-->

رواية لا احد سواك الفصل الثامن 8 بقلم سمسم

رواية لا احد سواك الفصل الثامن 8 بقلم سمسم

     

    رواية لا احد سواك الفصل الثامن 8 بقلم سمسم

    لبارت الثامن
    ولكنه وجد باب غرفته يفتح ويدخل منه اخيه أكرم
    أكرم.....مالك يا ابنى فيك ايه بس قالولى انك مصدع
    وانت قالع قميصك ليه كده هو اللى بيصدع بيقلع هدومه
    رائف....اكرم انا مش فايقلك ياريت تسكت ماشى
    أكرم..... حاضر هسكت بس كان فى موضوع شاغلنى أوى
    رائف.....موضوع ايه ده اللى شاغل سيادتك
    أكرم.....دكتور يوسف
    رائف بعصبية..... ماله دكتور بتاع ده كمان
    أكرم بحذر......كلمنى عن سچى النهاردة
    رائف.....وده عايز منها ايه بقى ان شاء الله
    أكرم.....كان قالى انه طلب منها انه يتقدملها بس هى مردتش عليه لدلوقتى فكان عايز يعرف رأيها إيه فى الموضوع ولما عرف انها عايشة معانا هنا فكلمنى اتوسطله فى الموضوع ده واقولها علشان يعرف رأيها إيه
    رائف.....انت هتشتغل له خاطبة يا أكرم
    أكرم بذهول .....خاطبة! فى ايه يا رائف انت عمال تغلط ليه كده يا جدع انت ما تحاسب على كلامك يا اخى
    رائف بعصبية شديدة..... وانت جاى تقولى انا ليه ها مكلمتش صاحبة الشأن ليه هو انا ولى امرها ولا مسئول عنها روح شوف مين ولى امرها وقوله متقوليش انا انا مليش دعوة بيها ماشى يا أكرم
    أكرم....لا دا انت حالتك صعبة اوى يا رائف
    رائف.....حالة ايه دى بقى يا دكتور أكرم اللى صعبة
    أكرم بصراحة..... حالة الحب اللى بهدلتك اوى دى يا اخويا والغيرة اللى مولعة فى قلبك نار بسبب حبك ليها وغيرتك عليها
    رائف بتوتر.....انت بتخرف بتقول ايه حب ايه وبتاع ايه وغيرة ايه دى كمان اللى مولعة فى قلبى ومين دى اللى بحبها كمان وبغير عليها انت اتجننت يا أكرم ولا إيه
    أكرم..... والله انت هتلف وتدور عليا انا اكتر واحد اعرفك يا رائف لأننا مش بس اخوات لاء واصحاب كمان وعمرنا ما خبينا حاجة على بعض ودايما بنصارح بعض بكل حاجة ومفيش ما بينا اسرار
    رائف.....الظاهر فعلا انك بتخرف يا أكرم وبتتوهم حاجات فى دماغك انت عيان يا حبيبى لو عيان شوفلك حاجة علشان تخف كده غلط عليك يا دكتور
    أكرم....... بقى كده ماشى اتريق براحتك يا رائف براحتك بقى انا هروح اقول لتيتة وبابا وماما على الموضوع ده
    رائف......موضوع ايه ده اللى هتقولهم عليه
    أكرم..... إن يوسف عايز يتجوز سچى وطالما هى تعرفه مظنش هتمانع بقى وهو عريس كويس ومناسب ليها
    شعر رائف بتمزق فى قلبه بعد سماعه هذا الكلام هل من الممكن ان توافق سچى ان تتزوج من يوسف فهو لن يتحمل ذلك ولكنه لا يملك ان يفعل شئ فهذه حياتها وهى حرة بها
    رائف ببرود.....ربنا يسعدهم يا سيدى عايز حاجة تانية بقى ولا ترحمنى وتسيبنى فى حالى
    أكرم.....ايه يابنى حرام عليك نفسك هو انت غاوى تعذيب فى نفسك يا رائف أنا عارف انك بتحبها وهتموت عليها كمان
    رائف.....هى مين دى اللى هموت عليها
    أكرم.....سچى يا رائف ومتنكرش انك بتحبها كل تصرفاتك وغيرتك اللى بسبب ومن غير سبب دى إيه ها دا انت حتى بتغيير عليها من شادى لما بيكلمها وبيضحك معاها بتغير عليها منى لو طلبت منى حاجة وانت متعرفش بتغير عليها لما تخرج من البيت بيبقى نفسك تحبسها هنا ومتخلهاش تخرج صح ولا انا غلطان
