رواية سكينته وامانها الفصل الثالث عشر 13 بقلم ام بكر
" لم ينتبه أحد لغرقي ،
أنا الذي ظهرت بمظهر الناجي دومًا. "
انسام : ظليت گاعده للصبح ما جاني نوم
رحت للدوام بدون ريوگ الطريق كله افكر
والوم بروحي استخفيت وتصرفت مثل المراهقات
ما جان لازم اخلي حنيــن اتابع سيف وتحجي ويا
كلشي جان غلط انوب كلشي ما حصلت
الزلمه طلع ما عنده شي
وعاصم زعل ووگعت السالفه براس حنيــن
البنيه فوگ ضيمها جبتلها مغثه
بس اني هم مجان عندي حل
عاصم يريدني اتزوج محاصرني تعاي وافقي
زين اني ماريد اتزوج خوما غصب
مجاي يفهم عليه مدري ليش يعتبرني حمل على اكتافه
هو لو بس يصبر لتالي الوضع
على اقل لو بس يطلعون اخواني من السجن
ويخف الحمل عن عاصم تا نشوف دربنه زين
لا هذا ما يفكر بي ابو العواصم يروح ويرجع
تعاي يا انسام تزوجي عبالك راح تخلص الزلم
وصلت المدرسه بساع عبن الطريق كله
اسولف لروحي واحسب وافكر
طبيت بوجهي عالصف
بالگوه ركزت وكملت درسي
رحت سلمت على خالي والمدرسات
وطلعت تاروح عالمحل اشتري شي اكله
جعت حيل واحس دخت
لحگني الطالب مهند ينادي بأسمي حاف بدون ست
التفتت ادحگله عاگده حواجبي وهو يبتسم
خير شعندك
مهند : اذا تسمحين عندي موضوع مهم
اگوله الج
انسام : اي سولف شكو
مهند : مو هين بيها مجال نطلع نگعد بسيارتي نسولف
انسام : انــته شجاي تخربط
شنو اطلع وياك بالسيارة شعندك سولف هين خلصني
توتر يدحگ حوالينه ويمتمت
مهند : ما يصير هين
زين تعاي وره الأدارة ماخذ من وقتج جثير
سالفة مهمه لازم تسمعينها
انسام :مهند ليش ما تولي من گدامي اخيرلك
اعصابي تعبانه مالي خلك تفاهتك
شنو اروح وياك وره الأدارة صدگ خبل
اذا عندك سالفة تخص دراستك روح عالمدير
الضاهر ناوي اجدد الاقامة بصفي
_شبعته رزايل وهو صافن ما حجه
عفته ومشيت
جانت عايزه تا يجي هذا الكسول يجملها عليه
خليني بضيم ابو العواصم وزعله
الله العليم شراح يسوي من يجي
طبيت المحل شتريت كعك
رجعت عالمطبخ اخذت جاي وطلعت گعدت بالحديقه اكل بدون نفس وافكر شلون راح اراضي عاصم
وشلون اقنعه ماريد اتزوج
على گعدتي واجه مهند انوب
وگف گدامي يدحگلي متوتر
خير شعندك سولف
دحگ حوالينه وگرب عليه يبتسم
مهند : انسام اني احبج والله من زمان
ما يهمني انـتـي اكبر مني ولا يهمني الناس
احبج اني واريدج تقبلين اتزوجيني
انسام : ادحگله فاتحه حلگي مصدومه
حت الكعكه مگدرت ابلعها شربت جاي وغصيت
وگفت اريد اسولف ويا مگدر
انوب اجه يمسد على ضهري
دفعته واخذت نفس اسأله اخاف سمعت غلط
انـته مستوعب نفسك شحجيت
وگف يرد بكل صلافه
مهند : اي مستوعب نفسي اني احبج
لا حرام ولا عيب وذا عبالج اني فاشل بدراستي
تره اتعمد ارسب تا اظل يمج
ما احتاج ادرس عندي بيت وفلوس وسياره
وراح استلم شغل بس نزوج اخليج اسعد انسانه
ها شگلتي تقبلين بيه
انسام :ما تحملت كلامه ضربته راشدي ترس بوجهه
حط ايده على خده يدحگلي
صگيت اسناني متعصبه نار
انهديت علي بالحجي ما خليت
شفت خالي عادل طلع ناديته اجه بساع
حجيتله عن مهند
تخبل خالي انصدم نفس صدمتي
