رواية غرباء ( لقاء بعد الموت ) كامله وحصريه بقلم اساورالموسوي

لَمْ أَعُدْ أُفَرِّقُ بَيْنَ أَنْفَاسِي وَاعْتِرَافَاتِي، كُلَّمَا حَاوَلْتُ أَنْ أَهْرُبَ مِنْ ذُنُوبِي، وَجَدْتُهَا تَجْلِسُ قِبَالَتِي تَبْتَسِمُ، وَكَأَنَّهَا تَعْرِفُ أَنَّهُ لَا طَرِيقَ لِلْخَلَاصِ مِنْهَا، وَالْغَرَقُ أَكْثَرُ.

فِي هَذِهِ الْأَرْضِ الْمُبْتَلَّةِ بِعَرَقِ الْخَوْفِ، الْأَسْمَاءُ لَا تُهِمُّ، وَالْوُجُوهُ تَتَشَابَهُ جَمِيعُهَا، مَحْفُورَةٌ بِخَطَايَاهَا، وَكُلُّ عَيْنٍ تَحْمِلُ ظِلَّ رُوحٍ أُعْدِمَتْ قَبْلَ أَنْ تَمُوتَ.

الْحُبُّ هُنَا لَيْسَ حَيَاةً، إِنَّهُ قَيْدٌ حَرِيرِيٌّ يَشُدُّ عَلَى عُنُقِكَ حَتَّى تَنْسَى شَكْلَ الْهَوَاءِ.

الظُّلْمُ لَيْسَ سُلْطَةً، إِنَّهُ عِبَادَةٌ طَوْعِيَّةٌ لِلطُّغْيَانِ، وَالسِّحْرُ لَيْسَ طَقْسًا غَرِيبًا، بَلْ وَعْدٌ مُظْلِمٌ يُنَفَّذُ عَلَى جَسَدِكَ قَبْلَ رُوحِكَ.

هُنَا الْأُمُّ قَدْ تَبِيعُ رَحِمَهَا، وَالْأَبُ قَدْ يَزْرَعُ الشَّوْكَ فِي قَلْبِ ابْنِهِ، وَالِابْنُ قَدْ يَذْبَحُ حُبَّهُ بِيَدَيْهِ، ثُمَّ يَدْفِنُهُ فِي صَدْرِهِ لِيَظَلَّ يَنْزِفُ الْعُمْرَ كُلَّهُ.

اللَّيْلُ فِي هَذِهِ الْقَرْيَةِ لَا يَنْتَهِي، وَالشَّمْسُ الَّتِي تَشْرُقُ عَلَيْهَا لَيْسَتْ شَمْسًا، بَلْ نَارٌ أُخْرَى، أَشَدُّ بَرْدًا مِنَ الزَّمْهَرِيرِ، وَأَشَدُّ ظُلْمَةً مِنَ الْقَبْرِ.

إِنَّهَا الْحِكَايَةُ الَّتِي إِنْ بَدَأْتَ لَنْ تَخْرُجَ مِنْهَا إِلَّا وَأَنْتَ تَحْمِلُ شَيْئًا مِنْكَ مَدْفُونًا فِي قَلْبِهَا، وَشَيْئًا مِنْهَا عَالِقًا فِي رُوحِكَ.

كَأَنَّكُمَا وُلِدْتُمَا مِنْ ذَاتِ الْخَطِيئَةِ، وَتَنْتَظِرَانِ مَعًا ذَاتَ الْعِقَابِ........

----

عودةٌ إلى الماضي البعيد بومضةٍ خاطفة..

حيث تُروى الحكايات فلا يُصدَّق أنها حقيقية من فرط غرابتها، بينما يصدّقها الأطفال حرفًا حرفًا.

نذهب إلى ذلك المكان الذي يجلس فيه الصغار ملتفّين حول أجدادهم يصغون إلى القصص بعيونٍ تلمع، وقلوبٍ مفتوحة على الدهشة.

تترقرق الدموع في أجفانهم، لا حزنًا، بل لأنهم يرون الحكاية حيّة أمامهم، كأنها تُبعث من الكلمات وتنهض في الخيال.

ذلك هو أجمل أوقاتهم بعد عشاءٍ دافئ، وبين وجوه الأحبة، حيث ينتظر الأطفال حكايةً جديدة، ولمسة حبٍ من جدٍّ أو جدّة، تحمل معها الطمأنينة قبل النوم.

لكن حكايتنا اليوم لم يروِها الأجداد بألسنتهم، بل تركتها ذنوبهم خلفهم، أثرًا ثقيلًا في قلوب أبنائهم، وفي أرواح لم تجد مهربًا من الإرث القديم.

لم يمنعهم الندم من الاستمرار في الحياة، لكنه كان يزورهم كل ليلة، يخنقهم بصمت ويذكّرهم بما لا يُقال.

هذه ليست حكاية تُروى، بل لمحةٌ من شريط الماضي، إحدى الحكايات التي لم تُحكَ لكنها عاشت.

لم تكن الأرواح هنا بريئة... كانت تحمل اوزارها مثل سلاسل صدئة، تُجر فوق ارض مبتلة بالدموع..

هنا تبدأ الحكاية... حكاية من تعاهدوا مع الموت، فعاد ليجلس بينهم، ويهمس في آذانهم..

"لن اترككم حتى تسددوا كل ما عليكم حتى آخر قطرة من ارواحكم"

-----

( الاسم مستعار للقرية الحقيقية)

الليل غطى ظلامه على قرية "مصاعب" مثل عباية حرمة متربة بوسط مقبرة، الهوا يخنگ وبارد ويجمد حتى الحچي بالحناجر.

بعد صلاة الفجر الناس تجمعت وسط ساحة طينية، وگصب محروگ عالنص، كل واحد لازم شعلة نار، ونور برتقالي يعكس على وجوههم التعبانة.

الهمس صار عالي وثگيل على مسامعهم، كأنه ما يريد يطلع من حناجرهم.

وسط الحلقة هاي على الأرض المبللة بالدم، مشهد مرعب، رجال اممدد منحور من الوريد للوريد، ويمه هايشة منحورة بنفس الطريقة، الرجال رگبته مفتوحة، واضح كتاله انتزع روحه بالگوة.

الدم مختلط ويه الطين، والريحة ما ينبلع طعمها من الجو، خليط الدم ويه الماي بالارض من مطر امس..

الغضب واضح بعيون الرجال، صياحهم عله، جريمة بشعة خصوصًا ابو صالح، صاحب الهايشة، اللي صوته هز الساحة هز..

ابو صالح :- حلاااااالي، هاي بگوع مالتي من يومين مختفية، هاي مو بس قتل هاي قذارة، هاي نگاسة ما تصير حتى من عدو!

واحد من الزلم الواگفة..

:- تفكر بحلالك هاي روح انزهگت!

زلمة ثاني..

:- هذا الشاب المن؟ ياحيف على شبابه وياعار چتاله!!

زلمة ثالث..

:- هذا مو من ديرتنا!

:- اي مشايفة هنا!

:- حرامات هالشاب راحت حياته

:- زين ليش؟ وشلون ؟ ويمته؟

:- واضح من بعد ما وگفت المطره، شوفوا الدم ما رايح

:- ريحة الدم تازه يمكن قبل الصلاة صارت

:- هو ليش...

سكت الزلمة ماكمل كلامه واحد ظل يباوع للثاني باستغراب، واللي يباوعله بقهر، ما طلع الضوا الا كل القرية تجمعت، صارت هوسة وحچي، الشرطة ادخلت..

اكثر اهل القرية ما چانوا منتبهين للتفاصيل، ما يشوفون غير انُ الحلال انذبح والرجال وياه، بس اللي انتبه وجهه تغير، اللي شايفه شي ما ينحچي بصوت عالي..

الأسئلة تردد بينهم..

ــ ليش يذبحه وياه الهايشة؟

ــ منو يگدر يسوي هيچ جريمة؟

ــ هذا مو فعل بني آدم طبيعي هذا فعل وحش!

النار تاكل بيهم مو مشعولة بيدهم، والمشهد رغم بشاعته، ظل يزيد غرابة كل ما ركزت بيّ كأنه چان رسالة مو مجرد جريمة؟!

-----

بعد سنوات...

ركضت برجليه الگصيرة شايلة جنطتي الثگيلة على ظهري، لحگت اخوي عقيل، واصل للشارع، اخيرًا گدرت اوصله.

وياه خواتي، "حروب" "شامية" "زمان" كل وحدة لابسة جنطتها، عافوني لأن تأخرت بلبس حذائي.

كضيت شريط جنطة عقيل باوعتله، ابتسمت وطلعت اسناني الفوگ والجوا اللي تشبه حب الرمان ماناضج، باوعت لجانبي الايمن.

