رواية سكينته وامانها الفصل الخامس 5 بقلم ام بكر
الباب مكسورٌ ونافذتي ذوت..
قل للرياح العابثات تمتّعي..
♡
3
حنـــين :حميت الأكل وگعدت اباوعله
كاشه روحي ما بقه بي طعم
لأن يبرد واحمي اكثر من مره
عفته وگمت طلعت بسكوت
اكل وافتر بالبيت مثل المخبله
ما اعرف شسوي
اندگ الباب المشترك تأفأفت بقهر
وتالي يعني ماريد اشوف احد مارييييد
استمرو يدگون الباب واني مغلسه
اخر شي طلعت زهگانه فتحت الباب
... نفس الوجه نفس الابتسامة والصوت الهادئ
انسام : شلونج خيتي
اول ما سكنتو ما عزمناكم احمد گال يستحن
عاد جبتلج من عشانه هاج الف عافية
قدمتلها الصينية اخذتها بتردد وخجل
حنيــن :تشكرتها وبقيت واگفه
شايله الصينية بأديه ثنين
هسه شسوي اگللها تفضلي لو اسد الباب
ابتسمت هي
وسحبت دبة مي الفلتر جانت بصفها بيها نص
شالتها وفاتت انجبرت ابتعد عن الباب
انسام :وهم جبتلكم مي خاف ما عدكم فلتر
اخذت الدبه ورحت عالمطبخ
والبنيه تمشي ورايه
عيني اتفحص كل مكان وزاوية
مو گالو خوات ثنين عجل وين الأخرى
حنيــن :خلت الدبه عالكاونتر ووگفت جانت تباوع
عبالك ادور لشي وفعلاً سألتني
انسام : عجل اختج وينها
حنيــن :خليت الصينية عالكاونتر وجاوبتها
اختي نايمه مريضه فلاونزا
انسام : سلامتها اجر وعافية
حنيــن : الله يسلمج شكراً عالأكل والمي
انسام : الشكر لله خيتي هذا واجبنه
احنه مقصرين بحقكم جثير
اترخص منج اروح احط عشه لهلنه
حنيــن : راحت وهيه تباوع هنا وهناك
وصلت الطارمه وانادرت عليه
:احنه مخلصينها رسميات
حت اسامي بعضنه ما نعرفها
اني انسام وانــتي شسمج
: تشرفنا اني حنيــن
انسام :عاشت الاسامي
امانة الله اي شي تحتاجينه دگي الباب
من يفتحولج گولي نادو انسام
حنـــين : هزيت راسي بـ اي
شكراً الج
راحت وهي تبتسم
ما اعرف ليش ارتحتلها احس ابتسامتها
بيها كل حنية العالم
رجعت للمطبخ شلت الصينية ورحت للغرفة
شميت ريحة الاكل تخبل
جايبتلي شوربه دجاج
وتمن بسمتي وكاسة طرشي وزلاطة خس ناعمه
مخليتلي خضره ورغيفين خبز
خليتها بالگاع ورحت اجيب خاشوگه
غسلتها ورجعت وگفت بالباب متفاجاة
جانت رنــا يم الصينية گاعده دا تاكل
باوعتلي وحجت بتعب
3
رنــا : جيبيلي خاشوگه
حنــين : رحتلها بسرعه انطيتها الخاشوگه
وگعدت اباوعلها شلون تاكل بشراهه عبالك مو شايفه
اكلت قطعتين الدجاج والتمن كله والزلاطه
انوب تشيل طرشي بيدها وتاكل
ما خلت شي صارت تغمس خبز بالشوربه
باوعتلي وحجت
رنــا : جيبيلي بعد من هذا الأكل
1
حنــين : هزيت راسي بـ اي
وگمت فرحانه مو مصدگه الدا اشوفه
طلعت بالطارمه تلبكت هسه شلون
اروح لبيت جيراني اطلب منهم شگول يعني
مشيت بتردد فتحت الباب اباوع لبيتهم ماكو احد بره
لزمت الباب بصفي دگيته هواي
طلعلي ولد صغير من جوه ناديته
: حبيبي صيحلي انسام
انسام : گاعده اتعشه واجه ضياء
ها منو عالباب
گال المره جيرانه تصيحج
گمت بساع يعني هذا الباب المشترك اندگ
عبالي الباب الجبير غسلت اديني
وطلعت البس نعالاتي والف الشال على راسي
لگيت حــنين فاتحه الباب عالنص
ادحگلي وتبتسم
ها عيني ناديتني حجت بخجل
حنين : اي اني صحتج ما اعرف شلون اطلب
احس عيب والله
انسام :عيب شنهي يمعوده
گولي شرايده عليج الله
حنين : الصراحة اختي حبت الاكل الجبتي
اذا عدكم بعد اريدلها
ضحكت وحجت
انسام :يبوو على هاي وگوه تسولفين
ابشري بعيني هسه اجيبلج
رجعت بساع عالمطبخ
كشفت الجداري ما ظل بيهن غير عشه عاصم
ما فكرت جثير اخذته وانوب عندي ماعون دولمه
منالجيران هم جنت مخليته لعاصم
خليته بالصينية رتبتها نفس ذيج
وطلعت انطيتها تشكرتني وراحت مكيفه
حت نست تسد الباب جريته اني وطبگته
حنيـــن : فتت بسرعه للبيت جانت رنا على گعدتها
خليت الأكل گدامها
وگعدت اباوعلها بحياتي ما شفتها
تاكل بهيج شراهه انصدمت بيها
من اكلت الدولمه
جانت ما تخليها بحلگها ابد
ولا اتذكر بيوم شفتها تاكل خبز
جانت تهتم لصحتها وتبالغ فوگ اللازم
حتى اني تمنعني وتنبه عليه
اتذكر بهذاك اليوم شسوت
من شافتني دا اكل دولمه
فلاش باك عوده للماضي......................
