رواية نص غلطة الفصل الرابع 4 والاخير بقلم عمرو خالد ليث
: نور القاعة قطع تاني ليه هو في أي؟
• مفيش حاجة خليكي جمبي بس متبعديش عني
: أنا خايفة بجد ومين بيصرخ هناك
• النور يرجع وهنشوف خليكي ماسكة أيدي اوعي تسيبيني
فضلت ماسك في ايد شهد لأني كنت حاسس أن في حاجة هتحصل وقد كان، مفيش ثواني والنور رجع التاني، وظهرت رحمة والمرة دي ماسكة ازازة كبيرة في ايديها بترش منها في كل ركن، دي مش ماية ده بنزين، وولعت في كل ركن في المكان كله، الناس كلها بدأت تجري من القاعة، الفرح باظ والناس بتصوت في كل حتة، بصيت علىٰ شهد جمبي ملقيتهاش، سابت أيدي هي كمان وجريت، بصيت عليها في كل حتة ملقيتهاش، لقيت رحمة بتقرب مني لحد ما وقفت قدامي، كل ده والابتسامة المخيفة إللي علىٰ وشها مختفتش، مسكت أيدي من غير ما تتكلم ولا نطقت أي كلمة، حتىٰ انا مش عارف انطق ولا أقول أي حاجة، مسكت أيدي ومشيت معاها، فضلت ماشي معاها مش عارف رايحين علىٰ فين بس فضلت معاها ماشي من غير أي اعتراض مني .
: لا مش عايزة أعمل كده لا
• أمال عايزة أي؟
: مش عايزة حاجة عايزة أمشي
• مش أنتي إللي طلبتي أن الفرح يبوظ!
: مش عايزة أبقى السبب في أن فرحته تبوظ لا
سبتها ومشيت علىٰ طول، فضلت أجري لحد ما خرجت من المكان كله، مش عارفة عقلي كان فين لما جيت برجلي لواحدة دجالة عشان أعمل سِحر لحد، بس غصب عني مش قادرة اشوفه مع حد تاني، مش قادرة استوعب أن في واحدة في حياته غيري، واحدة هتقعد في حضنه غيري، هيطبطب علىٰ حد غيري، أول ما دخلت لـ الدجالة دي قالتلي عايزة تعملي أي قولتلها عايزة الفرح يبوظ، قالتلي بسيطة وتعالي اوريكي أي إللي هيحصل، قربت منها وحطت ايديها علىٰ راسي، وشفت الفرح كله من اوله لآخره وهو وبيبوظ لحد ما مسكت أيد يوسف ومشيت بيه بعيد عن المكان كله، مهانش عليا اكسر فرحته في يوم زي ده، أنا بجد متخلفة عشان أفكر بالطريقة دي، مشيت من المكان كله وضميري بيأنب فيها ومش قادرة استحمل، فضلت أعيط لحد وصلت البيت ونمت علىٰ السرير وأنا مش قادرة اواجه أي حاجة تاني في حياتي، نمت وانا مش عايزة أقوم تاني .
: ده بجد؟
• ايوة
: حصل أمته!
• النهاردة الصبح واخدوها علىٰ المستشفى علىٰ طول
: لا حول ولا قوة الا بالله
• كلهم راحوا معاها مفيش حد موجود
: طيب يلا نروح
• أنت هتروح!
