رواية صغار العم الفصل العشرين 20 بقلم مسرة اسامة
روايــة #صغار_العم
الحَـــلْـــقـــة الــعــشـــرون 🌸
يوسف : ماشية تخطبيلي من راسك ؟؟؟ هبلتي انتي ؟؟؟؟
سعاد تشوفله و ساكتة
يوسف : والله ماعاد قاعدلك ولاك شايفة وجهي بعد اليوم
طلع و قربع الباب
سعاد حاطة ايدها على صدرها و مصدومة
قعمزت ع الكنبة و بدت تبكي : أخرتها بدي يعلي في صوته عليك يا سعاد
________________________
هناء مقعمزة ف السيارة متكية راسها ع مسند الكرسي و تبكي
(( يَـاعِـرْق قَـلْـبي يَـاقـلـيـلْ الـطَـاعَـة
كـانْ نَـلْـحـقـك نِـكْويـك بِـالـطـبّـاعـة ))
1
شافت نجاة جاية مسحت دموعها بسرعة و رشفت خشمها
نجاة ركبت : انتي اللي بتسوقي ؟
هناء : ايه
يوسف فتح باب الشارع و طلع
هناء جت عينها ف عينه ؛ لبست نظاراتها و طلعت بسرعة
يوسف تنهد و مشي على رجليه
_
هناء تسوق و ساكتة
نجاة شبحتلها : فاتاتك مباراة قوية يا هناء
هناء بصوت واطي : مباراة شني
نجاة : طلعت اروى يعطيها سلوة تسلها ورا كل شي صار
هناء انصدمت و شبحتلها
نجاة : و خواتك عطوها طريحة و سحنوها بردولي قلبي
هناء درست على جنب و مازالت مصدومة
نجاة علت صوتها : ربي يحبها إني سمعت بعد ماروح بيها عصام كان هذا الا ما خليتها عايبة
هناء شبحتلها
نجاة : هذا لو ماقتلتهاش
هناء : يعني اروى هي اللي بعتت صوري ؟؟
نجاة : ايه و انتي زي الدرويشة راقدة على وذانك تاخد ف تليفونك تبعت منه ف الرسايل يا هبلة
هناء تشوفلها و مصدومة
نجاة : و تعالي جاي ! علاش مش قايلتيلي ان الموضوع فيه صورك و ان فيه واحد داوي عليك ليوسف ؟؟
هناء : شن بتستفيدي ؟
نجاة : قالولي حتى من يوسف خدي حصة ف اروى و جلدها بِ السبتة
هناء حطت ايدها على فمها و فنصت : بجديات !!
نجاة : والله زي مانحكيلك ..؛ خليت اللاّي راعشة لتوا مصدومة حتى هي
هناء ساكتة
نجاة : هي اطلعي باش نولي بسرعة مانيش قاعدة معاك عند خالتك
______________________
03:00 م
امال وصلت لحوشها ؛ فتحت الباب و خشت
حست بيها اروى قعدت تنادي عليها من دارها : ماما ؟؟
امال خشتلها مستغربة : من روح بيك ؟
اروى : عصام ... و بدت تبكي
امال شافت وجهها انخلعت : خيرك ؟؟ من اللي دار فيك هكي !!
اروى تبكي مش قادرة تتكلم
امال علت صوتها : تي تكلمي من اللي ضربك ؟؟
اروى تبكي : يوسف ولد خالي سنوسي
امال شدت وجهها : علاااااش
اروى تبكي : يتبلىٰ عليا ف حاجات 😭
امال قعمزت بحداها تشوف فيها : كيف يمد ايده عليك بالشكل هذا ؟ شن صار بالزبط ؟؟
اروى : مادرتله شي جي و هاج فيا ؛ ضربني بالسبتة
امال تشوفلها و مصدومة : كيف يتبلى عليك و يضربك هكي ؟! قوليلي شن اللي قاله عليك بالزبط ؟؟؟
اروى : على خاطر لقاني شادة تليفوني و نهدرز يحسابني نكلم في ولاد 😭
امال حمقت : خزي عليه مايستحيش كيف يمد ف ايده على بنت !! و هو شن دخله فيك ؟؟ سيب هناء و بيدير روحه يحزر عليك !!!
اروى تسمع فيها و تبكي
امال حامقة فتحت تليفونها : تو نعرف كيف نتفاهم معاه
اروى خافت و خداته منها : لالا ماتكلميشي فكينا منه
امال شبحتلها : خليني نكلمه نعطيه على راسه يحسابك سايبة و ماعندكش امّالي !!
اروى تحرك ف راسها : لالا فوتيه خلاص
خش بوها عبد المنعم للحوش ينادي : اماااال ؟؟
امال سمعاته : تعالى انى ف دار اروى
اروى خافت : ماتقوليلاش ماتقوليلاش 😰
امال شبحتلها : بوك لازم يعرف و يمشي يدير فيه زي مادارلك وأكتر
عبد المنعم خش عليهم استغرب
اروى شبحتله
عبد المنعم : خيره منظرك هكي !!
أمال تحكيله ف اللي داره يوسف و حامقة
عبد المنعم انصدم : متأكدة يوسف ؟؟؟
امال : شن نبصرو !!
عبد المنعم تعفلق : هاني ماشيله و الا ما نكسرله !!
و طلع حامق
اروى تبكي : حي يا ماما نوضيله تربحي 😭
امال لحقاته : اصلا بنمشي معاه
طلعت الشارع و لحقت راجلها للسيارة ؛ ركبت معاه و مشو
اروى تندب ف وجهها : ووه عليك يا اروى ووه .. مشيتي فيها ... وووه علياااا ووه
_______________________
1
السنوسي يعارك ف سعاد : انى قلتلك مفيش مشي ولا ؟؟؟
سعاد تبكي
السنوسي متعفلق : اهو الولد هج منك و البنت يعلم الله بحالها عاجبك الوضع هذا !!! .. تكسري ف كلمتي يا سعااااد ؟؟؟ ف جرت تفتفيت نساوين نتحشم مع خوي !! لعب فروخ هو ؟؟؟؟
سعاد تبكي : نبي ولدي يروحلي دبر كيف تقنعه يا سنوسي
السنوسي : تستاهلي اللي يديره فيك و شوية يخي ؛ خليه عايش بروحه ع الأقل مفتك من العيشة معاك
خش الحمام و قربع الباب
______________________
وصل عبد المنعم لحوش العارف و خش للجنان حامق : سنوسي ؟؟؟ يوسف !!!!
امال معاه : بالشوية يا منعم مش هكي عاد
عبد المنعم متعفلق : انتي اسكتي ماتدويش معاي .. سنووووسي !!!!
سمعه عصام نزله يجري
عبد المنعم شبحله عاقد حواجبه : ولد خوك اللي اسمه يوسف وين !
