رواية صغار العم الفصل الثامن عشر 18 بقلم مسرة اسامة
روايــة #صغار_العم
الحَـــلْـــقـــة الــثـامـنــة عــشـــر 🌸
سعاد انسحبت و مشت لحوشها : ااه هذا وين قلبي ارتاح
__
ازهار تشوف لهناء : لا حول ولا قوة الا بالله فرحة ماتمت
هناء فقدت الوعي تاني
حلومة راعشة : كلمو اسماعيل يجي يشوفها ولا يرفعها للمستشفى بسرعة
نجاة تصيح : سنابل !!! اتصلي بِ بوك فيسسسع
___________________
يوسف يدور بسيارته و متعصب .. ( تكذب عليا تقولي مانعرفاش و هي اتدلع فيه مجودي !!! )
و يخبط ع الستيرسو بيده .. ( كيف تستغباني و تضحك عليا و انى اللي وقفت قدام امي على خاطرها !! )
درس السيارة ع جنب و تكّا راسه ع الدومان بارمة بيه الدنيا و خاش ف دوامة .. ( تبي تهربي معاه يا هناء ؟ علاش توهمي فيا بحبك بس .. طلعتيني ماننفعش و تدوي بيا لصاحبك !! )
حس بروحه مخنوق ؛ فتح بطمة سوريته و قعد تايه ف افكاره
______________
أروى تتكلم ف التليفون : هذا رقم مني ؟
أمجد : متع واحد صاحبي ؛ تليفوني رزاني فيه اللي كنت عنده
أروى ضحكت : شن صار
أمجد : اللي تبيه صار و روح زي المهبول
أروى : ياسلاااام مسحت على قلبي
أمجد : لكن عرف اسمي الزفت كله منك
أروى : كيف ؟
أمجد : لانك لما كنتي تكتبيلي تكتبي حتى في اسمي
أروى : تي عادي مش موضوع
أمجد : توا شن يصير في العملية اختي بادية تمرض
أروى : ابعتلي اسمها كامل ف مسج و ماتخممش حتى موضوع الحضّانة عندي
أمجد : مية مية
أروى سكرت الخط
بعد شوية وصلها المسج و طلعت من دارها
خشت على امها ف المطبخ : ماما
امال تخلط في كيكة شبحتلها : نعم
أروى قعمزت ف الطاولة : فيه واحد يقرا معاي عنده اخته عندها ولادة مبكرة نبيك تساعديها
أمال طفت الخلاط : كيف بنساعدها
اروى : راجلها متوفي و حالتها صعبة ماعندهاش حق العملية ف المصحة ؛ و المستشفيات زي ما انتي عارفة كل شي لازم انتي تجيبيه و كله يكلف ..؛ حالتها تقطع القلب
امال سكتت
اروى : و البنية اللي بتجيبها تبي حضّانة و عناية و قصة
امال : من هو الولد
اروى : أمجد اللي ساعدنا خاله ف الجوازات
أمال سكتت بعدين قالت : اها عرفته ؛ باهي كلميه يقولها تجيني ف العيادة و تو نساعدها حاضر
اروى ابتسمت
أمال : اللي يدير الخير يلقاه ع الأقل نربحو اجرها
اروى : اي والله
________________________
سعاد ف مطبخها اتطيب ف بسبوسة : هالنهار عليه اندور ..؛ هالنهار اربيع منور
هذا اليوم اللي نبيه 👏 فرحانة و نراجي فيه
12
____________________
09:00 م
هناء ف المستشفى مدايريلها تغذية و راقدة
نجاة مقعمزة جنبها : عارف روحه مش قد الزواج علاش يلعب عليها و مخليها تجري و توتي
اسماعيل واقف بحداها : اسكتي يا نجاة مش وقت كلام خلينا نشوفو البنت شن يصير فيها و بعدين ساهل
نجاة سكتت و هي تسحن
بعد شوية خش السنوسي : السلام عليكم
اسماعيل شبحله : و عليكم السلام
السنوسي يشوف لهناء : كيف حالها توا
نجاة ناضت و طلعت من الحجرة
السنوسي شبحلها
اسماعيل : شوفة عينك لتوا ماناضتش
السنوسي سكت
اسماعيل : شن اللي صار ؟
السنوسي شبحله : والله ماعارف يا اسماعيل ؛ حتى مشيتله ف شقته قعدت نكلم فيه و نسأل فيه ماباش يحكيلي شي ..؛ شادلي ف قولة صار موضوع بينا و ماتفاهمناش فيه و خلاص
اسماعيل استغرب : موضوع شني اللي ماتفاهموش فيه توا قرب العرس و خلاها تمرض
السنوسي : علمي علمك ايديا ارتبطو و حشمني معاك معاش عرفت كيف نتصرف
اسماعيل هز راسه : يعني كيف هكي مفيش سبب ؟؟؟!
السنوسي : والله ماعارف ..؛ انى لتوا مصدوم
اسماعيل شبح لهناء : خلي البنت تفيق و نفهمو منها
____________
..
