رواية ارهقني الفجور الفصل الثامن 8 بقلم نوسه حمد
سعاد قالت لي نوسه انا مستحيل رجلي تعتب القسم انا اي بساعدك اننا نلاقي صفيه بس ما لي درجه ادخل اقسام قلت ليها يا زوله ما مشكله اقيفي هنا ودخلت بقلب قوي وكل الناس اعاينو لي بنظره استغراب نحنا الدوله الوحيده العندنا دخول القسم عيب واهلي لو عرفو ما ح يرحموني بس ربنا عالم بي نيتي نفسي بس الحق يظهر اول ما دخلت لمحت ظابط كان من ضمن الضباط الجو لحظه لقينا الطفل مشيت عليهو قال لي انتي منو ودايره شنو والجابك القسم شنو بي لبس المدرسه وكان زهجان انا لمن خوفتا منو وحسا بي خايفه غلبني زاتو اتكلم الدايره اقولو طار مني قال لي مالك فشنو في زول لمسك قلت ليهو لا لا في زول اعتداء عليك قلت ليهو لا اهلك عاملين معاك مشكلة قلت ليهو لا قال لي طيب يابت الحلال الجابك مكان المجرمين شنو قلت ليهو تتزكر المدرسه اللقيتو فيها طفله قال لي اي مالا قلت ليهو انا جيت ارفع بلاغ قال لي بلاغ شنو البت العملت كده نحنا خلاص اتسترنا عليها وخصوصا انها من اسره بسيطه قلت ليهو لكن دي ما الحقيقه الولدت ما صفيه كلهم شهدو عليها زور قال لي كيف كدي تعالي المكتب مشيت معاهو وحكيت ليهو بكل شي حتي الغفير البشيل قروش وابيع ضميرو وهو سبب الفساد الحاصل في المدرسه بخليهن يدخلن الحمامات المهجوره عشان يشربن السجاير ويتكلمن فيديو مع الاولاد وانا شفت الكلام بعيني وهو صورهم فيديو واشتكاهم وفصلوهم شهر بس م عارفه ليه تاني باع ضميرو انا ما عايزه اظلمو بس هو العارف حقيقه البت الولدت واتهمو المسكينه دي قال لي تمام انا بشوف الموضوع دا وطلع دفتر وقال لي الولد الجنبو اكتب وبقا يملي فيهو في كلام قال لي اسمك منو قلت ليهو لا لا يا جنابو ما تدخلني في الموضوع البنات ديل ما بقدر عليهن قال لي كيف لالا طيب انتي جايه علي اي اساس انا احرك القضيه بعد اتقفلت تاني كيف انتي بتهظري قلت ليهو لا لا بس انا اهلي ح يقتلوني وما ح يثقو فيني تاني قال لي طيب يابت الحلال مدام خايفه ما تدخلي في الموضوع دا قلت ليهو لا لازم ادخل لانو ابو صفيه خاتي سكينو وحالف يقتل صفيه لمن تجي قال لي وصفيه وين قلت ليهو صفيه اختفت من بعد الحادثه قال لي صفيه لو ما ولدت ما بتختفي البطلعها شنو قلت ليهو لا لا صفيه ما عارفه زاتو انو الناس اتهموها هي طلعت بسبب ابوها هو تعبان نفسيا وعاوز يغصبها علي ولد عمها وهي ما عايزاهو قال لي شوفي لو انتي عاوزه تساعدي صاحبتك نكتب اسمك وانك الجيتي بلغتي عشان نظهر الحقيقه يا كمان في حل تاني تقنعي ام صفيه لو عندها ما يدل انو بتها بريئه تبلغ في الغفير والبنات الاتهمو صفيه قلت ليهو انا عندي ما يثبت وحكيت ليهو جبتو كيف قال لي تمام اذا تجيبي امها وانتي تكون بعيده من الموضوع قلت ليهو تمام طلعت لقيت سعاد قلبها يدق قالت لي خوفتا يسجنوك انتي وما نقدر نطلعك تاني نوسه عليك الله ما تخليك متهوره قلت ليها صبرك علي ان شاء الله حق صفيه برجع انا بكره تاني بمشي لي امها رجعنا البيت امي قالت لي اتاخرتي مالك قلت لينا غشينا ام صفيه بقت تكورك فيني قالت لي انتي من يوم الطفل اللقوهو انتي بالك ما معاك وعامله فيها روحك ولا قاضي القضاه خليتا تتكلم ودخلت عشان انا تعبت اني افهما جات بعد مسافه لقتني اقرا قالت لي خالي بالك ف قرايتك يابتي هي البتنفعك قلت ليها حاضر يمه وفاتت بقيت ادعي ربنا انو انا لو ماشه في طريق ح يتعبني او يخسرني ثقه اهلي فيني تجيني قناعه من فوق واخلي اي شي مشيت