رواية ولي العهد الفصل التاسع عشر 19 بقلم نورهان نصار
الفصل التاسع عشر:
في القصر الخاص بيه..و تحديداً اوضه مكتبه..كان قاعد و بيشرب سيجار..و حواليا الدخان...و مغمض عينيه باسترخاء..
تررن..تررن..تررن...
رد جاسم:الو..
صلاح:ايوا يا جاسم..جبتلك اللي انت عاوزه...
جاسم اتعدل في قعدته و سمع بتركيز..
صلاح في مكتبه في المديريه و قعد و فتح فايل و بيشتغل:هو و أنور اتخانقوا امبارح و بهدلوا الدنيا و اللواء مهدي كان معاهم و مهاب و الباقي...
جاسم بسخريه:يعني المديريه اتفرجت!
صلاح قفل الفايل اللي قدامه:اه الصوت كان مسمع...
و بجديه:مش هتنسي بقي اللي فات!!
جاسم بجمود:انسي!!!اومال يا صلاح لو مكنتش صاحب عمري و عارف اللي حصلي من ورا أنور..كنت هتقول ايه!!!
صلاح اتنهد:يا جاسم انا مش عاوزك تدخل في مشاكل..منصب والدك كبير مش محتاج شوشره...
جاسم بجديه:و انا مش هسيب حقي يا صلاح...
........................
كان يحي بيتابع مع المحامي...و أميره استغلت ده...طلبت انها تروح تكشف و امها معاها..و يحي مقدرش يعترض بسبب انشغاله...و راحت أميره مع دولت...
كانت نايمه علي سرير الكشف و الدكتوره بتعملها سونار...
دولت بسعاده:ها يا دكتوره طمنينا؟!
الدكتوره بإبتسامه عمليه:الحمد لله المؤشرات كلها كويسه...ناقص بس تحليل هتعمله هنا عشان اطمن اكتر...
و قامت...و كذلك اميره و عدلت هدومها...
دولت بفرح:ربنا يتمملك علي خير يا ميرو...
أميره بسعاده: تسلميلي يا ماما...
الدكتوره طلبت ممرضه من بره...و الممرضه دخلت:ايوا يا دكتوره..
الدكتوره:اعملي لمدام أميره تحليل دم..
الممرضه:اتفضلي يا مدام...
و مشت معاها أميره و دولت..
.....................
كان يحي قاعد مع المحامي...و لقي فونه بيرن..
يحي: الو...
جاسم:مراتك موجوده في السويس شارع.... عماره...الدور الرابع...
يحي قام وقف و بحده:انت مين؟!!
جاسم ضحك بسخريه:يلا بسرعه عشان ابوها بيجهز..و لو وصل قبلك مش هتعرف طريقها بعد كده....
و قفل السكه...
يحي بصوت عالي:الووو...الووو...
و ساب المحامي و نزل يجري عربيته...
.......................
في مديريه الامن:
كان أنور قاعد مع فريقه علي ترابيزه الاجتماعات...و بيتناقشوا في قضيه....و سمع صوت نغمه الفون برساله...بس تجاهلها و رجع يكمل...
........................
جاسم كان قاعد علي كنبه في مكتبه و حاطت رجل علي رجل و ف ايده كاس خمرا و بيدندن بسعاده..
*فلاش باك*
جاسم بحده:يعني ايه؟!!!
مدير الأمن بجديه:يعني تم طردك بسبب اعمالك الفاسده اللي بتقوم بيها...و الرشاوي اللي اخدتها..
جاسم هجم علي أنور و بجنون:كله بسببك انت كله بسببك...صلاح كان بيبعد بين جاسم و أنور و كذا لواء في المديريه منهم مهدي...
مدير الأمن قام وقف و بحده:ايه التهريج اللي بيحصل ده..مفيش احترام ليا...
جاسم بحده:و الله لوريكم..بقي انا اتطرد انتوا متعرفوش انا ابن مين!!!
