-->

رواية بلغ حبيبك وقله باخذك منه كاملة pdf

رواية بلغ حبيبك وقله باخذك منه كاملة pdf

    رواية بلغ حبيبك وقله باخذك منه كاملة




    الجــــزء الأول)


    في صبـــاح أحد أيــام شهر مايو من سنة 2006 في أحلى مدن الامارات (الشـــارقـة)

    ومثل ما اتغنى فيــــها حسين الجسمي وقــــــــــال (اضغطوا على الرابـــط)


    وعلى أرض السحــــــــــــــــــــــــر والجمـــــال ... كانوا يسكنون أبطال قصتنـــــا

    .
    .

    نشت جـــوري على دقات الباب

    الأبو : جـــوري بابا يلا نشي الساعه 8 اتأخرتي عالكليـــه

    (ومن هناك بعدها 6 بس هو يحب يلعوزها لأنها كسوله وما بتنش الا بهاي الطريقــه)


    جـــوري من تحت اللحـــاف: بابا بلييييييز بس 5 دقايق الله يخليييييك

    الأبـــو: ماشي 5 دقايــــق

    جــــــوري: بلييييز بابا الله يخليك حراااام

    الأبــو: الحين ابغي أعرف هالخمس دقايق شو بيسوون بــج؟!! وسار عنها

    وكل صبـــح على هالحاله

    وعلى الرغــم من انه ابــو جـــوري رجــل أعمال وعنده أشغاله الخاصه الا انه متعود يوعي كل عياله وخاصه جــوري الدلوعه آخر العنقود ... وعقب ما يتطمن عليهم يسير يباشر شغله وهذا سر تعلق جـــوري فيه لأنه من صغرها وهو يخلصلها كل طلباتها مع انه عندها اخوان وعندهم دريول بس مع جــوري الموضوع مختلف تماما
    من اول ما دخلت جـــوري الروضه الين ما اتخرجت من الثانويه وابوها هو اللي يوصلها واييبها! يمكن اتشوفونه شي غريب مع كثرة أشغاله لكن عشان عين تكرم الف عين

    وأول ما اتخرجت من الثانويـــه كانت هديتها سيــاره آخر موديـــل من أرقى معارض السيارات اختارتها بنفسها وكان لها اللي بغته ...
    وسووا طلبيه للموديل المطلوب بحكم انها سياره يديده وتوها نازله ومب موجوده فالبلاد

    واف هالاثنـــاء دخلت جــوري معهد لتعليم السواقه بس كانت فيه مشكله هو انه جــوري باقيلها شهر ويصير عمرها 18 والاجراءات اتعطلت شوي ... بس مع واسطــه أبوها انحل الاشكال وفعلا خلال شهـــر واحد خذت الليسن ومن أول تراي ...
    واستلمت سيارتها مع بدايـــة سنتها الجامعيــه الأولى

    .

    نرجـــــــــــــع للقصــــه


    الأبـــو يالس يتريق فالصاله ويقرى الجريده

    شوي ويسمـــــع صوت باب غرفــة جـــوري يتبطل وهي طالعه ومظهره ثيابها للخدامه عسب تكويهم لها

    جـــوري بويــه كسول وبرئ: صبـــاح الخير باباتي

    الأبــــو: صبـــاح الجــــوري يا أحلى جـــوري

    جــــوري: بابا؟ ليش اتقص عليه واتقول انها الساعه 8

    الأبـــو: انا قلتلج 8 وانتي توج ظاهره عيل لو اقولج انها 6 بترقدين لين القايله

    جــــوري بويــه قافط: وينها اليســـا أباها تكويلي ثيابي

    (اتحب تتهرب هالبنيه ههههههههههه)


    الأبـــو: خلاص انتي سيري اسبحي وانا بقولها يلا بابا عن تتأخرين

    جــــوري: من عيوني


    الابـــــــــــــو فالصاله: اليســــا اليســــــــــــــــــــــــــــــا

    اليســـا: نعم بابا

    الأبــــو: اكوي ثياب جـــوري بسرعه ووديهم الحجرة انا بسير الحين وايد اتأخرت

    ويوم بتظهر جـــوري من البيت اتصلي خبريني

    اليســــا الأندونيسيه: جين بابا

    (هاي الحركه دايما يسويها ابو جــوري عسب يتأكد انه جوري ظهرت وما ردت ترقد هههههههههه كسوله هالبنت)


    .
    .
    .


    اول ما خلصت جـــوري من السبوح سمعت دق خفيف عالباب

    جــــــــــــوري: منووو؟

    اليســـــــا: سياب (يعني ثياب)

    جـــــوري وهي تربـــط الروب وشعرها المبلل يغطي جزء من ويههاا بكل عذوبه ورقه: هههههههههههه اول مرة ادري انه الثياب اتدق الباب خخخخخخ

    (أحلى شي في جــوري ان تعاملها حلو ويا الخدم وتحب تمزح معاهم)


    فتحت الباب وخذت ملابسها وبدت تتزهب للكليه وكانت الساعه 7 وثلث

    لبست تنورة بيضــــــا عمليه حق الصبح مع توب ابيض ووردي فاتح

    جففت شعرها الأســـود الداكن ورفعته بشريطـــــه ورديه

    وخطت عيونها العسليــات بحكل اسود اللي خلاها اتصير روعه وخلا لون عيونها يبرز أكثر وحطت جلوس وردي ع شفايفها وكانت جــوري اسم ع مسمى



    اتصلت الصاله: الو

    جــــوري: اليســـا بسررررررعه سوي لي فحــــــم اتأخرت

    يت اليســـا الغرفه ودخنت جـــوري

    لبست جــوري عبايتها وشيلتها وشلت شنطتها الورديـــه وطيرااان ع السيـــارة

    واليســـا المسكينه تلحقها بشنطة اللابتوب والفايلات اللي نستهم كالعاده

    ولقت أخوها حارب اف دربها

    هو شكله بعد متأخر ع دوامه

    حارب: وعليكم السلام مافيج اخلاق موول

    جــــوري وهي تركض: مب وقته مب وقته بعدين بسلم

    حــــارب: الحمدلله والشكر مخبل هالبنيه

    ( حـــارب يشتغل رئيس اقليمي اف بنــك معروف ... عمره 27 وشخصيته روعه ودوم هاي سالفته مع جــوري دومهم يتحرشون اف بعض )


