رواية سكينته وامانها كامله وحصريه بقلم ام بكر
المكان سيطرة الصقور مدخل محافظة الأنبار
الساعة 10: صباحاً
: السيارات كلها واگفه بالأزدحام سيارتنه صايره بالنص
گلبي يرجف منالخوف والتوتر والقلق
احس دا اختنگ كلساع اباوع هنا وهناك
ادور احمد وين راح وعافنه
مسحت رگبتي عرگت رغم برودة الجو
وريگي ناشف ما اگدر حتى اطلب مي
صرت اهز برجلي لا ارادياً منالتوتر
بكل ثانيه تمر احس السيارة دا تضيگ عليه
باوعت لرنــا گاعده بصفي
سانده راسها لوره وفاتحه عيونها بصدمه
هاي حالتها من ساعة مشينه
خليت شعرها وره اذنها
مدا يروح من بالي منظرها اول مشفتها
اباوعلها اريد اسألها شصار وياج
شفايفي تتحرك بس مدا انطق بحرف الكلام ما يطلع
درت وجهي عنها اباوع منالشباك
تجمعت الدموع بعيوني والغصه شگت صدري
غمضت ماريد ابجي احاول اتماسك
بكل قوتي على اقل لحد ما نعبر وأمن المكان
مسحت عيوني نزعت لكلاو
تلمست راسي من وره يوجعني هواي
من اثر الضربه
وحتى نازف دم متخثر بشعري
ابد ولا حسيت بساعتها
يمكن لأن جان كل تفكيري اخلص روحي واهرب
رجعت لبست الكلاو اغطي شعري
مسحت وجهي ورگبتي ختنگت وينك احمد فدوه
اديني ترجف خاصة اليمين الي مدا اسيطر عليها
باوعتلها بيها دم ضميتها بحضني
خفت هواي اباوع هنا وهناك
كل نظره علينه وصوت اسمعه احسه مترصدني
گلبي جان حيوگف
مرت لحظات الأزدحام عليه مثل السم
اجه احمد حرك السيارة
نشف الدم بعروگي من وگف يم الشرطي
يسأله منين جايين وين رايحين
خفت يطلب هويتي
وينتبه لحالتنه اني ملامح الخوف تبين عليه
ورنــا لابسه بنطرون وقميص رجالي
شعرها مخربط ووجها شاحب مصدومه
اتخيله شوكت يفتح الباب وياخذني
جان راح يغمى عليه منالخوف
ما صدگت من تحركت السيارة ومشينه
طبينه الأنبار لأول مره بحياتنا
محافظه غريبه علينه ما نعرفهم بس من بعيد
مجنت متخيله اوصلها لأن مو هدفي ولا اهتمامي
اجيتها مجبوره مهزومه ادور الأمان الي فقدته
رجعت راسي للكشن
جنت كلش تعبانه جسدياً ونفسياً
وعيوني تحرگني لأن صار هواي مو نايمه
غمضت دا اغفى فزيت لمن احمد گال وصلنه
صف السيارة گدام البيت ونزل فتح باب السياج
نزلت اعرج من رجلي
فتحت الباب لرنــا بالگوه سحبتها
تمشي بخطوات ثگيله ضايعه احس ما عدها وعي
ولا تعرف احنه وين طبينه جوه
جانت اكو قنفه بالطارمه گعدت رنــا عليها
ورجعت على احمد نزل جنطي
فات خلاهم بالطارمه قفل الباب باوع لرنــا وحجه وياي
احمد :مجاي افتهم ليش متردين تشتكين
شوفي حالة اختج وحالتج عبالك طالعات من حرب
اشتكي يمعوده خلي يطيحون حظهم هذولي النگسين
حنيــن : عصرت اديني متوتره
حيلي كله يرجف امتمت منالخوف
بالگوه احجي
