رواية ملائكة بالف وجه الفصل الثاني 2 بقلم اروي طاهر المسلاتي
باب حديدي كبير الصدى يلي مغطيه وصوته قوي لما انفتح يأكد قداش هوا قديم بخطوات ضخمه خش من الباب شخص لبسه وريحته وحتى هيئته مش مناسبه ابدا المكان يلي هوا واقف فيه!
يلي زي اناقته وهيبته مفروض مكانه في مكتب فخم او في منصب عالي!
ووقف وهوا يشوف لي ندى يلي كانت مربطه من كل مكان وطايحه ع الارض
غبرة الارض كانت مغطيه وجها ويديها وشوية جروح وكدمات على طرف عينها وفمها واضح انها من اثر المقاومه .......
ندى:رجعت فتحت عيونها من جديد بس المره هادي عرفت ان في حد نحا كيسة القماش يلي كانت على راسها واستبدلها بي طرف اسود يغطي عيونها بس حافضت على هدوئها وهيا تسمع في صوت رجلين يقربو بي اتجاها ...
وصوت باب ضخم تسكر وريحة شاهي قويه كأنه في سخان شاهي يغلي على النار
كانت بتتكلم وبتسأل هيا وين وعند منو وكيف وصلت هنايا لكن سبقها صوت زوز شباب يهدرزو
ياسين:قعمز على جذع الشجره طلع يديه من الجاكيت ومدهم على النار يدفي فيهم....تعرف الحاج واخد بدله رسميه فضيييعه
طارق:يولع في دخانه....علاش شنو المناسبه ؟
ياسين:والله علمي علمك مش عارف .......لكن تعرف لونها ازرق كحلي وفيها بطم دهبيات اطلع طووول
طارق:ضحك......تسلفها منه 
ياسين :هادا مناقص نطلع فيها زي الفلوس مش شايفه انت طول وعرض
طارق:هههههههههه
ندى:بكلمات متقطعه وتكلمت وهيا تتألم .......ااااه وو وين انا منو انتم ؟
ياسين:شاف لي طارق بي اهتمام اهو ناضت شنو توا ؟
طارق:قال مديرو شي لين يجي غضوا خليها تعبر على شعورها
ندى:سمعت كلامهم وقلبها بيطلع من الخوف بطريقه هستيريه تبكي وتتكلم....اطلقووووني حد يفكني خلوني نطلع من هنايا انا وييين
تحاول تفك نفسها بس كل ما تتحرك في الارض كانت الغبره تتحرك معاها وتغطي ملابسها ووجها ويديها
ياسين :ملامح التوتر بدت تبان على وجها ......هادي شن نديرلها تعيط بتفضحنا
طارق:بنبرة استهزاء....تي من بيسمعها تبي ساعه ونص في الطريق باش تلاقي كائن حي
ولا ناسي روحك وين !
ندى:سمعت ها الكلمتين وجن جنونها اكتر ......بدت تعيط بصوت عالي
طارق:ناض قرب منها ومسكها من يديها المكبلات بي الحديد .....قامها من ع الارض وعدلها خلاها تقعمز وهيا مستنده ع الحيط
ندى:وسط البكي .....بعد من عليا ياحيوان بعدددد
طارق رجع خطوتين للخلف......مفيش فايده من الجو يلي اديري فيه وسكريلي فمك بدون وجع راس باش لا انتي تتعبي ولا اتعبيني معاك
ندى:كتمت اصوات العياط وبدت تبكي بهدوء
طارق :يتمتم بصوت هادي ........ادعي ربي ميقتلكش الباقي ساهل
ندى:سمعت سيرة الموت .....وبدت الدكريات تتسلل لي داكرتها رغم الخوف من الموقف يلي هيا فيه !