    رائف باحباط.....دى تهيؤات فى دماغك يا أكرم انا منفعش احب ولا اتحب خلاص انا مبقتش انفع لاى حاجة خالص
    أكرم.....ليه يعنى بتقول كده يا حبيبى
    رائف.....بتسأل ليه يا أكرم يعنى مش شايف حالتى واللى انا فيه مش شايف انا بقيت عامل ازاى
    أكرم.....ومالها حالتك حادثة وحصلتلك ودلوقتى بتتعالج وفى تحسن كبير فى حالتك وان شاء الله ممكن تعمل عملية وتمشى كويس زى الأول يعنى الحكاية مسألة وقت مش أكتر يا رائف
    رائف.....انت بتحاول تجملى المستقبل يا أكرم حتى لو ده حصل لسه عليه وقت على ما يحصل حتى شغلى انت عارف انى خلاص مينفعش ارجعله
    أكرم.....وفيها ايه يعنى دى كمان انت برضه معاك شهادة فى الهندسة يعنى انت مهندس ودارس تخصص ميكانيكا زى بابا وانت عارف بابا عنده شركة ومصنع يعنى انت بكل سهولة وبكل بساطة ممكن تروح تشتغل مع بابا فى الشركة ودى حاجة مش صعبة انت حتى بابا كان بيتحايل عليك تسيب الجيش وتشتغل معاه بس انت اللى كنت مصر علشان حابب انك تبقى ظابط فى الجيش
    رائف......وقدر هى اللى حابة تتجوز يوسف هتغصبها مثلا وتقولها لاء اتجوزى اخويا اللى بيتهيألى انه بيحبك
    أكرم......والله احنا هنقولها وهى تقرر بس لو هى رفضت يوسف اظن يبقى عندك فرصة يا رائف انك تصراحها بحبك ده ومتخليهاش تضيع من ايدك
    رائف......والنبى تسكت يا أكرم انا مبحبش حد ولا هحب حد خلاص الحب مش فى حساباتى دى صفحة وقفلتها من زمان
    أكرم...... برضه يا رائف دا انت غاوى وجع قلب بقى ماشى مايا وقولنا يا فرج الله انها بعدت عنك ليه بقى عايز تضيع سچى من ايدك واديك شوفت اخلاقها وادبها وتربيها دى الواحد يحط اسمه وشرفه وعرضه وماله وكرامته فى أيدها وهو مطمن انها هتصونه مش لا مؤاخذة يعنى زى مايا اللى اصحابها الولاد اكتر من البنات
    رائف......لا مايا ولا غيرها رائف خلاص مبقاش ينفع يحب تانى
    أكرم بتنهيدة تعب.....ماشى يا رائف هسيبك على راحتك دا انت متعب اوى وغاوى تعذيب فى نفسك وفى اللى حواليك
    رائف.....شفت بقى ان كل اللى فى دماغك دى تهيؤات مش أكتر يا دكتور
    أكرم....تهيؤات ! ماشى قوم بقى نتعشى الكلام معاك جوعنى وجابلى احباط
    قام أكرم بالتقاط قميص رائف من على الأرض واعطاه له لكى يرتديه
    أكرم بلؤم....خد قميصك البسه خلينا نخرج لهم برا احسن تكون سچى زهقت وراحت تنام من غير عشا
    رائف....هات يا ظريف
    دخل شادى الغرفة ليخبر اخويه بمجئ احد معارفهم وهو شاب يدعى عصام ابن احد اصدقاء ماهر
    شادى.....الحقوا الحقوا تعرفوا مين جه برا دلوقتى
    أكرم.....مين ده يا شادى اللى جه برا
    شادى..... عصام
    رائف.....يادى النيلة وايه اللى جابو ده كمان دلوقتى
    أكرم بهمس لرائف......الحق بقى قبل ما يبقى عصام غريمك وانت فاهمنى وعصام مش بيعتق حد
    رائف بهمس.....ماهى نقصاه هو كمان مش كفاية يوسف خليه يعمل حاجة وانا اطلع عينه
    خرج رائف وأكرم وشادى من الغرفة وجدوا عصام يجلس فى الصالة مع والديهم وجدتهم وسچى
    عصام......ازيكم عاملين ايه
    رائف بسماجة.....عاملين نفسنا كويسين يا حبيبى
    أكرم.....اهلا يا عصام منور يا حبيبى