عصام : مهناش و لو تبي تعرف اللي صار خش الداخل نتفاهمو
عبد المنعم : نتفاهمو ؟؟ نتفاهمو على شنو بالزبط ؟؟ و انتو مش قادرين تحافظو على بنتي عندكم
امال ساكتة
عصام تعفلق و فنص فيه : اعرف كيف تتكلم مع نساباتك و ماتغلطش فيهم خيرلك يا منعم ؛ ف الاول افهم شن صار و بعدين تكلم
امال : كيف تخلوه يضربها بالشكل هذا ؟؟ هذا معذبها تعذيب مش ضرب
عصام : خشو الداخل شهدرتو علينا الجيران
عبد المنعم يكشخ : من بعد اللي صار معاش خاشلكم ولا عافس بساطكم
امال انصدمت
عصام : استغفر الله العظيم
طلع العارف : شن الدوشة هادي ؟؟
عبد المنعم شبحله : يرضيك اللي صار يا عمي ؟؟ معقولة البنت تروح شبه مشوهة و انى اللي متطمن عليها انها عندكم ؟
العارف فنص فيه : بدل ماجاي زي الثور الهايج و تفتح فمك برا اسأل بنتك شن مدايرة ف شرف بنت خالها
امال : كيف ؟؟
العارف : بنتك يا فالحة خربت على بنت خالها فتنت بينها و بين خطيبها و اللي صار كله من جرايرها
امال انصدمت و سكتت
عبد المنعم : بتتبلو عليها توا ؟؟ مافيش سبلة تانية تقدر تحطها باش ادير الفرق بين بنت بنتك ولا بنت ولدك
العارف تكنطا و خبط العكوز ع اللوطّا : احترم نفسك يا منعم انت ف حوشي مانبيش نغلط معاك و نلزك
عصام تكنطا : يا امال تبي تعرفي شن دارت بنتك بالزبط ؟؟
و بدي يحكي ف اللي صار ......
امال شدت وجهها : لا مستحيل اروى ادير هكي
عصام مدلها التليفون : هذا تليفونها فتشيه بروحك و تأكدي
امال خداته منه و مصدومة
عبد المنعم من الصدمة مازاد ولا كلمة ؛ طلع لسيارته و طار بيها بسرعة
العارف ساكت قعمز ف الطاولة و ماقالش كلمة
امال خافت : ووه عليا اكيد ماشيلها
العارف يشبحلها و ساكت
امال تبكي : تربح يا عصام لحقني ليه
_______________________
مرام اتطيّب في مطبخها و متفركسة
فتحت تليفونها و اتصلت بأمها ...
نجمية ردت : الو
مرام : ايوا ماما
نجمية : نعمممم
مرام : مكرونة صالصة يديرولها رند ولا ؟؟
________________________
عبد المنعم خش لأروى يعيط : أرواااااا
أروى خافت : يارب ساعدني يارب
عبد المنعم فتح عليها الباب و خش : تكذبي عليا يا امسخة ؟؟؟
اروى قلبها يدق : بابا غر اسمعني
عبد المنعم شاد ف ايده عصاة مكنسة و يضرب فيها
اروى تعيط و هو يسب فيها
خشت وراه امال هي و عصام يحزو عليها
عصام يجبد فيه : شن ادير يا راجل بتقتلها
عبد المنعم حامق : حول من قدامي خليني نربيهاااااا
امال تبكي : البنت انضربت هلبا اليوم خلاص
اروى طايحة و تبكي
عبد المنعم حدف العصا : الله ياخدك و يريحني منك
اروى تبكي
عبد المنعم : انى شن منقص عليك باش تكوني حقودة هكي ؟!
امال تشوف لبنتها و تبكي
عصام ساكت ؛ طلع و ماقالش كلمة
عبد المنعم بدي يعيط : اعطيها و فكيني من همها الكلبة بنت الكلب
كلمي الناس اللي خطبوها قوليلهم موافقين و يجو يرفعوها بحوايجها اللي عليها و ريحوني منهااا
اروى انصدمت : لالا 😭
عبد المنعم : و عليا الطلاق ماعاد قاعدة اكتر ماقعدتي .. تفسدي بين الناس و تكذبي ؟؟؟؟ لمن طالعة قلبك اسود و تخلي ف صور البنت عند الولاد ؟؟ تندري عليهم شن يديرو بيهم ؟؟؟
اروى تبكي
عبد المنعم : لعنة الله عليك ؛ لعنة الله عليك .. هادي جامعة الشياطين اللي تمشيلهاااا من اليوم معش فيه طلوع من الحوش
و شبح لأمال : كلميهم الناس يجو يتمو فيها
امال : شن تقول يا منعم البنت قاعدة صغيرة ع الزواج
عبد المنعم : و اللي ادير فيه شنو ؟؟ حركات وحدة صغيرة ؟؟؟ هادي شيطانة فرختك شيطانة
امال سكتت
2
عبد المنعم طلع من الحوش متعفلق و ايتمتم بروحه
اروى تبكي : يا ماما انى مانبيش بالله عليك ديريلي حل
امال تبكي معاها : علاش درتي ف بنت خالك هكي يا بنتي ،، الدنيا نصيبات و يوسف مش ليك
اروى : انى مانحبش حد ياخد مني حاجتي
امال : و يوسف مش حاجتك !!!
اروى تبكي : ماما انى نحبه و نبيه .. مانقدرش نشوف هناء ليه و انى لا يا ماما مانقدرششش 😭😭😭
امال تشوفلها و تبكي
5
________________________
10:30 م
هناء ف دارها توتي في شنطتها
بحداها سلسبيل : سعدودك
هناء شبحتلها : سعدودي في الهم ؟
سلسبيل : باهي مش تأسف منك و قالك انه نادم ؟ سامحيه
هناء سكتت
سنابل : شن تسامحه والله كاني في مكانها مانسامحه لين يبوس كراعي
سلسبيل : يوسف حتى هو انظلم معاك يا هناء حطي روحك ف مكانه و اعذريه
سنابل : لا ماتعذراش هو خلاها ايام مريضة في الفراش و ماسألش عليها أو حتى جي و سمع منها
هناء شبحتلها : ايه صح
سنابل هزت راسها : ماتعدليش عليه
سلسبيل : حرام عليك يا هناء يهون عليك اوسيفه حبيب قلبك ؟
هناء شبحتلها و سكتت
سلسبيل : يهون عليك تسيبيه و تخليه بروحه ماسد هو عايش ف حوشه ما معاه حد تزيدي عليه انتي ؟؟
سنابل تتكلم ب غل : ماتنسيش انه خطب غيرها و سحنلها كبدها
هناء حركت راسها : ايه صح والله ماناسيتهاله الله
سلسبيل : تي سعاد تصرفت من راسها الراجل ماعنداش علم
هناء : قصدك صدقتيه انتي ؟؟
سلسبيل : تي لو نشوفه بعيوني مانصدقش ؛ انتي ماتشوفيش فيه لما يبدا يرف عليك وقت اللي يبي يصالحك ولا لما يبدا يخطط باش يرضيك احيه محلاه
هناء سكتت و قلبها حن ليه
سنابل علت صوتها : و ف الاخير شني ؟؟؟ ف الاخير طلع مش واثق فيها و ماباش يصدقها
سلسبيل فنصت فيها : انتي بدل ماتكحليها بتعميها ؟!