عمي جسام صار بمستوانا بالمشي، كاض كتبه بيده بدون جنطة، لافهن بلاستيكات فلوس، القلم ملفوف بوسطهن.

ظلوا يمشون سريع، گمنا نرگض ويه خطواتهم، خصوص انه حتى حد حزامهم ماوصل.

الطريق مو تبليط حصو وتراب، كل شوي حذائي يدعم بحصوة وتوجعني، فحطت، والجو بارد بس شرجي رطوبة مريخان(ضباب).

عمي جسام يتسابق ويه عقيل اخوي وانه وزمان الطايحات بيها، اركض ويه خطواتهم، خواتي اكبر من عدنا شوي.

عمي جسام :- المطي يمته تطلع من الخامس ماتستحي شكبرك وشگدك

عقيل:- غير يستقر ابن سينا، هو انتَ صف سادس ابتدائي وشطولك نخل جدي السعمران

جسام:- انچب رسبت سنتين بس انتَ هم رسبت سنة

عقيل:- راسب بس سنتين نعله على ابو حظك لو مسويهن 3 سنوات شمنتظر؟

جسام:- منتظرك تنجح وتلحگني

ظلوا يضحكون سويه..

عقيل:- غير جدي راح يبطلك ويخليك تعمر بالبستان وتزرع كرفس ورشاد

جسام:- طزززز هسة عود شراح نصير؟

عقيل:- احچي عن نفسك، اني اريد اصير دكتور

جسام:- ثور قصدك

عقيل:- انچب دختور غصب عن شاربك الاخضر

جسام:- زينته بموس حتى يثخن

عقيل ضحك ضحكة شكبرها..

:- لو تموت مايطلعلك شارب تظل املط

جسام:- انچب اكيد اطلع على سيد علي، لحية ثخينة وهيبة

عقيل:- وكرش مترين گدامك

جسام:- انچب لا تحچي على ابوي مو جدك حيوان!

عقيل:- احتراماتي لجدي وبخت جده السيد، بس انتَ مالك احترام

جسام:- وعلي الفحل اكضك هسة وادوس بمصارينك، اخليك تصيح التوبة

عقيل:- دروح ابو صماخ انتَ راسك بس كبر لا فايدة ولا عادية

جسام:- اكل خ.... لا اوكلك اياه بيدي، انه ابو العريف اذكى واحد بالعائلة

عقيل علت ضحكته..

:- اذكى واحد وراسب سنتين، لو تصير اغبى واحد شگد ترسب؟

ظل يضحك اكثر وحروب تضحك وياه، مشينا وگبل لا نوصل للگاع المبللة چان عقيل بعده يسولف ويضحك ويه عمي جسام، محد منهم ساكت لحظة، حته الطيور اللي بالجرف ما سكتت وياهم.

عقيل:- اذا انتَ فهيم هيچ راح أسألك سؤال

جسام باوعله بطرف عينه..

:- اسأل عبقرينو، فضها علينا

عقيل :- هي حزورة سهلة، خروف ما عنده گرون ولا ذيل ولا يمعمع

جسام:- لا تظل تاكل خ.... منين جايبها هاي الحزورة؟

عقيل ضحك..

:- چا مو انتَ فهيم جاوبها يلا

شامية گمزت..

:- هاااا هاااا عرفتها

عقيل:- بلا شنهي؟

شامية طلعت سنونها بضحكة فخر..

:- خروف

عقيل:- طاح حظه اللي وصلچ للرابع

حروب:- اذا مو خروف شني هو؟

عقيل:- انتِ انچبي، جسام جاوب لا بقندرتي

جسام:- اكل خ..... انه عمك، نعال احترمني

عقيل:- اي عود راجعني بمكتبي الرئيسي، تحترمني احترمك، ماتحترمني ماحترمك

جسام :- طايح حظك مو بيدك حيوان واخلاق سزز،"ظل يفكر" زين اكو خيارات لو بس تخربط؟

عقيل رد بثقة..

:- لا ماكو خيارات ولا موزات، حلها بصماخك چنه رگية بس كبر

جسام خبزه براسه بصگعه قوية..

:- وهرش عالاساس صماخك زغير

عقيل رجعله الخبزه على راسه..

:- ومرض ايدك كربة نخل شكبرها، وغير طالع على عمي ابو صماخ

جسام رگعه براسه مرة ثانية..

:- سرجين الهايشة لا تجاوز

عقيل:- انتَ همين لا تجاوز

واحد هجم عالثاني، تماطلوا بنص الشارع، وهم يتكاتلون ادهربوا على الطحمة، حروب تلطم وشامية مشت عافتنا ماهماها..

لحگتها حروب:- طبكم مرض تمالخوا

زمان ظلت تبچي..

:- راح نتأخر وتضربنا بالعودة ست سميرة

جسام فحطان وهو يملخ بعقيل..

:- حيوان طايح الحظ، اني اعلمك شگيت ياخة القميص، اليوم اشگك واشگ ابوك

عقيل وجهه احمر وفحطان..

:- ابوي اخوك ياتيس، هدنييييي!

جسام يجر شعره..

:- ثور هدني واهدك!

عقيل:- ماهد!

جسام:- چا ماهدك!

صار مدافر ووملاطم، راشديات، چلاليق، ملابسهم ادمرت، شعرهم انترس بماي الطحمة، بسبب الرطوبة العليهن.

زمن فحطت بچي، ظلت تصرخ..

:- كاااااافي عقيييييل! كااااافي!

انه خايفة اموت من العركات جسمي يظل يرجف..

:- عقيل اجه ابوي عالبيسكل

جسام بسرعة گام وگف وخر عن عقيل، يخاف من ابوي، عقيل گام وهو فحطان ويعدل بقميصه وقمصلته وينكتهن.

جسام شاف ابوي..

:- أكبر!

عقيل مات خوف..

:- يابه!

ابوي نزل من البايسكل..

:- شبيكم ليش هيچ اشكالكم؟

عقيل وجسام سوية واحد أشر عالثاني..

:- هو البده

:- هو البده

ابوي انطاهم كل واحد راشدي هز وجهم هز..

:- چلاب دازينكم للمدرسة تتعلمون لو تتعاركون چنكم واوية شوفوا ملابسكم، وصخين، يلا لمدرستكم

كل واحد اخذ كتبه، مشوا ركضوا گدامنا سوية، واحد يدفع الثاني من الچتف.

ابوي دنگ مسح دموع زمان، باسها وكض ايدها، مشاها للبايسكل، اشرلي اجي، حطاني بصندوگ مسواگ شاده عالبايسكل وراه، حط زمان گدام، مشه على كيف ويه عمي جسام وعقيل.

بعدهم يتناقشون بالخروف.

جسام:- شلون خروف وشلون ما يمعمع ولا عنده لا گرون ولا ذيل، خاب دروح!

عقيل ابتسم بخبث..

:- احلها الك، بس تنطيني مصرفك؟

جسام:- خاب دروح، ما نطيك دينار لو تطب بالنهر

بابا مشه بسرعة يوصلنا لا نتأخر لأن طريق مدرستنا بعيد، ويومية نمشيله، نعبر مجموعة نهران ودرب ترابي، متعب بالمطر يصير ككاو بس تعال اغرف.

زمان:- بابا شنو هو الخروف بلا گرون ومايسوي ميع وماعنده ذيل؟

ابوي:- يابه هذا الرجال اللي يطلع اهله بلا ستر وبمظاهر الزينة

ما فهمت شنو يقصد، بس ضحكت اني وهي وبابا ظل يضحك ويانه، مثل العادة، احس نفسي طايرة والهوى ريحته حلوة ترست خشمي ويلعب بخصلات شعري الصغار.

عبرنا حروب وشامية، وصلنا ابوي نزل زمان ونزلني، طلع من جيبه فلوس انطانه كل وحدة 25 دينار طرنا فرحة، ركضنا سوية وحدة كاضة ايد الثانية.

دخلنا انه وزمان من الباب، تلگتنا ست سميرة، دنگت گرصت خدودنا.

ست سميرة:- وين صباح الخير

انه وزمان سوية:- صباح الخير ست

ضحكت وضربت على جنطتي خفيف، رحنه كل وحده لصفها، زمان بالثالث ابتدائي، اني بالثاني ابتدائي.

مدرستنا مابيها سياج ولا باب ساحة كبيرة مفتوحة عالشارع، بالاصل هي تل وملجأ حرب، بسبب قلة عدد اللي بالقرية سوها مدرسة.

حيطانها باهتة قديمة، من داخل كأنها عالم ثاني، الممرات ظلمة شوي، ريحة الطباشير والكتب تنطي احساس غريب، مختلط بريحتها الرطبة.

