رواية صغار العم الفصل الثاني والعشرين 22 بقلم مسرة اسامة
روايــة #صغار_العم
الـحـلــقــة الــثَانــية و الـعــشــرون 🌸
هناء ورقت لروحها ضحكتله ؛ عقدت حواجبها و طلعت اول مانفتح الاسانسير
يوسف ضحك و طلع وراها
هناء شبحتله : هيا خليك في حالك
و شافو نجاة جاية
يوسف : شن صار معاك ؟
نجاة : تمام
يوسف : نمشي نتم أمور الحجز و نجي
.. و مشي
نجاة شبحت لهناء : اطلعي انتي وياه غيرو جوكم قبل مانروحو .. اليوم اخر يوم
هناء : ماما فوتي الموضوع انى نراجي بالساعة و الدقيقة امتى نروحو باش مانشوفاش طول الوقت
نجاة سكتت
هناء تشوف ليوسف و زارتها الضحكة .. ( كان ماخليتكش ماترقدش الليل زي ماصارلي معادش نتسمىٰ )
نجاة : بتركبي معاي ؟
هناء شبحتلها وقعمزت ع الصالون : لالا الجو حلو نبي نقعد هني
نجاة : امالا انى بنركب نلم حاجاتنا من توا
هناء عيونها ف يوسف : به
نجاة ركبت و هناء قعدت بروحها تشوفله و ساكتة
يوسف تلفت و هي نحت عيونها
يوسف قرب منها : عجباتك التقعميزة هني ؟
هناء وقفت : ايه .. امالا حتى انى خليني نمشي نتم أمور حجز الهوتيل و نسكره
يوسف : امك ماقالتليش
هناء بإستفزاز : و علاش بتقولك ؟
و مشت للريسبشن
يوسف لحقها و وقف معاها
هناء تتكلم مع الموظف و مبتسمة : مساء الخير
الموظف ابتسم : مساء الورد
هناء : لو سمحت نبي نسكر الحجز
الموظف مبتسم : حاضر من عينيا ..؛ غرفة كام ؟
يوسف شدها من ايدها و كرها ع الجنب
و شبح للموظف : لحظة لحظة
الموظف شبحله : اتفضل
هناء : خيرك ؟!
يوسف يشوف الموظف : حني مازال مش متأكدين اذا كنا بنسكرو الحساب اليوم او لا
الموظف سكت
هناء : لا متأكدين و ياريت تقولي كم الحساب
يوسف فنص فيها و جبدها من ايدها
هناء تمشي معاه : ااي خيرك ؟؟
يوسف يكر فيها : اركبي و معش تتصرفي من راسك
هناء : انت مادخلكش فيا شن ندير
يوسف خش بيها للأسانسير : تتضحكيلي للراجل و تبيّني في سنونك ؟؟
هناء فكت ايدها : حول العملية معادش تتقوا عليا
يوسف شبح لبطنها : اسف
هناء : خليك بعيد عليا يا يوسف مش ناقصة
يوسف تكنطا : استغفر الله العظيم
اول مانفتح الاسانسير هناء طلعت بسرعة و خشت الغرفة
__________________________
حلومة مقعمزة ف دار المعيشة مع العيلة : ماوتينا شي للعرس يا بنات معاش مازاله هلبا
سلسبيل : غر العروسة توتي بتاتها 😏
امال فنصت فيها : العروسة واتية و كاملة مكملة
سنابل ضحكت : ماشاء الله
أزهار : وينها هي اروى خيرها ماجتش معاك
امال : طلعت مع صاحبتها تحجز ف الحلو
حلومة : كيف حالها توا ان شاء الله تأقلمت ؟
امال فنصت فيها : بتتأقلم فاش يمي ؟
حلومة تلخبطت : انها بتتزوج و بتفتح حوش
روان ضحكت : شن فيه من وعارة الموضوع ؟ الراجل مايبي الا المبكبكة ولا اعزقيله المفرخ بس
سلسبيل و سنابل يضحكو 😂
ازهار : والله كان ماتسكتيش يا فرخة نجيك نقصلك لسانك
__________________________
تاني يوم 🌹
08:30 ص
.
يوسف و نجاة وهناء ركبوا الطيارة
هناء جي مكانها جنب ولد ليبي و يوسف و نجاة جي مكانهم وراها جنب بعض
هناء قعمزت ف كرسيها
يوسف شبحلها و فنص فيها : نوضي انتي لمكاني جنب امك و خليني انى في مكانك
هناء ماتبيش تشوفله : لالا حلوة التقعميزة هني
الولد ساكت
يوسف يدوي مسكر سنونه : نوضي قتلك !
هناء شبحت للروشن و ماردتش
نجاة شبحت للولد : معليشي لو سمحت عادي نقعمز في مكانك و انت تاخد مكاني ؟
الولد شبحلها : سامحيني يا خالتي انى مداير عملية على رجلي و الحركة بحسابها
نجاة تحشمت منه و سكتت
جي المضيف من وراهم : لو سمحتم ياريت تاخدو اماكنكم و تفضوا الممر ؛ الركاب بيخطموا
يوسف شبحله و قعمز ورا هناء هو و نجاة
هناء ضحكت و شبحت للروشن
يوسف حامق و ساكت
نجاة ساكتة تقول ف عقلها .. ( اديري ف عْمل يا هناء !! )
__
بعد شوية الطيارة طلعت ✈️
هناء شبحت للولد : ان شاء الله لاباس عليك
الولد شبحلها و ابتسم : الله لا يوريك باس ؛ شكرًا
هناء : شن سبب العملية ؟
الولد : نلعب ف الكورة
هناء : اكيد الأربطة تمزقو !
الولد ضحك : صح
هناء ضحكت : حتى ولد خالتي هكي صارله السنة اللي فاتت و تعب هلبا
تعلي في صوتها و شادة ضحكتها على يوسف : اكيد حتى انت تعبت ؟
الولد : ايه صح لكن الحمد لله توا خير من قبل غر تبي الراحة
يوسف يسمع فيهم و متعفلق
تلفت لنجاة : سكتيها خير مانسكتها انى
نجاة تلخبطت و وقفت : هناء !!!
هناء شبحتلها : نعم
يوسف حط ايده على وجهه : شهدرتي بإسمها ؟؟؟!!!
نجاة تفنص ف هناء و توشوش : تعالي في مكاني ولا مكان يوسف
هناء ابتسمت : استريحي ماما في مكانك علاش اتعبي في روحك و تخشي مكاني توا
الولد شبح لنجاة
نجاة تلخبطت و سكتت
يوسف يشبحلها : نوضيها
نجاة قعمزت ف مكانها : ماتبيش على كيفها و خلاص
يوسف سكت و هز راسه
1
الولد شبح لهناء : اسمك هناء ! ..؛ عاشت الأسامي
هناء ابتسمت : الله يسلمك ..؛ و انت ؟
الولد : نزار
___
( قرب انتهاء الرحلة )
هناء مازالت تهدرز مع نزار و يوسف دمه فاير و يحس بالوقت مايبيش يتم
هناء علت صوتها : بجديات كنت تقرا في كليتي ؟
نزار ضحك : ايه و متخرج منها ليا ثلاثة سنين
هناء : تصدق لما ريتك حسيت بروحي شايفاتك
نزار : ممكن
هناء سكتت
نزار : و توا تشتغلي ولا مازلتي ماحصلتيش وظيفة
هناء : اشتغلت ف الراديو لكن يوم واحد بس
نزار : و علاش ماستمريتيش ؟
هناء تلخبطت : صار معاي موقف مخجل معادش قدرت نولي
نزار سكت ماباش يسألها ع الموقف و يحرجها
يوسف يسمع فيها و يتأفأف : استغفر الله العظيم ..؛ لو كنا جايين من الصين رانا وصلنا
نجاة شبحتله : وسع بالك وصلنا حني خلاص
يوسف سكت
هناء مازالت تهدرز مع نزار
نزار : تبي تشتغلي
هناء : ياريت لكن ماظنيتش نحصل
نزار : انى نشتغل في قناة (....) كان تبي انى نخدمك
هناء ابتسمت بخجل : شكرًا بارك الله فيك
نزار : الشكر لله ، ندوي بجد لو انتي تبي تشتغلي انى نتملك فيها
هناء سكتت
نزار : افتحي تليفونك و سجلي رقمي عندك في حالة فكرتي بإنك تخدمي تواصلي معاي
هناء منحرجة و ساكتة
نزار ضحك : نيتي صافية ره
هناء ضحكت و فتحت تليفونها تاخد منه ف الرقم
__
1
يوسف تعفلق و وقف : شن اديري !
هناء انخلعت و شبحتله
يوسف يفنص فيها
نزار شبحله
يوسف : نكلم فيك وله ؟
هناء : ريتني درت حاجة ؟؟
المضيفة جت ليوسف : لو سمحت ياريت تستريح في مكانك لان الطيارة حتنزل توا
يوسف سكت و قعمز ف مكانه
نزار شبح لهناء : خوك هذا ؟
هناء : ولد عمي
________________________
سلسبيل ف الجنان تتكلم بالتليفون : بجديات تتكلم انت ؟
ادم : والله
سلسبيل تكنطت : امك فنصت فيا و هزت عليا كيف بتولي تاني ؟
ادم : انى قنعتها علاش معادش كلمتك الفترة هادي امالا
سلسبيل سكتت
ادم : المرة الجاية حاولي ترطبي معاها الجو باش ماتاخدش منك موقف يا سنابل
سلسبيل ساكتة وتفكر
ادم : الو ؟
سلسبيل : باهي امتى بتجي ؟
ادم : اليوم
سلسبيل : شن اليوم و انى اماليا مروحين !!
