رواية سكينته وامانها الفصل العاشر 10 بقلم ام بكر
في كل خطوة، كان الخوف يلاحقها…
لكنه لم يكن وحده."
حنيــن : گاعده بالمطبخ بوحدي
عيوني تحرگني لأن بجيت هواي
شعور الندم والحسره تاكل بيه
قرفانه من روحي ماكو شي يعبر عن حالتي
صعب اذا يجي الخذلان من اقرب الناس النه
خاصة اذا جنت حريص عليهم
ومنطيهم ثقه
جنت دائماً اخاف من كلمة خذلان وخيانة
اگول مستحيل اتحمل
ماريد اعيش هذا الشي حتى بأحلامي
مجنت متوقعة بيوم اكون اني الشخص الي يخذل
ويخرب كلشي
مجرد اتخيل شعور رنــا من خذلتها
احس روحي دا تطلع اريد اموت
گلبي دا يتگطع
دگ تلفوني جانت هيفاء
جاوبتها بصوتي المخنوگ
لحت تسأل شكو
: يمعوده ضايجه من وضعنه الى متى نبقه هيج
تعبت معد اتحمل
هيفاء : حقج منو يولمج
بس لازم تصيرين قويه انــتي گدها واكثر
مريتو بالأصعب وجاوزتي
حنيــن : ضحكت بداخلي
كل الصعاب تهون يم هاي المصيبة
هيفاء : وينج تسمعيني
حنيــن : اي يروحي هنا اسمع
اگلج هيفاء اني اريد اصلي بس ما اعرف
حسيتها فرحت من نبرتها
هيفاء : اي واخيراً الله هداج
من زمان اگلج صلي وزوري ما تسمعين مني
راح ادزلج مقطع يشرح الوضوء والصلاة
تعلمي منه
حنيــن : تمام يروحي واريد طلب ثاني اذا ماكو
زحمه تگدرين تزورين وتدعيلي
هيفاء : اي حبيبتي اگدر من عيوني باجر ازور
وادعيلج وانتي هم ادعي لنفسج
حنيــن : اي هسه اگوم اصلي وادعي
هيفاء : الله يتقبل مقدماً
اگلج رنــا بعدها مكتأبه ما حجتلج شصار وياهه
حنيــن : رجف گلبي ماريدها تسأل هيج
اختي حبيبتي كلشي ما صار وياهه متأكده
هيه بس زعلانه مني اعرفها
اختصرت الكلام ويه هيفاء
سدته ودزت مقطع تعليم الصلاة عالواتس
رجعته مرتين حتى فهمت گمت توضيت
رحت للغرفة جانت رنــا صافنه بالسگف
سحبت العباية لبستها استر اديني
لفيت الشال على راسي
خليت التربه گدامي وگفت اصلي
نسيت شنو اگول مدا اركز
اختنگت بعبرتي
اكو واحد ينسه يذكر الله
لو بس اني لأن مكروهه حتى ربي ما يريدني
گعدت حاطه ايدي على حلگي وابجي صامت
دموعي احسها نار تنزل على خدي
باوعت لرنـا جانت حاضنه بطانيتها وصافنه
شسوي حتى اطلعها من هاي حالتها
مابيدي شي هيه صلاة مگدرت ادبرها
مسحت دموعي وفتحت المقطع انوب حتى اتعلم
لازم اصلي وادعي ربي يحل مصيبتي ويرجعلي اختي
اكيد راح يلطف بحالنه لأن يتيمات ما النه احد
انسام : تجمدت بمكاني فاكه حلگي مصدومه
اني تخبلت لو هذا كلام عاصم
شنهي يگللها اسوي الي بنفسي وما تنسين هالليلة
فتريت ورجعت لغرفتي وگعت من طولي
گعدت بالگاع عقلي مجاي يستوعب
مستحيل عاصم يسوي شي حرام
انوب تدنا نفسه على ارملة اخو
لا والله ما يسويها لا يربي دخيلك كلشي ولا هالصگعه
شهگت ابجي وارجف
اتخيلهم وحدهم بالغرفة ويه الكلام الي سمعته
افكار اشكال تجيني
غمضت عيوني اهز براسي لا ما يصير
گمت گوه اتوازن طلعت امشي على طوارف اصابعي
اتأمل عاصم يطرد شهد نفس كل مره
رحت بالبداية على غرفتها فتحت الباب على كيفي
ادحگ على فراشها نايمه ومدثره ما اتحرك
صابني الشك رحت على كيفي تا سحر متحس
كشفت الغطى واشوف مخاد بمكان شهد
مدثرتها بالبطانيه رجعتها وطلعت ساده حلگي ابجي
الله يعثرج عساهه بصحتج يا حقيره