استلمه راشديات وغلط وهذا مثل الخبل
ما حجه شي
عادل : حيوان ارعن بعد ما الك مكان بمدرستي
امشي ولي انته مفصول
وبعد اليه حجي ويا اهلك
يالله ولي شبيككك واگف مثل الزمال
انسام : راح وهو يدحگلي
مشيت ويه خالي عالأدارة گعدت حيلي يرجف
رغم كل الصار مجاي استوعب
وهذا خالي يفتر متعصب يحجي
ما خله انفعل غلط وسب على اهل مهند
عادل : انتي شبيج ترجفين وخايفه اعتبري مصار شي
خلي يولي گومي اوصلج للبيت
انسام : گمت ويا بدون ما احجي
جان الطريق كله يوصي بيه ما اجيب طاري لعاصم
گال هو يحلها وصلت البيت
فتت بوجهي لغرفتي
ارتاحت اعصابي تا طلعت
رحت على حنيــن حجيتلها
حنيــن : عزااا العزاك مهند
هذا متأثر بالمسلسلات والأفلام
احسن شي افصلو حتى ما يسويلج مشكلة
انسام : هو خالي فصله بعد ما يعتب باب المدرسة
حنيــن : اي احسن هسه عوفج منه
شفتي اخوج شسوه راسلني يتهدد عليه ويحجي
انسام :گولي والله
حنيــن : اي والله باعي الرسائل
فتحت تلفوني شوفتها نفخت بقهر وضاجت
انسام : اسفه حنيــن بسببي اجتج سالفه
حنيــن : لا نسومه شكو تعتذرين
هاي خطتي من البدايه
بعدين اني ما خايفه من تهديد اخوج عليه
خلي يجي ونتواجه اذا يريد عركه يدلل
انسام :ضحكت على سالفتها
كفو منج بس شنو تگليله حرامي المفاتيح ما فتهمت
حنيــن :مو علساس اني ناسيه المفاتيح
يم خالج بالمحل من رحت تسوگت
سألته و تفاجأ طلع جذب لا ناسيه يمه مفاتيح
ولا يعرف الصار
عاد فتهمت هذا اخوج من البدايه لگاهم
وضمهن عني خلاني اتبهذل بسيطه اله بس يجي
انسام :لا نونه خاف متوهمه
تره خالي عدنان ينسه مرات
وغير هيج عاصم مستحيل يسوي هالحركات السخيفه
ماكو عاقل يعرض حياته وحياة غيره للخطر
اكيد اكو سوء تفاهم
حنيــن :شنو متوهمه نسومه اني متأكده من كلامي
عاصم ضم المفاتيح عني متعمد
حتى خابري خالج وسألي
انسام : ما ادري بعد يجي عاصم ونفتهم منه
هسه صار وكت يحل تا يصلي ويتغده
خلي اخابره تشوف شوكت يصل
فتحت تلفوني اتصلت بي اربع مكالمات ما يرد
اخر شي فصلني ضجت حيل
هذا زعل بعد ما يحجي وياي
حنيــن : اصبري يمعوده يجوز دا يشتغل
انسام : لا هو يرد عليه لو مهما جان مشغول
ما فد يوم فصلني دحگي شسويت بروحي
بسبب غبائي جبت الزعل بيني وبين اخويه
هسه لو بس يرد تا اسمع صوته
وافتهم منه شوكت يجي ماريد اظل بقلق
حنيــن : ضجت عليها جانت كلش مقهوره
باعي اتصلي بي من تلفوني
اذا صدگ زعلان منج راح يجاوب عالرقم الغريب
انسام :لا نونه عوفي ماريد
لحت عليه انطتني تلفونها حطيت رقم عاصم
جاوب من اول مكالمه
عاصم : هلا
انسام : هلا عاصم هاي اني امانه لا تفصل الخط
عاصم : شتريدين
انسام : ماريد شي بس اسأل شوكت تجي
عاصم : المغرب ان شاء الله اني يمكم
انسام : حجاهه وسده مبين حيل زعلان
حنيــن : لا تضوجين نسومه خلي يدلل ويزعل
هوه يرضه من كيفه يالله گومي اشوفج شطبخت
انسام : جرتني من ايدي رحنه عالمطبخ
هالمره ماكو انفجار جبير
كشفت الطاوه تشوفني مسويه
اكله بصدر الدجاج
هاي شنو ريحتها تخبل عبالك شاورما
حنيــن : هيه شاورما بس خليلتها اضافات