ادم : باهي غدوا ؟
سلسبيل سكتت و تفكر .. ( خلي تجي اليوم و نفتك منها خير من غدوا و ماما حاتكون تاعبة مش حاتسايرها و هكي حاتتعفلق )
ادم : وين مشيتي ؟
سلسبيل : باهي تمام جيبها اليوم
ادم : اوكى ..؛ نروح من المحل نكلمك على الرقم هذا متع اختك
سلسبيل تشقلب ف عيونها : اوكى
ادم : سلام
سلسبيل سكرت الخط متعفلقة و تبكي : ياربي من اللي داعي علياا و مخليني نعاني في الهم 😭
خش محمود شافها متكنطية : خيرك
سلسبيل رشفت خشمها و شبحتله
محمود وقف معاها : خيرك تبكي
سلسبيل سكتت
محمود : فوتي اللي صار هداكا اليوم خلاص
سلسبيل : اصلا معادش فكرت فيك
محمود : امالا خيرك
سلسبيل : اللي جاب امه مازال معشش ويبي يجيبها تاني
محمود : يعني انتي ماتبيشي ؟
سلسبيل : ايه و مكرهني في عيشتي
محمود : اعطيني نعتة حوشه ولا المكان اللي يخدم فيه و تو نمشيله
سلسبيل : لا مش للدرجة هادي وانت ماعندكش الروح مع المشاكل
محمود : مدامك ماتبيش خلي نديروله حل
سلسبيل سكتت و خشت الداخل
محمود قعد يشوفلها و لحقها ف الدروج
سلسبيل حست بيه وراها تلفتت
محمود ركب معاها : امتى بتجي امه
سلسبيل : اليوم
محمود سكت و سلسبيل خشت لحوشهم
لقت سنابل تتعارك مع اصيل
سنابل تصيح : من بكري تتشرط عليا احترم نفسك عاد !
اصيل بإستفزاز : توا تخشي المطبخ و تعاوديلي الفطور يا اما تاكلي كفوف
سلسبيل خشت لدارها و ماتكلمتش معاهم
سنابل متعفلقة : والله ماني حاطتلك حاجة تسمسم هذا يا اما اتطربق
كيف بتطلع من الباب و بتنزل شدها من شعرها و ضربها
سنابل تعيط و تباعد فيه : ااه حول 😭
اصيل يكر فيها من شعرها : خشي يا حلوفة تو نعرف كيف نربيك
سنابل تعيط : يا بااباااا ؟؟
اصيل : بوك مهناش مافيش من بيحز عليك
طلعتله سلسبيل من الدار : خير عمك زي الثور الهايج !! 😠
أصيل شبحلها : شن قلتي يا امسخة 😡
سنابل ضرباته بمرفقها و نزلت تجري
اصيل شبحلها : تعالي هني يا كلبة الكلااااب
سلسبيل حمقت : احترم نفسك ندادك كبرو و تأدبو 😡
أصيل جاها بيشدها : تو نوريك يا *****
سلسبيل هربت منه و خشت الدار
______________
2
سنابل نزلت للجنان تبكي و تتصل بمحمد ..
محمد مقعمز مع صحابه في قهوة يقرو لان عنده امتحان ف العشية
شاف تليفونه استأذن منهم و ناض يتكلم بروحه
فتح الخط : صباح الورد حبيبة عمري
سنابل تبكي : محمددد 😭
محمد انخلع : خيرك شن فيه ؟
سنابل تبكي : انى تعبت و فدّيت و مليت خلاص ضاقت بيا مافيش الا انت اللي نلجأ ليه
محمد مخلوع : شن فيه حبيبتي ماتخوفينيش عليك
سنابل تبكي
محمد : الووو
سنابل تبكي : محمددد 😭
محمد متفركس : باهي غر اهدي ياعيوني باش نقدر نتكلم معاك
سنابل تتكلم و تبكي ....
محمد تعفلق : مانيش عارف امتى بيبرا هالعيل هوا
سنابل تبكي : انى اعييت معش قادرة نتحمله اكتر
محمد : انى جايك توا ماتركبيش لين نوصل
سنابل : لالا تو يتعارك معاك و تصير مشكلة بينكم بسببي
محمد : تصير مشكلة ولا كارثة ؛ صابر عليه ليا هلبا لازم يلتقاله حل
سنابل سكتت
محمد : عمي وين ؟
سنابل : مشي للمطار
محمد : هي سكري انى جايك
سنابل : به ماتتكلمش معاه
محمد علّا صوته : تحسابيني بنسكتله و هو يمد ف ايده عليك ؟؟ تي والله ماراحمه
سنابل انصدمت : شن تقول انت ؟ هكي بيعرف بعلاقتي بيك
محمد : هيا سكري
و سكر عليها الخط
سنابل انصدمت و قعمزت ف الطاولة تبكي
محمد جي للطاولة جنب خدي شيتاته و مفاتيحه و طلع
يكلمو فيه صحابه ماردش عليهم
________________________
يوسف و نجاة و هناء وصلو لليبيا و استقبلهم اسماعيل في المطار
هناء ضحكت و سلمت عليه
اسماعيل ضحك : الحمد لله على سلامتكم
نجاة و يوسف يسلمو عليه : الله يسلمك
اسماعيل : كيف كانت الرحلة
هناء : تهبل ماحسيتش بيها
وشبحت ليوسف 😏
يوسف سكت و ماعلقش
نجاة : جاي بروحك ! توقعت البنات معاك
اسماعيل : مابيتش نجيبهم و نشحورهم معاي
يوسف : هيا نتوكلو ؟
اسماعيل : هيا
و طلعو مع بعض ..
_____________________
اصيل لبس سبيدروه و نزل من حوشهم
طلع الجنان لقي سنابل مقعمزة
جاها : وين بتهربي مني ؟؟
سنابل انخلعت و بدت تلود ع الطاولة : برا فكني منكككك
اصيل : مش كان امك مروحة اليوم معناها بتديري اللي تبيه ! نعرف كيف نمشيك على كيفي
سنابل تبكي : انى كرهتك فديت منككك
اصيل يلود وراها و يفنص : فديتي مني يا ****
سنابل هاربة منه و خايفة
على خشت محمد
شافاته مشتله تجري و شدت ف ذراعه : تعالاله 😢
محمد دارها وراه و فنص في اصيل : خيرك على اختك الزفت !
اصيل : حول من قدامي انت ماتتدخلش
محمد : تي اما مانتدخلش شن ادير الزح
اصيل متعفلق : هادو ناقصات و يبو الرباية من جديد
محمد تعفلق و شبح لسنابل : بري خشي انتي
سنابل : لالا يضربني 😢
محمد : باش نكسره امالا !
اصيل : شنووو ؟؟؟
سنابل رخت ايد محمد و خشت تجري
أصيل كيف بيلحقها محمد شده : تي شن ادير يا ***** معقولة تسترجل على اختك ؟
اصيل شبحله : اختي و اللي نبيه نديره فيها نضربها نقتلها نذبحها انت مادخلكش
محمد تعفلق و ضربه بوكس : بنتدخل مادام تفكيرك زي الهمجيين
أصيل شد وجهه : تمد ايدك عليا يا محمد ؟؟ و على خاطر سنابل ؟
محمد متعفلق : نمد ايدي و نقتلك يا ****
اصيل تعفلق و ردله البوكس
محمد شده من سوريته يكر فيه للشارع : اطلعلي برا اطلع
اصيل يدف فيه : حول ايدك ماتمسنيش
محمد شاده : سكرلي فمك و اسكت و انت مولي عيّل الزفت
اصيل حامق : اعرف كيف تتكلم معاي خير ؛ مانبيش نغلط فيك
محمد ضربه براسه : تغلط فيا و تسترجل على خواتك يا **** وتخليهم خايفات منك ؟؟
أصيل شد خشمه دم
محمد يضرب فيه : في مكان ماتحن عليهم و تحسسهم بحبك ليهم هكي مدايرلهم ؟؟
اصيل دفه من حوايجه : وانتا شن خصك فينا ؟؟
محمد ف لحظة غضب : اللي يوصل في سنابل نقتله ونحرق الأخضر و اليابس حتى لو كنت خوها
أصيل سكت و قعد يشوفله
محمد شده من سوريته و يدوي مسكر سنونه : هادي اول و اخر مرة نشوفك تعامل فيها هكي يا اما مش حايصير خير
جاهم جارهم عثمان : صلي ع النبي انت وياه
الولاد شبحوله
عثمان يفك فيهم من بعضهم : انتو صغار عم و من يومكم صحاب شن جاكم اليوم
محمد تحشم منه و سكت
اصيل ساكت و مصدوم من ردة فعل محمد
عثمان : معقولة هكي تشهدرو الشارع بيكم ؟ بعد هالعمر تصير خلافات و عراكات بينكم
محمد يمسح ف عرقه : لالا انت فهمت غلط حني كنا نتناقشو و تحمسنا شوية
أصيل يمسح في خشمه و ساكت
عثمان يشوفله : اما نقاش و انتو تتضاربو بالدم
( و ف اللحظة هادي وصل اسماعيل و درس السيارة )
الولاد شافوه سكتو
عثمان شافه تحشم من العويلة اللي معاه و مشي لفم حوشه
نزل يوسف من السيارة
جاه محمد : الحمد لله ع السلامة
يوسف سلم عليه و شبحله هو و اصيل : الله يسلمك كيف حالكم ؟
محمد سكت و شبح لهناء : الحمد لله على سلامتك انستينا
هناء ضحكت و سلمت عليه : الله يآنسك شن الجو
محمد ابتسم
و نزلو نجاة و اسماعيل
نجاة شبحت لأصيل و ابتسمت : مرحبا بصقري
اصيل شبحلها و سلم عليها و هو منزل راسه
يوسف يشوف لصغار عمامه و ساكت هو و هناء
اسماعيل استغرب : خيره وجهك
محمد سكت
اصيل : عركة انى و واحد
نجاة شدتله وجهه : ترا نشوف !! ..؛ يعطيه قصة ف ايديه علاش اتضاربتو !!