مدير الأمن بجديه:عشان عارفين انك ابن مين اكتفينا بطردك...واحد في مكانك كان زمانه اتحاكم و في السجن...
جاسم سكت و مبقاش عارف يقول ايه...بس فيه لكمه طالته من أنور....
أنور بكبرياء:مش أنور نصر اللي واحد فاسد زيك يكون عاوز يضربه....
جاسم زاد جنونه اكتر...و بقي يكسر في اللي موجود...و صلاح بيحاول يمنعه..
*باك*
كان ساند رأسه علي ضهر الكنبه اللي قاعد عليها و مغمض عينيه و بيدندن:تا..تتا...ترارارارا..را..را..را...
و اتنهد:دبور و زن علي خراب عشه!
......................
خلص أنور الاجتماع و فتح تليفونه...لقي الرساله في وشه..
(بنتك فريده في السويس شارع....عماره...الدور الرابع..و يلا عشان يحي في الطريق)
أنور قام بسرعه و الكل استغرب..و بجديه:مهاب تعالي معايا..و انت يا محمد هبعتلك رقم شوفلي بتاع مين...و نزل يجري علي عربيته و مهاب وراه و هو مش فاهم حاجه...
.......................
خلصت أميره التحليل و فضلت مستنيه نتيجته و بعد نص ساعه ظهرت النتيجه و دخلوا تاني للدكتوره...
الدكتوره بابتسامه بتكتب روشته:اتفضلي يا مدام...الحمد لله مؤشراتك كلها كويسه و كذلك مؤشرات الجنين..
و ادت الروشته:اتفضلي و كمان اسبوعين بأذن الله اشوفك تاني...
أميره قامت و بابتسامه:ميرسي يا دكتور....
دولت بفرح:متشكرين يا دكتوره...
و خرجوا.....
......................
خرجت من اوضتها علي صوت جرس الباب..و بصت من العين السحريه لقت أنه مغاوري البواب....ف اطمنت و فتحت الباب.....
فريده:ايوا يا عم مغاوري؟!
ظهر يحي قدام فريده فجأه و فريده بلمت و جات تقفل الباب بسرعه بس يحي منع ده و خبط الباب بكتفه و فريده وقعت علي الارض بسبب ده.....و دخل و قفل الباب وراه....
يحي بجمود قاتل:كنتي بتسقطي نفسك يا فريده...
فريده كانت بترجع لورا و هي واقعه علي الارض..و يحي بيتحرك ببطئ ناحيتها و هي ترجع و هو يقرب...
يحي بجنون:كنتي بتقتلي عيالي...
و هجم عليها شدها من شعرها قومها...
فريده بوجع صرخت:ااااه..ابعد عني..و كانت بتضرب في يحي عشان يسيبها بس هو مش مقصر فيه حاجه...و مسكها من شعرها و بقي بيتحرك بيها يخبط رأسها في الحيطه و اي حاجه موجوده علي رف أو ترابيزه...
فريده داخت و دماغها اتعورت...و قعدت علي الارض و مبقتش عارفه تقوم...يحي وطي علي الارض..و مسكها من كتافها و بقي يهزها جامد...
يحي بجنون و صوت عالي:ليييه...ليييه تموتي عيالي!!!
و زق فريده في الأرض و بقي نازل ضرب فيها...
فريده بقت حاطه أيدها علي وشها تحميه....
يحي شدها ليه و بصوت عالي:عملتلك ايه...هااا..عملتلك ايه عشان تقتلي عيالي و تمنعي نفسك من الحمل...
و ضربها بالقلم...و زقها علي الارض و نزل فيها ضرب..
فريده كانت بتحاول تزقه برجليها بس مكانتش عارفه...في بضوافرها بقت تخربش في وشه.....
فريده بصراخ:ابعد عني يا حيوان....اااه...
يحي مسك دماغ فريده و خبطها جامد في الأرض...و فريده اغمي عليها....و شالها من علي الارض و قام بيها و نزل علي عربيته....حطها علي الكنبه اللي ورا...و ربط ايديها و رجليها...و رجع لمغاوري و اداله ٥٠٠ جنيه...و طلع علي العربيه و اتحرك...