شويه معجون طماطه وجبن وملاعيب
شكلها حلو بقت نضوگ طعمها ونحكم
انسام :جابتلي شوكه
اكلت من الطبخه والله طيبه عاشت ايدج
يولي صايره تبدعين عود هاي اول تعلومج
صفگت تضحك مكيفه بروحها
حنيــن : بس والله تعب
انسام : وين اكو شي مو تعب
يالله حطيلي منها خن اروح اتغده
حنيــن : جبت ماعون حطيتلها
احس مو مصدگه طبخت ودا انطي الجيران من طبخي
وصلت انسام عالباب ورجعت ابتسم
طبيت اشوف رنــا جانت گاعده حاضنه المخده
وتباوع عالشباك صافنه عبالك بغير عالم
نفس حالتها اول ما اجينه هنا
رحت يمها احجي بهدوء
رناوي گومي تغدي
ما جاوبتني ولا انتبهت بقيت گاعده يمها فتره
گمت جبت الأكل يمها
حجت بدون ما تباوعلي
رنــا : اخذي الأكل وطلعي بره
حنيــن : تمام شلت الصينيه وطلعت
گعدت بالمطبخ كاتمه عبرتي وافكر
شبيها رنــا ليش رجعت لنفس حالتها
اني شدا احجي حقها اذا گاعده بين اربع حياطين
وهيه قبل جانت تجي للبيت بالصدفه
كلشي راح منها شغلها وتعبها ما بقه شي
دمعو عيوني مسحتهم بسرعه
طلعت بره افتر واخذ نفس احاول اهدئ عبرتي
اندگ الباب رحت عبالي انسام
من تجي تفضفض يمي ارتاح شويه
تالي طلع ادم وگف يباوعلي وصافن
دنگت بمستوى ها حبيبي ادوم شتريد
ما حجه وياي فات لحديقتنه يلعب
رحت گعدت على حافة الطارمه ايدي على خدي
واباوعله مجنت متخيله بيوم احسد طفل مريض
اي والله حسدت ادم طفل التوحد
لا هم على گلبه ولا يدري شكو بالدنيا
ضحكت على روحي هذا تالي حياتي
حسدت الطفل على مرضه
مسحت وجهي ونفخت بقهر
وگفت ارفع شعري
اجت شهد على ادم تسحبه من ايده
حتى يروح وهذا معند ما يقبل
صارت تصيح علي وضربته
حرگت دمي رحت يمها بالگوه لازمه روحي
عوفي خطيه ليش تضربينه هذا طفل ما يفهم
باوعتلي متخصره وتنتر
شهد : ميحتاج تعيريني ادري ابني ما يفتهم
حنيــن : شدا تحجين شوكت عيرتج
شهد : سلامتج ما عيرتي
يالله گوم ادم فضني عاااد
حنيــن : سحبته بالقوه اخذته تسحل بي،
دمي صار يغلي من تصرفها وكلامها
خطيه ادم شنو ذنبه عنده هيج ام حقيره
انسام : غوربت الدنيا تا اجه عاصم
طلعو الجهال كلهم يتلگونه بره اني وگفت بالباب
مبين من اول ما نزل عاگد الحواجب
سلم عالجهال وفات من يمي بوجهه عالبيت
ظليت بمكاني عيوني مغورگه
اول مره هيج يسوي
مشيت وراه اكتم بعبرتي
راح على غرفته سد على نفسه الباب
اتصلت بيه حنيــن تسأل شصار
حجيتلها على تصرفه
حنيــن : ياا هذا شبي كبر الموضوع
باعي اني مگدر اجي يمكم تعالي ويه عاصم
حتى نتفاهم
انسام : لا يمعوده عوفي
انتي تريدين تشيلين السالفه وحدج اعرفج
تره ما يفيد صدگي عاصم من يعصب ما يتفاهم بعد
حنيــن :انـتي جيبي ومعليج
عود اگله ثنينه غلطانات
بس افهمه بأسلوب اخلي يرضه
تمام لا تتأخرون انتظركم بره
انسام :سديته منها ورحت دگيت الباب على عاصم
ظليت فتره تا اجاني صوته
عاصم : انسام روحي منا اريد انام اغفي
انسام : جذاب ما تنام هسه بوكت الغروب
اطلع خل نسولف لا تكبر السالفه
عاصم : ما ظل شي نحجي بي روحي
على جارتج خوش تنطي حلول ونصائح
اني معد افيدج بشي
انسام : كافي عاد افتهمنه والله فتهمنه