محمد ساكت ؛ ركب سيارته و طلع
هناء تشوف لأصيل : انت و مني !
أصيل : ماتدوريش
________________________
05:30 م
العيلة في حوش العارف ؛ مقعمزين في المربوعة و فرحانين برجعة هناء
يوسف مقعمز جنبها لكن هي مش معبراته
مرام غمزت هناء : شن الجو غادي بعد العملية
هناء زرتها الضحكة : تعرفي مانحكليكش ع القلق و الملل تمنيت حد منكم معاي و ونسني
يوسف شبحلها : ماعندهمش حق المفروض لحقوك من اول يوم
هناء ماردتش عليه ؛ شبحت للعارف و ابتسمت
العارف : الحوش هذا وين نور و دبت فيه الروح بعد ماروحت هنيوه
حلومة : ايه والله ؛ من غيرها مطفي و ابصر كيف مظلم علينا
هناء ضحكت : ربي يحفظكم لينا
محمود ضحك : تبو الحق ! الحوش بلاي اني مايسوا شي و يجي يوم و قولو قالها
ازهار : هيا فكنا منه الكلام هذا بعيد السو عليكم كلكم
محمود ضحك و شبح لسنابل : محمد وين
سنابل اشرتله بيدها بمعنى عنده امتحان
محمود سكت
سعاد خشت : السلام عليكم
ردو عليها نصهم : و عليكم السلام
نجاة وقفت : نستأذن انى
و طلعت من الدار
حلومة تشوف لسعاد و تفنص فيها
سعاد جت ليوسف اتضبط فيه : اوسيفه جي الحوش ضوي
يوسف مضبطتها و ساكت
سعاد شبحتله و حطت ايدها على وجهه : و اخيراً تفكرت امك و روحت
يوسف وقف : سلمي على هناء قبل
هناء تشوفلها و ساكتة
سعاد مدتلها يدها : الحمد لله على سلامتك
هناء سلمت عليها : الله يسلمك
حلومة تشوفلها : هكي الناس يسلمو ؟!
سعاد شبحتلها : ماهو ظهري يوجع فيا مانقدرش نطبس
هناء ضحكت بإستهزاء و وقفت : امالا وين سلسبيل ؟؟
سنابل : كيف ركبت
هناء سكتت و مشت للمطبخ
لقت روان مقعمزة ع الطاولة هي و احمد
احمد : قالتلي كان ماتقول لحد نعطيك قداش تبي
روان : برا يا كذاب
احمد : اقسم بالله الا هكي قالت
هناء ضحكت : شن تقولو
روان شبحتلها و غمزتها : بعدين
هناء ضحكت و وقفت تصب ف امية
خش يوسف
شبحتله روان وقفت ؛ خدت احمد و طلعت
يوسف سكر الباب و قرب من هناء
هناء شبحتله قلبها يدق لكن تكابر بإنها مش مهتمة بيه
يوسف قرب منها اكتر و شدها من خصرها : لوين تبي توصلي بالزبط ؟
هناء نحتله ايديه : بطني
يوسف : اسف
هناء : شن قصدك ب لوين نبي نوصل ؟
يوسف زاد قرب : تبي تحاولي تغيظيني ؟
هناء ابتسمت : انت معش تهمني باش نغيظك او نستفزك
يوسف قرب من وجهها : متأكدة ؟
هناء قلبها يدق و مبتسمة : اكيد يا ولد عمو
يوسف سكت و قعد يشوفلها
هناء : و توا ياريت تحول من طريقي نبي نطلع
يوسف حول على جنب و عطاها الطريق بيده
هناء ابتسمت و طلعت
يوسف يشوفلها و ساكت .. ( هادي كيف بنتصرف معاها ؟ )
_
هناء خشت المربوعة ايديها يرعشو و قلبها يدق بسرعة قعمزت جنب حلومة ساكتة
حلومة شبحتلها : كيف حاسة روحك توا احسن من قبل ؟
هناء ابتسمت : الحمد لله ؛ فيه شوية وجاع لكن عادي بادي يخف يوم عن يوم
حلومة : الحمد لله و ان شاء الله هذا حد السو
هناء : ان شاء الله
خشت روان : امّيمه جت مرا
حلومة شبحتلها
ازهار : من هي ؟
روان شبحتلها : اللي جت تخطب في سلسبيل هذاكا اليوم
___________________
سلسبيل في دارها تجهز في روحها ؛ اتصل بيها محمود
ردت : الو
محمود : ها شن صار
سلسبيل : شن صار في شنو
محمود : في اللي جاياتك
سلسبيل : اكيد شوية و توصل
محمود : باهي امالا انى بننزل لوطا نراجي
سلسبيل : ياسر ماتخلينيش نندم انى حكيتلك
محمود : ماتخافيش مش حاندير العار بندوي معاه بس
سلسبيل : لالا خليه الموضوع عليا تو نعرف نتصرف
محمود : اوكى تشاو
سلسبيل : باي
و سكرت الخط
محمود لبس سبيدروه و نزل للشارع
__
احمد طلع للجنان بالدرقة .. كيف بيطلع الشارع شاف محمود خاف و رجع الحوش
___
سلسبيل : غر هيا يا ماما عيب
نجاة متكية ف سريرها و مغمضة عيونها : والله لو كانت بنت ابصر شكون ماني نازلة ؛ راني مرهقة و تعبانة مش قادرة نوقف
سلسبيل : باهي مش هكي المرا تهزأ علينا و تقول امهم ماتعرفش الأصول ؟
نجاة شبحتلها : و خليها هي تعرف الأصول و تاخد موعد قبل ترا ؟؟
سلسبيل سكتت
نجاة تشوف لحوايجها : هذا شني اللي لابستيه ؟
سلسبيل شبحت لروحها و تلخبطت : كنت نجرب فيهم
نجاة : بري تحركي نحيهم و البسي حاجة غيرهم
سلسبيل : يعني ننزل بروحي ؟
نجاة غمضت عيونها : معاك نساوين عمامك و اميمة
سلسبيل سكتت
نجاة : و قولي لهناء تركب ؛ اختك مازالت تاعبة و لازم ترتاح
سلسبيل : حاضر به
و طلعت من الدار
____________________
محمود مقعمز قدام الحوش يشوف لآدم ساكت و يدخن
________________
سلسبيل نزلت و خشت المربوعة : هاااااي
ام ادم و حلومة و ازهار و هناء انصدمو 😳
سلسبيل لابسة سروال جينز واسع هلبا كله مشرك تشركيات كبار معاه تيشرت اسود فيه كتيبة بالأبيض و مشرك نفس الشي
مدايرة شعرها كيرلي بِ الجل متع اصيل و روج اسود و راسمة عينها بالأسود
لابسة كاوْ في رقبتها و طاقية بيضاء
حلومة تشوفلها ومصدومة
هناء جت لأختها : هذا شن اللي مدايرتيه ؟؟
سلسبيل ابتسمت : لوك جديد
ام ادم تشوف و ساكتة من الصدمة
سلسبيل ابتسملها و جت تسلم عليها
بعدين قعمزت و قالت : ماما كانت بتنزل لكن للاسف خداها النوم
ام ادم تكنطت : نوم العوافي
سلسبيل : ثاااانكس 😊
هناء تحشمت : مانا كيف مروحين من السفر و هي تعبت هذا علاش رقدت
حلومة تسحن في روحها : و هو بسلامته وليدك امتى بيجي يشوف بنيتنا ؟
ام ادم شبحتلها : خلينا نشوفو شروط العروسة قبل
و شبحت لسلسبيل
سلسبيل ابتسمت : اهم حاجة ان نسكن بروحي مش معاك باش ماتبديش تقيديلي في احوالي
ام ادم جسمها سقع 😨
ازهار عضت فمها و هناء حطت ايدها على وجهها
سلسبيل : و لبسي هذا مانبيش حد يقيدني بيه و يقولي غيريه ولا البسي عبايات و من هالكلام ..
ام ادم مصدومة : لكن اللبس هذا مش متع حجاب !
سلسبيل شبحت لروحها : تي عادي تو نلبس اتش دي تحت الجينز يتدرق
ام ادم عوجت فمها و سكتت
حلومة فنصت في هناء
هناء فهمتها و وشوشت سلسبيل : نوضي تحركي
سلسبيل ناضت و جت تسلم على ام ادم : فرصة سعيدة
ام ادم ساكتة
سلسبيل قامت حاجبها بتعجب : خيرك خفتي ؟
ام ادم : شنو
سلسبيل : قتلك فرصة سعيدة سكتتي ! ماتبيش سعيدة ؟ شن رايك ف امباركة ؟
حلومة سخنت : طلعوها ضغطي ركب
هناء زرتها الضحكة و طلعتها
____
5
مرام مع البنات ف المطبخ : عصومي قالي معش اتطيبي لان الوحم متعبني
و حطت ايدها على بطنها : نراجي امتى نتم شهور الوحم باش نبدا نطيبله و نفتلك
روان شادة ضحكتها : علاش ماتلبسيش كمامة لما اتطيبي ؟ نحسها احسن و تساعدك
مرام : لالا غر تقولي هكي تبدي مش قادرة حتى تشوفي للطنجرة
سنابل : كرهتيني في الزواج بصراحة
مرام ابتسمت : لالا بالعكس ؛ الزواج حلوو و طبعا ع الراجل اللي بتاخديه كيف جوه و طبعه
روان غمزتها : لا من الناحية هادي سنابل في السليم 😉
سنابل تلخبطت
مرام ضحكت : علاش مني سعيد الحظ ؟
و خشو هناء و سلسبيل
البنات لما شافو سلسبيل شهقو مع بعض : هيييييه 😱😲
سلسبيل ضحكت : خيركم 😂
هناء ضربتها من ورا ظهرها : هذا عار اديريه قدام المرا ؟؟؟
سلسبيل : مفيش حل غير هكي
مرام تشوفلها : احكيلنا علاش هكي لابسة ؟؟؟
سلسبيل : ....
