رواية الحب المخيف كاملة بقلم ماهي احمد
الحب المخيف 
انا اسمي (ماهي احمد) حكايتي غريبه حبتين بس هحكيهالكوا وانتوا احكموا في الاخر ، انا كنت في اولي جامعه داخله الجامعه طور لاهي في برسيمه معرفش اي حاجه من اللي بيحصل فيها ، اتعرفت ع بنات في الجامعه كانوا شله زي السكر والله ، وفي يوم لاقيت عربيه تحفه زي عربيات ال race وقفت قدامي ونزل منها حته واد يخربيت ام حلاوته حاجه كده زي القمر ، البنات كلها كانت هتموت عليه الا انا اقسم بالله حسيت انه بارد وابيض كمان وانا بكره الولاد البيضا اصل لما هو يكون ابيض وشعره سايح وعنيه ملونه انا هبقي اي 
من الاخر انا بعشق الولد الاسمر اللي شعره اسود ناعم وتقيل وعيون سودا ويبقي رفيع عارفه ان ذوقي وحش ومعظم صحابي بيقولولي اني ذوقي وحش بس اعمل اي انا بحب كده
المهم تعدي الايام وعرفت ان الشاب ده معجب بيا ، طبعا رفضت ما حبيتش الموضوع ياعتللي مره واتنين وتلاته مع صحابي وانا قولت ابداا ده دمه بارد وواخد مقلب في نفسه وحاجه اي اخر قرف بصراحه كانوا صحابي بيستغربوا مني ازاي شاب زي ده ارفضه ده البنات كلها تتمني انه يبصلها ، وانا برضوا ولا في الدماغ قلبي ما دقش اول ما شفته ياجماعه ،
لحد ما كان عندنا رحله في الجامعه طلعه الاقصر واسوان كنت هموت واروحها كنا هنقعد هناك 3 ايام فضلت اعيط واهبد نفسي في البيت لحد ما بابا وافق بس بشرط ان اخد اختي حنان معايا وانا وحنان مش قد كده يعني مع بعض ، بس وافقت غصبا عني المهم اني اطلع 
فعلا طلعنا الرحله سوا واحمد الشاب اللي قولتلكوا عليه اول ما عرف اني طالعه طلع هو كمان مشاني ، بس لما لقاني مش مدياله وش وبقيت اكلمه بقرف ، اتعرف ع اختي حنان وبقوا مع بعض طول الرحله انا قولت رحله وهاتروح لحالها ، بس الظاهر ان الموضوع كان اكبر من كده الرحله خلصت وروحنا ولاقيت اختي حنان بقت قريبه مني جداا وبقت تحكيللي عن كل حاجه بتحصل بينها وبين احمد بقيت فرحانه مشانها خالص بس بقت تتعلق بآ احمد بطريقه غريبه اوي بقت كل يوم لازم تشوفوا واليوم اللي مش يكلمها تجيلوا الجامعه معايا فضلنا ع كده عدي كام شهر ، وحنان كانت مره متخانقه مع احمد ووصلها لحد البيت وقفلت الاوضه ع نفسها ومارضيتش تكلمني خالص اليوم ده سيبتها تاني يوم روحت الجامعه ورجعت لاقيت
الباب مفتوح وامي بتعيط وجيرانا عندنا دخلت بسرعه قولت في اي يا ماما حصل اي ، لاقيت جيرانا بيقولولي البقاء لله ، قولت في مين دخلت بسرعه لاقيت الحمام كله دم واختي حنان مقطعه شرايين ايديها ومرميه في الارض بقيت اصوت ومش فاهمه ليه ؟ وحصل اي ؟ وليه عملت كده ؟ عدي علينا شهر من اسود الشهور وجه وقت الامتحانات روحت الجامعه وانا مش مذاكره اي حاجه وكانت اول ماده علينا ، روحت لاحمد وقولتلوا حصل اي بينك وبين حنان خلاها تموت نفسها رد بكل برود وقاللي انا معرفش حاجه ياماهي
وسابني ومشي وهو ماشي قال بصوت واطي انتي السبب مافهمتش هو يقصد اي بالكلام ده وقتها ، وفي اليوم ده وانا مروحه لاقيت شاب اسمر وشعره اسود وناعم وتقيل ، كان في كل مواصفات الشاب اللي بحلم بيه كان بيبصللي ، بس وقتها انا نفسي اتسدت عن كل حاجه وماكنتش مهتمه اصلا المهم مشيت لاقيته ماشي ورايا ركبت المترو ركب معايا نزلت من المترو وركبت مشروع لاقيته ركب ورايا ، نزلت من المشروع نزل معايا وقتها بصراحه خفت جداا بقيت امد في الشارع لحد ما وصلت العماره وبطلع ع السلم طلع ورايا ولحد باب الشقه عندنا قولتلوا اي هتدخل معايا الشقه كمان قاللي افندم!!