العارف مقعمز مع العيلة ساكت و متغشش
حلومة متنكدة : والله الا عيطوا علينا ؛ العين مامخلية حد
اروى داروحها متأثرة : وجعووني هلبااا ، بالذات هناء ياروحي عليها توتي و تجري لعرسها فجأة يسيبها و يفوتها .. اكيد مدايرة حاجة
روان : كيف مدايرة حاجة ؟
اروى شبحتلها : بالك لقاها تكلم ف غيره
ازهار : لالا مستحيل هناء ادير هكي
سلسبيل فنصت ف اروى : حني ماعرفناش السبب لتوا ماتبديش تاخدي و تفترشي منك ليك
اروى قامت حاجبها : والله نقول في الحق
سنابل علّت صوتها : حق عينك يا معفنة تو كان انوضلك نقطعلك شعرك نوريك الحق شن هو 😡
امال فنصت فيهم : تحشمي منك ليها قدام جدكم
اروى شبحتلها : والله موضوع مايخشش الراس يا ماما هكي فجأة ايسيبو بعضهم
روان : انتي مادخلكش فيهم ألهي في عمرك بس
اروى قلبت وجهها : انى قلت وجعتني و انتو حرام الواحد يدوي معاكم كلمة
و ناضت للمطبخ لقت سعاد و مرام مقعمزين ف الطاولة و يهدرزوا
سعاد : انى من الاول مش راضية و قلتله لوح عليك بنت نجاة ماسمعش كلامي ؛ اهو شوفي توا شن صار
مرام : علاش خيرها هناء كويسة و طيوبة
سعاد كشرت وجهها : انى مانبيش البلوة نجاة ؛ حرفة و كلوفية حاطة راجلها تحت باطها و تمشي في الكل على كيفها ؛ ولا يعجبها عجب ولا صيام في رجب
مرام : هي صح تبان واعرة لكن حسيتها فيها هلبا مميزات و طيبة
سعاد تحرك ف يدها : انتي الطيبة ياوخيتي ..؛ بالنسبة ليا ولا ! نشوف فيها ماتناسبنيش نهائي و من يومي مانحبلهاش ريحة لانها تغار مني في كل شي
مرام سكتت و قعدت تشوفلها
اروى قعمزت معاهم ف الطاولة : تعرفو الموضوع اللي صار مش بلاش ؛ مافيش دخان من غير نار
مرام شبحتلها : كيف
اروى : اكيد يوسف كشف هناء تخون فيه او لقاها متع وجيج فاتها في قرب العرس
سعاد حمقت : ريتيها اووووه !! عليك تربية 😡
و شبحت لمرام : شفتي ؟؟ شفتي توا يا مرام نقولك نجاة ماتناسبنيش اهي شوفي رباية بناتها كيف ربي طلعها على حقيقتها من توا قبل ماتجي كنتي و تنحسب عليا
مرام : حرام عليك تظلموا في البنت يوسف ماقالش حاجة زي هكي باش تركبوا عليها تهمة
اروى : بالله عليك حطي اي موضوع في بالك يفركسهم و يخليهم يفسخوا ف يوم و ليلة
مرام تكنطت : الله اعلم شن هو السبب ؛ المهم الواحد يشد لسانه و يسكت ربي فوقنا و تو يحاسبنا على كلامنا
سعاد تتحرك بيدها : تقولي هكي غر لانك ماتعرفيهمش
مرام وقفت : انتم ولاية و الدنيا دواره معادش تتشمتوا ف الناس
و طلعت من المطبخ
اروى تشوفلها : خيرها ولت شيخة هادي ؟
سعاد : فوتيها مازال ماتعرفش نجاة و بناتها
اروى شبحتلها : تعرفي يا مرت خالي شن اديري باش تكسري راس نجاة و بنتها ؟؟
سعاد : شني ؟
اروى : اخطبي ليوسف
سعاد : اما نخطبله و هو مش طايق يشوف حد قدامه
اروى : مسكين حتى هو مداير في روحه هكي
سعاد سكتت
اروى : تبي الحق يا مرت خالي انى سمعتها تتكلم مرة لكن كذبت روحي
سعاد : شن سمعتيها تقول
اروى شبحت للباب و شبحت لسعاد : سمعتها توشوش ف المربوعة و الحق اني خاطمة بالصدفة ره بالصصصدفة نسمع فيها تقول " لالا هو واثق فيا ثقة عمياء مش حايشك يعني لما بنهربو تو يحسابني انخطفت و يدورني لين يدهش "
سعاد مصدومة : اقسمي بالله 😲
اروى تحرك ف راسها : ريتي ريتي يا مرت خالي وله ؟ لازم يخطب و يتزوج باش يعفس على رقبتها
سعاد : راسي و راسه لين ناخدله
اروى : غر ردي بالك تجيبي سيرتي بس بعدين يحرش بابا و يوريني
_________________________
1
ولاد العم مقعمزين ف الجنان
أصيل حامق : غر تروح هناء و نفهم منها بس ؛ تي وقسماً بالله لو يطلع هو اللي غالط فيها و مسيبها الا مانقتله ..؛ يجري بيها و ف الاخير يسيبها يحساب مفيش وراها تريس ؟؟؟
محمد : ماتديرش المشاكل بينك و بين ولد عمك هما ادرىٰ بنفسهم
محمود : ايه عنده الحق ايييييه
و شبح لأصيل : انى معاك يا اصيل لو يوسف هو اللي غالط فيها مش حايطلع من بين ايدينا عايش
و خبط صدره : خودها مني
محمد علّا صوته : تي شن تقول انت وياه ؟؟! معقولة بتعادوا ولد عمكم و بتضربوه على خاطر موضوع خطبة ؟ تي شن تقولو الزح !