رحت گدام غرفتي كامشه الباب ارجف
وادحگ على غرفة عاصم
انتظر هسه تطلع شهد مطروده
اي هسه تطلع
ماكو مرت ربع ساعة وهمه جوه
لطيت على وجهي ابجي صامت
ليش عاصم ليش
شسوي هسه اعصابي صارت نار
رحت لغرفته حطيت اذني عالباب
اسمع صوت مثل الأنين
دگيت الباب عالخفيف اجاني صوته بهدوء
عاصم :منو
انسام :هاي اني افتحلي
عاصم :شتريدين انسام روحي نامي
انسام :گزيت اسناني وحجيت
افتحلي عاصم اعرف منو وياك جوه افتح الباب
شويه وانفتح الباب جان عاصم عاگد الحواجب
يدحگلي بأسف عيونه حمر
ويلهث من اعصابه
لابس هدوم النوم المعتاده بجامه خفيفه وفالينه
دحگت على ايده طابگ حزامين وساد قبضته بعصبية
وخر عن الباب طبيت واشوف شهد
گاعده عالجربايه
بمنظر يخزي لابسه سيت نوم عباره عن خيوط
جسمها كله يبين
مجتفه كلها حت حلگها مسدود بحزام
شعرها منفوش وجسمها شطوب حمر
دحگت على عاصم
جان ينافخ من اعصابه متخبل قفل الباب
ورجع عليها يجلدها بدون رحمه
وهاي تعن اتوسلني بنظراتها تا افكها
وگفت بمكاني ما حجيت ولا تدخلت تستاهل
ما عافها عاصم الا شافها فقدت الوعي
گعد بالگاع ارتكه عالحايط يناهت
ويمسح بگصته
اشرلي على دشداشتها بسد الجربايه
حجه بتعب ريگه يابس
عاصم : لبسي هاي السافله ثوبها
انسام : شلت الدشداشه
رحت على شهد جان شاد اديها وراهه بالبجامه
جالدها جسمها مزلغ ضهرها يطلع دم
من گد مو باجيه حت الرموش الحاطتهن واگعه
فكيتها ولبستها الدشداشه
خربانه ما تحس اجه عاصم جرها من عكسها
تا يشيلها
عاصم :نسوم شوفيلي بره اذا اكو احد
انسام : وين تريد بيها عاصم منگدر ناخذها عالغرفة
خاف سحر تحس
عاصم : بس شوفيلي دربي وما عليج
انسام : طلعت ادحگ ماكو احد
انطيته اشاره طلع شايلها توجه لباب الصالة
لحگته امشي بخفه واحجي همس
وين تريد يمعود
حجاني بهمس
عاصم : افتحي الباب لخاطر الكعبة
انسام : فتحت باب الصالة
طلع شايلها اخذها عالصحيات بره
رحت وراه حاضنه روحي الجو ثلج
نزل شهد بالصحيات فتح الحنفيه رش عليها مي
فزت اتوأه وتصيح ااخ
شافت عاصم رادت تنهزم كمشها ثبتها بمكانها
عاصم : اواش اواش وين رايحه
مو گلتي اخذني بين احضانك لمكان استاهله
هذا اني شلتج بحضني وجبتج لمكانج المناسب
صدگي شهد هذا اكثر من مستواج وانظف منج
انتي مكانج المجاري اتمنى الي وراج ما يسونج
شريفه براسي والا جان من زمان دافنج بالمجاري
وطام عارج
بس يا حيف كلها تگع براسي وسمعتنه تصر بالوحل
همزين كاظم استشهد وما شاف وصاختج
انسام :سد حلگها بيده وضربها راشدي
جر شعرها بقوه گلت شلع جلد راسها
رگعها عالحايط وگف دفرها
عافها بالصحيات تعن مابيها حيل تبجي
طلع مشيت وراه عالبيت طبگنا الباب ما قفلنا
طبيت ويه عاصم على غرفته
شفته سحب فراشه لگحه بنتر گعد عالجربايه
رتكه عالحايط ينافخ ويستغفر
رحت يمه مدنگه راسي
:اني ادري بشهد من زمان تلاحگك
وبكل مره اشوفك تطردها
بس هالنوبه ما طلعت عبالي....صار
مگدرت اكمل غصيت بعبرتي
اسفه عاصم امانه سامحني شكيت بيك
سمعته تنهد بحسره
عاصم : ولا يهمج نسوم
تعاي عليش تبجين
انسام : فتحلي ادينه رحت يمه حضني
ربت على جتفي وحجه
عاصم : انتي سامحيني
