رواية ولي العهد الفصل الثامن عشر 18 بقلم نورهان نصار
الفصل الثامن عشر:
كانت في الحمام تحت الدش علي ملامحها الحزن..و بتفتكر اللي حصل...
*فلاش باك*
خرجت من الحمام و هي منهاره..ازاي كانت هتنتحر و تموت كافره..لطمت علي خدها بحزن و قهر..عشان تفوق نفسها من الذنب اللي كانت هتعمله...
فريده بتأنيب:ايه يا فريده..كنتي هتضيعي دنيتك و اخرتك..و علشان مين..واحد زباله و حيوان ميستاهلكيش..
و سمعت صوت أميره و هي بتضحك...مسحت دموعها بكبرياء...و قامت من علي الارض..
فريده بقوه:انا مش هسمحله ب ده...
اتنهدت بقوه و خرجت للبلكونه عشان تشوف طريقه تحاول تنط بيها بس معرفتش لأن المسافه كانت اعلي مما هي تتخيل...ف دخلت تاني و ايدها علي دماغها دليل علي انها بتفكر و بتبص حواليها...فضلت كده دقيقه و بعدين جرت علي الحمام و دخلت بالراحه و بحرص عشان الازاز اللي علي الارض...و فتحت درج ف دولاب جانبي و طلعت ادوات الباديكير بتاعتها....و بقت تدور فيهم علي حاجه ممكن تساعدها علي فتح الباب...
فريده خبطت علي دماغها بتذكر:بنس الشعر يا فريده...
و خرجت من الحمام بسرعه علي التسريحه و فتحت درج صغير فيها و طلعت بنسه شعر..
فريده بتبص للبنسه:لازم اخرج النهارده....
و راحت علي الدولاب و طلعت هدوم ليها جينز و تيشرت حطتهم علي السرير...و قعدت علي السرير و غطت نفسها هي و الهدوم تحسباً أن يحي يدخل ف اي وقت...و فضلت كده لحد الساعه ٢ بعد نص الليل....و قامت غيرت هدومها بسرعه و خدت الكريدت كارت بتاعها...و مفتاح عربيتها من شنطتها...و طلعت كوتشي ليها و مسكت البنسه...و قعدت تحاول تفتح الباب...
فريده بتركيز:يلا..افتح بقي....
و بعد أقل من دقيقه الباب اتفتح..اتنهدت براحه و ابتسمت..و قامت اخدت الكوتشي بتاعها مسكته ف ايديها عشان ميعملش صوت و هي نازله...و قفلت الباب وراها بالراحه...و نزلت بسرعه و بحرص...و راحت علي الصالون اخدت تليفونها من هناك لأنها سايباه هناك من الصبح..و بصت بصه اخيره علي البيت و فتحت الباب بالراحه و خرجت...و طلعت تجري علي عربيتها و ركبتها و دورتها بسرعه و مشت بسرعه بعيد عن الفيلا و هي بتبص وراها و ف المرايه بتتأكد أن مفيش حد وراها...غمضت عينيها بالراحه و لنفسها:الحمد لله..
و طلعت علي مكنه لسحب الفلوس...و لبست الكوتشي بتاعها و لمت شعرها كحكه و نزلت و فضلت تسحب من الكريدت كارت فلوس..سحبت تقريبا كل اللي في المكنه و راحت علي العربيه حطت الفلوس و ركبت...و حطت الكريدت كارت ف العربيه...و طلعت بعربيتها علي النيل....و فضلت جوا العربيه و قافله علي نفسها..و بتبص للنيل...اتنفضت علي صوت خبط علي ازاز العربيه لقت أن النهار طلع و فيه بنت صغيره واقفه بتخبط علي ازاز شباك العربيه..و معاها فل...بصت حواليها بتحاول تستوعب...لحد ما افتكرت ايه اللي حصل ف خدت نفس..و فتحت شباك العربيه و وقتها صوت البنت وضح...
البنت بابتسامه:فل يا هانم...
فريده بإبتسامه ودوده:ماشي يا ستي...
البنت ضحكت بفرحه و طلعت عقد فل من اللي معاها...و ادته لفريده..و فريده ادتها فلوس تزيد بكتير عن مبلغ العقد...و ابتسمت للبنت و قفلت الشباك..و البنت مشت و هي فرحانه و بتبص للفلوس...حطت فريده العقد علي التابلوه و دورت العربيه...و طلعت علي محل لبس و دخلت و اختارت طقمين ليها مريحين و حاسبت و خرجت...و اشترت نضاره شمس من محل تاني جمبه و لبس بيتي من محل تاني...و رجعت لعربيتها..و طلعت علي موقف عربيات صغير...و نزلت....عند كبير الموقف...
