رواية ترويض ولد العشماوي الفصل الرابع 4 بقلم مصطفي جابر

ضربوني يا سراج أمك وهايدي ضربوني وذلوني في غيابك مسكوني ونهشوا فيا كأني مليش حد يسندني وهددوني انهم هيلبسوني تهمة عشان يخلصوا مني أنا عايزه ارجع لأبويا يسراج والنبي مشيني من هنا

سراج بصدمه : طب اهدي اهدي قسما بالله وحق كل دمعة نزلت من عينيكي دي لهجيب عاليها واطيها تعالي معايا وانا أجيبلك حقك تالت ومتلت

خدها ونزل

سراج بزعيق: يا نوجة يا هايدي تعااالولي

نوجة بمسكنة: هيا لحقت كلت عقلك وسخنتك علينا يا سبع الرجااال اكيد الكدابه دي قالتلك اننا احنا اللي افترينا عليها وضربناها مش كده؟

هايدي بشهقة: سراج أنت بتزعق لنا وإنا لسه مضروبة بسببها اتقي الله في اللي في بطني

سراج بزعيق: اتقي الله؟؟ بقي بتمدو يدكم على مراتي في غيبتي وتهينوها في داري والله لولا إنك لكان ليا تصرف تاني وأنتي يا هايدي حسابك واعر جوي جوي

هايدي ببرود: حساب إيه أنا شايلة ابنك حفيد العشماوي ولو مش عايزو همشي من هنا

سراج ببرود : تمشي تروحي فيين استني دنا محضرلك مفاجأة... اتفضلي يا دكتوره.

بتدخل الدكتوره وهايدي اتصدمت لثانية بس رجعت رسمت الابتسامة الخبيثة على وشها

هايدي بمكر: أهلاً يا دكتورة تعالي شوفي ابني اللي أبوه مش عاوزه ده اتفضلي معايا الأوضة

دخلت هايدي ومعاها الدكتورة الأوضة وسراج واقف برا زي الصنم وحاطط إيده في جيبه وعينه على الباب و أبوه واقف جنبه

بعد شوي

الدكتورة بهدوء: مبروك يا سراج بيه المدام حامل فعلاً في شهر ونصف والجنين وضعه مستقر بس محتاجة راحة

هايدي خرجت وراها وهي بتعدل لبسها

هايدي بغل وخبث: سمعت يا سراج سمعت يا حاج شاكر حفيد العشماوي أهو ودلوقتي بقا يا سراج أنا مش هقعد هنا ضيفة ولا وعاء زي ما قولت قدامك حل من الاتنين يا تردني لعصمتك النهاردة والكل يعرف إني رجعت مرتك ست الدار يا إما هاخد ابني وأمشي وقسماً بالله ما هتشوف وشه طول ما أنت عايش وهفضحه في البندر والنجع

سراج بصدمة وزهول: أردك أردك بعد اللي عملتيه في ملك أنتي بتلوي دراعي يا هايدي

هايدي ببرود: اعتبرها زي ما تعتبرها معاك لحد الفجر يا المأذون يجي يردني يا تنسى إن ليك لحم ودم في الدنيا قولت إيه

سراج بسخرية: أنتي شكلك اتجننتي رسمي يا هايدي أنا سراج العشماوي مبرجعش لورا واصل والورقة اللي اترميت في وشك مبيجيش بعدها رجوع حتى لو شايلة في بطنك النجع كله غوري من قدامي وإلا والله العظيم هنسى إنك حامل وهطردك بالمنظر ده

ملك بهدوء: ردها يا سراج ردها لعصمتك

سراج بذهول وغضب: أنتي بتقولي إيه يا ملك أنتي واعية للي بتطلبه ده دي لسه ماده يدها عليكي دي عاوزة تكسرنا

ملك قربت منه وحطت يدها على كتفه بحنان وصوتها واطي: أني واعية زين الولد اللي في بطنها ملوش ذنب يتربى بعيد عن أبوه ولا عيلة العشماوي ينقص منها حتة ردها عشان خاطر اللحم وعشان عمي شاكر ميتكسرش قدام الناس ردها يا سراج وأني موافقة وأهو نربي الواد سوا

سراج بص في عينيها بضعف وهدوء: عشان خاطرك أنتي بس يا ملك وعشان الحنان اللي في قلبك ده اللي بيخليني أصغر قدام نفسي ماشي المأذون يجي ويردها بس حسابي معاها لسه مخلصش

هايدي بابتسامة خبيثة وغل: مبروك يا سراج بس استنى أني ليا شرط ومظنش إن الكريمة ملك هتمانع طالما رجعتني يبقى تطلق الفلاحة دي حالاً مش هعيش في بيت واحد مع واحدة سراج بيفضلها عليا اطلقها يا سراج وخلينا نعيش لبعض ولابنك

سراج بصدمة وزعيق: أطلق مين أطلق ملك؟ أنتي أكيد عقلك طار منك ملك دي تاج راسي والدار من غيرها متسواش مليم اطلعي من نفوخي يا هايدي وإلا قسماً بالله ما هيحصل رجوع

هايدي ببرود وهي بتلعب في ضوافرها: والله أني قولت شرطي يا أنا يا هي وابنك في بطني اختار بقا يا سراج تختار بنت عمك دي ولا تختار ابنك ووريثك

ملك كانت واقفة بتسمع والدم غلي في عروقها مش عشان نفسها بس عشان بجاحة هايدي اللي فاكرة إن الصعيد ملهوش أصول قربت من هايدي بخطوات سريعة وزي البرق نزلت بكف على وشها رن في المندرة كلها هايدي من قوة القلم وقعت تحت رجليها