أصيل متغلل : ولد عمي على عيني و راسي لكن يوصل في اختي و يرخي بيها تبيني نسكتله !! لااا و راس العزيّز ماصايرة
محمد : متفهم موقفك لكن خلو الموضوع يحلوه العمام بين بعضهم ماتخشوش فيه و تزيدو الطين بلة
محمود : حني قلنا لو هو السبب يعني مازال ماقررناش
محمد فنص فيه : انت تسكر فمك و ماتتدخلش الموضوع يخص عمامك الزوز ..؛ اطلع منها الدوة اهيا
محمود سكت
اصيل حرك راسه : بوي مش حايدير شي نعرفه ؛ تو يقول مانعاديش خوي على خاطر مواضيع زي هادي و يسكت
محمد : غر خلو هناء تروح و بعدين يصير خير
سنابل طلعت للجنان بتكلم محمد لقت معاه اصيل و محمود ؛ وقفت ف مكانها و سكتت
اصيل شافها : ها خيرك ؟؟
سنابل تلخبطت : ماكلمكش بابا ؟
محمد شبحلها
اصيل : كان يكلم فيا قال معطلين شوية
سنابل سكتت و عيونها في محمد
محمد تلفت للجهة التانية
سنابل خشت متنكدة : ياربي شن هاليوم هذا 😢
احمد يلعب بالكورة ف الجنان
محمد انزعج منه و عيط عليه : تي سيّبها و خش ارقد البلي الاحرف
احمد انخلع : باهي
______________________
01:00 ص
هناء متكية ف سريرها مغمضة عيونها و دموعها ينزلو قلبها محروق
سلسبيل و سنابل مقعمزات بحداها و متنكدات
نجاة : هي نوضي انتي وياها و ارقدو خلو أختكم ترتاح
سلسبيل : نبي نقعد معاها بالك تحتاج حاجة
نجاة : لالا ماتبي شي ؛ نوضي توا هيا
سنابل تشوفلها : وين كان مدسوس هاليوم !
نجاة علّت صوتها : لدارك انتي وياهااا
هناء انزعجت : اسكتي يا مامااااا
نجاة سكتت و فنصت ف بناتها
ناضو سلسبيل و سنابل لدارهم و نجاة طفت الضي على هناء و طلعت
هناء غمت روحها باليرغان و استمرت في البكي
_____________________
أصيل مع بوه ف الدار : تي كيف ماتبيش تدوي كيف !!
اسماعيل : موضوع بينهم و مايبوش يحكو فيه خلاص احترمهم
اصيل حرك راسه : لالا تو نسألها هي ضروري نعرف
اسماعيل : اختك تاعبة و لازم ترتاح ؛ مافيش داعي تضغط عليها توا يا أصيل
اصيل : تو نمشي للي اسمه يوسف و نفهم منه غدوا
اسماعيل : انت ماليكش دخل فيه الموضوع هذا ؛ انى ولي أمرها و انى اللي نتصرف اطلع منه
اصيل تعفلق هز راسه و مشي لداره
__________________
سنابل ف دارها تلود ف مكانها تتصل بمحمد مايردش
سكرت تليفونها و بدت تتأفف : نبي نرضي محمد كيف ندير ؟؟؟
سلسبيل متنكدة على هناء و يوسف وساكتة
سنابل : قوليلي !!!
سلسبيل شبحتلها : بري انزلي و قوليله ينزلك حتى هو و تأسفي
سنابل هزت راسها : لالا مش حاينزل نعرفه
سلسبيل علّت صوتها : حني وين وانتي وين توا ؟؟؟
سنابل تكنطت و فتحت تليفونها على رقم روان و اتصلت ..
بعد شوية روان ردت : الو
سنابل : ايوه روان
روان انخلعت : خيرك شن فيه
سنابل : خوك شن يدير ؟
روان : خلعتيني نحساب هناء ابصر خيرها
سنابل : تي قوليلي محمد وين
روان : من بكري ف داره احتمال راقد
سنابل : نوضيه و قوليله قتلك سنابل تلقاني ف الجنان و لو ماكش نازل انى مش حانركب و نبات فيه للصبح
روان ضحكت 😂
سنابل : سمعتيني ؟؟
روان تضحك : باهي تو نقوله
سنابل سكرت الخط و نزلت بالدرقة للجنان
_______
روان خشت على محمد : محمد ؟؟
محمد واقف ف الروشن يدخن : خيرك
روان قربت منه و قعدت تحكيله سنابل شن قالتلها ....
_______________
يوسف قاعد ف شقته بروحه ..
حاس بخنقة و ضيقة و يدخن
_______________
سنابل واقفة تراجي في محمد
بعد شوية نزل و طلع الجنان
سنابل قربت منه
محمد يشوفلها و ساكت
سنابل : اسفه هلبا
محمد : اسفك شن بيفيدني !
