رواية عشق لا يروض الفصل الخامس 5 بقلم حنين محمود
اهلا بكم في مدونة مكتبة حواء نقرأ لكم ونكتب من اجلكم
عشق لا يُروض
الحلقه الخامسه
بقلم: حنين محمود إبراهيم
____________________
ياسين: لا يا حليتها كلهم عارفين تبقى اخت مين كويس واللي هيقول عليها حرف عارف بردو كويس اني هدفنه مكان ما هو واقف
والكلام مش هيبقى عليها هيبقى عليك انت اما عرفتك انت لعبت مع مين مبقاش انا ياسين
احمد: انا ماشي يا خالتي بس منش داخلكم بيت تاني
ياسين: استنى عندك خد الخرده اللي انت جايبها قبل ما تغور
خلص كلامه ودخل اوضة نيروز ورجع بالدبله ورماها في وشه وقال: خد زبالتك دي ومن النهارده مش عاوز المحك قدامي تاني حتى لو بالغلط
منال شهقت: انت اتجننت؟! بتفركش الخطوبه بمزاجك؟!
ياسين لف ناحيتها بعصبيه: اه بمزاجي لإن دي اختي ومسؤوله مني وانا هنا الراجل واقول ايه يمشي وايه لا
منال ضربت على صدرها وقالت: يا خراب بيتك يا منال هقول ايه لاختي دلوقتي؟!
ياسين صرخ فيها: قولي ان بنتك بني آدمه مش ذبيحه هتتساق على جوازه بالعافيه
منال بعصبيه: انا امها واعرف مصلحتها اكتر منك
ياسين ضحك بسخريه: مصلحتها؟! تدفنيها بالحيا وكدا عارفه مصلحتها بجد والله
منال زعقت فيه: احترم نفسك وانت بتتكلم معايا
ياسين: لازم تفهمي بقى ان نيروز مش هتتجوز احمد وعلى جثتي لو الجوازه دي تمت
ولو هتحصل هاخد اختي وهنمشي من هنا وتنسي ان ليكي عيال اصلا
منال: غصب عنها هتتجوزه
ياسين ضرب بإيده على الترابيزه بعنف لدرجة انها اتخضت: قولت لااااااااااااااا
منال حاولت تهدى لما شافت حالته
وقالت : طب اهدي يا حبيبي اهدي بس ونتكلم
ياسين : الكلام خلص على كدا واللي عندي قولته واللي هيعارضني يستحمل بقى نتيجة افعاله
خلص كلامه وبص لأحمد اللي واقف بغضب وقال:
لو شوفتك في المنطقه هنا بالغلط وربي في سماه هخليه اخر يوم في حياتك يلاااا برههه الداهيه اللي جابت تاخد
احمد بصله بغضب وسابه ومشي اما ياسين رزع الباب في وشه
وبص لمنال وقال:
الحيوان دا لو دخل بيتنا تاني تنسي انك خلفتي من الاساس وانتي عارفه اني اعملها ومش بتكلم وخلاص
خرج ياسين للبلكونه بعصبيه وهو بيفك أول زراير من القميص بتاعُه وكان مخنوق جدًا
كان واقف وساند إيديه على سور البلكونه وبيتنفس بعنف وعينيه بتطلع شرار
أما جواه
ف كان بيحاول بالعافيه يسيطر على فكره واحده بس بتدور في راسه
إنه مايروحش يقتل أحمد بإيده
بعد ثواني خرجت نيروز من الأوضه بخطوات متردده
وقفت وراه بخوف وقالت بصوتها الهادي المُحبب لقلبُه: ياسين
مردش عليها
نيروز : خلاص بقى اهدي الموضوع خلص خلاص
لفلها فجأة وقال: انتي ازاي تسكتي على حاجه زي دي ها؟! ازاي يخوفك بالشكل دا وانتي مخبيه؟!
نيروز : كنت خايفه تكبر الموضوع
ياسين : وكنتي مستنيه ايه؟ استنى لما يعمل اللي في دماغه وبعدها تيجي تقوليلي؟!
