رواية خيط وابرة الفصل الثاني 2 بقلم شمس العراقية
سميعه ...
ـ أمي ضلت على هالحال أيام وأسابيع وعينها عالدرب بلكي عروبه يطگها ضيم گلبها وتعاود ، مدري هجسني گلبي عليها ومـا مرتاحه لان طولت علينا مو من عوايدها هي كلما أحد طس للعرب تچي وياه بس رجلها خبل جلاب أكيد هو مانعها .
الحجيه عطيات ـ أنه اليوم گلبي ما مرتاح ، أهجس بنار وثاكبه بصدري ، دهر صابك يمحمود حركت أفادي على بنيتي شگول شدعي عليك أنت وعمك من لفكم البين وخلصني منكم ، ولج سميعه طسي للكاع صيحيلي منعم خل يجيني بساع .
ـ ليش يمه
ـ من احاجيج لاتلغيين برأسي ، چا أرطن من ساعه على شنهي مو على أخيتج عريب لو الدكن داكج ما تسمعين شو دمشي وصيحيلي أخييج ، هذا مشعان ادزه يجيب أخيته يروح يتوسد حربيه ويعوفني محتركه بناري ، أنه محد يعرف علتي بهل القصر أخ يالقهـر .
ـ عفتها ومشيت للزرع ، شفته مشجل بالدشداشه ولازم الكرك يسكي الزرع ، الله يساعدك خويه .
منعم ـ هلا بسميعه ويساعدج بويه ، خير شمالج
ـ أمي تريدك علمود عروبه
ـ يا طلابة عروبه ، بابا عيالها ورجلها ما ينطوها شنهي نأخذ المره كوه منهم ، خلنها بيت زلمتها هي لو تشتاك تجي ، مالنا خلك لطلايب ويه محمود وأخوانه
ـ أنه مالي شغل ،أجييت أكولك وأعاود القصر ،تجي لا
ـ اجي أمري لله دمشينا ونشوف تاليها شون تفض .
ـ وصلنا لكيناها تفتر بس شافتنا حجت بصوت مخنوك
ـ يمه منعم گلبي ثكبت بي نار هلبت واحد منكم يجيبلي عريب اشوفنها طگت رويحتي على شوفتها
ـ يمه عوفيها والله ساتر عليها ، چا هي وين غير بيت زلمتها على شنو خايفه ومن أسبوع شفتها زينه .
ـ ولك يمه يا أسبوع! أمشي طس لولايه جيبها وتعال
ـ على أمرج يمه .
سميعه ـ راح وأمي ضلت كاعده بالطرمه وعينها عالدرب ، يمه صبينا الغده ما تجين تأكلين ويانا
ـ مـا اريد أتزوهر وميلي عني وروحي تغدي ويه أخواتج وكولي لنهاوند خل أتهير وناخذ خضير ونولي لبيت مهديه اشوفن أخيتج ، لان أخوانج بطو عليه ولا واحد منهم بين ياهو الادزه يروح ينام وأبوج حاير بالفصول وطلايب العالم .
ـ صار يمه ، قبل لا أمشي ، أمي صاحت وراي
ـ ولج تعاي عايني ؟ شو كمت ما اشوفن زين
ـ باوعت وشفت سيارات جايات صوب القصر من كرايبنه وسيارات أخواني
ولاحظت بالسياره أكو تابوت! ...
ـ شنهي هالسرب هاذ شكو ولج حاجيني سميعه!
ـ يمه شحاجييج وصلوا النا
ـ اشم ريحة أخيتج بس ريحتها مقموته
ـ مشت الهم كوه ودخلوا السيارات ونزلوا أخواني والنسوان نزلن يتعاطن ويتصارخن ويدكن ويلطمن وأمي تمشي ما مصدكه لما وصلت وتلكاها مشعان وحضنها وجان تعيــــط بإسمها .
ـ يمه عريب يمه سويتها ومشيتي وخليتي أمج وراج يمه كون أنه مكانج هاي النومه مو الج هاي لأمج أنتِ تنامين على الحرير يمه طركاعة السوده النزلت على أمج موت الكرفني يمه ، ولج چا المن عايشه أنه المن عفتيني ، يبـــوه سوده بوجهك يا حبيب نام رغد يا حبيب مشت بنيتك مشت يمه مو وگتها مشيتج يمه .
ـ موتتها لحد هسه ما مصدگينها ماتت وهي بعدها شابه لاعاشت مثل البنات ولا مثل المتزوجات كظت حياتها ضيم بضيم زوجها ابوي وهي بعدها قاصر والمن لمحمود أكبر منها واحد أهله ما جارعينه ..
خلصت الفاتحه وأمي لاتأكل ولا تشرب وتنعي وتبجي ليل بنهار ما تسكت أبد وعيونها مـا تشوف يينهن من الورم وحاضنه بنات عروبه وثوبها! وكل هاذ ومهديه مكابلتها بس أمي البكلبها نار تاگل مهديه وخلفتها .
الحجيه عطيات ـ يمه حمل الظعن ومشوا يمه مشوا وما ردوا ليا ، يمه گتلوج الما يخافون الله عسى نار گلبي بالعزيز! يمه عريب ، يمه غطاج التراب وغيرج يشم الهوا ومرتاح كون طركاعه تنام عليه يمه كون صواب گلبي بالعزيز ...
ـ تنعي بقهر والنسوان يبجن وياها وجان مهديه تعاين وتنفض رأسها وعبايتها بغضب وطلعت ما مسميه بالرحمٰن ، فلك فلگج حتى مشيتج مو راحه .
لميعه ـ عمتي مهديه وين كامت اكومن اشوفها
سميعه ـ وين موليه كعدي بمجانج وشكو أنتِ بيها تولي عساها لا ردت ، جيتها زايده
ـ شنهي جيتها زايده ، أنتِ خبله شو دوخري عن دربي
ـ رديي لا اكومن انعنع عظامج كدام هالنسواين وأخزيج وأخزي رويحتي وياج ، أنه منا گلبي مكثب بنار على عروبه اطلع قهري كله برأسج هالمدعبل شو أنجعمي
ـ خاب دمشي ما ضلت عليه بس العوجه تتحكم بيه
ـ مشت وتنفض بعبايتها مثل البغل ونهاوند وصبيحه يعضعن بحلوككهن علينا
نهاوند ـ من دهر صابجن وگت أمالخ هسه ، بيا حال احنه ، خريتنا النسواين تعاين الجن
سميعه ـ وأنه شگوو
صبيحه ـ وهي وين عفصت
سميعه ـ ولت مدري
نهاوند ـ شو امشي لحكي أختج ويا ولجن تعاودن وكولي لوحده من البنات تجيب الچاي وشوفن الحلاوه وين صارت .
سميعه ـ لحكتها لگيتها هي وسحاب بنت مهديه يسولفن! شافني سگتن علامجن تهرجن ومن شفتني سكتن؟ .
لميعه ـ وكت هرج! شبيج أنتِ شاربه كاز سلامة عقلج
سميعه ـ لميعه أمشي وياي مو وكت سوالف خلي للموت قدر الماتت أختج ، جريتها وتنفض بيه عبالج ما اعرف بسوالفج أنتِ وسحاب علمود صبيح
ـ خاب ما تسكتين وبعدين شكو بيها اذأ سألت عليه تردين أموت رويحتي
ـ لا لاتموتين رويحتج! ولج كلها تلحك الأوادم ويصير برأسها خير الأ أنتِ تبقين دثو حتى جاسم بي عرج محنه اكثر منج من ساعه الجابوا جنازتها هو ساكن الجول ويعن عليها شنو من گلب شايله كلب هايشه هم مو هيج راضعه حليب مطايا هم مو هيج
ـ شنهي هالحجي هاذ ماله وجه من گفه شكالولج عليه وانهجم جذبج يالفهيمه عود أنتِ الحزنانه خايبه ما توليين عن وجهي درينا التوم مالتي خاب مدري شون جنت جارعتج بطن وحده ريتني دافرتج بدفره وشايله افادج وخلصانه منج ومن هرجج الماصخ هاذ .
