رواية في عشقها هلاكي الفصل السادس 6 بقلم زهرة الربيع
اخوك جايب بنت مغمى عليها او ميته معرفش فيها ايه ... شالها وطلع بيها اوضتك لان اوضته مقفوله.. انا حاولت اكلمه بس انت عارف انه مش بيبلعلي كلمه و.....
بس حمزه مسمعهوش اكتر قفل فورا وبقى يقلع البالطو بسرعه وهو بياخد مفاتيح عربيته
نسيم قالت بقلق...فيه ايه يا حمزه خير
حمزه مسك ايدها وقال بسرعه..احنا لازم نتكلم بس ضروري اروح البيت دلوقت ...عشان كده هاخدك معايا يلا بينا
نسيم سحبت ايدها بخوف وقالت...تاخدني فين ..مش هينفع طبعا
حمزه قال باصرار .....لا هينفع يا نسيم احنا لازم نكمل كلامنا لازم اسمع اللي كنتي هتقوليه يمكن قلبي يرتاح شويه...انا بموت يا نسيم فاهمه يعني ايه
نسيم خدت نفس عميق وقالت....بس اللي هقوله معتقدش يهدي قلبك للاسف يا حمزه
حمزه قال باستغراب..... يعني ايه
نسيم اتنهدت وحاولت تخبي الوجع اللي جواها وقالت بقوه...يعني انا مش مجبوره على جوازي من جمال زي ما انت متخيل ...انا اتجوزته بارادتي ...انت اتأخرت قوي في سفرك ...وانا كان لازم اتجوز زي كل البنات اللي في سني...ده اللي حصل وفي النهايه ده نصيب انا مش اخر واحده في الكون...ربنا يكرمك باللي احسن باذن الله...لو سمحت تنساني خالص ..لان انا بحب جوزي ومش عايزه مشاكل معاه
قالت كده ولسه هتمشي حمزه شدها بقوه ومسكها من درعاتها وبقى يهزها بعنف وهو بيقول بزعيق..بعني ايه بتحبيه ...بتحبي مين....وانا ....واللي كان بنا ..كنتي بتضحكي عليا
نسيم نزلت دموعها وقالت بالم...اه دراعي بيوجعني قوي يا حمزه ...سبني اه
بس حمزه كان منفعل جدا وبيضغط عليها اكتر وبيقول..وانتي موجعتنيش... ده انتي دوستي عليا.... ازاي قدرتي ازاي
نسيم بقت تحاول تدفعه وهيه بتتالم من مسكته وفي الوقت ده دخلت نجوى بسرعه لما سمعت زعيقه واتصدمت لما لاقته ماسك نسيم بالشكل ده .جريت عليه وهيه بتقول بذهول..حمزه ...حمزه انت بتعمل ايه ...سيبها...سيبها يا حمزه بقولك
واتدخلت وبعدته عنها بالعافيه ووقفت وسطهم وهو بيزعق وبيقول.. ...اوعي يا نجوى من وشي
وبص لنسيم وقال بانفعال....انا وقفت حياتي عليك واجي الاقيك اتجوزتي ولا على بالك ...بعد كل وعودك ليا يا حقيره.... بس مش انا اللي يتعمل فيه كده انا حمزه الديب واحده غيرك تبوس ايدها من الوشين اني بصتلها اساسا... بس قسما بالله ما هعدهالك يا نسيم سامعه مش هعديها
نسيم قالت بدموع ... ولا انا هعديها ....اجي اكشف الدكتور يتهجم عليا بالطريقه دي ...مش هسكت وهعمل شكوى في المستشفى كلها وخصوصاً فيك يا دكتوره لان على الاساس داخله اكشف عندك مش عند حد تاني
بقلم....زهرة الربيع
قالت كده وطلعت جري ونجوى جريت وراها بذهول وهيه بتقول...لا لا فيه سوء تفاهم يا مدام استني يا مدام نسيم
بس نسيم موقفتش وجريت بسرعه وهيه بتبكي بقوه
وحمزه بيزعق وبيقول...اهربي زي العاده ده اللي بتعرفي تعمليه بس هتروحي مني فين
نجوى رجعتله وهيه بتبصله بصدمه وقالت...انت عملت ايه...ده وعدك ليا انك هتظبطلي شغلي لحد ما اخلص
