رواية عشق ملوث بالخيانة كامله وحصريه بقلم اسراء ابراهيم
انتي بجد هتروحي يا اسيا ؟ طب وفريد طليقك ماهو اكيد هيكون هناك مش خطوبته؟
كانت بتتكلم نيرة اخت اسيا بقلق وهي واقفة وراها قدام المراية
اسيا بثقة / طبعا هروح يا نيرة ،،كفايا عشت سنة مبخرجش وكأني فعلا مذنبة ،، لكن من انهاردة مش هخاف تاني وهواجه اي حد
اسيا بسخرية / هيقوله ايه يعني اكتر من اللي قالوه ،، هيقوله اني بج*حة ؟ واني خا*ينة عادي قالو كتير قبل كدة
نيرة باندفاع/ يا اسيا الناس ليها الظاهر واللي حصل وقتها مكنش هين عشان الناس تنساه بسهولة ولا ان فريد يغفره
اسيا بغضب ودموعها بتنزل / الناس ؟ الناس دول معليهمش لوم يا نيرة عشان ميعروفنيش لكن اللي بتتكلمي عليهم دول اهلي ؟ عارفة يعني ايه اهلك ؟ عيلتي اللي المفروض تدافع عني ولو شافتني بعنيها تكدب عينيها وتصدقني ،، يمكن فريد ابن عمي مو*جعنيش اكتر منهم ،،فريد انا منكرش اني حبيته بس من وقت ما صدق عني الكلام اللي سمعه وهو خلاص انتهي من حياتي
نيرة باندفاع / كدابة يا اسيا ،، لانك رايحة دلوقتي عشانه ،،عشان عرفتي انه هيخطب
اسيا بسخرية/ لا يا نيرة ،، انا رايحة عشان ابين براءتي قدام الكل ووقتها بس هحس اني كرامتي رجعتلي
نيرة بشك/ انتي تقصدي ايه ؟ وتبيني براءتك ازاي ؟ اسيا انتي ناوية علي ايه بالظبط
اسيا بتنهيدة/ كل خير يا نيرة ،، ها هتروحي معايا ولا خايفة من باقي العيلة ،، صدقيني لو مش حابة تيجي مش هزعل منك
نيرة بثقة / انتي هبلة يا اسيا ،، علي اساس اني هسيبك يعني تروحي لوحدك ،، لا طبعا معاكي وربنا يستر
اسيا بتفكير / خير يا حبيبتي خير متقلقيش
......................................
كان واقف فريد سرحان وهو في القاعة بتاعة الخطوبة لحد ما سمع صوت نوال امه من وراه
نوال باستغراب / في ايه يا فريد ،،مالك يا حبيبي ،، وواقف بعيد ليه كدة
فريد بجدية/ مفيش يا امي ،، بس يعني حاسس اني اتسرعت في الخطوة دي
نوال بتكشيرة/ نعم ،،، يعني ايه اتسرعت مش فاهمة ،، فريد اوعاك تكون لسة بتفكر في البت دي
فريد بجمود وهو بيقبض علي ايديه/ خلاص يا امي ،،مش كل شوية تفكريني بيها ،، قولتلك ان اللي بينا انتهي بدليل اني وافقت اخطب خلود بنت خالي
نوال بخبث / انت زعلت ليه ،،انا بهزر معاك وبشوف يعني لسة بتفكر فيها ولا لا ،، صدقني ده انت عين العقل اللي عملته وبكرة تقول امي قالت ان جوازتك دي بقي هتبقي جوازة الهنا ولو اني يعني كان نفسي تبقي دخلة علطول
فريد بجدية / قولتلك يا امي اني مش مستعد دلوقتي ،،انا مضغوط في شغلي وورايا حجات كتير
نوال بصدمة وهي بتبص ورا فريد/ يا نهارها اسووود ،،هي ليها عين تيجي بعد اللي حصل
بص فريد مكان ما امه بتبص واتفاجأ باسيا داخلة من باب القاعة فاتصدم وقبض علي ايديه بغضب
نوال بغضب / انا هروح اوريها مقامها ،،بنت جميلة
كانت داخلة اسيا بثقة ومعاها نيرة اختها اللي كانت مسانداها وواقفة في ضهرها وبتبص بغضب لاي حد يبص لاختها بنظرة شماتة واتهام لحد ما وصلو للترابيزة اللي قاعد عليها عمها مجدي ابو فريد وباقي العيلة
اسيا بثقة / ايه يا عمي مش هتقولي اتفضلي ،،مش كفايا اني متعزمتش في فرح ابن عمي