سنابل عيونها دمعو : والله ماقصدي نشك فيك ؛ انى من غيرتي دويت هكي لاني مواضيع الزرادي مانحبهمش و ديما واخدة عليهم فكرة غلط
محمد : سنابل ! الثقة اساس العلاقة يعني لو انتي مش واثقة فيا صعب ان علاقتنا تكمل و حانقعدو ديما ف المشاكل
سنابل تبكي : انى اسفة
محمد سكت
سنابل تبكي : اليومين اللي بعدتهم عليا كأنهم شهور مش يومين 😢
محمد ضحك و قرب منها يمسحلها ف دمعتها
سنابل : انى اسفة هلبا حمودي نوعدك ان معش نزعلك مني بكلام زي هذا
محمد : باهي خلاص معادش تبكي
سنابل حضناته و تبكي بلا صوت
محمد ضحك و شبح للرواشن : هييه رانا مش واخدين ساتر
سنابل ماتسمعش فيه
______________________________________________________
و مرو ايام و ليالي و هناء مازالت منهارة و طريحة فراش ؛ على أمل يرجعلها حبيبها و يعتذر منها
_
اما يوسف قاعد ف شقته و مايطلعش منها نهائي ؛ طافي تليفونه و خاش في حالة كآبة
_________________
09:30 ص
هناء طلعت من دارها و خشت الحمام
نجاة حست بيها تحركت ؛ جتها بتشوفها لقتها ف الحمام وقفت تراجي فيها
بعد شوية هناء طلعت : صباح الخير
نجاة تشوفلها : صباح النور ..؛ كيف حالك
هناء مكشرة : الحمد لله
نجاة تشوفلها
هناء : انى بننزل لميمّة شوية
نجاة : لالا اقعدي تو نكلمها هي تركب
هناء و هي طالعة : مش حانشوفه ماتخافيش ؛ هو معادش يجي
فتحت الباب و طلعت
نجاة قعدت واقفة تشوفلها : ان شاء الله ماعاد يرتاح نهار هللي خلاك ذابلة ؛ بجاه نهار هالجمعة
_____
هناء واقفة قدام حوشهم تشوف لحوش يوسف و دمعتها ف عينها
فتحت تليفونها تتصل بيه بس قاعد مقفل
سكراته و نزلت
______________________
يوسف في شقته متكي
سعاد مقعمزة بحداه : نوض افطر وتيتلك فطورك من بكري
يوسف حاط ايده على عيونه : ماخاطريش يا أمي قداش مرة بنعاود
سعاد : لآمتى بتقعد في الحالة اللي انت فيها ؟ نوض اتدوش و انشط و ارجع لشغلك زي قبل .. الوضع هذا مايفيدك ف شي راهو
يوسف سكت
سعاد : باهي فهمني شن اللي صار بينكم ! لا انت تبي تحكي ولا هي تبي تتكلم كيف هكي ؟!
يوسف شبحلها : لو جاية باش تقعدي تعاوديلي في نفس الكلام ارجعي للحوش احسن
سعاد تكنطت : هي جوها سمح و تطلع و تنسرف و تضحك مع الكل و انت حابس روحك بين أربعة حيوط ؟؟
يوسف انصدم : هناء ؟؟
سعاد حطت ايدها ف نصها : ايه هناء ..؛ ولا كأن صايرة معاها حاجة بكت و عيطت اول يوم و من تاني يوم نساتك
يوسف سكت و دمه بدي ينحرق
سعاد : تلقاها زعلت لانها مش حاتلبس الفيلو و تتجكتر على صاحباتها بكتلها شوية و تمت ..؛ تو اول ماتشدلها ف عريس لُقطة تجريله جري
يوسف يسمعلها و دمه محروق من كلامها
سعاد تشوف للشقة : شوف مصلي ع النبي عليك حويشك جاهز و مش ناقصاته حويجة الا بنية الحلال اللي تنوره
يوسف قعمز : فكيني منه الجو هوا مش وقته
سعاد علّت صوتها : لواااااه ؟؟ امتى امالا وقته !! لين هي تتزوج قبلك و تقهرك ؟؟
يوسف شبحلها و سكت
سعاد : تو نخطبلك احلى وحدة فيك يا ليبيا و خليها هي تنسحن
يوسف ساكت
سعاد : والله ماتستاهل ظفرك ؛ اني واثقة و متأكدة انها مدايرة عملة اكبر من راسها لكن الحمد لله الحمممدددد لله اللي ربي كشفها ليك قبل ماتاخدها و تحصل فيها
يوسف ساكت ؛ يحك ف ايديه على بعض و دمه يغلي
سعاد حطت ايدها على كتفه : اسمع كلامي سلم وليدي و خود برأيي المرة هادي ؛ اخطب بنية تستاهلك تو تشوف كيف تغيّرك و تنسيك فيها
يوسف خش للحمام و ماردش عليها
سعاد سكتت .. ( لازم نزيد انّق عليه باش يقتنع بكلامي )
11:30 ص
يوسف دوش و طلع من الحمام
لبس حوايجه و جي لأمه : امتى بتروحي ؟
سعاد شبحتله : مازال لين نطيبلك غداك
يوسف حرك راسه بمعنى لالا : المطبخ مانبيش نستعمله خليه جديد
سعاد : امالا روح معاي للحوش معادش تقعد بروحك
يوسف : نبي نعيش هني بروحي مستريح
