رواية صغار العم الفصل الخامس 5 بقلم مسرة اسامة
روايــة #صغار_العم
الحَــلْـــقــة الـخــآمــسـة 🌸
يوسف فتح الخط : ايوه
سلسبيل : كيف نزلت لمطبخ امّيمه
يوسف : مية مية ، منورة
سلسبيل : بوجودك برو
______
لبست هناء شبشبها و نزلت ..
يوسف خش للمطبخ من باب الجنان و سكر الضي
هناء خشت للمطبخ من الباب اللي من داخل و فتحت الضي 💡
لقت يوسف انخلعت 😳
كيف بتطلع ..
يوسف قرب منها و شدها من ايدها : خليك شوية
هناء قلبها يدق : حول بنطلع
يوسف سكر الباب و شبحلها
هناء خافت و حطت يدها على يد الباب : افتحه تو عصام يجي
يوسف شدلها يدها : فكينا من عصام توا
هناء : شن تبي
يوسف قرب منها : علاش تهربي مني ؟
هناء توخر : مانهربش
يوسف يقرب منها و يدوي بصوت واطي : لا تهربي ؛ كل ماتشوفيني تجري
هناء وخرت ع الدولاب : خليك بعيد تو يخش حد يفهمنا غلط
يوسف : و اللي مدايرتيه فيا مش غلط ؟
هناء : كيف !!
يوسف وقف قدامها : امتى بتنحي الحظر ؟
هناء سكتت
يوسف شد شعرها مبلول : قاعدة زعلانة ؟
هناء شبحت ليده
يوسف يشوف لعيونها : آسف هلبا هنو
هناء خافت منه : خيرك هكي تشوفلي
يوسف قلبه يدق : علاش تعذبي فيا هكي ؟
هناء صوتها يرعش : كيف
يوسف يشوف لفمها : انتي فاهمتيني كيف
هناء غمضت عيونها : يوسف خليك بعيد
يوسف حاصل عليها و حاط ايديه ع الدولاب : اشششش
هناء فتحت عيونها و بدت ادف فيه من صدره : يوسففف
يوسف حط خشمه على خشمها و يشوف لعيونها
هناء سكتت ؛ تشوف لعيونه و قلبها يدق بسرعة
يوسف يسمع ف دقات قلبها و صوت أنفاسها
هناء دوب ماتدوي : يوسف !
يوسف بصوت واطي :
دعيني أعشقك ..
دعيني أبلغ عينيك إني عشقتها ..
غرقت و ما أروع الغرق في بحورها ..
9
أسرت و ما أجمل الأسر بها ..
عشقت ولا عشق يفوق عشقي لها ..
دعيها تحتضنني فما أجمل أحضانها ..
و ما أروع الحديث في نظراتها ..
اتركي عينيك تحتضن عيوني ..
و دعيني أعشقك بصمتي و جنوني ..
دعينا نعشق بكل اللغات ..
دعي عيوننا تتحدث بالنظرات ..
دعي الأيادي تتعانق باللمسات ..
دعي الشفاه تعبر بأروع الكلمات ..
دعي الشوق يملئ الكون آهات ..
دعيني أعشقك بكل طريقة ..
تاره مجنونة و تاره رقيقة ..
مزيج من أشواق مجنونة ..
و أحضان دافئة حنونة ..
تاره أغير بجنون ..
و تاره صدر حنون ..
تاره أتحدث بحبي ..
و تاره أخفيه في قلبي ..
تاره قلب حبيب يخاف عليكي ..
و تاره طفل يبتغي الحياة بين يديكي ..
دعيني أقول و أقول و أقول ..
و مهما تركت حديثي يطول ..
حبك أعمق من أن تصفه كلمات ..
و شوقي إليك لا تحاكيه آهات ..
دعي الصمت يحكي أروع الكلام ..
دعيني أعبر عما أخفى من غرام ..
دعيني أمنح قلبك الحياة ..
مع كل تنهيدة شوقٍ و آه ..
دعيني أتنفس من أنفاسك ..
دعيها تبلغني إحساسك ..
2
دعي أحضانك من البرد تحميني ..
دعيها بدفئها و حنانها تنسيني ..
كل مافات من عمري قبلك ..
و دعي حياتي تبدأ بعشقك ..
يحرك ف خشمه على خشمها : فقط .. دعيني أعشقك ❤️
هناء ارتخت و ذابت ؛ كيف بتطيح ..