لكن حرفيا ادكرت كل شي بتفاصيله ......بدت تعيط وتطلب في المساعده من اي حد قريب
لكن صوتها كان قوي هلبا ومزعج
طارق:سكري فمممممك
ندى:نوبة الهلع يلي صابتها مخلتهاش تسمع ولا اي كلمه واستمرت في البكي والعياط
طارق:فقد اعصابه من صوت عياطها العالي والمستفز ومسك قطعة الخشب يلي كانت جنبه وضربها ع راسها
ياسين:بخوف.........تي لاااااا شن درت انت
يقرب بسرعه على ندى يلي طاحت فاقده الوعي .......نوووضي انتي نكلم فيك نوضي يا بنت
شاف لي طارق بغضب......خيرك انت تبي تودرنا ولا شنو يا غبي
طارق:طاحت من يده قطعة الخشب وهوا مش عارف يلي داره شنو !وهل ماتت البنت ياترى ؟
ياسين:وجها احمممممر وهوا يشوف لي الدم يلي نزل من راسها ودار سرب
____________________________
فندق كبير الفخامه تلقاها موجوده في كل زاويه فيه داخله حديقه واسعه فيها مجموعه من الورود النادره
الارضيه الرخاميه والصالونات الراقيه والموضفين يلي كان لبس خدمتهم مرتب وجميل
وسط الفندق هادا كان في جناح ملكي خاص بي العرايس واعياد الميلاد وغيره من المناسبات
داخل هادا الجناح كان في عيون معبيه خوف حاولت تسيطر على نفسها لكن بعض الناس متقدرش تخبي خوفها
كفاح:قربت بي خوف وارتباك وهيا شابكه يديها في بعض ومش قادره توقف ع حيلها ......شيخه
شيخه:مسلمه وجها لي الكوافيرا ومفيش شي هامها غير ان يطلع مكياجها حلو ......نعم شنو
كفاح:ترددت كم مره قبل ما تحكي .......لو سمحتي اختي شويه بعد ادنك
الكوافيره:حاضر حبيبتي ......وبعدت بهدوء
شيخه:كفاح خيرك راهو العرس مزال عليه ساعتين بس خليها تكملي ولا انتي هنيتي ع روحك وبس
كفاح:بلعت ريقها بخوف ....ندى
شيخه:افففففف ندى قلها تراجي دورها نساوين خوتها اهم اهو انتي تميتي ومزال انا شويه
شافت لي روحها في المرايا .........قلها توتي روحها لي مرت خوها الجديده اشبح كيف تطلع تو مش مستريحتلها السلفه هادي ان شاء الله تطلع زيني انا وياك
كفاح: قاطعت كلامها .....ندى طلعت من الضهر ولعند توا مروحتش وتالفونها مسكر
شيخه:بعدم مبالاة ........كيف يعني ؟وين مشت هيا بضبط !
كفاح:وصوتها يرجف ......انا بعتتها قتلها تجيب الشي يلي اتفقنا عليه امس ليا وليك
شيخه :تبدلت ملامح وجها من وحده مش مهتمه بي اي شي غير مكياجها وتجهيزها لي نفسها
لي ملاح خوف ورعب
خبطت يديها الاثنين على وجها .......نهااااااري الاحرف انتي غبيه خلاص ملقيتيش من تبعتي الا ندى!
انتي عارفه خوتها لو مروحتش شنو ممكن يديرو فينا! رح نرجع انا وياك مطلقين بي صغارنا
وقفت وقعدت ماشيه جايه في نفس المكان بتوتر ورعب .....مزال ساعتين على عرس خوها
مروحتش شي طبيعي تكون هربت اكيد ردة فعلها بعد مارفض بوها يعطيها لي حبيب القلب
لالالا انا مدخليش معنديش استعداد ينجاب اسمي حتى 1%لا كفااااااح مستحيل بتخربيلي بيتي انتي ناسيه خوتها كيف؟تي كييييف كيف تنسي وانتي متزوجه واحد منهم
كفاح :تبكي وكل المكياج خرب وشيخه تشوفلها وسااااارحه بخوف
وفجآه بعد لحضات الصمت هادي والهدوء يدق الباب ......طق طق طق
شيخه :فزت من مكانها بخوف ....
كفاح:خبطت يديها على وجها .........حي عليااااا حي
شيخه:بلعت ريقها بتوتر .......اهدي بالك هيا روحت
كفاح: خدت نفس وملامح الامل انها ممكن ندى انت ع وجها
شيخه :بصوت يرجف ....منو؟
مفيش رد
شيخه:ندى؟
مفيش رد
شيخه فتحت الباب وتجمدت في مكانها لما شافت راجلها واقف قدامها
كانت لابس ومتأنق
نجم الدين:قام حاجبه بي استغراب .....من بيكون يعني جايكم
شيخه :اءء اءءء انا انا شي سألت بس لان لان انا كنت يعني حني نقصد نبدلو وهكي
نجم الدين:يشوفلها بي استغراب .....