ملك بزعيق : إخرسي يا واطية سراج العشماوي محدش بيتشرط عليه وأني اللي رضيت بيكي شفقة عشان خاطر الواد مش عشان سواد عيونك واعرفي انه الفلاحة اللي بتغلطي فيها قادرة تدفنك حية في أرض الصعيد أنتي هترجعي هنا خدامة للواد وللدار والكلمة الجاية هتكون آخر كلمة تنطقيها بلسانك ده

هايدي كانت حاطة يدها على وشها وبتبص لملك بذهول

سراج بشماتة: ها لسه ليكي شروط تانية يا هايدي ولا كفاية عليكي الواجب اللي عملته معاكي مراتي

نوجه بغضب: انتي اتجننتي بتمدي ايدك علي ام حفيدي وعاوزة تسقطيها قدامنا كمان يا بجحتك

سراج ببرود: مراتي تعمل اللي هي رايده ياما وهي مغلطتش

نوجة بصدمة: وه من امتي بتعمل اكده يا ولدي وتسمح ان في حد يتهان في بيتك

شاكر بزعيق: اكتمووووو اني مش عاوز اسمع حس حد فيكم وسراج هيرجع ل هايدي

هايدي بصت له بفرحه

سراج بصدمة : أردها إزاي يا بوي بعد اللي قالته دي بتتشرط عليا أطلق ملك دي جاية تخرب البيت مش تعمره وأنا مستحيل أفرط في ضفر مرتي عشان خاطر واحدة كيف دي

هايدي قامت من الأرض : أنا قولت اللي عندي يا حاج شاكر مش هقعد في بيت فيه البت دي يا أنا يا هي والشرع محلل أربعة بس أنا مقعدش معا ضره

شاكر بزعيق: إخرسي يا جليلة الرباية أنتي فاكرة نفسك مين عشان تتشرطي في دار شاكر العشماوي أنتي هنا أم العيل وبس يعني وجودك زي عدمه ليكي أوضتك وأكلك ومرعاة لحملك لكن كلمة طلاق دي متجيش على لسانك تاني وإلا والله العظيم أرميكي في المحطة بالهدوم اللي عليكي والولد ده ناخده بالقانون وباسم العيلة

هايدي برعب : بس يا حاج

شاكر بمقاطعة وقسوة: مبسش ملك دي ست الدار وتاج راسك وهي اللي وافقت تردك شفقة عليكي يعني تعيشي هنا خدامة لمداسها ملك متتسواش بيكي واصل هي الأصل وأنتي التقليد فاهمة ولا أعيد كلامي

هايدي بصت للأرض بغيظ : موافقة موافقة يا حاج اللي تشوفه

ملك بابتسامة وهدوء: نورتي دارك يا ضرتي اهي كدة الأصول رجعت لمكانها والبيت الكبير مبيتقفلش في وش حد حتى لو كان

هايدي سابتهم بغضب وطلعت فوق

سراج قرب من ملك ومسك إيدها قدام الكل وباس راسها بحنية وهو بيطمنها بعينيه قبل لسانه

سراج بهمس : متخافيش يا ملك والله لو انطبقت السما على الأرض ما حد يقدر يزحزحك من مكانك أنتي النفس اللي طالع وداخل واليوم اللي هفرط فيه فيكي هيكون آخر يوم في عمري أنتي الحقيقية والكل هنا خدامين لرضاكي

ملك طلعت جناحها وهي حاسة بتقل في قلبها بس أول ما فتحت الباب اتصدمت هايدي كانت نايمة على سريرها فاردة شعرها ولبسه قميص قصير ومكشوف

ملك بذهول وقرف: أنتي إيه اللي منيمك في سريري ومين سمحلك تدخلي جناحي انا وسراج أصلاً

هايدي بخبث: الجناح ده كان جناحي أنا قبلك يا شاطرة والسرير ده ياما شالنا سوا أنتي دخلتي غلطة في النص لكن أنا الأصل والقديم يحلى لو كان إيه مكنتش قادرة أنام لوحدي والبيبي طلب إنه يشم ريحة باباه فقلت أجي آخد مكاني الطبيعي

ملك بسخرية: مكانك الطبيعي هو أوضة الضيوف اللي تحت ده لو ليكي مكان أصلاً قومي يا هايدي بدل ما أفرّج عليكي الدار كلها بهدومك دي

هايدي قامت وقفت بدلع وقربت منها: تفرجي مين يا حلوه... انتي تعرفي انه سراج كان بيموت في التراب اللي بمشي عليه بصي لنفسك في المراية وبصي عليا كده... أنا الأحلى والأشيك انا اللي سراج هيفضل مربوط بيها العمر كله أنتي مجرد سد خانة عشان يرضي أبوه لكن عينه وقلبه لسه بيلفوا ورايا أنا وعمره ما هيحب واحدة زيك ريحتها بصل

ملك بسخرية: سراج النهاردة كان هيموت عليكي صوح بس هيموت ويخنقك مش يحضنك وبعدين يا حلوة الجمال اللي بتتباهي بيه ده سراج شايفه قرف لما عرف حقيقتك

هايدي بزعيق: طب اطلعي برا الأوضة يالله...وعايزاكي تشوفي سراج دلوقتي اول ما يطلع ويشوفني بقميص النوم اللي بيحبه ده

هيعمل اي