رواية صغار العم الفصل الثاني عشر 12 بقلم مسرة اسامة
روايــة #صغار_العم
الحَـــلْـــقـــة الــثــانـيــة عــشـــر 🌸
محمود مل بروحه ووقف و هو ماشي لقي محمد واقف مع سنابل في جهة بروحهم
ضحك : يا نهار مش فااااايت
و مشي للشاليه
لقي سلسبيل مقعمزة بروحها : شن اديري بروحك
سلسبيل شبحتله : ندير في عصبان 😒
محمود ضحك و قعمز بحداها
سلسبيل : وين كنت
محمود : كنت نكبس ف العشاق
سلسبيل ضحكت : مَنْ مِنْ العشاق ؟
محمود : امس كبست البرو هو و سنابل يعومو و الصبح كبست العصافير هناء و يوسف و توا لقيتهم يعومو تحشمت نخش
سلسبيل تضحك
محمود : و توا ريت محمد أمير البحار يمسحلها في دموعها ابصر شن دارلها و يرطب ف الجو
سلسبيل تضحك : انى نعس عليهم من الكبسات و انت تكبس 😂
محمود ضحك : امالا خودي ساتر مني
سلسبيل شبحت قدامها و تنهدت : فرقت حالي بالله منين يا حسرة
محمود شبحلها : تبي تقنعيني انك رسمي سنقل
سلسبيل : انى نقنع فروحي بالسيف
محمود ضحك
سلسبيل شبحت وراها للشاليه : شن رايك نشوّو سبول
محمود : عادي به
سلسبيل وقفت تنفض في ايديها من القزّة : انت ولع النار و انى نقشره
محمود وقف : تم
__________________
ازهار مضبطة ولدها احمد في غمرها راقد : الطريق ماحسيتش بيها و هداكا محمد قريب يقلب السيارة و انى في قولت بالشوية بالشوية شي مايسمعش ف كلامي
روان : جوه مش مليح امبكري
حلومة : اليوم ماريتاش من الصبح خش البحر و منها مشالك طول
سعاد : معاش تبعتوه بروحه هادي تاني مرة يولي لطرابلس تخافي لا قدر الله يدير حادث مايندري عليه حد
نجاة شبحتلها : شن خطر عليك توا تفاولي ؟ الولد جي بسلامته وما صارله شي
سعاد : مانفاولش لكن الواحد يفكر لكل شي
نجاة : يا لطيف قداش تحبي تتشائمي
سعاد فنصت فيها : خيرك معاي انتي ! واقفتيلي في كل كلمة نقولها 😠
نجاة : لأنك ماتعرفيش تتكلمي
ازهار شادة ضحكتها
حلومة : هيا ياسري انتي وياها ماتعيوش من التنقريز ؟ مش عارفة كان جيتو ضراير ولا نسابات كيف دايرات ف بعضكم
سعاد تكنطت و خشت الداخل : هي سلفة و
حاصلة فيها
ازهار تشوفلها : حي شكلها تعفلقت
حلومة : من يومهم هكي ماتقوليش عليهم عايشين عمر في نفس الحوش
نجاة قلبت وجهها و سكتت
حلومة شبحت لنجاة : امالا كان خطبت وحدة من بناتك ليوسف كيف بتتفاهمو بعدين ؟
روان زرتها الضحكة 😬
نجاة شبحتلها : سلفة و متحملتها بالسيف تبيها تكون نسيبتي ؟ بعيد السو
حلومة : ايه و خيرا شن فيها ؟
ازهار تبي تغير الموضوع : مش كان خلوها الجية للبحر بعد رمضان احسن ؟ حسيت البحر متحرك
نجاة : نعاودوها عادي
جت سلسبيل : وين السبول ؟؟
________________
1
هناء شادة ف ايد يوسف : ماترخينيش مازال مانعرفش نعوم بروحي
يوسف : شادك يابيبي ماتخافيش
هناء ابتسمت
يوسف يشوفلها و ساكت
هناء : حسيتك من الصبح ماكليت شي وله
يوسف : ايه صح
هناء : لما نطلعو لازم تاكل ؛ فكنا من الرجيم اللي مدايره مش ضروري
يوسف : من قالك مداير رجيم اني مخليها بالجو الماكلة الموضوع كله اني ماجعتش بس
هناء : نتذكر يوم فطرنا عند امّيمه قلت انك بتنقص ماكلة
يوسف ضحك : و انتي كاسرة وذنك شكلك !