دخلت الصف، معلمتنا الجديدة وابتسامتها مثل الشمس لمت شعرها من على وجهها وگالت..

:- هلا والله بالتفاحة الصغيرة اليوم شنو الجابچ للمدرسة متأخرة؟ شفتچ توه دخلتي

:- والله بيتنا بعيد ست ونمشي درب طويل

:- وين بيتكم؟

:- يم مگام ال.......

:- يا بعيييد شلون تمشون لهنا؟ انتِ واخوانچ هنا مو؟

:- نعم ست

همستلي وهي تداعب وجهي..

:- اني سعيدة اشوفچ كل يوم تكبرين، انتِ كلش حلوة، حظي حلو كل يوم اشوفچ علويتنا الصغيرة

فرفحت من الفرحة اسناني طلعن كلهن..

:-احبچ ست

:- ياعمري واني احبكم، ماشاء الله عدنا علويات بعد بالصف، انتم بركة الصف، صفكم كلش شطار

ماعرف شتقصد بس كل احنه نحب ست نجوى، هي نجمة المدرسة ماصار هواي من اجت، بس صارت محبوبة الكل، يگولون هي من المدينة، نعتبرها مثل الاميرات اللي بالخيال.

ماتلبس حجاب وحلوة بشكل، لبسها غريب عجيب، بس يگولون عنه كشخة، تلبس كعب عالي، سرحت عليها وهي تكتب بالطباشير على السبورة.

واني اتخيل اكبر واصير مثلها، حلوة والبس كعب، خلص يومنا بين لعب ودراسة، واليوم عدنا 50 دينار اني وزمان، اشترينا من بسطية ام حسين وتونسنا بيهن.

صار وقت الحله، طلعت من الصف، شفت عقيل وجسام، صوتهم عالي ، هم دوم هيچ على جنطة، على قلم، على كرسي، على كلشي يتكاتلون.

طلعنا من المدرسة الشمس نصها غيم ونصها يضرب بوجهي، بس نسمات الهوا باردة وتلعب باطراف شعري.

زمان تمشي گبالي وحروب ويه شامية يتشاقن ويضحكن، وياهن آية صديقتهم.

صوت المعلمين والطلاب تارس المكان، كل واحد يحچي بصوته، والكلمة تضيع بين الحچي والضحك.

التفتت ست نجوى طلعت من باب المدرسة كاضة جنطتها الجلدية السودة، تمشي بخطوات واثقة، ناعمة، كأنو الگاع مفروشة الها بساط احمر، شعرها يتمايل ويه كل خطوة، ريحتها الطيبة دگت بخشومنا.

كل العيون صارت تباوعلها، مو بس الطلاب، حتى المعلمين اللي واگفين عالباب يراقبونها، والولد اللي بصف سادس ابتدائي يهمسون واحد للثاني ويضمون ضحكهم.

باوعت لعقيل غمز لجسام..

:- هاي المعلمة لو تجي لصفنا، انجح باعلى الدرجات واصير الأول عالمدرسة

جسام كفخه على راسه..

:- انچب غير ريحتك سرجين وبعرور، تزوع اول ماطب للصف

عقيل دفعه..

:- متخيل هاي ريحتك حبيبي، لتگول چن دجاج

جسام ضربه بكتبه براسه..

:- انه اعلمك الأدب يافهيم المدرسة

ظلوا يتعاركون مثل كل مرة، واحد يركض ورا الثاني، عقيل يضحك وجسام معصب، ست نجوى انتبهت إلهم ضحكت بس راحت ركبت السيارة الاجت عليها.

انه وزمان ننتظر خواتي شامية وحروب جاي يسولفن ويه آية، همين ننتظر ابوي يوصلنا بالبايسكل، لأن اني وزمان زغار والطريق طويل كلش.

زمان صاحت..

:- شوفووووا منو اجه

باوعنا صوب الشارع، تيجان اخوي جاي بسرعة عالبايسكل مالت ابوي، شعره يتطاير بالهوا، مالابس قمصلة بس تشيرت نص ردان.

حروب استغربت حطت إيدها على خصرها..

:- شعجب تيجان جاي؟ مو عنده مدرسة عصري اليوم؟

اَية صديقتها بصوت ناصي..

:- ولچ حريبة اخوچ صاير يموووووت، آخخ گلبي تيجان صار شكثر ماشايفته

حروب دارت عليها..

:- ثكلي عيب ولچ!

اَية غطت ضحكتها بيدها..

:- نتشاقة شبيچ

تيجان نزل من البايسكل صوته خشن..

:- شبيهم هذول يتمالخون

حروب:- ماتدري بيهم مايتجمعون بنفس المكان

تيجان صاح..

:- چيلة ونار يلا للبيت

عقيل وجسام التفتوا واجو من بعيد علينا واحد يدفع بالثاني، تيجان اشرلنا نجي نصعد وياه، آية ظلت تسوي حركات ويه حروب وتسولف بصوت عالي، حروب دفعتها حتى تروح.

حروب:- شني ما مداوم اليوم؟

تيجان:- ماعليچ، يلا خفوا رجليكم

عقيل:- تيجان ما مداوم؟

تيجان:- انتوا شكو بيش الكيلو؟ ماداومت؟ داومت؟

جسام:- شيخلصك من أكبر هسة يشگك نصين

تيجان:- انلصم انتَ محد طلب رأيك

جسام:- انچب احترمني انه عمك من عمت عيونك

تيجان:- عمه بعيونك

عافهم وساق بينا البايسكل، عصافير بطني بدت تصيح جوعانة، تذكرت لفة البيض اللي سوتها اللي امي طلعتها من جنتطي.

بديت آكلها بايته بس طيبة، وصلنا البيت ريحة الباچة طالعة بره البيت، امس كله ريحة شعواط شعر الراس ورجلين الخروف، ينظفونه امي وخالة عتبار.

دخلنا بحماس ابوي جاي يقرا قرآن بالليوان، صوت قراءته تجنن، سلمنا لأن معلمنا من نطب للبيت او اي مكان لازم نسلم.

رحت للمطبخ گبل:- يمه يمه شنو غدانه؟

امي جاي تصب:- باچه

:- لاااا ماحبها

خالة عتبار طبت بيدها مشخالة التمن وبيها خضره وكل راس فجل بكبر راسي، حطتها بالگاع.

خالة عتبار:- ماتردين باچه روحي جيبيلچ روبه من بيبتچ

:- خوش خل ابدل"صحت" زمان تردين روبة وياي

زمان من الصالة:- لا آكل الباچه

طلعت من المطبخ بسرعة رحت توجهت لكنتورنا الابيض، باب كنتوري طايح، وملابس تنعد عالاصابع، نزعت ملابس المدرسة، لبست بجامة وفانيلة، طلعت البجامه مزروفة.

ماهتميت، طلعت ركض اخذت طاسة فافون، عبرت ابوي، التفت وصاح بنعومة.

أكبر:- ترفة بويه على كيفچ لا اطيحين

:- ماطيح يابه، رايحة بيت جدي

:- صيحي لعمچ جسام يتغده يمنه اذا واصل

:- خوش

رحت اركض والجو غيم شوي، وصلت بيت جدي هم مسافة ركضة عشر خطوات عن بيتنا، جاي يتغدون، رحت لبيبي.

:- السلام عليكم

كلهم:- وعليكم السلام

جدي جاي ياكل هو رجال ضرير..

:- هاي ياهو؟ ترفة؟ تعاي بويه يم يدچ تغدي

:- فاصوليا ماحبها جدو، اجيت اريد روبه بيبي

مديتلها الطاسة مالتي، گامت بيبي هي وشيلتها البريسم الماتنزعها ابد، ودشداشتها الكودري الزرگة طوخ منگشة بأخضر، حتى بالشتاء تلبسها.

شطفت الطاسة لأن بيها وسواس نظافة، وراحت للغرفة مالتها هي وجدو.

على صندوگ حديد چبير حاطة جدر فافون، فتحت القبق وغرفتلي روبة، اخذته ورحت رجعت لبيتنا صابين الغده.

اخواني الولد سبعة تيجان اخوي الچبير، رشاش اللي بعده، يوسف، علي الزكي، خنجر، شرار ، عقيل اصغر اخوتي وانه آخر العنگود، حنيوة كنيوة يسميني ابوي.

ابوي متزوج نسوان ثنين، خالة عتبار الچبيرة وهي ام الولد كلهم وام حروب وشامية وزمان جابتله سبعة ولد و3 بنات.

بس انه من طوعة اللي هي امي، عدها مشكلة بالحبالة وماتحبل، ماصار عدها بس انه.