يوسف شدها من خصرها و يدوي ف وذنها : شديلي روحك يا قلبي
هناء دوب ماتدوي : مش قادرة نوقف
يوسف بصوت واطي : تبي نقيمك و نركبك ؟
هناء شافت لعيونه و قلبها يدق 💓
يوسف ابتسم
هناء شدت روحها و طلعت من المطبخ
يوسف لحقها
هناء حست بيه وراها ركبت للحوش تجري
___
سنابل : عطلت وله ؟
سلسبيل : بالك علق عليها
سنابل ضحكت : سعدودها بتعيش مع الحب ف نفس المكان
( خشت هناء للحوش )
سلسبيل شبحتلها : وين الخبزة ؟
هناء خشت لدارها و سكرت الباب
تلوحت على سريرها قلبها يدق بسرعة تستوعب ف اللي سمعاته
___
سنابل : زعما شن صار
سلسبيل : شكلها شدت
2
__________________________
تاني يوم 🌹
09:00 ص
يوسف طلع من حوشهم و وقف قدام حوش هناء متردد يطق عليها ولا لا
فتح تليفونه بيكلمها لقي الحظر قاعد ، حط تليفونه ف جيبه و نزل
______
هناء فايقة مارقدتش الليل كله و هي تفكر ؛ ناضت للحمام و رجعت لسريرها مش قادرة تشد حيلها
__________________________
02:00 م
خشت نجاة للحوش هي و بناتها : غيري حوايجك انتي وياها و معاي للمطبخ طول
سنابل كشرت وجهها : وااك حني ماصدقنا كملنا امتحانات و بدت العطلة خلينا نرتاحو
نجاة : عندك صيف كامل ترتاحي فيه
سلسبيل : هناء شورها مهناش
سنابل : لالا سيارتها قاعدة
نجاة تنادي : هناااء ؟
( هناء ف سريرها متكية )
نجاة فتحت عليها الباب : راقدة ؟
هناء شبحتلها : لالا
نجاة قربت منها : خيرك امالا
هناء دوب ماتدوي : تاعبة شوية
خشو خواتها للدار
سلسبيل : نحسابك مهناش
نجاة : تحسي ف حاجة توجع فيك ؟
هناء : حاسة روحي مش قادرة نوقف رجليا فاشلات
خواتها ضحكو 😂
نجاة شبحتلهم : شن يضحك فيكم ؟
سلسبيل : شكلها محصلة رعشة بنتك
هناء شبحتلها و سكتت
نجاة شبحت لهناء : رعشة شنو ؟
هناء : بالك بداية بردة
سنابل : زعمااااا 🌚
نجاة فنصت ف بناتها : بري غيري حوايجك انتي وياها و تعالو عاونوني ف الغدي
البنات طلعو من الدار و هما يضحكو
نجاة شبحت لهناء : رعشة شني ؟ شن صار ؟
هناء : ماصار شي يتسهوكو على اي حاجة بناتك تعرفيهم كيف تافهات
نجاة تشوفلها : لالا حتى وجهك اصفر ! خيرك يا هنيوه تكلمي اني امك عادي
هناء : قتلك إني تاعبة شوية خليني متكية لين نحس روحي احسن
نجاة : باهي براحتك ، اني نوتي الغدي و انادي عليك لازم تاكلي حاجة شكلك مش فاطرة
هناء هزت راسها بمعنى به و سكرت عيونها
نجاة مشت لدارها
_____________
سنابل ف الدار مع اختها : زعما شن صار و خلاها مريضة بالفراش البنت
سلسبيل شبحتلها و عضت فمها : حييييه حييييي
سنابل ضحكت : اللي بالي بالك 😍 ؟؟؟ نزلتله بروحها فالليل و الشيطان بينهم و إلعب يالاااا 💃
سلسبيل ضربتها على ظهرها : مصحك هناء مستحيل تخليه يقربها
سنابل تتوجع : احييه محرها يدك
سلسبيل : وووه ضاربني الفضول نبي نعرف
سنابل : فوتيها توا ، حقا جايين عرب بنغازي اليوم
سلسبيل كشرت وجهها : اووف اكيد منذر جاي مبرد دمه الباسل
سنابل : عينك والله الا جوه عسل
سلسبيل : يحب يتبرد على هناء تو لما بتعرف انه جاي بتتكنطا