المدرسه بعد نهايه اليوم مشينا بيت ناس صفيه لحسن حظنا لقينا ابوهم مافي فهمت ام صفيه اي شي قلت ليها الشرطه ح تساعدك في تلاته حاجات تزح التهمه من بتك وتلقا ليك بتك وتحمي بتك من ابوها قالت لي اي شي بعملو حسيتا ملهوفه علي بتها اديتا اسم الضابط وكلمتها قلت ليها تحكي من مرض صفيه لغايه ما ابوها عاوز يغصبها علي ولد عمها قالت لي تمام ودعتها ومشيت وتاني نبهتها انها لازم تمشي لو عايزه تلاقي بتها مشيت البيت لقيت اهلي اتونسو استحميت وصليت وجيت قعدتا في نصهم ابوي طبعا بريدني شديد قال لي الغاليه تعالي وسلم علي في راسي وبقا يسال فيني من القرايه طوالي امي قالت ليهو دلعا كده لمن تجيبا لينا كبيره بتك كل يوم تحقق في موضوع صاحبتها ابوي عاين لي اخواني وقال ليها ما توضحي اكتر الشفع ديل قاعدين وبعدين انا واثق من بتي وغير واثق انا بحس لو طعنتا شوكه بحس بيها لاني قلبي متعلق بي اولادي شديد ما تشيلي هم يا ام نسيبه بتك بي الف راجل امي سكتت غلبا زاتو تقول شنو وانا ابوي كل مره ثقتو فيني بتديني شجاعه وقوه وطول ما انا عايشه لو خيروني بين الموت واكسر ثقه ابوي ح اختار الموت اهون لي من اشوف ابوي فقد الثقه فيني
تاني يوم في المدرسه سعاد قالت لي تفتكري تكون ام صفيه سمعت كلامنا ومشت ولا لا قلت ليها ما عارفه حاجه والله والايام دي امي مشغلاها لي وعندنا الامتحانات الشهريه عاوزه اركز شويه لو نقصت درجه ح تعمل لي موضوع قالت لي حلو احسن نركز والفيهو خير يحصل انتي ربنا عالم بيك عملتي العليك وزياده قلت ليها الحمد لله ربنا اجمع بي صفيه ان شالله
ركزت في قرايتي وبعدت عن اي شي علا طبعا بقت مركبه لي مكنه عشان انا اثبت انو صفيه مظلومه وبقيت متجنباها وهن اصلا ما دايرات قرايه ضاغطنهن اهلن سبحان الله ناس متوفر ليهم اي شي وما عايزين القرايه وناس ماعندهم حاجه وعاوزين القرايه شديد ما عارفه القروش عمتهم بس برضو في ناس حالهم كويس زي سعاد وبتحب القرايه بس شكلو علا وصاحباتها الدلع عامل فيهم كده الحمد لله اهلنا ما دلعونا
في عز الامتحانات الشرطه جات والمدرسه انقلبت وانعدلت وانا وسعاد الوحيدين العارفين الشرطه جايه لشنو وعملنا نفسنا مافاهمين اي شي بقينا نسال فشنو والحلوه الضابط عينو جات في عيني بس ما قال لي اي حاجه ساقو الغفير وعلا وشلتها والمديره جنت عديل ودايره تقبل علي الضابط قال ليها هي دخلها في الموضوع شنو قالت ليهو من يوم الحدث البت دي شغاله تحقيقات قال ليها هي ما عندها ذنب دي والده صفيه رفعت فيهم قضيه واي تعدي عليها ح يدخلكم في سين وجيم طبعا المديره جنت وبقت تكورك عاوزه تستر علي اي شي ما عاوزه تظهر انها فاشله عشان منصبها وما تخسر وظيفتها بس تستر علي البنات ديل احتمال يعملن اي شي وما كده وبس احتمال يفسدن اخلاق البنات بالذات في ناس بتتاثر بالاشكال دي سريع نحنا لو واعيين في غيرنا ما واعي
مرت الايام وانا ركزت في امتحاناتي والحمد لله عدت ع خير وعرفت انو علا وصاحباتا طلعن منها والاتسجن الغفير حسيت بالذنب اكيد ما الولد هو وكيف ديل يطلعن منها علا جات قالت لي فشلتي للمره المليون توقعينا يابت نحنا اقوا منك وانظف منك يا الاولي وكانت بتتكلم بس اسلوب مستفز قلت ليها يااه كل الحقد دا جواك لي وعلي فكره مصيركم تقعو بس متين ما معروف وشكلو القصه اتعقدت سعاد قالت لي نوسه البنات ديل في واحده سمعتهم بتكلمو بالتلفون وبتقول ليهو اي اسمها نسيبه انا قلبي بقا ادق قلت ليها كيف وبتكلمو مع منو