: لا احمد ماريد اشتكي فدوه
احمد : من شنو خايفه فهميني
قابل الدوله بأديهم
حنيــن : اي مثل مگلت همه الدوله وكلشي
اني مو گدهم ابد
احس رجليه صارو خيوط
سحلت روحي گعدت بصف رنــا
لازمه ايدي الترجف بقوة
احمد : استغفر الله يربي
لو مهما جان نفوذهم المفروض تشتكين
الهزيمه ابد مو حل
حنيــن : باوعتله بتوسل
فدوه اترك الموضوع ماريد اشتكي
انته اكثر واحد تعرف اني واختي ما النه احد
هز راسه بأسف فتح باب الأستقبال وفات شويه وصاحني
حتى يشوفني البيت گمت بصعوبة افتر وراه اباوع للبيت طابق واحد
بدايته استقبال وصالة صغيرة
بي غرف ثنين ومطبخ وحمام
وجان اكو باب خارجي ثاني لاغينه مخلين بس واحد
صار فتره من عاد ترميمه ريحة الصبغ بعدها بي
ونظيف مرتب
بس فارغ مابي ولا قطعة اثاث
بس المطبخ بي سنك وكاونتر ركن واحد
جان راح يأجره وهسه صار من نصيبي
احمد :من رجعت لگيت الغراض اكثرها مبيوگه
مخلين شي قليل جمعتهن بهاي الغرفة
راح نطلع الشي التحتاجونه
اعرف انتي تعبانه بس لازم استعجل ارتبلكم المكان
لأن ضروري ارجع لبغداد قبل الليل
تعالي ساعديني اذا تگدرين
حنيــن : هزيت راسي بـ اي ورحت
وگفت اباوع للأغراض ما اعرف شنو اخذ
وشسوي عقلي وتفكيري بغير عالم
ساعدني احمد لأن شاف حالتي شلون تعبانه
طلع ميز اكل وكراسي خلاهم بالمطبخ
وشويه مواعين
طلعنه بره يعلمني شلون اشغل الماطور اوترس مي
احمد :حالياً التانكيات مليانه مي
بس اذا خلص وحتجتو علمتج شتسوين
كلشي مضبط ماكو تعب ان شاء الله
راح افوت اشغل الگيزر مدام الكهرباء اجت
خاف تسبحون
حنيــن : يمشي ويعلمني واني حاضنه نفسي
وافتر وراه بدون صوت طبينه عالمطبخ
جان يحجي ما انتبهت عقلي مو مني
احمد :حنيــن يمعوده وينج
حنيــن :فزيت اباوعله مثل الثوله ها شكو
احمد : اسمعي اني ادري بيج بحالة صدمه
وبعدج ما مستوعبه الصار متفهم حالتج
بس انتي لازم تنتبهين لوضعكم لا تبقين ضايعه
طلعتي من بغداد مهزومه تگولين حياتكم بخطر
وما تردين تشتكين يعني اقامتج هنا اطول
ضروري تفكرين شلون راح تعيشون بهيج مكان
شوفة عينج البيت فارغ لازم نجيب كلشي تحتاجونه
انتو متگدر تطلعون ولا اني اگدر اجي بعد
تعالي اگعدي دنشوف شنجيب اغراض
حنيــن : صفنت اباوعله بهدوء
وبداخلي صرخات تحرگ الگلب
سحبت كرسي گعدت احاول افكر
مدا اجمع شتات عقلي متحملت شهگت ابجي
احمد : والله حالتج حاله مع الأسف وصلتي لهنا
الله يكون بعونج
حنيــن : بلعت عبرتي مسحت دموعي بسرعه
اباوع لأيدي الترجف واضافري الملوثه بالدم
ضميتهم بحضني كاشه روحي وخايفه
احمد :ماشي اني راح اگلج شتحتاجون
انتن بس ثنين رتبن غرفه وحده زايده عليجن