سنابل : لان هذا الحق
هناء تسمع فيهم و ساكتة
سلسبيل : و كان يسمع انك مسافرة يا هناء الا مايدير العار و مايخليكش تمشي ؛ نعرفه انى
هناء فنصت فيها : تعرفي لو تقوليله كلمة بنقلب الليلة على راسك
سلسبيل : تو يبدا يكلم فيك كل يوم و انتي قلبك مش حايطاوعك انك ماترديش 😎
هناء : و من قالك بنرفع تليفون
سنابل : قصدك مش رافعتيه ! كيف بتصوري و كيف بنهدرزو معاك
هناء تسكر ف الشنطة : كله من تليفون بابا
خشت نجاة : هنيوه ؛ لما بوك يكون ف المؤتمر اقعدي ف الجناح ردي بالك تنزلي أو تطلعي بروحك وصيتك
هناء : باهي حاضر
نجاة تشوف للشنطة : شن مازال ماحطيتيش ؟
هناء تتألم : خلاص معش مازال شي
نجاة سكتت و طلعت من الدار
هناء شرين تليفونها يوسف يتصل ؛ داراته مقفل و حطاته ف القجر
سلسبيل شبحت لهناء : غر ردي عليه
هناء : نروح نلقاك عاطيتهوله
سنابل : ايه انى تو نمدهوله
سلسبيل علت صوتها : ياسري بلا حفر يوسف والله مايستاهل هكي
سنابل : لا على اساس هناء اللي تستاهل اللي صار فيها
هناء تسمع فيهم و تاعبة : خلاص اسكتو
سنابل : يوسف لازم يذوق العذاب اللي عاشاته هناء حتى شوية لانه يستاهل
سلسبيل : لا ماتكونيش مسمومة هو ماليشي ذنب ف اللي صار
سنابل : لا ليه ذنب و هو طلع مسموم و ماهوش حنيّن
سلسبيل : يوسف مافيش ما احن منه تو تشوفي مع الايام
سنابل : لا في ؛ حمودي مافيش من احن منه
سلسبيل علّت صوتها : ووه علينا من حمودي متعك لازم اتدخليه توا !!!
هناء شدت راسها
سنابل : لانك قلتي يوسف مافيش ما احن منه
هناء تعصبت : خلااص خلااااص خلاااااص !!!
البنات انخلعو و شبحولها
هناء : اطلعي برا انتي وياهااا ؛ انى مش ناقصة زنينكم فوق راسي نبي نرتاااح
البنات طلعو ساكتات
هناء سكرت الباب و اتكت ف سريرها تبكي
تحس بألم و جسمها تاعب و مرهق
5
_
بعد شوية سمعت صوت تصفير جايها من الجنان
قعدت مركزة و عرفت انه يوسف ؛ غمت روحها باليرغان و ولت تبكي
_
يوسف واقف ف الجنان و يشوف لبلكونة دارها
(( جِـيـتْ خَـاطـمْ مـن الـبـابْ شَـاعـل ضـيـه
زعـمـا امـريّـض ولا يـفـكّـر فـيـا ))
____________________________________________________
9
بعد مرور ثلاثة أسابيع 🌹
2
11:00 م
اسماعيل في مصر يجهز ف شنطته متع السفر باش يروح هو و هناء
و هناء متكية ف سريرها تبكي و تتألم من بطنها
اسماعيل ينادي : هناااء ؟ .. هناااء !!
هناء دوب ماتتكلم : نعم بابا
اسماعيل ينادي : تعالي يا هناء
هناء وقفت مسحت دموعها و دوب ماتمشي ؛ جسمها تاعب و مرهق
اسماعيل : هناء ؟
هناء خشتله ف الدار : نعم
اسماعيل : وتيتي شنطتك ؟
هناء : لالا
اسماعيل لاهي ف الشنطة : وتيها قبل ماترقدي الطيارة بكري هلبا مانبوش نتأخرو
هناء شادة بطنها و تبكي بلا صوت
اسماعيل : السواق بيجينا بعد الفجر لان الدكتور كمال مروح معانا بنخطمو عليه ف الفندق متعه
هناء شادة ف الباب و تبكي بلا صوت
اسماعيل : قلتله من الاول انزل معاي ف نفس المكان ماباش ؛ كان هذا طلعنا طول
هناء من قوة الألم قعمزت ف مكانها : ااااه
اسماعيل انخلع و شبحلها : خيرك
هناء تتألم : اااه يا بابا معش قادرررة
اسماعيل شدها : شن فيك ؟
هناء شادة بطنها : وجاع مش طبيعي ..؛ ااااه
اسماعيل قامها و حطها ع السرير : رجعتي حتى اليوم ؟
هناء حركت راسها بمعنى ايه و تبكي
اسماعيل يشوفلها : منين الوجاع بالزبط
هناء حطت ايده على يمين بطنها من الوسط
اسماعيل : مدي رجليك
هناء مدت رجليها و تتألم : من اللي تعشيت و انى نتوجع ؛ قلتلك مانبيش ناكل انت صممت
اسماعيل يكشف على عيونها : رجعتي لانك كليتي دهانات اليوم ؟
هناء داهشة : علاش شن دخل الدهانات
اسماعيل يشوف لعيونها و ساكت ؛ لقي بياض العين مصفر
هناء استغربت : شن ادير ؟
اسماعيل ساكت
هناء شدت فيه : قيمني بنرجع
اسماعيل قامها رافعها للحمام : وضعك مش عاجبني من قبل مانسافرو
هناء خشت للحمام و بدت ترجع : خلاص اطلع خليني بروحي
اسماعيل شادها و متأتر
هناء ترجع : خلاص اطلع يا بابا
اسماعيل ساكت
هناء تغسل ف وجهها : اطلقني خلاص
اسماعيل طلقها و طلع من الحمام
هناء سكرت الباب و بدت تسيّق ف الحمام و تبكي
(( نـمـرض و يَـبْـرىٰ داي و يـوَلـيـلـي
و يـانـفـس شِـن هـوَ الـدَواء قُـولـيـلـي ))
8
_________
اسماعيل فتح تليفونه و اتصل بدكتور كمال
( دكتور باطنة )
كمال رد : الو السلام عليكم
اسماعيل : و عليكم السلام دكتور ؛ ان شاء الله مافيقتكش من النوم
كمال : لا مازال ساهر ، ان شاء الله خير ؟
اسماعيل بدي يشرحله في حالة هناء ..
