رواية ملائكة بالف وجه كاملة بقلم اروي طاهر المسلاتي
(مقدمه)
ندى: جسمي كان مرمي على الارض كأني جثه ....الدم يلي كنت حاسه بطعمته في فمي الباين انه كان مغطي كل وجهي 
الضلام كان مستمر حتى بعد مافتحت عيوني !
خديت دقايق باش استوعبت ان انا وعيت حركت يديا وتحرك معاهم سرب من السلاسل الحديديه قمت يدي المكبله وحطيتها على وجهي لمست كيس من القماش يلي كان مغطي راسي
حاولت ناخد نفس خفيف من تحت الكيس يلي كنت مربوطه فيه
وحاولت نسترجع الاحداث وندكر ...... شن الشي يلي صار ووصلني لي هادي الحاله؟
انا وين؟
—————————————————————————
في بلاد تبعد علينا ايام وساعات الثلج كان مغطيها اللون الابيض في كل مكان عاطيها منضر كأنها جنه
من بين كل اللبيوت والاكواخ فيه روشن صغيرون 
واقفه وراه بنت عمرها مفاتش 17 السنه لابسه ماليه صوف كبيره مغطيه كل جسمها
مش طالع منها غير يديها الصغيرونات وكان لونهم احمر من الصقع
فتحت الروشن وسكرت عيونها وهيا تاخد في نفس ومبتسه
قاطعها صوت عياط
زينب:وهيا تسكر في الروشن بقوه وعلامات الغضب على وجها ......الف مره نقووولك الصقع مش باهي ليك خصوصا في شهور حملك الاخيره مش وقت مرض وبرده ابدااااا
ريحانه:يديها شابكتهم في بعض وتحكي بتوتر .......تعبتتت انا 8شهور مطلعتش برا الشقه ومكلمتش حد ع الاقل نتنفس من الروشن شويه مش جريمه
زينب:خدت نفس بملل ....... اسمعيني كويس ومعش بنعاوده الكلام هادا كل شويه
انا وضيفتي هنايا ندير بالي عليك لين تجيبي الزفت يلي في بطنك مش نخليك على حل شعرك
عندك الحق لو صار شي لقدر الله انا يلي بنتعاقب من اهلك مش انتي
ريحانه:استبدلت ملامح الغضب يلي في وجها بي توسل وقالت بصوت هادي ومسالم .... به يا زينب
اوكي تمام والله برا غرفتي مش رح نطلع والروشن مش قارباته لو تبي
زينب:قامت حاجبها وتراجي فيها تكمل كلامها ......اي؟
ريحانه :عطيني تالفونك نستخدم النت 5دقايق منطولش والله نوعدك منديرش ولا شي غبي
زينب:والله مافي غبي غيرك بجديات .....خليك هاديه احسن ما نكلم بوك شخصيا يتصرف معاك وقتها تعرفي كويس شن رح يصير .....وطلعت وسكرت وراها الباب
ريحانه:انهاااااارت وكسرت كل العطور والزيوت والتحف يلي كانت فوق الزيانه وهيا تعيط.....قرررررررفت ياربي من ها العيشه تعبتتتت تعببببت
وكملت انهيار على الارض وهيا تبكي ودموعها زي المطر
حطت يدها على بطنها وكلامها يطلع من بين شهقات البكي ......مفيش ام في الدنيا هادي تكره ولدها زي ما رح نكرهك انت
ضربت بطنها بيدها وهيا تبكي.....الله ياخدك الله ياخدك من قبل حتى ما تجي دمرتلي حياتي
زينب:كانت واقفه تتفرج عليها من طرف الباب يلي مسكراتاش كويس .......قعدت واقفه تراقب فيها لين كملت ريحانه نوبة الانهيار يلي جتها
سكرت الباب بي احكام وقالت بصوت خفيف.........ربي يخلصني منك انتي وعيلتك يلي خدمت عندهم سنين في اقرب وقت ..........
ـــــــــــــــــــــــــــــــــــــــــــــــــــ
نجمه:ضايعه بين الشوارع داكرتي مفيهاش ولا اي شخص ممكن انه يساعدني بعد ما الكل تخلى عليا !
وجهي اصفر شاحب كأني ميته شفايفي كانت زرقاء من الصقع بسببب النعمه يلي مذقتهاش ليا 3 ايام
واقفه وحيده وسط الشارع مفيش حد غير انا وشوية حبات مطر كأنها مواساة من ربي ليا
لانه الوحيد يلي يعرف اني منستاهلش يلي قاعد يصير فيا !
فتحت يدها طلعت مفتاح قديم مصدي ........رفعت عيونها وشافت للعماره الطوووويله يلي كانت قدامها
مسكت شنطت الضهر يلي كانت ماسكتها وركبت للعماره
.