عقيل دخل توه وصل، دخلت وراه حروب وشامية ،ابوي جاي يجادل تيجان على غيابه من المدرسة اليوم.

مايحب احد يطلع من المدرسة، يريدهم يصيرون فد شي، لذلك مايرضه احد يغيب، بس شرار بطل من العام، شبع كتل وماهماه ، چان هسة بالاول متوسط.

وابوي العنده والماعنده يصرفه عليهم، حتى يصيرون فد شي، حاطلهم سيارة كل شهر وكاسر ظهره من الشغل، حتى مانشوفه كله علمودنا.

شرار دخل يتثاوب..

:- يمه شنو الغده؟

خالة عتبار..

:- ماشميت ريحتها

شرار تأفف..

:- هم باچه يمه راح اصير هايشة من كثر ما أكلنا رجليهم وصماخاتهم

ابوي باوعله بعقدة حاجب..

:- هو انتَ هايشة أكل شرب ونوم وبوجهك للمرافق شعندك حضرة المدير، حتى المدير يگعد من الصبح وعنده شغل وشي مهم يسوي بحياته، بس انتَ گاضيها نوم وأكل چنك چلب بلا شغل وعمل، فوگها ماعاجبك

شرار:- ماريد شبعت أكلها بحدك

ابوي گام بعصبية..

:- تعااااال لا انعل خير خيرك، اگعد اطوحل ماعندي واحد يزعل على أكل

شرار:- ماريد اكل گتلك اكله بحدك

تيجان:- ولك حيوان هيچ ترد على ابوي!

ابوي صعدت عنده..

:- شرار ارجع اگعد وأكل لا وكفيل زينب اكسرك تكسر

شرار بعناد وتحدي..

:- تعال وذرني بس ما آكل

ابوي يريد الولحة عليه، كضاه وصلخ وجهه بالطراگ، ماكتفه بهيچ جراه من فانيلته حتى شگاها ، انكسر باب گلبي من ظل يبچي، وابوي مارحمه.

ظل يضرب بي بالنعال، ظليت ارجف وابچي على بچيته تكسر الخاطر، يصيح يماااا ماسويت شي، صار صايح امي وخالة عتبار يردون يفكونه.

ظليت اصرخ بچي على بچيته، اني وزمان، تيجان يحاول يفك ابوي منه بس ماگدر، شرار يصرخ ويغلط على ابوي، ويبچي.

وابوي يزيد بضربه، عاف النعال، طلع بره جاب صوندة، شرار ظل يركض ومفرفح، فرفحت وياه بچي، احتمه بأمه، حتى امي صارتله درع.

امي تصيح وتتوسله..

:- أكبر عليك الكفل زينب كافي

ابوي بغضب..

:- ماتسمعونه يفشر الساقط

خالة عتبار بتوسل..

:- آخر مرة والعباس مايعيدها، مو وليدي ماتعيدها؟

شرار يبچي ويصيح..

:- الله ياخذك ويخلصنا من ظلمك، ظااااالم! ظاااالم! انتَ...

سدت حلگه خالة عتبار وامي تسويله اششش ولك اسكت..

طاحت الصونده من ايد ابوي وانكسرت نبرته..

:- يابه يجي يوم تندم على هذا كلامك من اموت

شرار بنفس صياحه وبچيته وخر ايده امه..

:- بيوم موتك اتحنى، الله ياخذك...

رجعت سدت حلگه، ابوي نزل راسه بقهر، مسح على وجهه، ظل يستغفر، عافنه وراح للغرفة سد الباب على روحه، انه بعدني ابچي ومفرفحة ، اموت رعب من المشاكل.

البنات وجهن اصفر، تيجان يتأفف، عقيل وجسام خايفين، زمان مثل حالتي تبچي.

كلما ابوي يحاسب الولد ويضربهم هيچ يصير بينا، اكثر اثنين شابعين كتل علي الزكي وشرار، لأن عنادهم ماينوصف، هذاك همين يريد يبطل من المدرسة.

ابوي عنده مبدأ الولد مايتدلل وماينحضن بحنان وما ينطي وجه زايد يطغى عليك او شخصيته تخرب، رغم ابوي قاري كتب ومتدين ويعلمنا هواي اشياء، بس من يغضب يفقد.

وهم الله يسلمهم عناد والا يمشون شخصياتهم، وابوي مايحب اللي يطغى ويخالف امره، مثل شخصية جدي كلش.

الغدا محد لمسه، حتى ابوي ماطلع من الغرفة، راحت يمه امي، وبعده شرار يبچي.

خالة عتبار..

:- ولك ابوك شلون تگله هالحچي! تفشر وتدعي عليه، خلافة تموتون جوع

شرار ببچي..

:- ماسويت شي يمااا ماسويت ليش يضربني؟!

تيجان:- من لسانك طايح الحظ

شرار:- انتَ اسكت مالك شغل

تيجان:- هسة اكمل البداه ابوي واكسر راسك

شرار:- تعال يلا

تيجان:- شرار سد حلگك مستخطيك ماريد اكسر ظلوعك، احترم لا بقندرتي اشگ حلگك

شرار صيح..

:- ماتعوفوني بحدي

عقيل:- ماتسكت كافيك اهانة

جسام:- هسة يخبزك تيجان ايده چاكوك

شرار:- انچبوا انتم الثنين

گام من الگاع وطلع من البيت وامه تصيحله وتيجان يصيح يگله وين مولي، ماهماه طلع ورگع باب الحوش هو بحده مفلش.

گعدنا تغدينا حاولنا ننسه الصار، بس كل مشكلة تنبت مثل الشريان بالگلب والعقل ماينسن، ابوي ماطلع تغده وامي ما اكلت، حتى تيجان طلع وره شرار.

شلنا الغدا حروب غسلت الماعين وكفت المطبخ، احنه درستنا امي انه وزمان وشامية تكتب، خالة عتبار راحت نامت.

شرار بالديوانية، تيجان يمه يدرس، لانه سادس اعدادي، مشه الوقت بسرعة، نهار الشتاء يطير بسرعة.

قريب المغرب صار غيوم الجو وراح تمطر، امي وخالة عتبار يحاولن يخبزن بسرعة قبل لا تمطر.

ابوي بيت جدي، ولهسة ما أكل لگمة من مساع، شكله مقهور، دوم هيچ يضربهم ويندم.

التنور الطين شاعل وامي خلصت تشنگ العجين، خالة عتبار بسعفة تمسح التنور بعد ماطاحت الچيمة.

اجت امي بيدها صينية الشنگ، حروب اجت وياهم وهي جربت اول خبزة، تريد تتعلم تخبز، انه وزمان نلعب بالطين.

نسوي جدورة واماعين، سوينه چرباية، هزيتلها راسي.

:- زمان نروح بيت جدي يم عربانة الحديد نلعب بيت وبيوت

زمان:- امشي ابوي هناك يم جدي

:- يمه راح نروح نلعب بيت جدي

امي:- لا ترحن يم النهران

هزينا راسنا وركضنا سوية، ريحة الحطب والخبز تارسة الهوا، طلعنا من البيت ورحنا بيت جدي.

تيجان واگف ويه صديقه منتظر، هم مو من الريف، اجو من المدينة وسمعنا راح يشيلون علمود دراسة ابنهم، مبينين ناس مثقفين، يلمعون لمع ومرتبين.

جدي گاعد بالباب وياه ابوي، وعمو عباس اخو جدي، وثنين من عمامي، سامح ومجتبى، جاي يحچون عن عمو محسن ومصايبه.

اكو عربانة حصان حديد يم بيت جدي متچاية على الحايط بالمگلوب، فأحنه نعتبرها بيتنا باللعب، رحنه قريب من النهر نجر طحمة حتى نخليها سگف.

انه وياها نجرجر الطحمة وعمامي يضحكون علينا، مانگدر نحطها على العربانة، عمو سامح گام حطاهن، طرنا فرح.

دخلنا جواها ونلعب انه وياها، هي عالاساس اسمها سميرة على مديرتنا وانه نجوى، بعد ماتعاركنا على اسم ست نجوى.

تمثل هي ام اربعة ولد واني خمسة، وحامل، بس حطيت وصل ابطني، عمي صاح.

عمي سامح:- ولچ بت الحلو حبلة! مستعجلة عالعرس والحبالة والجيابة

طلعت اسناني بخجل..

:- عمو نلعب مو صدگ

زمان:- عموو لعب لعب مو صدگ

سامح:- ما مكفيچ خمسة عندچ طيحي هذا كافي، طول صبع رجلي ماتگدرين عالسادس

ضحكت وطلعت الوصلة من بطني..

:- احب الجهال عمو، اريد اكبر حتى اجيب هلگد

رفعتله ايديه واصابعي عشرتهن.