دموعها نزلت تاني وقالت: والله ما عرفت اعمل ايه
أول ما شاف دموعها سكت
بصلها كام ثانيه وغمض عينه وضغط على ايده جامد عشان يحاول يهدى
بعدها نزل عينه على إيدها اللي كانت مِحمِرَه وشِبه وارمه
ملامحه اتغيرت فورًا
مسك إيدها بهدوء المره دي وقال: وريني
نيروز بصتله باستغراب من هدوءه المفاجئ
بس هو ما سابش ليها مجال للتفكير سحبها وراه ودخلوا على جوه خلاها تقعد على الكنبه وهو راح جاب كيس تلج صغير وقعد على ركبته قدامها
فضل ساكت شويه وهو بيحط التلج على إيدها بحذر شديد وكان خايف يوجعها
أما هي ف كانت باصه عليه باستغراب
أول مره تشوف ياسين بالشكل دا
عصبي ومرعوب عليها في نفس الوقت
قطع الصمت وهو بيقول: لو كان مس شعره منك مكنتش هتردد لحظه اني اقتله واشرب من دمه كمان
نيروز اتوترت وقالت: خلاص يا ياسين ارجوك متفكرش كدا انا خايفه عليك ومش عاوزاك تتإذي بسببُه
مردش عليها لكن فجأه حست بإيده بتربت على شعرها بخفه وهو بيقول:
طول ما انا عايش محدش هيأذيكي فاهمة؟
فضلت نيروز باصه ليه بصمت وقلبها بيدق بعنف
سحب إيده بهدوء من على شعرها وقام وقف وهو بياخد نفس طويل بيحاول يهدي بيه النار اللي جواه
أما هي ف كانت لسه متعلقه بنظراته اللي محاوطاها
قطع الصمت وهو بيقول: من النهارده مفيش نزول لوحدك
نيروز عقدت حواجبها: نعم؟!
بصلها بجمود: اللي سمعتيه
نيروز: بس انا اتقبلت في الشركه وهروح الشغل كل يوم
ياسين: هروح اوصلك
اتصدمت من كلامه وقالت : لا طبعًا يا ياسين.!! انت عندك شغلك وحياتك مش هتفضل ورايا رايح جاي
رد بدون نقاش: افضالك
اتنهدت بضيق: انت بتخنقني على فكره
قال بحده: وانا مستعد اخنقك العمر كله مقابل انك ترجعيلي سليمة كل يوم
اتسمرت مكانها من طريقته
هو كان بيتكلم بعصبيه
لكن كلامه لمس حاجه جواها لأول مره
بعد ثانية بعد عينه عنها وقال: ادخلي نامي يلا انتي تعبتي النهارده
نيروز: وانت؟
هقعد شويه
كانت هتمشي لكنها وقفت فجأه وبصتله بتردد: ياسين
همهم من غير ما يبصلها: امم
قالت: شكرًا
بصلها بإستغراب: على ايه؟
هي ابتسمت ابتسامه خفيفه وقالت: عشان صدقتني
قال بهدوء : حتى لو الدنيا كلها قالت عليكي كدابه انا مستحيل أصدق غيرك
قبل ما تكوني اختي انتي بنتي اللي ربيتها على ايدي من وهي 8 سنين
انتي بنتي اللي شيلت مسؤليتها وانا 14 سنه وكان كل همي انك تكوني ناجحه ومش ناقصك حاجه
امشي من وشي يا هابله انا ما عملتش حاجه
قربت منه وباست خده وقالت: ربنا يخليك ليا يا حبيبي وما يحرمنيش منك ابدًا يارب
ياسين: ويخليكي ليا ياقلبي
بعد مرور شهرين على احداثنا دي كانت نيروز
داخله الشركه بسرعه
وهي ماسكه ملفات في اديها ومستعجله راحت على الاسانسير على طول بس مره واحده خبطت في شاب والملفات وقعت منها
نيروز بغضب: انت عبيط.!! مش تفتح يا اخ انت ولا انت ملكش اخوات بنات ف ماشي تخبط في بنات الناس ولا ايه حكايتك مش فاهمه؟؟
يامن بصلها وقال: اا انا اسف مش قصدي
نيروز نزلت تلم الورق من على الارض ف نزل هو كمان عشان يساعدها صرخت فيه مره واحده بغضب
وقالت: لا بقولك ايه شغل الروايات بتاع انزل الم معاها الورق واحط ايدي على اديها وابحلق في وشها دا مش بياكل معايا خليك مكانك الا وقسما بالله باللي في رجلي وهنزله على دماغك
يامن بصلها بقرف وقام وقف وقال: جتك القرف في شكلك
نيروز لمت باقي الملفات من على الارض وبصتله وقالت: القرف دا يبقى الزريبه اللي امك جايباك منها
يامن رفع حاجبه وقال بسخريه: لا والله؟ اسملا على اللي داخله تجري زي القطر المقلوب ومش شايفه قدامها
نيروز : انا قطر مقلوب يا بني آدم يا جبله ياللي شبه لوح التلج انت
يامن ضحك غصب عنه وهو باصص عليها: انتي لسانك طويل اوي
نيروز عدلت شعرها وقالت بثقه: لا ما هيبقى في اطول من كدا لو ما ممشتش حالا من قدامي
في اللحظه دي باب الاسانسير اتفتح وخرجت منه بنت من الموظفين بصتلهم باستغراب وبعدها قالت: الانسه نيروز مستر رائد قالب الدنيا عليكي فوق
نيروز شهقت وقالت: يا نهار اسود!!