سعاد : مالك و مال الوحدة يا اوسيفه ؟ شن ناقصك باش تحبس روحك يا وليدي و انت ماكش غالط فيها ؟؟
يوسف يلبس ف ساعته : عندي مشوار نديره و نجيك بعد الجمعة
______________________
هناء متكية على رجل حلومة و متنكدة
حلومة تمسحلها على شعرها : هذا اللي كنت خايفة منه يا بنيتي ؛ صح فرحتلكم و نتمناكم كلكم تاخدو بعضكم ؛ لكن زواج الأقارب مش ساهل على اي مشكلة يتزاعلو العيلتين
هناء : انى مانبيش عمي و بابا يتعاركو او يكرهوا بعضهم بسبب موضوعي اني و يوسف ..؛ لان حتى حني الزوز ماليناش ذنب فيه
حلومة : شن اللي صار ياهنيوه فهميني تربحي ؛ يومها قلتي انه ظلمك
هناء عيونها دمعو : فروخ الحرام خشو بينا
حلومة شبحتلها : من هما ؟
هناء تبكي : مش عارفة ..؛ حسدوني فيه الله ياخدهم
حلومة تأثرت : ربي يجعل كيدهم ف نحرهم ؛ حسبي ربي يا بنيتي بس .. ربي في الوجود و الا ما ياخدلك حقك
هناء تنهدت : حسبي الله و نعم الوكيل
حلومة سكتت
هناء خانقتها العبرة : هو لو يجي و يسمعني انى مستعدة نسامحه لانه معذور غر يجي و يسمعني و يصدقني
حلومة : شن اللي صار بالزبط ؟
هناء سكتت و تنهدت
خشت مرام : السلام عليكم
هناء و حلومة شبحولها : و عليكم السلام
مرام : كيف حالكم اليوم ؟
هناء قعمزت تمسح في دموعها : الحمد لله
حلومة تشوف لمرام و ساكتة
مرام : كيف حالك ماما حلومة ؟
حلومة : هداكا النهار اللاّي توا بديت ماما حلومة من جديد ؟
مرام استغربت : كيف ؟؟
حلومة : يوم اللي هربتي من قدام عمك قلتيلي يا اللاّي و توا ماما
مرام تلخبطت : ماهو عمي حشمني مش عارفة كيف قلت هكي ، سامحيني ماما
حلومة : لا يابنيتي يدوم عليك اميمتك من اليوم بتناديني اللاّي زيك زي سلفاتك ؛ انى من الاول ماهضمتهاش كلمة ماما
مرام تحشمت و سكتت
هناء ناضت و مشت للمطبخ
__________________________
سنابل و سلسبيل في مطبخهم
سلسبيل : لازم نعرف من اللي دار هكي والله كان هدا تنبت فيا نخلة
سنابل : حتى انى نبي نعرف ؛ هناء مستحيل تخونه مستحيل ..؛ تي هي حتى ايام الجامعة كانت تخاف تصاحب بتخون يوسف !!!
سلسبيل فنصت فيها : ردي بالك تدوي قدام حد هناء ماتبيش حد يعرف باللي صار
سنابل : باهي عارفة ؛ انى مستغربة في يوسف كيف سكت و مافضحش بيها
سلسبيل : ايه الحمد لله اللي ستر عليها
خشت عليهم نجاة : وحدة منكم تنزل تشوف هناء خيرها عطلت
سلسبيل : خليها تتنفس شوية بالك مقعمزة ف الجنان
نجاة حركت راسها : لالا انزلي توا شوفيها
سلسبيل خدت تليفونها و طلعت
نجاة خشت لأصيل تصيح : نوض تحرك ياسر من النوم
اصيل شبحلها : خيرك
نجاة : الجمعة بتفوتك نوض تحررررك
اصيل غم روحه : مش حانلحق عليها خلاص
__
سلسبيل و هي نازلة ف الدروج لقت محمود
محمود شبحلها : شن الجو
سلسبيل : الحمد لله شن جوك انت
محمود حك شعره متلخبط : باهي
سلسبيل تشوفله : خيرك
محمود سكت
سلسبيل فنصت فيه : ماتقولهاش !!
محمود بصوت واطي : الليلة متسقد
سلسبيل شهقت : هيييييييييه 😲
محمود فنص فيها : تي اسكتي النهار الاحرف
سلسبيل مصدومة : بجديات ولا تتسهوك
محمود : والله العظيم
سلسبيل خافت : لا بالله عليك لا
محمود يشوفلها : دوينا فيه الموضوع و تميت أموري خلاص
سلسبيل عيونها دمعو : ماتقهرناش فيك تربح
محمود سكت
سلسبيل : بالله عليك فوتها الهجرة و اقعد حني مش ناقصين توا
محمود هز راسه : خلاص اعطيت كلمة
سلسبيل : لو ليا خاطر عندك ماتمشيش
محمود سكت و قعد يشوفلها
سلسبيل : راهو والله نفضّح بيك و نقول للعيلة كلها ..؛ ياسر موضوع هناء و يوسف مزعلنا ماتزيدناش حتى انت يا محمود بالله عليك
محمود ساكت
سلسبيل : والله مانقدر نتخيل الحوش بلاك
محمود شرين تليفونه شافه و سكره
كيف بينزل سلسبيل شداته من ايده : وين ماشي ؟
محمود شاف لإيدها و تلخبط : طالع
سلسبيل : بالله عليك ماتسافر يا محمود بالله عليك ؛ نترجّا فيك
محمود ابتسم و نزل
سلسبيل وراه : اعطيني كلمة يامحمود !!!