عمو مجتبى:- عشرة تريد تجيب بت اكبر، تطينين عيشة رجلچ منين يجيب يوكلهم

جدي:- تريد تكثر نسل السادة بنيتي

عمو مجتبى يغمزلي..

:- منو گال تزوج سيد

جدي:- بناتي مايتزوجن غير بنات عمامهم ماعدنا غريب يطب بيننا

ابوي:- المهم اخلاقه ما انطي بناتي لواحد تعبان حتى لو ابن عمها

عمو مجتبى:- حچايتك عدلة ابو تيجان

عمو عباس اخو جدو:- چا ماتنطي عمك، ترفة من زمان محجوزة لواحد من احفادي

ابوي:- احترامي الك عمي، ما اقبل بناتي تنحجز كلمن يكبر ويقرر، اذا حفيدك مصلي صايم، ياخذها حتى بدون مهر، اذا سرسري وساقط ماله اي نصيب يمي

كلمهم ايدوا حچيه، ظلو يتناقشون بينهم بكلام مانفهمه احنه وزمان، اصلًا مو يمهم ملتهين بلعبنا.

اجن بنات عمامي يلعبن ويانه، اخر شي صبتها مطرة قوية، صديق تيجان راح بسرعة وابوي اخذنا للبيت.

الجو منعش برودة على رطوبة حتى ريحة الطين تفوح من حيطان البيت، كهرباء ماكو ظلمة وبس الفوانيس واللالات مشتعلة والصوبة.

بيتنا مو كبير بس بي ريحة طيبة وحنية اخوان مو غريبة، بي ريحة اب حريص على اولاده ومدلل بناته، وليل نهار يتغزل جمالهن.

بيتنا مبني من الطين، بيت بسيط رغم كبر عائلتنا، زوجات ثنين لكل وحدة غرفة، خالة عتبار بناتها ينامون يمها حتى لو ابوي يمها، وانه انام يم امي.

الصالة مگطوعة نصين جزء بي الحمام وكنتور لملابسنا والجزء الآخ نگعد بيّ للاكل للگعدات العائلية، الاولاد ينامون بالدوانية وهي بره بابها عالحوش، وبالشتاء الولد ينامون نصهم بالصالة.

المطبخ ماننساه، حوش فارع الكبر وتنور طين بوحدة من زواياه، حديقة بسيطة زارعيها شوي حنة ونخلات زغيرة وحضيرة زغيرة للدجاج والبطات.

الدنيا بره تمطر مطر ثگيل، كأنُ السماء اليوم قررت تبچي، والبرد يدخل للبيت من جوى الباب.

گاعدين كلنا بالصالة، على ضوى اللالات تيجان يدرس، وكل شوي يساعد واحد من اخواني بالدراسة.

الكهرباء بعد ما رجعت، والفانوس يضوي بنوره الخفيف على وجوهنا، بي ريحة خفيفة من النفط، ابوي منتچي على الحايط، يباوع على الولد يدرسون، ماعدى شرار.

الصوبة قديمة وشبه مهترية بس تشتغل وادفي البيت، تطلع صوت من النار خفيفة.

حروب عافت كتابها..

:- يابه، احچيلنا سالفة، من سواليفك مالت قبل، نريد شي يخوف شوي

ضحك ابوي ضحكة صغيرة تعبانه عيونه نصها ظل..

:- يخوف؟! ماعندي سوالف تخوف، عندي سوالف تبچي

شامية ضحكت..

:- خوف لا، تبچي احسن، نريد نسمع شي يوجع الگلب شوي

تنهد ابوي وگال وهو يمد ايده صوب الفانوس يعدل نوره بصوت هادئ..

ابوي :- كان يا مكان رجال من سنين طويلة، غايب محد يعرف وين راح لا مات ولا عاش، ولا انوجدله قبر كل يوم اهل المدينة ينتظرونه، عيونهم على الطريق، كل ما يمر ظل يگولون يمكن هو، وكل ما تمر نسمة باردة يحسون بروحه عدهم

سكت شوي، وصوت المطر زاد، يضرب على الطابوك والحيطان، ظليت اباوعله، عيونه راحت بعيد، كأنه يشوف الشي اللي يحچي عنه.

كلهم سكتوا يستمعون اله كمل وصوته ناصي كأنما يبوح بسر خطير..

ابوي :- هذا الرجال ما نسه الناس، بس الناس نسوه، راح بس بعده يراقبهم، ينتظرهم يرجعون مثل ما چانوا، گلبهم نضيف، نيتهم طيبة، اذا يوم من الأيام تغيروا، راح يرجع ويرجع وياه النور

زمان ببراءة طفولية..

:- بابا ورجع لو بعده؟

ابوي باوعلها وعينه بيها حزن وبصوته غصة..

:- بعده بس بيوم راح يرجع، والأرض تضحك، والظلم ينمحي، ويحولها مروج خضراء

الكل ساكتين، بس صوت المطر ظل يسولف، چنت اشوف انعكاس نار الصوبة بعيون ابوي المدمعة، وانگلبت الدنيا بداخلي ظل بس وجع الكلام.

امي وهي تشمر حسرات..

:- يا ريت كل الغايبين يرجعون، حتى اللي غابوا من الدنيا، حتى الحنان اللي نسى طريقه يرجع

حروب باوعت على ابوي بفضول، عيونها تلمع بنور الفانوس..

:- منو هذا الرجال يابه؟ شنو اسمه؟ ليش غاب؟

ابتسم ابوي ابتسامة باهتة، صوته ظل هادي ومليان هيبة..

:- اسمعي حبيبتي، اسمعوا كلكم راح احچيلكم عنه، بس لازم تسمعون من گلوبكم مو بذانكم

سكت شوي صوت نسمات المطر تمشي بين كلماته وكمل حديثه..

:- هذا الرجال، انولد ببيت طاهر، أبوه إمام عادل، وأمه امرأة عظيمة، اسمها نرجس يوم انولد، ما حسوا بيه الناس، لأن رب العالمين اخفاه عن العيون، انولد حتى يكون أمل الناس من الدنيا تصير ظلمة، من الظلم يعمي العيون والقلوب، ومن البشر ينسون الله

انه اباوع عليه وما اتنفس بصوت حتى بس اسمع بقية الكلام، صوته صار ناعم كأنه دعاء..

ابوي :- الناس شافوا آباءه واحد ورا الثاني ينقتلون، مسمومين، مسجونين، بالسيوف، لأنهم چانوا يريدون ينشرون عدل الله، مو عدل الملوك، من استشهد ابوه، اختفى وغاب حتى لا تنمدله ايد ظالمة

سكت شوي واخذ نفس عميق، كمل بنبرة كلها حزن وإيمان..

:- من ذاك اليوم، والدنيا تنتظره يسموه، صاحب الزمان الحجة بن الحسن، الإمام الغايب ما مات، الله حفظه حتى يرجع، بيوم تمتلي الأرض ظلم، ويرجع هو يمليها عدل ونور ورحمة

حروب:- بويه يعني راح يرجع ؟

أبوي:- ايي ان شاء الله يرجع، ان وعد الله حق، بس من تصير الگلوب نقية، من الناس تصير طيبة ويحب واحدهم الثاني، ما تظلم، من نصلح انفسنا، يصير الطريق ممهد إله، ما يجي الا والدنيا تعبانه وتريد تتطهر

زمان:- بوية واذا ما صارت الناس طيبة بعد؟

ابوي نزل نظره بحزن..

:- يبقى غايب يبقى ينتظر مثل ما ننتظر احنه، ينتظر من يندعيله، من ينتظره بلهفة ومن صدگ، مو علمود ينقذنا، ننتظره لشوقنا اله حتى ينسعد قلبه

لازم مانزعل إمامنا ابدًا، ما نأذي گلبه بمعاصينا، ننتظره بلا سبب، نحاول نصلح نفسها گد مانگدر، نحارب النفس ونجاهدها

دنگ راسه، حط ايده على وجهه، كأنه حزن ويبچي، وشوي شوي ظلت تهتز چتافاته، كلنا فزينا من مكاننا، رحناله.

حروب نخبصت ودموعها لمعت..

:- بويه ليش تبچي؟

زمان دمعت..

:- بابا لا تبچي، والله مانزعلك بعد

العبرة خنگتني..

:- باااااباااااا

ظلينه نبچي وياه، احنه البنات وحده تمسح دموعه، والثانية تشبگه، الثالثة تحب ايده، والرابعة تبوس راسه.

حضننا احنه الاربعة، بعده يبچي وبحرگة، الولد ظلوا مصفنين ساكتين، احس گلبه يوجعه بسبب شرار، اليوم دعا عليه.

