رواية انا والشيطان الفصل الرابع 4
الحلقة الرابعة
أنا والشيطان
صحيت من النوم مفزوعة وبصرخ .ماما قامت هي كمان مفزوعة علي صراخي وبعد ما هدأتني قالتلي مش هينفع كده يا هالة لازم تروحي تكشفي .
قولتلها اروح اكشف ايه يا ماما ؟ قالتلي معرفش بس لازم تكشفي .اما اني اشوفلك شيخ كويس يشوف ايه اللي بيحصلك ده .
نمت تاني من التعب وصحيت الصبح وكانت ماما بتتكلم في التليفون مع خالتي وسمعتها بتحكي ليها اللي بيحصل معايا الايام دي .
وبعد ما قفلت معاها قولتلها ليه يا ماما حكيتي لخالتي ؟ قالتلي انها حكيت لها لانها كانت محتارة مش عارفه تتصرف ازاي .وان خالتي قالت لها علي راجل مبروك ومحترم جدا ومش دجال ولا حاجة اسمه عم مندور .
سألت ماما مين عم مندور ده ؟ قالتلي معرفة خالتك وساكن في الحي بتاعها ومعروف جدا بعم مندور اللي بيفك الاعمال والسحور .
في اليوم ده مش روحت الشغل وبعد المغرب ماما اخدتني وروحنا لخالتي وكانت خالتي زعلانه عليا اوي وقالتلي متخافيش عم مندور ده هيفك اي عمل او سحر معمولك وهتمشي من عنده وانتي مشكلتك محلولة بأذن الله .
نزلنا وروحنا لعم مندور .دخلنا بيت شكله غريب من بره .والاغرب لما دخلنا جوه البيت .
البيت كان عبارة عن دورين بس .وتحس من منظر البيت انه مفيش حد عايش فيه .
اول ما دخلنا مدخل البيت كان البيت منور وكان في صوت قران كريم شغال .
بدأت اطمن شوية ودخلت انا وخالتي وامي ورنيت جرس الباب فتح لنا راجل كبير في اواخر الخمسينات دقنه بيضا ولابس طاقية بيضا وجلابية .
الراجل بصلنا وابتسم وقالنا اتفضلوا .
عم مندور كان شكله وابتسامته مريحة .لكن نظرة عينه كان فيها شئ
عم مندور قالنا اتفضلوا اقعدوا . وبعدين قالي : انتي صاحبة المشكلة ؟
قولتله : ايوه .
قالي : بصي يا هالة يا بنتي .
اول ما سمعته بينطق اسمي اتخضيت وخوفت وسألت نفسي هو عرف اسمي منين ؟
عم مندور كمل وقالي : انتي بتشتكي ان في حاجات بتضيع منك كتير وبتدوخي عليها وبعد ما تيأسي انك تلاقيها بتلاقيها في مكان تاني خالص .
رديت وقولتله : ايوه فعلا ده بيحصل .
كمل عم مندور وحكالنا علي الحاجات اللي بحس بيها والاحلام اللي بشوفها. وبعدين سألني : ظهرلك او شوفتيه ؟
قولتله : هو مين ؟
قالي : اللي بيضايقك وبيعمل معاكي الحاجات دي .
قولتله : لا .
قالي : ولا حتي في المنام ؟
قولتله : ظهر مره في المنام بس كان ورا ستارة بيضا .
سألني : عاشرك ؟
قولتله : يعني اي ؟
قالي : زي اي زوجين .
خوفت اوي وقولتله : يا نهار اسود .هو ممكن يحصل كده ؟
عم مندور ابتسم بسيط وقالي متخافيش يا بنتي .ان شاء الله مش هيحصل ومشكلتك هتتحل علطول بأذن الله .
قولت له : يا عم الشيخ انا لحد دلوقتي مش عارفة اي هي مشكلتي ؟
عم مندور قالي : مشكلتك يا بنتي اسمها الجن العاشق .