مجدي بغضب / ايه اللي جابك يا اسيا ،، عاوزة تعملي فضاي*ح تاني ايه اكتر من اللي عملتيه
اسيا بضحك/ لا يا عمي الفضاي*ح بجد لسة جاية متقلقش ،،ومش همشي من هنا قبل ما اتأكد انها حصلت
مجدي بحد*ة / عيب يا نيرة خدي اختك وامشو من هنا وكفاايا اللي حصل منها
اسيا بغضب / ايوووة ،،بمناسبة اللي حصل منها بقي هو فين ام العريس عشان الموضوع يخصها
نوال بغضب وصوت عالي / وكمان ليكي عين تيجي لحد هنا ،،ده انتي واحدة بج*حة .. وواحدة غيرك كان المفروض ميبقاش ليها عين انها تخرج ولا تحط وشها في وش حد
نيرة بتردد / يلا يا اسيا نمشي ،،مش قولتلك
اسيا بصوت عالي / لا منا جيت هنا انهاردة
عشان استغل الجمع الحلو ده واعرفهم مين اللي المفروض تتكسف علي دمها ومتوريش نفسها لحد ،، يا جماعة ،، نواال ،،مرات عمي واللي المفروض انها كانت حماتي استغلت ابنها وثقته فيها وانه بيصدقها في اي حاجة واتفقت مع العروسة ،،خلود بنت اخوها العروسة،، وعملتلي كمين وطلعتني خاي*نة !! كل ده عشان هي بتكر*هني وكانت عاوزة بنت اخوها لجوزي ،،جوزي اللي رمي عشرة اربع سنين في الارض ومشي ورا امه وصدق عني اني خا*ينة
فريد كان متابع اسيا بصدمة ومش متخيل اللي بتقوله وكان مصدوم زي الباقي بالظبط
نوال بتوتر/ كدب ،، انتي جاية بعد ما ابني رماكي بعد عملتك السودا وتهلفطي بالكلام عشان يرجعك ،،لا يا اسيا مش هيحصل وغوري من هنا
ضحكت اسيا بصوت عالي لدرجة ان الكل استغرب وبقو يبصو لبعض وبعدين وقفت ضحك وبصت ناحية فريد بقهرة والدموع في عينيها
اسيا بغضب / اهي دي الحاجة اللي مستحيل تحصل يا نوال ،، انا ابنك وقع من نظري من يوم ما صدق عني كل الكلام الكدب اللي اتبليتي عليا بيه ولعلمك كل الرسايل اللي اخدتي تليفوني وكتبتيها بايديكي وبعتيها للرقم اللي مع خلود انا لسة مخلياها زي ما هي ،،، عشان لو فكرت احن افتكر اللي عمله ابنك فيا واكر*هه اكتر
مجدي بغضب / وايه اللي يثبت انك علي حق يا بنت اخويا ،، مش يمكن زي ما نوال قالت جاية تلعبي علينا عشان تداري عملتك
اسيا بثقة / مش هقول الا لما تقولي هتعمل ايه يا عمي بعد ما تعرف الحقيقة ،، تفتكر هتعرف ترجعلي سمعتي اللي انت ومراتك وابنك دمر*توها ؟ ،، بس تعرف انا هقولك وهوريك دليل براءتي دلوقتي عشان الدنيا كلها تعرف قد ايه انتو ظلمتوني،، نيرة شغلي التسجيل
نيرة فتحت التسجيل اللي سمع صوت نوال العالي وهي بتكلم خلود وبتتفق معاها علي كل حاجة تحت نظرات الكل المصدومة ده غير اللي شفقان علي اسيا واللي عملته مرات عمها فيها واهمهم فريد اللي اتحولت نظراته من الصدمة للغضب من امه اللي دمر*ت حياته
اسيا بسخرية/ اعتقد كدة يا نوال عرفنا مين فينا اللي المفروض ميوريش وشه لحد وبالمناسبة ،، انا مش عاوزة اعرفكم تاني وخصوصا انت يا عمي ،، ياللي ابويا وصاك عليا قبل ما يموت وقالك تتقي الله فيا انت وابنك ،، يلا يا نيرة
خرجت اسيا مع نيرة بثقة وراسها مرفوعة بعد ما قالت كل حاجة ووضحت الحقيقة كلها وسابت الكل مصدوم ومش مستوعب اللي هي قالته وانها مظلومة وضحية حماتها
..............................................