________
هناء مازالت ف الحمام تبكي ؛ وقفت ع اللاوندينو تغسل ف وجهها تاني و تشوف لروحها ف المراية
(( الـخـاطِـر ضـايـق و الـهـمـوم امـلايـا
فـرج عـلـيـه الـقـلـب يـا مـولايـا ))
3
مسحت وجهها و طلعت تاعبة
اتكت ع سريرها و غمضت عيونها
اسماعيل سكر التليفون و جاها : نوضي ماترقديش
هناء بصوت تاعب : نعم
اسماعيل : دكتور كمال بيجي يكشف عليك
هناء شبحتله : لالا مانبيش نعاين ؛ خليني نرقد و تو الصبح نكون احسن
اسماعيل : لازم يشوفك و يطمني عليه
هناء قعمزت و شبحتله : علاش خيرني
اسماعيل طلعلها عباية : نوضي البسي بسرعة ماتقابليشي بالبيجامة
هناء مكشرة وجهها : يا بابا مافياش حيل نتحرك انى ماصدقت ارتحت شوية نبي نرقد
اسماعيل يلبس فيها : مفروض ليك ايام معاينة مش مخليك لتوا
__________________
يوسف متكي ف سريره و يتقلب
(( يَـا جِـفـن عِـيـنـي الـنُـوم ويـشْ يـجِـيـبـه
انْ كَـان الـغَـوَالـي طـولـوا فِـي الـغِـيـبَـة ))
2
فتح تليفونه و اتصل بسلسبيل ..
سلسبيل شافت تليفونها
سنابل بحداها : مني ؟
سلسبيل : يوسف ؛ مسكين كل يوم يتصل
سنابل : هالحاجة الكبيرة
سلسبيل فنصت فيها و فتحت الخط : الو
يوسف : كيف الحال
سلسبيل : الحمد لله ؛ وانت
يوسف : كلمتيها اليوم ؟
سلسبيل : اليوم لا ؛ لكن امس هدرزت معاها
يوسف : شن حالها و شن صاير فيها
سلسبيل : كويسة تمام
يوسف : تعرفي نسمع بإن هناء عندها تليفون و ماتبيش تقوليلي حي عليك حي
سلسبيل : والله مانكذب عليك الله ..؛ هي من قبل ماتمشي قالت ماتبيش لا تليفون لا نت لا شي ؛ تبي تغير جوها و ماتبيش حاجة تفكرها باللي صار
يوسف : انى نفكر نمشيلها
سلسبيل : هما غدوا الصبح جايين
يوسف : والله جديات
سلسبيل : والله
يوسف : امتى يوصلو
سلسبيل : مع الحداش ممكن
يوسف : مية مية ؛ اول ماتوصل للحوش كلميني
سلسبيل : علاش شن بدير ؟
يوسف : هي تصبحي على خير
سلسبيل : رد عليا
يوسف : تشاو
سلسبيل : باي 😒
يوسف سكر الخط و قعد يفكر
_____________________
تاني يوم 🌹
10:45 ص
نجاة خشت على بناتها ف الدار : نوضو نوضوو
البنات انخلعو و شبحولها
نجاة : بوكم مش جاي اليوم
سلسبيل قعمزت : علاش ؟
نجاة : مش عارفة ؛ بعتلي رسالة و قال انهم مش جايين و بعدين تو يتصل يقول علاش
سنابل : باهي توا علاش تخلعي فينا 😩 ماتقدريش تشدي روحك لين يقولك السبب ؟؟
نجاة تعفلقت : نوضي اوقفي فيسع 😡
سنابل غمت روحها : علاش تنوضي فيا مازال نبي نرقد
نجاة جتها و خدت منها التليفون : تتمرقديلي للظهر كله ف جراير محمد عارفة انى
سنابل انخلعت و قامت الغطاء من عليها : هاتيييييييه 😲
نجاة طلعت من الدار : تنوضي اتضمي الحوش تاخديه
سنابل قعمزت تتأفف : مش عارفة امتى بتبطل حركات المفرخ
نجاة من برا الدار : شن حسك قلتي ؟؟؟؟
سنابل خافت : جاية يا نجوتة 😍 ماقلت شي
و ناضت تجري للحمام
سلسبيل سارحة تخمم : زعما علاش مش جايين !
3
______________
هناء ف المستشفى مدايريلها دخول
مقعمزة ع السرير و شادة ف ايد بوها و تبكي : انى مانبيش ندير عملية
اسماعيل واقف بحداها : ماتخافيش انى مش مخليك بروحك و دكتور كمال بيحضر معاك
هناء : لالا انى نخاف منهم المصريين مانبيش حد يمسني
اسماعيل : علاش خيرهم المصريين ؟
هناء سكتت
اسماعيل : من شن خايفة يابنتي هي عملية مرارة حاتكون بسيطة
هناء تبكي : باهي نروح نديرها ف ليبيا مانبيش نقعد بروحي حتى ماما مش معاي
اسماعيل حط ايده على شعرها : يا بنتي اسمعيني ؛ حالتك صعبة لازم تنحيها ف اقرب وقت و الا حاتنفجر ف بطنك و لو صار هالشي لا قدر الله بتكون فيه خطورة على حياتك
هناء سكتت و قعدت تشوفله
اسماعيل : توكلي على الله و ديريها و بإذن الله تنوضي بالسلامة
هناء تشوفله و تبكي : باهي كلم ماما تجيني
اسماعيل : علاش تجيك و انى معاك
هناء حركت راسها بمعنى لا : مانبيش نكون بروحي لا ماما لا يوسف لا خواتي
اسماعيل سكت شوية و قال : انى معاك مش سادك ؟
هناء انحرجت حست بروحها زلقت
اسماعيل : كلها يومين و تطلعي مش صعبة هلبا
هناء تحرك ف راسها بمعنى لا : اعطيني تليفونك بنكلمها تجيني ولا مش حانديرها بكل
اسماعيل مدهولها : باهي غر ماتقعديش تبكيلها تو تنخلع
هناء خداته منه و اتصلت بنجاة ..
بعد شوية نجاة ردت : الو ؛ ايوه اسماعيل
هناء : ماما
نجاة : اهلين هناء
هناء بدت تبكي
نجاة : علاش مش جايين اليوم شن صار
هناء تبكي : ماما نبيك تجيني
نجاة انخلعت : خيرك شن فيه
هناء تتكلم و تبكي : بندير عملية غدوا
نجاة شدت قلبها : على شنوووو !!
هناء سكتت و قعدت تبكي
نجاة مخلوعة : تكلمي قلبي بيوقف !!!