هناء ضحكت
يوسف : على اساس عيونك ف التلفزيون و عاملة نفسي مش واخدة بالي
هناء : عاد انى مقعمزة معاكم طبيعي بنسمع
يوسف ضحك
هناء : اصلاً وقتها ماكنتش طايقاتك وانت كنت تقصف فيا طول الوقت 😒
يوسف : كنت متطر انى نتعامل معاك هكي
هناء قامت حواجبها : علاش ؟ انى مادرتلك شي
يوسف : لان من اللي روحت حسيت بشي غريب تجاهك ؛ قلت بيني و بين نفسي لازم نتجنبك و نتعامل معاك بجفاف
هناء : لا هو ماكانش جفاف بس كان جفاف و احتقار
يوسف باس ايدها : لا مش للدرجة هادي
هناء : خلينا في المهم توا ؛ حني طلعنا من الموضوع
يوسف : نعم
هناء : لما بنطلعو لازم تتعشىٰ و انى بناكل معاك
يوسف : حاضر
هناء : محلاه حبيبي و هو يسمع في الكلام
يوسف ضحك
هناء : قولي توا
يوسف : نعم حبيبتي
هناء : لما بابا دويتله شن كانت ردة فعله
يوسف : ف الاول سكت شوره انصدم
هناء ضحكت
يوسف : لكن واضح عليه انه فرح ؛ قعدنا ندوو على وضعي و بعدين قال الراي راي البنت
هناء : ايه صح انت ماسألتنيش
يوسف ضحك بصوت عالي : والله ؟
هناء قامت حاجبها : المفروض سألتني هل موافقة عليك أو لا 😌
يوسف جبدها ليه : سمعيني جوابك هي
هناء ابتسمت و قعدت تشوفله
يوسف ابتسم : حبيبتي ! هل تقبلين الزواج بي ؟
هناء ضحكت : مارأيك عزيزي ؟
يوسف : أنا متأكد من جوابك ؛ و لكن عليّ أن أسمع تلك الإجابة منكِ حبيبتي
هناء مبتسمة و قلبها يدق : و هل لي أن لا أقبَل ذلك الرجل الذي وضع معنى لحياتي ؟ ذلك الرجل الذي زرع في قلبي بذور زهور الحب تنموا و تزدهر و تبعث في قلبي ارقى العطور ؟
يوسف ضحك ؛ كيف بيحضنها ..
هناء بعدت و شلبكت عليه الميه 💦 : لااااا
يوسف يضحك : من حبي ليك يابيبي مانقدرش نشد روحي
هناء : لا شد روحك ياروحي مافيهاش كيف ره
يوسف عيونه قلوب : لما نكون سكران في حبك مافيش شن يشدني
هناء : سكران !!
يوسف شد ايديها و قربها ليه
خدي نفس عميق و قال : الحمد لله أني لا أشرب الخمر و لكني في حبكِ أسعد سكران في الدنيا
دعيني أشرب من قوارير حبكِ اللذيذة
و أهيم في سكراتي
أرفرف بجناحيّٰ في مملكة عشقك الدائم
دعي قلبي يعزف لكِ أجمل أنغام الحب النقي الخالص
و تعالي إلى حضني العاشق لكِ
لكي نرقص معا على هذه الأنغام الرومانسية
تحت أمطار العشق الغزيرة
فهنيئاً لمن ربطت قلبي بقلبها
و أقلتني إلى بر الأمان و أنا غالق عيناي و أذناي و فمي
لأني واثق في ذلك القلب النقي
شكرا لكِ حبيبتي على حبك الدافئ النقي
شكرا لكِ حبيبتي على اهتمامك المتواصل بي
و هنيئاً لي على حسن الإختيار ❤️
___________________
سنابل مقعمزة في مكان متعلي جنب الشاليه و محمد واقف قدامها
محمد : نتأسف منك مرة تانية ؛ لما ريتك معاه الدخان قريب طلع من وذاني
سنابل تلفتت ع الجنب و زرتها الضحكة
محمد لفت وجهها ليه : تضحكي ؟
سنابل شبحتله و ضحكت
محمد ضحك و شدلها ايدها : عندك علم ان من زمان و انى نحلم باللحظة هادي
سنابل ابتسمت : لا ماكنتش نعرف
محمد : من زمان و انتي واخدة عقلي ؛ لدرجة لما نشوفك او تدوي معاي فجأة نتلخبط و ننسىٰ شن كنت بنقول .. نتفركس مع بعضي
سنابل ضحكت : زي امتى ترا ؟
محمد : زي يوم اللي طلعتيلي بالقفطان
و نفخ نفسه : اوووه درتي فيا البهادل
سنابل تحشمت : مش عارفة كيف درتها و طلعت هكي
محمد يشوفلها و عيونه قلوب
سنابل تلخبطت : خلينا نتمشو أحسن مايشوفنا اصيل
محمد : اصيل عنده موعد غرامي مش فاضي
سنابل مدتله ايدها و وقفها : مايعياش
محمد نازل معاها للشط : خليه يعيش
سنابل شبحتله : شن قصدك
محمد : يعيش و خلاص
سنابل : يعني حتى انت نفس جوه ؟ ديما مواعيد غرامية و كلام معسل في المعاكسات ؟
