رواية بنت ابليس الفصل التاسع 9 بقلم حياة محمد
بنت إبليس
حياة محمد
الجزء ٩
سيد: يعنى هتحتاج منى حوالى تلاته ونص مليون جنيه.أنا موافق تحب امتى نمضى العقود واكتب لك شيك بالمبلغ
سيد: وأنا جاهز.....
$$$$$$$$$$$٣٣٣$$$$
في الجامعة
حماده: أحلى كوبايتين كابتشينو بس متتعودوش على كده.
أمانى: إنت هتزلنا على الكابتشينو خلاص مش عايزين
زينب: من ده لا أنا عايزة يابنتى دى فرصه بتيجى في العمر مره لما حماده البخيل الجلده يعزمنا على حاجه
حماده: برضو يعنى أنا إللى عازمكوا وبرضوا مش عاجب.
عبد الرحيم: مش قلت لك مش هتخلص من تريقتهم.انا لو منك ارجع بالكابتشينوا
زينب: ترجع فين ده أنا أتجوزك حالا بكوبايه الكابتشينو دى وبعدين حماده حبيبي هيفهمنى محاضرة المحاسبة المالية إللى فاتتنى صح يا حموده يا قمر يا عسل يا سكر.
حماده: أنا كنت هقول لأ بس بعد الكلمتين الحلوين دول ماشى.
مريم: ليه توافق ماهى تحضر المحاضرة مش تروح تتفسح وتنبسط وانت إللى تشرح لها وتفهمها إللى بيفوتها
زينب: أعوذ بالله يا شيخه ربنا ما يجعلك من قطاعين الأرزاق وبعدين غيرانه ليه.
مريم: أصل حرام تبقى عايشه حياتك بالطول والعرض وفي الأخر تنجحى وتجيبى تقدير كمان.
فردت زينب كفها في وش مريم وقالت بصوت واضح: ومن شر النفاثات في العقد ومن شر حاسد إذا حسد.
مريم بغيظ: وأنا هحسدك على إيه.
زينب: على ذكاوتى طبعا غيرانه إنى بفهمها وهى طايره. الحمد لله ربنا مدينى ذكاء وعبقريه من أول مره بتثبت هنا (( وشاورت على مخها)) غيرى لو بيدوه المعلومات بالمعلقه مخها متربس برضو.
مريم: أصدك مين؟
زينب: إللى على راسه بطحه.
فادى: صباح الخير يا جماعه
أمانى: صباح الورد يا فادى
زينب بصوت واطي تسمعه أمانى بس: صباح التلزيق يا ملزق
خبطتها أمانى على كتفها بسرعه.
فادى: عن اذنكم عايز أمانى
قامت أمانى بسرعه وراحت معاه فنادتها زينب
زينب: هتطولى مع سى عنتر بتاعك فاضل على المحاضرة نص ساعة
أمانى: دارى عليا المره دى
زينب: مش ملاحظه إنك بتفوتى معظم المحاضرات بسبب سى فادى
أمانى: انا مش عارفه إنتى مش بتحبيه ليه مع إنه كيوت وكله رجوله ووسامه.
زينب: كفايه إنتى تحبيه بس مطوليش عشان أنا هروح على طول بعد المحاضرة مش هستناكى.
أمانى: عشان خاطري ساعه كمان.
زينب: يخرب عقلك المحاضرة ساعتين وساعه كمان إنتوا بتقولوا إيه في الوقت ده كله ده لو كان مقرر كان اتحفظ
أمانى: موتى بغيظك عشان مش لاقيه حد يحبك و يقولك كلام الحبيبه.
زينب بتريقه: مش لاقيه حد ملزق روحي روحي إلحقى بسلامته ليسيح منك في الشمس.
خرجت أمانى لسانها لزينب ومشيت.فى حين رجعت زينب للمحاضرة.
$$$$$$$$$$$$$$$$$$$$$$$
كانت رجاء بتزغرط وتوزع الشربات على الجيران
رجاء: ألف ألف مليون مبروك يا حبيبي أنا فرحانه لك أوي
يوسف: الله يبارك فيكي يا ماما
عبد الكريم: شوف يا يوسف الأستاذ مهاب ده مش أى حد ده سكرتير وكيل الوزارة وده مبيتوسطش لأى حد فعشان كده أنا عايزك ترفع راسى وتكون قد المسؤولية.