    أما جـــــــــــــوري فشخطت ويل بدون لا تحر السياره ولا شي

    ودقت عالريموت مال باب الكراج واول ما انفتح الباب ما بّين من السياره الا غبرتها وطيران عالكليــــه

    حــــــــــارب وهو فاقد الامل من اخته الدلوعه: هالسياره مظلومه عادي ترى مال عمك ما يهمك الحمدلله والشكر


    كانت الساعه 8 الا ربــــع

    والكلاس يبدى 8 يعني تلحق ما تلحق

    (جــــوري عمرهـــــا 21 وهي اف سنه ثالثه اف كلية التقنيه تخصص اعـــــــلام Media Studies وهاي آواخر الأيــام فالسمستر ... يعني صدق مزحومين اف تسليم الـ projects والـ assingments )



    فالسيـــــاره

    جـــوري فتحت الاف ام وطلعتها أغنيــــه اتحدى العالم مال صابر الرباعي ...


    (هذا الرابـــط للي يبا يعيش الجو صـــح)


    اتفائلت بيومها من سمعت الاغنيه لأنها صدق روووعه

    وطولت شوي ع الصوت ودخلت عالم حالم وشوي ويرن تيلفونها

    كان المتصل كالعاده ربيعتها وطبجتها منى

    منى: جوجو وينج؟؟؟

    جوجو: انا الحين فالمدينه الجامعيه

    منى: انزييين تعالي بسرررعه المس تسأل عنج

    جوجو: افف منها الغوله

    منى: شو نسوي بعـــد يلا حبيبتي سي يو لا تسرعين

    جوجو: اوكي حبيبتي بباي


    جــــوري تضحــك على منى ههههههههههههههههه : والله هاي نكته اونه تعالي بسرعه ولا تسرعين .. كيف تركب مادري! خخخخخخ

    الساعه 8 وعشر دقايق كانت جــــوري اتصف سيارتها اف باركنات الكليـــه عند مبنى الاعلام

    ودخلت الكلاس والمس مب موجوده واتشققت من الخاطر

    جــــــوري بصوت عالي وكالعاده: صبــــــــــــــــــــاح الخير

    البنات: جــــــــــــــــــوري الحمدلله انج ييتي صبـــاح الجوري

    منى: جــــوري تعالي بتخبرج

    جـــوري بكل اهتمام: هااااا شو صاير؟

    منى: خلصتي البروجكت؟

    جــــــــــــــوري: يعني almost خلصته

    منى: هيه الحمدلله عشان في أظن بروجكت ثاني

    جــــــــــوري: لااااا ... لا تقووولين متى الله بيتوب علينـــا!!

    منى: مادري لأنه اف مادة Elaine ما سوينا أي بروجكت بس ال presentation

    جـــــوري: هيه صح ... كيف غابت عن بالي!!!

    عجيييبـــه شو تتريا حضرتها!!!

    منى: ترى هاللي زايغه منه ... ماباقي شي عن السمستر

    جـــــــوري: اممم الله يستر

    جــــوري: عيل وين مهوو؟

    منى: مهووو عندها Conference ويا المس

    جـــوري: امممممم اوكي

    منى: جوجو محلووووة اليوم ... حلو اللوك الوردي عليج

    جـــــــــــوري: عيونج الأحلى انتي لوكج اليوم عجييييييب

    احب الأســـــــود والأبيض عليج

    (منى بعــد كانت اتعادل جــوري فالجمال ويتشابهون مع انهم ما يقربون لبعض ابدا لكن كل اللي يشوفهم يقولهم انتوا خوات سبحان الله ... يمكن لأنهم وااايد ويا بعض فاللي اف قلوبهم انعكس ع أشكالهم ... بس الفرق انه منى كانن عيونها سود وشوي أصغر عن عيون جـــوري فالمقابل عيون جـــوري كانن عسليات وواسعـــات )


    منى بخجل: عيل وناااسه

    وردت مهـــا الكلاس

    مهـــا بتأفف: بذبحها بذبحها

    جـــوري ومنى: بلااااج؟؟

    مهــــــــــــــــا: غيرتلي البروجكت كامل L بصييييح

    جـــوري: خلاص حبيبتي عادي

    أنا بعد يوم سويت وياها الــ conference نفس الشي عادي

    منى: حتى انا ... صدقيني مهوو ما بياخذ منج وقت كلها نص ساعه وكل شي بيتعدل

    مهـــا: ان شاء الله بس بعد ما دانيها

    كلهن ويا بعض: هههههههههههههههههههههههه

    وشوي وبدا الكلاس الثاني ....................

    وكان كلاس Elaine


    مها: اووف منها دخلت.

    منــى: خلاص عفت الكليه ، مليت من شي اسمه كلاسات.

    جـــوري: خلاص هانت ماباجي شي.


    البنات بصوت واحد: وااااااااااااااااااااااااااااااااااااااااااااااااا ااااااااااااااااااااو،You are very kind miss !!

    الترجمه: انتي وايد طيبه مس

    مها وجـــوري ومنى: بلاهم هذيلا اتخبلوا؟!!!

    جـــوري اترمس وحدة في الكلاس اسمها علياء: بلاكم احتشرتوا مرة وحده؟!

    علياء: ما سمعتي المس شو اتقول؟ اونه اليوم عندها meeting وما شي كلاسات والحين بتظهر عنا!

    جــــوري بصوت عالي: واااااااااااااااااااااااااو!!

    Miss Elaine : Joory you are too noisy today

    الترجمه: جــوري .. انتي وايد مزعجه اليوم



    جــــوري وهيه متشققه: I'm sorry miss.

    Miss Elaine:
    Ok girls I will come at 12:00 to take attendance and I have a small announcement for you. See ya .

    الترجمـه: اوكي بنات .. انا بيي الساعه 12:00 عشان آخذ الحضور وعندي شي بخبركم به

    جـــــوري: يا ربييي منها ما بغت تظهر حشا خذت الكلاس كله!!

    منى: انشالله يروغها بابا فريد من الاجتماع عسب انها متأخره.

    (بابا فريد هو مدير الكليه والبنات متعودات يزقرونه بهالاسم)


    مها: الله لا قال، بتي بتجابلنا عقب، ما بغينا نفتك من الكلاسات.