شگد حاولت ما اخليج تشوفين سفالة هاي الحقيره
بس مگدرت جنت انهزم منها اطلع ماريد اشوفها هين
اكرها تلعب روحي منها احسها خنزيره
شهد تخطت كل الحدود بكل حذري غلبتني
من رحتي تجيبين ملابسي
نسيت اگلج تقفلين باب غرفتي
ادري بيها ادور فرصه تا تجيني
طلعت من غرفتج رحت واشوفها بفراشي مصلخه
انصدمت جنت مقرر اخنگها الا تموت
بس فكرت ما تمر بسلام اني انكشف بساع
عاد اهلها يسونها شريفه براسي
مو بحيل افوت سجن انوب واني ما صدگت طلعت
عاد انطيتها هالمقسوم بلكت الله تاخذ الدرس
انسام : يعني لشوكت نظل هيج
عش ما تطرد شهد ونخلص
عاصم :شنهي حجتنه تا نطردها
جم نوبه گنالها بعدج زغيره روحي لهلج تزوجي
نوديها ماكو يومين ترجع علينه لا كرامة ولا احساس
فهميني شسوي بيها اذا احجي حقيقتها تگع براسي
اقل شي يسونه يگلولي تزوجها
واني لو انسجن لو اموت ما اخذها
انسام : لازم اكو حل ما نظل هيج مسلوبه راحتنه
عاصم : نلگه حل ان شاء الله لا يهمج
هسه گومي نامي لا تفكرين بشي
انسام :ماشي خن اجيبلك فراش غير هذا
رحت جبتله رتبت جربايته
وگفت اوصي عود اقفل الباب على روحك
ضحك ومدد يتمطى
عاصم : يعني عبالج شهد ترجع انوب
اراهنج معد تصد بوجهي
خل تحير بصوابها وداوي جروحها
شالت جتل من جابتها امها ما شافته
انسام : لا تخاف ترجع هاي مثل
الجلب يحب خناگه
طلعت من يمه سمعته قفل على نفسه الباب
ضحكت بأسف والله وكت خله الزلم
تخاف على شرفهم من النسوان
فعلاً هذا الزمن بي العجب
شنشوف تا نشوف انوب
سمعت باب الصالة انفتح
فاتت شهد تسحل بنفسها وتبجي
شافتني ودنگت عجيب والله من شنو دنگتي
تستحين مثلاً
ما جاوبتني فاتت لغرفتها
دعيت عليها من كل گلبي
عساج ما گعدتي وشفتي النهار حسبي الله بيج
ثاني يوم الصبح عاصم
جان غابش على سوگ الجمعة
جايب عصافير لأدم
كيف بيهن گام يگمز ويضحك
جان جبت قفص اكبر من هذا خطيه متضايگات
عاصم : ما لگيت والله كلهن ازغار
احمد عنده جثيره خابرته گال اخذ
تلگاهن عالصطح شوي انوب اروح اجيب
هسه انطونه ريوگ جوعان
انسام : حطيتله ريوگ جايب گيمر وكاهي
التمينه كلنه بالحديقة من عدا شهد
ما طلعت من غرفتها
جانت كل جمعة تگعد من الصبح تنبص گدام عاصم
عاصم : نسوم عدنه باميه بالمجمده ؟
انسام : اي يروحي عدنه
مفكره اسويها گبل لا تطلب
طلعت منها تا يموع
عاصم : عفيه بالمعدله ولا تسوينها ثخينه حيل
انسام : تدلل ابو العواصم تريد شي انوب
عاصم : لا تسلمين
عجل اني اخن اصعد اجيب القفص
انسام :وين تصعد بس لا تريد تطفر على صطح الجيران
خل البنوات ليما يگعدن عود اني اروح اجيبه
عاصم : هذني يظلن للضهر نايمات
اذا انتظرهن ماراح يظل ريش بالعصافير
قفصهن يهلس خطيه
انسام : عجل شلون راح تشيل القفص
من صطحهم على صطحنه
عاصم : اگعد محمود ياخذه مني
انسام : حجاهه وراح
گمت الم السفره ويه البنوات
طبيت بغرفتي ادور بهدومي شي مناسب
تا البسه بخطوبة سمر
حنيــن : عن غير المعتاد اليوم
رنــا كاعده من الصبح اباوعلها ومو مصدگه
طلعت بره تفتر بالشمس
خليتها براحتها رجعت على فراشها
حتى انشره عالسطح احسه عفن
لبست العباية خليت الشال على راسي وصعدت
فتحت الباب ومشيت شفت عاصم مدنگ
يگلب بالأغراض مالات احمد