حنـــين :استلمت الأكل من ولد التوصيل
وفتت بوجهي للمطبخ جوعانه هواي
اليوم طلبت دولمه اجت وياهه مقبلات
صارلي فتره ما اكلتهم عود مسويه دايت
اصلاً ما سويته رنــا جبرتني
هسه مدام ازاعلنه خلي اكل كلشي بنفسي
خليت الاكل عالميز
غسلت اديني طلعت قوطية ببسي
جنت ضامتها بالثلاجة گعدت اكل بعدني ثاني لگمه وفاتت رنـــا فتحت عيونها بصدمة
عبالك اني جايبه رجال عالبيت مو دولمه
سحبتها من گدامي وصارت تصيح عليه
رنـــا : لج شنو هذا شنوووو مخبله
حنين :شنو يعني شدا تشوفين
انطيني دا اكل جوعانه
گمت حتى اخذ الأكل منها ما قبلت ظلت تحجي
رنـــا : عابت على هيج نفس ضعيفه
لج ناويه ادمرين جسمج وبشرتجججج
حنيـــن : اهووو عاد تره جسمي زين مقتنعه بي
ماريد اضعف بعد
بعدين شدخلها بشرتي بالأكل جيبي يالله
رنــا : امداج هايه عود خبيرة تجميل
تعرفين كلشي بس تضحكين على روحج
هذا الطرشي والدولمه والببسي
كله دمار لصحتج وبشرتج
مو جنتي تاكلين اكل صحي شبيج هسه تخبلتييي
حنيــن :اااف عاد فتهمت انطيني اكل بس هالمره
ما قبلت ترد عليه شگد حاولت وياهه
اخذت الأكل مني خلته بالزباله
وفرغت الببسي بالسنك
تخبلت لج ليششش ليييش
ما جاوبتني بقت واگفه تخوزر
عفتها وطلعت معجنات
من الكاونتر حتى اكل ويه الجاي
هم اجت وخمطتهن مني
1
رنــا : شوكت جبتي معجنات
يعني طلعتي تاكلين بدون علمي ماشي بسيطه
حنــين :لا تره زودتيهاااا شعليج انـــتي
جيبيهم ما ردت عليه ذبتهن بالسله
ووگفت تحجي ابرود
رنــا : هذا الأكل ممنوع يفوت للبيت
ترجعين على نظامج الصحي
تحافظين على جسمج ورشاقتج
وذا بنفسج تصيرلج كرش وتضاريس مثل البقرة
عادي اكلي بس مو هنا گدامي
1
حنيــن :ما جاوبتها باوعتلها بنظرة طويله
اخذت نفس عفتها وطلعت
اخذت تكسي ورحت للمركز
تلكتني هيفاء هم متعصبه تحجي
هيفاء : همزين يمعوده وين جنتي
وعايفه الهوسه فوگ راسي
حنــين : اسكتي مالي خلگج انـتي الثانية
هيفاء : ليش منو الأولى العكرت خلگج
الضاهر تعاركتي ويا رنــا
حنــين : جريت كرسي وگعدت
اهز برجلي متعصبه
ما تركتني هيفاء الا حجيتلها الصار
هيفاء : ياربيييي هايه شبيها اختج
شنو هذا الحكم الدكتاتوري المعيشتج بي
حتى بأكلج صارت تتحكم
تريدج تموتين جوع ومدا تعرف شلون
فرعون بزمانه ما سواهه
حنيــن : هيفو عوفج منها رجاءً
كل الحجي بعد ميفيد
اطلبيلي شي اكل جوعانه اني بدون ريوگ وغده
هيفاء : هسه حبيبتي ادللي
راح اطلبلج لفات شاورما اسرع شي
حنين : عادي اي شي المهم اكل
گمت بدلت ورجعت يم هيفاء وصلها الطلب بسرعة
گعدت اكل بدون نفس
مقهوره عالدولمه الراحت بالزباله
بعد طعمها بحلگي شگد طيبه
بسيطه اذا ما اجيب انوب
اجت هيفاء گعدت بصفي
تباوعلي وتبتسم رفعتلها حواجبي
: خير شبيج
هيفاء :ماكو شي سلامتج
اگلج هذا باسم شوكت يجي
حنيــن : يا باسم
هيفاء : باعو سوت روحها فقيره
باسم المصور مو گلتي يريد يجي يسوي وشم
حنــين : تذكرته وگوه بلعت اللگمه
عزاا والله نسيته اي گلي اريد موعد حتى يجي
عود گلت اراسله اليوم
التهيت اباوع صوري النشرتهم عالانستا وراح عن بالي
هيفاء :أنــتي دومج ناسيه روحج وحقج
اذا عايشه ويه فرعونه
خابري خلي يجي هسه مدام ما عدنه احد
من باجر تصير هوسه هنا
حنــين :اصبري بس اكل واشبع
انــتي گومي شوفي الموجودين وساعدي البنات
شكو مگابلتني
هيفاء : معجبه بيج حبي ومگابلتج
اريد اخطبج لأبني عابت
عود ماكله هم الشغل وجايتني الضهر عابت
حنــين : غمتني وراحت
كملت اكل غسلت ودزيت رسالة لباسم
حتى يجي
دقائق وجاوبني
باسم : هلا مسافة الطريق بس دزي العنوان
حنيــن : دزيتله العنوان
ورحت اشتغل بشعر الزبونه
وعيني على تلفونها تراسل بالواتس
