رواية ارحمني كاملة

 رواية ارحمني كاملة 

-الحلقة الاولى من ارحمني انا نشرت قصتين جداد واكتر قصه هيكون عليها تفاعل هي اللي هكملها معاكم ان شاء الله

" ارحمني ارحم ضعفي بين ايديك انا تعبت "

جمله قولتها وانا بصرخ وهو نازل ضرب فيا بالحزام وامي واقفه تتفرج مش قادره تلحقني من تحت ايديه وكل صرخه مني مع كل ضربه بالحزام كانت بتهز العماره .

لغايه اما الباب خبط وكانت جارتنا جت تلحقني من تحت ايديه بعد ماسمعت صريخي وانا بترجاه يرحمني شدوني من تحت ايديه بصعوبه وخدتني علي شقتها اللي بتكون في وش شقتنا كنت بعيط بانهيار وشهقاتي وسط بكايا كانت تقطع القلب

جارتنا حضنتني - اهدي يا حبيبتي خلاص محدش هيقربلك

- انا تعبت يا طنط تعبت

دخل علينا ابنها مروان كان راجع من شغله

بصلي بجديه وبص لمامته وقال - في ايه

انا مقدرتش ارد من كتر العياط والاحراج كمان

مامته ردت عليه وقالت - اللي ربنا ينتقم منه اخوها ضاربها وزي مانت شايف مبوظ وشها وجسمها بالحزام وانا لحقتها بالعافيه من تحت ايده

بصلي واتعصب - انتي ازاي سايباه يضرب فيكي كل يوم والتاني

ببكا رديت عليه- وانا اعمل ايه انا اضعف من اني اقف قصاده

- في حاجه اسمها قسم شرطة تنزلي تعمليه في محضر يربيه شويه

- عشان بعدها اكون قي قبري

- خلاص انا رايحله اشوف اخر القرف ده ايه .

قام عشان يروحله لقيت نفسي بتلقائيه مسكت ايده - ارجوك متروحلوش ارجوك ابعد عنه ليأذيك شكله مش طبيعي وشارب حاجه ارجوك يا مروان ابعد عنه .

بصلي شويه وسحب ايده - هو انا هخاف منه مثلا

- ارجوك بلاش عشان خاطري بلاش

مامته ردت - اه يا مروان اقعد بلاش ليعمل معاك احنا مش ناقصين

اتعصب - ونسيبه يضرب في البت ويهينها كل يوم

رديت بكسره وعيون ماليها الوجع - اتعودت على وجع القلب متخافش .

بصولي بحزن علي حالي ومامته خدتني في حضنها وطبطبت عليا وانا دموعي مش راضيه توقف .

بعدها بشويه امي جت خدتني من عندهم وقالتلي ان اخويا مشي فا استأذنتهم ورجعت بيتنا

ام مروان بصتله وقالتله - مسكينه خديجة

- ابوها الله يرحمه قسي علي ابراهيم وزرع فيه القسوه وفي الاخر جه كله دماغ المسكينه دي

- طب طب ما ترحمها من اللي هي فيه

- انا !! ازاي وانا في ايدي ايه

- في ايدك تتجوزها اهي خديجه بنت ناس ومحترمه ومفيش في جمالها بس حظها قليل ودنيتها جايه عليها ومحتاجه حضن تستخبي فيه من القسوه اللي هي عايشاها

- ات ايه انتي بتهزري يا ماما اتجوز ايه

- يابني وماله اما تتجوز وبعدين دي خديجه اللي كنتو مبتفارقوش بعض وانتو صغيرين

- اديكي قولتيها واحنا صغيرين وانتي عارفه كويس انا مينفعش معايا ولا هي ولا غيرها

- يابني هتفضل دافن نفسك بالحيا كده لامتي مانت لازم تعيش وتستمتع بحياتك

- ولو اتجوزت واتعلقت بيا وخلفنا ايه مصير الطفل يتظلم ليه وهي كمان ذنبها ايه وانتي عارفه كويس انه كده ظلم ليها وللطفل

- يابني ولا ظلم ولا حاجه انت اللي قافل علي نفسك اوي ومخوف نفسك من المستقبل والاعمار بيد الله