انـته شدا تسوي هنا
الفتت يباوعلي وحجه ابرود
عاصم : جاي ابوگ
حـنيـن :حجيت بگلبي سخيف
عفته ورحت شريت الفرش
رجعت جبت الباقي
جان عاصم بمكانه مطلع اقفاص مال عصافير
اخذ واحد وراح بتجاه سطحهم ينادي
عاصم : محمود هي محمووود طرش
حنيــن :طلعله محمود نعسان يحك بعيونه
شمرله القفص اخذه وراح وگفت احجي ويا
:هيي بعد لا تعيدها تمام
باوعلي ونكث ادينه
عاصم : شگلتي ما سمعت
حنيــن : لا تطفر للسطح بدون ما علمي
لا تنسه اكو بنات هنا
اعتقد ما ترضاهه لخواتك
ابتسم وهز راسه بقبول
عاصم : اي والله ما ارضاهه
اعتذر منج ما عبالي تگعدن الصبح
جنت مضطر عالقفص
ولا يهمج ما تنعاد ابد
حنيــن : حجاهه وطفر لسطحهم
قفلت باب البيتونه زين ونزلت
رغم احسه انسان امان بس الحذر واجب
انسام : نزل عاصم شايل القفص ويضحك
... شكو اجه يمي وهمس
عاصم : ترزلت
انسام : منو رزلك
عاصم : صديقتج ام السان شافتني عالصطح
گشتني برزاله توب
انسام : ضحكت ويا
تستاهل گتلك خلهن يگعدن واروح اجيبلك
:.. عافني وراح يسولف
عاصم : شمدريني عاد صارت بعد عبالي يظلن مطمورات ما يگعدن الصبح
انتي روحي وديلهن ريوگ خطيه
انسام : امم خطيه گلت شو دحگلي بالله
فات بدربه ما التفتت
رحت عالمطبخ اخذت صمون وگيمر وكاهي
دگيت الباب طلعتلي حنيــن تبتسم وجها مورد
صباح الخير
حنيــن : اهلاً صباح النور
فوتي نسومه
انسام : لا يروحي مگدر سمعت بيج
گاعده اليوم عاد جبتلكم ريوگ
هاج الف عافيه
تريگي تا اجيج نحفحف
ونخطط اخذت حساب سيف الشاب المتقدملي
حنيــن : هههه تمام حبيبتي
تشكرتها راحت ادندن
طبيت عالبيت خليت الأكل عالميز
بلكت رنــا تاكل من هذا ما اتذكر بحياتي شفتها تاكل
گيمر وكاهي تبتعد عن كلشي مو صحي ويزيد الوزن
سويت شاي وگعدت انتظرها
جانت گاعده بره عالقنفه وهسه ماكو وينها
طلعت ادورها شفتها يم الشجره تتقيا
رحتلها بسرعة امسد على ضهرها
شبيها ياربي معقوله تسممت معدتها من من الأكل الدسم جبتلها مي ما قبلت تشرب
راحت عالمغسلة تغسل وجها
شويه واجت عالمطبخ باوعت للأكل گعدت اخذت
لگمه عضتها كشت روحها عافتها
وطلعت بره گعدت بالشمس
جانت شارده بتفكيرها
صار الضهر اجت انسام
جابت الغده باميه بلحم وتمن ومقبلات
عبالي رنــا هم ماراح تتقبله
تالي اجت گعدت تاكل مبينه هواي جوعانه
احس روحي اشبع من اشوفها تاكل
وبنفس الوقت انقهر عليها قبل وين وهسه وين
گمت لميت الميز جلفت المواعين وطلعت بالطارمه
انتظر انسام طولت حتى اجت
وينج يمعوده گلت غلست بعد متروح
انسام : لا وين اغلس
جنت اخيط هدوم عاصم
گبل كلشي اختج وينها
حنيــن :فاتت للحمام تسبح
انسام : خوش يالله هسه بشنهي نبلش
بالخطه لو وجهي
حنيــن : هههه بكيفج
انسام : خلي نبلش بسيف الفضول ذبحني
فتحت تلفوني شوفت حنيــن الحساب ماله
اخذته تفتش بتركيز
حنيــن : الصراحة الشاب حلو وانيق
حسابه نظيف ماكو شي يلفت
ما اعرف اذا هو هيج لو مسويله غسل وتشحيم
انسام : وهسه شلون يعني تورطت مو
عفيه ساعديني اني كلشي ما اعرف
حنيــن : لا تستسلمين بعدنه بالبداية
فكرت اساعدها لأن تستاهل اوكفلها
باعي خلي نسوي حساب جديد ونختبره
انسام : يبوو اني مگدر الوص كلشي