متعاركه ويه حبيبها ما اعرف زوجها
ذلت نفسها اتوسل بي وهو حقير يغلط ويسب
اخر شي گللها كلشي انتهى وكل واحد بطريق
وهايه تتوسل وصارت تبجي
مگدرت اتحمل حشرت روحي
: لج گليله يطبك مرض وذا رحت قابل انـته فلوس
دارت وجها تباوعلي بصدمه
شبيج ليش هيجي شخصيتج ضعيفه
كله على بعضه خلگة ذكر شكو دا تتوسلينه
وتذلين نفسج خلي كرامتج فوگ كلشي
ما قبلت تسمعلي گالت معليج ورجعت تتوسله عووع
اجت هيفاء وگفت بصفي متخوصره
باوعتلها خير شبيج
5
هيفاء :بيه قهر وكله منج
حنيــن : لج شسويتلج
دفعتني واخذت الزبونه تشتغلها
شبيج مخبله
هيفاء : روحي بدلي رتبي روحج وشعرج
اني اكمل البنيه
حنــين : باوعت لروحي جنت لابسه تراك
ابيض ربع ردن ورافعه شعري كبايه
ليش ابدل شنو المناسبة شبي لبسي هذا
هيفاء : تروحين لو اضربج اختاري
حنــين : عفتها ومشيت اضحك واهز بايدي
اعرف شنو ابالها
تريد ارتب روحي حتى يشوفني باسم
الحمد لله اني مو بنتها
يمكن تزوجني من الأبتدائي
رحت للغرفة اباوع لروحي بالمراية
شسوي يعني البس فستان احمر واحط تاج
صدگ هيفاء مخبله
بقيت بملابسي
بس فتحت شعري جان مبرمل
اخذت حمره لون وردي فاتح خليت لشفتي
صفنت لروحي شدا اسوي
اني مرتبه ودائماً احب اكون انيقه
بس هالمره احس دا ارتب شكلي
لشاب بشكل خاص
سحبت كلنسه مسحت الحمره
ورجعت رفعت شعري كبايه نفس قبل
هيج احسن
2
وصلتني رسالة من باسم فتحتها كاتب
باسم : اني بالباب
حنــين : اخذت التلفون وطلعت دا استقبله
لحگتني هيفاء تضحك وگفت اباوعلها
تعالي وين رايحه
هيفاء : وين يعني اروح وياج استقبل نسيبي
1
حنــين :لزمت كتوفها فريتها ومشيتها گدامي
لا نسيبج ولا بطيخ مليون مره گتلج ماكو شي بينا
مصارلي يومين اعرفه
اگعدي بمكانج لا تخزيني گدام الولد
دفعتها جوه ومشيت... اسمعها تحجي
هيفاء :اي صدگتج حنــين خانم
كلها كم يوم ونشوف الماكو شي بينكم
لا عبالج تضمين عليه كاشفتجج ترااا
حنــين : ضحكت على سوالفها مجنونه
طلعت جان باسم طابگ سيارته بعيد وواگف يخابر
باوعلي ورفع ايده ياشر رديتله الأشارة
جان لابس بنطرون ابيض وقميص اخضر ربع ردن
وهو طويل ومفتول العضلات طالع يخبل
سد التلفون واجه بسرعه سلم
طبينه جوه اخذته لغرفة الوشم مخليتها بوحدها
لخصوصية البنات اكو بيهن يسون وشم بصدرهن
لو الخصر ويم السره
گعد وصار يباوع للمكان
قدمتله مي اخذه شرب وحجه
باسم : ما توقعت المكان مرتب ونظيف هالگد
عاشت ايدج
حنــين : شكراً من ذوقك
باسم : اختج هم تشتغل هنا
حنــين : منو رنــا
باسم : ليش گلتي منو عندج خوات غيرها
حنــين : لا بس رناوي اختي الوحيده
وما تشتغل هنا
مگتلي شعرفك بيها
ابتسم وحجه
باسم : بيوم التخرج الكل جان يحجي عنكم
انــتي واختج
حنــين : شحجو بالله
باسم : لا تخافين ما حجو شي مو زين
مجرد كلام عادي گالو انــتي واختج يتيمات
وما عدكم اقارب ما اعرف اذا صح السمعته
حنــين : ضجت من الكلام
وگمت ارتب ميز الشغل
: اي صح السمعته اني واختي ما النه احد بس بعضنه
ومرتاحات هيجي
باسم : احسج ضجتي وحجيتي بزعل
لا تهتمين اني هم يتيم ما الي احد بالدنيا
غير نفسي حتى اصدقاء ما عندي
ومثل مگلتي مرتاح هيجي
حنــين : حجيت بگلبي
جذب محد مرتاح بس دا نكابر
انطيته كتلوك يشوف الرسمات
خلا عالكرسي وحجه
باسم : ميحتاج اشوف جبت رسمتي وياي
حنــين : وينها دا اشوفها
فتح تلفونه شوفني صورة عنكبوت
تمام رسمه بسيطه انطيته التلفون وگعدت
باسم : مبين الوشم لعبتج
حنــين :اي لعبتي وملعبي
وانــته مبين تحب العناكب اديك مليانه وشم
باسم : اعشق العناكب
حنــين :الصراحة اني انقرف منهم
ابتسم وباس وشم العنكبوت بيده كشت روحي
شنو رئيك اخليلك ويا شبكه