: ايوة مينفعش مروحش
• طب وشهد؟
: مش هقولها حاجة وأنتي متقوليلهاش حاجة
• حاضر متقلقش
خبر متمناش أسمعه نهائي، رحمة تعبت الصبح واخدوها علىٰ المستشفىٰ، كان واضح أن نفسيتها الفترة الأخيرة مش كويسة بسبب طلاقها، مفيش حد يستحمل يتجوز ويتطلق بعد شهر، كفاية الضغط النفسي إللي كانت عايشة فيه طول الفترة دي والمرحلة إللي وصلتلها لحد ما وصلت لطلاق، مشفق جدًا عليها والله، روحت المستشفىٰ أنا وفرح ولقيت العيلة كلها هناك بس أول ما وصلت كان اغلبهم مشي ومفيش حد غير مرات خالي وامي وخالي، سلمت عليهم ودخلت اتطمن علىٰ رحمة، لقيتها نايمة علىٰ السرير ومتوصلة بأجهزة ومتركبلها محاليل، ملامحها كانت باهتة خالص والسواد ظاهر تحت عيونها، الزعل والتعب واضحين عليها، قربت منها وكنت حاسس أني عايز الومها علىٰ حاجات كتير جدًا، عايز اعاتبها بس ده مكنش وقته ..
: سلامتك يا رحمة، مقدرتش أسمع أنك تعبانة ومجيش اتطمن عليكي، رغم أنه مينفعش ورغم أننا مبقيناش لبعض ورغم أنك سبتيني لما تعبت وكنت محتاجك، بس أنا مقدرتش مجيش ليكي، مقدرتش أسمع أنك تعبانة ومجيش، رغم حاجات كتير جدًا بس جيت عشان اشوفك
لقيتها بدأت تتحرك ببطئ، ولفت وشها نحيتي وعيونها مليانة دموع، شالت جهاز التنفس إللي عليها وبدأت تتكلم بالعافية ..
• حقك عليا أنا غلطت ومقدرتش أكون جمبك بس كان غصب عني والله كان غصب عني مكنش بأيدي اسيبك ولا أبعد
صوتها بدأ يقطع ودموعها لسه بتنزل وهي وبتتكلم، أخدت نفسها وكملت كلام ..
• بس أنا والله فرحانالك رغم اني مش حابة تبقى مع حد غيري بس مهانش عليا اشوفك زعلان حقك عليا يا يوسف
مسكت جهاز التنفس وركبتهولها تاني عشان بدأت نفسها يقطع، ومسحتلها دموعها، مش عارف بجد أعمل اي بقيت محتار، بدأت عيوني تلمع جمبها، مقدرتش أقعد وخرجت علىٰ طول، مكنش ده الوقت إللي يتقال فيه كده، جه متأخر خالص كلامك يا رحمة، مبقاش له لزوم أي كلام ولا عتاب دلوقتي، سلمت عليهم ومشيت من المستشفى علىٰ طول، وانا وفي الطريق لقيت شهد بترن عليا .
: بيحبها إزاي؟
• دي مجنونة وقفتي في الشارع وقالتلي أنه لسه بيحبها وهي بتحبه ومش هتسيبه
: وبعدين
• كلمت يوسف وحكيتله إللي حصل طبعًا وجالي وفهمني كل حاجة
: بس هو بيحبك
• ده كده كده معنديش شك أصلًا
: سمعتي أنها تعبت ومحجوزة في المستشفى؟
• رحمة!
: ايوة النهاردة الصبح
• لا معرفش لأني مكلمتش يوسف النهاردة
: طب شوفيه
• تتوقعي يكون راحلها ؟
: اي المشكلة ماهي قريبته
• أي المشكلة!
بصيتلها بقرف كده إللي يعني أي أي المشكلة، أكيد فيها مشكلة طبعًا أي العبث ده، رنيت عليه عشان افهم أي إللي حصل، وهو راح ولا لا ..