محمود و هو طالع : ان شاء الله خير
سلسبيل سكتت و خشت لحوش جدها
_________________________
بعد ساعة
محمود عند صاحب القارب تبع الهجرة
محمود : غيرت رايي و ماصارليش .. اعطيني فلوسي و خليني نتوكل
صاحب القارب : لا مانقدرش نعطيك توا بعد ماجهزنا أمورنا و قررنا نطلعو الليلة ، المفروض جيتني قبل يومين لو تبي تغير رايك مش نفس اليوم
محمود تكنطا : اسمع ؟ خلينا نتفاهمو بالكلام خير مايصير شي لا يعجبني ولا يعجبك
صاحب القارب تكنطا : شن بدير يعني ؟ بتمد ايدك ؟ كان راجل دير حاجة
محمود تعفلق و فتح عليه موس بوخوصة : تحب تلعب معاي ؟
صاحب القارب خاف و وخر : نزله من ايديك و بلا هبال يا راجل
محمود يعيط : اعطيني فلوسي خير مانشركلك جنابك توا 😡
صاحب القارب خاف ؛ فتح شنطته و أعطاه فلوسه
محمود خداهم منه و ضربه بوني على عينه طيحه بيه
صاحب القارب شد عينه و تعفلق
________________________
يوسف ف الطريق هو و امه
سعاد : فكر في كلامي كويس و رد عليا .. صدقني مش حاتندم
يوسف : انى مانبيش نتزوج نحيه الموضوع من راسك
سعاد شبحتله : بصراحة ماكنتش نبي ندوي لكن حسني بنتكلم خلاص
يوسف ساكت
سعاد : هداكا النهار سمعتها تتكلم و كذبت وذاني
يوسف : من هي
سعاد : هناء من غيرها
يوسف نقص السرعة و شبحلها : كيف تتكلم
سعاد تعاودله ف كلام اروى على اساس هي اللي سمعاته : .......
يوسف دمه فار و زاد ف السرعة
سعاد خافت : بالشوية خير ماتقلبنا
يوسف ساكت و حامق
سعاد : انى هذا علاش نبيك تخطب و تشوف حياتك ؛ هي بايعاتك من الاول اعفس على قلبك و جيب اللي تفورم عليها
يوسف ساكت
سعاد : خليني نفرح بيك و نشوف صغيويرتك يملو عليا الحوش
_
2
بعد شوية درس يوسف السيارة قدام حوشهم و نزل
سعاد نزلت : خلاص بتروح ؟
يوسف عاقد حواجبه : بناخد حاجات ليا و طالع
سعاد خشت معاه الجنان : باهي امالا انى خلي نشوف حناك
______
سلسبيل و هناء ف مطبخ حلومة
سلسبيل : اجديده ماروحش ؟
هناء تغسل ف الماعين : لالا ؛ طالع هو و عصام من الصبح
سلسبيل : وين
هناء : مش عارفة ممكن معاهم حتى عمي عماد و احمد
سلسبيل سكتت
هناء كملت و خدت الفوطة تمسح بيها : انى بنركب مليت من هني
سلسبيل : به
هناء طلعت من المطبخ لقت سعاد : مرت عمي كيف حالك
سعاد خشت لحلومة و ماردتش عليها
هناء اتضايقت و خشت الدروج
كيف بتركب خش وراها يوسف
حست بحد وراها تلفتت
قلبها دق بسرعة و عيونها دمعو
يوسف ركب بسرعة و مباش يشبحلها ؛ قلبه مغصوص و خاطره مكسور منها
هناء لحقاته و شداته من ايده : يوسف !
يوسف نحالها ايدها و شبحلها
هناء تشوفله و تبكي : أرجوك ماتظلمنيش يا يوسف الظلم حار
يوسف يشوفلها
هناء تبكي : انى مانعرفش من اللي كلمك و قالك عليا كلام مش مزبوط لكن و الله العظيم ماخنتك او حتى كلمت راجل غيرك
يوسف عاقد حواجبه : تبيني نصدق إن مش انتي اللي متكلمة ع الفيس و ان مخترقين حسابك ؟ باهي تمام .. و الصور اللي مبعوتات منين محصلينهم ؟؟
هناء تبكي بخنقة : مانعرفش
يوسف هز راسه بعصبية : ماتعرفيش !
و بدي يعيط : انى كل مانتفكرهم و نتفكر كلام ال***** اللي دوي معاي تتظلم قدامي و تركبني نار يا هنااااء
هناء تبكي
يوسف مسح على وجهه بيديه : و الرسايل اللي من رقمك ؟؟ حتى هما ماتعرفيش !
هناء سكتت و هزت راسها بمعنى لا
يوسف علّا صوته : كيف ماتعرفيش يعني طارو من تليفونك ؟؟!!
هناء تبكي : تليفوني مايمسش فيه حد غيري والله انى قريب ننجن منه الموضوع هذا لا ليلي ليل ولا نهاري نهار
يوسف ضحك بهزوة : الحركات متعك اهما ديريهم على حد غيري انى خلاص كشفتك
هناء انصدمت
يوسف : توا كان تبي تهربي مع مجودي متعك الطريق واسعة ليك ربي يجيبهالك زينة
و خش لحوشهم و سكر الباب
هناء تشوفله و مصدومة فتحت حوشهم و خشت
سكرت الباب و قعمزت وراه تبكي
يوسـف ..
لم تقترف يدي جريمة بحق حبنا الكبير ..
كان اكبر احلامي انتَ ..
كان قلبي ينبض عشقاً بأسمك ..
كان غروري قد كُسر أمامك ..