محمد شبحلها : ابدا ولا نحبه الجو اهوا
سنابل : امالا كيف صحاب و مش نفس الجو ؟
محمد : مش كان صاحبي معناها انى وياه نفس العقلية .. حاط روحي في مكانه بس ؛ لحظات مع الحب احلى من اي حاجة تانية
سنابل تحشمت و شبحت قدامها
محمد يهمسلها : ولا شن رايها الحلوة ؟
سنابل قلبها يدق و ساكتة
محمد شدلها ايدها : نوعدك انك تكوني اسعد بنت ف الدنيا و حاتعيشي معاي احلى قصة حب
سنابل شبحتله و انحمر وجهها
محمد يشوفلها : بتقعدي ساكتة هكي ؟ ماتبي تقولي شي ؟
سنابل ايديها يرعشو : وسع بالك معاي
محمد حس بيها ترعش ؛ شد على ايديها بالقوة : ارخي روحك
سنابل خدت نفس عميق و شبحت لسلسبيل و محمود : خلينا نقعمزو معاهم
محمد شبحلهم : فوتيهم تو بيكسرو علينا اللوز
سنابل : لالا هو هداكا ليل
رخت ايده و مشت بسرعة
محمد ضحك و لحقها
__
سلسبيل : تي السبولة انحرقت قيمها
محمود مقعمز يشوي : ماتشوفيش فيها قاعدة صفراء ! تي اصبري و انتي عند الماكلة يا لطيف
سلسبيل حمقت : مصح خليقتك شن لقيتي هايشة ؟؟ 😡
محمود ضحك و شبح لسنابل جاية : اهي جت " روز "
سلسبيل تلفتت : من روز ؟
سنابل قربت منهم
سلسبيل ضحكت 😂
محمود يشوف لسنابل : امالا " جاك " أمير البحار وين ؟ راخيك في هالليل !!
( يقصد على ابطال تايتنك 😂 )
سنابل ماردتش عليه و وقفت جنب سلسبيل ترعش
سلسبيل وشوشتها : وين كنتو ؟
سنابل بصوت واطي : بعدين تو نقولك نحس في قلبي بيطلع مني
سلسبيل تنهدت : يا بختكوووو
محمود سمعها و ضحك بصوت عالي : ههههههههههههه
سنابل شبحتله : ألهىٰ في شغلك
محمود شبحلها : بالشوية علينا يا مرت خوي مش من أولها
سنابل سكتت
و سلسبيل تضحك
محمد جي و قعمز جنب محمود
محمود شبحله : أمير البحار ؟ شن الجو
محمد فنص فيه : أبرا يا عيل
محمود يضحك : موضوع مليح جي لعندي والله مافيها كيف بنفوتك يا برو 😂
سنابل تبي تغير الموضوع : ياريت عصام جي معانا و اجلها سفرته
محمود شبحلها : لالا انى هكي و نكبس فيكم تبي تكمليلي حتى عصام ؟؟ ياسر في الحوش هني و غادي هلبا
سلسبيل ضحكت : كيف كبسته ف الحوش 😂
محمد و سنابل يشبحوله
محمود وقف : كملو انتو انى شوية و نجي
و مشي بعيد يبي يدخن
سلسبيل تضحك : هرب 😂
_________________________
4
أصيل قاعد واقف مع البنت
اصيل : زي ماتفاهمنا حبيبتي باهي ؟
البنت : تفاهمنا في شنو ؟
أصيل : انك ماتعوميش بروحك و ان معادش تمشي لحوش خالتك لان عندها ولاد
البنت ضحكت : و شن تاني
اصيل : و من غدوا تتحجبي انى مش ديّوت باش نخليك تطلعي هكي
البنت تضحك : حاضر به
اصيل ابتسم : نتلاقو غدوا في نفس المكان ؟
البنت : مانعرفش ؛ تو نهدرزو حني
اصيل : اوكى
البنت و هي ماشية : باي
اصيل يشوفلها : سلام
البنت .. ( مصح خليقته مصدق روحه هلبا هذا من اول يوم مداير روحه حُزَار و يقولي حبيبتي 😏 )
اصيل يشوفلها .. ( والله و شدت ف وحدة مليحة يا قدر )
________________
1
تاني يوم 🌹
12:00 م
حلومة و الكناين مقعمزين ف الطاولة ع الشط
جي محمد : امي انى مروح تبو شي ؟
ازهار شبحتله : مروح توا ؟ علاش ؟؟
محمد : عندي امتحان بنروح نقراه من توا و ان شاء الله نلحق
حلومة : اقعد معانا يا حميدا كمل اليوم و نروحو غدوا مع بعضنا
محمد هز راسه : لالا مستعجل
ازهار : باهي كلمني لما توصل للحوش
محمد : ان شاء الله ، هي سلام
__
سنابل واقفة ف الدروج جنب الشاليه تراجي في محمد يركب
جتها سلسبيل : هناء وين ؟
سنابل : مازالت راقدة
سلسبيل : آدم متعك يتصل بيا درهلي كبدي ردي عليه
سنابل شبحتلها : وواااك كيف بنتلفه هذا