سنابل : مش هي بس اللي بتتكنطا 😉
سلسبيل ضحكت : شكلنا بنتفرجو على هلبا مبارايات 🌚😂
_______________________
5
حلومة ف الجنان تستقبل ف اختها نورية جاية من بنغازي باش تحضر عرس عصام هي و بنتها و ولدها
نورية : يانااعليا يا خيتي طيب فيا اللي ريتك
حلومة فرحانة مضبطة اختها : الحمد لله على سلامتكم نورتو الحوش
نورية فرحانة : منور بيكن يا خيتي وحشتيني واااجد
حلومة : اني اكثر والله
نورية ضحكت و قعدت تساوي في شاربتها
حلومة شبحتلها : وين اسماء و المنذر ؟
نورية : خاشين ورايا خليتهن ينزلن ف الدبش مالسيارة
حلومة : شنو تعبتو في الجية ؟
نورية : اها الطيارة اتأخرت واجد و تعبت ف المطار محتوك قدرت انتحرك
حلومة : خشي الداخل ارتاحي
و خشت اسماء للجنان هي و المنذر
أسماء متزوجة و عندها ولد صغير و خوها المنذر نديد يوسف و مش متزوج
أسماء خاشة تجري : ناعليااا خالتيييي 😍
حلومة ضحكت و سلمت عليها : اهلين و سهلين بنور العين
أسماء مضبطتها : وحشتيني واجد والله
حلومة فرحانة : ليكم وحشة اكتر يا حبايبي
المنذر واقف شاد ولد اسماء و يضحك : تي هيا يا ولية عطني دوري
أسماء شبحتله : وليه ؟ 😒
حلومة ضبطاته : نهار مبروك عليا جيتكم عندي بالدنيا كلها
المنذر : خالتي شن حالك
_______________________
1
عصام و يوسف في محل بدالي عربية
عصام لابس بدلة : ها شن رايك ؟
يوسف : لالا مش ماشية معاك
عصام يشوف لروحه : علاش حسيتها باهية
يوسف مدله بدلة تانية : شوف اللون هذا احسن اللي لابسها طالع فيها تقول بنقلا
عصام ضحك و خداها منه : قول كلمة طيبة ياراجل
و خش يقيس
يوسف ضحك و وقف يوازي لروحه
شد بدلة لونها زرقاء يقول ف عقله ( زعما هادي تعجبها ؟ )
عصام طلع : ها شنو منو
يوسف شبحله : ااه هادي مليحة
عصام شبح للبدلة ف ايد يوسف : شنو خطرلك تشري حتى انت ؟
يوسف : ايه الفاتحة غدوا معاش فيه وقت
عصام تلفت للمراية : باهي مليح
يوسف يشوفله : والله و صار منك 😂
عصام ضحك : هرمنا الزح و اخيرا
______________________
03:00 م
امالي هناء مقعمزين يتغدوا
نجاة : اليوم جت خالتك نورية ريتها ؟
اسماعيل : ايه اني اللي جبتهم من المطار
نجاة : نحسابهم جو بروحهم ماريتكش معاهم
اسماعيل : كنت مستعجل حطيتهم و طلعت
سنابل : من جي معاها ؟
نجاة : المنذر و اسماء
اسماعيل ياكل : وين هناء ؟
نجاة : بنتك مريضة اليوم ماعجبتنيش
اسماعيل : خيرها ؟
سلسبيل : امس دوشت و خلت الروشن مفتوح شورها بتمرض
سنابل : مش وقت مرض توا فِ العرس 🌚
اسماعيل وقف : نخش للحمام و نشوفها .. و خش للحمام
أصيل ياكل و ساكت
نجاة شبحتله : خيرك مهبي هالفترة
أصيل شبحلها : شي
سلسبيل بإستهزاء : تبي تقنعنا ان رسمي مافي شي !! 😏
أصيل فنص فيها و قام ايده فوق : الهي ف روحك خير مانشلبخك كف
نجاة فنصت فيه : احترم نفسك و احترمني اني اللي مقعمزة
اصيل علّا صوته : شوفيها شن تلقح الحيوانة اهيا
سلسبيل علّت صوتها : علاش اني شن قلت باش تقول حيوانة يا حيوان ؟؟؟
اصيل تعفلق و شدها من شعرها : من هو الحيوان !!!