سكتنا كلنا، شرارة نار الصوبة والفانوس تتحرك بوجه ابوي ودموعه على خده يلمعن..

يوسف تأثر..

:- يابه كلنا فداك لا تنزل دموعك غالية

علي الزكي..

:- اسم الله يحفظك يابه ليش البچي؟

ابوي ودموعه ترس وجهه..

:- يابه انه وعيوني فدوة اله، ابچي على حزنه، ياترا شنو شعوره وهو ينتظر احد يدعيله؟ وهو ينتظر فرجه؟ شلون صابر؟ شلون شاف زينب تنسبي؟! شلون شاف گطع النحر؟! شلون شاف الرضيع وسهمه؟! شلون تحمل گطع الچفوف والماي ماوصل المخيم؟! شحال گلبه وهو يسمع نداء جده الحسين وحيد فريد؟ الا من ناصر ينصرني؟!

صارت الصالة هدوء، گلبي انعصر بدموع ابويه، القصة مو بعيدة، كأنُ الغايب بينا، يسمعنا من بعيد، گلت بيني وبين نفسي..

"يمكن يرجع بيوم المطر"

حروب ما سكتت گاعدة بصفه ظلت تميل راسها بفضول..

:- زين يابه، شلون غاب؟ يعني من اول ما انولد اختفى؟ وشلون عرفوا الناس هو غايب؟

ابوي مسح دموعه..

:- لا بنيتي، هو ما غاب من اول يوم ولادته، ما دروا بيّ إلا ناس معدودين، ابوه الإمام الحسن العسكري عليه السلام خاف عليه من الظالمين، لأن كل إمام قبلهم چانوا يراقبوه ويقتلوه، چانوا يعرفون إن الإمام الثاني عشر راح يغير وجه الأرض، فكانوا يدورون عليه حتى قبل ما ينولد

لأن رسولنا الكريم گال لامته هناك رجل من ذريته إمامًا من ولد الحسين عليه السلام، يملأ الأرض عدلاً وهذا الخبر انتقل جيل بعد جيل، فصار الخلفاء والسلطات بوقتها يعرفون أنُ هناك مولود راح يظهر بآخر الزمان ويقضي على حكمهم الظالم، ولهذا چانوا يراقبون نسل الأئمة بشدة، خصوص الإمام العسكري ابو الإمام المهدي عليهم السلام

من اجت ساعة أبوه، دعا ناس قليلين من خاصته، وگاللهم هذا ابني، إمامكم بعدي، بس ما راح تشوفوه بعدي، الله راح يغيب وجهه عنكم، بس هو حي، يعيش بينكم، يشوفكم، بس انتم ما تشوفوه

كلمات "يشوفكم بس ما تشوفوه" ظلت ترن بأذني، كأنه حچه عن حلم بعيد..

ابوي:- وبعد وفاة ابوه الله ستره عن الناس، صاروا يسموه "صاحب الغيبة" اول شي ما غاب نهائيًا چانت عنده غيبة يسموها الغيبة الصغرى، بيها چان يبعث رسائل للناس عن طريق اربعة رجال امناء يسموهم السفراء، كلهم يشوفوه ويودون رسائله للناس

حروب:- شلون يعرفونه ومايكذب؟

ابوي :- لأن كلماته نفس كلمات أبوه، ونوره نفس النور، الناس چانوا يحسون انه هذا مو كلام بشر عادي، بل كلام معصوم چان يرد على الأسئلة، يجاوب على الحايرين، ويواسي المظلومين، بس من بعيد

حروب بعدها ما اكتفت..

:- وبعدين؟

رفع ابوي نظره للسگف، كأنه يشوف زمن بعيد من فوگ الغيم..

:- بعد سبعين سنة انتهت الغيبة الصغرى، وقال آخر سفير للناس من اليوم انتهى التواصل، وبدأت الغيبة الكبرى، يعني بعدها ماكو احد يشوفه ولا يوصله، بس الله وحده يعرف مكانه

أبوي كمل وهو يباوع للنار بالصوبة..

:- من ذاك اليوم، صارت كل الأجيال تنتظره يتناقلون القصة، أب عن جد، كتاب عن كتاب، بعضهم يشوفه بالمنام، بعضهم بالحقيقة، بس ما يعرفوه إلا بعدين، هو يمر بين الناس مثل الغريب، يشوف الفقير والمريض والمظلوم، بس ما يگدر يگول منو هو، لأن بعده ما اجه وقت الظهور

سكت شوي وتنهد صوته ناعم..

:- الله مأخره حتى يملأ الأرض عدل بعد ما تفيض ظلم، حتى تصير القلوب نقية، والناس تعرف معنى الانتظار

سكت وكلنا نستمع للمطر صار أثگل، يضرب قوي على سگفنا البليت، خيرات الله وبركاته، مادري ليش گلبي وجعني، حزنت على الإمام وبچي ابوي.

ماعرف ليش بس أحس إنُ كل بيت بهالقرية، وكل فانوس، وكل طفل نايم، ينتظر هالغايب حتى يرجع ويطبب جراح العالم.

عقيل :- يابه احچيلنا قصته شلون اجه للدنيا ومنو سفراءه؟

ابوي ابتسم..

:- ولادة الإمام المهدي عليه السلام كما وردت في الروايات الشيعية، ورد في كتب الشيعة مثل كمال الدين وتمام النعمة للشيخ الصدوق، والغيبة للطوسي، والإرشاد للمفيد، أن الإمام المهدي عليه السلام وُلد في ليلة الجمعة، الخامس عشر من شعبان سنة 255 هـ في مدينة سامراء.

كانت أمه تُسمى نرجس بنت يشوع بن قيصر الروم، وهي زوجة الإمام الحسن العسكري عليه السلام.

وقد أخفى الإمام العسكري حملها بأمر الله تعالى، فلم يظهر عليها أثر الحمل، حتى أن القابلة التي حضرت الولادة قالت إنها لم تر حاملًا مثلها قط، لأن بطنها لم يكن فيه أثر، ثم فجأة جاءها المخاض في نفس الليلة.

وفي بعض الروايات، ذُكر أن الحمل كان قصيرًا جدًا، ووقع في ليلة واحدة، وأن الولادة كانت خفيفة بلا ألم، وذلك من معجزات الله لحفظ الإمام من بطش العباسيين الذين كانوا يراقبون بيت الإمام العسكري ويبحثون عن هذا المولود المنتظر.

وعند الولادة، خرج الإمام عليه السلام ساجدًا لله، رافعًا اصبعه إلى السماء، قائلًا..

"أشهد أن لا إله إلا الله، وأشهد أن محمدًا رسول الله"

ثم غاب أمره بعد وفاة أبيه الإمام الحسن العسكري عليه السلام سنة 260 هـ وبدأت الغيبة الصغرى حيث كان يتصل بشيعته عبر سفرائه الأربعة.

سفراء الإمام المهدي الأربعة هم الوسطاء الذين تواصل من خلالهم الإمام المهدي عليه السلام مع شيعته أثناء الغيبة الصغرى"من سنة 260 هـ إلى 329 هـ تقريبًا"

وردت أسماؤهم في جميع كتب التاريخ الشيعي الموثوقة مثل الغيبة للطوسي وكمال الدين للصدوق.

وهم بالترتيب التالي..

1- عثمان بن سعيد العمري (السمّان)

كان من أصحاب الإمام الهادي والإمام العسكري عليهما السلام.

لُقب بـ السمّان لأنه كان يتاجر بالسمن (الدهون) وكان يضع الأموال والرسائل التي تُرسل إلى الإمام في أواني السمن كي لا تُكتشف، وهو أول سفير بعد وفاة الإمام الحسن العسكري.

2- محمد بن عثمان بن سعيد العمري

ابن السفير الأول، وأوصى به والده بأمر الإمام المهدي ليكون السفير بعده، كان معروفًا بالورع والصدق.

استمر سفيرًا لمدة طويلة، وهو الذي نظّم العلاقة بين الشيعة والإمام بشكل دقيق.

3- الحسين بن روح النوبختي

كان من كبار علماء الشيعة في بغداد ومن عائلة النوبختيين المعروفة.

كان حليمًا وسياسيًا حكيمًا، استطاع إدارة أمور الشيعة رغم التضييق العباسي، خلال فترته اشتدّ البحث عن الإمام المهدي، فتعرض للسجن لفترة.

4- علي بن محمد السمري

هو آخر السفراء الأربعة، استمر في السفارة حتى سنة 329 هـ قبل وفاته بستة أيام، وصلته رسالة من الإمام المهدي عليه السلام قال له فيها..

"يا علي بن محمد السمري، أعظم الله أجر إخوانك فيك، فإنك ميت ما بينك وبين ستة أيام، فلا توصِ إلى أحد من بعدك، فقد وقعت الغيبة التامة"

تيجان حط ايده على راس..