بس يرادلها اثاث حالياً نجيبلها زوليه وفراش نوم وبرده
وشويه اغراض خفيفه للحمام وللمطبخ
عندج هذا طباخ موجود شتريته للعمال حتى يسون جاي
وهاي دبة الغاز خلي اشوف اذا بيها
-راح شالها ورجع گعد
احمد : خوش مليانه غاز تكفيجن
لأن متأكد ماراح تطبخن شي
هسه انطيج اسماء مطاعم وصي منهم
وبعد شنو تحتاجون
اي ثلاجة وغسالة ولازم نسحب خط مولد
حنيــن : گعد يحسب هواي شغلات
اثاث بيت كامل انعصر گلبي
يعني خلص حبقى هنا بعد ماكو رجعه لبغداد
ولا اگدر اسافر خارج العراق
مسحت وجهي اخذت نفس وحجيت بعبره
باوع ماريد اغراض ثگيله حالياً نجيب المهم
لحد ما استوعب حالتي يجوز الگه حل لوضعي
احمد : ماشي براحتج
لعد خلي نكتب الأغراض بورقه تدرين بيه انسه
حنيــن : طلع دفتر يكتب الأغراض
گمت طلعت بره يم رنـا بعدها على وضعها
گاعده تباوع لمكان واحد عيونها ما ترمش
ولا تتحرك عبالك تمثال
من نظراتها تبين شافت شي ما ممكن نسيانه
سحبت الجنطه طلعت 400 الف اخذت تلفوني
ورجعت على احمد قدمتله الفلوس حتى يتسوگ
ما قبل ياخذهم لحيت علي هواي
احمد رجاءً ما قبلت تاخذ ايجار البيت
وفضلك ما انسا طول عمري
هسه اخذ مني فلوس الأغراض فدوه
وذا عندك نت افتحلي نقطة اتصال
اخذ الفلوس وفتح نت
احمد :تلفونج الشخصي گلتي اخذو مو
حنيــن :حجيت بقهر اي
اخذو كلشي التلفونات والهويات
وهذا جان بالبيت احتياط
جبته حتى افتح حساباتي اعطلهم
احمد : لا يا انذال خوما يعرفون يفتحونه
بي صورج وكلشي يخصج
حنيــن : هزيت راسي بـ لا يمكن كسروهن
احمد : فدوه يمعوده اهمشي طلعتو بسلام
كلشي يتعوض لا تضوجين
حنيــن :احس راح اختنگ
واموت هالگد ما اكتم بعبرتي گدام احمد
اخذت نفس فتحت تلفوني
همزين مخليه كل حساباتي احتياط
بهذا التلفون حتى الخطوط الأصليه
لأن مره انباگ تلفوني تبهذلت حتى گدرت ارجع
حساباتي ومن ساعتها اخذت حذر
فتحتهم الكل جان بيهم كومة اشعارات
ما شفتهم طبيت بسرعة اعطلهم
الانستا السناب الواتس وكلشي ما خليت
اخر شي طلعت الخطوط كسرتهم
احمد : ليش كسرتي الخطوط؟
حنيــن : تواصلت ويه شخص بيهم
واخاف من خلاله يوصلولي
احمد اذا ممكن سجلي خط جديد
هز راسه بقبول وطلع حتى يروح للسوگ
شمرت التلفون عالطبله
گمت بره وگفت بالباب اباوع لرنــا وابجي صامت
حطيت ايدي على حلگي شميت ريحة الدم باضافري
لعبت روحي ركضت عالمغسلة يم الحمام
اتقيا انتهيت احس معدتي انشلعت لأن مو ماكله شي وگفت اخذ نفس وارتاح
فتحت المي جانت اكو صابونه غسلت هواي
حتى اتخلص منالريحة والدم
گعدت بالگاع اتنفس بصعوبه روحي ذايبه
تعبانه كل ما اغمض عيوني ادوخ
نعسانه هواي بس مگدر انام منالقلق والتفكير
گمت طلعت بره گعدت على حافة الطارمه