    جـــوري : هيه والله.

    (مهـــا وجـــوري ومنى ربيعــات الروح بالروح وسوالفهن ما ينمل منها ... بس يمكن علاقة جـــوري ومنى شوي أقوى عن علاقتهن بمهــــــا سبحان الله القلب وما يهوى بس فالنهايه كلهن ع قلب واحد ومغامراتهن كلها ويا بعض)


    مر الوقت بسرعه وكانت الشله الحلوة فالكافتريا

    وشوي والا جوري اتشوف الساعه وكانت 12 الا خمس دقايق والمفروض 12 يكونن فالكلاس عسب Elaine بتاخذ الحضور وبتخبرهن بشي

    جــــوري: أبييييييه الساعه 12 الا خمس

    منى: ال attendance !!

    مهـــــــا: يلا عيل خل نلحق

    وردن الكـــــــــــــلاس


    جـــــوري: الساعه 12 وخمس وElainoooh مايت!!

    مها: يبتي سيرة الأط جا ينط

    منـــى: وووععععععععع

    جـــــــوري: اتطالعوا شكلها مستانسه

    مها: هيه والله

    منـــى: الظاهر رقوها


    Miss Elaine: who is here?

    الترجمـــه: منو موجود؟

    البنات: all of us accept Moza

    الترجمــه: كلنا الا موزة

    Miss Elaine : where is she?

    الترجمه: وينهـــا؟

    البنات: She has a hospital appointment

    الترجمـــه: عندها موعد فالمستشفى

    Miss Elaine: Ok girls, I have an announcement for you about your last project

    الترجمــه: عندي شي أبا أخبركم به عن بروجكتكم الأخير

    البنات احتشروا، اللي مب عايبنها واللي اتقول ما شي وقت واللي شوي وبتصيح

    Miss Elaine: GIRLS!!!

    الترجمه: بنات؟

    صخن البنات

    Miss Elaine : let me talk, then complain as you like

    الترجمــه: خلوني ارمس عقب اعترضوا على كيفكــم

    استسلمن البنات للأمر الواقع

    Miss Elaine:
    ok girls, relax
    This project is different than the others; this project will allow you to practice the program in the real life for the first time

    الترجمـــه: اوكي بنات ... اهدوا .. هالبروجكت غير عن باقي البروجكتات ...

    هالبروجكت بيعطيكم الفرصه انكم اتطبقون تخصصكم على أرض الواقع للمرة الأولى اف حياتكم

    وحدة من البنات: How miss?

    الترجمــه: كيف؟

    Miss Elaine: let me continue please

    الترجمــه: خلوني اكمل لو سمحتوا

    البنات: اوكي



    Miss Elaine:
    You don’t have to handle the project now, it is a summer project

    You are required to create your own story about any interesting experience you will go through and record it as a diary and then bring it to me at the beginning of the next semester which will be the first of September

    الترجمـــه: مب لازم اتسلمون البروجكت الحين ... هالبروجكت صيفي ...

    المطلوب منكم انكم تكتبون قصه عن أي تجربه أو مغامرة اتعيشونها وسجلوها كمذكرات لكم وأباه يكون جاهز على بداية السمستر الياي يعني على بداية شهر سبتمبر

    البنات: Miss, we don’t want to work in our holiday

    الترجمــه: مانبا نشتغل اف اجازتنا مس L

    Miss Elaine:

    It’s different, you will enjoy it believe me, just imagine a story and apply it with a short descriptive script and that set!

    الترجمــه: هالبروجكت مختلف ... بتستمتعون فيه صدقوني ... كل اللي عليكم انكم تتخيلون قصه واتطبقونها واتعيشونها وتكتبونلي عنها ريبورت

    I gave you the whole summer to work on it in order to have enough time to be creative but some of you can finish it within one week maximum

    الترجمــه: أنا عطيتكم الاجازة بكبرها عسب تشتغلون على راحتكم واتكونون مبدعات ... لكن بعضكم يقدر حتى يخلصه في اسبوع واحد

    More over, you will be working in groups of three and you can choose your peers to make it easier for you so the amount of work will be smaller!

    الترجمــه: وشي ثاني ... انتوا بتشتغلون اف مجموعات مكونه من 3 طالبات لكل مجموعه وهالشي بيسهل عليكم المهمه

    Ok girls, I know you are creative and you will give me some fabulous stories!

    الترجمـــه: اوكي بنات .. أنا ادري انكم مبدعات وبتعطوني قصص روعه

    I will give you the outline of the project so you can refer to it

    Read it carefully, you can start from this moment and if there is any question come to my desk am available, see you

    الترجمــــه: أنا بعطيكم الحين ورقه فيها شرح مفصل عن البروجكت ... ممكن ترجعونلها اف أي لحظه

    اقروها عدل ... واترومون تبدون من هاللحظه اذا حبيتوا ... واذا عندكم أي سؤال .. أنا موجوده اف مكتبي

    .
    .

    ( وطلعت عنهم)



    البنـــات: بروجكت غريب!

    وحده من البنــات: لازم انفكر اف شي غير

    وحده ثانيه من البنات: هيه صح نحن بنات الاعلام مب أي شي

    (خقاقات لووووول)



    نرجــع حق بطلات قصتنا وانشوف شو رايهن بالبروجكت

    جـــــوري: يا الله كيف متحرقصه بسبة هالبروجكت

    منى: حتى انا أحس انه ربشششه ..

    مها: بس يلا فكروا بشي ..

    جـــوري: بس لقيتها ..!

    منى ومها بصوت واحــد: شو ؟؟؟؟

    جــــــوري: مب هي تبا شي غريب وقصه يعني مب مألوفه

    منى ومها: هيه اكيد

    جـــــوري: انزين اسمعوني

    منى: قولي يا أم العريف

    جــــــوري: نحن لازم انعيش القصه عسب الاحداث اتكون حقيقيه واتمسنا واللي فهمته من ال outline مال البروجكت انها تبا قصة مغامرة اتناقش قضيه اف مجتمع الامارات بطريقه حلوة ومبتكره

    منى ومها: صح

    جـــــوري: عيل لقيتها!

    اسمعووني عدل


    (وخبرتهم بفكرتها)


    منى ومها بصوت واحد: انتي اتخبلتي؟!!!