سلسبيل : ردي عليه و قوليله باي باي معاش نبيك
سنابل : نعرفه مش حايفوتني
سلسبيل سكتت
سنابل : عندي فكرة لكن و راس امك ماتقولي لا
سلسبيل عوجت فمها : شن هي الفكرة ؟؟
سنابل : اعطيني نكلمه من عندك و نقوله ان تليفوني راح مني و ماعنديش تليفون توا
سلسبيل : به و لما يتصل بيك يا غبو
سنابل : تو نقوله ان الشفرة حرقتها و خوي طلع غيرها و خداها هو لانها بإسمه
سلسبيل : و تخوني حميدا من تليفوني ؟
سنابل ضحكت : ماهو انتي اللي بتبدي تتكلمي مع ادم في مكاني
سلسبيل : امالا ديما عيد 😠
سنابل : هو مش حايورق لان اصواتنا زي بعضنا ؛ و انتي ابدي كرهيه فيك بالشوية بالشوية لين يفوتك لأنك باسلة و فيسع ماينمل منك
سلسبيل : كلبة 😒
سنابل ضحكت
سلسبيل : و شن المقابل 😏
سنابل : مرات تطلعي منه بتليفون جديد
سلسبيل : امالا كلميه بسرعة 😍
سنابل لمحت محمد جاي : اسكتي توا
محمد قرب منهم : اصيل وين
سلسبيل : يعوم هو و محمود و أحمد
محمد سكت
سلسبيل : احم احممم نستأذنكم
سنابل ضحكت و سلسبيل نزلت للشط
محمد : تبي حاجة قبل مانطلع ؟
سنابل شدت ف ذراعه : نسايرك للسيارة فرصة مادام اصيل ف البحر و ماما ع الشط
محمد ضحك و مشي هو وياها
____________________
يوسف ينوض في هناء من النوم : هنوو !
هناء مغمضة عيونها : نعم
يوسف يحرك ف وردة على خشمها 🌹 : الظهر بيأذن يا بيبي
هناء فتحت عيونها و شبحتله
يوسف ابتسم : صباح الخير حبيبتي
هناء ابتسمت و بصوت واطي : صباح النور
خدت منه الوردة و غمضت عيونها تاني : كيف خشيت قدامهم ؟
يوسف : العيلة كلهم ع البحر قلت نجي انوض حبيبة قلبي
هناء بياخدها النوم تاني
يوسف يمسحلها على شعرها : هيا نوضي بلا كسل
هناء : باهي خمسة دقايق بس مازال خاطري ف النوم
يوسف : تتدلعي عليا ؟
هناء ضحكت و شبحتله
يوسف دغدغها من جنبها : هيا نوضي
هناء ضحكت و قعمزت بسرعة : خلاص خلاص نضت
يوسف : خيرك تخزرطتي
هناء : الحركات هادي مانقدرش عليها
و قعدت تلم في شعرها
يوسف ضحك و وقف
هناء : اطلع انت و أنى نلبس و نجي
يوسف : ماتعطليش
___________________
محمد مولع السيارة تسخن و واقف مع سنابل
سنابل : مش متطمنة لموضوعك
محمد : ماعنديش الا الحل هذا ، خير ما امي تعرف و نتفركسو
سنابل : انى تو نوتي الصورة باش لما تطلقه نوريهاله
محمد ضحك : اما موضوع طلعتي بيه مايخطرش ع البال بكل
سنابل ضحكت
محمد : انى لازم نطلع وقت عليا
سنابل : توصل بالسلامة
محمد : الله يسلمك
سنابل : كلمني اول ماتوصل
محمد : ان شاء الله
سنابل ابتسمت
محمد قرب منها و شد ايدها
سنابل تلخبطت و نزلت راسها
محمد : اشبحيلي
سنابل قامت راسها و شبحتله : نعم
محمد عيونه قلوب : نحبك حبيبتي
سنابل سكتت و انحمر وجهها
محمد : الدنيا فيها كل شي مابيتش نمشي قبل مانقولهالك
سنابل اضايقت : بعيد الشر عليك ، فكنا منه الكلام هذا يا محمد مانحباش
محمد سكت
سنابل : شن رايك اتدير السماعات و تخليك معاي في المكالمة لين توصل
محمد : ياريت والله
سنابل ابتسمت : خلاص امالا
محمد : باهي ارجعي للعويلة قبل مانطلع
سنابل : حاضر ؛ هي باي
محمد : سلام
سنابل و هي ماشية تلفتت : محمد ؟
محمد يشوفلها : نعم !
سنابل اشرتله ع التليفون : خليك معاي
محمد ضحك : حاضر
سنابل ضحكت و مشت
و محمد ركب السيارة و طلع
_____________________
3
نجاة لابسة نظارات شمسية و تشوف للبحر : البحر يسهف
ازهار : خشي عومي
نجاة شبحتلها : لالا مانحبش تمرميده
سعاد : انى نضت الصبح بكري خشيت مع الولاد
روان ضحكت : ياريتني خشيت معاك وتفرجت عليك
نجاة : ان شاء الله عمتي بقفطانك الخليجي !
