رواية في عشقها هلاكي الفصل الثامن 8 بقلم زهرة الربيع
انا مش فاهمه ايه دخل وشي بحياتك يعني لو عملت العمليه وغيرتلي شكلي ده هيفيدك بايه
مختار ابتسم بخفه وقال...انتي صدقتي اني هغير وشك...طب انا مالي بوشك....انا قولتلك كده لاني كنت ناوي اخبي عليك الحقيقه...بس الصراحه ضميري مش جايبني تفضلي تسألي كده ومقولكيش
روعه قالت بسرعه..وتخبي عني ليه اصلا ما تقول فيه ايه هو انا يعني قادره اعمل حاجه
مختار اتنهد وبصلها والدموع بتلمع في عيونه ولا اجدع ممثل وقال....انا بموت يا روعه ..عندي مشكله في الكبد ...ومحتاجين متبرع بفص كبد ومكناش لاقين اي حد يتطابق معايا لحد ما عملنالك التحاليل ولقناكي تنفعي
روعه وقفت بخوف وقالت....يعني ايه...انت عايز تاخد الكبده بتاعتي ....واموت انا عادي
مختار قال بسرعه..كبده ايه بس انتي جعانه....احنا هناخد فص واحد الدكتور اكدلي انك مش هتتأثري ابدا ....بس ده هيحي نفس وهينقذني ياروعه
وبصلها بتمثيل لاشد حالات الوجع وقال...انا بموت وكل يوم بيتخصم مني ..انا صغير وعايز اعيش حياتي ارجوك ساعديني
روعه بقت تبصله بقلق وهو قال بسرعه...ممكن اخليكي تسمعي من الدكتور وتتاكدي منه ان ده مش هيأثر عليك اصلا الكبد بينمو تاني....اقري عن الموضوع ...ارجوك ساعديني...انا عارف اني مليش حق اطلب بعد اللي عملته معاك.... بس انا بجد لمست فيك الطيبه والانسانيه...شوفي القرار قرارك ولو رفضتي بجد هسيبك تمشي وهستسلم لقدري بقى وخلاص
قال كده وبعد عنها ووقف عند الحيط وهو بيمثل انه متدمر وبيخفي ابتسامته الخبيثه
روعه فكرت شويه و قالت بتوتر....طيب ...انا...انامعنديش مانع اساعدك
مختار التفتلها بسرعه ولهفه مصطنعه وقال...بجد ..ربنا يخليك كنت متأكد انك انسانه جميله من جوه زي بره...لو عايزه تساعديني تاخدي العلاج ده زي ما كاتبه الدكتور لان عندك مشكله بسيطه في الدم ولازم تتحل قبل العمليه
روعه حاولت تبتسم وقالت وهيه خايفه...ماشي هاخده في معاده ...انت...انت معاك حق انت لسه صغير...وطالما مش هيضرني تمام...بس عايزه اطلب منك طلب
مختار قال...عيوني
روعه لمعت الدموع في عيونها وقالت....عايزه احملك امانه....لو...لو حصلت مشكله و...وانا مت ...حاول قد ما تقدر تلاقي اهلي....عرفهم قبري ...عايزه حد يزورني بعد ما اموت
بقلم....زهرة الربيع
مختار اتجمد مكانه واختفت ابتسامته وحاول يقوى وقال...احم...موت ايه بس انتي هبله..انا بقولك مش هيجرالك حاجه..متخافيش
روعه ابتسمت و قالت بدموع...انا مش خايفه...اللي كاتبهولي ربنا هلاقيه....ومعنديش مشكله لو مت علشان انت تعيش...انت شاب عندك كل حاجه...عندك اهل يزعلو عليك وعندك فلوس وشغل ..واهم حاجه عندك هويه...انما انا لا ....انا مين اصلا....انا لو مت مهفرقش مع اي حد
قالت كده وبقت تحاول تمسح دموعها اللي مش راضيه توقف ومختار وقف بالعافيه وهو بيبصلها ومش مصدق اللي بيتقال...مش مصدق انها جاهزه تضحي بروحها بالطريقه دي علشانه وهو ناوي يسلمها للموت بايده حاول ينطق بالعافيه وقال....ان شاء الله هتكوني بخير...عن اذنك عايز ادخل الحمام