:- عجل الله تعالى فرجه الشريف

كل اخواني وابوي وامي وخالتي عتبار حطوا ايدهم على راسهم..

:- اللهم عجل لوليك الفرج

ابوي:- لازم ندعيله كل يوم، ونتجنب المعاصي گد مانگدر حتى مانحزن گلبه، معاصينا وذنوبنا تأخر غيبته

تيجان:- نقرا دعاء الفرج كل يوم الصبح، حتى لو متنا نكون وياه ونلبي نداءه

ابوي:- عفية وليدي، وصية الكم اولادي، لقنوا انفسكم كل يوم لأن اللسان بعد الموت ممكن ماينطق

حروب:- شلون يابه؟

ابوي:- تگولون كل يوم أُشهد الله وملائكته وأنبياءه ورسله والصديقين والشهداء والصالحين، وأُشهد الملك الموكل على كتفي الأيمن، وأُشهد الملك الموكل على كتفي الأيسر أني أشهد أن لا إله إلا الله، محمد رسول الله، علي ولي الله، فاطمة الزهراء سيدتي، الحسن، الحسين، السجاد، الباقر، الصادق، الكاظم، الرضا، الجواد، الهادي، العسكري، الخلف الهادي أئمتي

حروب:- شكرًا يابه لأنك تعلمنا كل هاي الدروس

ابوي:- واجبي هذا يابه، بس اريدكم تهتمون بدراستكم، الإمام يريد جيل قوي متسلح بالإيمان والعلم

هزت راسها حروب:- اوعدك اصير اللي اتمنيته الي

ابوي:- لا يابه اللي تتمنينه انتِ

حروب:- ان شاء الله

ابوي:- بحق محمد وآل محمد يوفقچ ويوفق كل اخوانچ

كلهم صلوا على محمد، اللهم صلِ على محمد وآل محمد.

-----------

بعد العشه گاعدة يم ابوي يدرس شامية وشوي يلتفت لزمان، امي تفرش لاخواني، وخالة طوعة تدرس ترفة، انه ادرس بحدي، بس خلصت رفعت راسي لأبوي مترددة.

:- يابه اريد اروح ابات يم جدي وبيبي

رفع راسه باوعلي..

:- هسه دنيا ليل ومطر، روحي باچر الصبح

:- لا يابه، هسه اريد اروح والله مشتاقة ابات يمهم

سكت شوي بيده السبحه، لفها بصبعه..

:- خلي تيجان يوصلچ

هزيت راسي بسرعة..

:- مايحتاج يابه، غير هو بيت جدي هوينه عشر خطوات واوصل

ظل ساكت، ضجت عرفت ماقبل گمت اشيل بكتبي واروح افرش فراشنا، سمعته گال بنبرة حنونة..

:- روحي بس ديري بالچ الدرب طين يزلگ

ابتسمت بفرحة..

:- اي يابه لا تخاف امشي بحذر

رحت لامي گتلها ماقبلت اروح بهالليل بس ابوي گلها خلي تروح، بسرعة لبست سترة حياكة بسيطة ولبست نعالي وطلعت، ابوي وگفلي ظل يباوعلي بالباب كأنه يريد يگلي شي بس ما گاله.

الدنيا سكون وهدوء بس صوت المطر الخفيف، گمت امشي بحذر، وجهي صار عليه قطرات، حسيت ببرودتها تدخل لخدي.

التفتت ابوي بعده واگف يراقبني، يخاف علينا من نسمة هوا، ردت اطيح، ماعرف شلون شافني بالظلمة.

ابوي:- الله الله بوية انتبهي

:- يابه برد ادخل وهاي وصلت انه

ابوي:- انتظرچ ادخلين بيت جدچ

الطريق بين بيتنا وبيت جدي گصير، بس بهالليلة صار طويل، الماي مغطي الدرب والطين، وكل خطوة تطلع صوت وراي.

الضوا يطلع من بيوت عمامي، ملمع الشارع،الماي صاير ذهبي بالظلمة من اضوية الصفرا.

الكهرباء ما اجت بس بيت جدي يشعلون نار وحتى بيت عمامي، يمكن توهم يشعلون النار.

قبل لا اوصل رجلي زلگت يم بيت خال امي بيتهم بصف بيت جدي كلش، طحت على ظهري، حسيت الطين كله لزگ بملابسي وحجابي، دخت شوي گمت كملت بصعوبة.

ابوي صاح:- حروبه يابه طحتي؟

صحت :- لا بوية ماكو شي لا تخاف روح ادخل باردة انه وصلت

ظلمة مايشوفني عدل، اضطريت اكذب حتى لا يجيني يرجعني، زلگت من جديد تأذيت، كأنُ الارض صارت تتحرك، گلت بهمس وانه الفلف چاكيتي على نفسي عن البرد.

:- يلا حروب وصلتي، بيبي تنتظرچ ببطانية دافية

وخطوة بخطوة رغم البرد والطين والظلام، مشيت، وكل ما يضرب المطر على وجهي اغمض عيوني واتخيل حضنها هي وجدي، اللي ينسي كل التعب.

وصلت الصبة اللي بعتبة بيت جدي، بسرعة دفعت الباب ودخلت، الباب حديد بي سبرنگ يرجع بحده، وگصير كلش.

مايقفلونه يظل مفتوح هنا امان، وكلنا اهل واحد يدخل عالثاني، ماكو بيننا حرامي ولا صاحب دغش.

بيت جدي من داخل ليوان طويل من صبه، ومابي صالة الغرف مفتوحة هالحوش، واسع چبير، والنص اللي على الشارع بي حوطة حيوانات، صفحة للنعجات والصخول والصفحة الثانية للهوش.

دخلت للدوانية لأن جدي وبيبي ينامون بيها، شفت فارشين شكلهم يردون ينامون، هم من وكت ينامون بالتسعة بيت جدي صنطه.

سمعت صوتهم بالمطبخ، رحت دخلت بسرعة المكان دفو يجنن، موگد متروس جمر، بنص المطبخ، جدي گاعد يشرب گدو، وبيبي يمه يسولفون.

بيبي:- حروب شجابچ بيبي بهالمطر؟!

:- اجيت انام يمكم

جدي:- هلا بيچ بنيتي، تعاي يم جدچ

:- بس انزع چاكيتي طحت مرتين بالطين والماي

بيبي:- كلچ طين ومبللة، تعاي وياي اطلعلچ ملابس، لا تمرضين

رحت ويه بيبي لغرفتهم هي وجدي، انطتني من ملابس عمتي الشهيدة، بس هالملابس عدهم تناسبني، شفت حسرتها وغصتها، من لبستهن، مانستها لليوم، مارادت تنزع ثوب السواد لوما جبروها عمامي وعماتي.

عندي عمة شابة ما متزوجة بعدها، دخلت من الليوان الثاني للبيت، بيدها فانوس، جاية من بيت عمتي، هي سمينة بس اطيب گلب عدها بالدنيا كلها.

المطر خف وماكو.

فاطمة عمتي بيدها صحن..

:- حروب ولچ شجابچ بهالمطر

:- اجيت ابات يمكم، شنو هاي بيدچ؟

فاطمة:- دبس وراشي من بيت زهرة، جوعانة؟

:- اي والله ماشبعت بالعشه

فاطمة:- تعاي اكو بتيتة بالموگد، تعاي تعاي خل نزيد لحماتچ چنچ ورقة

ضحكت دخلت للمطبخ، الموگد كله جمر ورماد ودفو يجنن، راحت بيبي تنام، بقينه احنه وجدي وعمتي فطومة، نسلس حب شمسي وناكل بتيتة شويي.

جدي راح ينام، شوي انه وعمتي طلعنا من المطبخ اخذنا الفوانيس، فرشتلي يمها، حطينا راسنا عالمخدة وخذانا النوم، نص الليل ويه الرعيد والمطر القوي حسيت بجدو حط كوته الچبير على بطانيتي علمود يدفيني اكثر.

غمرتني الحنية والحب اله، نضر عينه اختفى من زمان بس ماختفت حنيته النا وحبه، هو يشوف قليل كلش، خاص بالنهار.

گمت اريد اروح تواليت، طلعت من الغرفة المطر واگف والگمر ظاهر من وره الغيوم، يجنن، رحت اخذت الابريگ ترسته ماي.

حمام بيت جدي بآخر بيتهم بعيد شوي عن الغرف، صاير يم حوطة الهوش، طلعت مثل الشبح، سمعت صوت ولمحت ظل بالگمرة.