    عصام....دا نورك يا دوك اخبارك ايه
    أكرم.....الحمد لله
    ماهر.....باباك ومامتك عاملين ايه يا عصام بقالى شوية مشفتش باباك
    عصام.....كويسين الحمد لله بيسلموا عليكم بابا الشغل واخد كل وقته وانت عارفه يا عمى بيحب الشغل اوى صحيح مين الآنسة انا اول مرة اشوفها هنا
    رائف باندفاع..... وانت مالك انت بتسأل ليه
    هدى....دى قريبتنا يا عصام الدكتورة سچى
    ثم نظرت نظرة عتاب الى رائف بسبب قلة ذوقه فى الرد على سؤال عصام
    عصام.....وهى دكتورة فى ايه
    رائف.....هتبقى دكتورة علاج طبيعى يعنى لما رقبتك تنكسر بعد الشر يعنى هى هتعالجك
    كان عصام فى سن رائف حتى انهم كانوا يدرسون في كلية واحدة ولكنهم لا يوجد بينهم توافق بسبب ان رائف لا يحب تصرفات عصام فعصام يهوى صحبة الفتيات وعصام كان يغار من رائف بسبب تفوقه الدراسى فعلاقتهم ليست جيدة
    أكرم بهمس لرائف......رائف لم دورك انت خليتها خل على الآخر
    رائف....انت مش شايف سماجته ورخامته واحد رزل بجد
    اكرم.....دا بيسأل عادى يعنى دا الحب بهدلة صحيح
    رائف.....لا ياراجل حب ايه بقى ان شاء الله هتسكت ولا اقوم اولعلك فى نفسى علشان ترحمنى يا أكرم
    أكرم.....يا حبيبى اجبلك طفاية الحريق هو انا يرضينى برضه انك تولع فى نفسك واقف اتفرج
    رائف.... قوم من هنا احسنلك ياض انت
    أكرم......اقوم وافوت الفيلم ده برضه دا انا هشوف فيلم اكشن دلوقتى
    عصام.....تشرفنا يا آنسة سچى
    سچى بابتسامة خجولة.....شكرا
    ماهر....يلا بينا نتعشى يلا يا عصام اتفضل معانا
    جلسوا جميعا على السفرة جلس أكرم بجوار رائف فهو يعلم ما يشعر به الآن وخصوصا ان عصام لا يرفع عينه عن سچى برغم انها تنظر إلى طبقها ولا تتكلم
    عصام....هو انتى يا آنسة سچى لسه بتدرسى
    صفية بالنيابة عن سچى.....لسه فاضلها سنة
    عصام....بالتوفيق ان شاء الله
    سچى بهمس.... شكراً
    أكرم....ايه يا عصام يا حبيبى مش هتاكل اكلك هيبرد
    كان يجلس رائف بصمت يراقب نظرات عصام لسچى وكان يريد شىء واحد ان يقوم برمى طبقه فى وجه عصام حتى يكف عن النظر اليها بتلك الطريقة الوقحة من وجه نظره
    وكأن اكرم شعر بما يريد رائف ان يفعله فرائف أصبح يتصرف بعصبية غير مبالى بالنتائج فمسك يده اخيه
    رائف....فى ايه يا أكرم ماسك ايدى ليه كده
    أكرم.....علشان عارف وحاسس باللى انت بتفكر فيه
    رائف.....اللى هو ايه بقى
    أكرم....انك عايز تخبط عصام بالطبق اللى قدامك ده دلوقتى
    رائف بدهشة....انت بقيت دكتور روحانى وبتقرأ الافكار ولا ايه
    أكرم....هههه لاء يا حبيبى بس انت مكشوف اوى وواضح ليا يعنى ممكن استنتج رد فعلك على طول
    رائف....طب كل وانت ساكت للبسك انت الطبق فى وشك
    أكرم.....بقى كده ماشى يا رائف
    رائف....انت بقيت غتت كده ليه يا أكرم
    أكرم....انا غتت علشان بواجهك بالحقيقة
    انتهوا من تناول الطعام وبعد فترة قصيرة استأذنت سچى لكى تذهب إلى الاستراحة
    سچى .....عن اذنكم وتصبحوا على خير
    هدى.....اتفضلى يا حبيبتى وانتى من اهله