اعصر بمعدتي توجعني هواي
انادريت اباوع لرنــا بعدها على صدمتها
حاولت اگوم احجي وياهه مگدرت
مدا استوعب الصار لعد شلون هيه مستحيل تتخطى
صفنت افكر بحالتها ورد وفعلها من تصحها شراح تسوي احس عقلي حينفجر منالتفكير
مر وقت هواي واني على گعدتي
فزيت من سمعت حركه يم الباب
وگفت مرعوبه اباوع للباب بخوف معقوله لحگوني لهنا
لا مستحيل تراجعت لوره وگفت يم رنــا متت منالخوف
برد گلبي من شفته احمد فات ينزل بالأغراض ويبتسم
احمد : اجتج ثلاجة هديه من صديقي
تسوگت من عنده عباله رجعت اسكن هنا
گتله لا بيتي بي مهجرين
گال لعد عندي ثلاجه تاخذها الهم
هسه اجو ورايه جابوها
حنيــن : ابتسمت مجاملة وبداخلي اكتم العبرات
اني تاليتي صرت مهجره
احس گلبي انفطر
طلب مني ادخل رنــا للبيت حتى يفوتون الثلاجة للمطبخ
رحت سحبتها وگفت وياي جسد بدون روح
طبينه للغرفة لحد ما خلصو وراحو
رجعت رنــا لمكانها
جمعت قوتي ورحت اساعد احمد
نظفنه الغرفة عالخفيف لأن نظيفه مابيها بس شوي غبره
شغلت المروحه حتى تنشف دگينه البرده
وفرشنه الزوليه جايبها عالقياس
وجايب دواشگ ثنين واربع بطانيات ومخاد وهيتر
ومتسوگ للمطبخ من كلشي
حتى الگهوه جايبها يعرفني احبها
وجايب غده عباله النه نفس ناكل خلا عالميز وصاحني
احمد : يالله تعالن نتغده متت جوع
حنيــن : ماريد مو جوعانه
احمد : يمعوده بالگوه تحجين منالجوع
تعاي اكلي حتى لو لگمه شدي حيلج شوي
حنيــن : هزيت راسي بـ لا صدگ ماريد
عود اذا جعت اكل
احمد : ورنــا ما تاكل
حنيــن : لا ما تريد اكل انته بالعافية
عفته وطلعت وگفت بالباب اباوع لرنــا
مگدر اشيل عيوني عنها
ماكو كلام يوصف حالتها الي يشوفها يحسها صنم
تمشيت وگفت يمها حاولت احجي وياهه مگدرت
همه كلمتين ليش مگدر احجيهم
عفتها وانادريت اكتم عبرتي
طلع احمد من جوه شايل واير السحب والدگمة
احمد : اني رايح اسحب خط مولد
وگبلها خن اشوف اذا عاصم هنا بلكت يساعدني
حنيــن : تمام لعد اوگف خلي انطيك فلوس السحب
احمد :ما يحتاج بقى من فلوسج
لأن تسوگت من صديقي ما قبل ياخذ هواي
راح انطي للمولد مقدم لثلاثة اشهر
ماريد احد يجي يدگ بابكم
حنيــن :اي فدوه احمد شكراً هواي تعبتك
احمد :شمسوي يمعوده هاج هذا الخط الطلبتي
حنيــن :اخذته منه وهو راح
طول حتى اجه كمل شد الواير منالبيت
خطيه تعب كلش لأن جان بوحده
احمد : ما لگيت عاصم هنا رايح لبغداد يشتغل
اتصلت بي وصيته بيكم گال تبشر ولا تاكل هم
سبوعين واجي ان شاء الله ما اقصر وياهم
وحتى گال راح اخلي اهلي يعزموهم
گتله اشور البنات خاف ما يقبلون وارجعلك خبر
حنيــن : شنو يعزموني شدا يحجي هذا