يوسف: إن شاء الله يا بابا
رجاء: إلا بجد انت هتاخد مرتب أد إيه ؟
يوسف: خمسمية جنيه ده الأساسي وبالحوافز والبدلات وكل حاجه هيبقى حوالى٨٧٦جنيه.
رجاء: ودول يعملوا ايه ؟
عبد الكريم: حلوين وبعدين متنسوش إن دى وظيفة حكومه وهى مرتبات الحكومه كده.
رجاء: بس دول مايكفوش يعنى لو عايز يفتح بيت ميكفوش إجار شقه ولا مصاريف بيت.
عبد الكريم: ده لسه في الاول وأكيد سنه والتانيه هيترقى ويبقى أكبر مهندس في مصر.
&&&&&&&&&&&&&&&&&&&
سيد: باركى لى يا زوبه.
زينب: ألف مبروك بس على إيه لقيتوا المبنى.
سيد: مبنى إيه احنا لقينا شركة كامله
زينب: لا والله
سيد: بتكلم بجد لقينا شركه معروضة للبيع صاحبها كبير في السن ومش هيقدر يتابعها وعايز يرتاح الباقي من عمره واحنا اشتريناها.
زينب: لا تكون شركه مفلسه وصاحبها بيتخلص منها.
سيد: حتى ولو احنا المستفادين الشركه كبيرة وفي موقع ممتاز في منطقه راقيه في مدينة نصر.والمعدات والعربيات حالتها ممتازه وبعدين احنا اخدناها بموظفينها يعنى هنبدأ الشغل على طول.
زينب: ألف مبروك طيب هتاخدنى اتفرج عليها امتى؟
سيد: وقت ما تحبى أنا هديكى العنوان وابقى تعالى.
زينب: ماشى بس كده انت هتنشغل بالشركه طب والمعارض والمحلات
سيد: لا انا مش فاضي للحاجات دى وانتى يازوبه يا شطوره هتباشرى المعارض مع المحلات
زينب: أباشر إيه يا بابا إنت بتهزر ده أنا تقريبا مبلحقش أرتاح شغل المحلات متعب أوى تزود عليهم المعارض كمان ده غير الجامعه ده حرام
سيد: طيب هعمل ايه ممكن أأجر المعارض أو.أبيعها لأنى مش هبقى فاضى
زينب: مش عارفه وبعدين أنا كمان مش هدنى في المحلات أنا عندى طموح وأحلام وأفكار وشغل المحلات بالنسبة لي حاجه مؤقته لحد ما أخلص جامعه.
سيد: طيب احنا لسه قدامنا اكتر من سنه ونص وبعدها على متخلصى الجامعه وبعدها نبقى نفكر ونشوف هنعمل ايه بس دلوقتي.هنعمل إيه في المعارض.
زينب: دلوقتي يا سيكا يا عسل هتسيب ليا المعارض وأنا هتصرف فيها.
سيد: طب ما أنا قلت كده من الأول.
زينب: لا يا حبيبي المحلات باخد مرتب شهري على إدارتها أما المعارض هاخد نص الأرباح
سيد: نااااااااااااااااااااعم نص إيه
زينب: نص الأرباااااح يعنى المكسب فيفتى فيفتى لك النص وليا النص.
سيد: كتير يا زوبه ٣٠٪ كفايه ده أنا غلبان وداخل على شغل كتير ومحتاج فلوس.
زينب ٥٠٪ مينقصوش ولا ١٪
سيد: ياسلام ما أنا أخلى أى حد يباشر المعارض وهياخد مرتب وخلاص
زينب: وماله براحتك بس ماليش دعوه لو خربت المعارض وبعدين فين صاحب شعار مندخلش حد بينا.يعرف سرنا على العموم براحتك بس لو ماوافقتش دلوقتي هينتهى مدة العرض ولو طلبت منى تانى أباشرهم هيبقى عرض جديد بشروط جديده ونسبه جديده.
سيد: أعوذ بالله منك زى المنشار طالع واكل نازل واكل.ماشى موافق
زينب: مبروك عليك أنا يا سيكوا يا عسل.خمس دقايق وأجهز العقد
سيد: عقد إيه
زينب: انت بابا أه بس الشغل شغل.
&&&&&&&&&&&&&&&&&&&&
في الجامعه
بسمه: بقولك يا زيزى الشله كلها هتروح السينما بالليل بيقولوا فيلم أحمد السقا الجديد يهبل هتيجى.