قولتله يعني اي؟
قالي يعني في جن عاشقك وبيحبك وهو اللي بيعمل معاكي الحاجات دي .
قولتله : ولما هو بيحبني بيخوفني ليه ؟
قالي : هو بيلعب معاكي ومش عاوز يخوفك .لكن هو مش عارف يلعب معاكي ازاي من غير ما يخوفك .
قولتله : طب والحل ايه ؟
قالي : خليكي قاعدة مكانك وغمضي عنيكي .
وبعدين جاب كرسي وقعد قدامي وحط ايده علي راسي وفضل يقرا قران وبعدين سمعته بيقول كلام كتير مش مفهوم .
بعدها سمعت صوت كاسات العصير بتخبط عليها .
بعد كده عم مندور بدأ يتكلم معاه لكن احنا كنا سامعين صوت عم مندور بس .
بعدين عم مندور قام وقعد بعيد وقالي احنا لازم نعمل جلسة تانية بعد يومين وقالنا علي حاجات نشتريها بخور وطيور بمواصفات معينة ونجيبها معانا المرة الجاية واحنا رايحين عنده .
خرجنا انا وماما وخالتي من عند عم مندور وكنا بفكر في الكلام اللي قاله .
خالتي سألتنا ايه رأيكم في عم مندور ؟
ماما قالتلها باين عليه راجل طيب ومبروك فعلا .ربنا يجعل الشفا علي ايديه .
خالتي لما لاقتني ساكته سألتني : وانتي ايه رأيك فيه يا هالة يا بنتي ؟
قولتلها : الصراحه يا خالتي هو شكله راجل فاهم كويس في شغله لكن هو فيه حاجه غامضة مش مفهومة قالقاني شوية .ومش قادرة احدد اذا كان راجل كويس ولا نصاب ودجال .
خالتي لما سمعتني بقول كده وشها اتغير وقالتلي بقه كده بردو يا هالة !! بقه انا بردو هوديكي عند واحد نصاب !!
حاولت افهم خالتي اني مش اقصد الاساءة ليها لكن هي زعلت ومش اتكلمت معايا تاني لحد ما سابتنا وطلعت بيتها واحنا روحنا بيتنا .
طلعت انا وماما واتعشينا مع بعض وقعدنا نتكلم شوية في الموضوع ده وحاولت ماما تقنعني بأن الراجل ده كويس وان اكيد ربنا هيكتب لي الشفا والراحة علي ايديه .
ماما كانت تعبانه من المشوار ومن قلة النوم في الليلة اللي قبلها علشان كده كانت بتنام واحنا قاعدين .وبعدين قالتلي يلا يا هالة تعالي نامي جنبي .
قولتلها لا ادخلي انتي نامي وانا هدخل انام في اوضتي .
فعلا ماما دخلت تنام وانا مسكت الموبايل قولت اتسلي شوية قبل ما انام لان مش كان جايلي نوم .
وبعد حوالي نص سأعة دخلت علشان انام علي سريري .
خوفت اقفل باب الاوضة وسبته مفتوح وسبت نور الصالة منور من الخوف .
مفيش ثواني عنيا غمضت لكن لقيت نفسي بفتح عنيا تاني كانت الاوضة كلها ضلمة كأن الكهرباء قطعت لدرجة اني مش كنت شايفة كف ايدي .
بعدين حسيت بصوت هزهزة وحاجة بتزن وحسيت ان في حاجة بتتحرك في الاوضه لكن مش شايفاه .
حاولت اقوم من علي السرير لكن حسيت بأيدين مسكت رجليا الاتنين !!!
حاولت اصرخ علشان ماما تيجي تلحقني لكن صوتي مش كان طالع خالص .
بعدها لقين الايدين دي بتفتح رجليا الاتنين وتبعدهم عن بعض وبعدين رجليا اتربطت في حاجة ومش قدرت احركها ابدا من مكانها .
تتبع.