حمزه اخيرا فاق لنفسه وبقى يحاول يهدى ويستوعب اللي عمله قال بتعب...انا....انا اسف يا نجوى حقك عليا والله...بس متقلقيش هيه بتقول كده علشان تعرف تهرب مش هتعمل حاجه من اللي قالتها
نجوى قالت باستغراب.....تعمل ولا متعملش...انا مش فارقلي غيرك..ايه اللي انت عامله في نفسك ده....انا اول مره اشوفك بالشكل ده
حمزه فرك دماغه بتعب وقال....انا تعبان يا نجوى حاسس ...حاسس بنار في صدري...حاسس ضغطي مش مظبوط ابدا
نجوى مسكت ايده وقالت بحنيه...طيب..طيب اهدى ..هدي نفسك شويه واقعد ريح هطلبلك ليمون واشوفلك الضغط
حمزه اتنهد وقال...لا انا...انا كويس ..لازم امشي فيه مشكله كمان في البيت...بس انا بجد محرج منك جدا ...مكنتش اقصد اوقف شغلك بالشكل ده واعملك مشاكل
نجوى قالت بسرعه..متقلقش عليا خالص انا هخلص كل حاجه..اصلا مش ورايا حاجه انهارده ..بس انت حاول ماتنفعلش ذياده ....بلاش تروح البيت طالما فيه مشاكل
حمزه ابتسم لها وقال....شكرا يا نجوى ...بجد شكرا على وجودك في حياتي ...متقليش انا تمام ..لازم اروح دلوقت وهبقى اكلمك اطمنك
قال كده ومشي ونجوى بصت لطيفه بحزن وقعدت على المكتب وهيه بتفكر في الكلام اللي قاله لنسيم
عند مختار جاب هدوم من بتاعة والدته وقرب من روعه وقال...جبتلك حاجه من ريحة الحبايب...ايه يا بت مش هتفوقي ولا انتي استحليتي ونمتي ولا حكايتك ايه
وجاب برفان من بتاع حمزه وقال ..ايه البرفان الجامد ده يا دكتور ...بس مش خساره في اخوك
وبقى يحط منه ويرش في الاوضه وكأنه قاصد يخلصه
وقرب من روعه وبقى يشممها منه علشان تفوق وهو بيقول ..روعه..انتي يا بت ...سمعاني ...لو سمعاني حركي دماغك
روعه بدات تفوق وتبصله بتوهان وتحاول تفتح عنيها بتعب شديد وكانت شيفاه زي خيال بيتهز قالت بتوهان..انت مين..انا فين
مختار قال بدهشه..انا مين. يا نهار ازرق..انتي نسيتيني انا كمان
وقرب منها قوي وقال بمشاكسه...حد ينسى مختار الجبار اللي يخلي القلوب تحتار
روعه دفعته بعيد عنها برعب لما شافته بوضوح واحتدت عيونها بغضب رهيب وقالت...انت ....انت عملت فيا ايه..انطق انا فين وعملت فيا ايه
مختار قال بضيق..لسه...لسه معملتش
روعه بلعت ريقها بخوف وقالت..لسه...ليه هو انت ناوي تعمل ايه
مختار قرب منها قوي وقال بهمس....ناوي اعمل بلاوي
روعه بلعت ريقها بقلق وبقت تضم هدومها عليها من نظراته الجريئه وحاولت تبان قويه وقالت بحده مصتنعه ....على فكره لو بتقول كده علشان تخوفني ..تبقى بتتعب نفسك على الفاضي انا ...انا مش بخاف من حد سامع...انا بنت جامده و بمية راجل و.....ومحدش يقدر عليا غير الي خلقني و....
بس قطعت كلامها لما لقته بيقلع قميصه وقرب جامد عليها وبسرعه البرق نطت من على السرير وقالت برعب ..لا لا لا ورحمة كل غالي عندك يا مختار بيه اعتبرني اختك الاهي يسترك
مختار اتفاجأ بتغير موقفها في ثواني وضحك جامد وقعد على السرير ورفع قزازة البرفان وقال ...كنت بس هاخد القزازه من جنبك يا جامده ياللي بمية راجل
روعه قالت بتوتر....بجد...يعني انت مش عايز...