زينب: ماشى بس مين اللى هيدفع.
بسمه: جيبى من تحت البلاطه يا جلده.
زينب: أعوذ بالله يا شيخه ومن شر حاسد إذا حسد ماهى عنيكوا المدوره دى هيا إللى هتجيب أجلى ماشى يا ستى هعزمكم على السينما والفشار بس مسمعش سيرة فلوس ولا عزومه تانيه طول العمر سامعه انا بدفع مره واحده
حماده: ياااااا لأ وبتقول عليا أنا بخيل ده إنتى جلده.
أمانى إزيكوا يا جماعه
مريم: أهلا يا أمانى هتيجى معانا السينما ولا كالعادة.
أمانى بضيق: لأ يا ختى كالعادة
زينب: هي مالها الأخلاق قافله كده ليه مش المفروض تكون غزالتك رايقه والدنيا بمبى
أخدتها أمانى في جنب وقالت بضيق: زعلان ومتضايق منى
زينب: مين فادى أه أتاريكوا قعدت تحبوا في بعض ساعة واحدة اكيد اتحسدتوا.
أمانى: أنا بتكلم بجد مش ناقصه تريقتك.
زينب: وسى فادى زعلان ليه؟
أمانى: كان عايزنا نتعشى سوى وزعل لما قلت له مش هقدر
زينب: وزعل ليه إن شاء الله
أمانى بزعل: مفيش مره قال نحرج ولا نتفسح وقلت له ماشى إلا كله لا لا ومش هقدر من حقه يزعل
زينب: كسر حقه لأ ملوش حق لما يبقى يخطبك ويبقى يجى ويقول حقى لكن بيتشرط وبيزعل على إيه.
أمانى : احنا فين والخطوبه فين
زينب: وايه إللى مأخره إن شاء الله
أمانى: مش لما ظروفه تتحسن
زينب: إنتى هبله يا بت ظروف إيه دا بيجى راكب عربيه أد كده وبيفرتك كل يوم مبلغ وقدره غير السجاير الأجنبى إللى مبتفارقش جيبه .البركه في فلوس السيد الوالد.
أمانى: أبوه
زينب: أه ياستى بيشتغل في الإمارات من يجى عشرين سنة ومغرقهم في الدنانير والدراهم.حتى أخوه بيشتغل في مستشفى استثماري كبيرة أوى
أمانى: وانتى عرفتى ده كله منين
زينب: ماهو أنا اتقست وبحثت وعرفت عنه الكبيره قبل الصغيرة
أمانى: طيب برضوا كل كلامك محلش المشكله
زينب: عشان مفيش مشكله لما يبقى يخطبك يبقى يتشرط.
أمانى: واشمعنى أنا كل حاجه عندي لأ لأ لأ طب ما انتى أهو بتخرجى وبتسهرى وبتتفسحى وبتعملى كل اللى يعجبك ومفيش حاجه بتحصل لك.
زينب: يا اختى إنتى وضعك غير وضعى.وكل واحده ولها ظروفها.
أمانى: يا سلام وايه الفرق غير إن أهلى بيعشقوا التحكم ومكرهينى في عيشتى
زينب: مش للدرجه دى وبعدين الأهالى أوقات كتيره بيكون عندهم الحق.
أمانى: ياسلام
زينب: أه والله يعنى عندك بابا سايبنى على راحتى عشان عارف إنى مبجيش بالغصب يعنى هيغصبنى هعاند.وفى المقابل زاحمنى وهالكنى من الشغل معاه عشان ملحقش أبص جنبى. وبعدين أنا بخرج يوم اجازتى من الشغل يعنى يوم الخميس وبس.
أمانى: مش في الخروج الدخول بس لأ في حاجات كتيره زى اللبس والمكياج وكل حاجه
زينب: طب مانتى بتحطى مكياج في الجامعة وبتمسحيه في العربيه يعنى بتعملى إللى إنتى عايزاه بالرغم من تشدد أبوكى.
أمانى: سرقه وفي الدرا وبخاف أوى ليشوفنى أو يعرف إنى بحط مكياج
زينب: ياسلام يعنى هيزعق لك عشان الماكياج ومش هيزعق لك وانتى بتزوغى ساعين تلاته تحبى فيهم فادى
أمانى: برضوا فادى طلعيه من دماغك
زينب: هو مش في دماغى عشان أطلعه بقولك ايه.إيه رأيك نروح نكبس على بابا في الشركه الجديدة
أمانى : مينفعش أتأخر روحي إنتى وابقى احكيلي ولا أحسن وإبقى صورى كل حته بالموبايل.
