رواية عزاي انك رجاي العذب لو كل الدروب عثور الفصل الثاني عشر12 بقلم الكاتبة اديم الراشد
اهلا بكم في مدونة مكتبة حواء نقرأ لكم ونكتب من اجلكم
حنان : لكن ويييين مايعصب الا فالسنه حسنه
وجدان بقهر: لكن خليه يعصب يحوس الدنيا
ضحكوا البنات وهم يعرفون شعور وجدان اللي اكثر وحده يطيح في راسها تعصيب خلف
وعد : بعد انتي تستاهلييين ترا يسكت يسكت عنك لين ينفجر
شهد بضحك : والله ما انسى الكف اللي اخذته منه انا وياها االساعه وحده في عز الظهر لو انه عقاب ماعليه متعودين بس خلف سبب لي صدمه
اماني: عشانكم ماتستحين انتي وياها ! الادمي تعبان وحالته حاله وانتي وياها خليتوا شي ماسويتوه فيه يقالكم خفيفات ظل
وعد : انا اقول قوموا ننام الحين لا يكفخوونا كلهم ترا مصخناها صوت الضحك لين اخر الدنيا
مضاوي : بنام انا عشان بس اصحى الفجر واشوف الجو بس
سحر: لكم مني فطور بكره يحبه قلبكم
اماني : والله انك كفو
دخلوا ينامون وهم في خيمتين قريبه من بعض والنومه كانت قمه في الراحه والمتعه
_______________________.
في الكويت
الصباح كانت ليلى تتجهز وهي تسمع السوالف وتحاول تتجاهل مريم وكل شي تقوله مريم ونزلت مبتسمه وهي تسمع سوالف وضحك غريب!؟
قربت وهي تقول : شنو فيكم ؟
وقفت مريم ببتسامه : ابشرچ عندنا خطاب
ضرب قلب ليلى : خطاب!؟ مريم: ايييه
ليلى : يخطبون منو!؟ مريم : يخطبونچ
اختنقت ليلى ماتدري وش السبب بس تنفست براحه اول ما قالت امها بضحك: لا لا يخطبون شيخه
ابتسمت ليلى برعب وراحه: والله!؟ ومنو سعيد الحظ
ام نهيان: من غيره جاسم ولد عمچ
ضحكت ليلى وقربت تحضن شيخه اللي كانت مستحيه : اخيراً قرر ونفذ
مريم: مابغينا نشوف هاليوم
ليلى: رديتوا عليه!؟ ام نهيان: اييه ابوچ قاله موافقين تعرفين بعد هو يبيها وهي من زمان عارفه وراضيه
شيخه: والله احس متفشله من ابوي
ليلى: مافيه شي يفشل عادي
فزووا على صوت ابو نهيان وعياله ووقفت ليلى مبتسمه ودخل ابو نهيان: وين شيخه
ليلى: هنييييه يبه
جابر : يلا هااانت خلصنا من وحده وباقي الثانيه
نهيان: شدعوه قاعدين على قلبك !
جابر : ايييه ما تحس انت بالنار اللي انا فيها
ليلى : الله اكبر عليك ! صرنا نااار مره وحده
ابو نهيان: جابر انت متى بتجوز عن خواتك هاه!؟ ام نهيان: ماعليكم منه قولوا لي شنو صار!
ابو نهيان: ماصار شي ابو جاسم حدد الملچه ( الملكه ) بعد يومين والعرس بعد شهر ! شنو رايكم!
جابر: موافقين يبه ماعليك
ضربته امه بخفه:انت اسكت ، انا اشوفه مناسب ما ادري عن شيخه
نهيان جلس جنب شيخه ببتسامه: شيوخ قولي حبيبتي راضيه! يناسبچ
ابتسمت شيخه: ايه يناسبني معنا وقت
شهقت ليلى: لا والله مايناسبني
جابر: وانتي شكو! شيخوه العروس انتي شكو!
. .
.
ونادر جالس بهدوء يناظر البيت حوله ما عمره حس ان بيتهم كبير وثقيل الا اليوم شال هم شوق كيف بتخلصه بلحالها وبدا يدرس فكره في باله لازم يسويها
_______________________.
المغرب
في بيت ابو خلف الكل جالسين وهم فيهم خمول بعد الطاقه اللي استنزفوها في المخيم
ولف ابو خلف بهدوء وقال: وعد
ابعد وعد اللي كانت تسولف مع خلف عن مجلة القصيد اللي يقرونها : سم يبه
التفت ابو خلف بهدوء: اسمعيني واسمعوني كلكم زين بذات انت ياخلف
اعتدل خلف وهو يركز في ابوه: نسمع يبه
ابو خلف : امس كلمني رجال يخطب وعد وانا سالت عنه وطلع رجال طيب ويشتغل مع عقاب في نفس الشغل وسألت عقاب انا وقالي انه رجال كفو
انخطف لون وعد اول ما سمعت اسم عقاب وشكت على طول وقرب خلف وهو يناظر وعد ويناظر ابوه : وش اسمه طيب!؟ وش شغله بالضبط ! وكم عمره!
