رواية جذبني جمالها الفصل الثاني عشر12 بقلم حسناء رمضان
.jpg)
بصلها وهو ساكت بس قطع نظراته صوت صريخ واحده ست
صوت الصريخ كان جاي من ناحية البيت اللي جنبهم
اول ماوقفوا قدام البيت لقوا دخان كتير طالع من جوا وفي نار
كسر الباب ولسه هيدخل
عمر: بيان خليكي بره
بيان: لا يعمر في نار متدخلش
سابها ودخل وسط النار وهي واقفه بره والناس ابتدت تتلم ع الصوت
غاب شويه و طلع وهو شايلها ومغمى عليها
الناس اتدخلت وطفوا النار وعمر فضل يحاول يصحيها لحد مافاقت والنار طفت
عمر خدها بيته
عمر: انتي كويسه!، تحبي نروح المستشفى!
ـ لا انا كويسه
مامتها: اتفضلي يابنتي اشربي مايه
عمر: الحمدلله النار طفت، بس تاخدي بالك بعد كدا
ـ مش عارفه ايه اللي حصل، كنت نايمه وسمعت صوت حاجه فرقعت، صحيت لقيت الاوضه بتولع
عمر: طيب مفيش حد عايش معاكي؟
ـ لا مفيش، عايشه لوحدي
مامتها: ومامتك فين يابنتي؟
ـ اهلي كلهم مسافرين ياطنط
عمر: في حاجه غير ايدك اتحرقت؟
ـ لا لا مفيش
عمر: طيب بيان لو سمحتي هاتي علبة الاسعافات من اوضتي
بيان: ماشي
دخلت اوضته وهي متكدره
بيان في نفسها: بيان لو سمحتي هاتي علبة الاسعافات من اوضتي، جاتك نيله انت وهي وانتوا شبه بعض اصلا، نينينني، دي حته مش مكسوفه من نفسها وهي قاعده بهدوم النوم قدامه، طبعا، مانت راجل وغد حقير زي الباقيين، اكيد الموضوع على هواك، مفيش فيكوا حد يتقي الله، ياخي كلكوا كدا، طيب حتى ياخي دي مفهاش حاجه يتبصلها، كفايه انها شبه علبة التونه، وقال ايه، طالع شايلها، ياخي يشيلوك من وراكك ياخي، وبعدين هو دا حرق دا، ولا هي مرقعه وخلاص عشان تمسك ايديها، ااه منكوا يرجاله، اعععععع، انت، انت جيت امتى
بصت وراها لقته واقف وحاطط ايده في وسطه راحت صوتت
بيان: احم، اانت، انت هنا من امتى
عمر بضحكه بيحاول يداريها: من ساعة وراكي اللي هيشيلوني منها
ميل فتح الدرج وخد علبة الاسعافات وطلع
بيان في نفسها: يافضيحتي هيقول ايه دلوقتي اووووف
خرجت وراه لقته قعد جنبها وبيحطلها مرهم على ايديها
ربعت ايديها ووقف تتفرج عليهم، حاولت تعمل نفسها طبيعيه عشان كفايه اللي سمعه منها، بس مقدرتش، ملامحها قالت اكتر من اللي هي قالته جوا، مركزه على ايديه وهو بيلمسها، بدأت تهز رجلها في الارض وهو خد باله وابتسم بخفه بس مبصلهاش
مامتها دخلت تعملها حاجه تشربها
عمر: الف سلامه عليكي
ـ الله يسلمك
عمر: اسمك ايه
ـ اسمي فريده
عمر: طبيعي تكوني فريده والله
بيان برقتله من رده عليها قدامهم وابتدت تفرك في ايديها جامد
بيان: ااه، اسمك حلو يفريده، حلو قوي
فريده: وانت اسمك ايه
بيان اتغاظت اكتر لما سألت عن اسمه
عمر: اسمي عمر
فريده: حلو
عمر: والله؟، محدش قالي قبل كدا ان اسمي حلو
فريده: ازاي، اسمك حلو قوي، وكمان مش اسمك بس
بيان؛ احم احم، حمدلله ع السلامه يامدام فريده
فريده: انسه
بيان: ايه دا فعلا؟، مش باين عليكي خالص
فريده: قصدك ايه
بيان: فكرتك متجوزه ومخلفه كمان
فريده: هو في واحده في جسمي تبقى مخلفه؟، تيجي ازاي دي!