سلسبيل تعيط : حول ايدك ااااي 😩
سنابل تجبد فيه : مصح وجهك
نجاة وقفت : ياسرو يلي ماتتحشموش احترمو بوكم اللي قاعد
أصيل نحّا ايده و شبحلها : يوم تاني بنقتلهم الحلوفات
و ناض خش لداره
سنابل تصيح : ما حلوف الا انت يامعفن
أصيل طلعلها : شن قلتي يا امسخة ؟
سنابل ناضت تجري للدار : برا اقلب وجهك ابصر من مكشخ عليك و جاي فاش غلك فينا
و قربعت الباب
سلسبيل : هههههههههه
أصيل شبحلها و نحّا السبتة من سرواله بيضربها
سلسبيل خافت و لبدت ورا امها : يا ماماااا 😰
نجاة : والله تمسها نهارك اسود
أصيل : شوفيهم كيف مش محترميني الكلبات لازم نربيهم 😠
سلسبيل ورا امها : غر ربي روحك قبل
اصيل جلدها من الجنب : سكري فمكككك
سلسبيل حستها : احيييي
نجاة ادف ف اصيل : تحشمو مني يرزيني فيكم
هناء راقدة ف سريرها و مسكرة عيونها : ووواك شن هالعيلة هادي مايخلوش الواحد يرتاح
طلع اسماعيل من الحمام : ماتقولوليش خيركم ديما تهنتشو ف بعضكم ؟
نجاة خشت للدار : تعالى ربي صغارك اني معاش نقدرهم
سلسبيل : بابا تعالاله يضرب فيا 😢
أصيل : ماهو من لسانك اللي يبي القصان يا حلوفة
اسماعيل فنص فيه و علّا صوته : بلا قلة ادب يا ولد 😠
أصيل : افهم علاش نضرب فيهم بعدين عارك
اسماعيل : خيرهم شن قالولك
سلسبيل ساكتة 😌
سنابل من الدار تصيح : ابصر من مهزبه و جاي يتكولف علينا
أصيل دمه يغلي : اسمعها شن تقول 😡
اسماعيل : تعالي يا سنابل
سنابل فتحت الباب : نعم بابا 😌
أصيل يعض ف لسانه بيضربها
اسماعيل : تعالي اوقفي هني
سنابل جاته : نعم
اسماعيل : اللي اديرو فيه لبعضكم عيب ، هذا خوكم الكبير لازم تحترموه
سنابل : ماهو ..
قاطعها اسماعيل : اني قاعد ندوي
سنابل سكتت
اسماعيل : لو بتقعدو ع الحال هذا حاتقعدو طول عمركم ماتتحابوش حتى لما يكونو عندكم صغار تبدو مفيش احترام و قدر بينكم عيب مايجيش
سلسبيل ضحكت بإستهزاء : هههه
اسماعيل : خليكم أحباب و متفاهمين باش حتى نهار نموت نكون متهني عليكم أنكم ماتفارقوش بعضكم
اصيل : شن تقول بابا بعد عمر طويل
سنابل : مانحباش الكلام اهوا 😒
اسماعيل : لازم تسمعوه و تحطوه ف راسكم ديما
انتو ما ليكم غير بعضكم ف هالدنيا بعدي اني و امكم
أصيل : ربي يطولنا ف عمركم
اسماعيل : هي بوسي خوك انتي وياها و تراضو
سنابل قالبة وجهها
سلسبيل : لين يتأسف مني 😒
اسماعيل علّا صوته : شن كنت نقول ؟؟؟
أصيل ضحك 😏
اسماعيل : هياا
سنابل باست اصيل من خده : سامحنا خونا
سلسبيل باساته و وشوشاته : معاش تعاودها
أصيل فنص فيها : شنوو ؟
سلسبيل سكتت
اسماعيل : ايوه خلوكم هكي ديما
سنابل : راهو مايمشيش معانا جو الأتراك هوا 😒
أصيل ضحك و قعمز : بري جيبلي قهوة ليا اني و بوك تحركي
سنابل : حاضررر حبيبي أصولي ... و خشت للدار
أصيل شبح لبوه : ريتها كيف ماتسمعش ف الكلام ؟
سلسبيل ضحكت و لحقت سنابل
اسماعيل هز راسه و خش لهناء : هناء ؟
هناء شافاته قعمزت : بابا
اسماعيل : خيرك مريضة ؟
هناء : لا تاعبة شوية بس
اسماعيل : في شن تحسي
هناء : كنت فاشلة مش قادر نتحرك لكن توا احسن بعد ماكليت
_________________________
يوسف روح للحوش هو و عصام و خشو لحلومة
يوسف : صوت مني الداخل ؟
عصام ضحك : خالتي نورية جت شكلها
و خشو لدار المعيشة : السلام عليكم
ردو عليهم : و عليكم السلام
يوسف وقف ف العتبة
عصام خش : اوووه خالتي
نورية شبحتله و ضحكت : مرحبا بالعريس
عصام يسلم عليها و يضحك : مرحبتين بيك أنستينا
نورية : الله يآنسك مبروك عليك ان شاء الله بالصحة
عصام مبتسم : الله يسلمك عقبال المنذر
و تلفت يسلم على بنت خالته