وانكشف بساع عاد شيخلصني من عاصم وزعله
حنيــن : عادي ماكو مشكلة نسومه اني اسوي
... ابتسمت فرحانه
انسام : صدگ والله
حنيــن : اي ادللي تستاهلين اوگفلج
انسام : يعمرييي تروحلج فدوه شهد الصخله
حنيــن : هههه يالله هسه نبدي بوجهج
انسام : اي بلشي متحمسه وخايفه
بحياتي ما حفيت وجهي غير الشوارب
حنيــن : لا تخافين سهله وجهج يخبل مابي شعر
مجرد وبر خفيف راح اسوي بالشفره
لأن الخيط من اول مره يسوي تحسس
واحتمال يطلعلج حبوب وشعر
وحواجبج يرادلهم تعديل بالملقط
كلش بسيط من جوه وبس هيج
انسام : عاد انـتي ادره مني بهاي السوالف
زين ما تصبغين حواجبي
حنيــن : لا منو بقى يصبغ يمعوده
بعدين من احطلج ميكب ارتبهم الج بتاتو وقتي
غسلتي وجهج زين مو
انسام : اي جلفته جلف اگلج هذول اضافرج حقيقات
حنيــن : اي حقيقات
انسام : يخبلن بالعافية عليج
اني امدي اسوي اضافر بس اتقيد بيهن ما اعرف
حت اشتغل
حنيــن :لا اني متعوده مگدر بدون اضافر
نسومه ابقي هنا هسه اجي
گمت جبت علبه من اغراضي
وگعدت ارتبها
كملت وجها بسرعة
ما شاء الله عليها بشرتها صافيه وناعمه
بيضه وخدودها ورديه باوعت لروحها فرحانه تبتسم
انسام : تدرين اول مره بحياتي اسوي هذا التعديل
گتلج جنت بس احف شاربي
من ضيم عاصم يظل يعيب
حنيــن :بالعافيه حبيبتي انتي تخبلين
اخوج سخيف ما يعرف يحجي كلام حلو
انسام : يولي احب سوالفه من يدابلني
خن اروح اشوفه وجهي اغوره
حنيــن :تمام لا تنسين ترطبين وجهج
راحت لبيتهم تضحك شگد فطيره وحبابه يربي
شلت المرايه اباوع لروحي هواي متغيره اني
حواجي طالع بيهم زوائد شعر وبشرتي يرادلها ترطيب
تأفافت وشمرت المرايه عالفراش
اني بيا حال ارتب واعتني بنفسي
ماكو شغف لشي كلشي طافي بعيني
انسام : طبيت ادور لعاصم لگيته
بالمطبخ يسوي مكان للعصافير
مبين خوش راح نحصل دوخه
وينك شو دحگلي بالله
عاصم : خير شعندج
انسام : دحگلي زين شنهي بيه متغير
گرب يركز بوجهي وحجه
عاصم : مغسله وجهج من الوصخ
انسام : ضربته جمع على ضهره بكل قوتي
ما تلام بيك حنيــن ما تعرف تسولف شي حلو
عفته كامش ضهره ومشيت
اعزل بغرفتي جهزت الهدوم الي راح البسهم
ظلت بس اخلي حنيــن تمكيجني
ومن يجي خالي ابدل بساع
اني مدري عش متحمسه
حنيــن : طلعت رنــا تتشمس
طبيت وراهه للحمام
جمعت ملابسنه دا اغسلهم
لعبانه روحي من هاي الشغله احتاج غساله
بس المشكله ماريد اصرف من الفلوس
ما اعرف الدنيا شنو ضامتلي بعد
لازم اصمد واعرف اتصرف
طلعت من الحمام تلاگيت ويه رنــا
اجت تركض جانت خايفه مرعوبه فاتت بالغرفه
سدت على روحها الباب لحگتها ادگ بالباب وانادي
شبيج رناوي احجي شكو جاوبتني بنبرة خوف
رنــا : جنت بره افتر ولمحت جيرانه على سطحهم
يصورني بتلفونه حاجيته شدا تسوي
ضحك وشمرلي بوسه
روحي سدي باب الصاله وتعالي هنا
انتي وين جبتيني شنو هذا المكان
حنيــن :سكتت ثواني استوعب كلامها
طلعت بسرعة بره
تفاجأت من شفته عاصم يفتر على سطحهم
صحته بعصبيه هذا انـته الي خابصنه بغيرتك على اهلك
لك شگد طلعت واحد منحط وسافل
باوعلي واشر على روحه
عاصم : تحجين وياي
حنيــن : اي وياك لعد اكو غيرك هنا سافل وحقير