بعد كام يوم كانت واقفة اسيا في المطبخ بتدندن وهي بتعمل الاكل لحد ما دخلت عليها نيرة
نيرة بابتسامة / يا سلام عالروقان ،،، ليكي نفس تعملي اكل وتغني وانتي قلبتي الفرح ميتم ،،انتي مش متخيلة انتي عملتي ايه ؟
اسيا بفخر / عارفة طبعا ،، عارفة اني اخدت حقي ورديت كرامتي وسمعتي قدام الدنيا كلها ،، انا من اليوم ده وانا خلاص قررت افتح صفحة جديدة في حياتي
نيرة بتردد / طب وفريد يا اسيا ،، ناوية تعملي معاه ايه ؟
اسيا بجمود / هعمل ايه ؟ هنساه طبعا ،، قولتلك اني هبدأ من جديد يا نيرة واللي فات همحيه باستيكة
نيرة بتلقائية/ بس فريد كان معذور يا اسيا ،، متنكريش انه ليه حق يصدق واي راجل مكانه هيكتشف ان مراته بتكلم راجل عالتليفون وفي بينهم رسايل حب وغرام هيعمل اكتر من كدة ،، انتي ليه متعذوريهوش
اسيا بغضب / لا يا نيرة مش هعذره ،، المفروض كان يصدقني ،، حتي لو شافني بعنيه ،، وانا بقي مش هسامحه ،،حتي لو جالي راكع ،،انا مش هفكر حتي فيه وقفلي بقي عالموضوع ده عصبتيني
نيرة بتنهيدة/ ماشي يا اسيا بس اعرفي ان المبدأ اللي بتتكلمي بيه ده غلط والمفروض تحطي نفسك مكانه ،، يلا انا هروح احضر السفرة
خرجت نيرة من المطبخ ووقتها اسيا سرحت في فريد ودموعها علي بتنزل علي خدها وبعدين مسحتهم بقوة ورجعت كملت اللي بتعمله
............................................
تاني يوم كانت نازلة اسيا من البيت وهي بتبص في ساعتها باستعجال بس فجأة وقفت مكانها بصدمة لما شافت فريد قدامها ،كان باين عليه التعب اوي والندم اكتر بس اسيا حاولت متتأثرش بشكله وكانت هتمشي بس هو وقفها بصوته
فريد بهدوء/ اسيا ،، لو سمحتي اسمعيني
اسيا بضحكة سخرية/ اسمعك ؟ ياااه ،،وانت كنت فين لما كنت واقفة قدامهم كلهم وبقولك اسمعني واديني فرصة ادافع عن نفسي ،، فاكر يا فريد وقتها انت قولتلي ايه ؟ فاكر انت رديت عليا بأيه ،، لو سمحت انا مش عاوزة افتكر حاجة ،، انا بس عاوزاك تسيبني في حالي ،،خليني بقي اداوي اللي حصلي منك
فريد بلهفة / طب اديني فرصة واحدة بس يا اسيا ،، لو فعلا ليا في قلبك ذرة حب ،،اديني فرصة وانا اوعدك اني اعوضك عن كل اللي حصلك ،، اديني فرصة يا اسيا
اسيا بقوة/ اسفة ،، بس وقت الفرص عدي ولاني خلاص اتخطبت وهتجوز
فريد بصدمة / تتتجوزي ؟ انتي بتقولي ايه ؟ هو مين وامتي وازاي ؟
اسيا بسخرية / هو مين ،، اعتقد ميهمكش ،،اما بقي امتي وازاي فمش هقولك غير ان البني ادم ده هو اللي صدقني ووقف جمبي في الوقت اللي كلكم اتخليتو فيه عني ،، هو الوحيد اللي قالي اني عمري ماا اصدق اللي بيتقال عنك ،، كان السند في وقت ما كنت لوحدي وهو الوحيد اللي يستاهل اني اكون ليه
فريد كان بيسمع اسيا وجواه بركان من الغضب والندم ،، كان بيبصلها بندم خلاها تهدا وتحس ان اللي قالته جاب نتيجة فسابته ومشيت وهي مش عارفة اذا كان تصرفها صح ولا غلط بس كل اللي تعرفه انها اخدت حقها وبردت نار*ها
...................................
