رواية فيونكة سوداء الفصل الخامس 5 بقلم زينب سمير

بعتتله رسالة بنوع من العصبية من الموقف اللي وقعت فيـه- أنت مدفعتش حساب الغدا من عندي؟

رد فورًا- وصلتي ولا لسة؟ كنت لسة هبعتلك

- رد عليا

رد بعناد- لما تردي أنتي الأول

إتنهدت وهي بتكتب- وصلت

- حمدلله على السلامة

مع أيموجي بعيون بطلع قلوب، أحيانًا بيخرجها عن شعورها.. من غضب شديد لضحك وعدم تصديق، بردود أفعاله العجيبة، كل الناس بصوب وكوثر في صوب حرفيًا

رد أخيرًا- أه مدفعتش من عندك.. قولتلك معنديش حريم تدفع

تخيلت شكله وهو بيحاول يتخن صوته

- ياربي عليك وقعت في موقف محرج قدام بابا لما..

وحكتله اللي حصل

قال بإعجاب- بس شطورة اتصرفتي بسرعة

بنوع من تأنيب الضمير- أنا عمري ما كدبت عليهم

- كدبة بيضة هتعدي

- كل حاجة عندك سهلة

- أنتي اللي بتصعبيها على نفسك.. الأهالي محتاجين أحيانًا الطريقة دي

مش كل الأهالي.. نسي هو إن أهله مش زي أهلها

إن حياته مش زي حياتها

لكنه عمم.. كل أب وأم بيختاروا حياتهم من غير ما يفكروا في أولادهم.. بيجبروهم.. بيحركوهم على مزاجهم.. بيسلموهم للحياة من غير إذنهم

يستاهلوا يتعاقبوا

دي مبادئـه..

غير الموضوع- في سباق إنهاردة تحبي تيجي؟

- أحب أوي.. بس مش هقدر

- لية؟

- أية هو اللي لية؟ أنت بنفسك عارف إن أخري بره تسعة

بعد تفكير كتير وصمت قال- أمم.. أنتي في الدور الكام؟

- الأول.. لية؟

بحماس- هتعرفي.. أنتي قولتي إنهم بيناموا بدري صح؟

ردت بتوجس- اه

- جهزي نفسك على الساعة وحدة أنا هاجي اخدك

- بوابة العمارة بتتقفل من 12 ومش معايا مفتاح

- ومين قال إننا هنحتاج البوابة بس.. أنتي هتنطي من البلكونة

- نعم!! لا يمكن..

والـ لا يمكن بقى يمكن! أزاي طاوعها عقلها توافق؟ حب المخاطرة.. المغامرة.. أن بيبو ازاي بيخلي أي حاجة صعبة في عيونها سهلة

كان في ايدها تتسحب وتاخد المفتاح من باباها.. كان في إيدها ترفض رفض قاطع

لكن ترددها في الرفض.. هو اللي بيخلي بيبو يكمل..

وصل أخيرًا تحت بيتها اللي لحُسن الصدف بلكونتها كانت من ورا في طريق هادي وبيطل على قطعة أرض فاضية..

بصتله من البلكونة وهي بتكلمه- مش هعرف لا

- هطلع أخدك

- برضوا لا.. أمشي يابيبو خلاص

- مش همشي أحنا اتفقنا.. اطلعي من البلكونة وأسندي رجلك على الحوافي اللي موجودة في الشباك اللي تحت

وأنا هبقى موجود

لسة رافضة، استخدم ورقة ضغط تانية- أنتي مش واثقة فيـا؟

- لا واثقة بس

كملت بهمس- مش واثقة في نفسي

شجعها- خلصي أنا معاكي..

نفذت كلامه وهي مرعوبة طلعت من فوق سور البلكونة اللي كان قصير مسكت السور بأطراف صوابعها وهي مطلعة جسمها بره.. لحد ما سندت رجعلها على حواف عريضة فوق شباك الدور الأرضي.. وقف عليها وحست إنها كويسة فسابت إيدها وهي بتتنهد

لفت ببطء وبصت لتحت لقيت إنها قريبة جدًا من الأرض ومن بيبو اللي فتحلها إيديه

نطت مرة وحدة من غير تفكير.. كانت خايفة.. مرعوبة.. متحمسة!

وقعت في حضنه سندت على صدره بدرعاتها وهي بتغمض عيونها

سمعت صوت ضحكته- أية الرشاقة دي

فتحت عيوزها تبصله ببسمة لطيفة بعدت عنه أخيرًا ومسك إيدها- يلا بسرعة علشان نلحق

وصلوا لمكان السباق بصلها و- تحبي تشاركي معايا

- أحب أوي

أبتسم وهو بيطلع خوذة وردي المرة دي غمز بعيونه وهو بيهدهالها- وعليها باربي كمان

ضحكت وهي بتبص للخوذة اللي عليها رسمة باربي

لبستها وساعدها إنها تقفلها.. ركبت وراه بسهولة المرة دي

تاني مرة من كل حاجة بتبقى سهلة

حتى الكذبة التانية بتبقى أسهل من الأولى

الغلط التاني بنبقى شايفين نصه صح..

فاز بالسباق كالعادة كان إحساس الإدرينالين عندها عالي، مفكرتش كتير، جواها وجع.. حبة تأنيب لكن اللي بيحصل حواليها مبنج كل دا

ركبها علشان يروحوا تحت نظرات دارين اللي بدأت تحس إن اللي بيحصل قدامها مش عادي

عمر ما بيبو كان كدا.. معاها أو مع غيرها

عمره ما أهتم.. وقرب وضحك بالصوت دا

وصلوا أخيرًا لبيتها، بصت للبلكونة بحيرة- هطلع أزاي بس!

بسهولة نطق- زي ما نزلتي.. هشيلك أطلعك للشباك

كمل بتفكير- المرة دي علشان كانت فجأة متصرفتش.. المرة الجاية هجيب سلم

- ومين قال إنها هتتكرر كانت مرة وراحت لحالها

- هنشوف..

قالها بغمزة..

طلعت أخيرًا ودخلت الأوضة، اليوم عدى بسلام محدش حس بيها

بصت لرسالته- بسابق من سنين.. لكن فرحت الفوز معاكي مختلفة

- عايشة من سنين.. لكن حياتي لما دخلتها بقيت مختلفة

بص لرسالتها كتير وهو بيبتسم

ولسة..

هتشوف معاه كتير وكتير.. هيخليها سلمى تانية.. أوبس.. قصده حبيبة تانية..

يومين والتنسيق طلع وحبيبة بقيت طالبة في كلية..

يتبع...