ـ عفصت ومشت وأنه رحت شفت البنيات وصبن الجاي وكظيناها لما فضت وخفت الرجل بس كم حرمه يعرفن أمي ويجن عليها ومهديه ولت من يومها وعساها لا ردت ما وراها بس العلوم الموزينه .
كاعده ويه أخواتي نسولف وأمي نامت من شوي ونافع نايم بحضنها من ماتت عمته هو ما عافها مگابلها وكاعد حبيب كلب جديته هاذ بزر الكعدة وبزر شيب لا اكو بعده بس لجن اله معزه وهو هم بسلامته وكيح وفارض نفسه ومحبته .
نهاوند ـ سمعتي حربيه شتحجي على أخوها يكولن ما يلفي عالبيت والوجه مكظم ومدخن وطول الفاتحه هو معصب وهارج الاوادم بصوته وقلة مروته ولا عرفته ابو صماخ .
سميعه ـ چا موهو الجتلها من قهره وضربه الها هسه عكب من ماتت صارت عزيزه من دهر صابك يمحمود .
صبيحه ـ هو شعليه الرجال أمانة الله يحبها ويريد خاطرها والله يوم الينزل هو وكاظم من الدوام متلهف للبيت
نهاوند ـ وأنتِ شمدريج بي شو ما مبين عليه هالحب كل كم يوم طاكها ودازها عليمن ادافعين يصبيحه
صبيحه ـ مو كاظم وياه ويسولفلي عليه وليش ادافعله ترى كلنا ندري بي جان يحبها وگتل نفسه عليها ومن صغر مو مخيل عليها رغم كل المشاكل بين أمي وأمه ما جاز منها ، بس المصيبه أمه واخته نوريه من مصيبه صابتهن هنا ساس البله فرن رأسه بسحورتهن
سميعه ـ يحجن ولميعه عوجت حلكها هزيت رأسي مطي ما يصير براسج خير
لميعه ـ شحجيتي ولج اهجس بيج تحجين عليا اذني اشركتني
ـ خاب ما تسكتيين وليش احجي عليج ليش شمسويه
ـ ما مسويه شيء احسن شيء اكوم وافارك هالوجه الحسن من خفت وجهج وجه المطال .
ـ كامت وكفختها وصاحت بيه أمي بصوت تعبان
الحجيه عطيات ـ سميعه كعدي وكومي جييلي ماي بارد أغسل لنافع شو مصخن خنت حيلي كصته نار تلجع .
صبيحه ـ يمه نافع شبيك عمه ، يمه وجه اصفر كركم
الحجيه عطيات ـ هذا انهبط على عمته كومي شوفي اخوج وين خل يجي ونودي يله بساع خفي رجلج ونهاوند كومي خضي جسمه بماي بارد ، كوم ولك جده كافي نوم ..
سميعه ـ انخبصنا بي وخذوا وتاخروا يله ردوا وكالوا مشكل عنده ابو صفار يبوي منين اجاه وحربيه تخبلت وأمي كعدت وتريد تشرط رأسه بالموس وحربيه ادك وتلطم يمها
الحجيه عطيات ـ ما تنجعمين بكاعج وتخليني اشوفن شغلي الولد ما خايف لان زلمه الا أنتِ ثبرتيني .
حربيه ـ عمه فدوه لوجهج عوفي خلينا نودي لطيب والله أخاف عليه لايصير شيء برأسه لا أطگيلج شريان ويروح من بين أيدينا وهذا الشغل موزين .
ـ ما هساع اكومن واشرط راسج نصين احد يلومني خاب ما تسكتين هذا الطب اهلنا ما ينحجي بي زين موزين
وهسه صمي حلكي لاتخرعين الولد ، ولك حبوبه نافع شون كيفك .
نافع ـ زين حبوبه .
ـ يبعد حبوبتك لاتخاف حبوبه جگة ابره وتصير زين .
ـ كعدت تشتغل ونافع بجه شوي وسكت وكملت ولفت راسه ونومته بحضنها وحربيه مكابله أمي تريد تاخذه وتمشي لولايه .
ـ علامج وجهج وجه البومه مكابلتني شتردين
ـ أريد ابني عمه
ـ وأنه عازته عليج ترى أبني هم ، شو دميلي عني أنتِ وزلمتج وخلوا نايم بحضني وكل عگلكم أخليكم تأخذونه وهو مريض وتلتهين عليه وهو نفسه دنيه يروح يترس كرشته ويرتفع ابو صفار لا خلوا كدام عيني اني اكدرله واداري .
مشعان ـ يمه أمه وتدير بالها عليه
الحجيه عطيات ـ أنه كلت يضل يمي وحجايه ثانيه ما تنحجي طلعوا وردوا الباب بمگفاگم ، سميعه جيبي الغطا أنامن وياه من فدوه لهل الوجه اليجيب العافيه نيالها التصير مريتك تضل مكابله هالوجه هالحسن لاتأكل لاتشرب .
ـ حاطته وتمسح على شعره لما نام ، وحربيه طلعت تدردم ومشعان يهدي بيها تالي اخذها ومشوا ومرت أربع أشهر بلمح البصر وبنات عروبه فترة يمنا وفترة يم ابوهن مبين ما حجوا ولا عارضوا ساكتيين شحدهم يحجون ..
صار يومين نشتغل ولميعه عينها عالدرب ومشدوهه سالفتها سالفه هالبت شمالها والله ما تفوت جيسج
اذا مـا لحد هسه عندج خيط تواصل ويه صبيح خيتي واعرفنح ملكوفه .
نهاوند ـ لميعه اشتغلي من ساعه عيني عليج شغلج شغل وحده تريد تكظي شون مجان وتمشي كفالة وجه انه هذا الشغل ما يعجبني
لميعه ـ هو غير لو يخلص شغلكم فوك ما لازميين فلاييح نوب نعاونهم شغليش هذا
ـ يمت مشتغله هو بس العصر تجين تفرين بطولج ساعتين وتولين شنهي هالهرج هاذ شو اشتغلي وأنتِ ساكته عبالك تشتغل عند الغرب لما كاع الخلفوج .
ـ سگتنا عمي سگتنا .
سميعه ـ رجعنا نشتغل وسمعنا صوت غاد
نهاوند ـ هذا ياهو اليصييح واجانا مطرود عايني زين جنا جاسم أجانا .
لميعه ـ اي جاسم ابو العلوم
جاسم ـ ولج لميعه أجوج خطابه؟ راح نفتك منج ومن طلايبج ونأكل كيك وشربت .
نهاوند ـ شوف الفلك چا أنت ما تسستحي ولك
جاسم ـ اي والله نخلص منها شكو بيها خل تعرس .
لميعه ـ ليش ما نخلص منك يالخبل عايشه على خبزتك من دهر صابك كون هم خبل وهو لسانك شطوله من كون عرسوا عليك اي والله
نهاوند ـ لميعه كبري عقلج وحشمي روحج لا أمدج كدام الاوادم ، وأنت جم مره حاجيتك وكتلك لاتخلي كورك وكورها هي خبل المخابيل عقلها طگه ونص .
جاسم ـ اي بس أنه مو خبل .
نهاوند ـ ما عليك منها ختولي انه الخبله هي تقصدني ما تقصدك يخيي ، يله تعالي اكعد يمي وسولفلي شنهي مـا شنهي من سالفه عندك .
سميعه ـ كعد يحجيلنا ونهاوند تخوز بلميعه وتالي صاحت بينا وگمنا
نهاوند ـ أنه ماشيه للقصر وأنتن كملن شغلجن ويا ويلها وسواد ليلها التلحگني الا امدها بنكرة الوز واطين عيشتها ، يله جاسم أمشينا .
سميعه ـ نهاوند مشت ورجعنا نشتغل بس لميعه تشتغل وتعارك ذبان وجهه كل شوي كابه بوحده من البنات ، أنتِ تخبلتي شعلييج منهن اشتغلي بمجانج وما الج لازم منهن على شنو شايفه نفسج عليهن
لميعه ـ ما يشتغلن بس مشت نهاوند كعدن يرمن تمر ولبن وهنا من ساعه تسممن جا الاكل كلساع والشغل يتعطل
ـ خلهن يأكلن أنتِ شگو بطونهن
ـ خل يجي ابوي الشيخ وأنه الجن والهن على هالشغل هاذ يمت اتزوج وافتك من هالعيشه هاي لا وفواكاها مشعان مخلي نهاوند عليهن وطاكات الشغل سوالف وعلف .