وبصت ليامن وقالت: انا لو اترفدت من هنا هيبقى بسببك يا لوح التلج انت
خلصت كلامها وسابته وجريت بسرعه على الاسانسير
يامن فضل باصص لطيفها وهو مبتسم وقال بهمس: مجنونه والله
في مكتب رائد
كان قاعد بغضب وهو بيبص للساعه كل شويه لحد ما الباب اتفتح ودخلت نيروز وهي بتتنفس بسرعه
نيروز بتوتر: اسفه والله الطريق كان زحمه و......
رائد قاطعها ببرود : والربع ساعه اللي فاتت كانت زحمه بردو مش كدا؟
نيروز بلعت ريقها وقالت: يعني...ما هو اصل يعني بص نوعا ما
رائد خبط على المكتب بحده وقال : نيروز انا مبحبش الاستهتار وانتي عارفه كدا كويس
نيروز بصتله بضيق وقالت: وانا مبحبش حد يزعقلي
رائد رفع عينه عليها بحده ف اتعدلت بسرعه وقالت: اقصد حاضر يعني مش هتتكرر
رما قدامها ملف وقال بجمود: الملف دا يتراجع ويتبعت قبل الساعه اتنين ولو فيه غلط واحد انتي اللي هتتحمليه
نيروز اخدت الملف وهي بتتمتم: حاضر يا معالي الوزير حاضر يا جناب الباشا حاضر يا سيادة السفير
رائد ضيق عينه وقال: قولتي حاجه؟
نيروز ابتسمت ابتسامه صفرا: بقول ربنا يديمك نعمه علينا يا مستر رائد
بصلها رائد ثواني قبل ما يرجع يبص في الاوراق اللي قدامه تاني ببرود وهو مخبي ابتسامه صغيره حاول ميبينهاش بينما هي كانت واقفه وبتبصله بضيق
وقالت في سرها: دا انا شكلي هتجنن هنا رسمي فهمي نظمي اه والله ياصغيره على الهم يا لوزه
رائد: بتبرطمي ب ايه؟
نيروز: ها
رائد: ايه يا حلوه القطه اكلت لسانه ولا الهوا طير الكلام كفلا الشر
نيروز: احم لا ولا حاجه اتفضل الملفات اللي حضرتك طلبت مني اخلصها امبارح اللي خاصه بتعاقدنا مع شركة الشرق
رائد اخد منها الملفات وهو بيبص فيها بتركيز وقال ببرود: اخيرا عرفتي تشتغلي عدل مره في حياتك
نيروز حطت ايديها على وسطها وقالت بضيق: نعم ياخويا؟ طب قول شكرا حتى ارفع معنوياتي شويه
رائد رفع عينه عليها وقال بسخريه: اخويا؟ وبعدين هو انتي عندك معنويات اصلا زي الناس؟
نيروز فتحت بوقها بصدمة وقالت: ليه ان شاءلله ما اشبهش ولا ما اشبهش يعني
رائد كتم ضحكه بالعافيه وقال: خلصتي؟
نيروز قعدت على الكرسي قدامه من غير استئذان وقالت: لا لسه عندي كتير اقوله بصراحه
رائد بصلها بحده: مين سمحلك تقعدي؟
نيروز اتلفتت حواليها وقالت ببراءه مصطنعه: الكرسي اصل شكله كان محتاج حد يقعد عليه ف قولت اخد الثواب واهو كله بأجره بقى
رائد ساب القلم من ايده وقال وهو بيحاول يتحكم في أعصابه: نيروز متستفزنيش
نيروز ببرائه: انا؟ بتتكلم عليا انا استغفرالله تعرفوا عني كدا بردو
قبل ما يرد عليها الباب خبط ودخل يامن وهو ماسك ملف في ايده لكن اول ما عينه جت على نيروز وقف مكانه واتصدم
يامن: انتي؟!