سنابل خدت سفرة الشاهي و رفعتها للمربوعة
_____
حلومة : هي قاعدة صغيرة و طايشة شوية لكن اكيد مش حاتقعد على ع الحال
ام ادم : مادامه ولدي عاجباته هو حر
خشت سنابل شادة السفرة : السلام عليكم
ردو عليها : و عليكم السلام
و مدت لأم ادم : تفضلي
ام ادم خدت منها و تشبحلها
ازهار : هادي اختها التوأم
ام ادم ابتسمت بمجاملة : ماشاء الله عليها
حلومة : الله يسلمك
سنابل مدت لحلومة و ازهار و حطت السفرة ع الطاولة و طلعت
________________
هناء تضحك : حي ع العار كان تسمع بيك مامااا
سلسبيل : عادي المهم نفتك منه
مرام : كانك قلتيلي قبلها راهو لبستك باروكا صفراء خوفتيها بيها
روان ضحكت : امالا تخوفي في عصام بيها 😂
مرام ضحكت : حاشاني .. لكن عندي من زمان في حوشنا كنت نلبس فيها بالجو مع بنات العيلة
هناء : خليها المرة الجاية 😂
________________________
ادم مقعمز ف سيارته فاتح الراديو و يراجي في امه
بعد شوية طلعتله و ركبت
ادم طلع بيها : ها طمنينا هالمرة
امه متعفلقة : والله لو كان اتطير تجنح ماك واخدها
ادم اتضايق : علاش يمي ؟؟
امه : معقولة تطلعلي بشلاتيت مشركاااات ؟؟ و هايجة مايجة زي الشيشباني ؟؟
ادم شبحلها و انصدم
امه : و مش هكي و بس مدايرة روحها زي جماعة الرديف و تلقح ف الكلام
ادم : كيف يام سنابل مش هكي بكل
امه علت صوتها : امالا نكذب عليك ؟؟؟
ادم : باهي شن قالت بالزبط ؟
امه : تبي حوش بروحها باش مانقيدلهاش أحوالها
ادم انصدم
امه : و ماتبيش تغير طريقة لبسها قالت ؛ و ماتبيش من ايقيدها
ادم : الشي هذا تو نتفاهم انى معاها فيه ماتدوريش
امه حامقة : والله ماك واخدها ولو كان على جثتي
ياريتك حتى اخترت اختها قاعدة خير منها
ادم سكت
امه : حتى من امها مابتش تجي و تقابلني فعلا عيلة مايعرفوش الأصول
ادم ساكت
امه : هذا ماناقصني الا هادم !!! ولا تفكررر تسمع فيا ولاااا ؟؟
_________________________
09:30 م
محمد واقف ورا الحوش يتصل بسنابل ..
سنابل ردت : الو
محمد : حبيبتي
سنابل ابتسمت : اهلين حمودي
محمد : .....
بعد شوية نزلتله و جاته ورا الحوش تحت الفَلة
محمد شافها ابتسم
سنابل قربت منه و حضناته
محمد حضنها و ضحك
سنابل : باهي اللي جيتني امبكري
محمد : من اليوم معادش حايمسك او يكلمك
سنابل شبحتله : شن صار انى لتوا ماريتاش
محمد : فوتيه و ماتفكريش فيه
سنابل شافت للرخامة متع الروشن لقاته حاط عليها بوكس احمر فيه شكلاطة و مزيّن بالورد
ضحكت
محمد مدهولها : ان شاء الله يعجبك
سنابل شداته و لقت مكتوب عليه ( يزعلك اصيل و نرضيك انا )
ضحكت بصوت عالي : يهبل محلاه 😍
محمد قرب منها : صحتين بيبي
سنابل شبحتله : شكرًا هلبا يا روحي
محمد حط ايده على خدها : بدل ماتشكريني نبيك معش تزعلي روحك بس
سنابل ابتسمت : ربي يخليك ليا ❤️
____________________
سلسبيل في دارها تتكلم ف التليفون : يعني انت ولد الماما ؟؟
ادم تعفلق : ولد عينك يا ***** تكلمي كويس خير مانغبر الليلة على راسك
سلسبيل علت صوتها : انت هذا فاش فالح غر في تعلاي الصوت زي الحيوان راك تسترجل و ادير هيبة و شخصية لروحك مش مخلي امك حاكمة فيك و تمشيك على كيفها جو أخطب هادي و ماتخطبش هديكا
ادم حامق : بري يا *****
سلسبيل سكرت في وجهه و داراته في الحظر
اتصل بيها يوسف ردت بسرعة : اووه برووو 😍
يوسف ضحك : شن الجو
سلسبيل : مليح هلبا هلبات شن جوك انت
يوسف تنهد : الحمد لله .. الحمد لله
سلسبيل : قاعدة مطرمة شواربها ؟
يوسف : هي وين توا ؟
سلسبيل : راقدة من بكري
يوسف : اسمعيني شن بنقولك ....
_________________________
أصيل يلود بسيارته ف الشوارع ويفكر بإستغراب من موقف محمد .. ( بعد هالعمر يمد ايده و يضرب و على خاطر سنابل ؟ .. اكيد فيه شي مستحيل الموضوع طبيعي .. حي كان اللي في بالي !!! )
و هو في عز تفكيره شرين تليفونه
فتح الخط : الو
حبيبته : وينك اليوم يا قلبي انشغلت عليك
اصيل : ماكنتش فاضي يومي كله مشي في المشاوير
حبيبته : معناته تاعب و تبي ترتاح
اصيل : لالا خليك ع الخط اصلاً مازال ماروحتش
________________________
سلسبيل خشت لدار هناء و قربت منها تنوض فيها : هناء ؟؟ ..؛ هنااء !
هناء راقدة ماتردش
سلسبيل اتصلت بيوسف ..
يوسف رد : ايوه
سلسبيل : راقدة مش حاتنوض و هي تاعبة
يوسف سكت
سلسبيل : انت وصلت ؟
يوسف : ايه انى لوطا
سلسبيل : اركب حتى انت لحوشكم ارقد و الموضوع خليه حتى غدوا
يوسف : لالا بنروح شقتي مانيش راكب
___________________________
تاني يوم 🌹
02:00 م
مرام تلود في مطبخها و حايسة في روحها
عصام عازم صاحبه و يراجي في الغدي يجهز
مرام تتصل بأمها ..
نجمية ردت : الو ؟
مرام : ايوه ماما شن صار ؟
نجمية : خوك كيف طلع اعطيه ربع ساعة و يوصل
مرام : باهي سلام
و سكرت الخط متوترة
أحمد بحداها : مازال !
مرام : اصبر اهو جاي
احمد : باهي اعطيني عشرة قبل
مرام مدتهاله : زي ماتفاهمنا باهي ؟ مش لازم حد يعرف
احمد هز راسه بمعنى به
مرام : يارب إسترني يارب
بعد شوية خوها وصل و اتصل بيها
مرام : هي انزله بسرعة
احمد ناض و نزل يجري
مرام طلعت المبطن الي مدايراته تستف فيه في الصواني
_
احمد شاد صونية رشتة كسكاس و راكب ف الدروج
فجأاااة ؛ يعتر و يطيح هو وياها
احمد : ااااه 😩
مرام سمعاته خافت و طلعت تجري : ووه عليااا 😱😭
احمد يبكي
جاته مرام توقف فيه : انحرقت ؟؟ ترا نشوف ايديك ؟؟
احمد : رجلي توجع 😩😭
مرام راعشة : باهي غر اسكت و نوض معاي
عصام سمع الدوشة طلع : شن فيه ؟
مرام خافت : اح اح احمد طاح
عصام يشوف الصونية مكسرة : هذا منين !!
مرام سكتت
احمد : حولي بنخش لحوشنا
و خش لحوشهم يبكي
عصام يشوف لمرام و ينفص : هذا شنو اللي نشوف فيه ؟؟؟
مرام خافت و عيونها دمعو
عصام حامق : تكلمي خيرلك
مرام غمضت عيونها : غدي الراجل
عصام دمه انحرق و يتكلم مسكر سنونه : و انى توا شن بنوكله ؟!!!