ماريد التقي بأي احد هنا رجاءً احمد
احجيلهم وفهمهم ما يتقربون مني ابد
حتى هذا صديقك لا توصي بينه
اني اعرف اهتم بنفسي وبأختي
احمد :ماشي براحتج هسه من اطلع امر عليهم افهمهم
همه سألوني عليكم گلتلهم انتن مهجرات
منالرمادي جنتو يمي ابغداد وهسه اجرتو بيتي
واني طلبت من عاصم اذا احد سأل عليجن يگول
انتو گرايبه خطيه ما رفض
حنيــن :حزت بگلبي كلمة مهجرات
سألته بعبره ليش گلتلهم هيجي
احمد :لعد شگول يا عيني
اگول مهزومات وحياتهن بخطر
بعدين انتي طلبتي تگعدين بمكان محد يعرف عنج شي
حنيــن : صح ماريد احد يعرف عني شي
بس مو الا تگول عني مهجره جان گلت عليه
من اقاربك
احمد : ما ترهم اگول عليجن گرايبي
تصل السالفه على اهلي وانتي تدرين بيهم متبرين مني يجون يسولي مشكلة
وذا ما اگول عليج مهجره لعد شگول
محد يسكنج اذا مو عرف ومستمسكات وطلايب
احسن شي يعتبروكم من گرايب عاصم
حتى محد يدگ بابكم
هسه لا تضوجين يمعوده حياتجن اهم من كلشي
تعالي افهمج شحجيت للناس حتى اذا
صادفتي احد تكونين مستعده اجاوبين
وهم اريد اوصيج وافهمج هذا المكان ابد ما يشبه
مكانج ابغداد
حنيــن :نزلت راسي مقهوره اغص بعبرتي
كعدت يمه فهمني وشرحلي كلشي
ما سألت ليش وشلون جان كل همي
ادور امان
احمد :هاي المنطقه امان فوگ متتخيلين
لأن الناس هنا تحتمي ابعضها يخافون على جيرانهم
اكثر من نفسهم والاحترام بينهم ما ينوصف
ابد لا تخافين حتى لو تخلين بابج مفتوح
محد يمر بيج انتي يم خيرة الناس هنا
حنيــن : الله يحفظهم بس اني ماريد اشوف
لا خيرهم ولا شرهم
احمد : حقج بكلشي راح اكتبلج ارقام مطاعم اطلبي
منهم اكل واي شي تحتاجينه بينا اتصال
حنيــن : تمام شكراً هواي بحياتي ما انسه وگفتك وياي
حجيتها وگعدت ابجي گعد يمي يواسيني
يحجي عبث لأن ماكو كلام بالدنيا يواسي حالتي
احمد : اني صار لازم ارجع لبغداد
تعذريني مگدر اجي بعد تعرفين ظروفي
دوام والتزام اليوم بالگوة حصلت اجازة حتى اجيبكم
البيت بيتج ابد لا تفكرين بشي وارجع اگلج
لا تخافين المنطقة امان
وجيرانج خوش ناس ماراح تشوفين منهم شر
سدي بابج واگعدي لحد ما الله يفرجها عليكم
حنيــن :تمام توصل بالسلامة
باوع احمد اخر طلب اذا ممكن
اي شخص يجيكم يسأل عني وعن رنــا
گولو ما تعرفونه معرفة شخصية
مجرد نشتغل سوه واخر شي سمعتو من عدنه
علساس سافرنه
احمد : ماشي
حنيــن : انطيته رقمي الجديد
تمشيت وراه للباب خايفه وابجي
وگف يباوعلي بأسف ويطمني
سلمني المفاتيح وراح احس گلبي انعصر قفلت
الباب ورجعت يم رنــا احجي واغص بعبرتي
لا تسوين هيجي فدوه
تحركي احجي اي شي رزليني
لوميني اضربيني او على اقل ابجي
دا تخوفيني فوگ خوفي شبيج بس احجي