ابو خلف : اسمه مبارك عمره حول الاربعين ويشتغل على الحدود
خلف : حول الاربعين؟؟ ذا شايب يبه ! مايصير لوعد
فيصل : يبه فرق ١٥ سنه وينكن زود
ابو خلف : العمر ماهو عيب ! انا بيني وبين امهاتهم فرق ١٠ سنين واكثر وبعدين وعد ماهي صغيره عمرها راح
وعد شدت على نفسها بغضب : ٢٥؟ كبيره!؟ وبعدين على اي اساس قلت ان العمر ماهو مهم ! انا مابي اتزوج شايب اجلس اقلب فيه مريض وحالته حاله
الكل صار يناظر وعد اللي اكيد بترفض ووقفت بغضب: انا ما ابيه ولا يمكن ارضى فيه
ابو خلف وقف بغضب اكبر: انتي وبعدين معك!؟ لين متى وانتي بهالراس والعناد!؟ الدنيا ماهي على كيفك انتي وش ناويه عليه ! تبين تعنسين وتجلسين عندي !
خلف : يا يبه الله يهديك وش ذا الكلام
ابو خلف: اقول انت اص ! محد اطغاها الا انت
ام وعد : يا ناصر اذكر الله مايصير هاللي تسوي
وعد : ما توقعت اني جالسه على قلبك يبه
ام خلف :يا وعد ياحبيبتي لا تقولين هالكلام ابوك مايقصد هو يبي لك الخير
وعد: الخير اللي بيجي من شايب ما ابييييه
تكتف ابو خلف : زين يا وعد بنطيعك هالمره
الكل سكت وهم يناظرون ابوهم باستغراب حتى وعد وفيها استغربت بس قال : ما تبين مبارك بكيفك لكن عقاب بعد خطب وعقاب ما ترفضينه لو تموتين
بكل ما تعني الكلمه حست وعد بدوووخه عجزت توقف منها وبانت لها خطه عقاب اللي وفهمتها مسكت ذراع خلف قبل تهوي من طولها وثبتها خلف بقلق:وعد وش فيك
.
سحبت يدها وعد ووقفت تمثل القوه وقالت بكل جبروت: يبطون عظم كلهم مبارك وعقاب
مسكها خلف بحده : وعد بس اقصري الشر
ابو خلف : لا الظاهر اني عطيتك وجهه لين صرتي ماعاد تحترمين احد
فيصل : عقاب ما رضا ان خلف يتزوج اخته ! ودامها كذا اختي ما تزوجه
لف خلف بغضب عليه: انت اسكت لا تخلط المواصضبع ببعض
سحبت نفسها وعد لكن قبل تطلع سمعت صوت ابوها يقول بغضب : اسمعيني زييين يا وعد هاذي اخر حدود صبري عليك وعندك حلين مالهم ثالث يا تاخذين مبارك يا تاخذين عقاب
طلعت وعد بغضب ولف ابو خلف على خلف بغضب: اطلع لها الجنيه وفهمها زييين يا خليف ويا ويلك يا سواد ليلك تصف معها وتجلس تخربط بهالكلام اللي ماله داعي
طلع خلف لوعد وتحركوا كل البنات بيطلعون مع خلف بس صرخ ابو خلف : ادخلي انتي وياها المطبخ
دخلوا بصدمه وكلهم مفجوعين حنان: خلصنا من سالفه خلف ودخلنا بوعد
اماني :ابوي بينفجر من وعد كل شوي ترفض واحد شوفي اخر شي وش طاحت فيه
ندى: مدري وش فيها على عقاب ! مهما كان افضل من هالشايب
وجدان: اصلا وعد تكرهه عقاب مستحيل تتزوجه حنان :في اسوأ الاحتمالات اكيد بترضى بعقاب وعقاب ولد عمنا ونعرفه وماهو سيء لهدرجه
ندى: الله يستر بس
برا كان ابو خلف ماسك فيصل ويهزئه على كلامه ويحذره لو يعديه بيكسر راسه وسحبته امه بهدوء: ابشر ابشر