هناء تبكي
اسماعيل : الله يهديك بس
و خدي منها التليفون : الو
نجاة راعشة : ايوه اسماعيل خيرها هناء على شن بتدير عملية
اسماعيل : ع المرارة
نجاة غمضت عيونها بالقوة : ووه عليااا
سلسبيل جتها : خيرك و انتي ديما ووه ووه
نجاة بدت تبكي : علاش بتنحيها ؟؟
اسماعيل : لما كانت تمرض هدوكا أعراض حصوات المرارة و امس تعبت هلبا شكّيت فيها ؛ جاها دكتور كمال اللي معاي شافها و اليوم زدنا تأكدنا ف المستشفى و قالو لازم تنحيها غدوا
نجاة تبكي و حاطة ايدها على صدرها : وه عليا عليك يا هنيوه مازلتي صغيرة ع الهم و السحن يا كبدي
اسماعيل : توا اسمعيني ؛ بنتك مدايرة النكد تبيك معاها وتي روحك و تعالي ف اول طيارة
نجاة : اصلا جاية من غير ماتطلب
سلسبيل تشوفلها و مش فاهمة شي : خيرك شن فيه !!!
نجاة تتكلم ف التليفون : ابعتلي ف رسالة كان محتاجين حاجات باش نجيبهم معاي
اسماعيل : تعالي انتي و اصيل ماتجيش بروحك
نجاة : و البنات منو بيهم
اسماعيل : خليهم عند امي منو بيهم يعني ؛ شن بيطرالهم ؟
نجاة : باهي ان شاء الله
اسماعيل : في أمان الله
و سكر الخط
هناء تشوفله : جاية ؟
اسماعيل : ايه
هناء اتكت ع المخدة و استريحت
اسماعيل حط ايده على خدها : بعيد السو عليك
هناء ابتسمت و عيونها دمعو
____
سلسبيل : تي احكيلي خيرك تبكي و علاش بتسافريلهم ؟
نجاة مسحت دموعها : اختك بتدير عملية ع المرارة
سلسبيل انخلعت : هييييييه
نجاة : كله من سعاد فقعتلها المرارة الله يعطيها فرارة اتطيرها
سلسبيل : بنسافر معاك
نجاة خشت لدارها : انى مش ماشية بنتنزه باش نرفعك
سلسبيل : قصدك بتمشي بروحك ؟
نجاة تلبس في عبايتها : معاي اصيل
سلسبيل سكتت
نجاة لبست وشاحها
خدت جوازها و جواز اصيل و فلوس و طلعت من الدار
سلسبيل جت وراها : نسايرك ؟
نجاة فنصت فيها : بري ضمي الحوش و اتصلي بخوك يروح
سلسبيل : باهي
نجاة طلعت و سكرت الباب
سنابل طلعت من الحمام : ماما وين مشت
سلسبيل : مشت بتحجز باش تسافر لبابا وهناء
سنابل استغربت : علاش ؟
سلسبيل : .........
سنابل انخلعت : حيييي 😱
سلسبيل : المفروض قتلناها الكلبة اروى
سنابل مخلوعة : ياروحي على هنو
سلسبيل : باهي اللي جتها مرارة مش حاجة تانية
سنابل : ايه الحمد لله ؛ ان شاء الله تنوض بالسلامة
سلسبيل : ايه ان شاء الله
سنابل : ماما بتمشي بروحها !
سلسبيل فتحت تليفونها تتصل بيوسف : لالا بيمشي معاها اصيل
سنابل فرحت و نطت : هالنهار عليه ندور 💃 هالنهار ربيعه نور 💃
سلسبيل تشوفلها : مصح وجهك
سنابل : بابا و ماما و اصيل مسافرين تخيلي الجو انتي 😍
سلسبيل ضحكت : هو الجو مليح لكن بالنسبة ليا مش حانتمتع بيه لين نتطمن على هناء
سنابل : حتى انى نفس الشي لكن بإذن الله تنوض منها بخير
سلسبيل : ان شاء الله
يوسف فتح الخط : الو
سلسبيل خشت للدار تتكلم : ايوه
يوسف : ها وصلت ؟
سلسبيل : غر قول صباح الخير
يوسف : تي شن صار و بلا كتر كلام
سلسبيل : مش جايين
يوسف استغرب : علاش ؟
سلسبيل : هناء مرضت
يوسف : هيا بلا كذب زايد ماعنديش جواجي للبصارة اهيا
سلسبيل : والله مانكذب خيرك
يوسف انخلع : كيف مرضت ؟!!
سلسبيل : ........
يوسف تفاجأ و حط ايده ورا راسه
سلسبيل : راهو ماحد يندري إني نعطي فيك ف أخبارها بالذات هي
يوسف : ابعتيلي عنوانها و ف اما مستشفى بالزبط
سلسبيل : باهي تو نسأل بابا ع الفايبر و نقولك
يوسف : ماشي تشاو
سكر الخط و طلع من شغله و ركب سيارته
فتح تليفونه و اتصل بمحمد ..
2
محمد رد : الو
يوسف طلع بالسيارة : ها محمد صباح الخير
محمد : صباح النور
يوسف : ان شاء الله ف الحوش بس
محمد : لا والله برا لكن مش بعيد
يوسف : بالله عليك ولي للحوش خود جوازي و جيبهولي انى نص ساعة و نكون ف راس الشارع
محمد : تمام به ؛ وين حاطه !
___________________
مرام و عصام كيف راكبين الدروج كانو عند الدكتورة
مرام : زعما ولد ؟
عصام : اللي يجيبه ربي باهي
مرام : شن بيصبرني باش نعرف
عصام شبحلها و ضحك
مرام : انت شن خاطرك
عصام فتح باب شقته و خشو
مرام : ماجاوبتنيش
عصام شبحلها و وقف قدامها : اللي بيجيني منك يا محلاه سواء بنت او ولد يكفي انك تكوني امه
و باس جبهتها
مرام ابتسمت و حطت ايدها على لحيته : ربي يخليك ليا حبيبي
عصام : و يخليك ليا
مرام تشوفله
عصام : اليوم جايني صاحبي وسام مرات يتغدا هني
مرام كشرت وجهها : علاش ؟
عصام : بنفتح انى وياه قهوة تانية بيجيني نتفاهمو عليها
مرام : حبيبي اني اليوم تاعبة و مشوار الصبح ديما يدوخ فيا مانقدرش نطيب ع الأقل نرقد سويعة
عصام : اعطيت موعد للراجل ماتحشمينيش معاه
مرام بلعت ريقها و سكتت
عصام : ديريلنا كسكسي بالبصلة
مرام تكنطت و خشت لدارها
عصام نحّا شخشيره و خش للحمام
مرام فتحت تليفونها و اتصلت بأمها ...