    خرجت سچى من المنزل لكى تذهب إلى الاستراحة ولكنها ارادت الجلوس فى الهواء المنعش فى الجنينة قبل ان تذهب إلى النوم جلست على الكرسي الهزاز اخذت تحرك الكرسى وهى مغمضة العينين مستمتعة بتلك الحركة وبذلك الهواء الذى يرطب من سخونة وجهها فدائما تكون تلك حالتها عندما يكون حاضرا فى المكان
    غلبها النوم وهى جالسة فى هذا الوضع ولم تشعر بأى شئ حولها
    بعد ان انتهى عصام من جلسته معهم هب واقفا حتى ينصرف هو الآخر الى منزله
    عصام.....عن اذنكم انا بقى انا همشى
    ماهر.....لسه بدرى يا عصام
    عصام.....بدرى من عمرك يا عمى
    هدى....سلملى على مامتك اوى يا عصام
    عصام....يوصل ان شاء الله
    سلام يا شباب
    أكرم وشادى.....مع السلامة يا عصام
    رائف بهمس....سلام يا اخويا المركب اللى تودى
    لا يعرف لماذا فكر ان يخرج خلف عصام فنفسه وسوست له ان يخرج ولا يعرف السبب
    خرج عصام واثناء مروره من الجنينة لمح سچى نائمة على الكرسى الهزاز وضع يده بجيوبه وظل ينظر اليها وهى نائمة تشبه الملائكة ظل واقفا فى مكانه حتى سمعوا صوت رائف
    رائف بصوت عالى.....سچيييييييى
    فزعت سچى من نومها عندما سمعت صوته العالى وكانت لهجته مشبعة بالعصبية
    سچى بخضة..... بسم الله الرحمن الرحيم ايوة فى ايه
    رائف.......انتى حضرتك نايمة هنا ليه اتفضلى قومى يلااااا
    عصام بابتسامة.....سلام يا آنسة سچى فرصة سعيدة
    سچى.....مع السلامة يا استاذ عصام
    انصرف عصام دون ان يلتفت الى رائف الذى كان واقفا وعروقه بارزة من شدة غضبه
    رائف......انتى ازاى تنامى هنا ها وانتى من امتى بتنامى هنا
    سچى....كنت قاعدة بشم هوا والنوم غلبنى من غير ما أحس انا ما اجرمتش يعنى وكنت قاعدة على الكرسى
    رائف......النوم غلبك ولا انتى كنتى حابة انه يشوفك كده وانت نايمة بالمنظر ده
    سچى..... منظر ايه اللى انت بتقول عليه انا كنت قاعدة على كرسى مش نايمة على كنبة يعنى ثم انت ازاى تتجرأ وتقولى كده ها انت مفكر نفسك ايه وازاى تتهمنى بكلام زى ده ياريت تحافظ على كلامك قبل ما تقوله انت فاهم
    واشارت باصبعها فى وجهه دليل على تهديدها له بكلامها بضرورة ان يحترم كلامه معها ولا يتجاوز حدوده فى الكلام
    رائف.....وكمان بتهددينى بكلامك دا انتى بقيتى جريئة أوى
    سچى.....شوف بقى انا سمعت منك كتير واستحملت وسكت علشان انا طبعى انى مردش الإساءة بالاساءة لكن كفاية كده انا مش هسمحلك انت او اى حد تانى انه يتجاوز حدوده فى الكلام معايا او انك توجهلى كلام ميعجبنيش او حتى تتهمنى بحاجة انا معملتهاش ولو حضرتك مضايق من وجودى اوى كده ومش لاقى حاجة تعملها غير انك كل شوية تهاجمنى بكلامك يبقى خلاص انا داخلة اقول لجدتك انى ماشية من هنا خالص علشان ترتاح وانا كمان ارتاح
    عندما حاولت ان تذهب لتخبرهم انها تريد ترك المنزل اوقفها صوته
    رائف.....استنى عندك هنا
    سچى....نعم خير افندم فى حاجة تانية عايز تقولها
    رائف.....انتى مش هتمشى من هنا انتى فاهمة
    سچى.....ومين اللى هيمنعنى بقى
    رائف.....انا اللى همنعك انك تمشى
    سچى.....بصفتك ايه بقى ان شاء الله هتمنعنى من انى امشى
    رائف.....بصفتى ابن الراجل والست اللى حبوكى زى ولادهم ولو مشيتى هيزعلوا وجدتى هتزعل
    سچى....والله باباك ومامتك وجدتك وكلهم على عينى وراسى بس انت اللى مش عارفة انا عملتلك ايه علشان تعمل معايا كده