هسه حنيــن خابرتني تگول تعالو مدري شعدها
يا الله اطلع خلي نروح
عاصم : هاا شعدها من السوالف الخبيرة
الاجتماعية ام عقل الرزين والحكيم
روحي انتي استفادي من خبرتها
وعقلها الناضج گبل لا يخلص
اني خلوني جاهل ما افتهم مثلجن
انسام :اهوو عاااد عاصم افتح الباب تره زودتها
اجه فتحه يدحگلي وعاگد الحواجب
شبيك تظل اتزعل غلطه وصارت
وسبحان الي ما يغلط
سكت ما حجه بس يخوزر بيه
امانه خلي نروح يم حنيــن البنيه تنتظرنا
ما فعل يروح جريته من ايده بالگوه ومشيت
جانت حنيــن فاتحه الباب وتفتر بالطرمه
سلم عليها عاصم من گفه خشمه
عاصم : خير شعندج دازه علينه
سولفي فضيني
حنيــن :رغم تصرفه المستفز
حاجيته بهدوء لخاطر انسام جانت عيونها مدمعه
فهمته الصار كله خطتي اني وحدي
حاولت انسام ادافعلي ما انطيتها مجال
هاي الحقيقه اني صاحبة الفكرة وكلشي صار
هز ايده واستلمني رزايل
عاصم : فهميني وين عقلج من دبرتي هيج خطه
تره هاي السوالف مال حسابات وهميه
وتفوتن تختبرن الزلم انقرضت من زماااان
الوادم تطورت وتثقفت
وسيف مو مراهق تا ادورن وراه
حنيــن :لا باوع حالياً تصرفات الكبار
صارت اكثر من المراهقين لذلك الحذر واجب
عاصم :اي صحيح والدليل تصرفاتج
مال مراهقين فعلاً جبتيها بالعدله
رحتي بكل ثولج تا تختبرين سيف
ما فكرتي يدور وراج ينبش حسابج
يگدر حت الشبكه المكنكه عليها يطلعها
خاف عبالج سيف غشيم
حنيــن : عزااا باوعت لأنسام
انخطف لونها شلون ما فكرنه بهاي
سكتت ما حجيت وهذا عاصم مستمر يرزل
عاصم :واضح عليجن ما فكرتن بهاي
اي طبعاً من گد الثول العدجن ما تحسبن ليگدام سوايتجن هاي تافهه مابيها معنى ابد
سيف مو حبيب انسام
ولا مواعدها وخاينها تا تروحن
تبحوشن بحياته الزلمه اجانه بكل حترام
يدور بنت حلال لو عنده سوالف مزعطه مجان اجه
وحت لو عنده ماضي وعلاقات
خن نگول عنده ما يحق لأي بشر
يحشر نفسه بماضي غيره
زين اني ويه منو اسولف ومتعب نفسي
ويه ثنين ثولات ما عدهن ذرة مسؤلية
حنيــن :عصبني كلامه بعد مگدر اتحمل
خلص عاد شي وصار وانتهى من اوله بدون مشاكل
شكو كبرت الموضوع
اجيت متعصب وترزل بينه شبيك ما تتفاهم
بعدين اني مو ثوله
اني شلت مسؤلية اكبر من ما تتخيل
وهسه مدام خلصت عركتك اجه دوري
يالله احجيلي ليش ضميت المفاتيح عني
خليتني بالبرد والمطر
لا تحاول تنكر سألت خالك طلع ما يعرف شي بخصوص المفاتيح احجي شبيك لا تباوع هيج بخزره
هز راسه بأسف وحجه
عاصم : تدرين انــتي مو مال واحد يگفلج
ويسوي زين اكثر من مره تظنين بيه السوء
ما فكرتي عليش اضم عنج المفاتيح
شنهي غايتي من اعرض حياتج للخطر
شعندي وياج شريد يعني شستفاد فهميني
يولي اني ما صخيت
ارجع انام والباب مقفول عليجن
رحت بالبرد والمطر ادور وراج عالمفاتيح
انكسر ضهري تا لگيتهم
رجعت عالبيت اسحل برجليه عضامي متكسره
ردت ابجي من وجع جسمي
والليل كله مريض ويومين تا وگفت على حيلي
تالي اطلع واحد مو خوش
يالله بالنهاية مو صوجج اي والله مو صوجج
انسام :ادحگ على حنيــن
دنگت تلم بشفتها