نجمية ردت : الو
مرام : ماما كيف حالك
نجمية : الحمد لله كيف حالك انتي و عصام
مرام : الحمد لله تمام ..؛ شن بنقولك شن طيبتي غدي اليوم
نجمية : قاعدة نخمم كيف خشيت المطبخ ..؛ علاش بتجي ؟
مرام : لالا ؛ كنت عند الدكتورة كيف روحت و حاسة روحي تاعبة و المشكلة ان عصام جايب صاحبه بيتغدا هني
نجمية : ديريله مكرونة بالبصلة و خلاص
مرام : عصام يبي كسكسي يا ماما و انى ماصدقت وصلت الحوش قوليلي كيف ندير
نجمية : انى تو نطيبه و نبعتهولك مع خوك
مرام : لالا بعدين عصام يتعفلق مايحبش ياكل من حد
نجمية : بري ابعتيه يجيبلك حاجات قرب الغدي و خليه يعطل و انزلي خودي الصونية بالدرقة
___________________
العارف مقعمز ف الجنان و يتشمس
خش محمد : السلام عليكم
العارف شبحله : و عليكم السلام
محمد خش الداخل
العارف يشوفله و ساكت
طلع احمد هو حلومة و قعمزو معاه
حلومة حطت الكمون تنقي فيه : ابصر شن صار مع اروى
العارف شبحلها : فاش ؟
حلومة : ف موضوعها ؛ البنت ماتبيش تتزوج و عبد المنعم مغصب عليها
العارف : خليه يعطيها البنت متجقجقة ع الأقل تعقل
حلومة : لكن هذا دوم مش يوم
العارف : باش تتربى ؛ شوفي شن صار في هناء ف جرتها البنت انسلت زي العودة
حلومة : صح اللي داراته عيب و مايندار
العارف : و انى اللي يوصل في هناء لا عاد نبيه ولا نبي فيه طيب
حلومة : لواه حتى هي حفيدتك مفيش فرق بينهم
العارف خبط ايده ع الطاولة : الا هناء ! تبي تقارني الجروة هادي بيها ؟؟
احمد ضحك : اروى الجروة ههههههه 😃
حلومة سكتت
13
_
محمد يطق على سعاد ✊
بعد شوية سعاد فتحت
محمد : مرت عمي كيف حالك
سعاد عيونها منفخات من البكي : الحمد لله
محمد خش : يوسف يبيني ناخد حاجة من داره بعد إذنك !
سعاد : خش هو شن خلّا
محمد سكت و خش لدار يوسف خدي الجواز و طلع
سعاد تشوفله و ساكتة
محمد شبحلها : تبي حاجة مرت عمي ؟
سعاد : نبي ولدي يروح بس
محمد : سيوره يروح غر الفترة هادي محتاج انه يكون بروحه
سعاد هزت راسها و سكتت
محمد طلع و سكر وراه الحوش
________
يوسف مدرس في راس الشارع يراجي في محمد
بعد شوية جاه و وقف عليه من الروشن
يوسف يسلم عليه : شن الأمور
محمد مدله الجواز : ماشية ..؛ ناوي الرحلة ؟
يوسف خداه منه : لالا ماشي لمصر
محمد ضحك : ان شاء الله تشدلك
يوسف ضحك : زعما ؟
محمد : كبيرة منك ره
يوسف : ان شاء الله خير
محمد : هي امالا مانعطلكش
يوسف : مية مية ؛ منور حمّد
محمد : بوجودك
محمد مشي و يوسف طلع بالسيارة
________________________
نجاة مشت للخطوط حجزت ليها هي و اصيل و روحت
فتحت الباب و خشت
أصيل شبحلها : شن صار معاك
نجاة : الطيارة الليلة ساعة ثمانية ماحصلت الحجز الا بطلوع الروح
سنابل : علاش
نجاة : الكلبة اللي تخدم ع المنظومة مكرت فيا لين عيطت عليها عيطتين باش حجزتلي
سنابل ضحكت : حي ع الجو 😂
سلسبيل مصدومة : بجديات عيطتي عليها !!
نجاة شبحتلها : ايه امالا شن بنديرلها ؟؟ نقوللها نبي نحجز ف اول طيارة تقولي غدوا الصبح و ان الرحلة متع الليل كلها فُل ؛ مشي لفتت الشاشة ليا لقيت فيه زوز كراسي فاضيات فنصت فيها و قلتلها و هادو شنو ؟
اصيل ضحك : صحة ليك
سنابل تضحك 😂
اصيل : باهي انى عندي امتحان كيف ندير ؟
نجاة : وصلني و روح
اصيل : تي شن وصلني و روح الامتحان بعد غدوا
نجاة سكتت
أصيل : تو نمشي نلغي الحجز
سنابل و سلسبيل تكنطو
_______________________
يوسف ف مكتب الخطوط الليبية
الموظفة : للأسف رحلة اليوم كلها فُل
يوسف : كيف ندير انى اليوم لازم نركب
الموظفة : لو تبي تحجز انتظار مرات تصدف معاك
يوسف : ايه ياريت
_______________________
عصام ف الصالون متعه مع صاحبه وسام
_
مرام تلود ف المطبخ و تراجي ف خوها يجيها
بعد شوية اتصل بيها
مرام ردت : ايوا
خوها فيصل : انى وصلت
مرام : باهي تو يجيك ولد سلفي ياخدها منك
فيصل : باهي بسرعة مستعجل
مرام : خمسة دقايق هي
سكرت منه و اتصلت بأزهار ..
