رواية ارحمني الفصل الثاني 2
الجزء الثاني
كنت علي وشك اموت ومش موتة عاديه لا كان هيولع فيا.
مروان قام فيه وبكل صوته وقوته فضل يخبط فيه في صدره جامد ويقوله - يا اخي انت ايه شيطان ده الشيطان يتبرا منك انت جنس ملتك اييييه .
رد عليه - وانت مال اهلك ومالكو كلكو انا هولع فيها هي تستاهل الحرق
- يا شيخ دانت اللي تستاهل تموت بدل الموته الف انا هرحم منك ومن اشكالك .
لقيت مروان قرب مني وفكني وقال _ تتجوزيني
- تتجوزيني
كانت صدمه عمري اول ما سمعت الجمله دي لكن كنت مش قادره اجمع من الصدمة الاولي وهي صدمة ان اخويا كان هيولع فيا
رد عليه ابراهيم وقاله - خدها خدها عزرائيل ومرجعهاش مش عايز اشوف خلقتها بس اعرف ان انت اللي جبته لنفسك
رد عليه - بكرا الصبح هنكتب الكتاب واخدها بشنطة هدومها وهرحمها من خلقتك
كنت مصدومه من اللي حاصل ومحروجه من سكان العماره اللي شافوني وانا مذلوله وشافو مروان وهو بيشفق عليا وبينقذني كان احساس بشع وكسرة ربنا ما يكتبها علي حد
______________________
كانت اطول ليله عليا مدوقتش فيها طعم النوم احاسيس كتير كانت متلغبطه جوايا وجع كسره احراج ذل خوف ايوه خوف بقيت خايفه اغمض عيني في البيت ده بقيت مش مطمنه ولا قلبي عارف يفرح بأني هكون مع اللي عشت سنين بتمناه .
" بارك الله لكما وبارك عليكما وجمع بينكما في خير "
كانت اخر جمله قالها المأذون وسط زغاريط امي وطنط كاريمان والجيران واحراجي وسطهم مكنتش قادره افرح ولا حتي ابتسم انا مكسوره اللي كسرني المفروض يكون اقرب الناس ليا .
بعدها مروان ومامته خدوني علي شقتهم عشان ياخد شنطه هدومه عشان نمشي اول ما دخلت معاهم عيطت
طنط حضنتني وقالت- مالك بس يا عروسه
رديت ما بين البكا وشهقاتي العاليه _ بكرهه من قلبي بكره كل لحظه قضيتها معاه بكره ريحته بكره صوت مفاتيحه بكره اي حاجه تخصه كرهني في حياتي وكسرني انا بقيت بخاف من اي صوت عالي أو اي حد يقرب مني انا بقيت بترعب اما اسمع خبط الباب سنين وانا في عذاب منه عشت سنين بستخبي اول ما بسمع صوت عربيته اللي بكرهه واول ما يدخل الشقه وريحته بتملي المكان بحس اني عايزه ارجع عمري ما كرهت قده كنت اول مابص في وشه بحس اني شيلت هموم كان بيتلذذ في بضربه ليا انا بكرهه .
بصولي بحزن نظراتهم ليا كانت بتقتلني اكتر الشفقه على حالي كانت اكتر نظره بتوجعني
طنط ردت عليا وقالتلي- انسي يا حبيبتي انتي داخله علي حياه جديده انسي الوجع اللي عشتيه وابدئي من جديد
بوجع _ بس انا انتهيت خلاص.
قبل ما نمشي لقيت طنط بتحضني وبتهمسلي بصوت واطي وتقول - خلي بالك من مروان ياخديجه ومتزعليهوش بالله عليكي ولا تعصبيه وهو والله حنين بس افهميه
هزيتلها راسي بحاضر واول ما وصلنا شقته وقفل الباب اتخضيت وبصتله قالي - اهدي اهدي مفيش حاجه ده الباب
سكتت ومردتش راح قالي- اختاري اوضه ليكي من الاوض وانا هاخد التانيه كلامه ده اكدلي انه جوازنا كله بعضه شفقه علي حالي مش اكتر وده اللي حسسني بكسرة النفس اكتر وهزيتله راسي بهدوء ودخلت علي اقرب اوضه ليا وعيطت ياااه لدرجادي هو ده اليوم اللي كنت مستنياه .