قال كده ومستناش ردها وراح الحمام وقفل الباب بسرعه وبقى يفك كرفتته وازرار قميصه وهو حاسس بخنقه وحزن متخيلش ابدا يحس بيه قال بتوتر .....فيه ايه...فيه ايه يا مختار...انت اهبل...كل حاجه ماشيه تمام....كل حاجه ماشيه تمام اهدى..انت مش ضعيف اهم حاجه حياتك انسى ..كل حاجه بتتنسي
عند حمزه كان بيكلم نجوى في التليفون و اتفاجأ بان نسيم جات عندها قبل كده قال....نجوى مش هينفع الكلام في التليفون تعاليلي البيت ضروري لازم نتكلم ..عايز اعرف نسيم بتتعالج من ايه ...ارجوك ده موضوع مهم بالنسبالي
نجوى قالت باستغراب....انت بتقول ايه يا حمزه انت دكتور واكتر واحد فاهم ان دي اسرار مرضى مينفعش تتقال
حمزه قال بسرعه ....والله فاهم...بس ارجوكي انتي كمان تفهميني في حاجات ضروري اعرفها ..مسالة حياه او موت ارجوك.... لو مكانش الموضوع مهم بالنسبالي مكنتش اسألك اسأله زي دي
نجوى اتنهدت وقالت بحزن..انا فهماك بس مقدرش يا حمزه ...صدقني صعب عليا
حمزه قال بسرعه...تمام..تمام فاهمك طيب خلصي اللي وراك وتعالي انا عايز اتكلم معاك ...ماشي هستناك يا نجوى
نجوى قالت ..تمام هاجي ..فاضل كام كشف كده وان شاء الله جايه
حمزه قال ...مستنيكي..وقفل معاها وفضل رايح جاي على نار وهو مش قادر يستنى لحد ما تيجي
عند مختار خرج من الحمام وهو بيحاول يكون طبيعي وبيقول....بجد الميه لا تقاوم ده تاني دش اخده الليله و ...
بس قطع كلامه باستغراب لما ملقاش روعه قال بصدمه و غضب.....هربت بنت الكلب
وجري على الباب بس وقف مكانه لما سمعها بتقول ..اهو انت ...اتلم كلب اما يعضك من فخادك
مختار التفت وراه بدهشه وبقى يبص في الاوضه باستغراب وقال..سلاما قولا من رب رحيم انتي فين يا بت و....
بس قطع كلامه بصدمه لما شافها على الدولاب من فوق قال بذهول.....انتي بتعملي ايه عندك
روعه قالت بضيق ...بونس السقف اصله زهقان....هكون بعمل ايه يعني على الدولاب
مختار قال بعدم استيعاب....معرفش ايه اللي ممكن يتعمل على الدولاب
روعه بصت حواليها وقالت....اه معاك حق مفيش حاجه تتعمل هنا ...انا طلعت هنا علشان انام ....لان حضرتك بمنتهى البساطه قولت لاخوك اننا متجوزين وطبعا ومضطرين نبات في نفس الاوضه
مختار قال بدهشه ...تقومي تنامي على الدولاب...ليه فار
روعه قالت بخنقه..بطل خفه..عندك حل تاني
مختار قال بخنقه ....تنامي على السرير مثلا
روعه قالت بسخريه...وحضرتك هتطلع على الدولاب مثلا
مختار قال ...وهو ليه لازم حد يطلع على الدولاب ما السرير قدامك اهوه يشيل فيل فيه ايه ده انتي زي القلم الرصاص مش هحس بوجودك جمبي اصلا
روعه قالت بسرعه...مين دي اللي تنام جمبك ....لا طبعا ..شوف بقى اوعى تفتكر لاني وافقت اديلك كبدتي تبقى كده خلاص صعبت عليا ونسيت اللي انت عملته معايا....حضرتك كنت خاطفني وبهدلتني وعمري ما انسى الحبسه اللي كنت فيها ولا هنسى انك واحد خاطف وواطي وملكش امان ومستحيل انام جمبك ....ولا انام في حته ممكن تطولني فيها اصلا