    رائف......معملتيش حاجة وياريت تنسى اللى حصل واتفضلى روحى نامى
    سچى....تسمحلى اقولك حاجة
    رائف....... حاجة ايه دى
    سچى بتراجع..... بلاش احسن تزعل عن اذنك
    تركته سچى وذهبت إلى الاستراحة وهى تنفخ من الغضب بسبب كلامه واسلوبه معها
    كان واقفا مكانه يفكر ماذا كانت ستقول وتراجعت ولم تخبره بما تريد
    **********
    فى المستشفى
    بعد ان انتهت سچى وريهام من التدريب اراد يوسف ان يتحدث مع سچى بخصوص موضوع ارتباطهم
    يوسف.....لحظة يا انسة سچى
    سچى.....افندم يا دكتور يوسف
    ريهام.....انا هسبقك وابقى تعالى
    سچى....ماشى خير يا دكتور
    يوسف....انا سبق انى طلبت منك ان احنا نرتبط بس انتى مردتيش عليا لدلوقتى
    سچى بهدوء....كل شئ قسمة ونصيب يا دكتور يوسف
    يوسف.....يعنى ايه
    سچى....حضرتك دكتور ممتاز ومحترم جدا بس انا مش هقدر نرتبط
    يوسف.....افهم من كده ان فى حد تانى فى حياتك
    سچى.....مش موضوع ان فى حد تانى الموضوع انى بحترمك كدكتورى غير كده انا اسفة
    يوسف بتفهم.....فهمتك يا سچى
    سچى.....اتمنى ان حضرتك متزعلش منى
    يوسف....لا ابدا وزى انتى ما قولتلى كل شئ قسمة ونصيب
    سچى.....حضرتك ان شاء الله ربنا هيرزقك بالبنت اللى تسعدك
    يوسف بابتسامة.....شكرا يا سچى وانتى هتفضلى طول عمرك بالنسبة ليا الطالبة المجتهدة اللى ليها احترامها عندى
    سچى....شكرا يا دكتور يوسف وربنا يوفقك
    يوسف.....ويوفقك انتى كمان عن اذنك
    سچى....اتفضل
    بعد ذهابه جلست سچى مكانها تفكر هل فعلت الصواب برفضها له؟ ولماذا رفضته من الأساس ؟هل بسبب ذلك القاسى الذى لا يملك سوى ان يجرحها بكلامه؟ فاقت من افكارها على صوت ريهام
    ريهام.....ايه يابنتى مجتيش ليه وقاعدة متنحة ليه كده
    سچى بتوهان.....ها بتقولى ايه يا ريهام
    ريهام....مالك يا بنتى فى ايه وصحيح دكتور يوسف كان عايز ايه منك
    سچى....بيكلمنى فى الموضوع إياه لما كان عايز يخطبنى
    ريهام.... وانتى رديتى عليه قولتيله ايه
    سچى.... رفضت يا ريهام
    ريهام....ليه يا بنتى دا دكتور يوسف محترم جدا ومركزه كويس واى بنت تتمناه
    سچى....عارفة بس انا مقدرش اوافق مش هو ده اللى بتمناه
    ريهام بحيرة.....ليه يعنى فى ايه
    سچى.....اهو كده وخلاص يلا بينا خلينا نشوف هنعمل ايه
    ريهام.....بت انتى بتتهربى من الكلام ليه انتى مخبية عنى حاجة فى حاجة انا معرفهاش
    سچى.....هتهرب ليه يعنى وحاجة ايه دى اللى هخبيها عليكى ما سرى كله معاكى
    ريهام....لاء انتى شكلك عايزة قاعدة اعرف فيكى ايه لانك اول مرة احس انك مخبية عليا حاجة
    سچى بابتسامة.....يلا يا مجنونة خلينا هنشوف نعمل ايه وبطلى رغى
    ***********
    فى منزل حامد راضى
    اتصلت أروى بسچى فهى تريد ان تراها فمنذ ان تركت منزلها وهى لم تراها فأرادت ان تطمئن عليها
    أروى.....الو ازيك يا سچى عاملة ايه يا حبيبتى
    سچى....الحمد لله يا حبيبتى تمام وانتى عاملة ايه
    أروى....الحمد لله وحشتينى اوى والله ونفسى اشوفك ما تيجى
    سچى....انتى عارفة مامتك يا أروى فمش هينفع اجى عندكم