ما انتبهتلي ولا ردت
وگفت اباوعلها وگلبي يرجف
اعرف شلون راح تعاقبيني كلشي اعرف
مسحت وجهي اخذت نفس سحبتها
رحنه للغرفة نومتها بفراشها جانت مثل اللعبة بيدي
ولا عبالك هايه رنــا غطيتها وطلعت قفلت الباب
رحت للحمام شفت المي صاير حار
رجعت للغرفة فتحت جنطتي
جنت مجهزتها حتى اطلع منالبيت ابدي حياة جديده
وهسه فعلاً بديت حياة جديده بنفس الجنطه
بس الحلم والمكان يختلفون
عضيت ايدي بقوة ما بقت بيه طاقة للبجي
صرت اصرخ بدون صوت
اخذت ملابس وشامبو ومنشفه
رحت للحمام طبيت جوه الدوش بملابسي
احس الفستان لازگ بضهري
لميت روحي كاشه من وجع راسي
تحسست الجرح وجعني
باوعت جوايه عالدم لوث ارضية الحمام
لعد شگد نازف راسي وما حسيت يجوز احتاج خياط
لأن الوجع صار ما ينحمل
غسلت شعري بصعوبة خلصت نص بطل الشامبو
حتى نظفته منالدم وريحته طلعت لافه راسي بالمنشفه
وصلت باب الغرفة ودخت سحلت روحي يم الفراش
خليت راسي عالمخده معد بيه طاقة اگوم خلص استسلمت
ما اعرف غفيت من قلة النوم والتعب والجوع
او اغمى عليه لأن راسي نزف
المهم غمضت عيوني وما حسيت عالدنيا
ومن صحيت على روحي جان جسمي كله يوجعني
ومخدر بنفس الوقت
وكلشي يهون عن وجع راسي احسه صار بگد الغرفة
اريد اگوم ما اگدر ومنا الجوع
ما بقت طاقة بجسمي لو ابقى بمكاني يمكن اموت
بس ارادتي جانت قويه جمعت قوتي بالگوه وگفت
دايخه احس كلشي يفتر
طلعت اسحل بروحي
رحت للمطبخ فتحت الثلاجة طلعت الأكل
الجابه احمد گعدت اكل متجاهله وجع راسي وجسمي
ما احس طعم لشي بس اريد اسد جوعي
مرت فتره حسيت الدوخه راحت وبديت اشوف زين
گمت اخذت بطل مي شربته كله
استعدلت حالتي يعني نص تعبي جان جوع وعطش
اخذت فتره اتنفس گمت سويت گهوه
احمد جايبلي قلايه وكوب
ما اعرف شلون اجازي هالرجال
اخذت الكوب ورحت للغرفة
من شربت الگهوه صحصحت شوي
باوعت لرنــا نايمه مغطيه راسها
تلمست الجرح براسي احسه نازف ومتيبس
وقليل يوجعني
سحبت تلفوني حتى احط الخط
انصدمت من شفت التاريخ والوقت
يعني صارلي 20 ساعة نايمه
معقوله خاف مخربطه
تأكدت من التقويم عزاا
شلون ما حسيت مستحيل هذا نوم
اكيد جان مغمى عليه
گمت بسرعة دا اشوف رنــا
جنت خايفه بس لا بقت على نومتها نفس حالتي
بدون اكل وشي كشفتها جانت لابسه من تراكاتي
برد گلبي من شفتها تتنفس
رحت للحمام شفت ملابسها معلگه
يعني سبحت لعد اكيد صارت زينه ويجوز اكلت
رجعت للغرفة ابتسم بحزن
گعدت خليت الخط بتلفوني
عندي رقم هيفاء بقى مخزون
اتصلت بيها اول ما سمعت صوتي
صارت ترزل وتعاتب جانت خايفه عليه
: هسه اسكتي خلي افهمج
هيفاء : لج شتفهمينييي من ساعة اخذت رقمج الجديد