ـ لا بالله تسودنتني ودكج ومدكوج مو البنات! أختي وأعرفنج تردين تسويلج مشكله وتعفصين وتمشين للقصر والسالفه بيها النا جية صبيح مو خاليه وكلام جاسم ما حجاه من جيبه لما سامع طارف سالفه واجانا .
ـ عوذه نخت نفس الخبل اخوها ، فدوانتك ربي عائلها كلهم عقلهم طگه ونص ، شو دمشي عن وجهي خل الحك عمري واخلص منكم واعيش مثل خلك الله
ـ مشت وخلت الشغل عليه ومر الوكت وسمعت صوت باقر فدوه لطولك يبعد عمتك
باقر ـ ها عميمه الكوه ، شو وحيدج
ـ الله يكويك ، اي والله ياعمه مشن عالقصر مدري كالن صبيح وأخوانه جايين خطابه مدري شمالهم تخبلوا على عمرهم وبعد تراب المرحومه ما نشف
ـ أي والله تخبلوا
ـ هاا يعني صدك السالفه اشو تعال سولفلي يبعد عمتك شصار ما صار .
ـ أمشينا للقصر وتفهمين السالفه من حبوبه لان انلاصت والعياط صار بفلس
ـ يا حافظ
ـ حبوبه طفتهم بالنعل
ـ منهو جاي منهم؟
ـ جدي ياسين ولده وكم زلمه وكاظم وياهم بس محمود ما حاضر
ـ حزين على عمتك يا بعد عيني ، امشينا چا المن ضاله ومشينا والسوالف شحلاتها ويه باقر ولاحظت ماكو نسوان دخلت وشفت صبيحه ونهاوند واكفات يحجن ها بشرن شو صنطه!
نهاوند ـ تعاركوا وكبت العيطه للستار
ـ وتالي
ـ نكول هسه فضت بس بعدهم بالديوان يحجون ما معلوم شيصير رغم سالفتهم واكفه بس شغل أبوي الشيخ من يكدر يخالف شوره وجلمته
صبيحه ـ عناد بإمي كله شغله عناد بإمي شون حملتة ذنب موت عروبه ومـا تحاجي ، يريد يرجع يعيد النسب الظاهر ما توب من الأولى ، الله يرحمج يخيتي .
سميعه ـ ومهديه راضيه
صبيحه ـ لا متعاركه وياهم وجايين غصب عنها لان عمي ياسين موافق وصباح يريد المكموعه أختج حتى المخبل يدري بينهم راده ، وگايل بيته لوحده مالها شغل بالعيال بعد مدري شيصير .
نهاوند ـ الله يستر أمشن نشوف أمي شو دخلت يم لميعه ما عاد طلعت وعاد لميعه شكد تحترم وتسمع الكلام .
سميعه ـ دخلنا على أمي شافتنا وسگتت وأول ما دخلت ضلت صافنه بوجهي جن تذكرت شيء جانت ناسيته! حتى اخواتي لاحظن صفنتها
نهاوند ـ علامج يمه صفنتي .
الحجية عطيات ـ لاهيج ، كملتن شغلجن .
سميعه ـ اي يمه وعفت الفلاييح يشتغلن ، عفتهن يحجن وتهربت من نظراتها ورحت على صالحه كعدت اساعدها بالطبخ وبالي يم نظرات أمي معقوله تكون تذكرتني ونقهرت عليه لأن لميعه أجتها قسمه وراح تزوج وأنه أضلن بالدار!
حسبي الله ونعم الوكيل بيك يل ما تتسمى وشوي وگبت العيطه يا حافظ كمت وصالحه ما تحركت ضلت تطبخ طلعت وأمي تحجي بعصبيه وخانكتها العبره
الحجية عطيات ـ ولك شون شون وخيتك بعد تراب گبرها ما نشف من عمت عيني على هذيج النومه النامتها وهسه جايين خطابه على أختك شنهي تخبلوا على عمرهم ولك يمه أسكت هالحجايه لاتحجيها مرتن أنوب
مشعان ـ يمه الحجي مو يمي ليش خيتي رخيصه عليه بس شسويلهم مـا يعرفون مالت الأوادم .
ـ لعد يمن الحجي ولك
ـ يم أبوي الشيخ ووافق وأنطه چلمه لعمي ياسين!
ـ گتلي أبوك لعد
ـ اي أبوي
ـ وين أولي أنه وبناتي أتطلك عگب هالعمر واخذهن وأهج منه ومن أخوه وولده ، أبوك مسودن من يومه وأنه راح اتسودن اكثر منه وطولما خشمي يشم الهوا ما يصير بينا نسب بعد ، والغلطة ما تنعاد والدفنتها هو السبب كون هذيج النومه لابوك مو لاخيتك ..
ـ يمه رحمه لعروبه كافي عاد
ـ لاتحاجيني يمه ووصل حجايتي لأبوك الشيخ وگوله عطيات بنت كتيبه تكول ما أعيد النسب مرتن ثانيه
سميعه ـ مشعان نفض نفسه بقهر ومشه لديوان وأمي مشت وكفخت لميعه الا خضضت مخها .
الحجيه عطيات ـ اذبحج وأطمج بصف أخيتج وما أخلي صبيح يلمسج ويصير ابن مهديه رجال عليج .
لميعه ـ يمـــه
ـ ولهده تلهدج على گلبج ووجعة أبوي التشلع أفادج
ولج مكموعة البين تردينه مو لو تموتين يا لميعه ما تصيرين جنه لمهديه لو أنه أموت لو عرسج على صبيح وبعد أنتِ أختاري .
سميعه ـ دگت رجلها بالكاع وتبجي وصبيحه جرتها من شعرها للغرفه وأمي كعدت كوه تاخذ النفس مخنوكه وبصدرها عبره واجانا نافع مطيور واشرتله جديته
الحجيه عطيات ـ شنهي علومك يحبوبه سولفلي
نافع ـ مهديه ما راضيه والزواج غصب عنها .
ـ أدري ، چا انه دزيتلك على هاي ، أحجيلي على جدك
ـ ما بي شيء جدي الشيخ
ـ نافع أزعل منك حبوبه
ـ حبوبه كتلج ما بي شيء هسه يجي أبوي ويحجيلج
ـ أدري بيك تحب جدك حتى لو تحبني ما تنطي بي شو دميل منا مالي خلكك ما منك فايده ، صبيحه شوفيلي أخيج وين صار .
صبيحه ـ على أمرج يمه
سميعه ـ راحت وسمعنا صوت سيارات تحركت طلعت عاينت زين وشفتهم كلهن واكفين وسلام ومباوس وركزت وما عرفت صباح من قادر لان بينهم شبه وانه مو هلكد علاقتي بيهم بس لميعه تعرفهم .
مشوا بيت عمي ياسين ومحد من هلي وصل وأمي دزت عليهم محد اجه علينا وصبيحه ما فهمت گلشي حتى رجلها مشى وما لحكت تفهم منه لان مشعان بس يطرد بينا ما يقبل وحده تطلع ..
لليل عاينت من الشباج وشفت خضير وعمي رزاق طلعوا من الديوان وخضير مستعجل ويهف بدشداشته بعصبيه! يا حافظ هذا شبي أنوب تخبل علينا .
أمي حمت ودخنت لان محد أجاها ، ودخلوا علينا أبوي الشيخ ومشعان ومنعم وأنجمعنا كلنا وأمي بس شافت أبوي گامت وابوي صاح وراها ومنعها .
حبيب ـ من أنه أحضر تبقين مزوعه بمجانج وتسمعين حجايتي للاخير ومن أكمل تفتحين حلكج وتحجين .
