رواية بنت البواب الفصل الخامس 5 بقلم اية عادل
بقلم آيه_عادل
لقيت دكتور رامي بيقول امنعو الضحك وانا حطيت ايدي علي شفايفي من كتر مانا بعيط بصوت
قالي لو سمحتي اطلعي بره
اتكسفت جدا وخرجت من كسفتي فضلت واقفه مكاني ماتحركتش لحد ماخلصو دكتور رامي اتفاجئ من وقفتي
قالي انتي لسه هنا مامشيتيش ليه
قولتله انا خايفه جدا
قالي ايه اللي يخوف انسان وبنشرحه ايه المشكله علي فكره كلنا هنبقي كده في يوم من الأيام ولو هتخافي وكل مره هتقعدي تولولي احسنلك شوفيلك اي كليه تانيه
سابني ومشي بعد ماكسفني بكلامه اخدت نفسي بالعافيه وروحت مشيت خطوتين خرجت بره المبني خالص
لقيته جاي من ضهري كده معرفش ازاي وقالي انتي كويسه ، معاكي حد يوصلك
قولتله اها كويسه ومعايا ربنا وسيبته ومشيت حسيت انه حس بغلطه وأنه شد عليا ف حب يعمل الحركتين دول وانا جمعت اعصابي ومشيت ولما روحت لقيت روان قاعدالي علي السلم
بتقولي كل ده مستنياكي انتي فظيعه ومواعيدك زفت
قولتلها ايه يابنتي مانتي عارفه اني في الجامعه
قالتلي مال وشك كده أصفر
قعدت حكيتلها كل اللي حصل معايا وقعدت تضحك عليا
قولتلها اللي يضحك اكتر اني مش عارفه هو فاكرني وعارف اني البوابه اللي عند استاذ ياسر ولا لا
قالتلي طيب وايه المشكله
قولتلها لا مشكله ماهو بعد المعامله اللي عاملهالي دي يبقي هو شخصيه من الاتنين هو اما دبش ورخم أو انا اللي كنت مستفزه
روان قالتلي بضحك بصراحه انتي اللي مستفزه
قولتلها الله يسامحك ياستي
قالتلي لا بجد يعني طول السنين دي معاكيش موبايل ازاي يعني انا لسه واخده بالي من الحوار ده
قولتلها هكلم مين يا حسره هو تليفون امي النوكيا القديم اللي بتكلم منه قرايبها اللي في البلد ولو حد من سكان العماره طلب حاجه
لقيت روان مطلعه موبايلها القديم اللي هو بالنسبالي محلمش اعدي من جانبه واديتهولي
قولتلها ايه ده
قالتلي تلاجه
قولتلها بجد ايه اللي انتي بتعمليه ده ده مش موبايلك يا بنتي بتديهولي ليه
قالتلي عشان اونكل صالح جابلي أحدث موبايل في السوق قولت يبقي ده من نصيبك
قولتلها انا مش عارفه اقولك ايه بجد الله يفرح قلبك ويخليكي ليا
قالتلي ايه يا بنتي كل ده انا برمي لبعدين عشان بعد كده اكشف عندك ببلاش
قولتلها يارب يقدرني علي رد جمايلكم دي
وعدت سنتين اللي حصل فيهم كان كتير اوي
اولا انا وأمي جمعنا فلوس كويسه من الخضار والفواكه وكان رأيي أننا نجيب شقه صغيره نقعد فيها خصوصا ان رنا مابقيتش سايباني في حالي وعلي طول عايزه تكسر نفسي وتطلبني بالاسم اجيبلها طلبات عبيطه وساعات كانت بتطلب من امي حاجه وبعدين تزعقلها وتقولها ماطلبتش اللي انتي مطلعاه ده ، قولت كده هيبقي اريح لينا وفعلا جيبنا شقه صغيره في البساتين قريبه من النصبه وعلاقتي ب روان ومامتها ماتقطعتش بالعكس بقت اقوي سيبنا شغلانه البواب
روان اتخطبت وهتتجوز بعد سنتين من قريب جوز مامتها ووالدها اتوفي بس ربنا كان معوضها بجوز امها اللي كان فعلا سند وضهر ليهم
وفي يوم جالنا خبر ان هما هيبيعو الارض اللي في البلد وهيقسمو نصيبنا وفعلا سافرنا وهناك عمي قالنا
اسمعي يادكتوره يسريه انا عارف انك نواره العيله وقولت اتفاهم معاكي برواقه
قولتله اتفضل يا عمي قالي انا فرقت علي كل عمامك نصيبهم في الأرض فاضل البيت معلش سامحيني احنا مش هنبيعه
قولتله طبعا يا عمي مش هنبيعه ده هو ده اللي بيلمنا كلنا ، انا معاك انه مايتباعش
عمي قال بإستغراب انا كنت فاكرك هتزعلي من كلامي اكمنك بتحبي مصر ومش بتحبي تيجي البلد
قولتله لا طبعا انتم اهلي وناسي وعمري ماضايق منكم
قالي الله يكرمك يا بنتي واشوفك احسن دكتوره احنا بنفتخر بيكي كلنا يا يسريه
قولتله ربنا يخليك يا عمي
امي قالتلي انا فرحانه بيكي يازينه البنات
قولتلها بضحك طيب ماسميتونيش زينه ليه بدل من يسريه ده
قالتلي نصيب يا بنتي قبل مابنتولد واسمنا مكتوب
قولتلها الحمد لله وقعدنا في البلد اسبوع واخدنا الفلوس ورجعنا
بصيت لنفسي فالمرايه وقولت ياااه شكلي يغر صحيح معقول انا يسريه بنت البواب في ايدي موبايل شيك ولابسه من اغلي الماركات وبرفاناتي من احسن بلاد ، فوقي يا يسريه لولا مدام اميمه وروان ماكنتيش بقيتي حاجه الإنسان مش بشكله ولا بلبسه الإنسان بنجاحه وشخصيته وصفاته