    منى: منو بيخلينا انسوي جيه؟

    مهـــا: مستحييل هليه يطيعون

    وبعدين تعالي

    نسيتي ابوج!!

    مستحييييل يطيييع

    جــــوري: بلاكم اشتطيتوا جذه!!

    كل شي بيتم حسب الأصول وبناخذ اذن من الكليه

    منى: جــوري انتي وايد تحلمين

    جـــوري: والله اسمعوني اذا سوينا هالفكره اول شي بنضمن ال a لأنها فكره يديده وبنتعب فيها وثاني شي بنستانس يالخبايل مغامرة وفرصة انه نتلاقى فالصيف بليييز وافقوا

    وع فكره اذا استانسوا ع فكرتنا اشدراج يمكن تتنفذ ونستوي مشاهييير يااااي

    مهـــــا: صح انها فكرة مينوونه بس عيبتني

    منى: وااايد تحلمون! انتوا اتخبلوا مستحيييل انروم انطبقها وبعدين ما اتخيل عمري اعيش هالتجربــــه ايييي!

    جــــوري: يعني انا اللي أتخيل؟!!

    أنا بيض ماعرف أفوّر كيف بشل مسؤولية بيت كامل؟!!!

    بس التجربه محتاجه المغامرة

    ولا تنسون نحن بنكون تحت وصايه واذا فشلت الخطه ما بنخسر شي وبس!

    مهـــا: هزرج بيعطونا تصريح من الكليه؟

    جـــوري: ياماما ايلينووه خبله واتمووت فالمغامرات وكل شي بيستوي حسب الاصول انتوا بس وافقوا

    مها ومنى: خلاص عيل تـــــم

    جــــوري وهي متشققه: كفكم!

    طراااااخ

    وساروا جـــوري ومهــا ومنى عند ايلين عسب يشرحولها الفكره

    وفعـــلا مثل ما اتوقعت جـــوري

    ايلين اتخبلت ع الفكره وقالت لهم ما يحاتون وهي بترتب السالفه مع اهاليهم

    جـــــــــــوري: ياااي فرحانه فرحااانه

    مهـــــا: انا بعد بس زايغه من ردت فعل اهليه

    منى: انا مب زايغه من حد كثر من ردت فعل عبود أخويه

    جـــوري: هذا عبود بعد مسوله رااااس مشاااكل

    جـــوري: فديييت باباتي كيف بتحمل بعده ولا حارب بيتنقرش في امنووه يوم انا محد ههههههههههههههه

    (وكل وحده منهن تمت اتفكر اف شي ((كلن يغني على ليلاه)) لووول)


    وخلص الدوام وكل وحده ردت بيتها وهي متحرقصه من الخاطر

    .
    .

    (تابـــع الجـــزء الأول)


    فالبيت عالســاعه 7 المغرب

    جــــوري يالسه اف حجرتها واترمس بنت عمهـــا غــــــلا وهي أكبر عن جــوري بسنتين وربيعتها الروح بالروح

    جــــوري: والله مثل ما أقولج

    غــــــــلا: انتي اتخبلتي؟

    جــــــــوري: بلاكم كل ما قلت حق وحده الفكره اتقوللي اتخبلتي؟!!!!!!

    غــــــلا: لأنها فكره مينونــه

    جــــــــــوري: بس بتتنفذ صدقيني بس اهم شي غلاي بليييييز مابا حد يعرف بالسالفه دخيييلج ولا كل شي بيخترب دخييييلج غلاي

    غــــــلا: اوف منج ومن أفكارج المينونه متى بتعقلين انتي متى بس ابا أعرف؟!

    جــــوري: بعقل صدقيني بعقل عقب هالسالفه

    غـــــــــلا: الله يعيني على خبالج

    جــــوري وهي تسمع دق ع الباب : غـــــلا بعدين برمسج حد يدق عليه الباب

    غـــــــــلا: اوكي بترياج

    وعقب ما سكرت جـــوري عن بنت عمها فتحت الباب وشافت حـــــارب

    جــــوري: هلا والله حرووبي

    حـــــــارب: الحين هلا والله والصبح لابستني

    جــــــــوري: والله سوري بس كنت مستعيله

    حــــــارب: انزيين انا مب ياي عسب سواد عيونج ... أبويه يباج

    ويمسكها من اذنها ويقول: انتي بتخبرج؟ شو مهببه فالكليه؟

    جــــــوري غصت: أي أي عورتني ... مب مسويه شي

    حــــــــارب: مب مسويه شي هااااا؟ سيري عند ابويه واصلنه فاكس من الكليه والـ Supervisor مالكم متصلبه

    جـــــــــوري وهي ميته: هااااااا

    حــــــارب: يلا انجلعي بسرررعه هو شكله مستعيل يبا يطلع

    جــــــــوري: اوكي بس انته لاتي وياي

    حـــــــارب: والله انا افخاطري ايي عسب اتشمت فيج بس المشكله طالبينج روحج

    جــــوري وهي طالعه من الحجره: يكون أحسن

    حـــــارب: ترى ابويــه فالمكتب مب فالحجره وشوي شوي عن اتخرطفين وتتكسريييين

    جــــوري: زيييييييييييين

    .
    .
    .

    وصلت جــــوري مكتب ابــوها اف ثواني وهي مي قادره تتنصخ (تتنفس) من السرعه ومن الارتباك

    جـــوري وهي واقفه عن باب مكتب ابوها الخارجي اتقول افخاطرها ياترى انكشفت الخطه ولا لأ!! يارب لااااا دخيلك ياااارب ... أبا أعيش هالقصه

    وشوي ولا باب المكتب يتبطـــل وتطلع اليســــا من داخل: انتي شو يسوي هني؟ روحي داخل بابا يريد انتي

    جــــوري: طاع هاي معصبه عليه بعـــــد

    اليســــــا وهي محرجه : يلا سيري بسرأه (بسرعه)

    جــــوري: حشى جني اشتغل عندها...!