: لقيتك مرنتش قولت اتطمن
• معلش مشغول من الصبح معرفتش اكلمك
: مأنا عارفة أنك مشغول بسبب الشقة ولا مشغول في حاجة تاني؟
• حاجة اي تاني
: سمعت أن رحمة محجوزة في المستشفى
• مين قالك؟
: إللي قالي بس معرفش انت كنت هناك ولا لا
• ليه؟
: حابة أعرف
• ايوة كنت هناك
: مقولتليش أنك رايح ليه
• محبتش اضايقك لأن موضوع زي ده مكنتيش هتقبليه
: مانت عارف أني مكنتش قبل بيه روحت ليه
• روحت عشان كان لازم أروح يا شهد مينفعش مروحش العيلة كلها كانت هناك
: مكنش هيحصل حاجة لو مروحتش
• لا مكنتش هخلص من كلامهم وقصصهم
: إللي يريحك
• شهد أنتي كبيرة وفاهمة في الأصول ومش معقول موضوع زي ده يزعلك
: انا مش زعلانة بس ليا عتاب عندك
• مفيش مشكلة عاتبيني ولو ليكي حق هجيبهولك ولو مني
: كنت المفروض تقولي انك رايح
• عارف وحقك عليا بس أنا روحت عشان أعمل الواجب
: ماشي يا ابو المواجب
• بتعملي أي؟
: مبعملش حاجة قاعدة مع سما
• طب ما تيجي اقولك كلمتين سِر
: اتلم وروح شوف إللي وراك
• مش ورايا غيرك يقمر
: طب أنا ورايا كتير يلا سلام
• وماله مسيرك يا حمام ترجع عشك
قفلت معاه بعد ما اقنعني بكلامه وحسيت أني متطمنة أنه مفيش حاجة، أنا عارفة انه مستحيل يفكر فيها بس أنا ببقى محتاجة اتطمن كل شوية عليه .
خرجت من المستشفىٰ بعد يومين وحقيقي نفسيتي كانت وحشة خالص، مكنتش قادرة اتكلم مع حد ولا اشوف حد خالص، قعدت أكتر من اسبوع في اوضتي مخرجتش منها إلا لضرورة، مكنتش بكلم حد، وأمي كانت بتدخلي بالعافية، مكنش عندي خلق أعمل أي حاجة، بس كنت بقعد طول الوقت في البلكونة عشان اشوف يوسف، كل مرة بشوفه فيها ببتسم وببقىٰ مبسوطة مؤقتًا وبرجع لحالتي الطبيعية، بقيت احس أني اتجننت خلاص ..
: جربتي تكرهيه؟
• معرفتش ومش هعرف
: أحسن طريقة ممكن تشيلي بيها حد من جواكي هي أنك تكرهيه أو تشوفي أنك تستاهلي حد احسن منه
• بس هو مفيش أحسن منه
: طالما شيفاه كده يبقىٰ عمرك ما هتتخطي
• طب أعمل أي؟
: اعملي كل حاجة بتحبيها واشغلي نفسك
• هتنجح الفكرة؟
: جربي لو منفعتش نجرب غيرها ونحاول أي المشكلة
حسيت أني بدأت استوعب الدنيا واستعيد نفسي تاني، لأن الدنيا مش هتقف عشانا ولا إللي راح هيرجع تاني خلاص مبقاش في أمل. ولكن إحنا مجبرين نكمل أننا نتعايش مع أي وضع والعالم مش ملزم أنه يستحمل أي تقصير مننا، مها كنت زعلان ومش طايق نفسك ولا إللي حواليك، بس أنت مجبر تكمل، حقك تزعل ومشاعرك من ضمن الأولويات طبعًا، ولكن متاخدش زعلك حجة أنك متشتغلش، ولا متذاكرش، ولا متخرجش بره اوضتك، ولا تعتزل الناس، ولا تقطع من نحية أي حاجة واي حد، الزعل شيء، وأولوياتك شيء تاني، مهما كان الضغط إللي أنت فيه العالم مش ملزم أنه يستحمل تقصيرك، الناس مش ملزمة تحطلك عذر، العالم يا عزيزي مش هيقف علىٰ زعلك، فأنت متوقفش حياتك علىٰ حاجة، مهما كان سبب زعلك حياتك أهم من أنها تقف علشان خاطر زعلك . انا زعلت والزعل وخد وقته وكفاية، خلاص نشوف حياتنا حتىٰ لو لسه زعلان علىٰ إللي سابني، نكمل حياتنا حتىٰ لو لسه زعلان علىٰ الشغل إللي مكنش مناسب ليا وربنا هيعوضني، نكمل حياتنا حتىٰ لو مأخدناش الحاجة إللي إحنا عايزينها، رب الخير لا يأتي إلا بالخير، واللي راح منك هيجيلك إللي أحسن منه، متحسبهاش عشان حسابات ربنا أحلى وأحسن من ترتيباتنا .