الحجيه عطيات ـ من رجعت من النجف وجبت تراباتها بجف أيدي بعد مالي حجايه وياك ، عطيات ماتت ويه عريب ، وأذا جايني بسالفة أخوك وأبنه مالكم مره عندي وهالسالفه تنسونها مثل ما نسيتوا الاصول الأحترام وما أحترمتوا موتت بنتي وما خليتوا لاهل الميت قدر .
حبيب ـ مالي بهل الحجي والماتت بنتي مثل ماهي بنتج وهذا الموت مقدر علينا كلنا ومو أنتِ التعلميني الأصول والأحترام يأم مشعان ، والسالفه وما بيها البت أنطيتها لأبن عمها وأسبوع اليجي ياخذونها وهناك يعرسون وكلام زايد ناقص ما أريد لا اكلب القصر على روس الخلفوجن .
ـ على جثتي يحبيب على جثتي لميعه ما تصيير لصبيح لو اموتن والله لو أموتن نسب ييني وبين مهديه مـا ينعاد والماتت كطعت النسب من عرجه لاتعيده يحبيب لاتعيده والله أحركهن بالقصر والبي وما اخلي أبن مهديه يگرب صوبها لـو مو ابن عمها .
سميعه ـ اثنينهم نار تثكب وأجه مشعان من برى مستعجل وشاور أبوي وطلعوا مستعجلين وأمي تضرب على رجليها وتصييح على مشعان
الحجيه عطيات ـ ولك شون وخيتك عروبه شون ، تخبلوا بيت البله تخبلوا ، تعال فهمني شكو تهامسون بينكم
مشعان ـ هسه أجيج بس أنطيني صبر رحمه لمرحومه
الحجيه عطيات ـ مـا بيكم زلمه ناصح وكاعد على عقله
هيج الموت ما ضلله قدر ولك مشعان
سميعه ـ لميعه ما طلعت مكبوره بغرفتها وبس تبجي وأمي مشت الها ولحكناها بس صبيحه دخلت وراها أنه يم الباب اسمعها تحاجيها وتضرب بيها .
الحجيه عطيات ـ تردينه مو ومكابله مراسيله شنهي هالمراسيل ولج لميعه تعشكين أبن مهديه ومن ورى ظهري ولج دهر صابج وصاب عمرج ما فكرتي بإخوانج لو شايله المستحى نوب عليه المراسيل .
صبيحه ـ يمه على كيفج وياها والبنت بعد عشگته شتسويلها هسه وهو ابن عمها مو غريب وصباح خوش صباح وفه بوعده واجه يخطبها كولي يالله وتعوذي من أبليس .
سميعه ـ أمي سگتت وصوت لميعه تبجي وتتوسل بإمي .
لميعه ـ يمه دخيلج لاتصيرين ضدي أنه بنتج يمه
الحجيه عطيات ـ سالفتج يا يمه يلميعه أجتي على رجليها وهالمراسيل تفيدني هاج صبيحه أخذيهن ضميهن لما اشوف تالي أبوج
سميعه ـ رجعت كعدت يم أخواتي وتأخر الوقت وأمي تتنظرهم بس عينها عليه وكل شوي تباوعلي
وطلعوا بيت عمي رزاق وأجانا مشعان مستعجل!
مشعان ـ يمه أمشيينا لديوان أبوي يريد يأخذ شورج
الحجيه عطيات ـ دام السالفه بيها شوري أذن أبوك دايخ! والله يدوخه بالزايد ان شاء الله ويلوع گلبه مثل ما لوعني على أختك ، أمشينا يمه ونشوف تالي هالشايب شون يكرط هالعيال نوب عليه أبن مهديه ما اخلص من هالغراب أنه ما أخلص . .
سميعه ـ مشوا ووهبيه خذت ولدها نومتهم ونافع يفتر ما تمشي تنام بفراشك أخوانك مو ناموا شعندك كاعد تحوم بالقصر مثل الذيب .
نافع ـ شعليج مني قصر جدي الشيخ وأفتر واحوم بكيفي .
سميعه ـ ولك فلك شون هيج تحاجي عمتك شو مجلوب لا الكعده هنا خبلتك خل ابوك يرجع للولايه احسن الظاهر بس حربيه تكدرلك يالملسون .
رجعت كعدت يم أخواتي ولميعه نايمه ولافها حتى راسها كلشي ما مبين منها وصبيحه بعدها بملابسها بالجبه مالتها تلمع لمع والكويه مالتها تذبح دومها كاشخه شكد تعجبني كشختها ولبسها وعطرها تكول لبس شيخات ، كعدت بصفها ونمت على رجليها حيل احبنها وحنينه عليه كلما تجي تجيبلي وياها شغلات وملابس وسوالف بنات تضمهن اليه تجيب لكل اخواتي بس انه غير .
صبيحه ـ ولج گومي اشوف وجهج شبي بس لا جلف
نهاوند ـ لا هذا حرك شمس هي دومها تنسى تتلثم
سميعه ـ قربتني وتباوعلي وضربت على وجهه
صبيحه ـ عمت عيني عليج وينج وين الجلف حرامات ولج وجهج شحلاته ، من اجي انوب اجيبلج علاج وياي اعالجه الج ما اخلي ، رجعي نامي لاتوهسين ما بيج شيء
ـ لا عادي يمعوده ، بگلبي اخ لو تعرفين بأختج ما عادت تهتم بشكلها وكشختها مثلج وانطفت رويحتها
وما عدت مثل الاول .
فتحت ظفيرتي وتلعب وتمشط بشعري وتسولف هي وصالحه ونهاوند وأباوع على لميعه ما كعدت ولا شفت رأسها هاي ميته عدله .
نهاوند ـ شيموتها تلكينها فااتحه اذانها مثل خرابة التنور وتسمع كل سوالفنا ، هاي ما تموت كبل ما تعرس على صبيح .
صبيحه ـ خرب بيومج سكتتي ما بيه حيل اضحك مو وكته
سميعه ـ رجعت تمشطلي لما غفيت بحضنها وتأخر الوكت حيل وأهجس هواي نمت وأسمع طارف سوالفهن .
صبيحه ـ ها يمه بشري شصار شحجى وياج أبوي الشيخ
الحجيه عطيات ـ أختج سميعه نامت!
صبيحه ـ أي من زمان ليش شتردين منها .
الحجيه عطيات ـ نامن والصباح رباح ، خل تجي حربيه الصبح وعكبها نحجي لاتستعجلن على رزقجن .!
سميعه ـ الصبح كعدت والغرفه فارغه بس لميعه كاعده والعيون مورمه ودخلت عليه حربيه تعايين ليا وبجت حربيه شكو يا حافظ شبيج .
حربيه ـ أمشي عمتي تريدج تحاجيج ، لميعه أنتِ هم أمشي ويانا .!
لميعه ـ بشريني أصير لأخوج مو
حربيه ـ الله كريم .
لميعه ـ ونعم بالله الله دومه كريم حاجيني بالنظيف حربيه بشريني وركدي نار گلبي الثاكبه من أمس
حربيه ـ أمشي مو وگت سوالف أنه رايحه الحگني .
سميعه ـ حربيه مشت مستعجله ووكفها مشعان مدري شنو حجوا! شجاي يصير ، لميعه نفضت فراشها بوجهي وگامت خبال كون تضلين هايشه أمداك يا صبيح شلكه بيج وعشكج رجعت عليه جرتني من شعري وتعاركنا ومشعان وحربيه فازعوا بينا
مشعان ـ هذن مال زواج لا والله مال دك بالنعل واسرحهن بالهوش والغنم .
سميعه ـ دخلنا على أمي واشرت لمشعان اخذ أبنك وعاود للولايه .
مشعان ـ شتردين مني مو هسه جبتلج حربيه بس تردين تكلعيني ، هسه اولي لدوامي ، صدك شصار نسيت اسأل ابوي ، تنطون مره لصباح لا
الحجيه عطيات ـ أي ليش ما ننطي شگو بي وولد عمها
مشعان ـ هاا هذا حجيج يمه!
ـ اي يمه
ـ والله ما أدري أنتوا تحيرون! يعني هالنسب الكريم راح ينعاد بلميعه وصباح .