دب الرعب بجسمي من شفت واحد واگف يم وحدة من الحلال، ضوا ذهبي عاكس عليه، فانوس او لالة؟ رجلينه غاطسات بماي اللي بالحوطة.

ركضت برعب گلبي يريد يوگف، طر رجليَّ طر، تجمدت من الفزع والخوف، وصلت للديوانية، دخلت برجلي فردة نعال والثاني نزعته بالباب.

همست بخوف يم ذان جدي وهزيته على كيف..

:- جدي جدي اكو واحد بالحوطة مادري منو يمكن جاي يبوگ الحلال، لا تسوي.. لا تسوي.. صوت حتى لا يشرد

جدي فزع من فراشه وهو يحرك بيديه سريع يتملس الارض حتى يگوم، ختلت يم بيبي من الخوف، فاطمة گامت بنعاس.

بيبي:- ولچ حريبة شصاير شبيچ فزعتي جدچ!

:- اكو واحد بالحوطة

بيبي گامت وعمتي فاطمة طفرت، لحگتهم اخاف بحدي، بعد ما اخذت حجابي لفيته بسرعة مخربط، طلعنه عمي حسن ركض للحوطة بيده چماغ خشب.

لحگناه، شفنه رجال طفر الحايط، عمي حسن صاح صيحة غضب..

:- ولكككككك جبااااان اوگف

بس مالحگه عمي ركض طلع من باب الحوش، مانعرف شصار لزمه لو شنو، جدي يحترگ مكانه ويضرب ايد بايد..

جدي:- سنين عايشين حرامي ماطب علينا منو هالناقص الدوني

بيبي:- يمه دخيل العباس ابو فاضل، وليدي خاف يسويله شي

ما مرت دقايق عمي مجتبى اجه..

:- شكو شصاير؟ يابه بيكم شي

جدي:- حرامي ولك شوف اخوك حسن وين صار

بنفس اللحظة دخل عمي حسن يلهث..

:- ماگدرت الحگه شاد محرك ابن الحرام، الطين عوگني

عمي مجتبى..

:- شصار؟! وين راح؟ شفته؟

عمي حسن:- ماشفته لبد بالبستان يمكن

عمي مجتبى:- روح اخذ مرتضى ودوروه اكيد مايلحگ يشرد، طين ويبطئه

راح عمو حسن گعد عمي مرتضى، التموا الكل، راحوا چيكوا الحلال ماكو شي مفقود، بس شلون چان ناوي يطلعه ويبوگه محد يعرف؟..

عمو مجتبى..

:- اكيد هذا يعرف بيت ابوي عدل، ويعرف شلون يطلع الحلال، هذا يعرفنا ونعرفه

عمو حسن:- هو شنو صار شلون شافته حروب؟

جسمي يرجف من برد وخوف..

:- طلعت من المرافق وشفته....

من شرحتلهم بالتفصيل شنو شفت، جدي لطم راسه بيديه الثنين، وانصدموا عمامي وبيبي، الا انه مافاهمة شكو؟!

جدي بقهر :- ولكم هذا زيان شارب، لزمو اريد اشرب من دمه النگس

ظل يدگ على راسه، ولا هدأ ولا واحد هدأ، ابوي گاعد لصلاة الصبح اجه وسمع الموضوع، كل الفهمته، لازم يذبحون الهايشة ويحرگوها.

صليت الصبح ويه بيبي وعمتي فاطمة، ماگدرت ارجع انام رغم النعاس، قبل لا يطلع الضوا الهايشة انذبحت، وراحوا عمامي حرگوها بالگيعان البعيدة.

من سألت ابويه ليش ماجاوبني، يمكن ملتهي وماعنده جواب، او مايريد يجاوبني، جدي مفرفح على حلاله، ضايج وگضاها صياح وعصبية.

ماسولفوا الموضوع غير بيننا وگالوا الي ما اسولف لأحد، حتى مدرسة ماخلانه ابوي نروح، لأن رجعت مطرت والطريق هسة طين ماينمشي بيّ.

العصر وگفت المطرة بيبي اخذتني وياها للبستان، تريد تحش گصيل للحيوان، رحت وياها، كلما احط رجلي بالطين ماتطلع بعد.

الدرب كله طين وكل البستان، نزعت النعال ومشيت حافي، اطلع رجل وتطمس الثانية، وصلت بصعوبة لآخر البستان.

هي حشت الگصيل، انه رحت لطلگة الفجل يمها، اشلع وانظف البوگ (الساق) وآكل، الناس تحوي وتاكل نبگ، انه احب الفجل.

خلصت بيبي صاحتلي، ركضت وراها شايلة حزمة الگصيل، اركض حافي ومالحگها، الطين مكروه.

عيوني تتفحص كل مكان خاف الحرامي نايم بالبستان، شلون تفكير، جني هذا مو حرامي يامطي ينام بهالمطر والطين والبرد!

طلعنا من البستان، رحت من الجهة الثانية من باب البيت للنهر حتى اغسل.

رجعت مطرت خفيف، النهر وره بيت جدي كلش، تطينت واريد اغسل، الشريعة كلها ماي مطفحة واخاف انزل كله يتخيلي سمكة القرش اكو وهو نهر، خيالي واسع.

نزلت من ضفة ثانية حتى لا ازلگ تمسكت عدل بالحافة، غسلت رجليه، دنگت ارد اخذ اخر غرفة ماي وچان اتكوم بالنهر، طلعت ركض اخاف يعضوني اسماك القرش.

اللي يشوفني يفطس ضحك صرت كلي طين وتبللت ، گمت ارجف من البرد اجه كملها ابن عمتي جراني من ملابسي، كفخني على راسي، والله لو يشوفه ابوي يكسر ايده.

:- ماتخافين تسبحين بالنهر مطفح ودنيا برد شبيچ تخبلتي؟!

:- ومرض حتى مرض لا تكفخ والله اگول لتيجان يكسر ايدك

ضربني على راسي مرة الاخ..

:- حيوانة طلعي لا اتويچ توي، تهدد راس البامية

:- والعباس ان ماگلت لابوي وخل اشوف شتسوي من يلزمك من ذانك

:- لا تاكلين خ... زايد ام لسان، يلا طلعي

هذا الحقير ايده والكتل وياي وامه اخبث وابوه اهز ايدي، طول النخلة الي باب بيت جدي ويگعد گباله وفچوچه الطالعة من حلگه ويگله ثييييد ثيييد ثيييد مولاي.

تسسس انه الحية ابو مسلم ابو السحورة، هنوب مايلفظ السين يسوي ثاء ومن يحچي مافهمه.

ظليت ساكتة، بس اعلمه عد ابوي كسر دماغي، عافني ومشه وهو يزبر..

:- امشي داخل يالله ملابسچ لزگن عليچ

لطمت وجهي، خجلت وانه ارجف، عالاساس هسة هو ابو الغيرة ويتحارش بيَّ اكثر من مرة، باوعت لملابسي صدگ لازگه، المطي هم يباوع، كون افگع عيونه.

خلي اغسل الطين لا امي تشوفني عبالها صدگ اسبح بالنهر، هلاووو هنوب انكتل.

رفعت راسي على صوت ابن جيرانه، ملابسي ملزگه عليه..شمرت روحي بالنهر بهالبرد، حتى لا يشوفني حچاياته چبيرة..

ذياب وگف على حافة الشريعة..

:- چني شفت چليب الماي هنا ولچ حروب شسوين بالنهر ازينچ صفر هسة

طلعت اسناني بابتسامة مزيفة..

:- عمو غير حارة متت احتريت واجيت اسبح

ذياب هز ايده..

:- چنچ چليب الماي، شجاچ بت السيد تخبلتي تسبحين بالنهر بهالبرد هو وينه الحر دهر صاب چليح

اسناني گامت تتراگع..

:- چليب الماي عمو گول بطة! بشة!

:- الا انتِ رفش اشوف طلعي، الله يعين الياخذچ يرادلچ واحد شافط مثلچ

هسة انه ميته رعب جوه الماي غير يروح..

:- اي صدگ عمو شوفلي واحد مخبل، قياسي المخابيل

ذياب:- علي ابن ام جاسم اللي يطلع بلا لباس يلوگلچ

خجلت وحلگي تخيط ويه عمو ذياب بالذات ماگدر الاسنه لان عنده لسانين، وحچاياته چبيرة، رغم لساني اطول من عمري..

ذياب:- هااا سكتي بت السادة، طلعي ولچ راح تفطسين بالماي البارد

عدلت حجابي..

:- لا عمو حلو الماي

:- هاز كاركوچ تگليلي عمو، طلعي چلييب الماي

طلعت من الماي بسرعة وطگيتها ركضة، ماحسيت غير رجلي راحت زايد بالصبه وطحت عالارض....

يتبع