روحت وقفت قدام المرايا وبصيت علي شكلي لابسه لبس مش لبس عروسه وراسي ملفوفه بالشاش والقطن ملامحي باهتة من كتر العياط وعنيا منفخه حقيقي كان شكلي صعب واتأكدت ان حقه يشفق عليا .
بعدها نمت نوم عميق كنت محتاجاه بقالي كتير ولكن صحيت علي حد بيخبط علي باب الاوضه هو كان خبط هادي بس اتخضيت
سمعت صوته من برا بيقول- خديجه لو صاحيه اطلعي عايزك
اطمنت اما سمعت صوته الهادي قومت غسلت وشي ولبست اسدال ولفيت الطرحه علي شعري وخرجتله لقيت اننا بقينا بليل .
- احم احم
- حمدلله على السلامة ايه كل النوم ده
- اسفه والله كنت تعبانه
- ولا يهمك يا ست بصي انا جهزت العشا كده بما انك من الصبح نايمه ومأكلتيش واهو اكلمك في كلمتين واحنا بناكل
- متشكره جدا مكنش له لزوم تتعب نفسك
- طب يا ستي اتفضلي قدامي علي السفره
روحت وقعدت بعيد عنه في اخر السفره
- مالك هو انتي خايفه مني
تهتهت شويه - ل ل ل لا لا بس انا مرتاحه هنا
- طيب علي راحتك المهم كنت عايز اقولك علي حاجه
- ا ا اتفضل
-بصي يا خديجه انا عارف ان جوازتنا دي جت بسرعه ولا كنتي انتي مخططالها ولا انا كمان كل اللي كنت عايز اعمله الحقك من الحيوان اللي بلا رحمه اخوكي فا عشان كده اتجوزتك فانا وانتي هنفضل مع بعض فتره عشان اقدر احميكي وابعدك عنه واول ما اطمن انك في امان وكده هديكي حريتك وهرجعك لحياتك بس وانتي أمنه ومطمنه وبعيد عن اي مشاكل وكمان هتفضلي هنا دي من انهارده بقت خلاص ليكي وساعتها هيكون احسن ليكي اكتر ما ليا .
كلامه صدمني يعني اول ما احقق اكبر حلم ليا يتحول لسراب فاجأه اول ماقول خلاص هتتعدل ترجع تسود اكتر سكتت ومعرفتش ارد عليه كمل وقالي - وياريت ماما متعرفش اتفاقنا ده وصدقيني عمري ماهعمل حاجه تأذيكي
هزيت راسي في صمت وكملنا الليله في سكوت وكل واحد فينا بيفكر في حياته.
_______________________
ايام عدت يمكن احسن ما فيها الهدوء والامان ولكن اوحش مافيها اني حاسه اني عايشه لوحدي هو من تاني يوم نزل الشغل وسابني لوحدي بيرجع نتغدا سوا ويدخل أوضته يكمل شغل علي اللاب او ينزل وكأنه قاصد يتجاهلني هي اه احسن من حياتي القديمه لكن انا محتاجاه انا بحبه انا عشت عمر بحاله مستنيه نظره منه ويوم ما النصيب يجمعنا يبقي اخر الجمع ده فراق .
______________________
هاجر كانت عندي بما انه اليوم ده كان مش في البيت
- تتجوزي من ورايا يا حيوانه وكمان الكراش وقعتي عليه ازاي
اترميت في حضنها وعيطت
- يالهوي مالك يا خديجه في ايه
- انا تعبت يا هاجر تعبت
- طب اهدي واحكيلي
حكتلها اللي حصل وانا ببكي
- انا اتذليت ونفسي اتكسرت قدام الناس حتي اللي عشت اتمناه اتكسرت قدامه خدني جبر خواطر وهيرميني بعدها وارجع لواقعي الاليم .