ذاب قلبي وغرقَ في بحر حبكَ الكبير ..
يوســف ..
لم اكن افكر يوماً ان اتنازل عن قطرة من قطرات ندى حبك ..
لم يوقف قلبي لحظه عن عشقك ..
كنت اخي ، صديقي ، حبيبي ، أبي ..
لم تكن مجرد حباً عابراً في طريقي ..
يوسـف ..
لم افكر يوما بكسر حبنا الكبير ..
لا تتسرع في حكمك الظالم لي ..
لا تكسر كياناً أحَبَكْ بصدق ..
يوسف .. أحـبـك
و إن منعني العالم عنك ؛ أحبك ..
و إن كان الموت طريقي ..
أعد التفكير قبل قتلِ قلبي و عقلي ..
أحبك 💔
____
نجاة شافتها جتها وقفتها : نوضي من هني ؛ خيرك اسمله
هناء ضبطتها و تبكي : بنموت ياماما
نجاة مضبطتها و تبكي معاها
هناء تبكي : ياريت اللي صاير معاي حلم و يجي حد يفيقني منه انى معش قادرة نتحمل خلااااص
2
__________________________
يوسف قعمز ف داره متعصب و خانقاته العبرة بس يكابر مع نفسه
مايبيش يبكي و يحس روحه مكسور 💔
مايبيش يضعف لانها خاناته بعد ماعاند امه عليها
رشف خشمه و مسح على وجهه و لحيته بسرعة و ولع دخانه يدخن فيه
__________________________
3
سلسبيل طلعت الجنان تتصل بمحمود ..
محمود رد : الو
سلسبيل : انت وين
محمود : شوية و جاي الحوش
سلسبيل : احلف انك جاي
محمود : والله جاي شوية و نوصل
سلسبيل : به
بعد شوية خش محمود
سلسبيل شبحتله : شن صار
محمود وقف قدامها : خلاص كنصلته
سلسبيل فرحت : احلف
محمود ابتسم : والله
سلسبيل فرحانة : الحمد لله ؛ والله كنت خايفة و متوترة ماعرفتش نتصرف .. خفت تمشي من غادي لغادي
محمود يشوفلها و ساكت
حلومة تنادي : سلسبيييييل ؟؟؟
سلسبيل سمعتها : خلي نشوف اميمة انى تشاو
محمود يشوفلها و ساكت
______________
2
05:00 م
يوسف خداه النوم ف سريره
خشت عليه سعاد شافاته مابتش تنوضه
و هي طالعة خبطت ف الشكماجة يوسف حس بيها و فاق
سعاد شبحتله : ولي على نومك ارتاح
يوسف قعمز يحك ف عيونه : ساعة قداش
سعاد : ساعة خمسة
يوسف وقف : لالا بنطلع هو هداكا
سعاد : باهي اقعد اشرب معاي القهيوة
يوسف سكت
سعاد : هي خمسة دقايق و نوتيها راجيني
___
محمود قاعد ف الجنان سمع حد ينادي عليه طلعله
لقاه صاحب القارب جايه و معاه زوز نفار
محمود قام حواجبه : تفضلو
صحاب الراجل تلاقو على محمود و بدو يتضاربوا
_____________
سنابل مع هناء ف الدار تسمع ف الدوشة : هذا ف زنقتنا وله ؟
نجاة :ممكن ايه
هناء متكية و ساكتة
سنابل فتحت البلكونة و طلعت : هذا محمود 😲
نجاة طلعت معاها : خيره ؟؟؟
سنابل طلعت تجري من حوشهم و ركبت لمحمد اتطقطق
فتحت ازهار
سنابل داهشة : محمد وين ؟؟
ازهار انخلعت : خيرك شن فيه
سنابل : محمود مداير عركة لوطا بروحه
ازهار رعشت : وووه عليااا ووووه
محمد سمعها جاها : خيرك
ازهار ادف فيه : انزل لخوك قبل مايقتلوه بسرعة
_________________
سعاد تشرب ف القهوة : شن قلت هيا ؟؟
يوسف : معش تضغطي عليا يا امي خيرك
سعاد : انت غر قول باهي بس نمشي اليوم نشوفهالك
يوسف هز راسه : لالا نحيه الموضوع من راسك مانقعدش نكرر كل شوية
سعاد سكتت .. ( غر يجي بوك تو نقوله هو يرفعني مش على كيفك )
يوسف حط الفنجان و وقف : ماتبي شي ؟
سعاد : سلامتك
يوسف : الله يسلمك
خدي حاجاته و فتح الباب لقي محمد نازل و ازهار نازلة وراه راعشة
يوسف استغرب و سكر الباب وراه : خيركم ؟
ازهار شبحتله : .......