من احمد واني اتصل بيج ماكو
خفت هواي گلت راحت اخذوها
احمد گال محد يوصل هناك
ورغم كلامه ما برد گلبي بقيت بقلق عليج
ليش هيجي تسوين المفروض بالثواني اطمنيني عنج
حنيــن : اسفه حبيبتي مو بقصدي والله
ما اعرف اذا تصدگين من اگلج كل هذا الوقت اني نايمه
او يمكن مغمى عليه ما اعرف شصار وياي
هيفاء :يااا وربي عرفت صايرلج شي
لج حنيــن شدا تسوين بروحج
شنو يمنعج ما تشتكين عليهم اطيحين حظهم
هذولي السفله نسيتي عندج اخت تعادل عشر زلم
حنيــن : باوعت لرنــا وحجيت بگلبي
تعالي شوفي حال الأخت الي تعادل عشر زلم
باقيه جسد بدون روح
هيفاء :وينج تسمعيني
حنيــن :اي هنا سمعي اني ماريد اشتكي
لأن گتلج بشنو هددوني
اني ورنــا وكل قوتنا مو بگدهم
هذولي عشيرة كامله نصهم تابعين
لل*******
لازم اگعد ويه روحي افكر بحل يخلصني
بس احتاج وقت وراحه
هيفاء :اي صحيح لازم ترتاحين
ما تاخذين قرارج بتهور
زين شلون شفتي المكان يمج مرتاحه
حنيــن : المكان هدوء ومريح اطمني
اگلج هيفو احد اجه سأل عليه
هيفاء : لا محد سأل غير البنات بالصالون
حنيــن : تمام لعد سمعي ناقصني اغراض هواي
فدوه اريد ازحمج تشتريهم ودزيهم بالسر
ماريد مخلوق يعرف
اهم شي ملابس واغراض لرنــا ما عدها
هيفاء :اشتريلج من عيوني
بس مو عدكم الشقة مليانه اغراض
ورنــا عدها هواي ملابس ليش ماروح اجيبلج
حنيــن :وگفت على طولي احجي بخوف
لا لا ممنوع تروحين للشقة مالتي
اخاف احد دا يراقبها ويشوفج
ممنوع توصلين هناك دا تسمعيني هيفاء
هيفاء : اي اسمعج ماشي ما اوصل للشقة
حشتري الأغراض وادزهم ويه اكثر الشباب ثقه
حنيــن : تمام شكراً هيفو
سديته منها وگعدت افكر بحالنه والي صار
شسويت بروحي اني
خربت كلشي بسبب غبائي
خليت نفسي واختي بخطر
مدا تروح من بالي تهديداته
شنو هذولي ناس لا ذمة ولا ضمير
انوب اني مگدر احجي لأي مخلوق عنهم
جذبت على احمد وهيفاء بقصه من خيالي
خفت ما يساعدوني اذا عرفو الحقيقة
اي شي اكيد يعوفوني لو مهما جان حبهم اليه
حياتهم اهم من كلشي
محد مضطر يعرض نفسه للخطر علمود شخص ما يگربه اني خربت كلشي ولازم اتحمل نتيجة اغلاطي
لميت شعري بصعوبه الجرح بعده يوجعني
احتاج طبيب بس وين اگدر اطلع
گمت للحمام اتصنع القوه
اخذت الملابس الجانت لابستهم رنــا
لازم احرگهم خاف كلشي يصير
اخذت ملابسي وياهم وطلعت بره
فكرت اذا احرگهم يجوز يصير دخان يسولي مشكلة
رجعت خليتهم بعلاگه فتحت الباب الخارجي
اباوع هنا وهناك ماكو احد الشارع فارغ
طلعت ذبيتهم بالحاويه مال جيراني صايره قريبه
على بابنه رجعت بسرعة بدون محد يشوفني
طبيت بفراشي ارجف وگلبي يدگ سريع
هذا دليل مهم علينه زين تخلصت منه