- طب بس بس اهدي يا روحي والله هتتعدل اللي قدر يجمعك باللي بتحبيه قادر بردو يريح قلبك ويزرع في قلبه حبك وانتي متيأسيش طالما وصلتي لهنا حاربي عشان يحبك
- هو انا لاقياه اصلا دانا بشوفه صدفه
- اهو استغلي الصدفه دي وصاحبيه زي ما كنتي زمان ارجعيله طفله ماسكه فيه زي زمان
- تفتكري هيفيد
- قولي يارب
- يااارب انا قلبي مبقاش حمل وجع
بعدها بشويه مشيت والباب خبط قومت افتح
- كرميلا
- قلب كرميلا عامله ايه يا عروستنا
- الحمدلله اتفضلي حضرتك وحشاني اوي
- امال فين الواد مارو
- زمانه جاي من الشغل
- انتو لحقتو عشان ينزل الشغل
- معلش ظروف شغله بقي
شويه ولقيناه داخل علينا واتفاجئ بوجود مامته جري علي حضنها- قلبي وحشتيني
- يا واد بكاش عامل ايه
- تمام الحمدلله
- اوعي تكون مبتاخدش ادويتك
لقيته فاجأه برقلها وحط ايده علي بوقها
بصتله وقولت - ادويه ادويه ايه!!!
رد وهو بيتهته - ا اصل ك كنت تعبان شويه قبل ما نتجوز وكان الدكتور كاتبلي شويه ادويه
- تعبان طب تعبان مالك
مامته حاولت تصلح تقريبا اللي حصل وقالت - لا ده كان نزله معويه بس من السرمحه والاكل بره وهو شكله بقي زي الفل اهو دانا اطمنت عليه
سكت وبعدها قولت- الف سلامة عليك هقوم احضر الغدا
سبتهم ودخلت علي المطبخ
قالها - انتي ايه اللي عملتيه ده يا ماما
- انت مقولتلهاش
- واقولها ليه
- عشان مراتك ولازم تبقي عارفه عنك كل حاجه ولو تعبت لاقدر الله تعرف تتصرف
- ماما انا حر اقول ولالا وياريت متفتحيش قدامها الكلام ده تاني
- براحتك يا مروان بس ده غلط عليك انت
- انا كويس خلاص بقي
حضرت الغدا وخرجته بيه واتغدينا سوا وأصريت ان طنط كاريمان تبات معانا وحقيقي كانت ليله قمر كفايه ان مروان فضل منزلش وسابني
قالتلنا - ما كفايه قعدتكم الممله دي وتيجو نلعب
- الله عليكي يا طنط يا فاتحه نفسي هو ده الكلام نلعب
قومت بفرحه جبت الكوتشينه بسرعه وجيت اجري بفرحه طفوليه
ضحك وقال- هبله والله
- طول عمري
بدئنا نلعب وصوت ضحكنا كان مدي للمكان بهجه رهيبه ومع مساعدات طنط ليا كسبناه
وقفت وانا بتنطط بفرحه طفوليه - وكسبنااااا
طنط ضحكت وقالت- يلا يا حلو هنحكم عليك
&;ضحك وقال - ربنا علي المفتري
قولتله - انا هحكم انك تغني
- ايه اغني ايه لا طبعااا
- يلااا انا عارفه انك صوتك حلو من واحنا صغيرين يلااا
- اممم
- يلااا
غمض عيونه اوي وغنا باحساس اوي خارج من قلبه _
" سنين شايفك في احلامي بنادي عليكي ضميني ليالي كنت مش عايش ومستنيكي تحييني وحشتيني وحشتيني سنتين بعدك على عيني ليالي كنت مش عايش ومستنيكي تحييني
"
"صفرلته - الله عليك يا عظمه مع انك كروت وغنيت جزء صغير بس عظمه ايه الصوت ده يابني بجد
ابتسم - ها يا ماما حكمك
ضحكت وقالت- لا حاجه بسيطه خالص قول سر عمر ماحد عرفه عنك
- يالهوي ايه الاحكام دي
ضحكت وشجعت طنط - الله علي احكامك يا كرميلا يا عسل انتي
غمض عيونه وقال - حبيت مره واحده ولغايه انهارده مطلعتش من قلبي ولا هتطلع وهتفضل اول واخر والطف حد مر علي قلبي .