بيان: لا فعلا مش باين عليكي
عمر: لا بالعكس، شكلك حلو جدا، حتى يمكن اصغر من سنك، ولو انها غريبه انك تكوني مش متجوزه، الرجاله عمت ولا ايه
بيان بدون وعي: عمررر
الاتنين بصولها باستغراب من نبرة صوتها وملامحها
بيان: احم، اا، الوقت اتأخر، هدخل انام
فريده: طيب هستأذن انا، ومتشكره جدا على اللي عملته معايا، مش عارفه لو مكنتش موجود كنت هعمل ايه
عمر: لا دا واجبي، بس خلي بالك بعد كدا
فريده: حاضر، عن اذنك
خرج معاها وصلها بيتها وبعدين رجع البيت
مامتها: دانا صحيت قلبي مخلوع من صوت صويتها
عمر: ااه، الحمدلله ربنا ستر
مامتها: هدخل انام يابني محتاج حاجه!
عمر: لا متشكر تصبحي على خير
مامتها: وانت من اهله
دخلت نامت وهو دخل بلكونة اوضته، بص جنبه لمح بيان اللي قاعده وسانده دماغها
فضل باصصلها وهي سرحانه مش واخده بالها منه
عمر: القمر غايب النهارده
بيان: هاا، ااه
عمر: ااه ايه
بيان: كان هنا من شويه
عمر: وراح فين
بيان: راح بيته، كنت عايزه يبات معاك؟
عمر: والله اتمنى، معنديش مانع
بيان: اماال، هتفرق ايه عن غيرك، كلكوا صنف واحد
عمر: كلنا مين
بيان: الرجاله
عمر: طب وانا عملت ايه، انا بتكلم ع القمر
بيان: ااه مانا كمان ع القمر
ابتسم وبص قدامه
عمر: بتعرفي تعومي؟
بيان: ليه
عمر: بسأل
بيان: معرفش ايه المغزى من السؤال الثعباني دا، بس ااه، بعرف اعوم
عمر: ثعباني!
بيان: ااه
عمر: ليه هستغل الموضوع في ايه، هغرقك مثلا؟
بيان: ممكن، ليه لا، اضمنك منين انا
عمر: لا متقلقيش، كنت هقولك نتسابق مثلا
بيان: في العوم؟
عمر: ااه
بيان: بتعرف!
عمر: نجرب!
بيان: بس ازاي، وفين
عمر: البحر كله قدامك
بيان: والناس اللي رايحه جايه دي
عمر: اامم، دي مشكلتك يعني، طيب ايه رأيك هلاقيلك مكان كويس
بيان: والله كدا كدا معروف مين هيكسب، بس للاسف عندي مذاكره
عمر: قولي كدا بقى
بيان: كدا ازاي، انت بتشكك في قدراتي؟
عمر: لا طبعا
جتلها مسدج ع الفون، بصت فيها وركزت كام ثانيه وعمر باصصلها
فونها رن وهي فضلت باصه وهي ساكته وعمر فضوله زاد
عمر: في حاجه؟
بيان: لا خالص، انا هدخل انام، تصبح على خير
عمر: وانتي من اهله
تاني يوم صحت بدري على صوت كحة عمر
طلعت بره لقته لسه ف اوضته وعمال يكح، دخلت المطبخ تعمل حاجه تشربها وهو دخل عليها وهو بيقفل زراير القميص، اول ماشافته لفت وشها
عمر: انا اسف، مكنتش اعرف انك صحيتي دلوقتي
بيان: صحيت على صوتك
عمر: صوتي!
بيان: بتكح كتير
عمر: مش بإيدي والله
بيان: اكيد برد، بتلبس خفيف والجو برد
عمر: مفرقتش
بيان: تشرب شاي معايا؟
عمر: لا متشكر انا خارج
بيان: خارج رايح فين، قصدي يعني لسه بدري قوي و..
