رواية منورة يا حماتي (حماتي ملاك) الفصل الخامس عشر 15 بقلم هايدي محمد
أم رتيبة : على العموم ماشي يابنى ربي يصلح حالك
تخرج أم رتيبة لصحابها
أم عبد الله : معلش أنا لازم أمشي وانتى يا أم رتيبة كونى لاولادك صاحبه ومراتتهم أم عشان ترتاحي وميكرهوكيش
ام رتيبة : اللى ايده فى المياه مش زى اللى ايده فى النار
ام عبدالله : ربنا يهديكي أنا همشي سلام عليكم
أم عدلات : اقعدى ياختى دى بتتكلم من فضا
أم رتيبة : شورى عليا انتى يا أختى
أم عدلات : اسمعى منى ونفذى اللى قلتلك عليه بعد أول اسبوع جواز واضح انها مش سهلة ولازم تكسريها وتذليها
ام رتيبة : خلاص يا حبيبتي مافيش الا كدا
ام عدلات : عن اذنك يا ختى أنا ماشية دلوقتى
تنزل أم عدلات من عندها وتقول لنفسها : ياختشي زعلانه على ايه دى ولادها كلهم حواليها ومنصوفين عيني عليا مع بنتى وجوزها الموكوس يللا حظوظ أما أروح أشوف أخبار أم فؤاد و عملت ايه مع مرات ابنها كانت واقفه على طلاق خلاص المرة اللى فاتت
ومشيت
نرجع لأم رتيبة
سامح : بللا يا أمى قومى اجهزى البسي عشان منتأخرش على اعمامى وميزهقوش
أم رتيبة : ياخويا مسربع نفسك على ايه هى البرنسيسة هتطير كمان ليه كتب كتاب على طول كدا تكونش معيوبة عاوزين يلزقوهالك وخلاص
سامح بزعيق : أمى انتى ازاى تقولى كدا على مراتى وانتى عندك بنات ولا تحبي حد يقول كلام كدا على رتيبة
ام رتيبة : والنبي اقطع لسانه هو فى أخلاق ولا تربية زى رتيبة
سامح : يبقي كمان تغلطيش فى حد تعرفيهوش
أم رتيبة : اللى يسمع كدا يفتكر انى غلطت فى صحيح البخارى
سامح لنفسه : فيش فايده مش هتتغيري
يخرج سامح الصالة شوية ويرن جرس الباب ويفتح سامح
رتيبة : اهلا اهلا ياعريس
سامح لنفسه : كملت
سامح : فين جوزك أومال
رتيبة : جاى ورانا
سامح : انتى جايه معانا
رتيبة : اومال لازم اجى مش عاوزنى معاكوا ولا ايه
سامح : لا بس دى قعدة رجالة
رتيبة ببكاء مصطنع : اللى يريحك ياخويا انا راجعه خلاص
سامح : اقعدى يارتيبة خلاص
شويه بدأ الضيوف اعمام وأخوال سامح ييجوا وخرجت
أم رتيبة من جوه وكلهم رايحين بيت همسة عشان الاتفاق
............
فى بيت همسة تدخل ميادة صاحبة همسة أوضة العروسة واختها الصغيرة
ميادة : ايه مالك ياعروسة مسهمة كدا ليه
همسة : قلقانه انى هاخد خطوة مع سامح قبل مانتفق
ميادة وايه يعنى هو لو بيحبك هيوافق على طول
همسة : مش عارفه والله يا ميادة المهم البس ايه
ميادة : نهار ابوكي اسود لسه مش عارفه هتلبس ايه
همسة : عارفه ياميادة على قد مانا فرحانه انى هبقي لسامح بسرعه أوى كدا على قد مانا خايفه من أمه
ميادة : مين اللى بيتكلم ده انتى همسة على سن ورمح هو فى حد يقدر عليكي
همسة : نرعوبة لحسن مقدرش عليها
ميادة : أقولك ايه بس تعاملى ببرود على قد ماتقدرى وتحطى حدود للتعامل بينك وبينها
همسة : خير ان شاء الله المهم البس ايه
ميادة : الدريس ده يجنن عليكي وجربي الطرحة دى عليها كدا
بدأت همسة تلبس وتستعد للمعركة الجايه بس المرة دى كانت مختلفه عن اللى فاتت .. المرة دى كانت قلقانه
........
بعد فترة يوصل سامح وعيلته وأبو همسة يفتح لهم الباب وسامح يدخل الشقة وهو ماسك علبة الجاتوة أم 256.5 جنيه ونص من لابوار
ويبتدى يعرف ابو همسة على اعمامه
دخل الكل أم همسة خدت أم رتيبة ورتيبه على جوه وسابوا الرجاله قاعدين برة يتفقوا
أبو همسة : اسف ليكوا ياجماعه قرايب همسة اتأخروا وجايين فى الطريق
خال سامح : مافيش مشكلة
أبو همسة : طيب يا سامح يابنى قوم اقعد مع العروسة شويه على ماييجي باقى الضيوف
سامح : ياريت ياعمى
سامح يقوم ويحط علبة الجاتوة أم 256.5 على الطرابيزة قدامه ويقف يستنى همسة تيجيله
ابو همسة : نادوا على همسه تيجي تقعد مع العريس
أم همسة : حاضر يا حج وتخش تقول لهمسة روحى اقعدى مع عريسك
تخرج همسة وهى قلقانه
تسلم على الكل
سامح وهمسة يطلعوا بره يقفوا فى البلكونة
رتيبة : هما رايحين على فين
أم رتيبة : والله ياختشي ما أعرف
رتيبة : لا لا لا أنا الفار ابتدى يلعب فى عبي هطلع أشوفهم
رتيبة رايحه البلكون
محمد جوز رتيبة بصوت عصبي : رتيبة لمى تعابينك وارجعي اقعدى مكانك
ترجع رتيبة وهى بتشتم فى سرها وتقول عليا النعمه لاربيكوا كلكوا
فى البلكونة
سامح : احم احم عاملة ايه
همسة : الحمد لله وانت
سامح : الحمد لله ها يا ستى عاوزه تقولى ايه
همسة تضم ايديها فى حرج فى كم حاجة عاوزين نتفق عليها الأول
سامح : اتفضلى سامعك
همسة بحرج : ....
#حماتى_ملاك