    أروى باحباط.....ايوة عرفاها بس انا نفسى اشوفك واقعد معاكى نتكلم شوية من اخر مرة شوفتك فيها وانا مش عارفة اشوفك
    سچى....خلاص تعالى نتقابل ونتمشى شوية قولتى ايه
    أروى بحماس.....ماشى موافقة
    سچى....خلاص هستأذن وابقى ارن عليكى تقابلينى
    أروى.....خلاص ماشى سلام
    سچى....مع السلامة
    اغلقت اروى الهاتف وهى سعيدة لأنها ستقابل أختها وجدت والدتها تدخل الغرفة فلا تعرف ماذا تقول لها حتى تدعها تخرج من المنزل لمقابلة سچى
    فادية.....كنتى بتكلمى مين يا أروى
    أروى بتوتر....دى دى واحدة صاحبتى بقالى كتير مشوفتهاش
    فادية.....وعايزة منك ايه دى دلوقتى
    أروى.....كانت عايزة تشوفنى اصل بقالنا فترة كبيرة مشوفناش بعض من ساعة ما خلصنا دراسة
    فادية.....ما تخليها تجيلك هنا تقعد معاكى
    أروى....هى بتقول نتقابل ونتمشى شوية بدل قاعدة البيت
    فادية.....ياسلام ومالها قاعدة البيت يعنى
    أروى.....تخنق يا ماما والنبى توافقى سبينى أخرج اشوفها علشان خاطرى
    فادية باستسلام....خلاص هتخرجى بس متتاخريش لو اتاخرتى مفيش خروج تانى ماشى يا أروى
    أروى.....لا مش هتأخر هنتمشى شوية واجى على طول
    فادية.....ماشى
    رجع حامد من عمله ولكنه يبدو عليه التعب والتفكير كأن هناك ما يشغله
    فادية.....جاى بدرى النهاردة يعنى يا حامد
    حامد....مفيش تعبان شوية فجيت علشان ارتاح
    أروى.....سلامتك يا بابا مالك فى ايه
    حامد....مفيش يا حبيبتى دول شوية صداع وخلاص
    فادية.....هشوفلك برشامة مسكن
    أروى....بابا انا هخرج اشوف واحدة صاحبتى
    حامد....ماشى بس مفيش تأخير ترجعى بدرى
    أروى..... حاضر هاجى بسرعة
    دخل حامد غرفته وهو يفكر فى حل لتلك المشكلة التى تشغله حاليا والتى اذا لم يجد لها حل ستؤدى به الى الخراب
    ************************
    فى منزل ماهر زيدان
    اراد سچى الاستئذان من صفية لكى تخرج وتقابل اختها أروى فوجدتها تجلس هى وزوجة ابنها ورائف
    سچى.....لو سمحتى يا تيتة
    صفية......نعم يا حبيبتى فى ايه
    سچى.....انا عايزة اخرج شوية
    هدى......فى حاجة يا سچى حصلت
    سچى....لاء ابدا يا طنط بس هقابل أروى اختى
    صفية....خليها تجيلك هنا يا حبيبتى وتقعد معاكى براحتها
    سچى....الصراحة انا عايزة اقابلها ونتمشى شوية بعد اذنك
    صفية....ماشى يا حبيبتى روحى
    هدى.....خلى بالك من نفسك وخلى السواق يوصلك
    سچى.....بلاش المرة دى انا هاخد تاكسى بلاش اذنبه معايا لانى انا وهى هنتمشى
    رائف.....ليه مش عايزة تاخدى السواق حضرتك ناوية تباتى برا النهاردة
    سچى....عن اذنكم علشان متأخرش
    خرجت بدون ان ترد عليه فماذا يريد منها ؟ ولماذا يفعل ذلك؟ التمعت الدموع فى عينيها وتساقطت رغما عنها
    صفية.....فى ايه يا رائف
    رائف....فى ايه يا تيتة
    صفية.....انت ليه بتتكلم مع سچى بالطريقة دى كأنها دايما تهاجمها فى الكلام عيب كده انت بتحرجها بكلامك ده
    هدى....فعلا انت طريقتك ناشفة اوى معاها يا رائف ليه كده ما اخواتك بيعاملوها عادى اشمعنا انت اللى دايما تسمعها كلام يزعلها
    رائف بتريقة..... طريقتى ناشفة معاها حاضر هطريها حاجة تانية
    صفية....بتتريق يا رائف على كلامنا