سعاد : ايه خيره ؟
نجاة ضحكت : لالا شي
سعاد : بالك تبيني نعوم بسروال و بلوزة 😏
نجاة : والله استر من القفطان كيف يبدا لاصق
ازهار تضحك
حلومة : والله قلبي عند عماد كيف هكي بيسافر من غير مايسلم
ازهار : قال مش معطل عشرة ايام و جاي
حلومة : و كان ؟ الدنيا فيها موت و حياة انى قلبي مش مرتاح لسفرته
سعاد : ان شاء الله مايصير الا الخير يا اللاّي
نجاة : هو علاش بيسافر
روان : قال صاحبه مريض و ماشي معاه
حلومة : و صاحبه هذا ماعنداش من يمشي معاه الا هو
ازهار : شن بديري هي ماتقدريش تقوليله لا
جو يوسف و هناء مع بعض
حلومة تشوفلهم و مبتسمة : وينكم مغيبين اليوم
يوسف قعمز : خلينا مكاننا ؟
حلومة : اي وانت قلتها
هناء ضحكت و قعمزت جنب يوسف : خداني النوم ماحسيتش بروحي لين لقيتها الطناش
روان : نزلتو مع بعضكم 😃
هناء تلخبطت : تلاقينا ف الدروج
نجاة : نايضة توا حتى انتي امس تعومي لعقابات الليل ؛ اللي يسمع يقول تحبي البحر
هناء : بديت نحبه
يوسف ضحك و طلع دخانه بيولعه
هناء وشوشاته : يوسف عيب قدامهم
يوسف نحاه و ماصارلاش
____
خشت سنابل للشاليه و اتكت ع السرير تتصل بمحمد ..
محمد رد : الو
سنابل : اهلين و سهلين
محمد : اهلين بنور العين
سنابل ضحكت : ...
____
سلسبيل واقفة مع الولد اللي تعرفت عليه و تهدرز
شافها احمد و هو راكب للشاليه : سلسبيل 😲
سلسبيل شبحتله و انخلعت : حي على امي
احمد جاها : من هو هذا ؟
الولد ساكت
سلسبيل فنصت فيه : برا براااا
الولد ضحك و مشي
احمد : نكلم فيك من هو هذا
سلسبيل شبحتله : هذا يقرا معاي في المدرسة و بالصدفة ريته توا
احمد : كذابة هذا صاحبك
سلسبيل تلخبطت : نهار احرف أغبر
احمر نزل يجري : والله الا ما نقول لمحمود كان يعرفه
سلسبيل تجري وراه : تعالى جاي محمود مايعرفاش
احمد يجري و هي تجري وراه
احمد وقف ع الشط ينادي : محمووووود !!! ... تعالى يا محمووود
سلسبيل شداته من عنفقته : سكر فمك يا حمااار
يوسف يشوف فيهم : هادو خيرهم
هناء تشوفلهم
حلومة تلفتت : بالك يبو يعومو
احمد ينادي : محموووود ؟؟
محمود سمعه و جايه
سلسبيل شداته من وذنه : تعرف تقوله كلمة نهارك احرف الولد يقرا معاي
احمد : اااي حولي ايدك 😩
سلسبيل شاداته : مانيش محولتها لين تسكر فمك
احمد : انتي كذابة والله الا صاحبك الله
جاهم محمود : خيركم ؟
احمد كيف بيتكلم ..
سلسبيل سكرتله فمه بيدها : يبي يعوم و انى قتله راجي تو نخش معاك
محمود : مش كان يعوم ؟
سلسبيل : شكله مازال يبي
محمود : انى معاش خاطري ف العومان
و مشي للطاولة
أحمد عض سلسبيل في يدها
سلسبيل عيطت : ااااه 😩
محمود تلفت : سكري فمك يا حيوانة خيرلك 😡
احمد هرب يجري و سلسبيل تجري وراه
شداته من شعره : تعالى جاي
احمد : شعري 😭😩
سعاد تشوفلهم : خيركم انتي وياه ؟؟
حلومة و ازهار يشوفولهم و ساكتين
سلسبيل خداته على جنب توشوش فيه : شن رايك لو ماتقول لحد نعطيك عشرة جني
احمد : عشرين 😍
سلسبيل : ماعنديش عشرين 😒
احمد : عشرييييين
سلسبيل عطاته عنفقة : باهي
احمد : هيا توا توا
سلسبيل : باهي اركب معاي
احمد ماشي معاها
محمود شبحلهم : وين ماشيين
احمد شبحله : بناخد منها فلوس بنمشي للمحل 😍
هناء ضحكت : اكيد رشوة
روان تاكل ف كيكة : ديما هكي الفرخ هذا
_______________________
1
05:00 م
محمد ف الحوش مع بوه : امتى طيارتك ؟
عماد : غدوا الصبح مع العشرة
محمد سكت
عماد : توا انى بنطلع ساعة و نجي خليك مع جدك قاعد بروحه
و فتح الباب نزل شنطته و نزل
محمد فتح تليفونه و اتصل ب صاحبه عبد المعين ..