- ماما اقفلي علي الموضوع

"انا خديجه بنت بسيطه في كليه رياض أطفال ابويا متوفي وعايشه مع امي واخويا او بمعني اصح عملي الاسود كلمة كره قليله علي اللي بحسه ناحيته عذاب وضرب واهانه من غير اي سبب كل ذنبي اني من اب تاني من يوم مابويا سابني واتوفي وهو موريني العذاب الوان كرهني في اليوم اللي جيت الدنيا فيه فكرت في الانتحار مرات ومرات بس كنت برجع عن تفكيري ده ماهو مش هيبقي عذاب دنيا واخره اما بقي عن مروان فاهو الجانب الحلو اللي في حياتي وصديق طفولتي عشت معاه نص عمري وانا صغيره كان اول حد يلمس ايدي ويبوسني اول ماتولدت هو اكبر مني ب ٤سنين لعبي ومذاكرتي ومدرستي كانو معاه لسه فاكره اما عيطت وانا صغيره وفرجت الشارع كله عشان شوفته رايح الحضانه وكنت عايزه اروح معاه وفعلا بناءً علي رغبتي وعياطي ودوني الحضانه معاه وبعدها بردو جمعتنا مدرسه واحده فضلت حياتي مع حياته لغايه اما دخلت اعدادي ساعتها بعد عني بلا سبب معروف مبقتش اشوفه الا صدف مبقاش فيه بينا كلام حتي لو اتقابلنا صدفه لكن كبرت وحبه بيكبر في قلبي عشت وكبرت علي امل انه يرجعلي مروان صديق طفولتي وحبي الاول والاخير ولغايه يومنا ده قلبي مبيدقش غير لي وبراقبه دايما من بعيد بستني المح طلته كل يوم الصبح وهو نازل الشغل او مقابله صدفه علي السلم يمكن بهرب من وجع وقسوه حياتي في حبه اللي ملي قلبي وبيطبطب عليه رغم انه مش حاسس بوجودي وهيفضل الدعوه اللي مبتفارقنيش اما بقي عن طنط كاريمان مامته او كرميلا زي ما بقولها دي امي التانيه واللي جابتني للدنيا دي اصلها هي اللي ولدت ماما لانه كان يوم صعب وشتا وبابا مش موجود مش بقولكم مروان اول واحد لمسني حقيقي احن انسانه عليا يمكن اكتر من امي كمان ده كفايه عليا انه خلفتلي مروان "

_____________________

تاني يوم الصبح صحبتي رنت عليا عشان عندنا محاضره وللاسف كنت مخنوقه اني هنزل قبل ماشوفه

- اوووف ايه يا هاجر كل ده رن ايييه المحاضره هتطير

- اه هتطير حبيب القلب هو اللي مش هيطير

لمحته خارج من باب العماره شدتها ورا شجره عشان اشوفه من غير ما يشوفني

- يا محني

- هاجر

- خلاص سكت وبعدين انتي لابسه نضاره شمس ليه واحنا الدنيا شتا اصلا ومفيش شمس اقلعيها واكله نص وشك

قلعت النضاره وبصيتلها بوجع وبصيت في الارض

- يالهوي يا خديجه هو اللي عامل في وشك كده

اتنهدت تنهيدة وجع - ادعيلي يا هاجر ادعيلي عشان انا تعبت

خدتني في حضنها جامد ولقيت نفسي دموعي نزلت وصوت عياطي بدء يعلي

- بس بس اهدي تولع المحاضره تعالي نروح اي مكان نقعد فيه .

روحنا كافيه قعدنا فيه وقعدت اعيطلها - تعبت يا هاجر تعبت بجد

- هانت وكلها شويه ويجيلك ابن الحلال اللي يريح قلبك ويخلصك من العذاب ده

- تفتكري هيحس

- هو مين

- مروان

- يخربيت مروان علي سنين مروان يا ستي واجعه قلبك ليه بواحد مش شايفك

- بحبه طول عمره واحنا صغيرين كان حنين عليا يا بنتي دانا كنت من اول مافتح عيني اجري علي شقتهم والعب معاه طول اليوم دانا كنت بفطر واتغدا واتعشا عندهم وكنت بذاكر معاه ويشرحلي اللي مبفهموش ولا اما حد يضايقني في المدرسه وكان يضربهولي جه اما دخل تقريبا تانيه ثانوي فاجأه كده اختفي من حياتي وسافر كام شهر هو واهله ورجعو تاني بس رجعو معاهم شخص تاني كأنه ولا كان يعرفني اللي هو لدرجادي كام شهر سافرهم نسوه خديجه طفلته يمكن سنين عدت واحنا زي الاغراب بس هيفضل هو مالك قلبي