حلومة شبحت ليوسف واقف ف العتبة : اوسيفه خش سلم
نورية شبحتله : كنك تبحت فينا من بعيد ياوليدي خش خش
اسماء : يتحشم شكله 😂
يوسف كح و خش يسلم : كيف حالكم الحمد لله ع السلامة
نورية مبتسمة : ماشاء الله الصلاة ع النبي
يوسف ابتسم : الله يسلمك
اسماء : ولد السنوسي صح ؟
يوسف ضحك : ايه
و تلفت لحلومة : امي نزلت ؟
حلومة : توا كيف ركبت كانت حدانا
يوسف تردد قبل ما يسأل : و بنات عمي اسماعيل مانزلوش اليوم ؟
حلومة : البنات لما روحو من المدرسة ريتهم لكن هنيوه مانزلتش
يوسف سكت ؛ طلع من الدار و ركب
عصام قعمز جنب خالته : كيف حالكم و شن أخباركم ليكم وحشة والله
نورية فاتحة شنطة الهدايا : الحمد لله بخير و نعمة
حلومة : والله مافي داعي علاش متعبة روحك يا نويره
نورية : مش قدركن يا خيتي مافش حاجة من قيمتكن
حلومة : والله ماعندكم حق جيتكم سادة
اسماء شادة ولدها : توا حني برانية يا خالتي ؟
حلومة ضحكت
عصام : وين المنذر ماريتاش
اسماء : طلع بياخد حاجات و جاي
عصام يشوف لولد اسماء : ماشاء الله عليه البرنس يمشي توا ؟
اسماء ضحكت : اهاا يدب مع الحاجة
خش العارف بصوت عالي : السلام عليكم
نورية انخلعت : يانعليا محرمتي وين ؟
حلومة ضحكت و حدفتلها شاربتها : هاك استري روحك
______________________
1
يوسف واقف ف الدروج قدام حوشهم و يفكر ( وينها اليوم ؟ خيرها ماردتش عليا ولا دارت ردة فعل ! )
فجأة يطلع اسماعيل من حوشه : اه يوسف ؟
يوسف شبحله : عمي ! كيف الحال
اسماعيل : الحمد لله ؛ خيرك واقف هني
يوسف : كيف بنطق عليكم
اسماعيل : تبي حاجة ؟
يوسف تردد : نبي سلسبيل شوية
اسماعيل طبس من الباب : سلسبيل ؟ ... سلسبيل ؟؟
سلسبيل جت : نعم
اسماعيل : شوفي ولد عمك شن يبي
سلسبيل شبحتله : اهلا
يوسف : شن الجو
( اسماعيل نزل )
سلسبيل ضحكت : تبي حاجة 😃
يوسف بصوت واطي : وينها مختفية
سلسبيل توشوش : كان نقولك شن صايرلها
يوسف انشغل : خيرها ؟!!
طلعت نجاة من الحوش
يوسف و سلسبيل سكتو
نجاة : اوسيفه ! شن الجو
يوسف ابتسم : تمام
نجاة : خيركم واقفين هني
يوسف كيف بيتكلم ..
قاطعاته سلسبيل : يسأل فيا على امتحان الانجليزي شن درت فيه 😅
يوسف زراته الضحكة
نجاة و هي نازلة : اها به
يوسف شبح لسلسبيل : تي ادوي خيرها اختك
سلسبيل شبحتله : من امس مش قادرة توقف
يوسف انصدم : بجديات !!
سلسبيل : شن درتلها ؟
يوسف مصدوم : مادرتلها شي دوينا عادي
سلسبيل : عليا اني ؟ 😉
يوسف : من فيه الداخل غيرك
سلسبيل : اصيل و سنابل معانا
يوسف : اول ماخوك يطلع كلميني
سلسبيل ضحكت : حاضر
يوسف : و هناء ماتقوليلها شي
سلسبيل : عيب يا برو ماتوصيش
يوسف قام حواجبه : كأني ندوي مع صاحبي مهاب
و هز راسه و خش لحوشهم
سلسبيل ضحكت و خشت للحوش
_______
سنابل ف الدار اتدير ف حلوى لرجليها
خشت سلسبيل : يوسف قالي لما اصيل يطلع كلميني
سنابل ضحكت : الله الله 😍
سلسبيل شافت اصيل من برا الدار جايهم انخلعت : حي على امك اصيل جاي
سنابل خافت : سكري الباب بسرعة خير مايشوفني
سلسبيل ناضت تجري تسكر ف الباب
اصيل شافها تسكر ف الباب جاها يجري يدف فيه بالقوة : افتحو يا كلاب علاش سكرتوه ؟؟
سلسبيل ادف ف الباب بتسكره : تي شن تبي فينا يا دراه
اصيل يعيط و يدف ف الباب : افتحي شن اللي ماتبينيش نشوفه ؟؟ ريتك كيف فنصتي فيها
سنابل تصيح : حاجات بنات يا حمار برااااا
اصيل يدف ف الباب : بلا كذب انتي وياها اكيد تتكلمي ف التليفون
سلسبيل تسكر ف الباب و هو يدف
سلسبيل : تليفونات شني يا حماااار
اصيل دفها بالقوة و خش : شن اديرو يا امسخات !!!