ـ أي يمه راح ينعاد
ـ خير أن شاء الله ، وهبيه الحكيني بملابسي .
وهبيه ـ اي عيني أجييت .
سميعه ـ مشعان طلع راح الدوامه وحسيت أمي تريد تخلص منه لان تفتر بالقصر مشدوهه ومنعم اجه وسمعته تحجي وياه بتهديد
الحجيه عطيات ـ بس تحجي حجاية زايده ، أزوجك بيدي وأكسر گلب حرمتك
منعم ـ لا يمه دخيلج گلشي ولا صالحه وأنه ما أريد أتزوج وشتسوين أنتِ وأبوي سوا أنه مالي شغل البنات بناتكم .
الحجيه عطيات ـ اي خلك بعيد لاتهوبز مثل مشعان وأنه وابوك خلونا نشوف شغلنا .
سميعه ـ منعم مشى وما حجه شيء ومشت من يمنا وباوعت على حربيه وكالت الها
الحجيه عطيات ـ أهم شيء رجلج ما يحضر ويلوصها عليه
امشي لديوان شوفيلي عمج .
سميعه ـ دخلت الغرفه ودزت علينا ودخلنا الها
الحجيه عطيات ـ كلجن طلعن بس سميعه تضل! ومن أصيحجن تجن ، يله صبيحه أخذي أخواتج وطلعي .
سميعه ـ بس أنه ووياها دنجت رأسي خايفه منها مدري ليش گلبي علمني هالزواج اليه مو لـ لميعه بس الما توقعته الحجته أمي وكالت .
الحجيه عطيات ـ سميعه أريدن منج تفتحين أذانج وتسمعيني زين يمه لان السالفه تخصج قبل لاتخص أختج!
سميعه ـ رفعت رأسي واشرتلها ورجعت گملت كلامها
ـ السالفه وما بيها صبيح يريد أختج وأبوج أنطاها اله رغم يدري أنه ما موافقه بس أنطاها عناد بيه وعمامج ردوا لولايه ومأخذين الموافقه من أبوج وصبيح فرحان
لميعه صارت اله .
ـ أي
ـ خليني أكمل حجايتي يمه لاتلكفين .
ـ هزيت رأسي ورجعت گملت
ـ بس الصار يا يمه يسميعه غير مجرى السالفه كلها وصارت من صالحج! وهاي بيها أراده من الله أنه يستر عليج ويخلصج من المصيبه التكبعتي بيها!
ـ شون يمه مـا فهمت
ـ أنه أفهمج ، خضير أبن عمج رزاق من سمع صبيح متقدم لأختج أجه هو وعمج وكابلوا ابوح ونهوا عليها لان خضير يعشك أختج! اكثر من صبيح وأزود وتعرفين ابوج شكثر يعز عمج رزاق وخضير عادينا واحد من الولد والايد اليمنى لأبوج وكاعنا ورزعنا وحلالنا والزايده والناقصه ، اعتباراً بيت واحد وهو الوحيد لعمج رزاق
ـ تحجي وأمه مخليه أيدي على گلبي بس لاتزوجني لخضير هذا خبل جلاب يفضحني والله ما يسكت على فضيحه هو أخواته ما يسكتلهن مو عاد أنه يارب استر
ـ أي وأبوج دايخ لان حيل يعز رزاق وما يريد يكسر خاطر ابنه خضير وأنه حجيتله كلشي وفهمته سالفتج
ـ شنهو يمه حجيتي لابوي يصخام وجهي .
ـ من صالحج يمه ، گتله ينطيج لصبيح بمكان لميعه وننطي لميعه لخضير لان صباح عاقل ما يكسر بيج ويفضحج وأنتِ عرضه أكيد يخيط حلكه على عيبج! وهيج أكون رديت الدين لمهديه هم أكسر گلب ابنها مثل ما كسرتج وهم استرج بمصيبتج ونخيط الفضيحه بوحده مجان الثانيه .
ـ يعني تبدلينا أني وأختي لميعه
ـ راح يجي ابوج ويحاجيج وانه أعلمج شتكولين اله وتسوين الكتلج عليه علمود تنسترين يمه وينطم عارج
ـ بس يمه
ـ سميعه لاتخالفين شوري ، تردين تنذبحين وأخوانج يسيحون دمج لـو تنسترين بيتج وتموت فضيحتج هاا أحجي
ـ التشوفينه يمه أنه وياج .
ـ اي هيج أريدج
ـ كعدت تحجيلي وأنه أهز رأسي لما سمعنا صوت أبوي ودخل ورد الباب وباوعلي كبل دنجت رأسي وبجييت
حبيب ـ أحجيلي بويه سميعه ولاتدوخيني أكثر من ما أنه دايخ .
الحجيه عطيات ـ شتحجيلك بعد وأبن أخوك وأمه يلعبون على بناتك يردون ينزلون رأسك بالطين بفضيحه بس انه أم مشعان ما تفوتني سوالف مهديه وهي الدزت صباح كسر سميعه وضحك عليها وهسه جاي يريد لميعه عود يصلح غلطه ويتشرط ويتخير بس انه ما يهون عليه يكسر بسميعه وياخذ لميعه ولا بناتي رخيصات عندي
حسبي عليه هو وامه وهم وضحك الأخوات بعشكه وخلاهن يعشكناه اثنينهم يوميه يضحك ويتغزل بوحده ومراسيل شاهده! على سوالفه ومكسراته ويه بناتك .
حبيب ـ عطيات سكتي خليني افهم من البت أحجيلي سميعه صدك بينج وبين أبن عمج راده! فهميني
علمود افهم راسي من راجليه لـو اذبحج لو اذبح ابن عمج .
سميعه ـ أي بويه هو جان يحاول يكرب صوبي ويكولي احبنج ومن هالسوالف التعبانه مثله بس أنه ما أنطيته وجه ودوم اصده لان فكرت بسمتعتي وسمعتكم أنتوا وأخواني وو
الحجيه عطيات ـ لاتكملين يمه ما يحتاج أبوج صار عنده علم وكشف سوالفهم هو وامه حسبي الله عليهم وهسه تنطيهم مره وأنت الممنون وتسكت لان الفضيحه اذا طلعت من هالباب تنشهر بالعرب ، وخلي صباح يتكبع بغلطته ويه بنت عمه
لعد يغلط ويه أختها ويريدن الثانيه ويتخير عليك شنهي وين صايره فاتحين بيت كواده!
حبيب ـ ليا خسيس يا نذل يا صبيح الكواد
الحجيه عطيات ـ كلهن سوالف أمه مهديه بيت البله تريد تكسر شوكتنا ببناتنا وتفضحنا بالعرب مو اكولك على مهديه ما تصدكني شفت شتسوي وشتعمل بشرف بناتك وقبلها عروبه ماتت وهسه تحول ثارها وصار بشرف هالتؤام .
حبيب ـ سميعه طلعي ودزي على لميعه .
سميعه ـ گمت وكل جسمي يترجف من الخوف يعني أبوي صار عنده علم وأمي شون تكول صباح الكسرني هي شمدريها وهو جان مثلم منو يگول هو! يمه شجاي تسوين وتعملين؟
وكلت لميعه ودخلت عليهم وطلعت وهي تبجي وابوي طلع مستعجل وصاحتني
الحجيه عطيات ـ سميعه يسميعه
سميعه ـ اي يمه أجيتج
الحجيه عطيات ـ حجينا انه وأبوج وخضير هسه يعقد على أختج وتمشي وياه وأنتِ باجر صبيح يجي يأخذج
سميعه ـ يمه تحجين الصدك
ـ اي ليش وكت شغه وأنه ما جايه اخذ شورج لان تمتت كلشي بس جايه اوصيج اديرين بالج واعلمج شتسوين
ـ شتعلميني يمه، أنه صباح ما أريدنه وهو ما يريدني يريد لميعه ويعشكها عشك مخابيل وهي هم ومن امس تبجي عليه ..
ـ عشگها البين وجسمها نصين .