وعاصم حط ادينه بجيوبه صد عليها وتنهد
عاصم :اسمعي يبنيه اذا شايفه حراميه
وناس عديمين الغيره مرو عليج لا تعمين الكل
احنه هين نعتبر الجار من اهل الدار
لو يجينه واحد مطلوب دم يگعد بصفنه وعنده نسوان
نتحامه عليهن مثل ما نتحامه على عرضنه
اني لو حرامي وعندي نية سوء
ما اخلي اختي تجي يمج ولا تصادقج
خلي ابالج هالشي
يالله انسام امشي نروح
انسام : مشينه وجان تلحگنه حنيــن
وگفت بين عاصم والباب تسولف بعبره
حنيــن : لحظه اوگف اسمعني
اني اسفه حباب والله اسفه هواي
كل كلامك صح بسبب الناس المرو عليه
صرت اظن السوء بكل شخص
فدوه سامحني بعد ما اعيدها ولا احجي عليك
انسام :نفخ عاصم وصد بصفحه
وحـنيـن تعصر بأديها وتعتذر ختنگت دمعو عيونها
وهو ما يفعل يسولف دحگتلي تريد العون مني
حنيــن : انسام احجيلج شي فدوه
انسام : عاصم البنيه جاي تعتذر منك
شبيك ساكت
بعدنه على وگفتنه
واجه ادم يركض فات بالحديقه يلعب
وشهد وراه تنادي راحت يمه تجره من ايده
صد عليها عاصم يحجي
عاصم : عوفي راح تكسرين ايده شبيج
شهد : لا ما اعوفه ماريد يجي هين
ويسمع حجي ومعايير
عاصم : شجاي تمسلتين انتي عوفي الوليد
اني اجيبه وامشي ولي عالبيت
شهد : ما اعوفه هذا ابني واريد اخذه
اليوم اجه هين والخانم جارتكم تعيرني بمرضه
هذا تالي زينكم وياهه
حنيــن :اندارو انسام وعاصم يباوعولي
واني فاتحه عيوني مصدومه من كلام شهد
جذب والله ما عيرتها هيه اجت تسحبه بقوه وتضربه
گلتلها خطيه هذا طفل ما يفهم لا تضربينه
اتهمتني دا اعيرها واخذت الولد سحل منا
انسام : تعصب عاصم وراح يم شهد لوه ايدها
عاصم : اني جم مره مبلغج ما تمدين ايدج
على ادم سولفي جم مره مبلغججج
انوب جايه تتهمين البنيه تعيرج
غشيم اني واصدگج مو انطقييي
شهد : يعني تجذبني وتصدگ هاي الدايحه
البارحه اجت كلشي متعرفون عنها
عاصم :لا يمعوده اصدگج انتي باطل عليج
امشي عالبيت نتفاهم
تا اعلمج الدايحه منو
حنيــن :اعصابي صارت نار من كلامها
بس ما حجيت وياهه لأن عاصم موجود
جابها يدفع بيها حتى تروح لبيتهم
فاتت من يمي وبسرعه اجت ضربتني على وجهي
انسام :ركضنه اني وعاصم وخرنه شهد
انتحلفلها ما حسينه الا حنيــن جرتها من ادينه
وكمشتها ضرب وسحل من شعرها
نريد نحجز بعد منگدر
حنيــن : شگد حاولت اصبر واتحكم بنفسي
مگدرت تخبلت من ضربتني
لزمتها كتل فقدت اعصابي
: لج اني مو دايحه اشرفج انتي وامثالججج
انوب تضربيني يا صخله ياحقيره
اجت انسام تحاول توخرني ما اخليها
جنت راح اموت شهد لوما عاصم سحلها من جوايه
اخذها لبيتهم يتحلفلها
اخذتني انسام گعدت عالقنفه بالطارمه
اسلت شعر شهد من بين اصابعي جنت الهث
وگلبي يدگ سريع وريگي ناشف
انسام : رحت جبتلها مي
اخذته تشرب اديها ترجف يمه هاي شگد اعصاب
ملخت شهد تملخ اووف بردت گلبي
اجه عاصم ينافخ مبين شبع قهر
دحگ على حنيــن واعتذر
عاصم :ولو اخذتي ثارج مربع
بس لازم نعتذر منج عالصار
حنيــن :وگفت ارتب بشعري دنگت خجلانه
اني المفروض اعتذر مو انـته
اسفه هواي مجان قصدي اضربها هيه عصبتني
شفتو شحجت وشسوت