    رائف....اعاملها ازاى يعنى اضربلها تعظيم سلام فى الداخلة والخارجة علشان ميبقاش دمى تقيل
    هدى....انت بقيت غريب اوى يا رائف
    رائف....لا غريب ولا حاجة ما انا زى ما انا اهو
    دخل إليهم شادى بعد ان انتهى من احدى تجاربه الخارقة التى دائما ما يتسبب فى كارثة بعدها
    شادى.....هو فى ايه اللى حصل
    صفية.... حصل فى ايه
    شادى....سچى مالها كانت بتعيط ناديت عليها ما رديتش وزى ما تكون جريت على الاستراحة علشان محدش يشوفها وهى بتعيط
    هدى....ارتحت يا رائف يارب تكون مبسوط دلوقتى باللى انت عملته
    رائف.....وانا عملت ايه يعنى هو انا شتمتها
    صفية.....حبيبى مش كده الكلام ميبقاش كده
    رائف.....حاضر مش هتكلم معاها خالص ولا كأنى شايفها تمام كده
    شادى....هو فى ايه انا مش فاهم حاجة
    رائف.....احسن برضه انك مش فاهم حاجة
    عندما علم انها تبكى استغبى تصرفه معها فلماذا دائما ما يضايقها؟ لماذا لا يحبها ان تخرج من المنزل ؟ لماذا يشعر انه يريد ان يحبسها فى برج عالى ويتولى هو حمايتها وحراستها ولا يجعل احد يراها غيره
    رائف فى نفسه......دا انا شكلى اتجننت على الآخر على رأى أكرم
    ************
    تقابلت سچى واروى فى كافتيريا حتى يستطيعوا ان يتحدثوا بحرية
    أروى......عاملة ايه يا حبيبتى
    سچى....الحمد لله تمام انتى عاملة ايه
    أروى بضحك..... الحمد لله اهو قاعدة فى البيت لحد ما خللت دا الدراسة كان الواحد بيخرج دلوقتى مفيش حاجة نعملها
    سچى.....قاعدة البيت مملة اوى صحيح ايه رأيك نقوم نشترى ساندوتشات ونتمشى فى الشارع شوية نشم هوا بدل ما احنا قاعدين كده اهو تغيير
    أروى.....والله فكرة برضه يلا بينا
    قاموا بشراء الساندوتشات وظلوا يتمشوا وقتا طويلا وهم يتحدثون عن كل شئ وعن لا شئ ولكن سچى لم تنتبه فكان شابين يركبون دراجة نارية قام احدهم بسحب شنطتها من على كتفها ولكنها ظلت متمسكة بها ولا تريد افلاتها وبسبب سرعة الدراجة النارية سقطت سچى على الأرض وهى ممسكة بشنطتها
    أروى بخضة.....سچى سچى انتى كويسة يا حبيبتى
    سچى بألم.....الحمد لله بس شكل ايدى اتجزعت يا أروى اصل الكلب ده كان بيشد الشنطة جامد ولما وقعت وقعت على ايدى
    أروى..... طب تعالى بسرعة نروح اى مستشفى نشوف ايدك حصلها ايه
    سچى..... ماشى يلا بينا
    ذهبت أروى وسچى الى احدى المستشفيات القريبة طلب منها الدكتور عمل اشاعة ليدها وبعد عمل الاشاعة
    الدكتور......الحمد لله ده مش كسر ده جزع بسيط بس نعمل له جبيرة علشان تخف بسرعة
    سچى بالم.....ماشى يا دكتور اللى تشوفه
    قام الدكتور بعمل الجبيرة ليد سچى وبعد ان انتهى كتب لها على بعض المسكنات للالم
    الدكتور....اتفضلى انا كتبتلك على مسكنات علشان هى هتوجعك فانتى خدى الدوا وان شاء الله هتبقى كويسة
    والف سلامة
    سچى بألم.....الله يسلمك يا دكتور ومتشكرة جدا
    خرجت سچى واروى من غرفة الدكتور وذهبوا لجلب الدواء حتى تعود إلى المنزل
    أروى....هاتى يا حبيبتى اجبلك الدوا
    سچى....تعالى نجيبه سوا
    قاموا بشراء الدواء وارادت سجى الرجوع الى المنزل فكفى ما حدث اليوم فهى تشعر بالوجع بسبب يدها