شيخه:ضحكت باش تخفف توترها يلي كان واااضح .....خيرك تبي شي !
نجم الدين:وين ندى !
شيخه:زاد خوفها اكتر ......نننن نن ندى داخل تلبس في الحمام
نجم الدين:علاش لما نطق قلتي ندى؟
هيا طلعت ولا شنو
شيخه:بضحكه ...... هه تي لا مش عليك كنت نكلم في الارتست سألتني ع اسمها قتلها ندى
نجم الدين :بنضرات فيها الشك.........خشي جيبيلي منها مفتاح الخزنه بوي خلاه في شنطتها
شيخه:هربت عليها الخريطه وقلبها طاح من مكانه .....تتت ت ت تممم تمام دقيقه
وسكرت الباب في وجها
كفاح:يديها يرجفو بخوف .....خيره شن قال
شيخه :حاطه يدها عاى راسها .......يبي مفتاح الخزنه من اخته
انا كيف بنتصرف بعد ما كدبت وقتله داخل ؟
كفاح :اهوااااا......طلعت المفتاح من جزدان صغير كان موجود على السرير .....عطتهولي قبل ما تطلع قالت بالك يحتاجوه
شيخه:قربت على الباب فتحاته ........تفضل
غير مم م متقدرش تطلع توا
نجم الدين:قعد يشوف للمفتاح كأنه حاس بي شي
شيخه:تبي حاجه تانيه حبيبي؟
نجم الدين:حط المفتاح في جيبه .......الف مره نقولك الكلمه هادي معش تعاوديها
وعطاها بي الضهر ومشي
شيخه:بانت على وجها علامات خيبة الامل
سكرت الباب واول ما ادكرت المصيبه يلي هما فيها رجعت ملامح الخوف من جديد
ندى هيا البنت الموجوده في هلبا عائلات
رغم انها كانت بنت وحده بين 3 شباب ومن عائله خيرهم يعيش بلد
لكن للاسف الدلع ميعرفلهاش طريق !
طول عمرها عايشه بقوانين صارمه متقدرش تتخطاهم طلوعها وخشوشها ومشيها وجيها كل شي يحتاج موافقه واذن
خوف خوتها الشباب وبوها عليها كان مبالغ فيه
وديمه حاسين ان كل الناس طمعانين في اختهم من رزقهم وخيرهم وزينها يلي كان الكل يشهد بيه
مفيش صاحبات غير نساوين خوتها كفاح وشيخه يلي كل وحده عندها قصه اقوى من الثانيه
يعتبرو نساوين خوتها مقربين منها اكتر حتى من امها
لان شخصيه امها بي اختصار كانت جدا واعره
____________________________
زينب:كانت في قمة الاسترخاء فارده جسمها ع الكنبه ومشغله مسلسلها .....فزت من مكانها بعد ماشرين التالفون
قامت كلللل الماكلة يلي كانت على الطاوله ولبست اليونيفورم (الزي المخصص لي عاملات النضافه)وقامت شعرها بطرقه مرتبه وبسيطه
قعمزت بتوتر حطت التالفون قدامها وردت على مكالمة الفيديو
جميله:بنبرة غضب.........وييين انتي ؟علاش التأخير في الرد هادا
زينب:اسفه مدام كنت في المطبخ نحضر في وجبة ريحانه
جميله:خدت نفس وهيا تحاول تهدا ......وين هيا ؟
زينب:طلبت مني نعطيها تالون وانترنت ولما رفضت انهارت بكي وخليتها في الغرفه
جميله:بانت على وجها ملامح الضيق ....ردي بالك كويس منها خصوصا الايام هادي
ولادتها مزال عليها اسبوع بس منبيش يصيرلها مضاعفات
زينب:بي ابتسامه مزيفه......حاضر مدام ولا يهمك مراقبتها 24 ساعه ودايره بالي كويس على اكلها ونضافة ملابسها وتعقيم غرفتها
جميله:بأسلوب متكبر......امممم به كويس نوضي عيطيني نكلمها شوي
زينب:حاضر ......دقيقه
ريحانه:راقده على جنبها اليمين ويدها على بطنها .....عيونها كانت وارمة من البكي ومنفوخه
سارحه ونفس الذكريات على بالها تذكر في كل شي في كل كلمه وكل تصرف غبي دراته
اذكرت الغرور والتكبر يلي كان جزء من شخصيتها لسانها السليط مع اي حد مش عاجبها
اسلوبها الوقح يلي كان نتيجه لي تربايتها في حياة الرفاهيه يلي كانت عايشتها
