رواية خدعتني بحبها الفصل الثاني 2 بقلم سلمي تامر
كرم بصراحه انا معجبه بيك وعارفه انك بتحبني..ايه رأيك نتجوز
كرم وقف يبصلها بصدمه وحس انه بيحلم
معقول بنت صاحب الشركة اللي بيشتغل فيها بتحبه هو!
البنت اللي وقع في حبها من اول نظرة و بيفضل يبصلها في السر وكل يوم حبها في قلبه بيزيد اعترفتله بإعجابها ليه النهارده!
حمحم واستعاد ثباته من تاني واتكلم بجدية
_انسة حبيبة انتِ فجأتيني بصراحه
مش فاهم يعني اعجبتي بيا امتى انتِ مش بتبصيلي حتى
رديت بكدب
_كرم انا عارفه انك مستغرب
بس صدقني انا اكتشفت اني معجبة بيك اوي وانك اكتر حد هينفع يكون شريك حياتي
_ايوه بس..بس احنا مختلفين تماماً..انا مستوايا مش زي مستواكي
ده غير ان حضرتك مخطوبة لسيف بيه ف مش فاهم عايزانا نتجوز ازاي
_انا اكتشفت اني مش بحب سيف..ومش شايفه غيرك
آخر جملة قالتها خليت قلبه دقاته تعلى وحس بفرحه كبيرة
معقول دعائه استجاب وطلعت بتحبه هو
ابتسم بسعادة وحبيبة لاحظت ده وابتسمت بخبث لأن انتقامها من خطيبها سيف هيتحقق
_عمتا ده الكارت بتاعي انا هسيبك تفكر شوية ياكرم في موضوع جوازنا وهستنى ردك..واتمنى توافق وتكلمني..باي
مشيت من قدامه بغرورها المعتاد وهو قعد على الكرسي بعدم تصديق وحس انه بيحلم
_حبيبة بتحبني!
بتحبني انا
_______________
رجعت بيتها وقعديت على سريرها بإنتصار
باب اوضتها اتفتح ودخلت اختها
_سيف رجع من السفر هو وعمك ومرات عمك
قلبها دق بعنف وعنيها دمعت وهي بتفتكر خيانته ليها والصور اللي اتبعتتلها
اتكلمت بعدم اهتمام مصطنع
_اعمل ايه يعني
_انزلي واجهيه..انا متأكده انه مظلوم..سيف ابن عمنا وبيحبك ومستحيل يخونك..متكسريش فرحتكم يا حبيبة وتتهوري
حبيبة بصراخ ودموع
_انا مستحيل ارجعله قولتلك وقولت لبابا ينهي كل حاجه ده خاين ومقر.ف
_شكرا يامتربية
قالها سيف بسخرية وغضب وهو داخل الاوضه
بصتله بنفور واتكلمت بكره
_اطلع بره...اطلع بره متدخلش اوضتي مش عايزه اشوف وشك في حياتي تاني
_مش طالع قبل ما افهم ازاي تفتكري اني خونتك..هو للدرجادي مفيش ثقه في علاقتنا
_اه خونتني..واه مش بثق فيك لأنك عينك زايغه
وبعدين ده انا شوفت صوركم وانت في حضنها
ايه كنت بتطبطب عليها
_انتِ فهمتي غلط..دي صاحبتي عادي وكنت بسلم عليها
_كداب..ومش عايزة اسمع منك حاجه ياسيف ولو سمحت اطلع بره
نفخ بضيق وطلع من الاوضة وهو مقرر يكلمها تاني ويسيبها دلوقت تهدى
بصيت منار لأختها بضيق
_والله حرام عليكي..ده بيحبك
_اطلعي بره انتِ كمان..بره
طلعت ندى بتذمر وحبيبه قعدت على سريرها تعيط بقهر
بعد يومين تليفونها رن
بصيت للرقم لقيته مش متسجل عندها
خمنت انه كرم وابتسمت بخبث
فتحت لقيته هو فعلا
_ازايك يا انسه حبيبه
_تمام ياكرم..فكرت في اللي قولتلك عليه
سكت شوية واتكلم بجدية
_اه..انا موافق
ابتسمت بفرحه كبيرة وانتصار واتكلمت بلهفة
_حلو اوي..انا هاخدلك ميعاد مع بابا بكرة علشان تيجي تقابله..باي
قفلت وهو بص للتليفون بإستغراب وحس ان فيه حاجه غلط
اما بالنسبة لحبيبة ف اتكلمت في سرها بغل
_بكره هكسرك قصاد العيلة كلها يا سيف وانا بختار غيرك وهعلمك درس عمرك ما تنساه
________________
تاني يوم وصل كرم الفيلا اللي حبيبه ساكنه فيها وكان شكله شيك ووسيم جدا وماسك علبة شيكولاته من النوع الغالي في ايده
وقف متردد وهو بيبص للمكان وقد ايه باين ان صحابه اغنياء
مبقاش عارف اللي بيعمله ده صح ولا غلط لكن مكنش عنده استعداد يضيع فرصة زي دي من ايده ان حبيبة تبقى ليه
دخل البيت ورن الجرس والباب اتفتح ولقى الشغالة في وشه
_حضرتك كرم بيه صح
هز دماغه بتأكيد
_اتفضل في الصالون.. حسان بيه مستنيك
دخل الصالون ولقى حسان واللي كان مديره في الشركه بيبصله بهدوء
سلم عليه وقعد قدامه وبعدها اتكلم بهدوء وجدية
_انا كنت جاي اطلب ايد الانسه حبيبه
واتمنى ان حضرتك توافق وانا هشيلها في عنيا
_تطلب مين ياحبيب امك!
حبيبة مين!
حبيبة خطيبتي
بص كرم وراه لقاه سيف اللي واقف وراه وبيبصله بنظرات نارية