عبد المعين رد : ايوه
محمد : ها موعا
عبد المعين : شن صار
محمد : دقيقتين و يطلع ؛ زي ماوصيتك مافيش داعي يشوف وجهك انت و اللي معاك البس اي حاجة
عبد المعين : تم يا معلم
محمد سكر الخط و نزل لجده
_______________
عماد فتح باب الشارع و ركب سيارته
فتح تليفونه و اتصل بخطيبته ..
خطيبته ردت : الو
عماد : اهلين عروسة
خطيبته : اهلين بيك حبيبي
عماد : شن اديري
خطيبته : كنت نوتي في شناطي بتاتي
عماد : امتى بتبعتيهم ؟
خطيبته : غدوا بعد الفاتحة
عماد : باهي كويس ؛ انى ساعة و نكلمك غر عندي مشوار للحلاق بنحجزه
خطيبته : اوكى يا روحي نراجي فيك
عماد سكر الخط و طلع بالسيارة
اول ماطلع من الشارع ركز على سيارة وراه تغيرله ف الضي
عماد استغرب و درس على جنب ؛ فتح الروشن و تلفت
وقفله على جنب عبد المعين لابس طاقية و نظارات شمسية و مربي لحيته : الكوفينو متعك صايرله يا خوي ، انزل شوفه
عماد فتح الباب و نزل
اول ما هو نزل عبد المعين نزله هو و اللي معاه و طبوه
____________________
10:30 م
هناء مقعمزة ع الشط بروحها تاكل في سبولة
جي بحداها يوسف و قعمز : خيرك بروحك
هناء شبحتله : كانو معاي البنات انسحبوا وراء بعضهم
يوسف : معاش تقعدي بروحك يا كلميني يا نوضي طول
هناء ضحكت : حاضر
يوسف شاف للسبولة : ذوقيني منها ؟
هناء : مش ماتحباش !
يوسف : اللي في ايدك نبيها
هناء مدتهاله : و هي ليك
يوسف قرب منها : وكليهالي انتي
هناء ضحكت : بلا دلع
يوسف : من حقي نتدلع على حبيبتي
هناء تضحك
نجاة تنادي من قدام الشاليه : هناااااء ؟؟؟
هناء تلفتت : نعم ؟
نجاة : خشي الداخل ياسرك
شبحلها يوسف : انى معاها مش بروحها
نجاة سكتت و خشت
هناء عضت شاربها : اكيد ورقتلنا ؛ باهي اللي ماما مش اصيل
يوسف : سو وات ؟! عمي و دويت معاه لما بنروحو بيبدا موضوعنا رسمي
هناء : نفوتو شهر رمضان قبل
يوسف سكت
هناء : ماخاطريش نروح من هني ؛ ثلاثة ايام مشو كأنهم ساعات
يوسف : نحجزو انى وياك بعد العيد ؟
هناء ضحكت بصوت عالي : هههههههههههه
يوسف ضحك
هناء : اما انت جو ، تحساب روحك في مجتمع اجنبي
يوسف : غدوا زي ماجيتي معاي تروحي معاي
هناء : و ماما شن بنقوللها
يوسف : تو نقسمهم انى في السيارات زي مادرت المرة اللي فاتت
هناء : ساعة قداش بنروحو حني
يوسف : مع الظهر
هناء : لوني ولّا برونزي من الشمس
يوسف شبحلها و قرب منها : احححح يا برونزية اححح 😍
هناء ضحكت : ياسر
_______________
محمد يتكلم ف التليفون : زي ماوصيتك يا موعا لا تكلمه ولا تقربه خليه هكي و خلاص
عبد المعين : ولا يهمك يا برو ماتخممش
محمد : خليه ثلاثة ايام تانيات و بعدين ساهل
عبد المعين : اوكى دورني امالا
محمد : مية مية
سكر الخط و طلع يدخل في سيارة بوه للقراج
_______________
بعد مرور ثلاثة أيام 🌹
09:00 ص
هناء تتكلم ف التليفون : صباح النور
يوسف : صباح الورد
هناء : طلعت ولا مازال
يوسف : ف الطريق ايه
هناء : خسارة قبل نبيك
يوسف : فيه حاجة ؟
هناء : من امس قبل بنحكيلك مشي جونا حوش خالتي و ف الليل انى رقدت بكري
يوسف شحنه نازل : بسرعة يا هنو التليفون بيتسكر
هناء : كنت بنقولك ان اليوم اول يوم ف الخد...
يوسف تسكر شحنه و ماسمعهاش
هناء : الو ؟ .. الوو
عاودتله تاني لقاته مقفل
هناء : كيف بنقوله توا
كتبتله مسج و بعتاته
يوسف ف السيارة : الزفت مش عارف كيف نسيت و ماشحنتاش
________________
حلومة مقعمزة تفطر مع ازهار : ماكلمكش عماد ؟
ازهار متضايقة : لالا ، من يومها
حلومة : حي عليك كان ماتزوج
ازهار : لا مايديرهاش يا اللاّي
حلومة : والله يديرها الرجالة مافيهمش أمان
العارف يتفرج ع التلفزيون سمعها تلفت : و كان تزوج شن المشكلة ؟ الشرع محلل أربعة
حلومة كشرت وجهها : ماتعرفو الشرع كان ف الماخدة على نساوينكم راكم تعرفو ف حاجات تانية
ازهار ضحكت
العارف عقد حواجبه : زي شنو !!