ومن صغرها مع خوها كانت ريحانه عندامها وبوها هيا الصح مهما دارت من غلط
والشي هاداخلاها اسوء بنت ممكن تقابلها في حياتك
لكن لكل ضالم نهايه ولازم وللاسف كانت نهاية ريحانه قاسيه شوي عليها
نتيجه لي تصرفاتها المنحله وعدم مراقبة اهلها ليها ......حملت بي الحرام للاسف
تفاصيل حملها كيف ومن منو وشن بيصير كلها رح نكتشفوها شوي شوي
طق الباب بي ادب على غير العاده
وريحانه مهتمتش زي العاده
زينب: ريحانه امك على الخط فيديو .......ووجهتلها التالفون
ريحانه:ناضت قعمزت وتشوف لي امها
جميله:حاولت بقد ما تقدر تخلي ملامحها جامده ومتلينيش لي بنتها ......كيف الوضع عندك
ريحانه:سبقوها دموعها بي الكلام .........ماما نبي نروح
خلاص قرفت 9 شهور على ها الحال ماما بتركبني حاله نفسيه تعبت بالله عليك خلي بابا يحجزلي طياره في اسرع وقت معش قادره نتحمل
جميله:تمالكت نفسها وشافت لي بنتها بدون رد
ريحانه:ماما ردي نبي نرجع لي حياتي منبيشي يلي في بطني فهميني شن مخططين اديرو
جميله:مهتمتش لي بنتها وكلامها قامت عيانها لي للعامله وقالت بهدوء
جميله:متنسيش تعطيها فيتاميناتها في الوقت المحدد وكل شوي ديري عليها طله في غرفتها ......وسكرت الخط بدون اي كلمه زياده
ريحانه:كانت مصدومه من تصرف امها يلي كانت تلقى في حل لكل شي وديمه واقفه على بنتها في الخير كانت ام الشر !
رجعت تمددت ريحانه على السرير بدون اي كلمه
سمير:قلب الصفحه وبدون ما يحرك عيونه من الجريده ......الافضل انك معش تتواصلي معاها لو كل ما بيتسكر الخط بديري عزاء هنايا
جميله:وهيا تمسح في دموعها .......بنتي راهو مهما كان ومهما دارت تقعد بنتي
سمير:غريب
جميله:تجاهلت الكلمه يلي قالها راجلها وسكتت
سمير :حط الجريده على الطاوله يلي كانت يمينه.......شن قررتي اديري في الطفل يلي جايك في الطريق؟
جميله:اضايقت بشكل كبير وبصعوبه قالت .....منعرفش مفكرتش يستر الله
سمير:شافلها بشك وبنبرة سخريه تكلم.......ليك فوق من ال5 شهور وانتي تفكري ولعند توا معرفتيش شنو اديري!؟
جميله:ام الولد تبي حفيدها بي اي طريقه وعرضت عليا تاخده تربيه في احسن الضروف
سمير :بدون اهتمام ......يكون احسن يطلع الطفل هادا من حياتنا .....وبنسبه لي بنتك خليها تولد بس
واول ما تروح رح نربيها من اول وجديد
جميله:سكتت وداخلها اكتر شعور شعور فرح وخوف وحزن وتوتر
وكل شعور ليه سبب!
____________________________
نجمه:فتحت عيونها وناضت من على الارض بتعب
ناضت من نومه عمييييقه على الارض نتيجه لي بكاء انهك قلبها وعقلها
نحت جاكيتها ودارت دوره في الشقه يلي معمرهاش خشتها ولا تعلم ان الشقه البسيطه الحلوه هادي من نصيب امها
كانت الشقه جميله جدا صغيره مكونه من غرفتين وحمام ومطبخ بار يفتح على صاله صغيرونه
الارضيه من الخشب بلون جميل والديكور والفرش بين اللون الابيض والرمادي والاصفر الهادي
قعمزت دقايق تحاول تستوعب كيف رح تعيش بروحها ؟تستوعب انتحار امها وليش تبيها تبعد تماما على بوها واعمامها رغم انها مدارت ولا شي غلط
من وين بتصرف على نفسها ومنو بيحميها من الزمان والناس يلي مترحمش؟
بين كل هادي التساؤلات طاحت عينها على مصحف صغير في التركينه ......ادكرت الشي يلي كانت ادير فيه كل ما تحتار في شي او تكون مكسوره وناضت بسرعه من مكانها..