عمر: عندي مشوار
بيان: طيب ينفع تاخدني معاك، يعني محتاجه اروح مشواري ضروري، بعدها روح انت مشوارك وابقى تعالى خدني، لو سمحت
عمر: قصدك اسيبك هناك وامشي!
بيان: ااه
عمر: لا صعب
بيان: صدقني مش هيحصل حاجه، طب بص، وديني مشواري وهي كلها ساعه ورجعني وانت روح مشوارك، عشان خاطري
عمر: امم، ماشي بس بشرط
بيان: ايه هو
عمر: مش هسيبك ثانيه واحده، هفضل معاكي لحد ماتخلصي، بعدها هجيبك هنا وانا امشي
بيان: طيب امري لله
عمر: يلا ادخلي بلغي مامتك والبسي
ـــــــــــــــــــــــــــــــــــــــــــــــــــــــــــــــ
حرم المنياوي: متقلقش ياحبيبي هتخرج من هنا
كرم: ماما لو سمحتي انا مش عايز اتسجن، اتصرفي ارجوكي
حرم المنياوي: متقلقش يعمري محدش هيقدر يعملك حاجه، لو رست اني اهربك هعمل كدا
المنياوي: ولما انت خايف كدا بتعمل كدا ليه، كل ماجي الم الموضوع من ناحيه الاقيك بوظته من الناحيه التانيه
كرم: اعمل ايه يعني، كنت عايزني اعدي اللي عمر عمله دا بالساهل!، دا مسح بكرامتي الارض قدام الجامعه كلها، متخيل شكلي كان عامل ازاي
المنياوي: عشان انت قليل الادب، انا حذرتك كتير ياكرم، مش كفايه الانتخابات اللي ضيعتها مني انت واخوك؟
كرم: وانا مالي، روح قول الكلام دا لعمر، مش هو اللي كل همه ينصر البت دي عليا؟، معرفش انا عملتله ايه عشان يكرهني كدا
حرم المنياوي: لا مش بيكرهك ياحبيبي، هو صحيح غلطان لانه لازم يقف معاك في كل الاوقات، بس مش بيكرهك دا اخوك
كرم: ااه، اخويا يضربني ويهيني كدا قدام الناس، ويخليني اعتذر لواحده متسواش
المنياوي: خلاص خلاص، المهم دلوقتي تهدى شويه لحد ماتصرف
ـــــــــــــــــــــــــــــــــــــــــــــــــــــــــــــــ
عمر: لمين الحاجات دي
بيان: لو سمحت، انا شرطت عليك لو هتيجي معايا يبقى متتدخلش في اي حاجه، ماشي!
عمر: امم، ماشي ياست
ركبوا العربيه وهي قعدت توصفله الطريق
بيان: بس اقف هنا
عمر: هتعملي ايه هنا
بيان: وبعدين!
عمر: المكان غريب، بتيجي هنا تعملي ايه، وايه الحاجات دي انا عايز افهم
بيان: استاذ عمر، عمر بيه، عمر باشا، ينفع تخليك في نفسك؟
عمر: لا
بيان: ماهو انا مينفعش اقولك، مش كفايه جبتك معايا!