اختبص بيت ابو خلف من جديد وقامت الدنيا فيه ولا قعدت
_______________________.
وفي بيت الجد قايد
كانوا جالسين واعتدل محمد: كأن صوت بيت ناصر طالع!؟ ابتسم عقاب اللي كان واثق ان الدنيا انقلبت على راس وعد : لا عادي هم دايماً كذا
تربعت مضاوي بضحك: بما ان الاختبارات جت اكيييد ان وعد مطوله عصاها وماسكها هالمجانين وتدرس
ابو ناصر: مالها نية تعقل هالجنيه
عزوز : حمدلله ماني عندها الله يعين فيصل بس
تكتف عقاب : وانت ورا ما تقوم تشوف كتبك وتخلي عنك هالكلام
محمد : طريتوا عرق الجنان ولا تحمل الجني ذا ! وش تبي به خله يتقهوى
عهد : الدنيا وييين وعزوز وين ما فتح الكتاب من يوم مادرس
هيا :عزوز وشهد كلهم
عقاب : قم انت وياها قم
قاموا قبل يتكفخون ولفت مضاوي : مازلت احمد ربي اني ما ادرس ما اتحمل ياربي
ضحك محمد : الله يخلق ويفرق ناس تدور الدراسه وناس فاشله
عقاب : وهي صادقه وش تبي بالدراسه
لفت سحر بضيق : الشهاده تعز يا عقاب
.
تكتف عقاب بغضب: بيتك واهلك هم عزك
نزلت راسها سحر بهدوء وسكتت والكل سكت وهم يعرفون ان عقاب معارض لهالموضوع ومتمسك بالاراء القديمه
ولا احد حاول يناقشه
_______________________.
في بيت ابو خلف
في غرفة البنات تحديداً كانت وعد واقفه بغضب وهي متكتفه وخلف واقف عندها : وعد اهدي وفكري زين
وعد : افكر في وش يا خلف افكر في وش!؟ خلف : في هالزواج مبارك وقلنا شايب ولا تبينه لكم عقاب وشوله ترفضينه!؟ماهو ولد عمك تعرفينه واحسن من الغريب
وعد بغضب: الله اكبر يوم كان الموضوع انت وسحر انهيتوا القضيه بقول اخوان والحين انا بتفرضون علي هالزواج
خلف : لا تصارخين!؟ وبعدين انا وسحر قضيتنا مختلفه
وعد:جزاك الله خير هذاك قلتها قضيتكم غير عني
خلف : وش يمنعك انتي!؟
وعد: ما اطيقه ما اواطنه بعيشة الله اشوف الموت ولا اشوفه هاذي هي قضيتي
صد خلف بضيق : وش مسوي لك عشان تكرهينه
تكتفت وعد : من الله ماله قبول عندي ولا ابيه ! وانت وش مضيق صدرك!؟ لايكون ناوي تجبرني عليه مع ابوي ؟
خلف : ما احد جاب طاري اجبار لكن انتي مدري وش في راسك عطيني سبب مقنع ! وانتي تدرين وش بيسوي ابوي
وعد : قلت لك اموت وتدفنوني ولا اتزوج عقاب هالمريض المعقد
خلف : وعد احترمي نفسك مهما كان عقاب ولد عمك وغصب تحترمينه ومحد غاصبك لكن دوري عذر مقنع تقولينه لابوي لان رفضك الغير مبرر لكل واحد يخطب مريب
لفت وعد بغضب : وش قصدك !؟ خلف : اسمعيني زين تدرين ان اخر انسان يوقف ضدك هو انا لكن في نفس الوقت انا مستحيل اخذ بيدك على الغلط
سكتت وعد وقالت بعد فتره : زين دام السالفه سالفة الرفض لكل واحد اجل قل لابوي اني موافقه على مبارك
اتسعت عيون خلف بذهول : وشوووو !؟ وعد : اللي سمعت
خلف : انهبلتي انتي!؟ تتركين عقاب عشان شايب!
وعد كانت تدري انها حركه من عقاب عشان يجبرها تتزوجه وتشوف الضيم على يدينه او تتزوج صاحبه ويكون بعد نوع من انواع العذاب اللي ممكن يدخل فيها عقاب لكن تفضل الموت على يد غريب ولا تكون تحت رحمه عقاب : والله والله والله ياخلف لو تخيروني بين الموت وعقاب لاختار الموت
بدا خلف يشك وهالكرهه ماهو طبيعي اكيد فيه شي اكيد فيه سبب قفل الباب وقرب بشك: الحين بتقولين وش هالجرم اللي سواه عقاب يخليك تفضلين الموت عليه بتقولين وش مخبيه ياوعد والا
غمضت وعد بضيق : وش بخبي يعني!؟ انت ما تعرف ولد عمك هذا شلون يفكر!؟ هذا مريض ومختل ومسيطر !؟ اذاا خواته وهم خواته ماباقي الا يدفنهم انا وش بيسوي فيني
..
