رواية انا والشيطان الفصل الثالث 3
الحلقة الثالثة
ولسه بقعد وحطيت راسي علي ايديا وغمضت عنيا سمعت حد بيخبط علي الباب .استغربت جدا وفتحت عنيا وقولت ادخل .لكن مفيش حد دخل .
قومت فتحت الباب مش لقيت حد .رجعت قعدت تاني وبعدين لقيت ايد بتمسكني من رجلي .
جسمي اتنفض وببص تحت علي رجلي ......
حاولت اكمل الشفت بتاعي لكن من خوفي جسمي قعد يتنفض وحسيت ان جسمي ثلج .
اضطريت استأذن وامشي رغم ان الساعة كانت حوالي ٢ بعد نص الليل .حاول زمايلي الدكاترة ان حد فيهم يوصلني بعربيته لكن انا صممت اني اروح البيت لوحدي .
وفعلا خرجت وركبت تاكسي علشان اروح البيت .
ركبت العربية في الكرسي الخلفي لكن لاحظت ان سواق التاكسي كان بيبص كتير عليا في المرايا .
خوفت منه اوي خوفت انه يطمع فيا .خرجت موبايلي وعملت نفسي بكلم حد وكأنه جوزي وفضلت اوصفله الشوارع اللي التاكسي ماشي فيها علشان السواق يخاف و يوصلني علطول .
وفعلا سواق التاكسي وصلني لحد البيت والحمد لله .
طلعت البيت كانت امي نايمه .غيرت هدومي ودخلت اوضتي علشان انام .
بعد ما نمت علي سريري واتغطيت لاني كنت بردانه جدا .لكن حسيت اني عاوزه ادخل الحمام .وياريتني ما كنت قومت من سريري .....
قومت ونورت نور الحمام ودخلت وبمجرد ما قفلت الباب وقعدت نور الحمام اطفا وسمعت صوت صراخ جامد جدا .
حاولت افتح الباب لكن مش عارفة .والغريب اني حاولت احسس علي الباب علشان امسك اوكرة الباب وافتحه ولكن الغريب اني بقيت مش لاقية الباب نفسه وكأنه بقي حيطة .
بقيت بلف في الحمام زي المجنونة وبعيط واصرخ علشان مش لاقيه الباب .وفجأة ..... سمعت صوت ماما وهي بتخبط علي باب الحمام وبتقولي افتحي يا هالة .
حاولت افتح و بقيت متلخبطة ومش لاقية الباب وعاوزة اخرج ومش عارفة .
ماما من برة الحمام قعدت تستعيذ بالله من الشيطان الرجيم .
وانا وقفت شوية وحاولت اهدي نفسي وبعدين مديت ايدي علي الباب وفتحته وخرجت .
الغريبة ان النور مش كان قاطع ولكن اطفا في الحمام بس .
ماما اخدتني في حضنها وفضلت تقرا عليا قران كتير وانا بعيط لحد ما بدأت اهدا فعلا الحمد لله .
ماما سألتني ايه اللي حصل .رديت عليها وحكيت لها اللي حصل بالظبط.
ماما قالتلي طيب ازاي النور انطفي في الحمام بس .
ولما بصينا تاني علي لمبة الحمام عرفنا انها اتحرقت وان العيب كان منها .
لكن انا فضلت مستغربة ازاي مش كنت لاقية باب الحمام علشان افتحه واخرج . وكمان سألت ماما عن صوت الصراخ اللي كنت سمعاه .لكن ماما قالت انها مش سمعت الا صوت صراخي وعياطي انا بس .
بعد اللي حصل ده خوفت ادخل انام في اوضتي لوحدي ودخلت نمت في حضن ماما وهي فضلت واخداني في حضنها وبتقرا عليا قران لحد ما نمت .
وانا نايمه شوفت ان نور الشقة كله انقطع وكنت قاعدة لوحدي ولما حاولت ادور علي شمعة لقيت في في حد خارج من الحمام من ورا ستارة بيضا كبيرة وماسك شمعة في ايده .
خوفت منه جدا وسألته انت مين ؟ رد عليا وقالي انا حبيبك انا نصيبك .قولتله لكن انا مش اعرفك .عرفني انت مين ؟ قالي ازاي مش تعرفيني ؟ انا اعرفك من زمان اوي وبحبك من زمان اوي .
قولتله وعاوز مني ايه ؟ قالي عاوز افضل جنبك وقريب منك .قولتله لا ابعد عني انا مش عاوزاك .قالي ابدا عمري ما هبعد عنك انا هفضل معاكي علطول .
حاول يقرب ليا لكن انا حاولت اجري منه .ولما جريت قرب مني اوي وكان خلاص هيمسكني لكن ....الحمد لله صحيت من النوم .
صحيت من النوم مفزوعة وبصرخ .ماما قامت هي كمان مفزوعة علي صراخي وبعد ما هدأتني قالتلي مش هينفع كده يا هالة لازم تروحي تكشفي .
قولتلها اروح اكشف ايه يا ماما ؟ قالتلي معرفش بس لازم تكشفي .اما اني اشوفلك شيخ كويس يشوف ايه اللي بيحصلك ده .
تتبع.