عمر: جبتيني معاكي فين، انا اللي جايبك
بيان: مفرقتش
عمر: لا فرقت، وبعدين المكان غريب وهادي، مش هقدر اسيبك تدخلي هنا لوحدك
بيان: مفيش حاجه هتحصل، الناس اللي هنا طيبه جدا، مش زي اخوك
عمر: بيان لو سمحتي قوليلي في ايه، انا عاطي مامتك وعد اني هحافظ عليكي
بيان: وانا مش هقدر اقولك، اعذرني لو سمحت
عمر: طيب، اتفضلي بسرعه
نزلت وخدت الحاجه معاها ودخلت الشارع وخبطت ع الباب
عمر بيحاول يطولها بنظره ويعرف مين اللي جوا
فتحت الباب طفله صغيره، اول ماشافت بيان اترسم على وشها علامات الفرحه وطلعت تجري عليها حضنتها
البنت: بيان؟؟، وحشتيني قوي
بيان: وانتي كمان، مارو فين
مروان: انا اهو
حضنته وسلمت عليهم وعمر واقف متابعهم وساند ع العربيه بتاعته
لقى واحده ست خرجتلها وسلموا ع بعض
بيان: اتفضلي، معلش سامحيني اتأخرت عليكي، بس والله عندي ظروف
ـ حبيبتي ولا يهمك كتر خيرك
بيان: يلا محتاجين حاجه؟
ـ الهي يرزقك ويفتحها في وشك قادر ياكريم، ربنا يحرسك يابنتي ويحفظك، اقعدي اشربي حاجه
بيان: لا معلش عشان معايا حد، مره تانيه
ـ والله ابدا، لازم تدخلي، نادي عليه ييجي
بيان: لا طب عشان الحلفاه هاتي مايه عشان مستعجله والله
دخلت جوا تجيبلها المايه وعمر واقف مش فاهم حاجه
مروان: بيبو بيبو
بيان: ايه ياحبيبي
مروان: في لحمه صح؟
ميلت قعدته قدامه ع الارض
بيان: طبعا، في لحمه وفراخ وكل حاجه قولتلي عليها المره اللي فاتت جبتها
مروان: الله، انا بستناكي مخصوص عشان عارف المره اللي هتيجي فيها يبقى هناكل لحمه
بيان: يلا فين البوسه بتاعتي
خلصت معاهم ورجعت لعمر اللي متابعهم من بدري، لقته باصصلها من تحت النضاره بطريقه غريبه
بيان؛ في ايه
عمر: مفيش
بيان: طب يلا
عمر: يلا
ركبوا العربيه ونزلوا المكان التاني
عمر: برضو مينفعش انزل!
بيان: بالظبط
خدت باقي الحاجه ونزلت خبطت ع الباب وطلعلها الشيخ عثمان
الشيخ عثمان: نور
بيان: ايه دا ايه دا، بتشم ريحتي ولا ايه
الشيخ عثمان: لا بحس بيكي، كنتي فين يابنتي ايه الغيبه الطويله دي
بيان: سامحني ياعمي والله غصب عني، كان عندي بلاوي متلتله والله
الشيخ عثمان: طب ادخلي، ادخلي يابنتي نتكلم جوا
دخلت قعدت وطلعت الاكل وبدأت تحكيله وهي بتأكله
ــــــــــــــــــــــــــــــــــــــــــــــــــــــــــــــ
في المطبخ
تقى: مصحتنيش ليه يماما اروح معاها
مامتها: تروحي معاها فين انتي كمان
تقى: مش راحت مع عمر!، كنت هروح معاهم
مامتها: مش رايحين يتفسحوا ياتقى، رايحين مشوار تبع الجامعه وراجعين
تقى: ماما ماما
مامتها وهي بتعمل الاكل: ايه
تقى: كنت عايزه اسأل على حاجه
مامتها: اسألي يا اخرة صبري
تقى: هو ينفع عمر يتجوز بيان؟
ـــــــــــــــــــــــــــــــــــــــــــــــــــــــــ
عدى وقت وعمر قلق عليها، او الاصح مقدرش يقاوم فضوله عايز يعرف هي بتعمل ايه جوا كل دا
مشي بخطوات بطيئه ناحية البيت لقى الباب موارب
حاول يبص جوا البيت عشان يشوفها، لقاها قاعده ع الارض وقدامهم اكل وبتأكل راجل كبير في السن بدقن بيضا، وبتتكلم وهو بيسمعلها بإنصات
حاول يسمع هي بتقوله ايه بس غصب عنه كح وهي بصت وراها لقته واقف
ادته نظره بعينيها ورجعت كلمت الشيخ عثمان
بيان: اعذرني ياعمي لازم امشي عشان معايا حد
الشيخ عثمان: مين دا، خليه ييجي
بيان: لا لا معلش، مره تانيه بس هو عشان مستعجل، الاكل الباقي اهو جنبك وكل حاجه متوضبه
الشيخ عثمان: ماشي يابنتي ربنا يحفظك، وزي ماقولتلك تخلي بالك كويس
بيان: حاضر يعمو، ادعيلي بالله
الشيخ عثمان: هو انا عندي غيرك عشان ادعيله، ربنا يابنتي يحفظك وينورلك طريقك ويبعتلك اللي يصونك ويحافظ عليكي
ـــــــــــــــــــــــــــــــــــــــــــــــــــــــــــــــ
في العربيه
بيان: انا قولت ايه؟
عمر: انتي اللي طولتي اعمل ايه!