ازهار ردت : ايوه
مرام : ازهار كيف حالك اليوم
ازهار : الحمد لله كيف حالك انتي
مرام : الحمد لله ؛ بنسألك احمد وين ؟
ازهار : اهو مقعمز بحداي يتغدا
مرام : والنبي معليشي نتعبه ينزل لخوي ياخد منه حاجة غر مستعجلة و مانقدرش ننزل لان عندنا راجل
ازهار : باهي تو ينزل هي
مرام : صحيتي
ازهار : سلمك
و سكرت الخط : احمد حط الكاشيك من ايدك و نوض
عماد شبحلها : علاش تنوضي فيه
ازهار : خو مرام لوطه ياخد منه حاجة و يركبهالها
احمد تكنطا : ماخاطريش في النزول توا جعان
ازهار : هيا نوض مرت عمك اول مرة تطلب حاجة
احمد حط الكاشيك و ناض متكنطي
محمود يشوفله : نزل عصام ولا نزلت هي علاش الجو الزايد تنزل فيه ف القوايل
ازهار : خيركم درتو قصة معليشي و كان نزل
___
احمد نزل خدي الصونية من فيصل و ركب
وقف قدام حوش عصام لقي الباب مفتوح خش
مرام ف المطبخ ادير ف السلاطة
خش عليها احمد شاد الكسكسي
مرام ابتسمت : صحيت سلمك جياب
احمد ابتسم : سلمك
مرام نحت السلفر من الكسكسي و ضحكت
احمد : توا نبي نشري جيلاطي
مرام : شني ؟
احمد : اعطيني نشري حاجة من الدكان
مرام مدتله جني
احمد خداه منه و مش عاجبه
خش عصام للمطبخ : مازال ؟؟
و شاف للكسكسي : ماشاء الله
مرام ابتسمت : خمسة دقايق و تعالى ارفع السفرة
احمد : تعرف يا عصام نزلت توا جبت
مرام تلخبطت و شداته من كتفه و باساته من خده : برا لحق ع المحل راهو يسكر ف القايلة
احمد : امالا زيديني فلوس هذا الجني مايديرش شي
عصام ضحك و عطاه خمسة : اجري
احمد خدي الخمسة ؛ و طلع يجري
مرام ضحكت
___________________
2
07:30 م
نجاة ف المطار مقعمزة ف الصالة فاتحة تليفونها و تراجي ف النداء
يوسف ركب ف اخر لحظة ؛ لقاها مقعمزة جي بحداها
نجاة شبحتله تفاجأت
يوسف ابتسم : توصلي بالسلامة
نجاة تشوفله : حتى انت مسافر ؟
يوسف : كان سخر ربي
نجاة سكتت
( و سمعو صوت النداء )
يوسف وقف : هيا
نجاة وقفت و مشو مع بعض للبوابة
نجاة ساكتة ماتبيش تدوي معاه
يوسف شرين تليفونه رد : ها مهاب
مهاب : ها شن صار فيك
يوسف : ركبت مية مية
مهاب ضحك : مليح بكل توصل بالسلامة
يوسف : الله يسلمك
مهاب : اسمع نسيت شنطة عندي شن موضوعها
يوسف : و انى نقول شن ناسي !! تي عادي مش موضوع خطمها على حوش العيلة مفتاح الشقة قعد معاي
مهاب : اوكى تم
يوسف : ماشي هي
مهاب : كلمني لما توصل
يوسف : ان شاء الله
و سكر الخط
ركب الطيارة مع نجاة و جي مكانه بحداها بدل اصيل
نجاة استغربت : مكانك معاي !!
يوسف : اهو ع الأقل مش بروحك
نجاة سكتت و قعمزت
يوسف قعمز بحداها و قعدو هما الزوز ساكتين
__________________
أصيل خش للحوش و قعمز ع الكنبة : انتي وين يا حلوفة منك ليها ؟؟
جاته سلسبيل : تكلم كويس احسنلك
اصيل حط رجل على رجل : ديريلي قهوة تحركي
سلسبيل حطت ايديها ف نصها : والله ؟؟
أصيل : و عندي سورية تبي الغسل حتى هي ديريها
سلسبيل : و شن تاني ؟؟
اصيل : و بعد ماتكمليهم ديريلي نتعشا
سنابل جاته : حني بايتين عند مرت عمي ازهار الليلة
اصيل فنص فيها : تباتي هني لا حوش ازهار لا حوش حلومة
سلسبيل : تي هي اللي أصرت تحشمنا نردوها عيب
اصيل حرك راسه : لالا عندها ولاد
سنابل ضحكت : ياسر بلا جو تو جونا جدد محمد و محمود ؟؟ و حني اصلا بنرقدو ف دار المعيشة ولا في دار روان مش حانباتو معاهم
اصيل سكت
__________________
11:45 م
هناء : ماما عطلت معش قادرة نصبر
اسماعيل : شوية و توصل
هناء : علاش مش انت اللي جايبها !
اسماعيل شرين تليفونه وقف : انى نازل للاستعلامات شوية و نجي
هناء : به
و وقفت ف الروشن قلبها يدق
بعد شوية خشت عليها نجاة : هنيوه
هناء شبحتلها
نجاة ضحكت
هناء جتها ضبطتها و تبكي : اخيراً جيتي
نجاة : بعيد السو على بنيتي ياريته فيا ولا فيك
هناء شبحتلها : جيت بنغير جوي لقيت روحي ف المستشفى
نجاة تمسحلها ف دموعها : معليشي كله مكتوب المهم تنوضي بالسلامة
هناء : الحمد لله على كل شي
خش وراها يوسف
هناء شبحاته قلبها دق بسرعة و جسمها صقع
يوسف قرب منها و قلبها يدق
نجاة شبحت ليوسف و طلعت للممر
يوسف يشوف لهناء : الف سلامة عليك حبيبتي
هناء خنقتها العبرة و تلفتت للروشن ساكتة
يوسف وقف وراها : ماتبيش تشبحيلي ؟
هناء خدت نفس : ماما ؟؟؟
يوسف : هنو !!
هناء تعصبت : ماماااااا !!!!!
جتها نجاة تجري : خيرك ؟
هناء شبحتلها و دموعها نزلو : علاش جاي معاك و يزيد فيا بشوفته ؟؟
يوسف سكت
هناء : انى ف المكان هذا بسببه علاش لاحقني ؟ علاش يزيد فيا على مابيا !!
يوسف يشوفلها : هناء انى جيتك باش نكون معاك
هناء ضبطت امها و تبكي : مامااا
يوسف يشوفلها و عيونه مدمعات ؛ كيف بيقرب منها ..