حلومة : شي شي بالله خليني رايقة خير مايرتفع ضغطي
احمد مقعمز ياكل شبح لجده : اجديدا شن معناها محلل أربعة ؟
العارف : معناها الراجل يقدر يتزوج أربعة نساوين مع بعضهم
احمد ضحك : حي على امهم 😃
خش محمد : صباح الخير
ردو عليه : صباح النور
العارف : قول يا ولد ! ماكلمكش بوك ؟
محمد وقف ف العتبة : ايه كلمني امس ف الليل
حلومة ضربت ايديها فوق بعضهم : و خيرك ماتقولش مخلينا منشغلين عليه
محمد : كلمني في الليل متأخر و قال انه ماشراش شفرة ؛ قاعد مع صاحبه ناصر ف المستشفى
ازهار اتطمنت : الحمد لله والله كنت على نار
محمد سكت و طلع للجنان
فتح تليفونه و اتصل بسنابل ..
سنابل ردت بصوت نعسان : الو
محمد : صباح الخير حبيبتي
سنابل ابتسمت و غمت روحها باليرغان : صباح الورد
محمد : قاعدة راقدة
سنابل تتكسل : ايه
محمد : باهي انزليلي ف الجنان
سنابل : حمودي ماخاطريييييش
محمد ضحك : هيا قبل ماينوض خوك
فجأة خش اصيل على خواته : نوضي حدديلي السورية وحدة منكم
سنابل سمعاته سكرت الخط و دارت روحها راقدة
محمد سمعه تكنطا : الشيت
اصيل : اوقفي يا حلوفة انتي وياهااا
سلسبيل شبحتله : ما حلوف الا انت يامعفن تحسابنا نخدمو عندك
اصيل شدها من رجلها و كرها : اوقفي
سلسبيل تعيط : اااااااي 😩
جاته هناء : خيرك مداير دوشة ع الصبح
اصيل شبحلها : هنيوه حدديلي السورية عندي موعد ضروري
هناء ضحكت : غر من هي بس
اصيل : تو تتعرفي عليها 😉
هناء خدت منه السورية و هي تضحك
اصيل لحقها لدارها
سلسبيل اتكت و غمضت عيونها : غر من هي اللي راضية بيه هالمتطرشق هذا !!
_______________
02:00 م
هناء ف استوديو قناة الراديو عندها حلقة تقدم فيها و تستقبل في مكالمات
__
حلومة مقعمزة ف دار المعيشة تسمع في هناء و فرحانة
هناء فاتحة موضوع الكناين المستهترات و اللي هاملات حياشهم و صغارهم
تاخد ف آراء الناس و تناقش
حلومة شادة الراديو : ايه هنيوه اعطيهم على روسهم اعطيهم .. زيديهم
العارف : تي اسكتي يا مرا خلينا نسمعو
حلومة : هابا على قهايري على قولت نورية اختي ؛ يا واقي كان ماتطلعلي مرت عصام زيهم و نقعد نسحن في روحي و نتصل نشكيلك يا هنيوه
2
خش يوسف : السلام عليكم
رد عليه العارف : و عليكم السلام
حلومة شبحتله : اوسيفه ! تعالى اسمع هنيوه مصلي ع النبي عليها
يوسف استغرب : خيرها ؟
حلومة فرحانة : تقدم ف الحلقة متعها اليوم اول يوم
يوسف تكنطا : قصدك ف الراديو ؟
حلومة قوّت الصوت : ايه اسمع
يوسف زاد تعفلق و طلع طول لسيارته
ولعها و طار بسرعة 🔥
____________
2
محمود في محل الدخان يتعارك مع صاحب المحل
محمود شد من سوريته : تي شن تقول يا راجل امس خديته منك بسبعة ونص شن قصتك كل يوم تزيد تركب فيه
صاحب المحل دف محمود من صدره : هادو الأسعار عجبك باهي ماعجبكش برا شوفلك غيرنا ماعنديش خلوق لجو العواويل متعك
محمود تعفلق و بدي يصيح : انى جوي جو عواويل ؟؟
شده من سوريته و خبطله راسه ع الحيط
صاحب المحل داخ و طاح
محمود طبس عليه و بدي يضرب فيه على وجهه : توا مني العيل يا عيل ؟؟!!! نوض وريني رجوليتك يا ******
يضرب فيه على بوكسات على وجهه و سنونه لين دهش
وقف عطاه تيرو و طلع
____________
2
هناء ف الاستوديو : خليكم معانا مستمعينا الكرام نطلعو فاصل و نرجعوا
فجأة يوسف يفتح عليها الباب بالقوة و يخش
هناء انصدمت : يوسف !