.ساعتها اتوجعت اوي وابتسمت كده بكسره - هقوم اعمل حاجه نشربها
قومت بسرعه وسبتهم عشان معيطش قدامهم وطلعت علي البلكونه ودموعي نزلت .
شويه ولقيت اللي حط ايده علي كتفي اتخضيت واتنفضت جامد
- اهدي اهدي ده انا ...ايه ده انت بتعيط با لمبي
ضحكت وانا بمسح دموعي- لا ابدا
- يا شيخه امال ده ايه مطر مثلا
ابتسمت - يمكن
- انا اسف لو ضايقتك
- لالا ابدا افتكرت بس حاجه ضايقتني مش اكتر
- بجد
- بجد
مسك ايدي- طب يلا ندخل الجو برد اوي هنا
مسكته لايدي خلت جسمي يترعش
طبطب علي ايدي اما حس بالرعشه دي وقالي- اطمني .
ابتسمت بهدوء ودخلت معاه عملنا سحلب وجبنا بطانيه وقعدنا كلنا نتفرج علي فيلم وكانت حقيقي ليله من الطف الليالي اللي في عمري ياااه علي طعم الامان اللي دوقته في بيته عمري ما حسيته في اللي كان مفروض بيتي وسط اهلي.
- يلا ادخلو اوضتكم نامو وانا هدخل الاوضه دي
ردينا في صوت واحد - ايه اوضتنا
- اه اوضتكم مالكم
رد عليها- ا ا اه اه هندخل يلا قدامي يا خديجه
برقتله شاورلي اني ادخل واسمع الكلام ودخلنا الاوضه
- ايه البلوه السودا اللي انت حطتنا فيها دي
- مش انتي اللي أصريتي انها تبات اشربي بقي
- طب طب هنعمل ايه
- عادي هنبات هنا واحد علي الكنبه وواحد علي السرير
- بس بس انا بخاف
- من ايه
- من ان حد ينام معايا في الاوضه
- الناس الطبيعيه بتخاف من العكس انها تنام لوحدها مثلا جديده دي انك تخافي حد يبقي معاكي
دموعي نزلت - قدرك بقي انك تقع في واحده معقده
- هو السبب بردو
- طول ما الباب مش مقفول عليا بالمفتاح وانا نايمه مبطمنش ولا انام بخاف يدخل يضربني وبخاف كمان من اي صوت حواليا وبصحي من اقل حاجه
- طب وهتخافي مني صدقيني عمري ما هأذيكي انا عمري ما هبقي زي الحيوان ده
- عارفه
- يبقي متقلقيش يا ستي وعدي الليله دي بس .
هزيت راسي بحاضر وسكت قعدت علي الكنبه وهو اخد السرير فضلت قاعده علي الكنبه وحاضنه نفسي بخوف لغايه اما روحت في النوم وللاسف حلمت بكابوس حلمت با ابراهيم بيدبحني وامي واقفه تتفرج من غير ما تعمل حاجه وكنت بصرخ لكن مش طالعلي صوت لغايه اماصحيت من النوم وانا بصرخ فعلا
لقيته قام بسرعه مخضوض وجابلي مايه اشربها وانا بشهق وروحي مسحوبه وبنهج بطريقه بشعه
ومسكت في ايده جامد وانا بتهته - مت مت متسبنيش هيقتلني هيقت لني
كانت حالتي صعبه لدرجه انه معرفش يعملي ايه غير انه حضني عشان اهدي كنت في حاله هستيريه من الخوف وحضنه طمن قلبي وسكنت جواه فضلنا علي الوضع ده كتير لغايه اما نمنا زي ماحنا
الصبح صحينا بصنا لبعض وصرخنا احنا الاتنين وبعدين ضحكنا اوي
- انت ايه اللي جابك هنا
- ما سيادتك طول الليل تصرخي وكنتي تقريبا روحك بتطلع
- مش عايزه افتكر مش عايزه افتكر
- خلاص خلاص اهدي كل حاجه تمام متخافيش
خرجنا نفطر مع مامته لقيتها بتقول _ واد يا مروان عمامك في الصعيد عرفوا انك اتجوزت وعايزينك تروح بعروستك عشان يشوفوها
- يشوفوا ايه هي عروسه المولد
- يابني معلش عمامك بردو وفرحانين بيك
بصلي وقالي - وانتي ايه رائيك
- اللي تشوفه
ردت مامته- يبقي خلاص تتوكلو علي الله انهارده وبلاش عربيتك عشان المسافه طويله وهتتعب من السواقه كل ده
- طيب قومي يا خديجه جهزي الشنط
قومت حضرت شنطنا كنت خايفه انا حقيقي بقيت خايفه من الناس لدرجه اني مبقتش انزل الكليه اقوم اسافر في مكان كله ناس في ناس
دخل عليا - مالك
- خ خايفه
- من ايه
- من المكان اللي احنا رايحينه
- متخافيش هتبقي معايا مش هسيبك لحظه
ابتسمت وقولت بتلقائيه - انت لسه حنين زي زمان
ضحك- هو انتي لسه فاكره كنت ازاي زمان دانتي كنتي صغننه اوي
لقيت نفسي برد بتلقائيه من غير تفكير - وعمري
ما نسيتك لحظه
- ايه !!!