فريده:لو سمحت كنت محتاجه سواق يطلع معايا...ك
كبير الموقف:عيوني يا ست الكل...يا اسطي عبده..
جه حد من مسافه مش بعيده و باين أنه راجل ف الاربعينيات:نعم يا ريس...
كبير الموقف:الست هانم عاوزه حد يطلع معاها..شوف طلبها...
عبده:تحت امرك يا استاذه...
فريده:كمان نص ساعه قدام.......
عبده:حاضر يا استاذه...
فريده:تمام..
و مشت راحت لعربيتها...و طلعت علي جراج خاص ركنت عربيته فيه..و دفعت تمن ده....و خرجت و فضلت مستنيه عبده..و بعد كام دقيقه وصل...و ركبت معاه...
فريده: اطلع علي السويس...
عبده:تمام...توكلنا علي الله..
و طلع بالعربيه علي السويس....
*باك*
فاقت فريده علي بروده المايه...ف خرجت من البانيو و لفت نفسها في فوطه..و طلعت لبست قميص بيتي خفيف و قعدت علي السرير....و بعد شويه الباب خبط..ف قامت لبست الروب بتاع القميص و خرجت من الأوضه و فتحت باب الشقه و كان البواب ..
البواب:اتفضلي يا ست الكل الحاجه اللي طلبتيها اها...و ده الباقي..
فريده اخدت منه الحاجه:شكرا يا عم مغاوري..و خلي الباقي علشانك...
و قفلت الباب بالراحه...و دخلت علي المطبخ تحط الحاجه في التلاجه...
.....................
وصل أنور لمكتب فريده..علي أمل أنها تكون راحت هناك بس ملقهاش..ف نزل بسرعه و طلع علي مكتبه في مديريه الأمن...
.....................
إسعاد بصدمه:القادره!!
دولت:اه ياختي شوفتي...هربت من غير ما حد فيهم يحس..أميره بتقولي هي ازاي نزلت يا ماما...
إسعاد:تلاقيها نطت من البلكونه زي القرده...
و بغل:ياكش كانت تقع علي جدور رقبتها و كنا خلصنا...
دولت:و الا اللي أبوها عمله...بس يحي عاقل عرف ازاي يربيه....
كانت شمس واقفه بره الاوضه وسامعه كل اللي بيتقال ده...زفرت بضيق من كلام امها و خالتها و طلعت علي اوضتها بهدوء..و اتصلت علي دنيا اختها...
شمس:الحقيني يا دنيا...
.......................
أنور صوته سمع الدور كله:يعنييي ايه ملهاش وجود...
كان واقف قدامه ظابط شاب..
مهاب بجديه:يا فندم تليفونها الخط مقفول و العربيه معدتش علي اي كمين لا داخل البلد أو براها..
أنور بحده:تقلبلي البلد عليها....
يحي دخل من بره و بسخريه:ملوش لزوم يا عمي...ريح نفسك انت..هي كده كده هتتجاب...
أنور هجم عليه:هموتك..وديت بنتي فييين؟
مهاب بيحاول يبعد أنور عن يحي:مش كده يا سياده اللواء....
و دخل من بره اتنين ظباط كمان و بقي بيحاولوا يبعدوهم عن بعض..و دخل لواء صاحب أنور...
اللواء مهدي بجديه:بس يا أنور مش كده يا جماعه..ده انتوا اهل و نسايب..صوتكم جايب المديريه كلها...اقفل الباب يا مهاب...
أنور بغل:انا مش هسيبك الا لما تقولي البت راحت فين..فررريده فييين...
يحي نفض ايد أنور و بجديه:انا اللي لتاني مره بسألك مراتي فين..خلي بالك انا خلاص طلبتها في بيت الطاعه و عملتلك محضر...
اللواء مهدي بحده:يا أنور بيه ما يصحش كده فريده بنت ناس و مهندسه ليها اسمها بيت طاعه ايه اللي تطلب فيه..و حماك راجل محترم و ليه اسمه و هيبته محضر ايه ده اللي عملته...
أنور بصوت عالي:حلووو...محضر بمحضر بقي...
و بص لمهاب:مهاااب اعملي محضر فيه بتهمه خطف فريده بنتي...
اللواء مهدي بصوت عالي:يا جماعه مش كده..
كان العساكر بره واقفين بيسمعوا اللي بيحصل و الظباط كمان...و كل عسكري يسمع حاجه ينقلها للظابط بتاعه...