يوسف حط الشنطة و نزل يجري ورا محمد
ازهار كيف بتنزل شدتها نجاة : ماتنزليش توا غر بتقعدي تعيطي
سنابل خشت لحوشهم و خشت لدار هناء
هناء : اصيل وين ؟
سنابل شبحتلها : طلع امبكري شوية فاتاته العركة
و طلعت للبلكونة تتفرج
هناء ناضت معاها تشوف
سنابل تشوف : يارب محمد مايصيرله شي كان هدا نموت 😢
هناء ركزت لقت يوسف حتى هو ف العركة قعدت تشوفله و ساكتة
_
بعد ماتمت العركة خشو ولاد العم للجنان داهشين
سنابل شافتهم خشو نزلت تجري و هناء لحقتها
____________________
يوسف انضرب على حاجبه
و محمد انضرب على فمه
و محمود ماصارله شي
10
حلومة تشوفلهم و راعشة : يا حي عليا يا كيّتي كيّه من هما اللي دارو فيكم هكي ؟؟؟
محمود شبحلها : قولي حني شن درنا فيهم خليناهم يروحو يمشو بالجنب زي الباغليات
سلسبيل ضحكت : قصدك هجتو فيهم ؟؟
محمد : واحد شاك فيه راسه تفترش
و أشر على يوسف : يوسف خدي حديدة و ضربه بيها على راسه
سلسبيل شبحتله و ضحكت : مليحة
يوسف واقف معاهم و ساكت
محمود حامق : مازال خاطري فيه الكلب
يوسف : من يكون هو ؟
محمود سكت
و جت ازهار تجري هي و نجاة و البنات
ازهار تشوف لولادها و راعشة : ماتبيش تعقل يا محمود لين تجيبلي الجلطة ؟!!!
محمود ساكت
هناء شبحت ليوسف و وقفت ف مكانها
يوسف جت عينه ف عينها و شبح للجهة التانية
1
سنابل واقفة على محمد تشوفله و ترعش : شاربك دم
محمد : اموره طيبة فوتيه
خشت سلسبيل جابت معقم و قطن
قعدو يعقمو ف الجروح
هناء تشوف ليوسف و قلبها يدق تبي تكلمه و تقرب منه بس مش قادرة
يوسف و هو طالع : هي السلام عليكم
هناء تشوفله و عيونها مدمعات رشفت خشمها و خشت لحوش جدها
____________________
1
07:30 م
مقعمزين الكناين مع حلومة يشربو ف القهوة
خشت عليهم سعاد متأنقة : السلام عليكم
ردو عليها بإستغراب : و عليكم السلام
نجاة و بناتها يشوفلها و ساكتات
حلومة تشوفلها : شكلك طالعة ؟
سعاد مبتسمة : ايه عندي خبر حايفرحك يا اللاّي
حلومة ابتسمت : فرحينا كلنا
سعاد : ماشية بنخطب لِـ اوسيفه
العيلة جاهم الخبر زي الصاعقة ؛ صارت لحظة سكوت و كلهم يشوفو لبعض
سعاد تغيظ ف هناء : مافيش مبروك
هناء تشوف و قلبها يدق بسرعة
نجاة بِ برود : الف مبروك عليه
سعاد : الله يبارك فيك عقبال بنياتك
هناء ناضت و طلعت بسرعة للجنان ؛ تبي تشوف يوسف
طلعت الشارع لقاته عمها هو الي يراجي
السنوسي ف السيارة : تي وينها هادي طلعتلي مشوار من العدم توا !!! اكيد فلانة جابت ولا فلانة ماتت مانعيوش حني
_
هناء قعدت واقفة ف الجنان بارمة بيها الدنيا و مش فاهمة شي
_
حلومة متعفلقة : هذا شن الهبال اللي اديرو فيه ؟؟؟
سعاد : الولد يبي يتزوج و بنخطبله وين الهبال في الموضوع يا اللاّي
الكناين ساكتات 😐
حلومة تتكلم بيديها : ماليكمش شهر كنتو خاطبين بنتنا و توا تبو تخطبو وحدة غيرها و تجيبوها كنة ف الحوووش ؟؟؟!!!! والللللله والله العظيم كنتك الجديدة ماهي خاشتلنا حوش ولانا راضيين عليها قبل ماهناء تبرد نارها و تتزوج .. لا انى ولا بنتي ولا كنايني فهمتي ولاااا 😡
سعاد طلعت و ماردتش عليها
حلومة ضغطها ارتفع
مرام مدتلها امية : خودي اميه و هدي روحك يا اللاّي
حلومة تشرب : حرقتلي دمي الله يعطيها كيّه
نجاة ناضت و لحقت هناء
____
هناء مازالت واقفة و مصدومة
طلعت سعاد من وراها شبحتلها
سعاد مبتسمة : عقباليك
هناء تشوفلها ترعش و خانقتها العبرة
سعاد طلعت للسنوسي و ركبت السيارة
السنوسي شبحلها : وينك لتوا ؟
سعاد : هيا اطلع
و بدت اتبيّب ف الكلاكس
السنوسي : خيرك ؟؟
سعاد : غر اطلع اطلع
السنوسي طلع : وين بتمشي باه ؟؟ عندك عرس و انى مانندريش ولا شنو ؟؟؟
سعاد اتبيّب لين طلعو من الشارع
__
هناء تسمع ف الكلاكس و ساكتة
تلفتت بتخش للحوش لقت نجاة وراها
جتها تجري ضبطتها و تبكي : مامااا 😭
نجاة مضبطتها وساكتة
هناء منهارة : علاش هكي يديرلي ياماما ؟ .. علاش ظلمني و قهرني في عمري انى والله مادرتله حاجة
نجاة تبكي معاها : ماتغشيش روحك والله الا مانزوجك سيد سيده
هناء تبكي : ااااه يا ماما اااه 💔
نجاة تبكي بلا صوت
هناء : بيسكنها في الحوش الي فرشته و اخترته كله على ذوقي يا ماما ... بنموووت 😭
5
يـتـبـــع ... 💗
_______________