شتحس فهمني مو عساس احنه محسوبات عليكم
اذا متغار على جيرانك معنى متغار على عرضك
فتح حلگه عود مصدوم مو فاهم
عاصم :انتي شجاي تخربطين تخبلتي لو شنهي سالفتج
حنيــن : ماشي بسيطه الك سوي روحك مصدوم
رحت فتحت الباب صحت انسام
اجتني تلف بشالها ومنا عاصم من شافها يمي نزل
واجه بسرعه
انسام : ها يولي شكو تنادين بعلو حسج
جانت متعصبه حاجتني بزعل
حنيــن : باعي بدون مقدمات
اخوج واحد سافل وما عنده غيره ولا اخلاق
انسام :صدمني كلامها حرت شگول
اجه عاصم وگف يمنه جان متعصب گوه كامش روحه
يسولف بحس ناصي ويه حنيــن
عاصم :انتي شنهي سالفتج انهديتي علينه بالضهريه
السانج متبري منج يولي ما تستحين
حنيــن :رفعت اصبعي ونترت بوجهه
استحي انتـه بالأول حتى نتعلم منك
على اقل اني ما اتلون كلساع بوجه
ما اسوي روحي شريفه وداخلي خايس مثل صنفك
انسام : لا يمه هذا الحجي ثگيل شبيج يولي
تخبل عاصم يدحگلها وينافخ
شفت عفاف والبنوات طلعو بالطرمه يدحگون
دفعت عاصم وحنين على بيت هيفاء
امشو من هين الوادم ادحگ راح تصيرون علج
سديت الباب ادحگلهم ومجاي افتهم شي
شكو يمعودين واحد منكم يفهمني
حنيــن : اسألي اخوج گليله شسويت قبل شويه
خلي يحجيلج سفالته يتحارش بكل وقاحه وهمجيه
عاصم :الله يصگعج عليش تجذبين
شوكت اني متحارش بيج بنت الوادممم
حنيــن :مو اني اختي رنــا تحارشت بيها وصورتها بتلفونك
انسام : فكيت حلگي ادحگ لعاصم
مصدوم ما يعرف شيگول صد عليه وحجه
عاصم : اقسملج بالله تجذب شوكت هالحجي
نادي اختج بالله
حنيــن : لا ما اصيحها لأن واثقه من كلامها ما تجذب
انسام : وعاصم هم ما يجذب
خاف اكو سوء تفاهم
دحگتلي بعيون مليانه دموع
حنيــن : ماكو ولا اي سوء تفاهم للأسف
رنــا جانت هنا تفتر بالشمس فاتت
خايفه وزعلانه گالت جيرانه عالسطح
صورها ومن گلتله شدا تسوي شمرلها بوسه
بالهوا طلعت بسرعة اشوف جان عاصم عالسطح
ارجع واگلج رنــا ما تجذب ابد لو الثمن حياتها
خلي اخوج يفتح تلفونه وشوفي الصور
انسام : شنهي السالفة مجاي استوعب
ادحگ لعاصم صافن على حنين عيونه صارت بگصته
مسح وجهه فتح تلفونه انطا لحنين
عاصم : هاج شوفي
حنيــن : دورت تلفونه اخر الصور جانت
سراميك ارضيه وجدران باوعتله
وشمرت التلفون على صدره ما لزمه وگع بالگاع
اكيد حذفتهم من شفتني حاجيتك
اني مو متفاجئة بتصرفك
انتو الشباب الكل نفس الصنف
تركضون وره غرائزكم الحيوانية ما تهتمون
للعيب ولا عدكم اخلاق وذوق
الي اعرفه ولد العشائر يغارون حتى
على جلاب جيرانهم وانته بكل سفاله تحارشت بأختي
انسام : اسكتي يمعوده شنو هالحجي كل عقلج انتي
حنيــن : اسفه انسام هاي الحقيقة
احنه اجينه اندور الأمان هنا وما حصلنه بس المذلة
اخوج من اول ما شافنه سوه روحه ابو الغيره
الشاب الشهم هسه شوفي شسوه
انسام : حنيــن تسولف ودموعها تصب
وعاصم يدحگلها وگاز سنونه راد ينفجر
عافنه وراح اخذت تلفونه من الگاع ومشيت وراه
انادي اگف عاصم
هاي البنيه ما تعرف شتگول مبين اختها جذابه
حجه وهو يصعد عالبيتونه
عاصم : لا مو جذابه
انسام : وگفت ادحگله خمط التلفون من ايد محمود
ونزل يگلب ابتسم وهز راسه بأسف اجه شوفني
عاصم : دحگي بالله هاي رنــا مو