..........................
نزلت شمس من اوضتها عشان تفتح باب الفيلا..و لقت دنيا و شايله كنزي اللي نايمه...
شمس اتنهدت:اخيرا جيتي...
دنيا بخفوت: متأخرتش اصلا من ساعه ما اتصلتلي و قولتيلي لبست انا و كنزي جيت بسرعه...
شمس اخدت كنزي:خشيلهم بقي هما في الصالون و ربنا يعينك...
و طلعت علي فوق عشان تنيم كنزي و دنيا دخلت علي امها و خالتها ...
إسعاد:انتي جيتي يا دنيا...
دنيا راحت سلمت عليها و بتبوسها:اه يا ماما..
و لدولت:عامله ايه يا خالتو..
و سلمت عليها و باستها..
دولت:الحمد لله يا دنيا...
دنيا قعدت:بقولك ايه يا ماما اطلعي اجهزي بقي و تعالي معايا الا كوكي تعبانه و هوديها للدكتور و شريف ف الشغل...
إسعاد بقلق:سلامتها حبيبت ستها..و قامت:انا هطلع اهو مش هغيب...
و طلعت إسعاد بسرعه عشان تغير....
دنيا:بقولك ايه يا خالتو انا هقوم اجيبلي اكل الا مفطرتش هجيبلك معايا...
دولت قامت وقفت:لا يا حبيبتي تسلمي..انا هروح بقي الا أميره في البيت عندي و كمان نتغدي سوا...
دنيا:سلميلي عليها...
دولت:يوصل يا حبيبتي..
و دنيا وصلت دولت لحد باب الفيلا و قفلت وراها...و وقفت سندت ضهرها علي الباب و زفرت:يا ساتر ست كالحه...
و طلعت علي فوق
.....................
بعدها بيومين...
دخل يحي علشان يحلق دقنه..بس افتكر أن ادوات الحلاقه بتاعته في حمام اوضته هو و فريده...ف خرج من الأوضه و راح علي اوضته هو فريده و دخل الحمام و لقي أن معجون الحلاقه خلص..بس هو بيكون جايب كام علبه و فريده هي اللي بتشيلهم و بتجهز حاجته وقت ما واحده تخلص تطلع التانيه..
يحي بتفكير:يا تري شيلاك فين؟!
و بقي يدور في الحمام و راح الدولاب الجانبي اللي في الحمام و بقي يدور بس لقي شريطين شكلهم غريب...
يحي مسك الشرايط واحد منهم متاخد نصه و التاني فاضل فيه حبايه...و فيه نوع منهم ليه شريط تاني كامل متاخدش منه...يحي طلع من الحمام و نزل لتحت و راح علي الركنه اللي سايب تليفونه عليها...و قعد علي الركنه و مسك التليفون...و بدأ يعمل سيرش عن الشرايط اللي معاه...و بلم يحي للتليفون لما عرف نوع اول شريط....
يحي بص قدامه بقهر و بعدين بص تاني للتليفون و عمل سيرش علي الشريط التاني و زي ما كان متوقع...
رمي يحي التليفون علي الارض كسره و كذلك الشرايط و فضل يدوس عليهم بعصبية و غل...
يحي بقهر و حده:انا متبقاش عاوزه تخلف مني و تسقط اي حمل...أناا....
و قلب ترابيزه الركنه بغضب...
أميره نزلت من فوق و جرت عليه و بخوف:ايه يا يحي فيه ايه بس...
و لمحت الشرايط تحت رجله ف وطت و اخدتهم....
و بلمت:يا نهار اسود انت لقيت الحاجات دي فين...
يحي بصوت عالي:في حمام الهانم...
أميره بجديه:ده دوت بياخدوه عشان يسقطوا الحمل و التاني حبوب منع الحمل...ايه ده يا يحي...انت كنت متجوز واحده ست و الا شيطانه...
يحي بغل:اقسم بالله لاندمها و اخليها تتمني الموت و متلاقيهوش..دي كانت بتقتل عيالي...
و مسك برواز موجود و كسره...
أميره صرخت بفزع: اهدي يا يحي....
......................
كانت فريده قاعده في ارضيه البلكونه و ماسكه طبق فيه أكل و بتاكل...و ضحكت بسخريه...و ببرود:فعلا انا مكانش ينفع يكون ليا ابن منك...
و بصت للسماء:الحمد لله يارب انك عرفتني ده من بدري و كنت بلحق نفسي...
و لنفسها بجمود:فعلا يحي ميستاهلش أنه يكون أب...انتي صح يا فريده..
و رجعت تكمل اكلها...