عاصم : حقج يابه محد يلومج
ربعنه مو خوش اوادم
يراد اعوف شغلي واگعد اربيهم
حنيــن : اندار حتى يروح
لحظه اوگف
رحت گدامه اعصر بأيدي متوتره
ما تجرأت اباوعله ما اعرف ليش
دنگت وبالگوه يطلع مني الكلام
: حتى لو ما تسامحني ابقه اعتذر منك
لأن اعرف غلطت بحقك هواي
رغم كل مواقفك الزينه ويانه
بدال ما اشكرك دا اسمعك كلام ما يليق بيك
اسفه عاصم كلش اسفه
صدگ ندمانه على كل كلمة حجيتها
رفعت عيوني اباوعله جان مركز بيه
دار وجهه وحجه
عاصم : احم مصار شي ولا يهمج مو زعلان
حنيــن :حجاهه وراح هو وانسام
رفعت شعري الفه واتأفاف
اني شبيه هيج تخبلت
ضربت شهد. گدامه هسه شيگول عليه
شيفكر بداخله
سديت الباب وطبيت جوه
حتى اشوف رنـا اكيد سمعت الهوسه
فتت للغرفه ادورلها ماكو
انتبهت على فراشها بي دم هواي
عزاا اجتها الشهريه اكيد
اي جانت جنطتي مفتوحه يعني اخذت فوط
رحت للحمام جان مقفول اسمع صوت المي
صحتلها رناوي تحتاجين شي،
رنــا : اي جيبيلي ملابس ومنشفه نسيت اخذ
حنيــن : رجعت بسرعه اخذتلها ملابس ومنشفه
فتحت الباب شويه اخذتهم مني بدلت وطلعت
لازم بطنها راحت للغرفه گعدت يم الصوبه
سحبت بطانيه خلتها على ضهرها
باوعتلي وحجت
رنــا :فراشي توصخ شلون هسه وين انام
حنيــن :ولا يهمج حبيبتي مددي بفراشي
هسه اطلب من نسومه تنطيني لحد ما انظف هذا
رنــا : تمام اذا عدنه اكل جيبيلي جوعانه
حنيــن : ابتسمت فرحانه بيها
رحت للمطبخ بسرعه اجهزلها الأكل
انسام : كلنه ملتمين بالصاله يم عاصم
يحجي منفعل على شهد
شعرها منفوش نتفتها حنيــن
خلتها مثل دجاجه مهلوسه
شبعها رزايل اخر شي طردها
عاصم : تلمين هدومج هسه وتولين لهلج
ماريد اشوفج هين نهائييي
كافي عاد خوش تحملتج وصبرت
شهد : ميخالف اروح بس اخذ ابني ويايه
عاصم : لا ما حزرتي تعذريني
ابن اخويه ما يطلع بره البيت
لا تمثلين عليه الأم الحنونه
هو حت ما يبات يمج ولا يريدج
سوالفج عبريهن على غيري
يالله انهضي حضري روحج هسه اجيب سياره
ماريد تصبح الدنيا وانـتي هين
شهد : هيجي صارت تطردوني علمود وحده
ما تعرفونها من ساعة اجت تسوي مشاكل
هججت محمود وهسه هججتني
والله يعلم الدور على منو
انسام : انبهت عاصم يدحگ علينه يريد يفتهم
اني جنت راح احجيله عن محمود بس گلت
ليما تصبح الدنيا الله يعثرج شهد
عاصم :شنهي هججت محمود شصاير فهموني
انسام : انجبرت اسولفله كلشي
انصدم ظل يدحگ علينه واحد واحد
صد على عفاف اعصابه تفور
عاصم : وينه محمود
عفاف : ما ادري والله راح والعلم بي
حت ما يخابر
انسام :طلع عاصم بساع
الله لا يوفقج شهد هسه وين يروح بهالليل
يدور لهذا العار
صارت الساعه تسعه وعاصم ماكو
انوب تلفونه بالبيت شسوي هسه
يربي وين ادورله
دگ تلفوني رحت بساع اشوفه
جانت حنيــن طلبت مني فراش
اخذتلها دوشگ ورحت
حنيــن :شكراً هواي نسومه والله دا اخجل منكم
كلساع اطلب حاجه
انسام : ما جبتلج بطل دم هو دوشگ يمعوده
حنيــن :ههههه اعرف لج حتى الخجل صعبتي عليه
شبيج ضايجه مو على بعضج
انسام : ااف عاصم عرف بسالفة محمود
وراح يدورله من المغرب وهاي الساعه تسعه وماكو