: يا بسبوسة يا بسبوسة البت شهودة عروسة
• بس يا فرح أنا خايفة ومتوترة جدًا
: خايفة ليه أي إللي مخوفك قوليلي
• مش عارفة بس خايفة من إللي هيحصل
: هي أمك حكتلك حاجة
• ايوة حكتلي إللي هيحصل
: لا خافي أنا بقولك خافي
• هي إللي قالتهولي هيحصل بجد!
: الأفعال أسوء من الأقوال يشهود
• يا مراري يا مراري وأنا إللي كنت فكراك محترم يا يوسف اتاريت طلعت مش محترم
: هو أي إللي مش محترم ما تتلمي يمرا أنتي
• يا خوفي تطلع أخته عقربة ولا أمه يا مراري يا مراري
: يجزمة أنا اخته وأمه تبقى أمي
• والله من القلق والتوتر مش مستوعبة أي حاجة
: أمال لو قولتلك علىٰ الكبيرة
• اي الكبيرة
: هاتي ودنك
قربت من ودنها عشان تحكيلي علىٰ الجريمة إللي هتحصل بعد الجواز، أنا إللي بصحى العصر هصحى 7 الصبح واطبخ واروق واعمل كل حاجة، لا لا أنا مش هتجوز روحوني بجد عايز أروح بيتنا ..
• تروحي بيتكم فين أنتي خلاص في الكوافير وهو شوية وجاي ياخدك
: مفيش زرار اكنسل واهرب
• في زرار اشتم واجري
: ولما اشتمك دلوقتي
• وهتعرفي تجري يقمر وأنتي كده؟
: هتفضح؟
• هتبقى تريند وهتتشهري وهتعملي لايفات بقا وبتاع
: أنتي مالك منشكحة كده ليه ده أنا العروسة ومش منشكحة كده
• ما تولعي أنتي أنا مالي بيكي النهاردة فرح اخويا وافرح براحتي
: اه يا عيلة مبتحبش غير نفسها
• طب يلا اخلصي الواد قرب يجي
كنت خلاص قربت أخلص ولبست الفستان وفضلت مستنية يوسف عشان نمشي، مكنتش قاعدة على بعضي كنت متوترة وقلقانة وخايفة جدًا، ولحد ما وصل يوسف وشفت الابتسامة على وشه لما شافني، كان طاير من الفرحة بيا وفضل يتغزل فيا وفي الفستان وسمعت أحلى كلام، ومسك أيدي وحسيت أني خلاص اتطمنت، ايوة اتطمنت لأنه بيعرف كل مرة يطمني لما أكون خايفة وقلقانة، وجوده كفيل كل مرة أنه يطمني فيها، وكأنه بيشيل مسؤلية كل حاجة في الدنيا، حتىٰ قلقي وخوفي شايلهم عني .