بيان: بس انا قولتلك اني هطول
عمر: انا مش عارف انتي متضايقه ليه، هو انا دخلت كلت معاكوا!
بيان: يخفه، وبعدين مكملتش نص ساعه
عمر: بقولك ايه، هو مين دا
بيان: ليه
عمر: بسأل
بيان: متسألش، ويلا عشان متتأخرش على مشوارك
عمر: ماشي، ماشي يبيان
ساد بينهم الصمت اللي قطعه صوت عمر
عمر: تحبي تروحي ولا تيجي معايا؟
بيان: اروح معاك فين
عمر: يعني رايح اصيع
بيان: تصيع!
عمر: اه
بيان: ودا ازاي بقى، اي نوع من انواع الصياعه
عمر: لا صياعتي مختلفه شويه
بيان: مختلفه ازاي يعني
عمر: تحبي تشوفي؟
بيان: اشوف ايه
عمر: الصياعه
بيان: ازاي
عمر: اقولك
بعد نص ساعه وصلوا المكان، عمر نزل من العربيه وطلع شنطة الضهر بتاعته لبسها وقفل العربيه
عمر: يلا
بيان: ايه دا
عمر: ايه
بيان: ايه المكان دا
عمر: مش بتحبي تغامري!
بيان: بحب ااه
عمر: طب يلا، اتمنى يكون قلبك جامد
بيان: جامد، بس هي دي غابه؟
عمر: شايفه ايه
بيان بصوت واطي: فيها حيوانات؟
عمر: كل حاجه
بيان: تعابين!
عمر: كل حاجه
بيان: عقارب!
عمر: كل حاجه
بيان: ايه اصله دا، جايبني هنا ليه، انت مجنون!
عمر: لا اله الا الله، مش قولتي اجي معاك!، ومش قولتي قلبك جامد!، ومش قولتي بتحبي المغامرات!
بيان: ااه قولت، بس كدا انت عايز تموتني
عمر: اموتك ليه
بيان: امال جايبني هنا ليه، وبعدين ايه المغامره في مكان زي دا
عمر: والله ي انسه بيان هي دي مغامراتي، وقولتلك تحبي تجربي قولتي ااه
بيان: طيب روحني
عمر: يفتح الله
بيان: نعم
عمر: انا بقول الحاجه مره واحده، وسألتك تروحي ولا تيجي معايا قولتي تيجي معايا، يبقى زي الشاطره كدا تيجي معايا وانتي ساكته، او تركبي العربيه وتستني فيها
بيان: بتحطني قدام الامر الواقع يعني
عمر: مظبوط
بيان: طيب بص، روحني عشان اعملك البشاميل
عمر: مامتك بتعملها
بيان: اووف، طب انت ترضهالي اني اقعد في العربيه في المكان المقطوع دا لوحدي؟
عمر: ااه عادي
بيان: يبايخ انا مش بهزر
حط شنطته ع جنب وبدأ يغيره هدومه
بيان لفت وشها وهي بتصوت
بيان: بتعمل ايه يامنحط انت
عمر: بغير
بيان: انت مجنون والله
عمر: لفي خلصت
بيان: على فكره انت انسان غير آدمي
عمر: وااو، آدمي مره واحده
بيان: اجل
عمر: وعارفه معناها؟
بيان: مش بقولك بايخ، عمر لو سمحت روحني
عمر: بصي، لو خدتك عشان اروحك يعني هضيع وقت كتير لحد مارجع هنا تاني، مش كفايه انك اخرتيني اصلا بحاجاتك دي، ودلوقتي مش عايز صداع، هتيجي معايا ولا تقعدي جوا العربيه واقفل عليكي لحد ماطلع!
بيان: لا هقعد ياخويا، وبعدين صحيح، افرض مخرجتش من جوا، هعمل ايه انا، هروح ازاي
عمر: ايه دا ثانيه واحده، انتي هامك هتروحي ازاي ومش هامك اني مخرجتش اصلا!