مختار فرك جبينه وقال بنفاذ صبر...امم ..طب اسمعي بقى يا سكر..اوعي انتي تفكري اني علشان استأذنتك من شويه وكنت لطيف معاك يبقى لسانك ياخد عليا ....انتي لسه متعرفنيش وده من حسن حظك..... يلا يا بابا انزلي من عندك انا موتي وسمي الزواحف وجزمتي غاليه مش عايز اوسخها
روعه بلعت ريقها بقلق منه وقالت...لا ..برده لا مش نازله انا عايزه انام هنا انا حره ..اتفضل نام انت وملكش دعوه بيا
مختار نفخ بتعب وقال..والله حظك حلو اليوم كان طويل وانا قرفان و تعبان وهموت وانام لولا كده كنت ظبطتلك اعداداتك على مزاجي وخليتك تسمعي الكلمه وتنفذيها قبل ما تفهميها...بس ملحوقه هنروح من بعض فين
واترمى على السرير بتعب وقال...هموت وانام دماغي هتتفرتك
روعه ابتسمت بخبث وقالت ...عايز تنام
مختار قال بتعب ...جدا
روعه قالت بسرعه....طب عندي سؤال مهم قبل ما تنام تعرف ليه النمل بيمشي على الحيط
مختار بصلها باستغراب وهو مش فاهم ايه لزوم السؤال ده
وروعه قالت بضحك...علشان ياخد احتياطاته
وضحكت ضحكتها المعتاده
مختار بصلها بغيظ وقال...عارفه لو قومت من مكاني دلوقت هسكعك بقفا ايدي الزقك في الحيط وساعتها هتعرفي هو ليه كان بياخد احتياطاته
روعه نامت فورا وسحبت المفرش اللي معاها على وشها
ومختار كان عايز يضحك على حركاتها وكلامها وضحكتها هز راسه بيأس من طفولتها ونام بتعب وهو بيفكر في اللي هيعمله الايام الجايه
عند حمزه كان قاعد مع نجوى وبيحاول يقنعها تتكلم وبيقول ...يا نجوى...يا نجوى والله الموضوع مش خيانة امانه ولا فضول ولا حاجه بسيطه...ده موضوع يهمني جدا مسالة مصيريه بجد بالنسبالي لازم تتكلمي
نجوى قالت باستغراب..هو ايه اللي مصيري...انا مش فاهمه..دي واحده على حسب كلامك كنت على علاقه بيها من سنين وهيه سافرت واتجوزت وبدات حياه جديده وجات عندي صدفه يبقى ايه لزوم الكلام ده وهيفيدك بايه تعرف بتتعالج من ايه....وبعدين انا معرفش عنها كتير اصلا هيه جات كشف واحد امبارح وانا طلبت تحاليل علشان كده جات انهارده ....ووبتقول انها لسه راجعه البلد هنا وهتستقر وتتابع معايا...ده كل اللي اقدر اقوله يا حمزه ....مستحيل هقولك اسرار المرضى بتوعي
حمزه اتنهد وقال ....يا نجوى افهميني انا شاكك في حاجه يوم ما روحتلها البيت لقيت جوزها بيتهجم عليها...وفي العياده كان وشها متبهدل واضح انها متعرضه لتعنيف شديد....ويمكن تكون اتجوزت غصب عنها...ارجوك ساعديني هيه جايه تكشف لنفس السبب جوزها بيعنفها وعندها كدمات جسديه كمان ..ارجوك تجاوبيني
نجوى سكتت ومردتش وحمزه مسك ايدها وقال بوجع واضح في صوته....انا مش عارف اذا هتفهميني او لا ...بس انا محبتش في حياتي قد نسيم...و لحد انهارده رغم كل عرفته مش قادر اكرهها...حاسس...حاسس قلبي بيتحرق يا نجوى مش قادر اتخيل انها اتجوزت غيري ...مش قادر افكر انها موجوده دلوقت في حضن غيري... بمووووت...بموت يا نجوى صدقيني .لو فيه اي حاجه تعرفيها تبرد قلبي قوليها انا بتحرق بنتهي
