رواية صراع قاصر الفصل الخامس عشر 15 بقلم نوسه حمد

قريت الرسايل وشفت الصوره حسيت نفسي م كويسه عديل انا واثقه من نفسي م غلطت غلط لدرجه اني انفضح لو غلطت ح تكون اني سمحت لبكري يمسك يدي وربنا اغفر لي بقيت افكر ليه ايلاف عايزه كده وعشان شنو رديت عليها قلت ليها شوفي يا ايلاف انا بي امكاني اني افضحك في كل القروبات بالرسايل العندي واني عملت لي عمل ودمرتيني ودمرتي حياتي عشره سنه وممكن كان اقبل دردشه راجلك واخونك وافضحك بس انا م قليله اصل زيك وشوفي الصوره دي ما بتخوفيني بيها اولا الصوره دي اتشالت لغرض تشويه سمعه وانا كنت بودع في بكري واتحداك تلقي فيني ثقره لو وريتي ناس الحله كلهم انا ما سأله فيك كتبت ليها الرسايل دي وانا بمثل فيها اني م خايفه بس انا جواي الخوف ح يكتلني وح اموت عديل لانو سمعتي فوق كل شي وهي عايزه تخرب لي سمعتي قررت اني اوجهه المشكله دي بكل مافيها من ثقل رغم اني م ح اقدر ومجرد الناس م يشوفو الصوره دي في نظرهم انا قليله ادب والناس م بترحم وما بختو النيه السمحه بالعكس ح يبدو يألفو وتأليفهم اصعب من الصوره دي والكلام دا كلو عشان انا انكسر بس انا م ح انكسر

تاني يوم اتصلت علي الشيخ قلت ليهو البت الكتبتني تاني هددتني ممكن توريني اوراد انا ازكرهم يوميا يحصنني قال لي ليك بي ازكار الصباح والمساء وسوره البقره ويس مع صلاه الصبح ان شاءالله عوجه م بتجيك وماتخافي من بني ادم خلقو ربنا قوي قلبك بالايمان وخلي عندك ثقه انو ربنا م ح يخزلك وانا مابنساك ح ادعي ليك ي بتي شكرتو شديد وكلامو طمن قلبي وتوكلت علي الله وعملت بالقالو لي

مرت الايام وبديت انسا تهديد ايلاف لي ومشيت مدني نزلت مدرسه والمدير استقبلني انا وعلي ووداني الداخليه علي اطمئن علي شديد ورجع انا قلبي كان مقطوع لاني اتعودتا عليهم شديد وابوي محتاج لي بس انا لازم افرحهم اكتر واكتر

فقدتا بكري شديد مشيت لي عمي محمد عشان ابلغو اني نزلت مدرسه قال لي خلاص انا قاعد لو احتجتي لشي قلت ليهو الله اديك العافيه يا ابوي وسالتو من بكري نزل مدرسه ولا لا قال لي بكري مرتو حامل ورافضه الاكل والشراب واليوم كلو تستفرغ وعايشه بالدربات وما بتسمع كلام زول غير بكري عشان كده قاعد معاها انا قلبي جوه انهرد هرد ودموعي قربت تجري بس حبستها قلت ليهو الله يسعدو يا عمي بتمني ليهو كل الخير ويعني ما ح ينزل مدرسه قال لي ح انزل بس شويه لمن مرتو دي تتعود قلت ليهو طيب رجعتا زي ما بقولو خشمي ملح ملح وقلبي حارقني قررت انساهو واشيلو من بالي وابعد من سكتو للابد عشان ما يتأثر بس بالاخص حسيت من كلام عم محمد انو مرتو متعلقه بيهو شديد وانا مستحيل افرق بين اتنين ولا بقبل اكون زوجه تانيه وكلتي امري لله وجدعت الماضي وراي وبقيت مركزه مع مستقبلي وعقلي مافيهو غير القرايه بقيت مهووسه شديد بيها وكالعاده متفوقه شديد كنت

مرت الايام وبكري نزل معانا ف المدرسه انا لمن عرفتو اتنقبتا طوالي واتجنبتو تماما كل م يقرب مني كنت ببعد منو ووقفتو عند حدو قلت ليهو احترم نقابي دا واحترم الخوه البينا قال لي م ح اضايقك ي نوسه اوعدك

يوم رجعت الحله عرفت من ناس بيتنا انو محمد ود عمتي نزل وداير يعرس في ايلاف راسي بقا ملان وبقيت خايفه من ايلاف والفضيحه الحا تعملا لي وعايشه في توتر م طبيعي بليل سمعت صوت ضيوف مع علي قومتا وعيني فيها النعاس امي قالت لي ادخلي سلمي دخلت لقيتو محمد وياريتني ما شفتو طبعا محمد اتغير شديد وبقا وجيهه وجاهه م عاديه من بعيد سلمت عليهو وكنت مكمكمه بالتوب علي اخوي قال ليهو نسيبه دي اتنقبت وبقت م بتصافح قال لي ربنا يثبتك وكنت حاساهو ملهوف علي عرفت انو ايلاف مابتكون فضحتني معاهو يوم ناس بيتنا مافي وكنت انا راقده مع ابوي لانو كان عيان شويه سمعت صوت محمد ود عمتي لبست التوب واتكمكمت دخل سلم وسالني من علي قلت ليهو ماف استاذن طلع انا افتكرتو ح يطلع قعد في المظله قال لي نوسه عايزك قلت

ليهو عايز شنو ي محمد قال لي عاوزك في كلام مهم يا تديني رقمك يا تقعدي اتفاهم معاك قلت ليهو لا م ح اقدر اقعد المظله دي فاتحه قصاد الباب وانت عارف ناس الحله بديك رقمي بس ياريت ما تسبب لي مشكله مع ايلاف مرتك قال لي انتي خايفه منها ليه انا محلالات لي اربعه قلت ليهو اي نعم بس انا م من ضمن الاربعه ديل حمر لي وطلع ما وصل الباب تلفوني اتصل قال لي ردي رديت عليهو قلت ليهو انت عايز مني شنو قال لي نوسه ايلاف كتبتك صاح انا راسي بقا لافي قعدت اتمتم قلت ليهو ايلاف لا لا ي محمد مستحيل ايلاف تكتبني ليه ما تظلمها قعد اضحك قال لي سبحان الله ماعايزاني اظلمها وهي ظلمتك وكانت مستعده تاني تظلمك اتزكرت الرسايل والصوره والتهديد وبقيت محتاره هل احكي لمحمد واستنجد بيهو واخرب حياه ايلاف زي م خربت حياتي ولا اسكت واثبت علي التهم وبالذات ربنا جاب لي محمد حدي عندي …….يتبع