ـ وكعت على رجليها وأبوس بيها دخيلج يمه لاهيج تسسوين وبعدين هو يعرف يمييز بينا من عيوننا هو حافظ كلشي بيها والله يكشفني لاتورطيني دخيلج يمه لاهيج تسسوين بيا عوفيني خدامه الج والنسوان أخواني بس لاتضحين بيه لاجل تخيطين الفضيحه بوحده مجان الثانيه وأختي ما الها ذنب لاتظلمينها بغلطي وتأخذين ثارج من مهديه وما حسيت غير ضربتني راشدي وشالتني ورفعتني من شعري بقوتها بحيث رادت تموتني .
ـ حلكج هذا تخيطينه بخيط وأبره لما تفض هالسالفه ويعقد عليج وأخلص من عارج وگتها لو نكشفتي نذب بلاهم عليهم ويتكبعون بسالفتج غصباً عليهم لان تصيرين حرمته وجنتهم بعد ويكعدون عمامج ونفضها بس الاريدنه منج حلكج يسميعه تخيطينه! .
ـ بس أنه حجيتلج مالي ذنب
ـ لا الج ذنب ، ذنبج ما عرفتي تحافظين على نفسج لانج فاهيه وخوثه وهسه من أريدن استرج وأطم عارج بركبة صبيح ما ترضين وأنه البارحه ريكي يبس لما حجيت لابوج وفهمته سالفتج لان اريدن استرج كبل تنفضحين وأخوانج يذبحونج
ـ بس يمه
ـ شو سدي حلكج لا هسه أحجي لأخوانج وأخليهم يطمون عارج ويدفنونج بصف أختج واخلص منج ومن الفضيحه النومتيها على گلبي
ـ يمه بس مو تزوجيني لصبيح .
ـ ولج خيطتي حلكج وأسكتي لاتحجين ولا جلمه وسوينا كلشي انه وابوج لاجل نسترج وعبالج الكسرج هيج واحد طارش من العرب لا هذا من طرف مهديه هي الدزته يكسرج واجه الوكت أشربها من نفس الكاس الشربتني منه
عبالج گاتله نفسي على نسب مهديه ولج ملطومه على حلكي وأرجع مرتن ثانيه واعيد النسب ويه مهديه علمودج يالعار وأنتِ الما راضيه والله خوش صحلها رجال وكالت أعور .
ـ چا أنه مو بنتج ليش تضحين بيه .
ـ لا مو بنتي مـا عندي بنات فاهيات ما يحافظن على شرفهن ، وهسه تكومين تغسلين وبدون ما تفكرين توافقين وأنتِ الممنونه لما يعقد عليج وگتها لو كشفج مو لميعه ميخالف بعد تصيرين حرمته ينجب على حلگه ويسگت وبنت عمه غصباً عليه
وخل سوالف وتخطيطات امه تفيده مثل ما تكيد الج أكيد الها بإبنها واني عطيات بنت كتيبه .
ـ كلمتها تذبح ضلت غصه بروحي ، نزلت رأسي ونفضتني وتعدل بثوبي وقبل لا أمشي حجيت
ـ والحلال والحرام شون هيج أنتوا تخدعون صباح هو طلب لميعه أنتوا تنطون سميعه
ـ ما الج شغل بهل السالفه وهو يعقد عليج وابوج يدري هو وكيلج وديري بالج تحجين شيء لمهديه لو تهري من جلدج جلد حلكج ما تفكينه وتكولين أمي وأبويه اتبررى منج يسميعه خوش .
ـ أبوي شون وافق وقنعتي
ـ لان سالفة شرف يرضى وهو الممنون وعرف سوالفهم هما وأمهم مهديه يكبعهم بغلطتهم وياج
ـ مدري سالفتكم مدري شونها ما راهمه يمه واحس راح تخازون نفسكم كدام عمامي والاوادم .
ـ أنجعمي يا بنت شنهي تعلمينا مالات الأوادم شو دمشي صيحيلي لميعه وصبيحه وحربيه والباقيات لا يدخلن .
ـ طلعت وشفت خضير يحاجي أبوي
خضير ـ عمي
حبيب ـ الك ما تصير لغيرك ، گتلك الك الصافي لاتضل تخبط ، عاود المضيف ولاتضل مهرفل
خضير ـ لميعه عمي
حبيب ـ اي اي ، ولك امشي عاد خلني اشوف شغلي شدهتني
سميعه ـ حبيب طلعت النا عطيات الثانيه بس نسخه محدثه ، رحت صحتلهن وكعدت تحجيلهن ولميعه كامت تكمز وتملخ بنفسها تسودنت بالكوه صبيحه وحربيه كاظاتها وأنه بس ساكته وأبجي عليها وعلى نفسي
ـ يمه عليج الله من كل عگلچ تردين تنطينا سميعه! وانه يمه وأنه ما فكرتي بيه شكلتي لربج ، ولج سميعه راضيه بعمل أمي راضيه أحجي صخمي
ـ ما اريده والله مـــا أريده ولا اريد أحرك گلبج صح أنتِ حقده وحقيره وياي بس لصح اتمنى تأخذينه حتى لو مهديه أمه هو ماله ذنب بسوالف أمه .
ـ يمه گليبي يمه ولج تصيرين لصباح وانه احترك بناري وفواكاها يزوجوني للخبل خضير والله لو اموتن أموتن وتكطعوني وصل وصل ما اصيرن حرمه لاحد غير لصباح
الحجيه عطيات ـ غصباً عليج وعلى راسج المصلبخ ترضين وتأكلين تبن هم هذا الموجود ، أحنه مو اجانب نزوج عالكيف عجبج عجبج ما عجبج القصر هواي بي حياطين طخي رأسي بواحد وأذا ما ترضين مراسيلج كلهن اخليهم كدام أخوج مشعان وخل هو يزوجج علكيفه ها شكلتي
ـ يمه لاهيييج تسسسوين بيه أنه بنتج يمه وخضير أنه ما أطيقه بعيشة الله شون تزوجيني اله ، والله اخزيكم بالعرب افضحكم أكولن هلي تسودنوا يردون يبدلوني انه وأختي ، حرام عليكم مجرمين كواويد ، من أنعل أبوج لابو ابويه وياج
سميعه ـ ضربتها فطستها من الكتل كوه صبيحه وحربيه خلصناها منها
لميعه ـ عليج الله لا تكسرين گلبي ولاتخربين خوتنا والله مو ذنبي صرت التؤام مالتج ، أحبه يولي احبه ، سميعه عليج الله سميعه لاتأخذينه مني ما أسامحج للموت اذا أخذتي ما أسامحج سميعه .
سميعه ـ بالكوه سگتنها وبالساعات يقنعن بيها وهي تملخ بنفسها وتبجي دم وادفر بيهن وتكمز وترد أمي تكظها وتكفخها وتكعدها وتحاجيها وثلاثه نسوان ملتمات على رأسها الا انه محد يحاجيني لان عاري مغطيني وهالعار لازم يتخيط بخدعه! .
الحجيه عطيات ـ گومي جهزنها باجر يعقد عليها وتمشيين وياه بهذا ثوبج لا دك ولا طبل عالسكيتي
لميعه ـ شنهو يعني فوك ما غاصبيني عليه انوب تزوجيني بدون عرس وبدله شون ما جان ادري انه ارمله ضاله بالدار .
الحجيه عطيات ـ من دهر صابج لعد تردين عرس ودنبك وأختج بعد تراب كبرها اخضر لازم تخبلتي ، تزوجيين وحلكج ما تفتحينه وبثوج تمشين وياه والاسود ما تنزعينه لما يدور الحول مال اختج والله افصم رأسج
سميعه ـ كعدن يعقلن عليها ويرتبن بيها يحهزنها ولليل عقدوا الهم وأمي هي ومرت عمي رزاق مشن وياها للبيت وصبيحه هم وياها وتزوجت لميعه لخضير وضليت أنه سالفتي ما تحملها جبال .
خلص هاليوم والبعده وأنه ساكته وصبيحه تباوعلي وتبجي ما راضيه على سوالف أمي تالي ضميتها بگلبي لما كالوا اليوم يجون يعقدون .
دخلت عليه أمي وباوعتلي بعزم وكالت .