مرام شبحتله : تو نشوف ازهار
عصام خبط ايده ع الحيط : تو نتحاسبو لما نروح بعدين
و خش الداخل
____________________________
06:30 م
هناء عندها صاحبتها اسراء و معاها اختها وصال
اسراء : و توا شن فكرتي بتخدمي ولا لا
هناء : اكيد بنخدم ندور فيها في السمي لقيتها ف اللوطا
اسراء ضحكت : فهمتك علاش
هناء : لازم نبرد ناري
وصال ساوت تقعميزتها : تبي تبردي نارك على صح ؟ عندي الطريقة
هناء تشوقت : شن هي
اسراء : لالا ماتسمعيش كلامها هادي ممكن توّدرك
وصال شبحتلها ع الجنب : كان كلامي يودر راهو ماجابش هيثم راجلي حبيبي
هناء ضحكت : هيا قولي
وصال شبحتلها : لازم يجيك عريس و يوسف يحس بالنار اللي انتي حسيتيها وقت امه قالت بتخطبله
هناء سكتت و قعدت تفكر
اسراء دفتها من كتفها : و العريس منين بتجيبه ان شاء الله ؟؟
وصال شبحتلها : مش سلفك أنور يبي يخطب ؟ خليه يجي
اسراء : لالا مانضحكش ع الراجل و نشحطه و في الاخير هي مش حتاخده
هناء شبحتلها : تعرفي صح فكرتها جيبيه
اسراء انصدمت : قصدك بتتزوجي ؟
هناء : لالا لكن نعرف كيف نتصرف ماتخافيش
اسراء : فكوني منكم تو نتحشم مع امتاعيني
وصال عوجت فمها : يالطيف قداش تخافي منهم و مركبينك الرعب
هناء ضحكت : تعلمي من اختك شوية
اسراء : انى نولي زي هادي ؟ ممكن راجلي يطلقني من تاني يوم
هناء تضحك : حقا شن جو مرت خوكم
وصال : كويسة ..؛ هونا حامل تاني
هناء : ماشاء الله ع السريع
وصال ضحكت : ايه ؛ مدايرة في ماما حالة
هناء : راهي امك مش متحملة نعرف جوها كيف
اسراء : خليها حاصلة معاها مش تبي ولدها يجيب الصغار معليشي خليها تتحمل
هناء ضحكت : شمايتية
و شرين تليفونها لقاته يوسف داراته سايلنت
اسراء تشوفلها
هناء : خلاص امالا شوفيلي سلفك امتى بيجي و كلميني قبلها
اسراء : اوكى
وصال : و كان تبي الجو يكون مليح و تستمتعي اكتر خليه هو يفتحله الباب
هناء ابتسمت : نخليه يقعمز معاه احلى شن رايك 😉
وصال ضحكت : هو ده
و طقت ايدها هي و هناء
اسراء تشوفلهم : عيب راهو
وصال شبحتلها : وين العيب في الموضوع ؟
خشت نجاة : صبايا ! كيف حالكم ؟
11
__________________________
احمد في الجنان واقف مع ولد شارعهم : خودها نص ساعة و جيبها ماتعطلش بيها
ولد جيرانهم : باهي هاتها
احمد : هات الفلوس قبل
ولد جيرانهم مدله الفلوس و هو مدله البشكليطا
احمد يشوف للحوش و للرواشن : هيا اطلع بسرعة
ولد جيرانهم خدي البشكليطا و طالع : باهي خيرك خايف
احمد يوشوش : اطلع اطلع
___________________
1
سعاد مقعمزة ف حوشها تسحن في روحها : ماتبيش تروحلي !! .. نسيت امك خلاص على خاطر بنت عمك يايوسف !! .. خسارة ماربيت و تعبت و قمطت
السنوسي قعمز معاها : مازلتي في نفس الدسكة ؟
سعاد شبحتله : مايحسش النار الا اللي عافس فيها ؛ راك تشوفه و تدوي معاه بدل ما مقعمز هكي و خلاص
السنوسي شد الريموت يتفرج ع الأخبار و ماردش عليها
______________________
07:30 م
يوسف مقعمز ف قهوة مع صحابه اشرف و مهاب
شرين تليفونه ناضت يتكلم بعيد
يوسف : الو
سلسبيل : اهلا شن الجو
يوسف : تمام وانتي شن جوك
سلسبيل : مليح
يوسف : شن صار ؟
سلسبيل : بنقولك انها كلمت الولد متع الشغل و قاللها تعالي اليومين هادو
يوسف : وين المكان ؟
سلسبيل : مش عارفة ماسألتهاش
يوسف : تبيني لين نعلمك ولا كيف ؟
سلسبيل ضحكت : راح من بالي نسألها
_________________________
عصام روح لحوشه و جي لمرام ف الدار متعفلق
مرام خافت
عصام يفنص فيها : تضحكي عليا ؟؟ على اساس مطيبة و انتي جايبتيه من امك ؟؟
مرام تبكي : اليوم تعبت ف الصبح و ماقدرش نطيب و تحشمت منك ماعرفتش نتصرف
عصام : و هكي حشمتيني مع حوش عماد ! خديت غذاهم باش وكلت ضيفي تقشريلي في وجهي ؟؟
مرام تبكي : ماهو كله من أحمد هو اللي طيحه
عصام : معاش تناقشيني !!!
مرام سكتت
عصام : كنتي توهمي فيا بإنك ست بيت ؟؟ وينه الكلام اللي كنتي تقولي فيه ولا كله وهم ؟!!!!
مرام تسمع فيه و تبكي
عصام : الله يحشمك زي ما حشمتيني
و طلع من الدار
مرام تعفلقت و ناضت اتطلع في حوايجها : والله ماعاد قاعدتلك فيها
_
عصام قعمز ع الكنبة حارق دمه
بعد شوية جاته مرام لابسة عبايتها و شادة شنطتها : ارفعني لحوش اماليا
عصام شبحلها : شني ؟
مرام متعفلقة : نعاود مرتين ؟
عصام : بري خشي بلا خفة عقل
مرام : و انى قلت نبي نمشي لـ اماليا
عصام فنص فيها : وانى قلت خشي الداخل ؛ ماعنديش مرا تطلع برا الحوش حرجانة
مرام زادت تعفلقت ؛ خدت مفتاح سيارتها و طلعت
عصام وقف و لحقها في الدروج : تعالي نكلم فيك ولااا !
مرام تبكي : انت هنتني خلاص
طلع محمود من حوشهم لقاهم
مرام شبحتله : تعالى يا محمود نزلها معاي
محمود شبح لعصام
عصام خش لحوشه و قربع الباب
محمود جاها خداها منها و نزل معاها
__________________________
بعد مرور يومان 🌹
11:00 ص
هناء طلعت بسيارتها ماشية لمقابلة الشغل
يوسف مدرس في راس الشارع يراجي فيها ؛ اول ماشافها طلعت طلع وراها
___
سلسبيل نزلت لحوش حلومة لقاته فاضي ؛ ركبت
و هي راكبة تلاقت مع محمود : صباح الخير
محمود ابتسم : صباح النور ؛ شج
سلسبيل : مليح
محمود سكت
سلسبيل : اميمة وين ؟ مالقيتهاش لا هي ولا اجديده
محمود : ممكن قعدت عند عمتي من امس ؛ و جدك طلع يتم في أمور حجته
سلسبيل : اااه سعدود الناس
محمود بيتكلم و متردد
سلسبيل سكتت
محمود حك شعره : فاضية بعدين ؟
سلسبيل : بعدين امتى بالزبط ؟
محمود : بعد العصر
سلسبيل : لتوا ماعندي شي واضح
محمود : مية مية تو ندورك
سلسبيل : تبي حاجة ؟
محمود : بعدين بعدين
سلسبيل : به
و خشت لحوشهم
محمود شبحلها و نزل
_______________
مرام مقعمزة مع امها : مانيش مروحة لين يجيني هو
نجمية : الراجل عنده الحق لما عاركك ماغلطش فيك هو
مرام : لالا مش حانرجع لين يجي يرضيني ؛ ماسد انى حامل و متعبني الوحم مش راحمني و كل شوية جايبلي واحد يغذي فيه
نجمية تعفلقت : الحق فيا انى اللي عاطياتك ماتعرفيش اتطيبي زي الناس
مرام شبحتلها و سكتت
نجمية : انى اللي مش حانخليك تروحي لين تتعلمي توكلي الراجل
_______________
هناء و هي نازلة من مقابلة الشغل لقت يوسف واقف جنب الاسانسير يراجي فيها
انخلعت و شدت قلبها : بسم الله
يوسف : كيف كانت المقابلة
هناء بإستفزاز : تهبل ماحسيتش بالوقت زي في الطيارة
يوسف تكنطا و سكت
هناء مشت و يوسف يمشي معاها
هناء : شن هالصدفة هادي ؟
يوسف ساكت
هناء شادة ضحكتها
يوسف : امتى بيردو عليك ؟
هناء : قبلوني طول
يوسف هز راسه و سكت
هناء ركبت سيارتها وفتحت الروشن : نتلاقو على خير
يوسف : ان شاء الله
و ركب سيارته
هناء ضحكت و طلعت بسيارتها
______________________
1
اروى متكية ف سريرها و تبكي
بحداها حلومة : نوضي افرحي لروحك و شوفي شن بديري عرسك معش مازاله راهو
اروى تبكي : معاش تزيديني يا امّيمه انى بنموت 😭
حلومة : علاش تغششي في روحك يا بنيتي ؟ ان شاء الله يطلعلك ولد حلال و يعيشك متهنية
اروى تبكي و ماتردش عليها