    أروى.....انا اسفة يا سچى انا السبب خليتك تخرجى من البيت وده حصلك
    سچى....متقوليش كده دا كله مقدر ومكتوب وانا مبسوطة انى شفتك
    أروى.....الف سلامة عليكى يا حبيبتى
    سچى بابتسامة.....تسلميلى يا حبيبتى يلا بقى روحى علشان متتأخريش ولما توصلى رنى عليا طمنينى انك وصلتى ماشى يا أروى
    أروى.....ان شاء الله خلى بالك من نفسك
    سچى....وانتى كمان سلام
    أروى.....مع السلامة
    ذهبت أروى وعادت سچى الى المنزل فبالرغم من وجعها الا انها سعيدة انها رأت اختها اليوم
    **********
    فى منزل ماهر زيدان
    عادت سچى الى المنزل وذهبت إلى الاستراحة قامت بتغيير ملابسها بصعوبة بسبب ان يدها التى بها الجبيرة هى يدها اليمنى وبعد ان انتهت جلست لترتاح وتلتقط انفاسها فشعرت انها تريد ان تنام فنامت لعل النوم ينسيها الم يدها وبعد فترة استيقظت من النوم ذهبت الى الباب وفتحته كان تريد الخروج ولكن انتابها دوار شديد فاسندت نفسها الى الباب حتى تستعيد توازنها
    كان ماهر عاد من عمله واكرم ايضا وتجمعوا جميعا لتناول العشاء ولكنه لاحظ رائف ان سچى لم تكن موجودة ففكر انها لم تعود من مشوارها فلماذا تأخرت كل هذا الوقت؟ وماذا حدث؟
    رائف بسخرية......هى الانسة سچى لسه مرجعتش من برا لدلوقتى
    ماهر....برا فين هى راحت فين يا هدى
    هدى....كانت خرجت تقابل اختها أروى بس لسه مجتش لدلوقتى
    صفية بقلق ....اتصلى عليها يا هدى شوفيها فين دى مش عوايدها تتأخر برا كده
    قامت هدى بالاتصال عليها ولكن هاتفها مغلق فحاولت مرارا ولكن يأتيها نفس الرد
    هدى....تليفونها مقفول
    أكرم.....ليكون حصل ليها حاجة
    شادى....لا ان شاء الله خير اكيد هى كويسة متقلقوناش يا جماعة
    رائف بسخرية.....تلاقيها بس القعدة عجبتها وتليفونها فاصل زمانها جاية متقلقوش اوى كده
    ماهر....دى مش عوايدها انها تكون برا البيت فى الوقت ده
    رائف.....نقوم نعمل حفلة تفتيش عليها يعنى ولا ايه
    هدى بغضب.....وبعدين معاك فى طريقتك دى يا رائف انت هتسكت ولا لاء
    رائف ببرود.....احنا هناكل ولا ايه ولا اقوم انام احسن
    شادى....مالك يا ابيه فى ايه
    رائف.....مالى يا حبيبى انا زى الفل اهو
    أكرم بهمس لرائف.....خف يا رائف شوية انا عارف انك من جواك هتموت من الخوف عليها ولو بايدك كان زمانك دلوقتى خارج تدور عليها فى كل حتة لحد ما تلاقيها ولا ايه
    رائف.....والنبى نقطنى بسكاتك وبطل تخريف
    أكرم....حاضر هبطل تخريف وانت بطل اللى بتعمله فى نفسك وفيها ده
    ولكنه من داخله الخوف يشتعل بقلبه على غيابها ولو كان بيده كان خرج باحثاً عنها ويرى لماذا تأخرت كل هذا الوقت؟
    ولكنهم انتبهوا جميعا على صوت الخادمة وهى تنادى على هدى
    ام سيد.....هدى هانم هدى هانم الحقى
    هدى بخوف.....ايه فى ايه ايه اللى حصل يا ام سيد
    ام سيد..... الانسة سچى
    هدى....مالها سچى فى ايه ايه اللى حصل
    ام سيد................


    الفصل التاسع من هنا

    إرسال تعليق

    جميع الروايات والقصص المنشورة علي الموقع هي روايات مجانية أخذنا إذن بنشرها من أصحابها إذا وجدت أي رواية لها حقوق ملكية فكرية أو تُريد إزالتها من الموقع اتصل بنا ، ونقوم بحذفها فوراً .