سنابل جسمها صقع و وجهها انقلب
سلسبيل : يا حيوااااااااااان
أصيل شاف سنابل تحشم و طلع من الدار
سنابل تصيح : والله ماتتحشم يا حماار يا خنزير
اصيل من برا الدار : وين نندري على امكم اديرو ف العفن
و طلع من الحوش و سكر الباب
سنابل ترعش : رعشني الحيوان الله يرعشه 😭
______________________
هناء ف دارها مقعمزة على سريرها
اتدلك ف رجليها و تاعبة : شن صايرلي ؟؟ معقولة يوسف أثر فيا هكي
مدت رجليها و اتكت ؛ فتحت تليفونها و خشت ع الفيس تمشي بيه الوقت
بعد شوية ملت ؛ سكراته و غمت روحها
بعد ربع ساعة 🌹
سلسبيل فتحت الحوش
يوسف : هي وين ؟
سلسبيل : متكية ف سريرها
يوسف خش : مانبيش وحدة منكم تخش وراي
سلسبيل : تبينا ننزلو 😳
يوسف ضحك : مش للدرجة هادي
سلسبيل مشت لسنابل ف الدار
و يوسف طق الباب على هناء ✊
هناء غامة روحها باليرغان : خشي
يوسف خش : هناء
هناء سمعت صوته انصدمت : يوسف !
يوسف قرب منها و وقف بحداها
هناء غامة روحها و قلبها يدق
يوسف قام الغطاء من عليها : هناء
هناء شبحتله : نعم
يوسف طبس عليها : علاش مدايرة ف روحك هكي
هناء سكتت
يوسف يشوفلها و ساكت
هناء : تبي حاجة ؟
يوسف : نبيك تنوضي و تنشطي روحك
هناء اتكت تاني : مافياش حيل
يوسف ضحك : هذا كله لأني صارحتك بمشاعري ؟
هناء وجهها انحمر و غطت روحها تاني
يوسف : يعني ماتبيش تنوضي
هناء : تؤتؤ ( بمعنى لالا )
يوسف : به تو نعرف كيف انوضك
قام الغطاء من عليها و قامها ف غمره
هناء انصدمت : شن ادير ؟؟؟
يوسف طلع بيها من الدار : مش ماتبيش تنوضي ؟ هاني نوضتك بالسيف عليك
هناء تشوفله و مصدومة : يوسف انت اكيد مش طبيعي نزلني تو خواتي يجو
يوسف فتح باب الحمام و وقفها قدام اللاوندينو يغسلها ف وجهها : فيقي هيا
هناء وجهها امية : مافياش حيل نوقفففف 😩
يوسف شادها : اني انشطك
يغسلها ف وجهها و يبللها ف شعرها
هناء ادف ف ايديه : باهي باهي خلاص
يوسف خدي الفوطة يمسحلها
هناء خدتها منه تمسح بروحها : باهي تمام تمام نشطت
يوسف طلع من الحمام و وقف قدام العتبة
هناء حطت الفوطة و طلعت من الحمام
يوسف : توا تبدلي حوايجك و تنزلي نبيك
هناء خافت : شن تبي فيا 😰
يوسف : تنزلي و تعرفي 😉
هناء سكتت
يوسف وشوشها ف وذنها : ماتعطليش
هناء قلبها يدق و ساكتة
يوسف طلع و سكر الباب
هناء خشت لدارها و تلوحت على سريرها
________________________
المنذر مع عصام ف المربوعة : شنو جاهز للزيزه ؟ ( الزواج )
عصام ضحك : شن رايك انت
المنذر ضحك : لنقنك جاهز
خش محمد : اوووه منذر هني ؟؟
المنذر وقف يسلم : اهلين
محمد : شكلك ماعرفتنيش
المنذر : بسلامتك
محمد : محمد ولد عماد
المنذر ضحك : ماشاء الله ماعرفتكش متغير واجد
محمد ضحك : حتى انت متغير لولا ماكنتش عارف انك جاي راهو ماعرفتكش
عصام شرين تليفونه ناض بيرد
المنذر شبحله : عقب لبعد بكرا لاحقين ع التكليم 😂
عصام ضحك و طلع برا يتكلم : الو
مرام : هلا
عصام رايق : هلا بالغلا
مرام : هلا بالزين
عصام : هلا بالجمال
مرام ضحكت : شن ادير
عصام : والله معكس مع ولد خالتي جاي من الشرق
مرام : هذا ولد خالتك نورية
عصام : ايه بالزبط .. و انتي شن اديري
مرام : شي ؛ من ساعة فاتت روحت من المزين كنت نصبغ
عصام : احيييه 😍 شن اللون اللي درتيه
مرام ضحكت : مفاجأة