احس مو حلو عنكبوت بوحده
باسم : هذا شغلج شوفي ياهو الأنسب سوي
حنـين : حلو لعد ارسمها
وذا ما عجبتك نغيرها
هز راسه بقبول
گمت جهزت الرسمه شوفتها اله عجبته
اني ما سألتك وين تريد الوشم
ابتسم ووگف ينزع القميص
تبسمرت بمكاني شدا تسوي
باسم : انزع القميص لو تردين تسويلي الوشم
فوگا عادي ماكو مشكلة
حنــين : بلا سخافه عاد وين تريد الوشم
ضحك وگعد عالكرسي
باسم : بجتفي يمعوده اذا متگدرين عوفي
اروح لغير مركز
حنــين : حجيت بتردد لا عادي اشتغل
رحت وراه نظفت المكان وطبعت الرسمه
جنت متوتره لأن اول مره اشتغل لشاب ينزع قميصه
جنت اشتغللهم بأديهم
ورجليهم واكو بيهم يطلبون وشم بالرگبة
جبت مرايه خليتها وراه ضهره
اعكسله الصورة ها شنو رائيك
حجه وهو يباوعلي
باسم : تخبل
حنــين :صدگ عبالي ما تحب الفراشه
انبهت وباوع للرسمة شافها عنكبوت
رجع باوعلي وضحك
ها شنو رائيك بيها
باسم : گتلج تخبل عاشت ايدج اشتغليها
حنــين :تمام اتجاهلت نظراته اليه
وبديت الشغل خدرت المكان وجهزت مسدس التاتو
گعدت وراه ارسم اول مره هيج اتوتر واتعب
ما اعرف السبب عطره الحلو
لو لأن يغني همس
او يمكن لأن هو وسيم وجسمه يخبل
هالگد مو مركزه
حجه وياي وما سمعته رفعت راسي وگلت ها
شنو حجيت ضحك ودار وجهه على كتفه يباوعلي
باسم :وين شارده
حنــين : احم مو شارده مركزه بشغلي
لدرجة ما سمعتك
باسم :ها گلت اليوم هادئه عكس بيوم التخرج
حنيــن : ليش شسويت اني بيوم التخرج
باسم : ما سويتي شي بس اجيتي تكسرين
الكامرا على راسي
حنــين :لا مو لهالدرجة عاد لا تزودها
باسم :مدا ازودها صدگي اني لحد هسه مخلوس
من صيحتي عليه ما نمت الليل اتخيلج واخاف
حنــين : ضحكت على كلامه
كافي عاد دا تحسسني اني وحش
بقه يحجي ويضحكني لحد ما خلصت الرسمه
ووگف يباوع لجتفه بالمراية
باسم : شنو هالجمال عاشت ايدج
حنــين : بالعافية
سحب قميصه يلبس ويحجي
باسم : شگد الحساب
حنــين : حساب شنو هايه هديه مني بدال الصور
ضاج وحجه بزعل
باسم : ها يعني عتبرتي الصور دين ودا توفيني
مع الاسف عليج
حنــين : لا مو هيجي والله
بس دا اهديك رسمه مقابل هديتك مابيها شي تره
هز راسه بقبول وابتسم
باسم :ماشي شكراً على هديتج وبعد لا تعيديها
حنـين :حجيت ببتسامه تمام طلع واني وراه اوصله
لمحت هيفاء راحت تركض اكيد جانت وره الباب
تتسمع بسيطه الج
وصلت باسم للباب ووگف يحجي وياي
باسم : نتراسل مو
حنـين : ليش نتراسل بالله
باسم : حتى اسألج شلون اداري العنكبوت
شنو ياكل شنو يشرب
حنيــن : ضحكت على كلامه
لا تخاف هذا ما ياكل ويشرب صايم
ابتسم وسند ايده عالباب
باسم : امم زين شلون انام على ضهري
خاف ينجعص العنكبوت
حنــين : ياا عود تحاول تكون خفيف الدم
يالله روح عندي شغل
ضحك وراح يأشر على اذنه بحركة التلفون
يعني نتخابر عابت شگد سخيف
سديت الباب وانداريت
شفت هيفاء واگفه تصورني وتضحك
رحتلها وجان تشرد
تعالي اليوم اموتجججج
7
........ الحاضر
انسام :گاعده بفراشي ادحگ عالساعة صارت
12: ليلاً وعاصم ما رجع
اتصلت بي جاوبني بساع
عاصم : ها نسوم جيت يابه گربت اصل
انسام :هلا بيك تصل بالسلامة
سديت الخط وگمت بساع
حطيت الصوبه النفطيه بالحمام
وحضرتله الهدوم الشتريتهن جدد
والمنشفه والشامبو وليفة
سديت الحمام تا يدفه
وطلعت وگفت بالطرمه انتظره
دخيل ربي شنو هالبرد مو مال شغل والله
بس منو يگدر يقنع عاصم العنودي
شويه وفات سد باب السياج واجه
متلثم وادينه بجيبوه مبين ميبسه البرد
فوگاهه حاجاني بزعل
عاصم : عليش واگفه هين متگليلي
انسام : غير انتظرك
عاصم : شايفتني جاهل فوتي جوه يالله
انسام : فات واني وراه اضحك
ايباا عساس رزلني
راح بوجهه لغرفتي