انسام : مديت راسي ادحگ
جانت صور رنــا تارسه تلفون محمود
انوب البنيه لابسه كيمونه سوده وجسمها نصه يبين
لطمت وجهي اي هاي رنــا الله يصگعك محمود
عاصم : هذا الأرعن جان عالصطح من شافني صعدت
فات بساع وگفت بمكانه وگعت الرزايل براسي
هاج ودي التلفون لحنيـن
خليها تحذف الصور وتكسره
انسام : نزل محمود يدحگلنه ويبلعم
جره عاصم من ياخته وگع بي راشديات ودفرات
التمو عفاف والبنوات يحاجزون دفعهم عاصم
عاصم : وخرن ممنوع وحده تحط نفسهاااا
هذا الجايف صور بنت الوادم
ما خاف على عرضه ما گال بيتنا مليان نسوان
يول بس الخنزير ما عنده غيره على عرضه
راجع نفسك خنزير انته لو بشر يووووول
انسام : الله لا يوفقك متصيرلك جاره
عفت عاصم يضرب بي ورحت ركض على حنيـن
جانت گاعده على حافة الطرمه تبجي
انطيتها التلفون ودنگت ميته من الخجل
هاج هذا محمود هوه طلع مصور اختج
عاصم ما يسويها لو على گص رگبته
حنيــن : اخذت التلفون ايدي ترجف
حذفت الصور ورجعته لأنسام ما قبلت تاخذه
انسام : عاصم يگول خليها تكسره
حنيــن : لا ما يحتاج خلص
انادارت انسام حتى تروح فات عاصم
شكله يخوف من اعصابه حجه وياي بأمر
عاصم :اخذي التلفون كسري
حنيــن : حذفت الصور ما يحتاج اكسره
صيح عليه بعصبية حسيته راح يضربني
اذا ما انفذ كلامه
لزمت التلفون شمرته عالصبه بقوة تكسر
باوعتله جان منزل عيونه وينافخ
عاصم : اعتذر على تصرف اخويه
صحيح جبير بالعمر بس عقل جاهل
اخذ جزاته وزياده وبعد حت بأحلامه ما يصد على بيتكم
وذا صارت وسواهه اشلع عيونه من مكانهن
انسام : جرني عاصم ومشينه
استخطيته انعصر گلبي جان مقهور
ترزل سمع اشكال الحجي وهو ماله ذنب
فات بغرفته بدل وطلع بره البيت مدري وين يروح
ناديت وراه ما صد عليه
هاي عادته من ينقهر يكمش درب الهزيمه
رجعت عالبيت مقهوره
محمود جان گاعد عالدرج يبجي مثل الجاهل
مكسره عاصم تكسر
گاعد يشكي لأمه العجيب عفاف ما انطته مجال
شبعته رزايل تستاهل حسبي الله بيك
ارعن سافل شوكت يصير بيك خير شوكت
حنيــن : اخذت تلفون محمود ورحت على رنــا
گاعده بالمطبخ شارده بتفكيرها
خليت التلفون گدامها
هذا تلفون الولد الصورج
جابه اخو وحذفت... حجت قبل لا اكمل
رنــا : سمعت كلشي
حنيــن : تمام لا تضوجين حبيبتي
باعي هذولي خوش ناس والله
بس هذا ابنهم محمود سافل
اكيد هسه شبعو ضرب يستاهل
بقت ساكته ما حجت
انقهرت على حالتها صارت تخاف وترتعب من كلشي
عگب ما جانت بعشر زلم ما يهمها شي
عفتها وصعدت للسطح
لميت الفرش رتبت مكانها زين وعطرته
گعدت افكر بكلامي ويه عاصم
غلطت بحقه هواي
ما عرفت افكر من عصبيتي
هسه اكيد انسام تزعل على زعل اخوها وحقها
بكلشي تسوي مسحت وجهي احس صخنت
من حرگة دمي وقهري
وفعلاً مثل متوقعت انسام زعلت
ما اجت اخليلها ميكب يجوز ما راحت للحفله
اي ما راحت لأن دزتلي العشه ويه ابنهم
انقهرت عليها حاسه بالندم لأول مره اهتم
لزعل شخص غريب عني
احس تعودت عليها وما اتمنى يصير شي يغثها
سحبت الغطى مددت افكر بيها وبعاصم
ما يستاهلون الصار
هواي جرحتهم بكلامي هواي
صاحتني رنــا گعدت اباوعلها ها يروحي
رايده شي
رنــا : اي اريد رمان وطرشي تگدر اجيبيلي