نجاة اشرتله بيدها بمعنى خليها
يوسف رشف خشمه و طلع برا
هناء تبكي : انى نبي ننساه علاش جايني بس
نجاة تمسحلها على شعرها : سمع بيك مريضة حجز في نفس اليوم و جاك باش تعرفيه مازال يحبك و تهميه
هناء تبكي : مادامه خطب و انى قاعدة ناري مابردتش معناته مايحبنيش ؛ انى معادش نبيه خليه يروح و يريحني
نجاة شدتها و قعمزتها ع السرير : خلاص معش تبكي و تزعلي روحك ؛ لازم ترقدي مستريحة على خاطر عمليتك غدوا
هناء : رقديني على رجلك
نجاة شبحتلها
هناء : ننعس و نبي نرقد في حجرك
نجاة قعمزت ع السرير و هناء تكت راسها على رجلها
نجاة تخربشلها ف شعرها و هناء غمضت عيونها و دموعها ينزلو
_____
يوسف مقعمز ف جردينة المستشفى يدخن و متضايق
مرت ساعة و ساعتين و ثلاثة وركب
وقف ف باب حجرة هناء لقاها راقدة بروحها و الضي مطفي
خش بالشوية قعمز بحداها ع الكرسي يشوفلها و قلبه يتقطع
شد ايدها و قال بصوت واطي :
اسف ع اللي راح و اسف ع اللي جاي
و اسف ع اللي صار مني و سويت
أرجوك سامحيني على كترة اخطاي
ارجعِ تراني راجع لك من اقصاي
و ان ماقبلتِ برجعتي لك توفيت
5
هناء تسمع فيه و شادة بكيتها ماتبيش تبكي و تحسسه انها فايقة
يوسف يحرك ف ايده على يدها
منزل راسه و عيونه مدمعات
هناء حست بألم ف بطنها تحركت : امممم ااه
يوسف شبحلها
هناء فتحت عيونها و شبحتله
يوسف : خيرك هنو
هناء فكت ايدها : حوللللل
يوسف وقف : اهدي انتي تعبانة
هناء علت صوتها : اطلع براااا
يوسف يشد فيها : باهي غر قوليلي في شنو تحسي
هناء تبكي : اطلع برا و خليني في حالي
جتها الممرضة تجري : هو فيه ايه ؟ مالك انتي حاسة بحاجة ؟
هناء تبكي
يوسف : تحس بألم في بطنها
الممرضة شبحتله : من فضلك اطلع برا لو سمحت
يوسف مسح على وجهه و طلع ف الممر
الممرضة حطت لهناء مسكن ف التغذية
و هناء بدي ياخد فيها و ترقد
__________________________
سلسبيل و سنابل بايتات مع روان
روان فاتحة الفيس : سلسبيل تعالي شوفيه شن كتبلي
سلسبيل تشوف معاها و تضحك
روان : شن نقوله
سلسبيل : قوليله باهي تو نتلاقو
روان : لالا نخاف
سلسبيل : تو نمشو مع بعضنا و نوقف عليه انى
سنابل شبحتلها : كيف بنمشو و امتى ؟
سلسبيل : نمشو غدوا بسيارة ماما لما اصيل ف الجامعة 😍
البنات ضحكو
روان : امالا بنمشي معاك هكي و خلاص مش حانكلمه ولا نقوله ان اني اللي ندوي معاه
سلسبيل : تي مية مية
و ناضت و مشت للمطبخ
لقت محمد نايض من نومه و واقف يشرب ف اميه
محمد شبحلها
سلسبيل : راك تقول كلمة انى سلسبيل
محمد ضحك : عارف
حط الطاسة و مشي لداره
_
3
سنابل متكنطية : خوك تفكر نومه لما انى بايتة عندكم
روان : اليوم تاعب هلبا من الصبح و هو مهناش
خشت سلسبيل : سنابل محمد ناض توا كان ف المطبخ
سنابل : و خيره ماجاش هني ؟
سلسبيل جت جنب روان : بالك تحشم
سنابل وقفت : من امتى يتحشم
و طلعت من الدار
روان : شوفي شن قالي يا سلسبيل
________
سنابل وقفت ف باب دار محمد و تشوف للديار التانيات
خشت بالشوية توشوش : محمد ؟؟ حمودي !!
محمد مغمض عيونه
سنابل قربت منه تشوفله و هو راقد
حطت ايدها على شعره : معقولة ترقد لما انى عندكم ؟ موصيك اصيل امالا ؟
محمد ساكت
سنابل سكتت و قعدت تشوف ف التيشرت متعها بتجبد منه خيط ماحصلتش
دارت شعرها ع الجنب و بدت اتدغدغ فيه ف وجهه
محمد قام ايده يحك ف خده
سنابل ضحكت بلا صوت و عاودت تاني اديرله فيه على خده و رقبته
محمد فتح عيونه ؛ جبدها و لوحها بحداه : تناشبي فيا ؟
سنابل انخلعت : حووووللللل 😰😰
محمد شادها : ديما نقولك ماتلعبيش معاي لكن انتي ماتسمعيش ف الكلام ياعمري
سنابل قلبها يدق بسرعة دفاته و ناضت تجري
محمد قعمز يضحك ؛ مسح على وجهه و لحيته : ااااااخ
_
سنابل خشت تجري لفراشها قلبها تحس فيه بيطلع منها : والله ماعاد نعاودها الله
سلسبيل شبحتلها : خيرك ؟
سنابل غمت روحها باليرغان و سكتت
روان : غر خليك مع هذا شن يقول يا سلسبيل
سلسبيل شبحتلها : محمود وين ماقابلنيش ؟
روان : ممكن بايت مع مراد صاحبه
سلسبيل : خسارة مخلي مكانه
و شرين تليفونها ادم يتصل ؛ تكنطت : واك واااك واكككك
روان : خيرك
سلسبيل : الدراه هذا اللي معش يبي يبطل سكرت البيلة عششلي هني
سكرت عليه و داراته وضع طيران
_________________________
تاني يوم 🌹
12:30 م
طلعت هناء من العملية و مازالت تحت تأثير التخدير
اسماعيل واقف مع دكتور كمال هو و يوسف و نجاة مقعمزة جنب هناء تراجي فيها تصحىٰ
بعد شوية يوسف خش عليها
نجاة شبحتله : شن قال الدكتور
يوسف : قال وضعها كويس يراجي فيها تفيق باش يكشف عليها
نجاة سكتت و شبحت لهناء
يوسف : نوضي انزلي مع عمي كولي حاجة و تعالي ؛ من امس ماكليتي شي
نجاة : لالا خليني لين نتطمن على بنتي
يوسف : انى قاعد معاها و لو فاقت نكلمك
نجاة سكتت
يوسف : لازم تاكلي باش تشدي روحك
نجاة وقفت : باهي كان ناضت كلمني
يوسف : حاضر به
نجاة شرين تليفونها : اليوم التليفون مابطلش
و ردت : الو
سلسبيل : ايوا ماما
نجاة طلعت برا الدار تتكلم
يوسف شبح لهناء و شد ايدها ينوض فيها : هناء ؟؟ هناء !!
1
و قعد يحاول معاها بعد ربع ساعة بدت تفيق
يوسف : هيا نوضي ياعيوني و طمنيني عليك
هناء مغمضة عيونها : يوسف !
يوسف : نعم حبيبتي
هناء دموعها ينزلو و دوب ماتتكلم : يوسف .. خـ خليك معاي يوسف
يوسف يمسحلها ف دموعها بصبعه : معاك ياقلبي معاك
هناء تهلوس بإسمه و تبكي
يوسف يشوفلها و دمعته نزلت ؛ قلبه يتقطع و ضميره مش مريحه
هناء فتحت عيونها : ماما ؟
يوسف مسح دمعته و رشف خشمه
هناء شبحتله : يوسف !
يوسف : الحمد لله على سلامتك حبيبتي
هناء نحت ايدها منه بالشوية و دوب ماتدوي : نبي ماما انت شن ادير هني ؟
يوسف سكت
هناء تبكي : اطلع
يوسف : معش اديري في روحك هكي يا هنو
هناء دوب ماتتكلم : اطلع من قدامي .. نبي مامااا
يوسف ...
يـتـبـــع ...