    (اليســـا بشكارتهم من 10 سنين ومتعوده عليهم وايــــد واتحس عمرها الـ Boss فالبيت هههههههههههههه)


    عادي بدخل شوفيها ... أبويه يحبني وأكيد ما بيعصب عليه وأنا بشرحله وجهة نظري هيه صــــح

    ومر حــــارب وهو كاااشخ من الخاطر وريحته شاله البقعه: انتي بعدج ما دخلتي؟

    يبــا يخرب عليهــــا فقال بصوت عالي: أبووووويـــــــــــــــــــــــــــه

    جـــوري حطت ايديها ع حلجه عسب يسكت بس عقب مافات الفوت

    ابــو جـــوري ظهر: انتوا شو تسوون هنـــه؟!

    جـــوري: هــــــــــــاااا

    أبوها: بلاج مصفره بابا ما تاكلين انتي؟

    حــــارب: من سواد ويهها أكيد

    الأبـــو: انته ما يخصــك وبعدين أظن طلبت جــوري مب جـــوري وهديتها المجانيه

    جــــــــــوري نقعت من الضحــــك: ههههههههههههههههههههههه ... دوااااك

    حـــارب وهو قافط: أصلا أنا كنت خاطف بظهر راشــــد ولد عمي بيمر عليه

    الأبـــو: زين تسوي

    وحــــط أبو جـــــوري ايده على جتف بنته الدلوعه جـــوري ودخلها المكتب وسكر الباب

    الأبـــو: يلسي بنتي .. ها بابا شخبار الكليه وياج؟

    جــــــوري: تمام .. تدري الحين وايد مضغوطين ونهاية السمستر

    الأبـــــو: الله يقويج فديتج ... يلا نتريا النتيجه الطيبه

    جـــــوري افخاطرها: شكله راضي عني بس باله مشغول

    الأبــــو: ها بنتي بلاج؟

    جــــوري: سلامتك بابا

    الأبــــو: انزييييين ... اليوم اتصلوا فيني من كليتكم

    جــــوري غصت

    الأبـــــو: هاج يودي اشربي ماي هني هني ... انتي حالج مول مب عايبني شكلي خلاص بهون لازم اوديج المستشفى أسويج فحص شامل .. وايد ذويانه

    جــــوري: لالا أنا بخير .. بس ما قلتلي اتهــون عن شووو بابا؟

    الأبـــو: ترى اليوم اتصلوا فيني من الكليه ويبغون اذن عسب المعسكر الصيفي اللي بيسوونه للطلبه المتميزين

    وانا كنت متردد بس هم قالولي انه بيكون تقريبا من 3 اسابيع لشهر

    يعني بيبدا من اول شهر ستــــــه

    جـــــوري وهي مستانسه: وانته شو رايـــك؟

    أبــو جــوري وهو يدقق اف ملامحها الطفوليه وابتسامتها اللي لا تقاوم: انا كنت بسألج عن رايــج واف نفس الوقت اذا وافقت هذا معناه انه سفرتنا لازم تتأجل لشهر 7

    جـــوري: محد خبرني عن السفر؟

    أبــو جـــوري: ترى هاي كانت مفاجـأتنا أنا وامج

    جــــــــــــوري: يـــــااااااااااااااااااي فديتكم والله

    بالعكــــس باباتي شهر 7 أنسب حق السفر وفرصه بعد اتشرى حق الكليه من هناك

    أبـــو جــوري: مزهبه عمرج انتي! ... صدقت يوم سميتج مصاريف!

    (ههههههههههه أبو جوري دايمــا يسمي جــوري مصاريف واخوانها يسمونها مسؤولة الشؤون الماليه اف بيت بو حــــــــــامد)




    للتوضيــــح:

    ( جـــوري عندها اخويين وهم بالترتيب حــــامد وهو العـــود وعمره 31 ويشتغل طيـــار ودومه مسافر والحينه عنده دورة في استراليا لمدة 6 شهور وباقيله 4 شهور وبيرد وعقبه حـــارب واللي سبق ورمسنا عنه وعمره 27 وعقبه جــواهر وهي معرســه من سنه ماخذه ولد خالتها حميـــد وعمرها 25 وآخر العنقــود جـــوري وعمرها 21 )


    نرجـــع لأبطـــال قصتنـــا

    جــــوري بدلع: باباتي عاد ما عندك الا انا خل أتشرى على كيفي

    أبو جـــوري: واخوانج الباقيييين خلاص كنسلتيهم!

    جــــــــــوري: هههههههههه بس هم خلاص راحت عليهم كبروا .. انزين باباتي هااا شو قـــوري: الحين لازم سالفة المعسكر الصيفي هذا؟

    جــــوري: باباتي هيه لازم وبعدين هم ما قالولك اني لازم اكتب عنه ريبورت وبيفيديني السنه اليايه

    أبـو جـــوري: هيه ابويه قالولي بس وين انا اروم اصبر عنج شهر أهون عليج؟

    جـــوري يت وحضنت ابوها: ابويه الا شهر واحــد وانا بتم عندك عقبها شهرين وبنسافر ويا بعض وكل شي

    وحتى انته أباك اتخلص كل اشغالك اف هالشهر عشان تتفرغلي عقب ... ماباك تنشغل عني فالسفر!

    أبــو جـــوري: خلاص عيل ... حكــم القــوي ... بس هناك كل شوي تتصليبي واتطمنيني عليج ولا ترى بكنسل كل شي

    جـــــوري: افا عليك اكيييد بتصلبك وبلعوزك باتصالاتي

    أبــو جـــوري: منكر بنات

    جـــوري وابوها: ههههههههههههههههههههههه

    أبـــو جـــوري: خلاص بابا أنا الحين بظهر اتاخرت عندي اجتماع وانتي مري على امج الحجره كانت اتقول جــوري ماشوفها مووووول زين ابويــه؟

    جـــــوري: من عيوني حتى انا اشتقتلها موووووت

    الأبـــو: بارك الله فيج بنتي يلا أنا ساير

    جـــوري: تيك كير بابا وبترياك ع العشــا لا تتعشى برا

    الأبـــــــــو: ان شــاء الله ما طلبتي

    (خراااااطه .. دوم ات قول جي وترقد قبل لا يوصل ابوها ههههههههههههههه)



    .
    .
    .