يوسف جاها شدها من ايدها : نوضي
هناء فكت ايدها : خيرك هايج ؟
يوسف يفنص فيها : هااايج !! اطلعي معاي خير ماندير العار
هناء متحشمة : يوسف هذا مكان شغل عيب اللي ادير فيه
جاهم المخرج : شن فيه ؟؟
يوسف جبد هناء من ايدها طالع بيها
هناء خدت شنطتها و طلعت معاه تجري
يوسف يكر فيها من ايدها و متعفلق
اول ماطلعو للشارع هناء فكت ايدها : خيرك ؟؟
يوسف متعفلق : تسمعيلي ف صوتك للبشر و انى اخر من يعلم ؟؟ اخر من يعلم يا هناء !!
هناء متعفلقة : اول شي اللي درته عيب انك اتطلعني بالمنظر هذا قدام الناس اللي يشتغلوا معاي و خصوصا اول يوم ، و تاني شي انى كنت بنقولك الصبح و انت تليفونك تسكر و ثالث شي بعتلك مسج و أعطيتك فيه علم و رابع و اهم شي انت ماكش ولي امري باش نستأذن منك
يوسف شدها من ايدها بيركبها ف سيارته : اركبي خير مانغلط فيك
هناء تفك ف ايدها : تو نروح بروحي مانيش مروحة معاك
يوسف علّا صوته : خلي امها السيارة و اركبي معاي
هناء ركبت سيارتها و طلعت تجري 🔥
يوسف دمه فار و لحقها
هناء تجري و يوسف يجري وراها
هناء متعفلقة : بيبدا يتحكم فيااا !!! والله مايحلم الله
يوسف يجتاز فيها و هي تزيد ف السرعة لين وصلو للحوش
نزلت هناء بسرعة و خشت للحوش
يوسف سطرب و نزل وراها يجري
شدها ف الجنان : تعالي جاي
هناء متعفلقة : يوسف فوتني توا ماعنديش نية ندوي حرف
يوسف : عندك نية غر تفتفتي ف الراديو على مواضيع تافهة و تتضحكي اها ؟
هناء فكت ايدها منه و ركبت تجري تسحن ف روحها : علاش هكي حشمني معاهم علاش 😭
يوسف قعمز ف الجنان متعفلق ؛ ولع دخانه و قعد يدخن
_______________
محمد نازل من الدروج لقي هناء راكبة : هناء شن الجو
هناء شبحتله و هي متعفلقة : الحمد لله
و خشت للحوش
محمد استغرب و نزل للجنان لقي يوسف مقعمز يدخن و ساكت
فجأة طق باب الشارع
محمد مشي بيفتح
اول مافتح الباب انصدم : تفضلو ؟
( لقاهم كتيبة مسلحة و كلهم ملتمين )
يوسف تلفت : مني يا محمد ؟
محمد : تفضلو من طالبين ؟
واحد منهم : محمود ال..... موجود ؟
محمد : لا مش موجود ، انى خوه شن تبو ؟؟
يوسف جاه : شن فيه ؟؟
شبحلهم و انصدم : من انتو !!
خدو محمد و ركبوه السيارة : لما محمود يجي تاخدو خوه
يوسف علّا صوته : تي وين رافعينه انت وياااه !!!
فجأة سحبوا عليه : وطي صوتك ولا نفرغوا فيك
يوسف مصدوم : تي اما تفرغو فيا نزلو الولد و فهمونا شن فيييه ؟؟!!!
الكتيبة ركبو سياراتهم و طلعو يجرو 🔥
يوسف خش يجري للحوش ؛ لقي امه ف الدروج : هاتي تليفونك بسرعة تليفوني مسكر
سعاد انشغلت : شن فيه ؟؟
يوسف داهش فك منها التليفون : جت كتيبة طبت محمد ف مكان محمود
سعاد رعشت : وووه عليك يا ازهاااااار وووووه وووووه 😱
سعاد : من هما اللي طبوه !!! و علاش ؟؟
يوسف طلع و ماردش عليها
حلومة سمعتها طلعت تجري : خيرك تعيطي شن فيه ؟؟؟؟
______
سنابل : صوت دوشة لوطه ولا ؟
سلسبيل : ايه صح
نجاة : انى نازلة ووه كان ما جدكم عملها
هناء : فكينا يا ماما ترا
فتحت الباب و نزلت تجري هي و نجاة
سلسبيل نزلت وراهم
سنابل : دقيقة و نجي
خشت للحمام و نزلت لحقتهم
اول ماخشت لقتهم كلهم يبكو و متفركسين
جت لسلسبيل : خيرهم ؟؟
سلسبيل راعشة : جت كتيبة مسلحة رفعو محمد
سنابل انصدمت و جسمها صقع : ع ع علاش ؟
سلسبيل : قالو رفعوه في مكان محمود ابصر شن مداير من عملة
سنابل من الرعشة فقدت وعيها و طاحت
يـتـبـــع ... 💗
________________