عصام : ياساتر كان ماتطلع كارثة مش مفاجأة
مرام : كخكخكخكخ 😒
عصام ضحك : نبصر معاك حبيبتي
مرام : احكيلي شن صار ف دار النوم ركبتها ؟
عصام : تي ليها اسبوع خيرك
مرام : والله راسي دايخ ماعاد قادرة نفكر
عصام : مازال الشاشة ماركبتهاش بعدين فالليل بنكسد عليها
مرام : باهي كويس
خشت عليها امها نجمية : قاعدة تتكلمي ؟؟
مرام نزلت التليفون لوطا : نعم ماما
نجمية : نوضي شوفي الكسكسي اللي حاطتيه ع النار قريب يشيط
مرام تعض ف فمها و توشوش : باهي راهو يسمعك
نجمية و هي طالعة من الدار : مش عارفة كيف بتتزوجي و ف اسبوع العرس قاعدة تتعلمي ف التطييب
مرام ردت التليفون لوذنها : الو
عصام : تي وين مشيتي
مرام : هادي ماما قتلي تعالي سلمي على خالاتك جو 🌚
______________________
حلومة مقعمزة مع نورية و اسماء و كناينها
حلومة : ايه هذا الصح
اسماء : شن هضا الصح يا خالتي من جدك تحكي ؟ نقولك ان لازم نعطوه علم لما نطلعو و لما بنشرو اي شي ولما بيزورنا حد من هلنا لازم ناخدو شوره
نجاة تصب ف الشاهي : بجديات هكي عمكم يتصرف ؟؟
و مدتلها الشاهي : تفضلي
اسماء خداته منها : اها والله زي مانحكيلكن عمي هو اللي يتحكم فينا ف كل شي من اكبر شي لأصغر شي مش مخلي ولاده متهنيين بكل
سعاد تاكل ف غريبة : ياناري عليكم مابعدكم تاريته عمي فيه الرجي
حلومة حطت الشاهي و فنصت فيها : شن قصدك بِ فيه الرجي ؟ شنو كاين عافس على رقبكم اوه ؟
سعاد تحشمت : لا مش قصدي يا اللاّي
اسماء ضحكت : فاهمة قصدك يا سويعده عمي العارف ماشاء الله عليه لكن كان نزيد نحكيلكن عللي عندنا يانعليا نقعد لعند بكرا و مانتمش
حلومة : لكن ديما خليك باهية معاه حتى كان هو مايصلحش عامليه بأصلك خير مايحطك ف راسه و يطلقك من راجلك و يزوجه
نجاة ضحكت : مش للدرجة هادي عاد
اسماء شبحتلها : والله يديرها مسمووووم انتي كان تبحتي فيه بس تخافي منه
______________________
08:30 م
يوسف مقعمز ف الجنان يدخن و يراجي ف هناء تنزل
هناء ناضت من سريرها و خشت للحمام خدت دوش سخووون و لبست و نزلت لحوش جدها لقت العيلة جايين و فاتحين المنظومة و جو مليح
خشت لدار المعيشة : السلام عليكم
نورية كانت متكية قعمزت : و عليكم السلام ، هنيوه !!!
هناء ضحكت و طبست تسلم عليها : كيف حالك خالتي نورية
نورية : الحمد لله شن حالك انتي
هناء : كويسة تمام
نورية : معقولة هضا وين تجيني تسلمي ؟
هناء : سامحيني غر كنت تاعبة شوية
نورية ابتسمت : سلامتك
هناء : سلمك ، امالا وين اسماء
نورية : يمكن اتدوش لولدها
هناء ابتسمت و طلعت من الدار
_____
يوسف تليفونه شرين لقاه أشرف صاحبه
رد عليه : ايوه
أشرف : تي وين يا برو معاش ريناك شكلك انت العريس
يوسف ضحك : ياريت والله
اشرف ضحك : اطلعلي برا اني
يوسف : دقيقة هي .. و سكر الخط
طفي دخانه و ناض طلع فم الحوش
اول مافتح الباب لقي أيوب صاحب محمود و معاه جماعة
يوسف : تفضلو ؟
أيوب : محمود قاعد ؟
يوسف يشوف للولاد : لا والله ماريتاش اليوم
أيوب شبح للولاد : امالا لما يروح قوله دورك أيوب
يوسف مارتحلاش : ان شاء الله
أيوب مشي هو و جماعته : تو نوريه غدوا كان ماذبحتاش ؛ يا اني يا هو
__________
هناء طلعت للجنان لقت مافي حد
جي من وراها المنذر صفق ايديه و خلعها
هناء انخضت و شبحتله : خيرك ؟!!