    وطلعت جـــوري من عند ابــوها وسيده ع غرفــة أمها

    جــــوري اتدق الباب: تك تك

    أم حــامد وهي يالسه ع التسريحـــه تتعدل: منــو؟

    جـــــوري: أنا

    أم حـــامد: دشي ماما

    جــــوري: له له له شو هالزين شو هالحلاه؟

    أم حـــــامد: أي زين ... الزين كله عند جـــوري؟ وينج ماما ... ما اتبينين ... ما اتقولين عندي ام؟

    جــــــوري: ماماتي سوري والله بس الكليه ماخذه كل وقتي

    أم حـــامد: يلا ماباجي شي ع الاجازة وعقب بنشوف شو حجتج

    جـــوري افخاطرها: اكيد ماما ما تدري عن المعسكر الله يستر.. بس اكيد بابا بيقولها

    أم حــــامد: اف شـــو سرحانه جوجو؟

    جـــوري: هاااا لا ماشي ... اممممم ليش كاشخه جي؟ وين بتسيرين؟

    أم حــــــامد: بسير ويا حرمة عمج عرس قوم ال......ي بنتهم عهـــود بتعرس

    جـــوري: الله وناسه عهـــود بتعرس

    أم حــــامد: الله يفرحني فيج بعد ياااارب

    جــــوري: اممم انزين ماماتي انا بسير عندي بروجكت وخبريني عقب شو العرس

    ام حـــامد: ان شــاء الله .. وانا بعد شكله دريول قوم عمج وصـــل ...

    .
    .
    .

    طلعت جــوري من جنـــاح قوم أمهــــا وهي طاااايره من الوناسه

    جـــــوري وهي تغني: والله وتحقق منايا ... حلمي اتحقق معايا هههههههههه

    حـــارب وتوه راد من براا: بسم الله سكنهم في مساكنهم ... سيري سحي كشتج ... ولا ومحرفه الاغنيه على كيفها

    بتخبرج انتي شو حياتج؟

    جـــوري: ياربييييه مشكله اللي يغارون وبعدين انته قلت بتطلع شو يابك مرة ثانيه؟

    حـــــارب: كيفي غيرت رايي ... وبعدين ييت أطمن .. هااا ان شــاء الله أبويه هزبج؟

    جــــوري: ويييي بسم الله عليه ... ليش يهزبني؟!!! ثرني شو مسويه؟

    حــــارب: عيل ليش متصلين من الكليه؟

    جـــــوري: يبون اذن عسب المعسكر الصيفي

    حــــــارب بكل ثقه: لا انا مب موافق

    جــــــوري: طاع هذا! انته شفت ويهك فالمنظرة اول شي؟!!!

    وااايد مصدق ويهك!

    حــــارب: من حقي الصراحه

    جـــوري وهي اتدز اخوها ع صوب: وخر شــوي مستعيله انا بسير أبشر منوووه ومهووووه!

    حـــارب وهو يبا يخرب: الحين كله منوووه ومهوووه ماشي غـــلا ... نسيتي غـــــلا ... مصلحجيه

    جــــوري: طاع هذا؟!!! غـــلا بنت عمي وحبيبتي وتوأم روحي لا تيلس تتفلسف ..

    بس هالسالفه اتخص الكليه وغلا متخرجه افففف

    حـــــامد: اهاااا ... انزين انا بسير اتأخرت على راشــــد ... صح تبين عشى من برا

    جـــوري وفجأة اتحولت الى حمل وديـــع: الله صدق؟؟؟؟ حبيبي انته عيل أباا

    وقبل ما اتكمــل جملتها قالها: ماك سبايسي من ماكدونالد

    جــــوري: وحافظ بعــد وناسه انته

    حـــارب: تراج ذليتينا كله هالوجبه وبس خخخخخخخخخخخخ حتى راشـــد بعد متعقد من غـــــــلا

    جــــوري: وانته بلاك على غــــــــلا هااا؟ قوللي لا تستحي عااادي

    حـــارب وهو ويهه اتلوّن مية لون: يلا انا اتأخرت باي

    جــــوري وهي ناقعه ضحــــك: باي يالعاشق

    اتطالعها حـــارب بنص عين وروح

    .
    .
    .

    كملت جـــوري دربها لين غرفتها ... الله خل اتصل اف مهــوووه اول لأنها متفائله شراتي وعقب منـــووووه لأني اخاف اتعكر مزاجي

    .
    .


    توووت تووووت تووووت

    ومع ثالث رنه ردت مهــــــــــــــــــــا : ألــو

    جـــــــــــــوري: مهـــووووووووه باركيلي

    مهـــــا: وانتي بعـــــد

    جـــــوري: لا تقولييين؟! صدق؟

    مهــــــا : هيه والله ... مب مصدقه

    جــــوري: ولا انا .. انزين رمستي منووووه؟

    مهــــا: اممممم اتصلتبها مساعه اتقول ابوها عادي وامها زعلانه والحين باقي عبـــود أخوها

    جــــــــوري: يا عبــود هذا اللي يالس النا مثل العظمة فالبلعوم

    مهــــا: هههههههههههه توأمها لازم

    جــــــــــــوري: هيه والله وراها وراها ... حتى اف بطن امها ههههههههههه

    جـــوري: اوكي حبيبتي بسكر عنج الحين وبدق حق منى وبشوف علومها

    مهـــــــــــا: اوكي حبيبتي وطمنيني

    جـــــــــــوري: اكيـــــد يلا شــاااو

    مهــــــا: شـــاااااو

    .
    .
    .

    جـــوري افخاطرها: الحين بدق حق منوووه وان شــاء الله أهلها يكونون موافقين عسب تكمل فرحتي

    توت توت توت

    منى: ألـــو

    جـــوري: هلا منى ... ها خبريني؟

    منى: الحين أختيه نوال تقنع عبـــود

    لحظه جوجو حد يدق الباب

    جــــــوري: أوكي

    جــوري ع الخط سمعت صوت منى وهي اتقول: واااااااااااااااااااااااااو شكرا نواااال

    ردت منى لجوري: جوجو باركييييلي .. ماصدق وافقوا

    جــــوري: مستحيييييل خطتنا نجحت لالا ماصدق

    منـــى: انزين متى بيبدا المعسكر اتقوله وهي تضحك

    جـــوري فهمت انه منى مب روحها فالحجره فقالت: بيبدى من اول شهر سته ... بخبرج التفاصيل باجر

    منى: عيل اوكي

    جـــوري: خلاص بخليج بباي

    منى: بـــاي حبيبتي

    .
    .
    .