روايات أروى الطــــاهـــــــرالساعه1ونص في الليل:-
تسكرت قاعة المناسبات يلي في الفندق بعد ما ودعو كل الضيف وانتهت المناسبه علي خير
لكن في غرفه موجوده في الطابق الخامس كان الصمت قاتل والكل كان متوتر ومفيش حد قادر يحكي ويتكلم
النضرات يتبادلو فيها وهما يتسائلو بخوف شنو بيصير؟
الكل قاعد بي لبس العرس…
كسر الصمت هادا صوت واضح انه كاتم غضبه وماسك نفسه بسيف:-
فتحي:واقف على الروشن وعاطي الكل بي الضهر .......ردت؟
نجم الدين:سكر تالفونه وحطه في جيبه …لا يابوي من بكري نتصل ينادي ميردش حد وتوا سكرت تالفونها ...
فتحي:تلفت وهوا يشوف لي كناينه .....امتى اخر مره شفتوها؟
كفاح:انا ياعمييي انا شفتها في ال اء ء اا اننن
شيخه:قاطعتها .....اخر مره طلعت قالت تبي حد من ادارة الخدم يكويلها قفطانها ومنها معش رجعت ...
فتحي:شاف لي نجم الدين .....خوك عطل
نجم الدين :الفندق بعيد شوي ع حوش الولد ...طبيعي يعطل
قاطعه طقتين على الباب وانفتح
انور:السلام عليكم
فتحي :عيونه كانت تسأل قبل فمه .....شن صار ؟
انور شاف لي خوه وهوا ساكت
نجم الدين :هربت معاه؟مشت معاه ولا شني؟
انور:خدي نفس .....الباين لا لان الولد في الحوش من الصبح مطلعش و......
فتحى:و شنو!؟
انور:مريض هلبا ضارباته برده قويه مش قادر يقيم راسه من المخده معتقدش تكون هاربه معاه
فتحى:قعمز علي الكنبه يلي كانت وراه بي انهيار وعيونه في الارض ميبيش ولاده يشوفو الكسره يلي في عيونه !
انور:شاف لي خوه….توا شنو به؟ كيف نتصرفو
فتحي: بصوت عااااالي وصريخ …..انا يلي بنسألكم مش انتم بنتي ووووووين
معقوله عرس خوها يبدا ويكمل ولعند توا مش باينلها اثر؟؟؟
نساوينكم يلي كل وحده اغبى من الثانيه كيف تطلع اختكم من الفندق ومفيش حد منكم عنده علمممم
الكل كان موطي راسه في الارض
سواء كان ولاده ولا نساوينهم
فتحي:خدي نفس بعد ما فرغ طاقة الغضب يلي داخل
وقال بصوت هادي ….كل واحد ياخد مرته ويروح الحوش
انور:كيف يا بوي وندى بن……..
فتحي:قاطع كلامه……كلمتي تنسممممع
كل واحد يروح بي مرته وخوك العريس منبيشي يعرف ولا حاجه من يلي صار اليوم
نجم الدين :حاضر …..واشر لي شيخه بي عيونه بمعنى اطلعي
انور:هيا كفاح
كفاح:نزلت خمارها وقبل ما تطلع قربت منها شيخه وهيا تقول
شيخه:لو يقتلوووووك كلمه منك متطلعش
ردي بالك تودينا في داهيه وربي ما رح يسامحونا
نجم الدين ؛شيخخخخه
شيخه:نزلت خمارها ونضراتها لي كفاح كلها تحذير 
…
…—————————————————————————
نجمه:طلقت السلام من ركعتين الاستخاره يلي طلبت ربي فيهم يوريلها طريقها ويصبرها على كل ها المصايب يلي مليهاش دنب فيها ......