انتي اتجننتي يا اسيا ،،ايه اللي خلاكي تقوليله كدة ؟
كان بيتكلم حمزة بانفعال وهو قاعد قدام اسيا في الكافيه بعد ما طلبت تقابله واسيا كانت سرحانة بعيد وهي بتفكر بحيرة
اسيا بحيرة/ معرفش ليه عملت كدة ،، ليه قولت حجات محصلتش ،، بس تقريباً كنت قاصدة او*جعه واحسسه بقيمة اللي هو معملوش معايا
حمزة بضيق / تقومي تقوليله انك اتخطبتي للراجل اللي اخترعتيه في خيالك ده ؟ انتي اكيد مجنونة
اسيا ببرود/ بس انا مكدبتش ،،انا قولت الحقيقة يا حمزة وبعدين هنروح بعيد ليه ما انت الراجل ده اهو ،، انا اصلا كنت بتكلم عنك ؟
حمزة بصدمة / لا بتهزري ؟ اسيا انتي واعية للي بتقوليه ؟ بت انتي انا خاطب وبحب خطيبتي واينعم يعني انتي زي القمر بس برضه انا بحب واحدة تانية
اسيا بضحك/ اهدي علي نفسك يا عم الشبح انت فهمت غلط ،، وبعدين انت تطول يا ولا ولا ايه ،، المهم انا اقصد انك ابن عمي برضه بس غير فريد ،،انت صدقتني وكنت معايا لحظة بلحظة ومصدقتش اللي اتقال عني وانا كنت بتكلم عنك مع فريد ولقيت نفسي بألف بقي حكاية الخطوبة دي عشان اخليه يتحسر
حمزة بجدية / طب بعيدا عن الهزار بقي يا اسيا ،، انا اه ابن عمك وفعلا كنت مصدقك ومش متخيل انك تعملي كدة ،، بس ده عشان انتي زي اختي ومش مجرد بنت عمي وخلاص ،، لكن لو انا مكان فريد فانا متأكد ان الوضع هيكون مختلف ،، صدقيني انا راجل زيه وبقولك الكلام ده عن ثقة ،، وقتها الراجل بيبقي عقله في حالة صدمة وكل اللي بيدور في باله ان الانسانة اللي امنتها علي شرفي واسمي وسمعتي خا*نتني ومش بيكون حتي في عقل ان الراجل يفكر
اسيا بغضب / انت بتدافع عنه عشان ابن عمك ،، لكن مش حاسس بيا انا ،،مراته اللي امنته علي نفسها حبته من كل قلبها ،،عموما يا حمزة لو مش هتكمل معايا للاخر عادي انا هشوف حد تاني وبرضه مش هسامحه وهكسر*ه زي ما كسر*ني واو*جعه زي ما و*جعني ،، يلا سلام
مشيت اسيا بغضب والدموع محبوسة في عنيها ومكنتش بترد علي حمزة اللي كان بينده عليها وكل تفكيرها ازاي تنت*قم وتطفي نا*رها من فريد وبس
.........................................
عدي فترة كان فريد فيها هيتجنن من بعد اخر مقابلة مع اسيا وكلامها ليه ،، كان بيكلمها كتير ومكنتش بترد عليه ودايما بتخالف مواعيدها اللي هو عارفها عشان متتقابلش بيه وانهاردة كان فرحان اوي لما عرف من ابوه انها هتيجي في تجمع العيلة اللي هو عامله وفعلا راح هناك وكان مستنيها بفارغ الصبر لحد ما الجرس ضر*ب ودخلت اسيا ومعاها حمزة ووقتها فريد كشر باستغراب لكنه معلقش
مجدي بفرحة/ اهلا ببنت الغالي ،، تعالي يا اسيا ،،تعالي يا حبيبتي
اسيا ببرود/ خير يا عمي ،،حضرتك طلبتني وانا عشان صلة الرحم والعيش والملح اللي بينا جيت
مجدي بأسف / انا يا بنتي طلبتك انهاردة وقدام العيلة كلها عشان اعتذرلك بشكل شخصي علي اللي حصل ،، اتمني تسامحينا وترجعي تاني وسطنا
اسيا بهدوء/ متشكرة يا عمي ،، بس انا للاسف مش هينفع ارجع تاني وسطكم لاني مش هقدر طول الوقت اتعامل عادي وانا من جوايا شايلة وده لاني اللي حصلي مش هين وكمان عشان خلاص اتخطبت وهتجوز حمزة