نيروز قامت بسرعه وبصتله بنفس الصدمه وقالت: يا ساتر يارب لوح التلج؟
رائد عقد حواجبه وبصلهم الاتنين: انتوا تعرفوا بعض؟
نيروز ويامن في نفس الوقت: لا
الاتنين بصوا لبعض بغيظ
رائد بصلهم بشك وقال: تمام ما أدام لا دي طالعه بنفس الطريقه يبقى اكيد في مصيبه
يامن قرب وحط الملف على المكتب وقال وهو لسه باصص لنيروز: دي اللي خبطت فيا تحت وكانت هتضربني بالجزمه
نيروز قالت: عشان تستاهل ماشي تخبط في بنات الناس وبعدين ما انت كنت واقف زي عامود النور في نص الطريق انا مالي
يامن بصلها بصدمه وقال: بقى انا عمود نور.!؟
نيروز كانت هترد لكن صوت رائد قطعهم بحده: كفاايه!
الاتنين سكتوا وبصوا لرائد
رائد سند بضهره على الكرسي وقال ببرود: انا مش فاتح حضانه هنا انتي على مكتبك وانت اتفضل اقعد
نيروز بصت ليامن بتشفي وهي خارجه وقالت بصوت واطي:
احسن يارب ياكلك
يامن رد بصوت واطي لكن لحظه الاسود ان رائد سمعه: خليكي ساكته يا لوزه انتي
نيروز وقفت مكانها وبصتله بصدمة: انت قولت ايه؟!
يامن ابتسم بخبث
رائد: ورحمة امي كلمه زياده وما هيحصلكم طيب انتو الاتنين.!!!!
وانتي على مكتبك يلااا تخلصي الملف اللي طلبته منك وهيبقى نهار اهلك اسود يا نيروز لو مخلصش في الوقت اللي قولتلك عليه وانتي اللي بتضيعي في وقك فات نص ساعه
نيروز بصدمه: لالا والله ابدا ولا ما ينفع
رائد رفع حاجبه وقال ببرود: والله ومن امتى اللي بقوله مش بيتنفذ هتمشي من قدامي ولا تحبي تترفدي
نيروز هزت راسها بسرعه وقالت: لا خلاص ماشيه اهو الواحد بيتعرض هنا للرعب البشري
خلصت كلامها وخدت الملفات بسرعه وخرجت من المكتب وهي بتبص ليامن بغيظ قبل ما تقفل الباب وراها
اول ما خرجت يامن ضحك وقال: البنت دي غريبه اوي
رائد رجع سند على كرسيه وقال ببرود: دي مش غريبه دي كارثه متحركه
يامن ضحك وقال: بس دمها خفيف
رائد بحده: وانت مال اهلك؟
يامن اتعدل بسرعه وقال: ها؟ لا ابدا يعني بقول رأيي عادي
رائد: امممم وبعدين ياعم النحنوح يعني
يامن غير الموضوع بسرعه ومد الملف ليه وقال: دا ملف الاجتماع الجديد بتاع الشركه الإيطاليه اللي حضرتك نزلتني من البيت مخصوص عشان اجيبه
رائد اخده وبدأ يقلب فيه لكن عقله كان سرحان في نيروز وطريقتها المجنونه
رغم إنها طول الوقت بتستفزه إلا إن وجودها بقى ملفت بالنسباله بشكل هو نفسُه مستغربه
بس هو مش قادر ينكر ان فيها حاجه بتجذبُه ليها لكن هل رائد المغربي كبريائُه هيخليه يعترف بحاجه زي دي لا طبعًا خرج من شروده على صوت يامن
يامن: رااااااائد
رائد: ايه ياترله انت ما بالراحه
يامن بمكر: اللي واخد عقلك يتهنابُه يا كبير
رائد: ولا اخفى من قدامي يلا انت لسه قاعد ليه اصلا
يامن ريح على الكرسي اكتر وحط رجله على الترابيزه الصغيره اللي قدامه وقال:
لا يا حبيب اخوك ما انا قاعد معاك شويه ما هو مش بعد ما تصحيني من النوم
وتنزلني من البيت مخصوص عشان اجيب الملف اللي سيادتك نسيتُه
وعاوزني كمان ببجاحتك انزل على طول ليه ان شاءلله لاقي صحتي في الشارع وانا معرفش يا اخويا ولا ايه انا راجل صحتُه على قده اه انا بقولك اهو
رائد: ولا انت مش وراك شغل
يامن بإستفزاز: هو انا مقولتلكش لا بجد والله اخص عليا الف خصايه يابيبي اصل كان ورايا عمليه من شويه بس اتلغت
رائد بسخريه: ليه يا خفيف المريض قرر يصلح العطل في مكان تاني ولا ايه