زينب: يادى صورى هو كل حياتك صورى صورى امتى هتعملى إللى نفسك فيه.
&&&&&&&&&&&&&&&&&
كان سيد في مكتبه الكبير في الشركة وقدامه شويه عقود أخدها من أرشيف الشركه بيدرسها واتفاجأ لما دخلت زينب عليه المكتب وقالت بسعادة: ألف مبروك يا بابا الشركة حلوه أوى.
حضنها سيد في سعادة وقال: أهلا يا زوبه الله يبارك فيكي إيه رأيك عجبتك
زينب: أوى أوى بالرغم إنى شفت بس الوجهات وشويه مكاتب بس .
سيد: لا ده أنا هفرجك عليها حته حته تعالى
دخل عليهم سالم عمران شريك سيد في الشركه واتفاجأ بوجود بنت بتضحك مع شريكه فبص لها بتقيم واعجاب وقال: لاموأخذه مكنتش عارف إن معاك حد
سيد: حد مين تعالى اعرفك دى زينب بنتى
سالم: بنتك انا مكنتش اعرف إنك مخلف ملكه جمال.
زينب بكسوف:: مش للدرجه دى يا سالم بيه
سالم: واكتر الجمال الشرقى له سحره وجاذبيته وانتى بتدرسى إيه
سيد: زينب في تالته تجاره إنجلش.
سالم: ماشاءالله وشاكره
سيد: زينب دى هايله دى هيا إللى ماسكه كل شغلى ومحلاتى
سالم: يعنى مش بس جميله لا وذكيه
(( حس سيد بالضيق من كلام سالم لزينب))
زينب: المهم يا سيكا يا حبيبي أنا خلاص شفت الشركه بس مش ده السبب الوحيد لزيارتى الكريمه
سيد: فيه سبب تانى.
زينب: أكيد أنا مفلسه واطورت في عزومه الشله كلها فجيت لك يا حبيبي عشان تمونى
سيد: مفلسه إيه إنتى لسه قابضة مرتبك من يومين.!!!
زينب: لا يا حبيبي مرتبى ده مقابل مجهودى في الشغل و ده يخصنى لواحدى أما الفلوس إللى هاخدها ده والتزامك لى يعنى هتكون بابا ببلاش لازم تدفع.
خرج سيد محفظته وقال: بس أنا مش ملزوم بعزومة أصحابك بس يالل المرة دى بس احتفالا بالشركه الجديدة
أخدت زينب الفلوس وقالت: تسلم يا أبو الكرم وإن شاء الله ربنا يبارك لكم في الشركه وتقولوا وشى حلو عليكوا
سالم: فعلا وشك حلو أوى علينا والدليل إن جالنا أول مشروع هنشتغل فيه.
سيد: ياااااه بالسرعه دى.
سالم: ومش مشروع صغير ده مصنع كبير على مساحة ٢٠ ألف متر مربع وده هيكون بوابتنا للمشاريع العملاقه.
زينب: ألف مبروك يا بابا ألف مبروك يا سالم بيه.
سالم: يالا اتشطرى في دراستك عشان تشتغلى معانا في الشركه وظيفتك محجوزه من دلوقتي.
زينب: اكيد إن شاء الله يالا يا سيكا أنا هاشيه عشان متأخرش على أصحابى.
سيد: هتتأخرى.
زينب: لا هنروح السينما وبعدها نتعشى سوى وبس يعنى على ١١ وبينا تليفون.
سالم بفضول: وأصحابك بنات ولا...
زينب ببساطة: الإتنين.
وخرجت من الشركه
سالم: إزاى بتأمن على بنتك تسهر مع شباب لوقت متأخر
سيد: هيا مقالتش شباب بس قالت الإتنين وبعدين أنا عارف بنتى.
سالم: بس دى بنت وصغيرة وممكن أى حد يضحك عليها.
سيد: يبقى متعرفش بنتى دى ب١٠٠ راجل
سالم: يبقى إنت إللى متعرفش شباب الأيام دى ممكن يغدروا بالبنت ويضحكوا عليها وحيل الشباب ملهاش أخر