مختار قاطعها وغمز وقال..عايز قوي....بس مش وقته ...احنا دلوقت في بيت اهلي..... واخويا زمانه على وصول ومش عايز مشاكل
روعه قالت بغضب...انا هقوله ان انت خاطفني يمكن يطلع عنده ضمير واحسن منك ويرجعني لاهلي..او حتى يرجعني للشارع المهم يخلصني منك
مختار بصلها بتحذير وقال..انا قولت ايه...قولت مش عايز مشاكل....اسمعي الكلام احسنلك ..ولازم تعرفي انك هتعملي مشكله وخناق على الفاضي وفي النهايه كلامي وبس هو الي بيتم ...ومحدش بيقدر يعارضني ولا يعمل حاجه مش على هوايا فهمتي
روعه لمعت عيونها بدموع وخوف وقالت...ابوس على ايدك تقولي انت عايز ايه مني..هتعمل ايه فيا ريحني ارجوك
مختار اتنهد وقال..تمام..هشرحلك كل حاجه بالتفصيل ....خليني بس اتفاهم مع حمزه ومتعترضيش على اي حاجه اقولها...وبعدها بوعدك وعد رجاله اني هحكيلك اللي شاغلك كله
روعه مسحت دموعها وهزت راسها بالموافقه
مختار ابتسم وقال ...تمام ...الهدوم دي بتاعة والدتي الله يرحمها جبتهم ليكي علشان تاخدي راحتك بيهم لحد ما اجبلك هدوم
روعه بصتله بذهول وقالت...يالهوي..بتوع مرحومه انت عايزني اتلبس ولا ايه...هتلبسني هدوم واحده ميته
مختار ولع سيجاره بلامبالاه وقال..دي مش اي مرحومه بقولك دي امي يعني شرف ليك تلبسي هدومها ....وبعدين متقلقيش مش هيحصلك حاجه ..في النهايه انتو دلوقت في ملكوت واحد وكلها خطوه وتحصليها
روعه اتسعت عيونها بذهول شديد واتجمدت مكانها
مختار ضحك جامد على شكلها وفتح الباب لسه هيخرج اتصدم بحمزه في وشه وملامحه متطمنش ابدا رجع قفل الباب تاني بسرعه
عند نسيم وصلت البيت وهيه مش قادره تاخد نفسها من البكا ولسه هتجري على اوضتها جمال قال بغضب...كنتي فين يا هانم...وباتصل بيك مبترديش ليه
نسيم قالت برجاء ودموع..ارجوك ...وحياة اغلى حاجه عندك يا جمال تسبني دلوقت...مش قادر اتكلم ..والله ما قادره
ولسه هتمشي جمال مسكها من دراعها بقوه وقال بغضب...وحياة امك....هو انا بقولك تعالي نرغي مع بعض شويه..انا بسألك كنتي فين..ولا مش من حقي اعرف مراتي كانت فين
نسيم قالت بغضب..كنت عند الدكتوره...زي العاده ...لتكون مش عارف اني هبقى محتاجه اروح لدكتوره بعد عمايلك معايا
جمال قال بغضب ....دكتوره...اه...وياترى قالتلك ايه الدكتوره..هيه اللي بتقولك تطلعي من غير اذن جوزك
نسيم قالت بانفعال...انت ايه يا اخي..بقولك تعبانه مخنوقه سبني في حالي دلوقت ...هبقى اشرح لحضرتك واديلك خط سيري بعد كده حل عني بقى
ولسه هتدخل اوضتها قال بطريقه ترعب...لازم تتعبي مش كنتي مع حبيب القلب واكيد بقى البيه زعلان انك اتجوزي وتعبتي لحد ما راضيتيه مش كده
نسيم بصتله بذهول وقالت...انت ...انت بتقول ايه..هو اي جنان وخلاص
جمال قرب منها وقال بغل ....انتي لسه شوفتي جنان..فاكره اني مش هعرف انك كنتي عند عشيقك الدكتور حبيب القلب اللي جيه يسأل عنك لحد بيت جوزك...وانتي تاني يوم روحتيله عيادته تطيبي خاطره
قال كده وضربها قلم قوي بانفعال
نسيم حطت ايدها على خدها بذهول وبقت ترجع لورا برعب وهيه مش عارفه ازاي هتبررله ان كل ده كان صدفه
عند حمزه كان بيخبط على اوضته بجنون وزعيق وبيقول..افتح يا مختار افتح ورحمة امي ما هعتقك انهارده
مختار بلع ريقه بتوتر شديد وقال...وبعدين بقى ...ايه العمل...مكنتش فاكر انه هيبقى متعصب قوي كده
روعه اتفاجأت وقالت...هو انت خايف منه
مختار اتنهد بخنقه وقال بغضب...بلاش عبط ..انا بس متوتر...لو فتحت دلوقت مش بعيد يمد ايده....شكلي هيبقى عره لو سكت...ولو مديت انا ايدي هأذيه وانا مش عايز كده
روعه ابتسمت وقالت بتوهان ....حلوه الاخوه...انا كمان كنت احب اخويا قوي ومقدرش ازعله حتى لو هيقتلني و.....