خشت امال : هي تعالو افطرو الظهر قريب يأذن
حلومة شبحتلها : تعالي ادوي كلمة مع بنتك لآمتى بتقعد هكي
امال : ريقي جف و انى ندوي حتى من بتاتها كله شريته بروحي ماعمري سمعت بعروسة ماتتدخل بشي ف عرسها
اروى غمت روحها و تبكي
حلومة تشوفلها و متنكدة عليها .. ( جبتي لروحك الهم يا بنيتي مالك و مال المشاكل )
____________________
هناء درست السيارة قدام الحوش و نزلت
يوسف درس وراها و نزل معاها
هناء شبحتله و خشت الجنان
يوسف وراها يبسبس : بس بس .. بسسست
هناء كملت طريقها و ماردتش عليه
يوسف لحقها للدروج : نكلم فيك
هناء شبحتله وركبت : مانتبهتش
يوسف سرع خطواته و شدها من ايدها
هناء قلبها دق و تفكرت حركاته ليها في اول علاقتهم
يوسف شدها من ايديها الزوز و قربها ليه : مش متفاهمين من قبل انك معش تطلعي بروحك ؟
هناء قامت حواجبها : وقت قبل يختلف على توا
و نجاة فتحت الباب
يوسف و هناء شبحولها و نحّو ايديهم
نجاة : اوسيفه كيف الحال ؟
يوسف : الحمد لله
هناء خشت للحوش و ردت الباب وراها
نجاة : كنت مع هناء
يوسف : لالا تلاقيت معاها
____________________
04:30 م
عصام خش هو و العارف للحوش
العارف : خليني نرتاح سويعة و نطلعو ناخدو حاجاتي الناقصة
عصام ساكت
العارف : قولي ؟ مرتك روحت ولا مازال ؟
عصام : مازال
العارف : برا جيب المرا و أكسر الشر ماعندناش نساوين يحرجو عند اماليهم
عصام ساكت
___________________
7
05:30 م
هناء واقفة ع المراية و تستشور في شعرها بعد الدوش
خشتلها سلسبيل تتسهوك : وين ماشية لحوش عمتي 😂
هناء ضحكت : ايه 😂
سلسبيل ضحكت : انى بننزل لوطا شوية و نجي
هناء : ماما و سنابل و اصيل وين
سلسبيل : مانعرفش وين مشو وأصيل راقد
هناء سكتت و تلفتت تكمل في شعرها
سلسبيل طلعت للدروج لقت يوسف واقف
يوسف شبحلها : شنو منو
سلسبيل : خش الأمور طيبة غر خود ساتر من اصيل لانه راقد ومرات ينوض
يوسف ضحك : غيري أسلوبك راهو ع الحال هذا مش حايرضىٰ بيك حد
سلسبيل ضحكت : والله الا ماتكون طيحتي مسقمة 😉
و نزلت
يوسف ضحك و خش لهناء
هناء حست بحد وراها تلفتت و انخلعت
يوسف سكر باب الدار وراه
هناء سكرت الاستشوار و حطاته : شن ادير هني ؟
يوسف قرب منها و شد خصلتها : جاي لخطيبتي
هناء وخرت : قبل كنت خطيبتك لكن توا لا
يوسف شدها من خصرها : لا خطيبتي و حبيبتي و نبضي الدايم
هناء توجعت : اي بطني
يوسف نحّا ايديه : اسف نسيت
هناء : يوسف اطلع و معش اتضايقني
يوسف حط ايده على خدها : مازال قلبك مايبيش يحن عليا
هناء قلبها يدق ؛ نحتله ايده و قامت حاجبها : حول
يوسف يشوف لعيونها : شن اللي يرضيك بيبي ؟ قوليلي شن تبي و انى نديره
هناء وخرت و خدت نفس : مانبي منك شي الا انك تطلع بس
يوسف سكت ؛ قام راسه و تنهد
هناء فتحت باب الدار و مشت للمطبخ
وقفت ع اللاوندينو تغسل في ايدها باش تتسبل
يوسف لحقها و جي من وراها يهمسلها : بيبي نهون عليك اتّعبي فيا هكي ؟
هناء خدت نفس و قامت كتفها : يوسف حول
يوسف جبدلها شعرها من رقبتها و يهمسلها : انى تعبت مش قادر نتحمل بعدك اكتر حسي بيا هنوشتي
هناء تلفتت و شبحتله : لكن اكيد مش حاس بللي حسيته انى
يوسف اضايق : خلاص هنو والله عاقبتيني و عذبتيني هلبا سادنا عاد
هناء خشت الحمام و ماردتش عليه
وقفت تغسل في وجهها و ايديها يرعشو ؛ شدت قلبها تحس فيه بيطلع منها : علاش هكي صايرلي ؟؟؟؟ انى مانبيش نضعف و نسامحه بسهولة هكي ..
__________________________
سلسبيل تراجي في محمود في الجنان
بعد شوية خش من الشارع
سلسبيل : وينك لتوا
محمود وقف معاها : شن الجو
سلسبيل : تمام
محمود سكت و تلخبط
سلسبيل : قلت تبيني في موضوع ان شاء الله خير
محمود مرتبك : ايه ... كنت .. اااا مش عارف نسيت
سلسبيل ضحكت : خيرك صارلك ستك
محمود سكت
طلع عصام هو و العارف
محمود شبحلهم : ها جدي شن الجو
العارف : شن اديرو هني
سلسبيل شبحتله : شي كساد
عصام : انى ف السيارة يا بوي
و طلع الشارع مازال مضايق
سلسبيل تشوفله : زعما امتى بتروح مرته
العارف : قلتله يمشي يردها يسمعو بيها الناس في العرس يضحكو علينا
محمود : و كان غالطة خليها تتربى عادي
العارف طلع و ماردش عليه
محمود شبح لسلسبيل
سلسبيل : ايه شن كنت بتقول ! ولا قاعد ناسي ؟
و في اللحظة هادي طلع يوسف
شبحوله هما الزوز
سلسبيل : يوسف ؟ شن صار ؟
يوسف حركلها حواجبه و طلع
سلسبيل فهماته انه متكنطي و سكتت
محمود يشوف : خيرها العيلة خاشة بعضها
سلسبيل شبحتله : زيك انت
و نزل احمد للجنان
محمود شبحله : هااااه من مازااااال !!!!
احمد تخزرط منه و ركب يجري
سلسبيل ضحكت : شن رايك تأجل موضوعك لبعدين لما تتفكر
محمود شبحله : تمام به
__________________________
بعد مرور عدة أيام 🌹
العارف تسقد و سافر للحج و العيلة لاهيين في عرس اروى
الا بنات العم مازالو ناقمين عليها
___
02:30 م
هناء تتكلم في التليفون : قصدك اليوم جاي ؟ امه ماقالتش لما جت اول امس
اسراء : انى زريت عليه باش اتمي موضوعك بكري
هناء : متشوقة ليه سلفك 😂
اسراء ضحكت : ياخوفي ياكل طريحة
هناء ضحكت : لالا ماتخافيش
اسراء : المهم جاي مع المغاريب شوفي روحك
هناء فرحت : احلى وقت لان العيلة كلهم بيكونو في عزومة العرس و مافيش الا يوسف
اسراء : خيرها بنت عمتك دارت عرسها توا قرب العيد العفو بتخش ع الدوارة طول
هناء : تستاهل مايجيها ان شاء الله ماتتهنىٰ
______________________
05:00 م
هناء و البنات يسيقوا في الجنان
هناء شادة الطوبو و تناشب فيهم و تضحك 💦
روان تجبد في المية و تصيح : لاااا فكينا مانبيش ننبل
هناء تضحك
سلسبيل شادة المكنسة و تحك بالصابون
و سنابل مقعمزة فوق الطاولة تهدرز و تحب ف التليفون
هناء شبحتلها و بختها 💦
سنابل انخلعت و وقفت بسرعة : لاااااا 😩
محمد انخلع : خيرك ؟؟!!
سنابل خشت تجري لحوش حلومة : لا شي غر شفت قطوسة
محمد ضحك
_
سلسبيل حطت المكنسة : اااه اعييت
هناء : هاتي نكمل عليك
سلسبيل : لالا عمليتك
هناء : خلاص ليها وقت عادي
سلسبيل مدتلها المكنسة و خدت منها الطوبو 💦خشت عليهم سعاد كيف مروحة من المزين : السلام عليكم
هناء شبحتلها وسكتت
البنات : وعليكم السلام
سعاد خاشة و تشوف لهناء تحك في الزليز بالصابون .. ( كُدّي يا بنت لمنّدي 😒 )
و فجأاااة ؛ تزلق و اتطيح على ظهرها : ااااااه
البنات انخلعو و شبحولها
سعاد تعيط و تتوجع : اااه ظهري انقسممم
هناء جتها تجري : ياساترررر
البنات يشوفلها و ساكتات متشمتات فيها
سعاد : ااااه ياربييييي
هناء تصيح : تعالو قيموها معاي انتي وياها
جوها يجرو بيقيموها
سلسبيل : لا انتي ماتقيميهاش عمليتك
هناء طبست : غر هيا مع بعضنا
و قاموها الداخل لحوش حلومة
سعاد تعيط و هناء راعشة شدت تليفونها و اتصلت بِ السنوسي ..
السنوسي رد : الو
هناء شادة على جرح عمليتها و تتوجع : ايوه عمي تقدر تجي الحوش توا ؟
السنوسي : شن فيه
هناء : .....
________________________
07:30 م
سنابل واقفة ف دارها تتصل بيوسف ..