واول ما قامت سجادة الصلاة سمعت الباب يطق ......قلبها طاح وبدت ترجف من الخوف
واقفه مش فاهمه منو يلي ممكن يجيها لي الشقه ؟
الشقه يلي مفيش حد يعرفها على حسب كلام امها قبل ما تموت !
قربت خطوات بي اتجاه الباب ونبضات قلبها مسموعه من الخوف
خدت نفس وسمت بي اسم الله وفتحت الباب ......
قابلها صوت حنون من وجه ملائكي....اهلين يابنتي
نجمة:ردت بصوت مبحوح من البكي والتعب .........تفضلي !
كريمه:زادت ابتسامتها .....انتي بنت هيام صح ؟
نجمه:كأن حد صب عليها اميه سخونه والخوف دخل قلبها .....اءء لالا انا مش ...
كريمه:خشت وسكرت الباب بسرعه ونجمه تشوفلها ومش فاهمه يلي صاير
قاطع استغرابها كريمه وهيا تقول ..... بنتي انا وصتني امك غليك قبل ما يبلغ فيها بوك الله يسامحه
انا اسمي كريمه جارتكم ونسكن فوق الشقه متعك بزبط عندي 3 وليدات شباب وربي مرزقنيش بي بنيه وانا بنعتبرك بنتي
بندير بالي عليك وامك خلتلي مبلغ كل شهر نعطيك منه تصرفي بيه على روحك لين امك تروحلك بخير وسلامه
نجمه:سرحت شوي وهيا تقول في خاطرها .......الباين متعرفش ان امي توفت في السجن !
كريمه :يا بنتي معاي ؟....تسمعي فيا!؟
نجمه:بي ابتسامه طلعت بسيف وعيون منهكه جاوبتها ......اءء اي اي
بارك الله فيك بس انا كويسه ومش محتاجه حد صحيتي
كريمه :ابتسمت ......متقوليش هكي حبيبتي البلاد هادي صعب تعيش فيها بنيه بروحه صغيرونه زيك لا ام لا اب ولا شخص يحميها !
نجمه:شكرا لكن بجديات مش مستحقه حد صحيتي
كريمه:تنهدت ..........الباين انك تعبانه قاعده الله يلوم يلي يلومك بعد يلي صار
لا خوال ولا اب والعمام قتالين قتله ولو يحصلوك بتكوني اولهم
نجمه:على وجها علامات الدهشه.......كيف؟!!
شن تقصدي مفهمتش !
كريمه:ارتبكت وحست انها قالت شي غلط....بنيتي ارتاحي وانا فوق لو احتجتي شي تفضلي مرحبتين بيك
وطلعت بسرعه قبل ما تحصل في اي سؤال من اسئلة نجمه
تسكر الباب
ونجمه واقفه مصدومه بي بدلة الصلاة ......كلام كريمه على عمامها وبوها
وكلام امها وتحديرها من بوها وعمامها علاش!
خصوصا ان عاشت طول عمرها بينهم ومفيش اي مشاكل معاهم كيف كل شي ينقلب بين يوم وليله
تصبح امها توفيه في الحبس وهيا هاربه من بوها واعمامها شنو يلي قاعد يصير!؟
_______________________________
أحيانا تتغير قصص الناس من حياة هاديه لي حياة حتى في الافلام متصيرش
تتغير حياة الشخص بين يوم وليلة بسبب الاهل ومشاكلهم الغامضه زي ما صار لي نجمه
وتتغير بسبب مشكله كبيره تنهي حياتها حتى لو هيا مكانتش السبب فيها
بس احيانا تتغير بسبب بيبي !!!!!!