گعد يم الصوبه يتدفه فل التلثومه ودحگلي
عاصم : اريد جاي
انسام :اي رحت عالمطبخ حميتله الجاي
جنت مسويته قبل ساعه صبيتله گلاص ورجعت
جان مدنگ على ادم يبوسه بخده
انطيته الجاي وگعدت يمه
عاصم : عليش ما نمتي
انسام : اذا نمت منهو ينطيك جاي ويولملك الحمام
عاصم : واني شبيه ما اعرف اسوي الجايات
وافوت اسبح انوب واگفه بره بالبرد
جربي تعيدينها انوب
انسام : هسه لا تسويها قصة
اني اصلاً ما اجاني نوم
احجيلي عن يومك خوما تعبت
عاصم : لا ماكو تعب ان شاء الله
گضيناها ضحك وونسه
احجيلي انتي شصار ما صار بغيابي
انسام : ماصار شي كلشي على حطت ايدك
عاصم : ها يعني ما رحتي لجيرانه
انسام : بلا رحت وطبيت البيت
عاصم : صدگ شلون خلوج تفوتين
وشفتي ما شفتي يمهم احجيلي
انسام : وديتلها عشه ومي فلتر
خليتها تشيل الصينيه
واني شلت الدبه طبيت جفت بدون عزيمه
البيت هدوء عبالك مهجور هنه خوات ثنين
وحده نايمه ما شفتها عساس مريضه
والأخرى هاي التگول عليها ام اللسان اسمها حنــين
مبينه خوش بنيه وفقيره بالگوه اطلع الكلمه
كيفت بالأكل واجت طلبت انوب
عاد انطيتها عشاك
عاصم : ها يعني اكرمتي بعشايه
والله ما عرفتج يالذيبه
گلت ماراح ادبرينها
انسام : رفعت كتوفي بفيكه
شعبالك اني انسام مو حي الله
عاصم : همم دحگو انتفخت
عالعموم عاشت ايدج
ظلي يوميه وديلهن اكل هذول ما يطبخن
انسام : شمدريك ما يطبخن
عاصم : اكثر من مره اشوف ابو التوصيل
يم بابهم هسه تلگين هذيج البنيه مريضه من الجوع
انسام : مدري والله
هسه گلي برد گلبك من ناحيتهن
هز راسه بنفي
عاصم :لاا ابد ما يبرد
گلبي ما مرتاح احساسي يگول وراهن طلبه
انسام : واحساسي يگول انـته خايف لحالك
دحگلي وابتسم
عاصم : هسه سوي الگتلج علي
ظلي روحيلهن خن نشوف
اذا صاب احساسي وطلع وراهن شي اتصرف
بالمناسب كل الي اريده ما يلوحنه شي يضر
وذا صاب احساسج وطلعو فقيرات وما عدهن شي
نحسن الهن ونكرمهن
بي شي كلامي نسوم الذيبه
انسام : لا مابي شي
يالله گوم اسبح ريحتك كلها دخان مال نار
اختنگنه ضحك وگام كفخني على راسي
راح عالحمام يسبح ظليت گاعده تاشوف
شيگول من يلگه الهدوم
مرت فتره ورجع حاط الخاولي على راسه
گعد يم الصوبه ينشف صفنت ادحگله
اشو لبس الهدوم وسكت ما گال منين
ولا حجه گمت جبتله مشط ومراه
اخذهم يمشط ويدندن
دحگلي وضحك
عاصم :شبيج عوزج تبجين
مو حلوات الهدوم يلعبن النفس
انسام : عجل عش لبستهم
عاصم : خوما اطلع مصلخ يولي
انسام : اي صدگتك ابتسم وگرص خدي
عاصم : فدوه للزعلت حلوات عاشت ايدج
عليش كلفتي نفسج تره عندي
انسام : ما كلفت نفسي هذول من الباله
عاصم : لا ينذله اني الجنت البس ماركات
تلبسيني باله باطل عليج
انسام : هههه جذب مو باله
عاصم : ادري بيهم
اي سولفيلي شجبتي لنفسج
انسام :امم جبت دشداشه قديفه مخمل
و ربطه وجنطه وجواريب وتسوگت للبيت من كلشي
عاصم : عفيه بالسبعه
وضميتي فلوس تا تسوين حشوه لسنج
انسام : اي خليت ميه
عاصم : شيكفون ميه يولي
وين صرفتي الباقي
انسام : وفيت دين عليه وخليت فلوس للمولد
وهم عوزنه نفط ودبة غاز
عاصم : شعليج بهذول اني ادفعهم
سوي سنج ولا تفكرين بشي
باجر اطلبي اجازه اذا ما لگيتي احد يروح وياج
عالطبيبه تاروح اني
انسام :ان شاء الله خل تصبح الدنيا ونشوف
جر المخده ومدد يگلب بتلفونه
گمت جبت علبة المرطب گعدت يمه جريت ايده
اليمين تا احطلها صفنت ادحگ عالگدمات والفراگيس
واضافره الماكوله حت اللحم مال اصابعه وارم
انوب ايده مخرمشه
اربع شخوط تبين مال اضافر
: هذا شنهو متكاون ويه احد
دحگلي ورفع حاجبه
عاصم : هذا شغل جارتنه التگولين عليها فقيره
انسام : منهي جارتنه حنيــن قصدگ