: والله هتجيبي جلطة لنفسك أنتي واعية هتعملي أي؟
• ايوة متقلقيش في أي ما هو جه يوم فرحي
: هو يختلف عنك
• مفيش فرق علىٰ فكرة
: لا في فرق وفرق كبير كمان
• ماما ممكن تسيبيني أعمل إللي أنا عايزاه ومش هطول هقعد شوية وهمشي
: اللي يريحك يا رحمة روحي
انا زهقت بجد أي المعاملة دي حاسة أني في سجن من ساعة ما اتطلقت، مبقتش عارفة اخد راحتي نهائي لا في البيت ولا حتى برا البيت، حتىٰ الفرح معترضة اروحه، كنت خلاص مترددة اروح فرح يوسف ولا لا، بس قولت خلاص هروح، لبست الفستان السوارية بتاعي، وحطيت ميك اب هادي وخفيف خالص لأن ملامحي حلوة لوحدها مش محتاجة، مرضتش أروح معاهم وطلبت اوبر يوصلني، ومكملتش خمس دقايق ولقيت نفسي واقفة قدام القاعة، دخلت وأنا نبضات قلبي بدأت تزيد بشكل غير مبرر، وكان العريس والعروسة وصلوا القاعة، دخلت ولقيتهم بيرقصوا مع بعض، كنت واقفة في نص القاعة، بتأمل ضحكة يوسف إللي كنت طول الوقت بحب اشوفها، بتأمل همساته ليها وبتخيل بيقولها أي كأنه بيقولهولي، واقفة مش قادرة اتحرك ولا قادرة أنزل عيني من عليهم، أنا إللي المفروض أكون واقفة هنا، ماسكة أيده وبيرقص معايا وبيشليني، أنا إللي المفروض أبقىٰ مكانها دلوقتي، كل حاجة اتسرقت مني بسبب كلمة سمعتها، اتسرق مني مستقبلي، واتسرقت مني فرحتي، واتسرق مني عمري، وفي الآخر اتسرق مني حبيبي، مبقتش في حاجة باقيالي خلاص بقيت بطولي، بسبب قرار جه في وقت غلط بوظ حياتي كلها ومفضلش فيها حاجة كويسة، اتحركت من مكاني، بس المرة دي سبت المكان كله، سبته وأنا بودع أحلى حلم رسمته، بودع المشهد إللي كنت بشوفه دايمًا ومستنياه، بودع الشخص إللي حبيته، بودع كل حاجة كان نفسي اعيشها، مكنش في حل تاني غير أني امشي واودعهم .
: مش مصدقه بجد شايف فرح جايبة أي؟
• سيبيها هيجي يوم ونرد كل إللي عملته معانا متقلقيش
: ده تنمر واضح وصريح منها
• اشربي بس العصير خلينا نروق
يوم الفرح جابتلنا فرح أختي عصير قصب كـ نوع من انواع الذكريات إللي جمعتني بشهد، أول ما جت فقرة العريس إللي بيشرب العصير للعروسة جابتلنا عصير قصب، كمية ضحك ومسخرة حصلت مفيش منها تاني، بس خلاص مفيش حاجة ممكن تحصل تاني غير إللي حصلت، أخدت الحاجة إللي استحقها، أخدت الضحكة والابتسامة والدلع والجمال كله، أخدت إللي هلاقيها لما احتاجها، أخدت إللي وقفت جمبي من غير ما اطلب منها، أخدت إللي كانت معايا وهي مش ملزمة، أخدت أحلى حاجة في الدنيا، فضلت قاعد وهي قاعدة جمبي وبتامل في ملامحها إللي مش قادرة تفارق عيني ..
: بتبصلي كده ليه
• هو أنا قولتلك قبل كده أني بحبك؟
: ايوة كانت مرة وبالعافية كمان
• طب بحبك وكل شوية هفضل اقولهالك بسبب ومن غير سبب
: أنا خلاص مبقتش محتاجة اسمعها طالما أنت جمبي
• مأنا جمبك وهفضل جمبك سواء احتجتي وجودي أو لا
: تعرف أني كنت مرقباك من زمان؟
• ايوة فرح لما وصتني عليكي حكتلي فرح وصتني عليكي كأنها أمك وخايفة عليكي مني
: فرح هي السبب بعد ربنا أني ابقى معاك
• والاسباب كلها اتسخرت عشان تبقيلي
: خلاص كده كنسل الغلطات كلها
• ليه هما كانوا كام غلطة؟
: كانت نص غلطة
حنين الواد واقع يعيني علىٰ قلبه
تلقاه وحيد صدق ما حد يحِبه .
إنتهت