نجوى لمعت عيونها بالدموع وحست بقلبها بينزف حرفيا من كلامه ومن صدق المشاعر اللي في صوته قالت ...وكلامي هيفيدك بايه يا حمزه ...افرض متجوزه غصب او برضاها ده هيفيد بايه مهي في النهايه في عصمة راجل تاني
حمزه قال بسرعه ولهفه ....تفرق...تفرق قوي لو مغصويه عليه يبقى اكيد فيه مشكله معاها...وقتها مش هسيبها...مش هسيبها لو فيها حياتي كلها...ارجوك ساعديني
نجوى نزلت دموعها ومسحتهم بسرعه وقالت بالم ...بس اللي هقوله مش هيساعدك ...ده هيذيد وجعك يا حمزه
حمزه ساب ايدها وبقى يبصلها وهو حاسس قلبه هيقف ونجوى قالت بحزن عليه....مفيش حاجه من اللي انت متخيلها البنت كويسه ومش معنفه ولا مغصوبه ولا حاجه...كانت عندي لانها....لانها حامل يا حمزه...اظن مفيش حاجه تثبتلك انها راضيه بجوازها اكتر من كده
حمزه اتسعت عيونه بذهول شديد وقال...ايه...حامل
بقلم...زهرة الربيع
عند مختار كان نايم وتليفونه بيرن كتير جدا ... روعه قامت من النووم وقعدت بزهق فوق الدولاب ومختار مش حاسس ابدا وفي سابع نومه قالت بذهول...ايه ده..ده لو في غيبوبه كان قام ..انت يا اخ...انت يا باشا قوم دماغي هتتفرتك من تليفونك
بس مختار مردش نزلت من فوق الدولاب وهيه متغاظه جدا ومسكت تليفون مختار وبقت تزقه في كتفه وهيه بتقول بغضب..انت يا بني ادم ايه النوم ده ما تقوم بقى زهقتني
مختار زقها بايده وهو بيقول بنوم...اششش سبينا لوحدنا دلوقت ...رقصه كمان يا نوسه
روعه اتسعت عيونها بذهول وقالت ..يخربيتك اللي جابك ..انت بتعمل ايه
وزعقت في ودنه وقالت..انت يا حيوان قوم
مختار اتفزع وقعد وهو بيقول...اعوذ بالله من الشيطان الرجيم فيه ايه فيه ايه
روعه قالت بغضب....فيه ان ليلتك سوده ومش معديه ..انت ازاي تعمل اللي كنت بتعمله ده قدامي انت والست نوسه ازاي تسمح لنفسك تحلم بحاجه زي دي وانا معاك في الاوضه
مختار مكانش فاهم حاجه رمش بعيونه وهو مش مصدق انها صحته علشان حلم قال..هو..هو انا قولت ايه وانا نايم
روعه قالت بغضب...لا ابدا كنت مستني الست نوسه ترقصلك بس الظاهر بطاريتها فضيت
مختار غمض عنيه وهو بيحاول يضبط اعصابه وفاجأها لما شدها بقوه بقت بين اديه وحاصرها بدرعاته وقال بوقاحه رعبتها...انتي مصحياني من احلى نومه علشان حلمي معجبكش ..بتدخلي في احلامي ليه ..لو حابه ترقصيلي انتي معنديش مانع ....الحق يتقال انتي اجمد بكتير من نوسه
روعه خافت وقالت بسرعه ...نوسه مين...لا لا انت فهمت غلط هو انا معقوله هصحيك علشان حلم يعني......ده تليفونك..والله تليفونك كان بيرن كتير وصحاني ...و..وقولت يمكن حد عايزك ضروري حتى بص عدد المكالمات
وداست على التليفون بس ظهرت قدامها رساله على الشاشه ..قراتها باستغراب وقالت.....مبتردش عليا ليه ..قدامك عشر ايام لو روعه مكانتش عندي يبقى تجهز قبرك ..خليك فاكر راسها هتفدي راسك و..
مختار سحب التليفون منها بسرعه واتنفض قايم من مكانه وقال بتوتر..احم انتي ..انتي بتفتحي التليفون ليه حد طلب منك....ملكيش دعوه بتليفوني خالص
روعه بصتله بصدمه وقالت ..روعه...روعه مين...انا المقصوده بالرساله دي صح ووووووو
التاسع من هنا