بيبي يجي على الدنيا ومصيره مش معروف
يتعب كل الناس معاه ويخرب بيوت وحياة ناس لمجرد انه جي لي الدنيا
__________________________
بعد 4ايام:_
حوش كبيير وجناناته واسعات والباين ان في شخص في العيله يحب الجنان هلبا ومهتم بي شكله اكتر من اي شي تاني في الحوش
رغم عدد الخدم المسؤلين على الجنان والسيارات الفخمه يلي مدرسه قدام الحوش
بس كان تصميم الحوش جدااا بسيييط
زي اي حوش تصادفه في اي شارع يشرح الصدر والنبتات يلي فيه عاطيين منضر خيالي
الشكل اللطيف يلي وصفناه خارج الحوش عكس داخله
لانه داخله كان بركان
بركان وميقدر حد يطفيه
داخل المطبخ:-
كفاح:اقسم بالله خلاص تعرفي رجليا مش حامليني 4 ايا وانور ياحليلي يصبر فيا تعرفي ومداير باله عليا تقول الهاربه اختي انا مش اخته
شيخه:سرحت وادكرت ليلتها الماضيه كيف فاتت.....بدت ملامح الحزن توضح عليها بدون ما تحس
كفاح :انتبهت لي سلفتها ورفت ان في شي مخليها تكون تعيسه والباين الشي هادا بينها وبين راجلها
لكن شيخه في كل مره تنكر الشي هادا وترفض ان تفتح قلبها
كفاح:هييي شيخه وين مشيتي خيرك؟
شيخه:وملامح الحزن عبت وجها .....نفكر في ندى حاسه بتأنيب الضمير لو صارلها شي مش رح نسامح نفسي
كفاح:حتى انا اقسم بالله لالا خلاص انا شكلي بنمشي نقلهم اني السبب وكنت نبيها ت.......
شيخه:سكرتلها فمها بيدها ........لالالالا الكلام هادا متعاوديشي حتى بينك وبين نفسك سكري السيره بي ادن الله تنحل ها القصه
كفاح:تنهدت بحسره وهيا نادمه....معقوله طول عمرها متطلعش من الحوش وعارفه قداش بوها وخوتها واعرين ويوم تحصل فرصه صغيره تهرب؟!
شيخه:العلم عند الله .....مرات البنت مخطوفه مش هاربه
كفاح:الخوف حاوطها من كل الجيهات .......مخطوفه؟!
شيخه:اففف منعرفش قلت مرات الله اعلم شنو يكون صايرلها .....
كفاح:ليها اربعه ايام يا شيخه وخوتها من كثر ما يدورو عليها الخبر انتشر بين الناس
شيخه:ضحكت بي هزوه تي راجلي المصون حط حتى مكافأة لي الشخص يلي يرجعها ومتبيش الناس تعرف !
كفاح:ياااارب يرد حماتي بخير وسلامه يارب
انور:خش عليهم للمطبخ ......كفاح حطيلي غداي
شيخه:غطت راسها .....شنو ياسلفي مفيش اخبارعلى وخيتك ؟
انور:قعمز على طاولة الاكل وتنهد بتعب ...... مفيش للاسف تشهدرنا بين الناس وكل واحد مطلع عليها قصه
خايف على بوي يصيرله شي بس من كثر حبه ليها
وراجلك حالف لو طلعت هاربه يجيبها ويقتلها
كفاح :حطت الغدا على الطاوله قدام راجلها ......
شيخه:ابتسمت .....نجم الدين طيب يقول هكي من خوفه على اخته بس
انور :وهوا ياكل ......مفروض انتي اكتر وحده عارفه الشر يلي فيه عاد ليك 3 سنين معاه بلاش نضحكو على بعض
كفاح: بنضرات صدمه .........انوووور عيب
انور :لاهي في الماكله .......مقلت شي غلط علاش الكدب وديمه تحاول تغطي عليه
شيخه:بلعت ريقها وعلامات الحزن على وجها ....وطلعت بدون ما تزيد ولا كلمه
كفاح:حرام عليك احرجتها عيب عليك
انور :ريحيني انتي التانيه تو حتى كلامي بتعلميني كيف نتكلم !