خبر منهم
حنيــن : عزاا ليش حجيتوله جان خليتو يرتاح
انسام : مو اني الحجيت هاي شهد الحيه
طردها عاصم من البيت وتخبلت تحير شتگول
حنيــن : عابتلها الصخله احسن شي طردوها
شكو مبقينها هنا هيه حتى ما تهتم بأبنها
انسام : هيه بعد ما للها مكان يمنه
بس خلي عاصم يرجع بالي يمه
هذا اذا لزم محمود وماكو حواجيز يموته
حنيــن : شلون قهر ماكو واحد مرتاح
بقت انسام يمي صارت الساعه 11 وعاصم ماكو
توترت وتعبت هالگد ما تفتر بالطارمه حاضنه نفسها
من البرد ترخصت وراحت لبيتهم
حتى اني قلقت وياهه وانشغل بالي
انسام :طبيت بيتنا جانت عفاف
تفتر بالصاله تلوب سألتها ما اتصلتي بمحمود
عفاف :اتصلت اي بس ماكو مغلق
انسام :نفخت بقهر
رحت بغرفتي گعدت رجليه معد تعيني
تا اگف ما بيدي شي غير انتظر
ادحگ عالساعه تفتر على كيفها
كل ما تمر فتره تخابرني حنيــن تسأل على عاصم
خطيه توترت وياي
صارت بـ 2 بالليل سمعت الباب انفتح
گمت بساع تشوف
فات عاصم يدفع بمحمود گدامه
مبين مكسره تكسر
گعد عاصم عالدرج يمسح بوجهه ويلهث
من التعب صفگ ادينه وصد على محمود
يسولف محروگ دمه حت صوته مطبگ
عاصم : شسوي بيك يول
اكتلك خلاص واطب سجن اديح
هاي العوائل ورايه
لو اطردك من البيت تاتروح ويه الشله
التعبانه مسوين گعده تبلعون حبوب
لو اخليك بالبيت تجفت على بنات الناس،
فهمني شسوي بيييييككك
يول ما فكرت گبل ما تسوي هالفاينه
ما گلت عدنه اخت عزبه بالبيت
هذاك اليوم صعدت تصورهن
وردت ابتلي بس الله سترنه
وزعم خوش انطيتك درس بدال ما اتوب
شديت حيلك ورحت سويت الأطگع منها
وين جان عقلك من رحت على جارة البيت
اتعدا عليها بنص بيتهاااا
تاهيتلك يول محمود دحگ عليه وسولف
نفهلي خلي افتهم شنهي سالفتك
خلي اشوفلك جاره گبل لا تبلينه ول عااار
انسام : انحمست على حالة عاصم
دمه يفور وادينه ترجف معد بي حيل يسولف
خفت يصير بي شي
رحت جبتله مي اخذه شرب
كمشت جتفه
كافي تحرگ بدمك امانه گوم مدد ارتاح
هز راسه بأسف وصفگ ادينه
عاصم : منهو يرتاح انسام
تضحكين عليه لو على روحج
شنهي راحه فهمينييي
انسام : ختنگت بعبرتي
مسدت على ضهره
نفخ وصد على محمود الي واگف مدنگ راسه
علساس خجلان
عاصم : اسمعني زين هذا اخر تحذير الك
اذا اشوفك تصعد للسطح
او احد يشكي منك
ولو بالغلط اشوفك واگف ادحگ على بيت جيرانه
وابالك تسوي فاينه هالنوبه قسم بالله
اموتك بيدييي لو اندل بروحي اخيس بالسجن
محد يرحمك مني بس ربك الخلقك
فتهمتني شگلت سولف انطقق
محمود :اي فتهمت والله توبه بعد ما اسوي شي
عاصم :خير ان شاء الله تروح تنطمر هسه
وخلي ابالك بعد ماكو راحه ونوم
لازم اطلع عالشغل الگاك گدامي
تكرب مثل الزمال اطلع منك كل الدلال الشفته
وهسه ولي من وجهي الله لا يوفقك حيوان عار
انسام :صعد محمود ينام وكلمن فات لمكانه
ظلينه اني وعاصم گاعدين بالصاله
كلمن حسرته بگلبه
دگ تلفوني هاي اكيد حنيــن
رحت جاوبتها
حنيــن : ها نسومه اجه عاصم
انسام : اي رجع الحمد لله
سديته منها ورجعت يم عاصم
ما لگيته رحت لغرفته فتحت الباب