الحجيه عطيات ـ هسه شوية أنوب يجون ويعقدون عليج ومثل ما وصيتج وابوج وكيلج ياخذ موافقتج ويعقدلج ياخذج هناك وأختج صبيحه تروح وياج توصلج لبيته لما يعرس عليج ولو سألج تكولين حزينه على أختي وكاظه لثامي وبوشيتي وأمه ما تحضر ولا أخواته بس حربيه وصار عدها علم وصيتتها تطمم وراج لما نخلص .
صبيحه ـ يمه السالفه ما تنعقل أخاف يعرفها مو لميعه وهنا صح يتشابهن بالشكل بس صفاتهن تختلف وهو عاشك يعني تلكينه يعرفها من بين الف وحده
ـ لا تنعقل أنتن بس اسكتن تنطقن بالشر شو لميعه وتزوجت بعد شكو وما مبدلين احنه وخضير راد بنت عمه وانطيناها لابن عمها .
ـ يمه عوفي هالسالفه دخيلج، ليش تورطينا وياج ومشعان اذا عرف ما يسكت ويفضحنا والله
وخاصة صباح قريب منه اكيد يحجيله منو يسكت بهل الوكت يمه هو الأخو ما ينضمن ، وأنت ليش هيج سويتي وانطيتي لميعه لخضير وهي تريد صباح .
ـ بكيفي محد اله غرض ودام أبوج عنده علم الكل يبلع حجايته ويصم حلگه خليني أشوف شغلي وأفتك ترى عليتن گلبي ، يله كومي جهزي أختج تولي
سميعه ـ مشت وگمت وياها جهزتني وشفت أبوي شايل سبحته ويفرك بيها ويهز براسه
حبيب ـ يأم مشعان وينج
الحجيه عطيات ـ موجوده يحبيب .
سميعه ـ وگفت تحجي هي وأبوي وصبيحه ما راضيه على شغلهم
صبيحه ـ أويلي منج يا يمه ومن شغلج وتخطيطاتج الما تخلص كله لان ابن مهديه ما نخلص أحنه كبل عروبه وهسه سميعه دكول مو بناتهم ، الله يعدي هالسالفه عالخير وأنتِ حربيه يمصخمه شون تشاركين بكسرة گلب أخوج
چا اذا كشفها مو لميعه يسگت الج وأنتِ اكثر وحده تعرفيهن ومعاشرتهن راح يرد عليج ويطين عيشتج
حربيه ـ چا بيدي مو شفتيها شون كسرتي ظهري بنافع ومشعان ، انه هم مثلهن مربطه أيديه ورجليه ومخيط لساني هذا شغل عطيات بنت كتيبه الله ما يرضى بي
سميعه ـ يحجن وأنه ساكته وسالفتي الما تنحجي بس أمي وأبوي يدرون بيها يا ترى صباح لو عرف هم راح يسگت وما يفضحني! الله يسترني ودخل علينا أبوي
حبيب ـ ها بوية موافقه
سميعه ـ أي بويه موافقه .
حبيب ـ خير أن شاء الله
سميعه ـ طلع يهف بعبايته وأمي وراه تمشي وفرحانه ولا دكول كاسرتلها گلبين بسالفه ما الها رجل من ايد وخياطها شبج! خياط واحد أعمى ...
حربيه ـ والله اكص ايدي من عرجها اذا ما طلع عمي سوه كل هاذ وطاوع عمتي عطيات بس علمود يكسب رضى عمتي وهم تغفرله وتسامحه على موتت عروبه وترد وياه نفس الأول لان كاتل نفسه علما تحاجي شفتي شون يعاين الها
صبيحه ـ اي شفت شفت هسه تلكينه مستعد يضحي بالعيال كلها لاجل عطيات ومحد وكع بيها غير هالبنات وذنبهن انخلقن تؤام .
حربيه ـ لان سالفتهم ما تنعقل وسوده عليه أخوي صباح ماله ذنب خنت حيلي وسوده بوجهي البارحه شگد فرحان رغم أمي ما راضيه وتحجي بس هو ما واسعته الكاع ويشتري ويأثث بهل البيت سواه جنه دكول بيت خلايجه موهيج .
سميعه ـ ودزوا عليه وكومني مشيت وياها بثوبي الاسود وامي لبستني عباية وغطتني زين كلشي ما يبين مني
الحجيه عطيات ـ بس تحملي لما تطلعين من القصر وعكبها يحلها الف حلال وأهم شيءلاتنسين الوصيتج عليه حلكج تخيطينه كدام مهديه ما تنطين سرج لاحد ما تحجين كلشي ، وكل هاذ سويته لصالحج .
صبيحه ـ صباح يمه والله حاطة ايدي على گلبي ما مرتاحه لهل السالفه كلها
الحجيه عطيات ـ أنتِ بس لاتنقطين بالشر ما يصير شيء ولو صار نكول هو راد سميعه مو لميعه! وكتها عود انه احلها محد رايد شورج يله اخذيها وامشن
سميعه ـ مشيت بصف صبيحه وحربيه وشفت مشعان جاي من الولايه كمت أبالع بريكي لايكشف سوالف امي لان هو الوحيد ما حجوله لان ما يرضى بالعوجه
باوعتله وعگد حواجبه وباوع على وجهي وهز رأسه لحربيه
مشعان ـ شكو ملثماتها ماخذينها الحرب صدك جذب شسالفه بويه شنهي تبجين
حربيه ـ لا ما باجيه شبيك مشعان
ـ لعد فكن اللثام عن وجهه وخل تتنفس ترى اعزب مو أرمل والمات الله يرحمه فوك ما اهله محد منهم حاضر انوب ننطي حرمته مكبعينها بالأسود
ـ هسه شتريد منها حزنانه عوف البنت مشعان شجلبت بيها
ـ وليش ساكته ما تحجي
ـ غير اليوم تتزوج وتستحي منك
ـ بس أريد أعرف سالفة اللثام شگو بالنص شو گلبي لاعب منجن ومن سالفة اللثام! .
ـ أهوو يمشعان غير شغل نسوان هذا شلك غرض بينا
ـ غضب الله على شغلجن ، يله أمشن اريد اولي
سميعه ـ مشيت وراه وحربيه تبالع بريكها لايكشفنا مشعان ، أحس أمي تريد تخيط الفضيحه بخيط وأبره وهي ما تتلزك بعلج ..
وطلعنا وياهم وكلهم واكفين باب الديوان ومشيت وياهن ركض ركض وأمي بس تريد تخلص مني باوعتها وبگلبي كومة حجي بس سكتت وصعدت ليورا وصديت وجهي لما اجه وباوعلنا وسلم ما رديت السلام ضل صافن علينا مستغرب وانه صاده وجهي عنه .
ونزل وركع الباب وراه وحربيه ضلت واكفه يم السياره وتحاجي أخوها لان نزل يسألها يمكن على البوشيه وحربيه تعاين ليا وتحجي وياه واجه مبتسم وباوعلي وشغل السياره وطلعنا للولايه وعاينت زين شفت كل هلي وأمي شامخه بصف أبوي ومشعان يفرك بلحيته
ويباوع على حربيه وأمي حسيته كاشف كلشي!
ومشت السياره وبكلبي كومه حجي يا هلي ذبيتوني بنص بير أظلم وفزت روحي على حضنة ايد صبيحه باوعتلها أبتسمت وعيونها مليانات دموع وباوعتله وهو يسوق ويباوعلنا ويحاول يركز عليه بس كلشي ما مبين مني عاد گال
صباح ـ صبيحه شسالفه بويه ترى صرت زلمتها فگي البوشيه عن وجهه خل اشوفها زين والله گلبي اشتعل بنار علما حصلتها عفت اهلي متمالخين بينهم الله وكيلج واجيتها .
صبيحه ـ لا عوفه وأمي ووصتها ما تنزعه الا توصل هسه نوصل وشوفها .
صباح ـ براحتها بويه وبراحتها ولميعه لاتضوجين ولاتنقهرين حبيبتي بس تدير السنه مالت المرحومه اسويلج أحلى عرس وأعزمي كل أخواتج وبنات عمامي وسوي اللي تردينه بس هسه صارت الشغله بسرعه بسرعه والبيت كمل ومأثث ومنتظرج .