قالت لي ما عارفه وما اكذب عليك انا خوفتا عاوزه اطلع من الموضوع دا قلت ليها ح يعملن شنو مثلا انا ما خايفه يا سعاد وحتي لو انتي خوفتي وما معاي انا ربنا معاي والله وحدو العالم بي نيتي ما عندي اتجاهم شي بس كونو انو يلعبو بالبنات الضعيفات ابقا عندي اتجاهم شي وح اقيف ليهم حتي لو ختو في رقبتي سيف قالت لي ما بنصحك البنات ديل زي ما بالقروش سكتن الغفير وحبسنو بالقروش بدمرنك اسمعي كلامي البنات ديل مافارق معاهم شي وانتي فارقه معاك سمعتك نوسه مابعيد يتهموك انتي في شرفك والناس اصلا بصدقو اي شي حتي لو كذب واهلك ما ح يقبلو بكلام زي دا. قلت ليها ربنا كريم ومشيت منها من ناحيه الخوف اتملكني بس لو سكت او اتكلمت خلاص هن ختني قي راسهن يا اكمل قصادهم يا استسلم وانا ما النوع البستسلم مشيت لي ام صفيه قلت ليها الحاصل شنو قالت لي مشيت وقدمت بلاغ في البنات والغفير بعد كم يوم استدعوني البنات في محامي طلعهم وورط الغفير لانو انا ما عندي ادله ضدهن وعرفت انو الغفير اتسجن بس من يوم اتسجن انا ما جايني نوم قلت ليها وانا كمان حسيت بالذنب وشكلو هو فعلا ما عارف حاجه لو عارف حاجه كان قالا اكيد ما ح يورط نفسو قالت لي انا بكره بمش اتنازل قلت ليها كويس وطلعت منها حسيت كل مجهودي راح في الفاضي معقوله هن اقوي من الشرطه لا لا في شي غلط انا لازم اتكلم مع الضابط بس خايفه اتورط انا قلت اشوف استاذ علاء
طلعت منهم لاقاني ابو صفيه قال لي انتي دايره شنو مننا كل يومين تجي تاني لو عتبتي عتبه البيت دا بشرح بطنك خوفتا منو شديد وجريت اهلي قلبي مقطوع والعبره خانقاني وبقيت اقول يارب الحق يظهر يا رب صفيه تظهر انا نفسيا تعبتا وتعبت شديد كمان دخلت بيتنا ما اتكلمت مع اي زول حسيت نفسي مكسوره امي اتكلمت وفترت انا م ركزت معاها شكلها اتصلت علي ابوي جا لقا دمعتي في عيني قال لي انا م داير اعرف انتي مالك بس شوفي انتي وصلتي لياتو مرحله رافضه تاكلي رافضه تتكلمي يابتي ما تتعبينا معاك ولو علي صاحبتك بترجع باذن الله ادعي ليها مافي شي بفيدها غير دعاك قلت ليهو حاضر يابا اتشجعت وكملت يومي زي الناس بس ما هدا لي بال الا لمن مشيت للضابط وكنت ببكي قلت ليهو انت عارف البنات الطلعن بعملن في خطه عشان يدمرني وانتو ليه تطلعوهن وأقسم بالله هن وراهن قصص يشيب ليها الرأس انا جيت واترجيتك تطّلع المدرسه من الفيها ديل قال لي هسي قشي دموعك وافهمي اول نحنا ما طلعناهن حبا فيهن انا طلعتهم عشان اشوف فسادهم وماتخافي في غيرك في المدرسه وزرعتو معاهن انا متاكد انك ما ح تقدري ع المهمه دي عشان كده جبنا البتعرف توقعهم وما تشيلي هم امشي مرفوعه الرأس اقسم بالله ما تجيك اي حاجه انا حلفت ليك بس انتي ما تركزي معاهم خلي بالك من قرايتك واتجنبي اي بت حتي اقرب البنات ليك فاهماني انتي حسيت الضابط عاوز يشكنني في سعاد بس معقوله لو سعاد طلعت م كويسه انا تاني امي ما بثق فيها قلت ليهو ما عندي غير سعاد قال لي اي كان اعملي حسابك وما تجي هنا كتير المكان دا ما شبهك وانا عرفت انك اكتر طالبه متفوقه ربنا يفوقك كمان وكمان دا رقمي لو احتجتي اي شي اتصلي لي والبنات ديل لو سالنك ارجعي لي بمكالمه قلت ليهو تمام طلعت منو وفي راسي الف سؤال بس ما فاهمه اي شي دخلت المدرسه لاقاني استاذ علاء قال لي الحقيني في المكتب قلت ليهو طيب حسيتو مستعجل مشيت وراهو قال لي نوسه انا عاوزه اقول ليك حاجه بس خشمك ما تفتحي قلت ليهو شنو قال لي صفيه اتصلت علي ………يتبع
