رواية بنت البواب الفصل السادس 6 بقلم اية عادل
كنت دايما جوايا صوت بيفوقني من غروري وبيقولي انجحي وانتي هتبقي احسن الناس
وبعد شهر من الاحداث الروتينيه لقينا واحده جارتنا بتقول ل ماما بقولك يا ام يسريه في راجل اسمه الحاج فاروق قافل المحل بتاعه وعايز يأجره ايه رأيك تأجريه منه
امي قالتلها والله فكره كويسه بس اشور فيها بنتي اشوف رأيها ايه وربنا يسهل
امي لما قالتلي قولتلها يا امي النصبه ماقالتش لا
قالتلي بس اضمن يا بنتي المحل اضمن كتير احنا ولايا الأول كان ربنا ساترها معانا لأن احنا كنا بنشتغل في نفس الشارع دلوقتي لا
قولتلها عندي فكره كويسه يا امي وهتريحك وتجيبلك زباين اكتر
قالتلي ايه
قولتلها احنا نفتح المحل وبرضو نقول لكل اللي حوالينا أننا بنوصل طلبات للبيت وبكده هيطلعلنا فلوس كويسه من توصيل الطلبات
قالتلي ومين اللي هيوصل
قولتلها انا يا امي
قالتلي ومذاكرتك
قولتلها مالها مذاكرتي احنا هنقول ان الدليفري هيبقي بعد الساعه 2 والايام اللي هيبقي عندي محاضرات هنقفل التليفون ونكتفي بالبيع في المحل
امي قالتلي علي خيره الله واتفقت مع الحاج فاروق اللي لما عرف ظروفنا قالي يا بنتي وقت ماتكوني عندك محاضرات وفي توصيل انا هخلي اي عيل يطلع الحاجه مكانك ونديله 5جنيه
وبصراحه كان راجل طيب جدا ولما كان بيلاقيني قاعده في المحل كان بيعملي كوبايه شاي تظبطلي دماغي وانا بذاكر
كانت روان دايما تكلمني واللي يضحك اكتر أنها كانت بتيجي تقعد معايا في المحل وكانت بتقعد تتحايل عليا توزن وتعبي للناس والله بحبها جدا البنت دي رغم مستواهم الاجتماعي الا انها تقدر تحسسك أنها منك جدا
وانا في الجامعه كنت دايما اطلع من الاوائل لقيت دكتور رامي في المحاضرة بتاعته
بيقولي لما حس اني سرحانه ولا ايه يادكتوره يسريه قولتله معاك يا دكتور قالي كنت بقول ايه
قولتله كان بيقول ايه
قالي طب مانتي مركزه أهو امال مش بصالي ليه
قولتله بتلقائيه سمعاك مش لازم ابصلك
عدهالي ولما جيت امشي لقيته بيقولي
علي فكره ردك مش عاجبني واسلوبك عنيف
قولتله معلش مخدتش بالي
ومشيت وكنت في اليوم ده محتاسه عندي كذا طلب لازم اوصله وشيله تقيله روحت وطلعت شنطتي واخدت الطلبات وابتديت اوصل الطلبات
وكان من ضمنهم كذا طلب للعماره اللي كنا شغالين فيها ، ولما وصلت ل شقه رنا قولت في سري يارب ماتقوليش كلمه تخليني اجيبها من شعرها ، بس مامتها هي اللي فتحت وقالتلي كويس انك جيتي يا يسريه خدي العنوان ده ولسته الطلبات دي وصليها وخدي الفلوس اهي
قولت لنفسي يادي النيله ده انا ماصدقت خلصت ، يلا محدش يقول للرزق لا ، روحت المحل واخدت الطلبات وروحت العنوان اللي قالتلي عليه وطلعت وخبطت والمفاجأه كانت في اللي فتحلي الباب ، دكتور رامي
فتحلي وقالي انتي اااانتي دكتوره يسريه
قولتله وانا مكسوفه وبحاول ابقي قويه ، اها انا دكتوره يسريه اتفضل يا دكتور الطلبات دي حضرتك طالبها من شقه استاذ ياسر
قالي ادخلي طيب اتفضلي اجيبلك الفلوس
قولتله لا شكرا انا هقف هنا ، فضلت واقفه وانا كنت هعيط من الموقف
وخرج دكتور رامي وقالي اتفضلي الفلوس أهي
اخدتها ولقيته مديني فلوس زياده قولتله لا حضرتك ليك باقي الحساب كله 150جنيه و20جنيه توصيل يعني 170وحضرتك مديني 300
قالي خلي الباقي علشانك
هنا كنت فقدت اعصابي وقولتله حضرتك انا مش بشحت ومش مستينه فلوس حقي 170 واتفضل الباقي بتاع حضرتك ...
يتبع
بكره باذن الله هنزل آخر جزئين بالليل معلش اتأخرت عليكم بس الظروف صعبه عليا اوي اليومين دول