صبيحه ـ أن شاء الله
سميعه ـ يحجي بإسمها وفرحان ويضحك وبگلبي شكولك اني مو لميعه أنه اختها التؤام انه سميعه يا صباح ، انه الامي ضحت بيه لاجل تخلص من عاري وتنتقم مـن أمك ..
ووصلنا الولايه ودخلنا الفرع مالتهم كلش حلو وأنه ما جايه قليل من جنت صغيره ووگف السياره يم بيت جبير بناء جديد وحلو ونزل وفتح النا الباب وصبيحه لازمه أيدي دخلنا البيت فارغ محد منتظرنا لان محد راضي بس ابو واخوانه وهم ما حاضرين وانه وصبيحه باوعنا مأثث گلشي من احسنه توني اباوع وجان تطفى الكهرباء .
صباح ـ يله ما صار شيء هسه اشعل لاله اتفضلن يا هلا نور البيت والله .
صبيحه ـ يا نور بس دخلنا نهجمت الكهرباء
سميعه ـ هو ضحك وراح يشعل لاله واني ميته خوف
يارب استرني ومالي غيرك ساعدني يالله وصلتني الغرفه النوم وهو شغل الاله وأجه خلاها عالميز وطلع وصبيحه كعدت تحجيلي وتعلمني وبالي مو يمها بس أبجي مااريدها تعوفني حاضنتها وابجي لاتخليني الله عليج لاتعوفيني مثل ما عافتني أمي والله ميته خوف خيتي أنتِ ما تدرين أمي ليش هيج سوت خلت ايديها على حلگي وسگتني
صبيحه ـ سگتي وخل هالليله تعدي عالخير والصباح رباح اني بصفج قريبه عليج بينا بيتين ، يصير شيء أول وحده تلكيني يمج لـو كلها تعوفج أنه ما اعوفج أنتِ بنيتي يله أني اروح غافر سوده عليه من بيت لبيت وأبوه بالدوام
سميعه ـ باستني وراحت وسمعت صوت المفاتيح ووصل لعندي حجيت بصوت ناصي طفي لاله صباح
صباح ـ يا روح وكلب صباح صار من عيني اطفيلج عيوني مو بس لاله وهاي طفينا لاله لك اروح فدوه للمستحي وخجلان من حبيبه ، وأخيرا نورتي حياتي يا شمعتي وأخيراً صرتي حلالي وأني وياج تجمعنا غرفه وفراش واحد ، شهر بحاله ما افارك حضنج اليوم اغفي بركبتج الاحبها وأحب ريحتها اليوم اني ملك زماني اليوم محد مثلي ويملك فرحتي لان حصلتج من حلك السبع من حلك مهديه وعطيات شون أثنين ما يتحصل منهن لا حق ولا باطل مو بالله
سميعه ـ هزيت رأسي
صباح ـ ليش ساكته حبيبتي مستحيه مني شدعوه عاد
سميعه ـ ما حجيت وتقرب ليا وصار تقارب وهو مندمج ومتلهف ومخبوص وأني ابجي بالكوه قاومت لما هناك وجان يعيط بيه ودفعني ويدور عالجداحه يشغل اللاله لان ظلمه ما ينشاف شيء .
صباح ـ معيوبه بنت الگلب اليوم اذبحج والله أذبحج منو هذا منو ولج .
سميعه ـ ما أحس الضرب منين يجيني موتني من الكتل الا خله دمي يرش من خشمي وحلگي ويصييح ويغلط ويسب وخنكني من رگبتي قوي وأني أكح وارفس بين أيديه .
صباح ـ أنتِ مو لميعه شون ولج شون هم معيوبه وهم مو لميعه شجاي يصيررررر والله شگيييت وگلبي لعب ومن ساعة لمست جسمج شگييييت بيج شگيتتتت ملعوب عليه بسالفه التصخم الوجه ، بس گلت لا يجوز مستحيه مني وتعوذت الشيطان بس الأعرفه لميعه وكحه بعيونها أنتِ حتى عينج ما خليتها بعيني! ومن تشوفني تطير من الفرحه الأ أنتِ عبالك جايبيج لفاتحه وجه البومه .
اليوم أطين عيشتج وأسسييح دم يا بنت الگلب يا ساقطه أدبسزز لاعبه لعب وجايه تصيرين حرمة صباح ياهو الضحك على عقلج واكل حلاوه وكالج صباح غشيم وتفوته هيج سالفه ولج ياهوووو ..
سميعه ـ ما حجيت اصلاً ما ينطي مجال أحجي بس يضرب بيه ما خله بيه عظم صاحي كسرني تكسير شعري ترس بي الغرفه وتعب وسحلني من شعري لبيت أهله بدون رحمه شمرني يم رجلين مهديه وعمي ياسين وانه ادور شيء اغطي شعري والوجع ينهش بلحمي من الضرب الشفته منه وعمي ياسين يسأل بي ويحجي عليه وجان تحجي مهديه برودة الكاع
مهديه ـ شبيها .
سميعه ـ كعد يحجيلهم گلشي وغمضت عيوني واحس دم يطلع منهن وما احس غير عمي شالني من شعري وضربني ولزمني هو ومهديه قضوا على عمري .
مهديه ـ بدلوج لان معيوبه مو ،أي هذا شغل عطيات شغل أمج تريد تكربس عارج برأس أبني ، احجي لا اخلي أبني هسه يذبحج ويغسل عارج .
سميعه ـ لازمتني من شعري وخانكتني وارفس برجليه وصباح دفرني بطني بكل قوته حسيت مرد كل احشائي.
صباح ـ أحجي بنت الگلب منو هذا الكسرج منهو وأذا أنتِ مكسوره لعد الباقيات حبل مو وطلع بيت عمي حبيب بيت كواده .
مهديه ـ دگها دگه زينه وخل تخرط البطنها ونفهم السالفه كلها ونشمرها على اهلها خلهم يغسلون عارهم هم ضاحكين علينا ومبدلينها وهم عارها وراها لا انوب تحمل بنغل ويكبعونك بي وتصير ابو لابن نغل ولك هاي عطيات محد يعرفها بگدي .
صباح ـ شتحجين يمه عمي ما أريدها هسه اشمرها بيت اهلها من أنعل ابوها لأبو عمامي لابو الساعة السوده الحبيت بيها شنو مضحكه أني .
مهديه ـ شگلت أني ، والأ أكولك جيبلي الصونده واني ادكها لان دكك ما جاب فايده
ـ اقضي عليها أموتها خلاص
مهديه ـ متشوفها بلعت لسانها بس يمي اخليها تزوع حتى حنجرتها .!
سميعه ـ محد رحم حالي لا عم ولا عمه ولا رجال ولا حما كلها صارت عليه ذيابه ومهديه صبغت جلدي صبغ الا كمت أكح دم وتالي من ضيم گلبي حجيتلهم گلشي وحجيت كل تخطيطات أمي
ياسين ـ أنه تضحك عليه يـا حبيب تنطيني وحده من بناتك مبدلينها لان معيوبه أنه تضحك عليه تضحك على أخوك ، أنت البديت يحبيب ، أمشينا يبوي جيبها وياك اليوم أعلگها على حبيب .
مهديه ـ اشمرها شمرة الجلب على أمها وخلها تحير بعارها أحنه ما نتستر عالعارات المثلها بس تربيه عطيات شتطلع ، عوذه شنهي من بنات أنتن أعوذ بالله من غضب الله الله يستر على بناتنا .
سميعه ـ شايله سبحتها وتباوعلي بحقد وشماته وضحكتها بطارف سنها والعيون مخططات بالكحل الاسود قاتم مثل وجهه الشيطاني ..
واشرت لصباح وگبل رفعني من شعري للسياره وصعدني مثل النعجه وصعدوا وطلعنا لبيت أهلي وما اعرف شــنو منتظرني وأمي عطيات شراح تسوي راح تكدر ترجع الضربه لمهديه؟ ...