حنيــن : ابتسمت احس مو مصدگه
رنــا دا تطلب مني بدت تشتهي تاكل يعني صحتها زينه
: اي يروحي اگدر اجيبلج رايده شي بعد
رنــا : لا بس هذولي
حنيــن : اي هسه اجيبهم حبيبتي
گمت ادور العباية
ما اعرف وين شمرتها خوش لگيتها
لبستها بسرعة لفيت الشال على راسي
اخذت 25 الف وطلعت شايلتهم بيدي هالمره ما اخذت جنطه حتى ما تقيدني قفلت باب الصاله بالمفتاح
وگفت اباوع للجو مغيم وبارده
انوب المحل شوي بعيد
شسوي تذكرت انسام گالت اي شي تحتاجينه
اطلبي حتى ادز جهالهم يجيبولي
رحت فتحت الباب ترددت
شلون اطلب منهم عگب الي صار اليوم
ما ترهم بعد قفلت الباب ورجعت
خلص اني اروح المنطقة امان
اكدولي هالشي احمد وهيفاء واني رحت مره
كلشي ما صار حتى محد باوعلي
واني ما اطول اروح واجي بسرعة
طلعت طبگت باب السياج ورايه
مشيت شايله المفاتيح والفلوس بيدي
لامه روحي اتلفت هنا وهناك
ماكو احد قليل يفوتون وكلهم بطريقهم
محد يباوع ولا يسأل الحمد لله
وصلت المحل جان دا يقفل بالباب
صحته من بعيد لحظه عمو لا تعزل اريد كم غرض
وگف يباوعلي مستغرب
گلي شجابج بهالليل وحدج
شسوي عمو ما عندي احد
فدوه افتحلي المحل اريد رمان وطرشي
استغفر وفتح المحل يدردم
: اكو عاقل يشتهي رمان وطرشي بهذا البرد
ما جاوبته طبيت اخذت اربع كيلوات رمان
وعلبتين طرشي مشكل وحلويات
حاسبته بسرعه گلي استعجلي لبيتج راح تمطر
طلعت فرحانه شايله العلايگ
مشيت مسافة فعلاً گامت تمطر عالخفيف
بس مو مهتمه وصلت البيت ودا افتح الباب ادور المفتاح ماكو جان بيدي وين راح
دورت العلاليگ هم ماكو دكيت جرص بيتنا الدگمه مابيها ضوء يمكن عاطل دگيت الباب اصيح رنــاااا
بس عبث متسمعني
صارت تزخ مطر قوي وترعد
هذا الجو الي ما احبه ويرعبني رغم كل شجاعتي
شسوي هسه دگيت الباب مره ثانية اتأمل رنــا تفتحلي تعبت هواي ملابسي صارت مي
بردت اجمدت صرت ارجف
وين اروح هسه وشسوي يربي
الشارع فارغ ماكو اسم مخلوق
بس اني گدام بيتي
مجان عندي حل غير ارجع ادور المفتاح
خليت العلاليگ گدام الباب ورجعت بنفس طريقي
بخطوات ثگيله وخوف بگلبي بسبب غرابة المدينه
اباوع هنا وهناك على امل الگه المفاتيح
الشارع صار مي واني جمدت رجليه معد احس بيهن
قويت نفسي ومشيت لحد ما وصلت المحل ادور
ماكو المفتاح
رجعت اسحل بروحي بالگوه امشي
نفخت بقهر عيوني حاره رغم البرد
حاجيت روحي لا تبجين فدوه لا تنهارين
انتي گدها دبريها
صرت يم اضوية الشارع
لاحظت خيال گدامي انادريت اشوفه
جان رجال طويل لابس قمصله سوده وكلاو
متلثم ادينه بجيوبه ويمشي بثگل متجاهل المطر
شكله ويا هيج جو بارد وممطر والدنيا ترعد
ومنا ضوء الشارع يشتغل وينطفي
وبوحدنه ماكو بشر غير احنه
بلحظه تذكرت كل فلم رعب شايفته
مشيت بسرعة خفت گلبي صار يدگ سريع
گمت الوم روحي اني كلي غلط ما اعرف اتصرف
امشي وكلساع التفتت الرجال بعده ورايه
ردت اموت من الخوف صرت
اتخيل كل مشاهد افلام الرعب
اسرعت بالمشي وصلت البيت وهو ورايه
وگفت بالباب اصيح علي
:شكو لاحگنييي هاا
تريد اصرخ والم عليك اهل المنطقة
اسويها تره اني مخبله
وگف يباوعلي ثواني واجه عليه
صرخت وگمت ادگ الباب قوي رنــاااا الحگينيي