كفاح:سكتت والزعل مبين على وجها
انور ابتسم .......كفووووحتي بلاش البوز يلي ضربتيه هادا تعرفيني منقدرش على زعلك
كفاح: ابتسمت..الف مره نقولك معش تناديني كفوحتي شن الاسم هادا
انور :ضحك اهم شي ابتسمتي تعالي سايريني
كفاح:خلي نشوف شيخه حرام زعلت
انور:يتعب قلبي مع الحنيه انا يتعببببب
طلعت كفاح وهيا تضحك على راجلها يلي مش مسيب لحضه رومنسيه حتى وهما في اسوء الضروف
_________________________________
ريحانه:فتحت عيونها بتعب على صوت اجهزه وناس جنبها تحكي بي لغة مش فاهمه منها ولا اي كلمه
كانت الرؤيه عندها مضببه وشوي شوي بدت توضح واول حد شفاته كانت شغلاتها الخاصه
زينب:الف الحمدله على السلامه واخييييييرا
ريحانه:شن تحكي !؟
زينب:تحكي بي فرح جبتي ولد وامورك تمام
امك بعتتلي التداكر بكرا بيكتبولك خروج واول ما تطلعي من هنايا انا وياك على المطار طووول
ريحانه:والولد ؟
زينب:تنهد بيروح معانا امك من البدايه طالبه الولد
توا بعتت شخص من معار بوك يتم الاجرائات هنايا لانك تحت السن القانونيه باش ميصيرش تحقيق وشوشره زايده
ريحانه :سكتت وهيا سارحه في سقف الغرفه
خشت الممرضه وهيا حامله الطفل ومبتسمه وتحكي انه ولد قنين وصحته ممتازه بس ريحانه مكانتش ممتازه في الانجليزي ومش فاهمه ولا كلمه
وبدون مقدمات حطت البيبي بين يدين ريحانه وقالت كلمتين لي زينب وطلعت
زينب :قالت الممرضه هادا ولدك تبيك تشوفيه وحاولي ترضعيه هادا كان فيك حليب ولا كنهادا خليه تو نديروله شيشه
ريحانه :تشوف لي ولدها يلي كان يبكي
زينب:شرين تالفونها وطلعت من الغرفه تتكلم
ريحانه :تشوف لي ولدها وتبكي .....انت دمرتلي حياتي
كل شي انا فيه توا بسببك
البيبي كان يبكي بدون توقف
ريحانه :لفت يديها على رقبته بتخنقه والبيبي كان يزيد يبكي اكتر وهيا تخنق اكتر
————————————————————————————-
الساعه 11 في الليل:_
كانت نجمه كيف متماسكهنفسها بعد نوبة انهيار وبكي
خشت للمطبخ وملقتش ولا شي في الثلاجه ولا اي شي يخص التموين اصلا !
وبعد تفكير وتفكير لبست جاكيتها وركبت لي الشقه يلي فوقها
بتردد طقت الباب اكتر من مره
واخر شي قررت ترجع لي شقتها وان على الاغلب كانت فكره سيئه تجي هنايا
بس قبل ما تتحرك من مكانها انفتح باب الشقه
ويلي فتح الباب كان شاب واضح انه عمرها وسط العشرينات
اسمر وعيونه ونقشه على الاسود والباين من لبسته في السوريه البيضاء انه كيف كمل صلاته
نجمه:ارتبكت ومعرفتش شن تقول
تكلم الولد وسألها .....تفضلي؟
نجمه:جاوباته بصوت هاااادي ........ءءء انا انا نجمه جارتكم في الدور يلي قبل هادا
وامك جتني الصبح
الشاب تغيرت ملامح وجها لي غضببببب وكره غريب
ونجمه بعد شافت التحول هادا تجمدت في مكانها ولا حتى عرفت تكمل شنو كانت تحكي
قاطع الموقف المتوتر هادا صوت كريمه ......
كريمه:اهلا بي نجمه اهلا اهلا نورتي هادا ولدي يزن
يزن:شافلها بنضرة حقد مش مفهوم سببها وخش بدون مايتكلم
كريمه:تكلمت بسرعه وهيا تحاول تبرر تصرف ولدها ........هه سامحيني يابنتي هادا يزن بسلامته ميتأقلمش بسرعه مع الناس ديمه هكي
نجمه:ابتسمت ....ولا يهمك
جيتك نبي شويه مبلغ من يلي خلاته عندك ماما بنشري شوي حاجات للحوش خضراء واساسيات
كريمه :اي اي اكيد لحضه هي ....
________________________________
رغم ان الساعه كانت 11 لكن الشارع كان ضيه طاااافي
وفاضي مفيشي كثرت سيارات ومشي وجي وكان جو ملائم هلبا ناس من جنس الشياطين يرتكبو شي غلط بدون ماحد يحس عليهم !
درست سياره عاليه لونها اخضر داكن وكللل مرشها اسود من السماء
نزلو منها زوز شباب ملثمين وهما يشوفو للحوش يلي قدامهم
قربو للباب وحطو قدامه جثه كانت حالتها سيئه بدرجه كبيره
وركبو السياره ومشو وهما مخليين وراهم اثار العجل الضخمه ......يتبع