    جـــوري طرشت مســج حق مهـــــا اتخبرها انه كل شي اوكي

    وردت عليها مهــــا: الحمدللهنفس الشي ... الا أنا أبويه الوحيد هو اللي يدري وحارب شكلها السالفه مب عايبتنه والله يستر من ردة فعل ماما

    .
    .
    .
    وتمت اتفكر شوي وعقب سارت تاخذ شــــور

    .
    .
    .

    اف هالأثنــــــاء كان حــــارب ويا راشـــد ولد عمــــه فالسيــاره بيمرون ع ماكدونالد

    راشــــد: ها شو تبا اختك؟

    حــــارب: كالعاده

    راشـــد وهو يرمس الحرمه اللي تشتغل اف ماكدونالد: two mac spicy meal plz

    الحرمه اللي اف ماكدونالد: second window plz

    راشـــد: ثانكس

    حـــارب: ليش طالب وجبتين؟

    راشــــد: حق طبجة اختك (يقصدون غـــلا)

    حـــــــــارب: والله هالهنتين فناتك .... كل شي نفس الشي!

    لا والحبيبه مسجله تبا اتسير معسكر صيفي لمدة شهر ف بوظبي مادري العيـــن

    راشــــد وهو متفاجىء: احلف؟

    حـــارب: وانته بلاك مشتط؟

    راشـــد: هاا لا ماشي! بس غريبه عمي موافق

    حـــارب: عمك صح ما يروم يصبر عن جوري بس بعد ما يردلها طلب وأظن هذا جزء من بروجكت يسوونه

    راشـــد: عاد فالصيف؟

    حـــارب: عاد انته ما تدري منكر الكليه!

    راشـــد: هيه والله يلا خل انوصل الأكل حق الهوانم قبل لا يبرد

    (راشـــد من عمـــر حــارب يعني 27 وغـــلا عمرها 23 وخليفــه عمره 32 ومعرس ماخذ بنت خالته روضه وعندهم بنوته حلوة اسمها شـــوه وعمرها 3 سنين وآخر العنقود روبي وعمرها 13 مراهقه بالقـــو)


    ويرن تيلفون راشـــد وكانوا البيت متصلين به: هلا بالغـــلا

    جان يفز حـــارب من سمع طاريها وراشد حس فيه

    جان يحطها ع الاسبيكر

    غــــلا ع الطرف الثاني: تعال مر عليه وودني عند جــوري ... نبا نتعشى ويا بعض

    راشـــد وهو يغلس ع اخته: لا ماروم

    غـــــــلا: بلييييييييز رشوووود

    راشــــد: دامج قلتي رشـــود ماشي .. أصغر عيالج اتقولينلي رشود

    حـــارب ويدخل عمره فالسالفه: ياخي ذليت البنيه ما يسوى عليها ....

    غــــلا: هيه حـــارب قوله بلييييز

    حـــارب وهو متشقق: ماعليج منه خلاص اتزهبي الحين يايين

    راشـــــد: سيارة ابوك وانا مادري

    غــــلا: خلاص انا متلبسه

    راشـــد: طاع هاي مزهبه عمرها ... طرطور انا مستوي

    غــــــلا: حراااااام جـــوري بتروح عني ابا اودعها

    راشـــــــــد: هاي جــوري مسويتلنا ازمه كلنا وانتبه على عمره يوم قال كلنا وبلعها

    يلا انزين يوم بوصل بدقلج

    غــــــــلا: يااااي ... اوكي باي طوط طوط طوط

    راشــــد: حشى ما صدقت

    وحـــارب اف عالم ثاني ... سرحـــان اف صــوت غــــلا

    راشــــــــــد بحركة نذاااااله حط شريط حسين الجسمي اليديد ع اغنيه خريش وطول ع الاخر وهو مرتبش

    انتبه حارب وفلع راشــــــد بدبة الماي

    نقع راشـــد من الضحـــــك: ههههههههههههههههه دواك محد قالك تسرح

    حــــــــارب: مب منك من اللي يعطيك ويه

    .
    .
    .

    واف هالأثنــــــاء كانت جـــوري توها طالعه من الحمام عزكم الله ولافه الفوده ع شعرها: اففف يوووعانه ... هذا حروبي قص عليه

    جففت شعرها ولبست برمودا جينز ازرق فاتح وبدي فوشي واتعطرت استعدادا لاستقبال بنت عمها وحبيبتها غـــــــــلا

    وشوي واتصلت اف حــــارب واول ما رد: حروووووووووووووووبي

    حــــــارب: بسم الله الناس اتسلم اول .. صدق ما شي اخلاق مووول ... اتعلمي من بنت عمج الذوق

    راشـــد اف خاطره: فديت شطانتها

    جــــــــــوري: حـــروبي يوووعااااااانه

    حــــارب: اشكثر وايد ولا شوي؟

    جــــوري: واااايد وااااايد واااايد فوق ما تتصور

    حــــــــارب: عيل ما بني خلاص

    جـــــــــوري: اييييه حرام عليك

    حـــــــارب: انزبببببببببببن .... خلاص يايين... الحين واقفين عند بيت عمج بناخذ غـــلا ويايين مسافة الطريج

    جــــوري: خلاص أترياكم


    .
    .
    .

    راشـــد يدق حق غــــلا وقبل لا يرن ردت: بسم الله

    يالسه فالتيلفون انتي!

    غــــلا: ها ييتوا؟

    راشــــــد: يلا تعالي من الباب الوراني مافيه ابوج يشوفني ويشغلني

    غـــــــــــلا: اوكي

    (هههههههههه ... أبوهم من يشوفهم يشغلهم ... سيروا ... هاتوا ... جابلوا العرب ... ومن هالسوالف اللي ما تخلص لوووووول وهم ماشالله ما تعيبهم هالمسؤوليات)



    وخلال ثواني ظهرت

    وركبت السياره: السلام عليكم

    راشـــد : الله ع الادب

    غــــــلا: الادب مب لك حق ولد عمي ههههههههههههههههه

    راشــــــد: لا تخليني انزلج من السياره الحين

    حـــارب: بتذل البنيه انته

    غــــــلا: هيه والله قوله ...! مذله

    راشــــــــد: انزين الحين انا مذله

    غــــــــــلا: هيه ... انته ما اتشوف كيف حارب يرمس جوجو

    راشــــــــــد: هههههههههههههههه لعلمج هذا اكبر مذله

    حــارب قفط: لا تصدقينه

    وشوي ولا هم واصلين

    حـــارب لحظه بدق حق جوجو عسب تظهرلج

    غــــلا: ما يحتاي يالسه ادقلها

    حارب وراشد بصوت واحد: سحـّــار

    .
    .
    .
    غــــلا دخلت داخل وسلمت ع جـــــــــوري

    جــــــوري: عيل وينه؟

    غـــلا: منوه هوه؟

    جـــــــــــوري بصوت عالي: الماكدونالد؟

    حــارب : وراج

    جــــــوري: بسم الله انته من وين طلعت ... يلا عطني اياه

    حــــارب: يودي ... بسم الله مستقطعه

    جـــوري: يوووعانه انزين افففف مذله مادانيييييك

    أبا أعرف ليش ماكدونالد ما يسووون توصيل بدل مذلتك!