اتصدمت من اللي قولته واتوترت وحاولت أصلح اللي هببته - ق ق قصدي عمري مانسيت لعبنا زمان سوا ومذاكرتنا وكل التفاصيل دي يعني كنت احن فيها عليا من ابراهيم
- اهااا طب يلا البسي عشان نمشي
جهزنا وقررنا نسافر في القطر لكن كنت متوتره وخايفه لدرجه ان عماله اهز في رجلي واعض في شفايفي واول ما سمعت صوت صفارة القطر استخبيت في حضنه من الخضه
- اهدي متخافيش
- متسبنيش انا خايفه اووي
ابتسم وطبطب علي ايدي وفضلت ماسكه في ايده ومايله علي كتفه طول الطريق بس شويه ولقيت ايده سقعت اوي بصتله بسرعه - مروان انت كويس
كان وشه مخطوف وشفايفه ازرقت وجسمه متلج بس ابتسم عشان يطمني وقال بصوت هادي بيحاول يظبط فيه نفسه - انا كويس جدا متقلقيش
مسكت ايده اكتر وفضلت متشبثه فيه اوي وكنت قلقانه عليه ومش مطمنه لغايه اما وصلنا بعد ساعات دخلنا وكنت متبته فيه زي طفله خايفه تسيب ايد باباها تتوه وسط الزحمه
وهو كمان كان مقدر ده وكان متبت في ايدي رغم اعراض تعبه اللي واضحه علي شكله .
عمه بصله وقاله - بجي إكده تسيب بت عمك وتروح تتجوز مصراويه ومن ورانا كمان
- معلش يا عمي النصيب والجلب وما يريد عاد
ضحكت في الخفا علي لهجته اللي اتغيرت وهمستله وانا بضحك- الله انت شكلك حلو وانت بتتكلم زيهم
وهو بيكتم ضحكته همسلي - بس يا هبله ليطخونا عيارين هنا
دفنت وشي في دراعه وفضلت اضحك عشان محدش ياخد باله وهو كان هيموت ويضحك علي ضحكي
عمه قال- خدو العروسه طلعوها علي اوضتها لغايه اما أتحدت مع ابن اخوي في كلمتين
مسكت في ايد مروان اكتر - لا يطلعوني فين لوحدي متسبنيش
- متخافيش اطلعي وانا جاي وراكي علي طول
سبت أيده وطلعت معاهم وانا علي تكه واعيط من الخوف يمكن اتشاف محن زياده او اوفر لكن اللي شوفته من اخويا مش شويه
بعدها بشويه دخل عليا الاوضه كان شكله تعبان اكتر و ماسك صدره وبياخد نفسه بصعوبه ووشه كله عرق
بخضه قولتله - مروان مروان مالك
قبل ما يرد كان واقع قدامي علي الارض ومغمي عليه ............
......يتبع هناك شكوي متكررة من عدم وصول باقي الاجزاء