عاصم : اي عجل اكو غيرها العرمه
انسام : انبهتت ادحگله
ليش سوت هيج ووين
عاصم : بهذاك اليوم من شفتها عالصطح
اگللها فوتي جوه متفعل
انجبرت اجرها من ايدها تاتفوت
عاد هيه من فقارتها وحنيتها خرمشت ايدي
اضافرها عبالك سعلوه
انوب گامت تصيح يالمخبل يالهمجي
الا اشتكي عليك عساس اني ازحفلها
انسام :تخيلت الموقف وضحكت مدري ليش
دحگلي عاصم ابتسم وهز راسه
عاصم : هاي بدال ما تروحين تسحلينها من شعرها
عالسوته بأخوج گاعده تضحكين
انسام : يالله باجر اروح اكاونها اخذ ثارك مربع
عاصم : خاف هيه تسحلج وترجعج عليه مكشمه
انسام : قابل اني عاصم الما گدر يفك نفسه منها
دحگلي وگعد ضربني بالمخده
تراجعت وره اضحك وهو يتوعدلي
عاصم : تعيريني نسوم بسيطه لج
انسام : رجع مدد عساس زعلان
رحت يمه بست راسه
اخويه الشهم ابو الغيره ما عاش اليعيرك
هيه غير بنيه وما گدرت تكاونها لو ازلمه جان كشمته
عاصم : همم مو لاحگه وره ما بعرتيها
انسام :يالله عاد لا تزعل البنيه حلوه
خلها تمون عسما تصلخ جلدك يجوز انته كيفت سحت
دحگلي وراد يگوم يضربني دفعته وانهزمت اضحك
رحت للحمام لگيته مطفي الصوبه ومخلي هدومه فوگ الغسالة گعدت اجلفهم بالطشت
اجه وگف بالباب يحجي
عاصم : شموازيج متگليلي ما مصبحه عليج دنيا
عوفيهن وگومي نامي وراج دوام
انسام : عاد هنه من كثرهن تا اعوفهن
خلصت بس اجففهم روح نام انــته لا تظل تفتر بالبيت
مثل الطالع تقاعد
ظل يلح ويحجي ما فعلت اگوم
نفخ بعصبيه وراح
قابل بس انــــته عنودي
جففت الهدوم وطلعت
شريتهم عالمحجر
خليت الصوبه النفطيه بالمطبخ
ورجعت لغرفتي مددت بفراشي
هسه اكيد عاصم لو طلع بالطرمه لو مدد بغرفته
وصفن بالسگف
اريد اگوم اشوفه بس مگدر اغفي نمت بساع
...
حنــين :من الـ 9 الصبح گعدت
مگابله رناوي اباوعلها وابتسم احسها مرتاحه بنومتها
وجها متغير مابي شحوب نفس كل يوم
يمكن لأن اكلت البارحه وشبعت
بستها بخفه على خدها ورحت للمطبخ
سويت گهوه وگعدت اكل كعك
اجت على بالي انسام ياربي هالبنيه شگد طيبه
اكلها عافية على رنــا
باوعت للمواعين تارسه السنك
هسه بيش اغسلهم ما عندي جلافه ولا زاهي
جان عندي بطل زغير خلصته عالملابس
شون اذا دزو عليهم خوما انطيهن وصخات
ولا اجه على بالي اشتري شغلات للمطبخ
اصلاً منين اعرف جان كل اكلي من بره
يادوب اسوي گهوه واغسل الكوب مالتي
تأفأفت وطلعت بره بالطارمه اليوم شمس
بعد ما افرح بيها لأن وراهه يجي برد موت
فتحت شعري ادلك فروة راسي
انتبهت الباب المشترك بيني وبين جيراني مفتوح للنص
اتذكرت البارحه نسيت اقفله
رحت قفلته ورجعت افتر بالشمس
جسمي بحاجة فيتامين د
احس تكسرت لأن مخلصتها نوم وصفنات بالغرفه
لا رياضه ولا اكل صحي
گعدت عالقنفه ايدي على خدي واتحسر على ايامي
كل ما تحاول دموعي تنزل اتلاحگهم
ماريد ابجي واكره روحي
گمت افتر اطرد الافكار السلبية من راسي
احجي ويه روحي وادندن
ما اعرف شگد مر وقت
فزيت على صوت الصريخ عد بيت جيراني
شصاير رحت يم الباب اتسمع
مركزه دا افتهم شكو
ما حسيت الا دگو الباب قوي
گلبي طار ارتعبت عزا شبيهم هذولي
فتحت الباب عالنص جانت مريه جبيره
لونها مخطوف خايفه
عفاف : شلونج يمه اريد اسألج
ابنه ضايع وليد زغير عمره تسع سنين
مريض ما يسولف ما شفتي عليج الله
حنــين : لا والله خاله ما شفته
لطمت على رجليها احس حيلها ميت
جانو بنات واگفات بالطرمه
صارت تحجي عليهن بعصبيه وانفعال
عفاف :راح الوليد يمه رااااح
معد نلگا الله يعثرج يشهد اليوم موتج على ايدي
مو على ايد عاصم
جانت شهد واگفه تعصر باديها وتبجي
شهد :شعليه اني خوما اظل حارسته
عفاف : اي تظلين حارسته خوما جاتلج الشغل
هذا الوليد ضاع شوفي لنفسج ديره تنهزمين بيها