    حــــارب: والله انتي مافيج أخلاق (دوم يقولها هالجمله هههههههه)

    يلا انجلعوا من هنيه راشـــد ياي

    جـــــوري: انزيييين

    حـــــارب: وبعدين مستانسه ع عمرج لابسه هاللبس اللي ما يندرى وين راسه من ريله

    جــــوري: هههههههههههه اتغار... عقب بتقول حق حرمتك تلبس نفسه

    حـــارب بصوت واطي: حرمتي الا نفسج .. كله مطقمين (قصده غـــلا)

    جـــوري: انته شو تخربط؟

    حـــارب: يلا سيروا راشــــد ياي

    جـــوري وغــــلا: انزيييييييييييييين

    ودشـــــــــــــوا داخل

    .
    .
    .

    فالصالة الداخليه لغرفة جوري ....

    كانوا جــوري وغـــلا فاجين التيلفزيون على 2 ويطالعون فيلم اسمــه 50 first dates

    وياكلون ماكدونالد امممم يمي يمي

    جـــــوري: غلووووه ... باجر لازم انسير نتشرى

    غــــلا: حق الشـــو؟

    جـــــوري: لا تستهبلين غلووووووه ... حق المعسكر

    غــــلا: والله اتضحكيني يوم اتقولين معسكر جنه صدق الحين!

    جـــــــــوري: ايييه اسكتي مب حد يسمعج ادريبج فضايح

    غـــــــــــلا: انتي متأكده اترومين تبعدين عنا شهر كامل ف مكان انتي ما اتعرفينه؟!!!

    وانتي تدرين لو اهلج دروا والله ما بيرحمونج

    جـــــــوري: ايييه لا تخوفيني روحي زايغه ... ما اتوقعت السالفه تستوي جد

    غــــــــلا: وانتي بس هذا هو ... اتسويين مغامراتج عقب اتقولين ماكنت ادري بيستوي جذه؟!!

    جــــــــوري: اييييييييه لا تلعوزيني وتاكل بطاط

    (هههههههههههه نكته هالبنيه)


    غــــلا: شوي شوي عن اتغصين بلاج مستقطعه الأكل ما بيطير!

    جـــوري اتهز راسها يعني اوكي

    غــــــــلا: انزيييين ما قلتيلي ... انتي ومنوه ومهوه بتكونون ويا بعض طول الوقت؟

    جــــوري: لا طبعــا كل وحده روحها وبنلتقي مثل السيلانيات كل جمعه هههههههههههه

    غــــــــلا: انا مول مب متخيله اللي بيستوي

    جـــــوري: لا تخافين الكليه بتختارلنا الانسب ... الحين يسوون اتصالاتهم ... وبعدين انا بشل اللابتوب وياي والموبايل طول الوقت اف جيبي ...

    خذتلي موبايل كتكوت ما يبيّن وانشالله بنكون على اتصال طول الوقت

    غـــــــــلا: انتي اتعرفين كم باقي عن المعسكر!

    جــــــــــوري: امممم يعني تقريبــا اسبوع

    غـــــــــلا: ومستانســه حضرتج؟

    جــــــــوري: خلاص لا مفر ... المهم متى بنسير انسوي Shopping ؟

    غـــــــــــلا: اممممم باجر الأربعــــا ... خلاص عيل ورى باجر ... الخميس الصبـــح

    جــــــــوري: اوكي كوووول

    بس تعالي؟!!!

    شو نوعية اللبس اللي آخذه معايه؟

    غــــــــلا: هههههههههههههههه ... بناخذلج لبس مال المهنده هههههههههههه

    جـــــــــــوري: اتصدقين؟ يبالي

    وتموا يضحكـــون وسالفه اتيب سالفه

    وشوي واتصــــل راشــــــد اف غـــــــلا

    غـــــلا: هلا راشـــــــد

    راشــــــــد: يلا أنا ساير بتين ويايه ولا بتباتين؟

    غـــــــلا: لا شـــو أبات!

    جـــــــوري نطت: امبلا امبلا بليييز باتي بيتنا

    غـــــلا: وكليتج يا حلوة ودوامي!

    (غــــــلا تشتغــل اف نفس البنــــك اللي يشتغل فيه حـــارب بس اف فرع الشارجه وهو اف فرع دبي شارع الشيخ زايـــــد (الله يرحمه) .. يعني ما يتلاقون .. وعلى فكره ... هو اللي موصي عليها ومختارلها مكان يكون منخش عسب ما تتعامل ويا الرايح والياي... هههههه يغار عليها ... وهي ما تدري ... تتحرى مشغلينها عسب سواد عيونها خخخخ)


    جــــوري بوزت وقالت: افففففف

    راشــــد: يلا عيل أنا برع

    غــــــــلا: الحين يايه

    وسلموا غـــلا وجـــوري على بعـــض على أمل انهم يلتقون الخميس الصبــــح ويتشرون أشيــاء حق جـــــوري عسب يتنفذ اللي افبالها والله يستر منــــه!

    .
    .
    .

    وردت جـــوري غرفتها وظهرتلها ثياب حق الكليه حق باجر واتغسلت ولبست بيجامتها وانخشت تحت اللحاف ورقدت على أمل انه ايي باجر بسرعه وتلتقي اف شلتها ويكملون باجي الخطط

    .
    .
    .

    (انتهى الجــــزء الأول)



    الفصل الثاني من هنا

    إرسال تعليق