.........................
كانت أميره مع امها في العربيه...
أميره:هوصلك يا ماما..و اطلع علي الصيدليه بس اشوف الوضع ايه...و احصلك نتغدي سوا اهو يكون يحي خلص برضه...
دولت:ماشي يبنتي ربنا يعينك....
..........................
وصل أنور بعد ساعه من مشيان يحي...و طلع يجري بسرعه علي العماره...
مغاوري:مين يا بيه؟!
بس أنور تجاهله و طلع يجري و كذلك مهاب...و مغاوري طلع وراهم...
وصل أنور و بقي يخبط علي باب الشقه بس مفيش رد..
أنور:يلا يا مهاب نكسر الباب...
و رجعوا لورا هنا الاتنين لمسافه كويسه و جروا علي الباب كسروه.
مغاوري بجديه:يا جماعه ميصحش كده فيه ست قاعده هنا!!
(علي اساس انك بتفهم في الأصول اوي
)مهاب بحده: بطاقتك...
مغاوري اتخض...و ده كله و أنور بيدور في الشقه علي فريده و خرج...
أنور بحده: فين الست اللي هنا...
مغاوري متصنع الجهل:نعم يا بيه!!هي مش موجوده..
أنور مسكه من هدومه و بحده:خدها من امتي؟؟!!!
مغاوري اعترف بسرعه بسبب خوفه:من..من...من ساعه يا باشا....
أنور لمهاب بصوت عالي:ادبلي الراجل ده...
و نزل بسرعه علي عربيته.....و اتصل علي محمد عشان يعرف مين صاحب الرقم...
أنور:ها يا محمد عرفت مين صاحب الرقم...
محمد:للاسف يا باشا شريحه بدون اسم..
أنور:زي ما كنت متوقع..اعرفلي بقي مكان يحي صباح فين دلوقتي في السويس...
محمد: عشر دقايق و يكون العنوان عندك...
....................
كانت أميره في الصيدليه بتاعتها في المخزن...او بالتحديد اوضه في المخزن..نفس مكونات المعمل...
و كانت لابسه البالطو الابيض و بتخلط في مواد معينه..و بتقيس كل ماده بالجرام الاول...و خلصت....
و خبط نور علي باب المعمل...
أميره: ادخل...
نور:حضرتك مطلوب كيس من المخدر...
أميره حدفتله كيس صغير فيه حوالي ٥٠ جرام و نور شقطه..
أميره بتنبيه:بس الكيس بقي ب ٦٠٠ مش ٤٠٠...
نور بتردد:ب..بس كده...
أميره قاطعته:و الله ده اللي عندي اللي عاوز الكيس ده يدفع ٦٠٠ جنيه و ميقلوش...
و بصوت عالي:مفهوم...
نور: مفهوم...
و خرج علشان يدي الكيس للي طالبه...
و كان شاب في التلاتينات باين عليه الإدمان تحت عيونه اسود و وشه ضعيف و باهتان...و اول ما شاف الكيس ابتسم و كان هياخده من ايد نور...
نور بعد الكيس:لا...٧٠٠ جنيه كده الاول...
الشاب:نعم!!!مش كانوا ٥٠٠..
نور هو رأسه بأن القرار مش قراره:ده كلام الدكتوره...
الشاب قرب من نور و بهمس:متعرفش انت تعملي الخلطه دي و يبقي ليك ٥٠٠ جنيه لوحدك..
نور بقله حيله:و هي معرفه حد ايه نسب المكونات...دي عفريته...ما المكونات معروفه بس هي بتخلطهم بنسب معينه..و مش معرفه حد سرها...
و بجديه:ها..هتاخد..و الا تسيبه لغيرك..
الشاب: و لو أنه غالي اه..بس شمه منه..تعدل الدماغ..هات هات...خليني اصطبح...