جان امدد عالجربايه وصافن
_احميلك العشه صد عليه وحجه بتعب
عاصم : ماريد شبعان من القهر والحمد لله
انسام : ماريد الومك فوگ قهرك
بس انـته غلطت من جمعت الكل
يمنه بالبيت انوب خليت محمود مدلل
وشهد اكبر غلط ظلتها عدنه
عاصم : ادري بنفسي غلطان
شسوي جنت مجبور گلت بدال ما اصرف
على اربع بيوت اجمعهم يمي تا اسيطر
وهذا تاليها شوفة عينج
انسام : گعد متربع يمسح بوجهه وينافخ
عاصم : مجاي اصدگ ولا استوعب
السواه محمود احس نار بداخلي
هاي عود جنت ازامط يم حنيــن بغيرتنه
وشهامتنه عالجار والغريب
تالي يطلع اخويه مصخمها
شتگول علينه هسه
طلع حقها من تظن بينه السوء
وحقها شما تسوي
بيا عين نواجها انوب اتمنى يطلع هذا كابوس
انسام : كافي تقهر بروحك
حنيــن متفهمه ابد ما عمت الكل
حت اني من اعتذرت منها
گالت شعليج هو بس محمود مو خوش
عاصم : كل ما اتخيل الصار،
گلبي يفور اريد اخنگ محمود اموته جوه ايدي
راح يكتلني التفكير شسوي بروحي گليلي
انسام : كافي عاد تلوم بروحك امانه
گوم خلي احطلك عشه
عاصم : ماريد صدگي لعبانه روحي وتعبان
انتي امشي نامي وراج دوام
انسام : حاولت ويا الا مليت وما قبل ياكل
عفته ورحت نمت
حنيــن : اتگلب بفراشي مگدر انام
مدا يروح من بالي كلام عاصم
وتصرفه من رجع يدور للمفاتيح بالبرد والمطر
حتى تمرض بسببي
مواقفه ويايه كلها شهامه
واني بدال ما اتشكره دا اهينه
وخرت الغطى وطلعت بره
گعدت افكر رغم سامحني على كلشي
بس بعدني احس بالذنب والندم
سمعت صوت اغاني صفنت اركز زين
منو دا يسمع بهيج وقت الساعه 2:ونص
احس الصوت يجي من بيت انسام
گمت لامه روحي برادنه وگفت يم الباب اتسمع
اي الصوت هنا فتحت الباب من فضولي
دا اشوف منو
جان عاصم گاعد عالكرسي بالحديقه
مرجع راسه لوره ومغمض يسمع اغنيه
تعلمت الصبر منج يا يمه
سديت الباب ورجعت بمكاني
هذا اكيد انقهر من سالفة محمود السافل
عاصم وانسام ابتلو بهاي الناس التافهه
محد بيهم يستاهل اتعب واتحمل قهر علموده
گمت للغرفه مددت بفراشي
احاول انام مگدر
سحبت تلفوني فتحته
شلت الحظر عن عاصم وطبيت لحسابه
اباوع صوره القديمه
جان كشاخ مثل مگالت انسام
كل همه يلبس ويتونس
ومن صدگ انيق ومرتب
وهسه صوره ولريلز بملابس العمال
الدنيا ظلمته هواي
طبيت للرسائل مالتنه اقرا وابتسم
صح اني ثوله بس مو على طول مرات يعني
مستمره اباوع وصافنه
مدري شلون اتصلت بي كامرا
گعدت مخروعه لغيت الاتصال
وطلعت من الانستا حطيت ايدي على حلگي
عزااا اني شسويت هسه شيگول عليه
يارب يموت قبل لا يشوف
لا شدا احجي شبيه تخبلت
ضربت راسي صدگ اني غبيه وثوله
وتافهه هم شمرت التلفون عالمخده
غطيت وجهي بأديه صخنت
سمعت اشعار دفرت التلفون برجلي
امشي ولي لو تموت ما افتحك
مگدرت اتحمل من فضولي
سحبت التلفون ادعي
ان شاء الله تطلع رساله من قاتل متسلسل
ولا عاصم يارب مو هو يارب
فتحت الرساله دازلي علامة استفهام؟
اووف اووف خلص صار عنده اكبر الدلائل على ثولي اخذت نفس وكتبتله
اسفه بالغلط
كتبلي
عاصم : ولا يهمج
حنيــن : سديت التلفون
وغطيت راسي متفشله