المنذر ضحك : كنك راقيلك ؟
هناء سلمت : اهلا كيف الحال
المنذر سلم : الحمد لله وانتي ؟
هناء : كويسة تمام
المنذر : ماشاء الله كلكن تغيرتن زي انتي زي خواتك
هناء ضحكت : اكيد بنتغيرو ليك سنين ماريتناش
المنذر : شن مدايرة
هناء : مدايرة تشيز كيك من امس تبي ؟
المنذر ضحك : عليك سماطه عادي به
هناء : زي برادتك 😛
المنذر يضحك
هناء : خليك نركب نجيبها و نجي
المنذر : مية مية
هناء مشت و المنذر خبط بطنه و سكت
__________________
سنابل تتكلم في التليفون : يا آدم أفهمني المرة اللي فاتت سترني ربي اللي ماشافنيش تبي الليلة ننفضح يعني ؟
آدم : مالياش علاقة بيك ليا اكتر من ثلاثة أسابيع ماشفتكش مش معقولة هكي عاد
سنابل : باهي كيف الراي
آدم : نجيك من ورا الحوش انتي اركبي ع السلوم و نهدرزو من السور
سنابل ضحكت : اكيد تحلم انت
آدم : علاش نحلم ؟ مش عندكم شجرة من تالي ! خشي تحتها
سنابل تسمع فيه و ساكتة
آدم : مش حانعطلو ربع ساعة نشوفك و نهدرز عليك و نروح
سنابل : باهي تو نرد عليك
آدم : لا توا تقوليلي مانبيش نتأمل ع الفاضي
سنابل : باهي كانش مع ساعة واحد
آدم : اوكى عادي
_______________
09:30 م
اشرف : والله هكي نفكر
يوسف : علاش بتولي لبريطانيا يا راجل اهي مشت الأمور و الشغل اموره ع الكيف
اشرف : اتضايقت هلبا الوضع اللي صاير مش واخد عليه مامشاش معاي يعني من الاخير ماقدرتش نتأقلم
يوسف : تزوج و جيب صغار تو تتغير نظرتك للمعيشة هني ، غر بلادنا مش مؤهلة لمعيشة العزوبية هدا علاش قالق انت
اشرف شبحله : امالا هداكا الموضوع شن صار فيه
يوسف شبحله : اما موضوع ؟
اشرف : موضوع بنت عمك
يوسف تكنطا و سكت
أشرف : ماصار شي يعني ؟
يوسف : اني دويت معاها و على اساس بترد عليا لكن هي سكتت و فاتت الموضوع
اشرف : باهي افتحه معاها تاني
يوسف فتح باب السيارة : هي نشوفوك
اشرف : خيرك مازال بكري
يوسف نزل : هو هداكا مازال عندي مشوار بنروح بالوالدة
اشرف : اوكى
__________
هناء مقعمزة مع المنذر ف الجنان و تضحك
يوسف سمع ضحكها من ورا باب الشارع استغرب
فتح الباب و خش
المنذر ياكل : يعطيك الصحة والله طعمتها سمحة بكل
هناء : صحتين
يوسف وقف و عقد حواجبه : دوم الضحك ان شاء الله
هناء شبحتله و سكتت
المنذر شبحله : اجمعين هيا تفضل
يوسف فنص ف هناء : صوت امك تنادي
هناء ناضت و خشت
المنذر استغرب : كنك فيه حاجة ؟
يوسف فنص فيه و خش ورا هناء
هناء حست بيه وراها ركبت لحوشهم تجري
يوسف لحقها ف الدروج و شدها من ايدها
هناء شبحتله : اي وجعتني
يوسف عاقد حواجبه و عيونه غضب : شن مقعمزك معاه بروحك ف الوقت هذا
هناء : عادي ولد خالتي
يوسف متعفلق : ماهوش ولد خالتك !
هناء سكتت
يوسف قرب منها و هو مكشر وجهه : اول و اخر مرة نشوفك معاه بروحك
هناء خافت و سكتت
يوسف يدوي مسكر سنونه : فاهمة ولا لا 😠
هناء هزت راسها
يوسف يتكلم بصبعه : و مازال تقابليه بلا حجاب حايصير شي مش حايعجب الكل ؛ حانقلب ام الحوش باللي فيه
هناء ...
يـتـبـــع ... 💗
شن رايكم فيها الحلقة بالنكهة الشرقاوية 😜❤️؟؟
__________________