يوسف رد : الو
سنابل : ايوه يوسف ! شن صار في مرت عمي ؟
يوسف : طلع عندها كسر في الحوض و قال الدكتور تبي راحة
سنابل : مسكينة وجعتني
يوسف : الله غالب
سنابل : يعني ماتقدرش تجي توا ؟
يوسف : علاش شن فيه
سنابل شدت ضحكتها : فيه واحد جاي بيشوف هناء مقابلة شرعية و مافيش راجل في الحوش كلهم ف عزومة العرس
يوسف عقد حواجبه : شني شني ؟؟
سنابل تضحك بلا صوت
سلسبيل حامقة بحداها و هناء تضحك
يوسف : الو ؟؟؟
سنابل : قتلك فيه واحد يبي يشوف هناء بعد شوية و قلت تجي انت خير ؛ اصيل في العرس مش حايجي توا
يوسف : نجي الحوش و نفهم منك
و سكر عليها الخط
سنابل لوحت التليفون ع السرير و بدت ترقص : العب يلااااا 💃
هناء ضحكت : شن قالك ؟
سنابل : جاي جاي
هناء تضحك
سلسبيل متكنطية : والله الا عيب اللي اديرو فيه 😒 يوسف مايستاهلش هكي
_______
بعد نصف ساعة 🌹
يوسف وصل الحوش و يطق على سنابل ✊
سنابل فتحت : اهلا
يوسف عاقد حواجبه : شن كنتي تقوليلي ؟
سنابل توشوش : فيه واحد جاي بيشوف هناء بعد شوية موضوع خطوبة و هي ماتبيش تقولك مشي انى كلمتك قلت تجي تقعد معاها خير ماتقعمز بروحها مع راجل غريب
يوسف : تتسهوكي ؟؟
سنابل : والله العظيم
( و شرين الحوش )
سنابل : هذا اكيد هو
يوسف تكنطا : بننزل نطقطقله رقبته
و كيف بينزل سنابل شداته : لااا عيب الراجل شن ذنبه و هو مايندري على شي
يوسف سكت و نزل
سنابل ضحكت و خشت لهناء ترقص بكتافها
هناء تهدرز مع سلسبيل : ماما غر اميمة شدت فيها تمشي قالتلها على خاطر عمتي مابينكم شي
سلسبيل : حتى و لو كان المفروض ماتمشيش
سنابل ترقص : اوسيفه نزل للعريس 💃
هناء قلبها دق : يارب استر
سلسبيل : مبردكم الزفت شن هذا 😠 كان الراجل مات في رقبتكم انتو
و سمعو الباب يطق
سنابل : جو جو 😍
هناء وقفت تلبس في وشاحها
____
يوسف خاش بالراجل للصالون : خش تفضل
أنور كح : يالله يالله
حط البكلاوة ع المدخل و خش
_______
سلسبيل : ماتكتريش الدوة باش يمشي اليوم على خير
هناء : به
و طلعت من دارها
وقفت قدام الصالون و قلبها يدق
خدت نفس عميق و خشت : السلام عليكم
أنور سلف اسراء شبحلها و تحشم : و عليكم السلام
هناء خشت ترعش قعمزت جنب يوسف
يوسف يشوفلها و عيونه غضب
أنور توتر و كح
هناء بلعت ريقها : كيف حالك ؟
أنور : الحمد لله وانتي ؟
هناء ابتسمت : كويسة الحمد لله
يوسف بعصبية : خش في الموضوع طول
هناء خافت من نبرة صوته
أنور تلخبط و بدي يحكي عن نفسه
هناء تسمعله و خايفة
أنور : انى شكراتك اسراء ليا و قلت مدامك صاحبتها اكيد بتكوني زيها
هناء ضحكت : تسلم
يوسف يسمع و ساكت
أنور : قوليلي شروطك بدون خجل عادي
هناء شبحت ليوسف و يوسف يشوفلها و ساكت
رمشت عيونها بسرعة و شبحت لأنور : شروطي بسيطة الحق ؛ طبعا نشتغل مذيعة في الراديو و شغلي مانبيش نتنازل عليه و نبي نقعد نسوق و نطلع بروحي ..؛ و لبسي حتى هو مانحبش من يقيدني فيه ؛ وهو طبعا اكيد محتشم و مستور
أنور يشوفلها و مبتسم
هناء : و حياتي الاجتماعية مانحبش من يقيدني فيها ؛ يعني لما نتلاقى مع صاحباتي او أصدقائي الي في الشغل ماتكونش متعقد و تتحسس منهم
و شبحت ليوسف و قامت حاجبها
يوسف يحك ف لحيته و ساكت
أنور : شروطك كلهم من حقك ؛ حني في عيلتنا ماعندناش التقييد و التعقيد اكيد زابطة كل شي من اسراء
هناء ابتسمت : ايه
يوسف دمه فار و وقف : خلاص هي
هناء انحرجت و وقفت : ان شاء الله معرفة خير أنور
أنور وقف : ان شاء الله
هناء خشت لخواتها و يوسف طلع مع أنور يسقد فيه
________
سلسبيل : الهدوء يعم المكان
سنابل : هدوء ماقبل العاصفة 😂
سلسبيل : و الله سكاته هذا مش بلاش
خشت هناء تضحك
البنات : شن صار ؟؟
___________________
يوسف طلع بسيارته و اتصل بسلسبيل ...
سلسبيل ردت : الو
يوسف : ساعة و نجي نبيك بروحك
سلسبيل خافت و بلعت ريقها : تمام به
يوسف سكر عليها و زاد السرعة 🔥
_______________________
(( في العرس - عزومة عشاء الرجالة ))
الخيمة زحمة و ولاد العم يعولو
محمود شاف واحد كيف وصل ؛ مشاله يجري
شده من ايده يكر فيه : في واحد مش متعشيييييي
اصيل شبحله و يصيح : هاته هني هاته !
الراجل تخزرط : باهي بالشوية بالشوية
محمود يكر فيه : تفضل خونا تفضل
15
________________________
بعد ساعة 🌹
يوسف وقف ف الجنان و بعت مسج لسلسبيل
_
سلسبيل شافاته و شبحت لهناء : هي نقعمزو في الجنان
هناء تتفرج ع التلفزيون : لالا فكينا اكيد الجو رطوبة
سنابل تتصل بمحمد يسكر عليها : ياريته قعد معاي نزل الغلي في اروى 😒
سلسبيل وقفت : و راس هناء نوضي معاي كساد
هناء : و كان يطلع يوسف لوطا ؟
سلسبيل : يوسف انسيه نحس فيه لم قشيشه و سافر مسكين
هناء سكتت و قعدت تشوفلها
سلسبيل علت صوتها : تي هياااااا
هناء ناضت معاها و بالها مع يوسف
__
يوسف وقف ورا باب الجنان
اول ماهناء طلعت دارلها مخدر في خشمها و فقدت وعيها
سلسبيل ترعش : زعما تموت ؟؟ 😢
يوسف شاد هناء : افتحي السيارة و اطلعي معاي
سلسبيل فتحت السيارة ف القراج : وشاحي فوق
يوسف : اركبي جيبي ليك و لأختك نراجي فيك
سلسبيل : باهي لحظة بس
و ركبت تجري
يوسف حط هناء ع الكرسي من تالي و ركب السيارة يراجي في سلسبيل ..
___
سلسبيل خشت تجري داهشة : سنابل قولي لمحمد يجي يقعد معاك حني طالعين
سنابل استغربت : وين ؟؟
سلسبيل خدت الأوشحة و نزلت
سنابل وراها : وين ؟؟؟؟
ماردتش عليها و خشت للحوش
خدت البكلاوة تاكل فيها و تتصل بمحمد ..
__________________
يوسف يسوق و طول الطريق ساكت
سلسبيل تشوف لهناء : زعما امتى تنوض
يوسف : ساعة تانية
سلسبيل سكتت وشبحت قدامها
بعد شوية وصلو لعمارة يوسف
يوسف نزل ؛ فتح الباب على هناء و حطلها الوشاح على شعرها
سلسبيل جت بحداه : و كان يشوفنا حد ؟
يوسف شاد هناء في غمره خاش بيها : انتي تصرفي
سلسبيل سكتت و خشت معاه
و هما راكبين لاقاهم جار نازل ؛ استغرب : شن فيه ؟
يوسف ساكت
سلسبيل تلخبطت : اختي كانت تعبانة في المستشفى و قاعد مأتر فيها البنج
الجار : ان شاء الله لاباس
و نزل
سلسبيل ضحكت و شدت المفتاح تفتح في الباب
يوسف وقف بحداها : جايبك معاي لموقف زي هذا اصلا
و خشو مع بعض
يوسف حط هناء ع الكنبة و يشوفلها
سلسبيل : باهي انى توا شن موقعي في الاعراب ؟
يوسف شبحلها : قعمزي و خلاص
سلسبيل حركت راسها : لالا لازم تكونو بروحكم
يوسف : شوفي محمد يجيك
سلسبيل فتحت تليفونها و اتصلت بسنابل ..
سنابل ردت : الو ؟
سلسبيل : جاك محمد ؟
سنابل : قالي مايقدرش يطلع من العزومة زحمة و مش فاضي
سلسبيل : ماشي باي
سنابل : انتو وين ؟
سلسبيل سكرت عليها و شبحت ليوسف : محمد ف العرس مافيش من يروح بيا
يوسف سكت
سلسبيل : كان هدا انت ارفعني و ارجع
يوسف : لالا مستحيل نخليها بروحها
سلسبيل : امالا كيف !!!
يوسف سكت
سلسبيل تشوف للشقة : ماشاء الله تجنن
يوسف ابتسم : شكرًا
سلسبيل : اصلاً نعرفها اختي ذوقها خيال
يوسف ضحك : ايه فعلا
سلسبيل شبحت لطاولة الأكل : لكن الجو ناقص ورد و شموع و عشي رومانسي
يوسف شبحلها و سكت
سلسبيل تلخبطت و مروحت بيدها : افتح المكيف نو
يوسف ضحك : اليوم مافكرتش ف شي غير انى نجيبها و نصالحها
سلسبيل : مدامني ساعدتك معناته حاتسامحك 😉
يوسف شبح لهناء : بيلو نبيك اليومين الجايات تساعديني في موضوع
سلسبيل : يا سلام 😍 .. شن هو
يوسف : خلي نشوف اليوم شن يصير معاي و نقولك
سلسبيل : باهي توا لازم نروح
يوسف سكت شوية و قال : يجيك مهاب يروح بيك ؟
سلسبيل قلبها دق و تلخبطت
يوسف يشوفلها : شن قلتي ؟
سلسبيل : مش عارفة
يوسف فتح تليفونه : مهاب نوثق فيه زي نفسي كان هذا مستحيل نخليك تركبي معاه
سلسبيل ساكتة
يوسف : الو
مهاب : ايوه يا معلم
____________
بعد ربع ساعة 🌹
مهاب وصل و اتصل بيوسف ..