گبل لا يجي عاصم
حنــين : گعدت المره على حافة الطارمه
تلطم على رجليها وتحجي على شهد وتسبها
اجه شاب گامت تلگته تسأل بلهفه
عفاف : ها محمود يمه ما لگيته
محمود : وين الگا ما خليت مكان الا ودورته
المحلات والجيران والشوارع نبشناهها نبش
حت بالخرايب دورته وماكو
حنـين : تخبلت المره گامت تلطم وتصيح
انتبهت لمحمود يباوعلي
سديت الباب بسرعة ورحت افتر
افكر وين راح الولد معقوله انخطف
المفروض يبلغون الشرطه مو ملتهين يصيحون
انسام :اول ما رجعت عالبيت اصدموني بأدم مختفي
انفعلت احجي واصيح وين ضاع الوليد
كل ما اسألهم على مكان يگلولي دورنه
رحت على بيت حنيـن دگيت الباب
فتحته عالنص ادحگ بتك عين
: عليج الله ما شفتي ادم
حجيتلها مواصفاته وشلابس
حنيـن :والله مشفته ليش متبلغون الشرطه
يجوز انخطف
انصدمت انسام لطمت على وجها
عزا شحجاني اني
سديت الباب ورحت گعدت انقهرت عالولد
انسام : طلعت تلفوني ايدي ترجف
خابرت عاصم امتمت مجاي يطلع الحجي
وهذا تخبل بس يريد يفتهم مني
عاصم : يول شكووو يربججج شكو
سولفي عليش مخنوگه انسااام
انسام : مگدرت اسولف اجه محمود اخذ التلفون
مني يحجيله
محمود :ها عاصم هذا ادم مختفي ما لگينا
من ساعه 8 وهاي صارت بـ 12
ما خليت مكان الا دورته وماكو
انسام : سد التلفون
گعدت بالگاع افكر واتخيل شغلات صايره ويه ادم
راسي راد ينفجر وخاله عفاف عيونها ورمت
عرفت ضغطها صعد گمت جبتلها علاج
انتظرنه ربع ساعه واجه عاصم متخبل الگاع مجاي تحوي مباشرة اشر على شهد اعصابه نار
عاصم : اذبحجج اذا ملگيته افتهمتييي
اذبحججج انتيي واليطلع وراججج
انسام : گمت تلگيته اهدئ العصبية متفيد هسه
روحو دورو عالوليد
محمود : وين ندوره اگلج نبشت بكل مكان وماكو
گولي ملحه وذابت
انسام : انفعل عاصم ما خله بالحجي عالكل
طلع تلفونه يخابر اصدقائه تا يجون يدورون ويا
دز محمود تا يبلغ السيطرات
وبدربه ينطي خبر للجامع
ودز صورة ادم للبيجات تاينشرون
حنـين :گاعده بالحديقه اسمع حجيهم
الكل مرعوب عالولد خطيه بلكت يلگو يارب
گمت للغرفه حتى اشوف رنـا بعدها نايمه
رحت كفيت البرده حتى تفوت الشمس
الغرفه ريحتها مدري شلون
فتحت الشباك واتفاجأ بولد يلعب بالرمل وره الشباك
يضحك ولا مهتم عزا معقوله هذا ادم
طلعت اركض رحتله اسحبه من ايده
گوم اهلك يدورولك يالله گوم حباب
ما قبل عبالك لزگ بالگاع
رجعت بسرعة فتحت الباب جانو الكل حزين وخايف
حتى عاصم عيونه مدمعه
صحت انسام ما سمعتني
عليت صوتي انسااام
باوعولي الكل
تعالي هذا ولد يمنه يمكن ابنكم
اجو الكل يتراكض اولهم عاصم
فات يباوع هنا وهناك ويسأل
عاصم : وينه ادم وينه سولفيييي
حنـين : وره البيت دا يلعب بالرمل
راحو علي كلهم واني وراهم
شفت عاصم شابكه لحضنه ويحجي بعبره
عاصم :متگلي شسويت بينه اخذت حيلي يمصگوع
انسام : دموعو عيوني على كلام عاصم ولهفته
شال ادم وراح لبيتنه والكل يمشي وراه
ظلت بس شهد صدت على حنـين تحجي
شهد : مو سألوج مرتين عالولد وگلتي ما شفته
اشو طلع يمج شنهي خطتج بالله
ردتي تخطفين ابني مو
حنــين : باوعتلها وضحكت بستهزاء
شدا تمسلتين انــتي
تعصبت وهدت عليه عساس تضربني
وگفت بوجها انسام دفعتها
انسام : ايباا ما عرفتج يالحنينه
خطيه ابنج بحضنج واجت البنيه خطفته منج
ما تگدر تگولين ضاع بسبب اهمالج
وهاي مو اول نوبه
شهد : لا مو بسبب اهمالي هاي خطفته
الله يعلم شنو ابالها سكنتوها بسدنه
ما نعرف عنها شيييي
حنيـن : انجبي حبابه وروحي لبيتج
اهتمي بالولد حتى ما اخطفه مره ثانيه
انسام : انفعلت شهد جيتت على حنين تا تضربها
كمشتها حنين لوت ايدها
خلت شهد تفرفح ما حجزت بينهن وگفت اضحك