- ربنا يريح قلبك ويرزقك اللي يستاهلك يا ديجا

- قلب ديجا انتي حقيقي انتي مهونه عليا كتير يا هاجر

طبطبت علي ايدي - يا روحي انا دايما جمبك

جه صوت من ورانا : هاجر ازيك

ردت هاجر عليه - احمد ازيك اخبارك

- تمام ايه مش تعرفينا

ابتسمت- خديجه صحبتي وده احمد ابن عمي يا ديجا احم احم ومتقدملي

شهقت بصدمه وفرحه - بتهزري

- والله مابهزر انا لسه كنت هفاجئك وافتح معاكي الموضوع لقيته

حضنتها وضحكت- مبروك يا جوجو مبروك يا احمد ربنا يتمملكم بخير يارب

ضحك وقالي- عقبالك

ضحكت - طالما هاجر اتخطبت يبقي النحس اتفك وهتفرج قريب

ضحكو وانا ضحكت جامد من قلبي بفرحه لهاجر لكن لحظات الفرحه مبتكملش ابراهيم اخويا كان داخل الكافيه ومعاه واحده ولمحني وانا واقفه بضحك مع هاجر واحمد جه بسرعه عليا ومسكني من دراعي جامد - هو ده الكليه يا روح امك

- اااه ااه ابراهيم سيب ايدي هفهمك

شخط فيا - اسيبك دانتي يوم اهلك اسود

جرجرني قدام الناس و هو بيشتم فيا وماسكني جامد وانا اكتفيت بالسكوت ودموعي اللي نزلت

وصلنا البيت رماني ونزل بالقلام عليا

امي قالتله - حرام عليك يا ابراهيم كل يوم ضرب وتلطيش فيها حرام عليك هي عملت ايه لكل ده

- بتستغفلنا بنت ال .. دي بتقول نازله الكليه وهي رايحه هي وصحبتها تقابل واحد في كافيه

صرخت بعياط - والله العظيم ابدا انا تعبت شويه فا هاجر خدتني علي كافيه اهدا انهارده وقابلنا احمد ابن عمها وخطيبها بالصدفه والله

- صدفه بردو دانا هربيكي من اول وجديد يا رخيصه

فضل يلطش فيا وانا بعيط وبكتم صرخاتي .

جرجرني من شعري ورماني على السلم _ خلي السلم يلمك بقي وحياه امك لابيتك عليه

- حرام عليك انت ايه يأخي انت ايه شيطان

جه بكل قسوه وعنف لطشني قلم من قوته دماغي اتخبطت في سلمه من السلم وجابت دم بعدها تف عليا ودخل الشقه وسابني علي السلم وانا بتألم من الخبطه والدم اللي نازل علي وشي ومختلط بدموعي .

فضلت ساعات علي وضعي ده وببكي في صمت لغايه اما لقيت مروان طالع وبصلي واتخض من شكلي جري عليا - يالهوي خديجه ايه اللي عامل فيكي كده .

اول ما سمعت صوته بصتله زبكيت بحرقه وصوت بكايا كان يوصل اخر الدنيا بجد وجع الدنيا كان باين علي ملامحي

- يالهوي اهدي عشان خاطري قومي قومي ننزل علي اقرب مستشفي عشان جرح دماغك قومي .

شدني قومني وسندني ونزل بيا علي اقرب مستشفي خيطولي الجرح اللي كان في دماغي ولفهولي بشاش وقطن وخرجتله

- سلامتك يا خديجه احكيلي ايه اللي حصل

بكايا زاد - تعبت والله تعبت انا مبموتش ليه و استريح

- بعد الشر عليكي اهدي بس وفهميني

حكتله الموضوع وانا منهارة

- لا ده كده زودها اوي وحياه امه ليبات في التخشيبه .