قولتلوا انت ماشي ورايا من الجامعه لحد هنا انت مين وعايز اي ؟
قاللي انا اسف والله انا حتي ما اخدتش بالي انا كنت رايح لاختي الجامعه ولما مالقيتهاش قولت اروح قولتله تروح فين قاللي انا تامر اللي ساكن في الشقه اللي قصادكوا جديد ، احيييييه ع الكسوف
من كسفتي والله فتحت باب الشقه بتاعنا وقفلت الباب في وشه ودخلت ع ماما بسرعه وقولتلها هي الشقه اللي قدامنا سكنت قالتلي ايوه بقالها اكتر من اسبوع ، سيبتها ودخلت اوضتي اليوم ده كان عمي تعبان اوي ماما قالتلي ماهي احنا هنروح عند عمك نشوفه مشان يابنتي اتحجز في المستشفي مشان هيعمل العمليه ادعيلوا ربنا يقوموا من العمليه دي بالسلامه قولتلها يارب يا امي ، ماما مشيت هي وبابا بعد الغدا واتصلت بعزه صحبتي مشان تيجي تذاكر معايا ، قالتلي هجيلك ع 8 وانا قاعده في البيت لوحدي لاقيت صوت التاب بتاع حنان اختي اشتغل في اوضتها لوحده وع الاغنيه اللي هي بتحبها ، والاوضه بتاعتها مقفوله اترعبت ودخلت اشوف في اي لاقيت مافيش حاجه والتاب مش شغال قفلت النور وطلعت ولسه بقفل باب اوضتها لاقيت التاب اشتغل تاني ع الاغنيه اللي كانت بتحبها اترعبت وسيبت الاوضه وجريت لاقيت جرس بتاع الباب بيضرب يالهوي ع الخضه وقتها كنت هموت من الرعب فتحت لاقيتها عزه اخدت نفسي كده وقولتلها يخربيتك هو انتي؟
قالتلي مالك فيكي اي حكيتلها قولتلها اسكتي ياعزه كل شويه اسمع اغنيه حنان اللي كانت بتسمعها ع طول واول ما ادخل الاوضه الاقي التاب مقفول قالتلي ، دي اكيد تهيئات ماتحطيش في دماغك ، قولتلها طيب ادخللي حضري الحاجه مشان نذاكر وانا هعمل اتنين نسكافيه لاقيتها دخلت من غير ما ترد عليا ودخلت ع اوضه حنان ع طول ببص كده قولتلها بت ياعزه ادخللي ع اوضتي انا مش ع اوضه حنان ، لاقيت عزه بتتصل بيا ع الفون الارضي لاقيت عزه بتكلمني وبتقوللي بتصل بيكي ع فونك مقفول من الصبح ، ماتزعليش يا ماهي انا مش هقدر اجي اذاكر معاكي النهارده ماما تعبت ومش هقدر اسيبها وقتها انا تنحت
