رواية فيونكة سوداء الفصل التاسع 9 بقلم زينب سمير

فتحت سلمى الباب فظهر بيبو قدامها، ملامحه باين عليها غضب مكتوم رفعت حاجبها و- مالك متنكد كدا لية؟

- أبعدي عن وشـي يابت

سمع صوت خالته وحد غريب - عندكم ضيوف ولا أية؟

هزت كتفها بجهل- حد من معارف ماما.. كان مسافر بره ونزل أجازة فحب يزورها قال

- مين يعني؟

- جيرانهم في البيت القديم

صوت أمها- سلمى روحتي فين؟ هاتي العصير يابت

قالت بعصبية- أوف الواحد زهق من شغل الخدامات ده بقولك تعالى شيل الصينية مكاني

زقها بعيد عني- غوري من وشـي

مسكت دراعه وبتحايل- بالله عليك.. هتتقلب عليا والله وأمي هتعمل مني شاورما.. يرضيك؟

- أه يرضيني..

- وهقولك حبيبة مالها اليومين دول

بصلها بتلهف.. قالت بثقة- لكن لما تنفذ اللي عايزاه

- فين الصينية

مشيت للمطبخ وهو وراها دقيقتين ودخلت سلمى للضيوف وهي بتوسع مكان علشان بيبو يدخل وهو شايل الصينية

وبهمس مسموع لبيبو بس- متتكسفيش ياعروسة

بصلها بغيظ وهي بتكتم ضحكتها قالت خالته سمية بتفاجئ- بيبو!

ظهرت على ملامحها المفاجأه مع القلق.. بصت بينه وبين الراجل اللي قاعد قدامها

لاحظ بيبو حالتها لكنه معلقش قدم العصير للست اللي توقع إنها مرات الراجل وشاب وبنت في بداية المراهقة

ووصل قدام الراجل أخيرًا اللي فضلت عيونه مثبتة عليه مبتتحركش.. نطق بصوت خافت متحجرش وهو بيبصله لكن السؤال متوجه لخالة بيبو- ابن سلمى؟

هزت راسها بآه وعيونها بتلمع.. بلع الراجل ريقه بصعوبة،

- شبهها.. كإنه نسخة منها

ضيق بيبو حواجبه قبل ما يسأل- أنت تعرف أمي؟

ضحك الراجل بسخرية مريرة- إلا أعرفها

'فرحة وجرح عمري' كمل همسه جواه..

حاولت سمية تلم شتاتها و- خلاص ياشهير كفاية تعارف.. بيبو حبيبي في أكل جوه خلي سلمى تسخنلك

- لا مفيش داعي أنا كنت حاي أسلم عليكي وماشي علطول

شاورله شهير إنه يقعد جنبه و- خليك معانا شوية

بيبو ببسمة مجاملة- مرة تانية معلش

خرج من الأوضة وسلمى وراه.. وقفوا مع بعض قريب منهم

سلمى بخفوت- حسيت باللي بقولك عليه؟ الراجل دا عجيب ومريب..

بلا مبالاه- ماله يعني.. ما الراجل باين عليه محترم

- يابني دا مستغل أن مراته أجنبية مش فاهمة حاجة وفي مية البطيخ وسأل عن كل ستات العيلة..

غير الموضوع- سيبك منه، عرفيني بس مالها حبيبة

سلمى بتعجب- مالها حبيبة؟ ما زي الفل

رفع حاجبه- أنتي مش قولتي هتقوليلي هي متغيرة لية؟

- إني!

- أومال أمي.. بت

رفعت إيدها بإستسلام- ولا أعرف.. أنا لاحظت وشك مقلوب قولت هي أكيد السبب.. أنا بقالي فترة مبكلمهاش أصًلا علشان مشغولة جدًا

- حتى أنتي كمان

قالها بخيبة أمل، بعد ما هددها من ساعتين رجع لعقله.. هو فعلًا بيضغط عليها سابها ومشـى على أمل إن الأمور تتصلح.. تقدر فعلته.. تكلمه تشكره

أي حاجة

لكن بس لقى الصمت..

- همشي أنا دلوقتي..

- ما تخليك شوية

لكنه شاورلها بالوداع ومشـي.

بعد يومين.. رجعت متردش.. متهتمش.. بص لرقمها بزهق قبل ما يغير قراره مش هتقرب مش هيقرب.. مش هترن مش هيعبر

بص للتاريخ اللي ظهر قدامه لثواني، إزاي راح عن باله

كل سنة في الوقت دا حالته بتبقى حالة.. لأول مرة حاجة تنسيه ذكرى اليوم دا

ذكرى وفاه أمـه.. بعد ساعتيـن.. في مقابر العائلة دخل بيبو وهو ماسك بوكية ورد أبيض، ملحقش يعيش معاها.. ولا يعرف عنها كتير لكن عنده إحساس إن حد شبهها هيفضل الورد ده

قرب ببطء من مكان هو عارفه كويس توقع كالعادة مش هيلاقي حد غيره لكنه لقى جسم معطيه ضهره.. مميل على قبرها وباين عليه الإنهيار

سمع صوته.. حاسه مألوف لكنه مش عارف مين، سمعه قريب على الأقل بيقول بصوت مخنوق.. مسموع.. منهار- اتأخرت أنا عارف.. سامحيني ياسلمى مقدرتش أزور البلد دي.. البلد اللي اخدتك مني لقيتني بهرب من كل حاجة أول ما عرفت خبر جوازك.. بقطع أي حاجة ليها صلة بيكي.. قولت يمكن أنساكي لكني مقدرتش ولا لحظة.. كنت بلوم عليكي قولت أزاي جالك قلب تعملي فينا كدا

روحت لسمية أختك أمبارح أعاتب.. أعاتب باللي شلته جوايا من عشرين سنة لكنها فاجئتني باللي عمري ما توقعته

قالتلي إن عمرك ما نسيتني.. وإنك كنتي بتحبيني لحد أخر لحظة.. قالتلي إنك حاولتي كتير تتطلقي علشاني.. بس أنا خذلتك.. هربت وسيبتك.. أنا الضعيف وكنت بلومك أنتي

أنا اللي محاربتش علشان حبنا.. سامحيني.. شوفت ابنك أمبارح.. نسخة منك.. سألت جوايا.. يـاه لو كان مني ومنك.. ابننا زي ما بنحلم حبيته لإنه منك.. حبيته لإنه شبهك بس السؤال فضل جوايا أزاي هحب ابن عدوي.. أيوة أبوه عدوي.. عدوي الأول والأخير سرق مني عمري.. وحبي.. سرق مني حياتي كلها أنتي ياسلمى كنتي حياتي كلها