شدني وخدني علي اقرب قسم وعمله محضر وشويه والبوليس راح جابه .

كنت خايفه منه اوي واستخبيت ورا مروان بخوف

زهق وهو بيبصلي بشر- بقي بتعمليلي انا محضر يا بنت ال ... يا صايعه ياللي مشيالي مع كل واحد شويه قفشك الصبح مع واحد ودلوقتي مع التاني اهو يا رخيصه

مروان رد عليه - احترم نفسك يا حقير انت يا شيخ اتقي الله دي اختك

- اختي انا ميشرفنيش ابقي اخ للسافله الرخيصه دي .

رد عليه - تصدق بالله مافي ارخص منك هنا <br>

الظابط خبط علي المكتب وقال - بس ايه مش مالي عينكم

مروان- الواد ده يتربي يا باشا علي اللي عمله في الغلبانه دي ده كل يوم ضرب واهانه فيها

رد ابراهيم عليه- كدابين يا باشا الصايعه عامله الحوار ده عشان مغلوله مني اني قفشتها مع واحد الصبح واديتها قلمين مش اكتر فا راحت فتحت دماغها لنفسها عشان تلبسني تهمة .

مروان - كداب يا باشا ده بيضربها كل يوم ومبهدلها والجيران تشهد

الظابط - بس انتو الاتنين خدولي الواد ده علي الحجز وروقوه

بصلي والعسكري واخده وقال بزعيق - وحيات امك اما اطلعلك يا بنت ال ....

خوفت ومسكت في ايد مروان

مروان بصلي وقالي بصوت عالي - ده لو طلع منها اصلا .

وشدني وروحني وامي عرفت اللي حصل فضلت تصوتلي وتقول - سجنتي اخوكي يا خديجه ضيعتي الواد

- انتي ايه حرام عليكي خايفه عليه وانا اولع مش شايفه دماغي مفتوحه منه ازاي مش شايفه العذاب اللي بشوفه الوان منه

- يا ميلة بختك في ولادك يا عزه يا ميلة بختك في ولادك

- ارحميني بقي يا ماما انا فيا اللي مكفيني

- وحيات امك لو ما روحتي الصبح اتنازلتي عن المحضر وطلعتيلي اخوكي لا انتي بنتي ولا اعرفك وهعتبرك موتي

- يا شيخه ياريت اموت واستريح منكم انا تعبت .

عند مروان مامته دخلت عليه وقالت - ما ترحم البنت يابني من وجع القلب اللي هي فيها ده وتتجوزها يابني البنت مسكينه وهتموت في ايده مره .

- يا امي اخدها ادفنها معايا

- وهي كده مش مدفونه بالحيا اسمع كلامي ده اللي بيرحم حيوان بيدخل فيه الجنه ما بالك ببنت زي الورد

- يا أمي انا مستقبلي مش مضمون

- ومين فينا حاجه في حياته مضمونه

_____________________

تاني يوم مع ضغط امي و ولولتها علي ابراهيم طول الليل الصبح كنت في القسم بتنازل عن المحضر .

بعدها بكام ساعه لقيته راجع البيت ودخل قرب مني وجاب شعري كله في ايده وجاب حبل وربطني بيه وبلاستر وحطه علي شفايفي عشان محدش يسمعلي صوت

وقالي _بتعمليلي انا محضر دانا هخليه اخر يوم في عمرك دانا هولع فيكي بس مش كلام لا دانا هولع فيكي فعلا .

اتصدمت ان جايب بنزين فعلا وبيدلقو عليا حاولت اصرخ معرفتش من البلاستر وامي اول ما شافت كده فضلت تصرخ تصرخ تصرخ لغايه اما العماره اتلمت وكسرو الباب ودخلو وهو ماسك الولاعه وخلاص كان هيرميها لولا مروان شدها منه ورجاله العماره مسكوه ساعتها انا كنت في حاله هتسيريه وبترعش وبعيط بطريقه فظيعه انا كنت علي وشك اموت ومش موتة عاديه لا كان هيولع فيا.

- تابععلق ب 20 ملصق ليصلك اشعار بالجزء الثاني

الثاني من هنا

تعديل المقال