وقفت قدام الشقه رقم 1 في الدور الثالث
فتحت الباب وحيها كان مهدود من التعب
خشت ولعت الضي وسكرت الباب .....تفحصت الشقه بعيونها بي استغراب والواضح ان اول مره تجي للمكان هادا
طاحت شنطتها من بين يديها
ورجليها معش قدرو يحملوها انهارت ع الارض وغمضت عيونها وهيا تدكر :-
خليل:- وجها احمممممر وعروق وجها باينات من الغضب مسك تالفونه .....مش رح نوسخ يديا بيك خلللليك
خليك في مكانك نعرف من نشكي فيك خلي الناس تعرف حقارتك
هيام: الصدمه باينه على وجها من قوتها مش قادره حتى ادافع على روحها !
نجمه:خشت عليهم الدار مستغربه ومش فاهمه شن قاعد يصير ! بصوت استغراب نادت..بابا!
هيام:ضحكت بصدمه.... هه شن قاعد تدوي انت شن المهزله هادي مستحيل تكون متهمني بي شي زي هادا !
خليل:بعنف.....علاش!!!!!!!!!!!
تبيني نكدب عيوني يا ست هانم !
والله ما رح نرحمك
هيام:طاحت عينها على نجمه توترت وزاد خوفها ........بنتي مفيش شي
سوء فهم وبوك جن زي العاده بري غرفتك تو نجيك
خليل:خليهاااا خليهاااا تشوف امها
هيام:فقدت اعصابها بنتك هادي يلي معندكش ذمه ولا ضمير كيف ترضى تخليها تشوف امها بي المنضر هادا كيف !
خليل:انتي يلي رضيتيه لي نفسك ورضيتي العار ليها طول عمرها
هيام:مصدومه .....شش ش شن قصدك ؟!
نجمه:فتحت عيونها من دكرياتها السيئه ومسحت دموعها بطرف يدها
رجعت سكرت عيونها بتعب
ورجعت الذكريات في مكان تاني 
هيام:وجها متورم بسبب كم ضربه وعيونها تاعبات من البكي لابسه ثياب الحبس......اسمعيني كويس نجمه
انتي مشاء الله عمرك 20 سنه ومعش صغيره
لازم تعرفي ان مستحيل حد يستقبلك من عمامك حبيبتي
نجمه:علاشّ!
ماما علاش انتي هنايا شن يلي قاعد يصير!
هيام:القضيه يلي فيها انا يابنتي قضيه شرف والاهون عليا نموت ولا نطلع بعد الفضيحه هادي قدام قبيلتي كلها حتى انتي حتى انتي مستحيل نخليك لان رح يقتلوك بي العرق
نجمه:توسعت عيونها بصدمه ........شني!
الشرطيه:هيا يا ابله خلاص تم وقتك
هيام:ترجف والتوتر ماليها مسحت دموعها ونضرات الجديه على وجها .......خودي هادا وخليه معاك وردي باااااالك تعطيه لي حد ولا تجيبي سيره عليه
نجمه :مدت يدها خدت مفتاح وورقه صغيره فيها عنواون
الشرطيه:اكتر من هكي معش نقدر نساعدك هيا نوضي
هيام:طلعت من جيها فلوس وعطتها لي الشرطيه بي الخفاء دقيقه بس!
الشرطيه: وخرت وعلى وجها علامات الانزعاج
نجمه:تشوف للمفتاح والورقه ..........شن هادا!
هيام:تحكي بجديه ومش مخليه لي العواطف مكان .....هادي شقه كاتبهولي جدك الله يرحمه لان بنته الوحيده واول ما خديتها كتبتها بي اسمك
تطلعي من هنايا على الشقه طول ردي بالك تمشي لي عمامك ومهما صار متخليهمش يقابلوك حتى بوك متجيبيلاش سيرة الشقه ابدا ومتخليشي يعرف اخبارك خليك مختفيا عليهم كلهممم
بري لي الشقه ورح تلقي كل شي مرتب غادي
نجمه :مكانتش مستوعبه ولا كلمه تجاهلت كل الكلام يلي حكاته امها وسألتها بخوف .........امتى بتطلعي؟!
لمعت عيون هيام وناضت تحضن في بنتها كأن اخر مره بتشوفها .........واخر كلمتين قالتهولها
هيام:ديري بالك ع نفسك وخليك قويه ومتوثقيش في حد حتى بوك
نجمه:وقفت وهيا شايفه امها تتباعد شوي شوي من عليها
خدتها الدكريات لي مكان تاني وذكرى اسوء من كل الدكريات يلي مرت عليها
لما عرفت ان امها انتحرت في الحبس قبل حتى ما يقدموها للمحكمه ...يتبع
يا ما في قصص بين ها البنات رح نعرفوها وقصص ميعرفهاش الا ربي
عائلات رح تنفضح قصصهم قدامنا وقصص رح تقعد ساترها ربي
لكل قصه اسبابها وضروفها وحكمتها نستفيدو فيها الحاجات يلي بتنفعنا بعيده علي الخيال يلي بيضرنا