بس قطعت كلامها وبصتله بدهشه واستغراب شديد وقالت....اخويا مين...هو انا ليا اخوات
مختار اتنهد بخنقه وقال...لا وحياة اللي خلفوكي مش ناقصني الزهايمر بتاعك دلوقت
روعه حاولت تفتكر حاجه بس كانت دماغها توجعها جدا حاولت تهدى وقالت...طيب انا ممكن افتحله وامتص غضبه قبل ما تتواجهه
مختار بصلها بدهشه وحيره استغرب جدا انها حابه تساعده بس حاول يتجاهل كل ده وقال..احم ....لا شكرا..انا..انا هتصرف...بس انتي اعملي نفسك مش شايفه اللي هيحصل..علشان الكاريزما يعني
روعه ضحكت بخفه وقالت....مفهوم مفهوم
حمزه كان بيضرب الباب برجله وبيقول...والله العظيم هكسره افتح يا وسخ حصلت تجيب حريم في البيت...وفي اوضتي كمان يا زباله
مختار اتنهد وفتح الباب ولسه هينطق حمزه ضربه بوكس قوي جدا رجعه خطوات
بقلم...زهرة الربيع
روعه حطت ايدها على بقها وجريت عليه وقالت...يالهوي ...انت كويس
مختار حاول يكبت غضبه وهز راسه وقال...تمام...انا تمام
وبص لحمزه بغضب ميتوصفش وقرب منه وقال من بين اسنانه...انت قد اللي عملته ده ياله... بتمد ايدك عليا يا حمزه
حمزه قال بغضب شديد..اللي عملته ده ولا حاجه قصاد اللي لسه هعمله ...قسما بالله لو ما خدت الزباله اللي انت جايبها في اوضتي دي وطلعت حالا من هنا لانسى ان اللي خلفتنا ست واحده وهمد ايدي ورجلي ...ومش بس كده هعملك قضية دعاره وارجعك مكان ما كنت ايه رأيك هتمشي بالزوق ولا
مختار حس ان اخوه تعبان وفيه حاجه اكبر من كده مضايقاه اتنهد وحاول يمتص غضبه وقال..انت زعلان كل ده ليه..علشان استخدمت اوضتك..اوضتي خلاص بتتنضف ..وهطلع من هنا
حمزه قال بغضب وحزم ...لا هتطلع من البيت كله...ده بيت نضيف ومش للنجاسه وقلة القيمه
روعه قالت بذهول..انت فاهم ايه..انا مش زي ما حضرتك بتقول ابدا انا...
مختار قاطعها بسرعه وقال ...استني انت يا روعه
روعه قالت بغضب...استنى ايه مش شايفه بيغلط فيا وعمال يقول بيت نضيف ومش عارف ايه وناقص يقولي البيت ده طاهر وهيفضل طول عمره طاهر
حمزه قال بغضب...دي حقيقه ...ولو مش عايزه تتورطي في بلاغات وسين وجيم وريني عرض كتافك
روعه لسه هترد حمزه شاف هدوم والدته على السرير قرب بذهول مسك هدومها وقال بصدمه والدموع بتلمع في عيونه...ايه ده...ها....دي هدوم امي... هيه صح
مختار فرك رقبته بقلق وقال بهمس..كده خربت بجد
حمزه هجم عليه ومسكه من هدومه بقوه وقال..انت اخدت هدوم امي لل**** اللي جايبها معاك يا كلب يا نجس
روعه شهقت بصدمه وقالت بغضب شديد..ده انت عيل قليل الادب ومتربتش انا مش جايه معاه بمزاجي انا جايه لاني....
مراتي...جايه لانها مراتي
قالها مختار بسرعه وحزم ونفض ايد اخوه وقال....لو فيه قانون هيمنع اني اقعد مع مراتي في بيت اهلي اتفضل بلغ انا مستني
حمزه وروعه بصوله بصدمه وقالو بصوت واحد....ايه...مراتك !!!؟
السابع من هنا