يوسف رد : ايوه
مهاب : انى وصلت
يوسف : اوكى
و سكر الخط
سلسبيل تعدل ف وشاحها و تفكر .. ( لبستي تحشم قدامه اخي عليها 😒 )
يوسف : مهاب وصل
سلسبيل : به
يوسف : هي اطلعي باش ننزل معاك
سلسبيل : مش ماتبيش تخليها بروحها ؟
يوسف : انزلي هيا
طلع هو وياها و سكر الباب على هناء
__
مهاب واقف يراجي جنب سيارته و متوتر
يوسف طلع هو و سلسبيل و وقف عليه : ها مهاب
مهاب شبحله
يوسف : سامحني متعبك معاي
مهاب ابتسم : ولا يهمك
سلسبيل تشوفله و ساكتة
يوسف فتحلها الباب من تالي : اركبي هي
سلسبيل ركبت و هي ساكتة
يوسف سكر عليها الباب و شبح لمهاب
مهاب : شن فيه ؟
يوسف : بعدين تو نحكيلك ؛ غر توا روح بيها قبل مايروح قبلها حد من الحوش و يشوفها معاك
مهاب شبح لسلسبيل : ان شاء الله خير و خلاص
يوسف ضحك : مية مية ؟
مهاب : تم ماتخممش
و ركب السيارة
سلسبيل خدت نفس عميق و شبحتله ف المراية
مهاب شبحلها منها : كيف حالك
سلسبيل ابتسمت : تمام وانت ؟
مهاب : الحمد لله
و طلع بالسيارة
يوسف شافهم مشو ركب لشقته
لقي هناء مازالت مخدرة
قعمز جنبها و يشوفلها
1
_____________________
مهاب يسوق و يشوف لسلسبيل من المراية
سلسبيل توترت : خليك لاهي في الطريق
مهاب ضحك
سلسبيل فتحت الروشن و تنفست .. ( خيرها الطريق طولت ! )
مهاب : شن تقري توا
سلسبيل شبحتله : بنخش شهادة ثانوية
مهاب قام حواجبه : ماشاء الله تباني اكبر
سلسبيل ابتسمت
مهاب سكت
سلسبيل : على خاطر لقيتني نسوق ؟
مهاب : بالله شن صار فيك طالعة و حاصلة في روحك ماتقدريش توخري
سلسبيل ضحكت : رحت ف الطريق و جانا عمي روح بينا هو و مرته
مهاب انصدم : وانتي لاش طالعة مادامك ماتعرفيش تسوقي
سلسبيل تلخبطت : صار ظرف طارئ
مهاب سكت و خش لشارع سلسبيل
سلسبيل قلبها يدق : و اخيراً
مهاب درس السيارة قدام الحوش و سلسبيل نزلت
مهاب فتح الروشن : تصبحي على خير
سلسبيل فتحت باب الحوش و شبحتله : وانت بخير شكرًا
مهاب غمزها : عفوا
سلسبيل تلخبطت و خشت تجري
مهاب ضحك و طلع بسرعة
__
محمود روح من العرس و مقعمز تحت الشجرة ف الشارع شاف سلسبيل مع مهاب تكنطا و ماعرفش يتصرف
غمض عيونه و قعد يفكر
__
سلسبيل ركبت تجري و فتحت الباب
لقت سنابل تراجي
سنابل : وين كنتووو
سلسبيل ذايبة : حي غمزني حي قتلني
________________________
بعد مرور ساعة و نصف 🌹
هناء مازالت مخدرة و يوسف انشغل عليها
شد ايدها و بدي ينوض فيها : هناء ؟؟ .... هنو !!
هناء مخدرة ماتسمعش فيه
يوسف قعد يحاول انه يفيقها لين ناضت
هناء فتحت عيونها و شبحتله
يوسف شاد ايدها : هنوشتي ؟
هناء رمشت عيونها و ركزت
يوسف يشوفلها و ساكت
هناء تشوف للمكان و مستغربة : انى وين ؟
و قعمزت بسرعة : شن جابني هني ؟؟
يوسف : حني في شقتنا
هناء خافت و وقفت بسرعة : انت شن درتلي ؟؟؟ 😭
يوسف وقف : مادرتلك شي ماتخافيش
هناء تشوف لحوايجها : لالا انت تكذب عليا
يوسف شد ايديها بيحاول يهديها : اهدي يا هنو
هناء تعصبت : بعد من علياااا .. انى كيف جيت هني !!
و شدت راسها دايخة و تحاول تتدكر
يوسف قعمزها ع الكنبة و قعمز على ركابه قدامها
هناء شبحتله و سكتت
يوسف شد ايديها : اسمعيني حبيبتي
هناء عيونها دمعو : يوسف شن تبي مني 😢
يوسف يشوفلها
هناء قلبها يدق خدت نفس عميق و وقفت : نبي نروح
يوسف وقف و تنهد : خلينا ندوو
هناء شافت الباب مشت بتطلع منه
يوسف لحقها و شدها من ايدها
هناء شبحتله : نبي نروح
يوسف قرب منها : مش حنخليك تطلعي و انتي مازال زعلانة
هناء خافت و وخرت عَ الباب : نبي نروح مكاني هني غلط
يوسف قرب منها و يسمع ف صوت أنفاسها
هناء خايفة : خليك بعيد
يوسف حط ايده ع الباب و قرب من وجهها : اليوم قررتي تنتقمي مني بللي جايك ؟
هناء خافت منه
يوسف : نحب نقولك هنيئاً ليك حرقتني حرق مش بس انتقام
هناء تشوفله و ساكتة بان على عيونها نظرة الخوف
يوسف حط ايده على خدها : اهدي ياقلبي ماتخافيش
هناء سكتت
يوسف قلبه يدق و بصوت واطي :
حـبـيـبـتـي ؛ أقدم لكِ اعتذاري
لوجهكـ الحزين مثل شمس اخر النهارِ
عن الكتابات التي كتبتها
عن الحماقات التي ارتكبتها
عن كل ما أحدثته ..
في جسمك النقي من دمارِ
و كل ما اثرته حولكِ من غبارِ
أقدم اعتذاري
عن لحظة انهياري
من اجل هذا جئتك ياحبيبتي
راكعاً بين يديكِ
لكي أقدم لكِ اعتذاري
هناء تشوفله و عيونها مدمعات
يوسف باس ايدها ف كفها و حطها على خده : انى والله تعبت بلاكِ
هناء حضناته و بدت تبكي
يوسف حضنها و قنط عليها بقوة
هناء تبكي بلا صوت
يوسف حاضنها و ساكتين هما الزوز
هناء شبحتله و هي حاضناته
يوسف شبح لفمها و قرب منها
هناء بدت توخر : لا
يوسف يقرب و هي توخر
1
_____________
سلسبيل تهدرز لسنابل و فرحانة
سنابل : و كان شافك حد ؟
سلسبيل : الدنيا ظلام و بعدين كلهم ف العرس
سنابل ضحكت
سلسبيل وصلها مسج من محمود ع الفايبر فتحاته ..
محمود .. ليا ايام و انى نخمم و نفكر كيف نبي نفاتحك بالموضوع او حتى نلمحلك .. و كل مانبي نكلمك مش عارف شن اللي يسكت فيا ، قلت أفضل شي اني نوضحلك في مسج و نعترفلك بمشاعري ..
سلسبيل انصدمت و جسمها سقع
محمود .. انا نحبك و نبيك و ماقادر انّحيك من بالي ؛ لو انتي موافقة و تبادلي فيا بنفس الشعور او حتى تحبيني ولو شوية انزليلي في الجنان بعد ساعة .. و لو ماكش موافقة انا حانفهم منك بعدم جيّك ..
سلسبيل طاح منها التليفون و عيطت : لاااا لااا لاااا
سنابل انخلعت : خيرك ؟؟
سلسبيل راعشة : اقري التليفون
سنابل خدت التليفون و بدت تقرا
________
محمود مقعمز ف الجنان و متوتر ؛ بعتلها المسج في الفايبر باش يعرف اذا كانت قرتها او لا
______________
سلسبيل تبكي : يارب نحلم يارب
سنابل ضحكت : محلاه طلع يعرف يحب
سلسبيل : اسكتي انى حاسة بشعور اخي 😭
سنابل شبحتلها : علاش خيره محمود
سلسبيل : مانقدرش نحبه مانقدرش .. هو مجرد ولد عمي و بس غير هكي لااااا
سنابل : علاش شن ناقصه محمود خير من الطرطور أيوب اللي كنتي تكلمي فيه
سلسبيل : انى مانقارنش فيه بحد لكن مانقدرش ، انى نحب مهاب مش محمود 😭
سنابل سكتت
سلسبيل : انحطيت في موقف اخي عليه ؛ ياريته بعت الكلام في رسالة عادية راهو درت روحي ماشفتهاش
سنابل : منين بتهربي كان هذا قالك بطريقة تانية
سلسبيل : اااه ياربي 😭
سنابل : بتنزليله ؟
سلسبيل : لالالالا مستحيل ؛ مانقدرش نواجهه
سنابل : و هكي هو حايفهم انك ماتحبيشي
سلسبيل : مانقدرش نحبه اصلا
سنابل سكتت
_______________
5
بعد ساعة 🌹
هناء مقعمزة فوق طاولة الأكل و يوسف واقف قدامها
هناء : خلينا نروحو
يوسف شد خصلتها : مازال مشبعتش منك بيبي
هناء ضحكت : روح معاي الحوش و تو تشبع مني لانك حاتشوفني كل يوم
يوسف : هكي رايها المُزّة ؟
هناء : اكيد
يوسف ضحك و باسها ف خدها
هناء وقفت : لازم نوصل الحوش قبل مايروحو اماليا
يوسف يهمسلها : وانى نحطك و نمشي لأمي
هناء : و بعدين ؟
يوسف : نجيك تاني
هناء ضحكت
__________________________
محمود يشوف لساعة ايده و متوتر : فاتت ساعة و نص مش جاية معناته !!
تعفلق و ركب موطوه ؛ و هو طالع شاف هناء و يوسف جايين
خلّا القراج مفتوح و طلع بسرعة متعفلق 🔥
يوسف خش بالسيارة و درس الداخل
هناء شبحتله : مش بتمشي لامك ؟
يوسف : لين نتطمن عليك خشيتي الداخل
هناء ابتسمت
يوسف باسها ف خدها
هناء خافت : لاااا يشوفك حد 😳
يوسف حضنها : طز ف الكل
هناء ضحكت : مش هكي عاد
يوسف قرب منها تاني
هناء خافت ؛ نزلت من السيارة و خشت تجري
يوسف ضحك و طلع
5
يـتـبـــع ...