بيان: وانا مالي، انا قولتلك متدخلش وانت اللي عايز، اتحمل المسؤولية بقى
عمر: دي نداله؟
بيان: ايوون
عمر: طيب بصي انا احتمال اطول، لو زهقتي وحبيتي تروحي معاكي العربيه، ومتقلقيش، سواء بتعرفي تسوقي او لا مش هتعرفي تطلعي من هنا لاننا تقريبا في الغابه ومفيش حاجه مضمونه
بيان: انت اهبل!
عمر: ايه!
بيان: ماهو دا ميطلعش من حد عاقل، انت مجنون بجد
عمر: بقولك ايه، انتي كلتي دماغي انا ماشي
بيان: طب استنى استنى، طب ماهو يعمر مش هعرف اقعد هنا لوحدي
عمر: خلاص ادخلي معايا
بيان: لا العمر مش بعزقه
عمر: خلاص خليكي هنا
بيان: ماهو هنا العمر مش بعزقه برضو
عمر: خلاص تعالي معايا
بيان: مش بقولك خفه، ينفع تاخد كلامي جد شويه؟
عمر: هما دول الحلين، اختاري منهم وانجزي عشان ضيعتي وقتي
بيان: هقعد في العربيه وامري لله
قعدت جوا العربيه وقفلتعلى نفسها وهو بصلها وابتسم ابتسامه جانبيه قلقتها اكتر، كان لابس شورت لحد الركبه وتيشرت كت وفي ودنه السماعه
دخل جوا وهي فضلت مراقباه لحد ماختفى من قدامها
طلعت فونها لعبت فيه شويه عشان تضيع وقت
حاجه خربشت بره العربيه بس هي طنشت
شويه وحاجه خبطت جامد
بلعت ريقها وكملت تقليب في الفون
شويه وسمعت صوت غريب
بيان: لا بقى، لا بجد كدا كتير
كل شويه الصوت بيزيد وهي بتخاف اكتر
فضلت لحد ماحاجه خبطت في العربيه جامد وهي صوتت
فضلت تقرا قران وتقول اذكار
بيان: هو عفريت؟، لا برضو الاذكار حلوه، لا ماهو مش هينصرف، طب اعمل ايه دلوقتي، انزل!، وتعرضي نفسك للخطر ياغبيه؟، طب اعمل دلوقتي، ياريتني روحت معاه، ع الاقل لو حصل حاجه كان هيتصرف، وهي يعني رجوله يسيبك كدا لوحدك!، صح، عندك حق، دي مش رجوله خالص، دي نداله، طب، ايه دا، انا بكلم نفسي!
عمر كان ماشي بيدندن، وهو بيتفرج ع الاشجار
بص جنبه لقى بيان جنبه وبتنهج
ابتسم وبص قدامه تاني
بيان: اقف ياعم انت شويه
وقف وبصلها من غير مايرد عليها
بيان: انت شايف ان دي رجوله؟
عمر: ااه
بيان: جاتك هوا
عمر: بت، انا سايبك تغطلي فيا من بدري، صدقيني لو غلطتي فيا تاني هسيبك هنا
بيان: ماهو انت مش عارف اللي حصل، سمعت اصوات غريبه، جيت جري الحمدلله اني لحقتك، بس انت مبعدتش يعني
جتلها لحظة ادراك
بيان: عمر
عمر: ايه
بيان: انت اللي كنت بتعمل الاصوات دي، صح!
عمر: لا
بيان: عمر
عمر: انتي عبيطه!، مانا ماشي قدامك، لحقت ارجع امتى، وليه هعمل كدا
بيان: معرفش، امال ايه الاصوات دي
عمر: بصي حواليكي كدا!، انتي في غابه
بيان: ااه مانا خدت بالي
عمر: مدخلتيش غابه قبل كدا؟
بيان: لا، عمري
عمر: ولا كان نفسك تجربي؟
بيان: يعني، كنت عايزه اعرف في ايه جواها وكدا، بس مجربتش
عمر: ودلوقتي؟
بيان: دلوقتي ايه
عمر: واثقه فيا ؟