وادحگ على حنين ادفع بشهد عالباب
حنـين :امشي ولي لبيتج عابتلج صخله
انسام : دفعتها لبيتنا ظلت شهد
كامشه ايدها وادحگ لحنين مصدومه
طلعت وراهه اضحك ومكيفه
حنيـن : سديت الباب ورحت افتر واحاجي روحي
دمي يغلي على شهد لوما خاطر انسام
الا اكسرها تكسر حقيره تضيع ابنها وتتهم الناس
عابت حتى عابت
انسام :گعدنه بالطرمه عاصم مخلي ادم بحضنه يشمه
ويمسد على راسه دحگلي وتنهد
عاصم : هذا شودا على بيت الجيران
وبابهم يظل مقفول
انسام : هاي البارحه من انطيتهم العشه
البنيه نست تقفل الباب
يجوز دفعه ادم وفات لايف وره البيت
خطيه ما شافته
شهد : لاااا هيه خطفته
مبينه من وجها مو راحه اريد اشتكي عليها
انسام : دحگلها عاصم بنظره عوزه يخنگها
عاصم :اذا وجها مو راحه منهو المريح انتي
الشوفتج تسد النفس انوب تريد تشتكي
شتگليلهم بالله
اجت جارتنه باگت ابني من حضني
1
شنهي شغلج ما اديرين بالج على ابنج
سارحه لو فالحه ما اتذكر بيوم شفتج كامشه شغله
ماكو شي يلوح ايدج غير تلفونج مكنكه 24 ساعه
سولفي عليش ساكته
انسام : ما جاوبته بس مدنگه
عاصم :لا مره ولا مرتين تضيعين ابنج
واصبر واتحمل سوالفج
لخاطر من خاطر بس لهين وكافي
هاي اخر فرصه لج وكلامي نهائي
اذا يتكرر هالموقف تحلمين تعتبين هذا البيت
ولا بعد تشوفين ابنج بحياتج
افتهمتي
انسام : هم سكتت ما جاوبته
صاح بيها الا فزت
عاصم : افتهمتييييي
شهد : اي فتهمت والله التوبه اخلي يغيب عن عيني
عاصم : خير ان شاء الله اخذي الوليد وكلي
وبدليله وعينج منه
طبعاً اني هسه جاي اسولف ويا الگاع
عبن انتي ابد ما تاخذين الحجييي
انسام : اخذت ادم وفاتت مبوزه
وگف عاصم ياخذ نفس انهد حيله
خابر على محمود تا يجي
وصاني ورجع لشغله جان جاي بالماطور
طبيت جوه لگيت شهد يم البنوات تحجي على حنين
اني وراهه متشوفني
شهد : هاي جارتنه الملطلطه هيه خطفت ادم
وغايتها مبينه مثل عين الشمس
شفتوها شلابسه تراكسود ربع ردن
مطلعه زنودها تا عاصم ينعجب بيها
عاد خوش لبسها ولا دحگ بوجها
تحمد ربها انسام فكتها مني
1
انسام :ضحكت بحس عالي الا فزت وصدت عليه
قصدج تحمدين ربج البنيه كبرت عقلها وياج
والا جان بعدها لحد هسه تكتل بيج
شهد : عبالج افوتها للها مو
بسيطه اني اعلمها
انسام : اي عفيه روحي اخذي ثارج منها
لا تسكتين بس اخذي البنوات وياج
تا يشيلنج من تكسرج ههههه
عفتها ورحت بدلت
رجعت عالمطبخ جانو يصبون غده
جهزت صينيه لحنيـن
وطلعت دگيت الباب
شوي وفتحتلي وهالمره انطتني مجال فتت
وگفت ادحگلي وتعصر بأديها
شبيج يولي ما تريدين الأكل
2
حنـين :بلي اريده شكراً هواي
بسس سمعي انسام انه اسفه مو قصدي اتصرف هيج
ويا البنيه شهد
انسام : صدگ عجل اني عبالي قصدج
وجبتلج اكل تا اشكرج واگلج عاشت ايدج
حنيـن : باوعتلها متفاجأة
كل عقلج دا تحجين لو ناصبه عليه
ضحكت وقدمتلي الصينيه
انسام : اي من كل قوايه العقلية
بردتي گلبي بيها تستاهل هاي العوبه
حت تنازلت عن ثار اخويه وسامحتج
حنـين : استغربت ثار شنو
انسام : مو خرمشتي ادين عاصم اخويه
گلت اجي اخذ ثاره وهسه بطلت
حنـين : انه خرمشته شوكت
انسام : لا تنكرين بهذاك اليوم من شافج عالصطح
يگول جريتها تا تفوت جوه وخرمشتني
بعدهم جروح اضافرج بأدينه ما طابن
حنـين : هاا اي اتذكرت
اسفه بوكتها جنت مخبله ما اعرف شصارلي
... بگلبي اگول حيل بي يستاهل
انسام : عش تعتذرين يمعوده
مزال بردتي گلبي بشهد تمونين
حنـين : ضحكت على حجايتها
مبينه كلش تحبيها زوجة عاصم
انسام :منهي زوجة عاصم شهد قصدج
حنـين : اي
انسام : غدييي يمعوده لا تسدين نفسي واني جوعانه
مجرد اتخيله يتزوج شهد تلعب روحي
الحمد لله عاصم بعده اعزب مو متزوج
3
يتبع.........