رواية قصه من العالم الاخر الفصل الثاني 2 بقلم اسلام احمد
ابويا نده عليا ، خرجت من المطبخ وفي ايدي صينية القهوة ،
لما وصلت ليهم بصنية القهوة وبصيت للعريس الصينية وقعت من ايدي من الصدمة !! ،
قولت لنفسي معقولة اللي انا شايفاه دا ! ،
العريس طلع الشخص اللي بشوفه في الحلم ، ابويا وامي والعريس واهله وقفوا علي حيلهم وهما مستغربين لما الصينية وقعت مني ، ام العريس اتكلمت وقالت " مالك يا بنتي في ايه !!؟ " ، وامي قالت " مالك يا ندي " ، وابويا سأل نفس السؤال ، انا بقي مردتش علي اي حد فيهم ، لكن كنت باصة باندهاش وصدمة ناحية الشخص اللي بشوفه في الحلم ، اللي هو العريس اللي جاي يتقدملي ! ، دا ازاي يعني !! ، كنت باصة ناحيته و عقلي عاجز عن التفكير ، كنت بسأل نفسي وبقول هو انا لسه نايمة !؟ ، كلهم واقفين في صمت وبيبصوا لبعض حتي ابويا وامي ، ابويا اتكلم بابتسامة وقال " دلق القهوة خير يا جماعة " في اللحظة دي حصلت ذبذبة في النور و الكهربا بتاعت البيت، كلنا بصينا علي الاضاءة بتاعت النور باستغراب ، لسه ابويا " اتفضلوا اقعدوا " الكهربا قطعت خالص ، العريس واهله استئذنوا وقالوا انهم هيجوا وقت تاني بسبب ان الوقت مبقاش مناسب ، الغريب ان بعد ما العريس واهله مشيوا الكهربا جت علي طول ! ، امي قربت مني وقالت " ايه اللي حصل يا ندي !؟ الصينية والقهوة وقعت منك ليه لما شوفتي العريس واهله !؟ يا بنتي انا عايزة اطمن عليكي زي اخواتك " ، في اللحظة دي حسيت بدوخة جامدة وحاسة ان كل حاجة حواليا بتلف استئذنت امي و دخلت الاوضة بتعتي ، من شدة مانا مش قادرة اقف وفي حالة لا وعي نمت باللبس اللي كنت لابساه وياريتني مانمت ، شوفت نفسي انا والشخص الوسيم دا في الفرح بتاعنا وهو لابس البدلة وانا كنت لابسة الفستان ، كنا بنرقص ومبسوطين ، الشخص كان باصص ليا وبيبتسم ، فجاة لقيته بيبعد عني و في حاجة بتسحبوا لورا ، ولقيت في دخانة كتير حواليا كانت خارجة من الفستان اللي انا لابساه ، لما بصيت لقيت الفستان بتاعي النار مسكت فيه وبيتحرق من تحت ، فضلت اصرخ و استنجد محدش كان سامعني لا حياة لمن تنادي ، فجاة قومت من النوم من الكابوس اللي كان هيبقي السبب في موتي ، بس اللي كان مستنيني لما اقوم كان يخليني اقول يا ريتني ما قومت ، اللي شوفته كان مفزع