يامن: ودي تيجي بردو ياريس ولا ايه عيب عليك اخوك مسيطر هو مات بس
رائد: اعوذ بالله في وشك يابعيد وبتقولها في وشي كدا وانت مبتسم للحياه كدا ليه
يامن: مالك كدا يا رايدو ما تخلي خلقك استرتش كدا وخد وادي وتعالى وهدي
رائد بقرف: اراضي ذمتك دا اسلوب جراح مشهور؟
يامن قبل ما يرد جاله مكالمه من المدير التنفيذي للشركه
بص للشاشه ورد بإستغراب
رائد: الو يا شريف
شريف قال بجدية : مستر رائد حضرتك فاضي دلوقتي؟
رائد حس إن في حاجه غلط ف قال: اه اتفضل في ايه؟
شريف: في مشكله حصلت بخصوص ملف تعاقد شركة الشرق والموضوع لازم يتحل بسرعه قبل الاجتماع
رائد عقد حواجبه وقال: مش فاهم ايه المشكله بالظبط؟
شريف فتح الملف قدامه وقال: النسخه اللي اتبعت للعميل النهارده مش النسخه النهائيه اللي اتراجعنا عليها امبارح
رائد بحده: ازاي يعني؟
شريف: البنود اللي تخص نسبه الارباح قديمه وكمان التسعير فيه غلط كبير ولو العميل خد باله منه هتبقى خساره ضخمه علينا
رائد: والملف اتبعت ليهم؟
شريف: اه واتفتح كمان من عندهم من عشر دقايق
رائد مرر ايده على شعره بضيق وقال: مين اللي كان مسؤول عن المراجعه والإرسال؟
شريف : الآنسه نيروز سامح يا فندم
رائد قال بغضب مكتوم : تمام يا شريف ابعتلي نسخه من الايميل حالا وانا هتصرف
شريف: حضرتك لازم تلحق الموضوع قبل مستر فؤاد ما يعرف لأن وقتها الدنيا هتقلب فوق دماغ الكل
رائد: ما خلاص يا شريف قولنا هتصرف
شريف: تمام يا فندم
رائد قفل المكالمه ببطء وهو ضاغط على التليفون بقوه وبعدها اتصل على نيروز
عند نيروز كانت بتشتغل على الملفات
وفجأه تليفون المكتب رن
نيروز ردت بسرعه وقالت بصدمه: قسم التسويق؟
رائد من الناحيه التانيه قال ببرود: على مكتبي حالا
نيروز بصدمه: نعم؟! هو انا لحقت امشي اصلا؟!
رائد: دقيقتين وتكوني هنا الا وقسمًا ما هيحصل كويس خلص كلامه
وقفل السكه في وشها
نيروز بصت للسماعه بغيظ وقالت: كل حاجه عندك زعيق الا ما تقول صباح الخير حتى يا اخي
قامت وهي شايله الملف وراحت لمكتبه تاني وخبطت بخفه
رائد: ادخلي
دخلت نيروز وقالت بتوتر: نعم؟
رائد شاور على اللاب قدامه وقال: انتي بعتي النسخه الغلط للإيميل.!
نيروز قربت بسرعه وبصت على اللاب وبعدها فتحت عينيها بصدمه: يا نهار اسود
رائد بصلها بحده وقال: عارفه دي لو وصلت للعميل كان ممكن يحصل ايه؟
نيروز قالت بسرعه: بس والله ما كان قصدي
رائد قام وقف وقال بنبره حاده: الشغل هنا مفيهوش ما كانش قصدي يا نيروز يا تشتغلي عدل وتكوني قد الحاجه يا متعمليهاش من الاول.!!!!
نيروز سكتت وهي باصه في الأرض لأول
رائد لاحظ سكوتها ف هدي نبرته شويه وقال: عدلي اللي حصل بسرعه قبل الاجتماع
هزت راسها وقالت بهدوء: حاضر
ولما لفت عشان تمشي وقفت مره واحده لما سمعت صوته
رائد: نيروز
لفت وبصتله تاني وقالت: نعم يا مستر رائد
رائد: الملفات خلصت؟
نيروز: وهو انا لحقت اعمل فيها حاجه؟
رائد: معاكي ساعه بالظبط قبل الاجتماع تكوني خلصتي فيه كل الهبل دا
نيروز: تمام يافندم
خلصت كلامها وخرجت من المكتب بضيق من تصرفاته معاها
دا مجنون بجد مستحيل يكون انسان طبيعي شويه يتكلم معاها حلو وتحسه بيهزر زي البني آدمين الطبيعين وباقي الوقت عصبي وبيزعق على اتفه الاسباب
في مكتب رائد قال يامن: ما بالراحه عليها يارائد مش كدا
يتبع.....