خلف :هذا ماهو عذر الدنيا كلها ماهي ردة فعل وحده وتصرف واحد
وعد كان اخر حلولها تقول : ترضى تتزوج وحده مغصوب عليها و انت ما تطيقها ! اذا ترضى انا برضى بعد
سكت خلف وهو دايماً ضد الاجبار في اي مراحله طلع وتركها
وجلست وعد تشد على يدها ( هاذي سواتك يا عقاب الردي هذا اللي طلع بيدك يا قليل الخاتمه ، لكن هييين الله لا يخليني اذا خليتك تهزني يا عقاب )
لفت على دخول البنات اللي قبل يتكلمون رفعت يدها وعد بغضب وتهديد : اقسم بالله لو وحده تنطق بكلمه ما تشوف خير
جلسوا كلهم بصمت وهم يشوفون غضب وعد
_______________________.
وفي بيت نادر
كان جالس وهو يقلب الفنجال قدامه والتفت بهدوء : شوق
لفت شوق : سم
ابتسم نادر بهدوء وقرب شوي : انتي خلصتي الترم الاول
شوق نزلت راسها بهدوء:لا باقي شهر ما درسته
نادر: يعني يمديك ترجعين قبل الاختبارات
ناظرته شوق بذهول : قصدك اكمل الحين!؟ نادر؛ ايه تكملين اجيب لك عذر ترجعين فيه للمدرسه وتختبرين ونكمل الترم الثاني هنا
فزت شوق بفرح وهي تجلس جنبه : الله نقدر يعني؟؟ نادر: ايه نقدر ليه ما نقدر ! وبعدين اللي اعرف ان اللي بصير دكتور ما ييأس ولا يا دكتوره
ضحكت شوق :ابد ما نيأس بس كيف نسوي!!
نادر : نرجع لمدرستك بالحفر ونعطيهم العذر ويختبرونك او يعطونا ورقه وتختبرين هنا
شوق : واذا ما وافقوا!
نادر: يوافقون غصب عليهم
شوق : متى نروح طيب!؟ نادر: بنروح بكره بنروح بس للمدرسه ناخذ اوراقك ونرجع طيب
شوق ببتسامه: طيب
رجع نادر ببتسامه وهو يشوف ان ابسط حق من حقوقها هي دراستها ولازم يكون لها عون فيه
اما شوق اللي كان الفرحريرقص بقلبها ما تدري كيف بتعبر ما تدري كيف بتصدق ان نادر بيكون لها عون وهي ظنته فرعون
_______________________.
ومن بكره
الكل حالهم راكد ومستقر الا بيت ابو خلف اللي قصة وعد فيه صارت كارثه والكل مايدري وش يتصرف معها
وللحين خلف مايدري كيف بيتصرف معها هي وجنونها وكرهها لعقاب لكن بما ان كفة مبارك رجحت لازم خلف يضمنه اقل شي
طلع من بدري طلع حتى ما افطر واتجهه لبيت جده يدقه وفتح عزوز : هلا خلف
خلف : هلا عزوز وين عقاب؟؟ عزوز: نايم كالعاده
خلف : روح صحه بسرعه ابيه بسرعه
محمد من بعيد : ادخل ياخلف مافيه احد
راح عزوز ودخل خلف يسلم على جده وجدته
ام ناصر : اجلس افطر
خلف : مابي ياجده
مضاوي : انصحك تجلس لان عقاب يبي له سنه يقوم
خلف: بيقوم ان شاء الله
محمد: وراك معصب اجلس اجلس
.
جلس خلف وهو مايبي يجلس ابد لكن مايبي يبلش بالاسئله
ام ناصر: وش فيك كأنك جالس على شوك
خلف : مستعجل
ابو ناصر: بدري على الدكان
خلف : ايه بروح مشوار قبل
نزل عقاب وهو يلبس ثوبه: وش فيك!؟
خلف : ابيك بشغله تعال
عقاب تقدم بيجلس يفطر بس سحبه خلف يوقف
ولف عقاب : وش فيك خليف! بعد الفطور نطلع
خلف : بنفطر برا قم
الكل استغرب من خلف لكن ما يمديهم يردون الا طلعوا
ولف عقاب : خلف بسم لله فجعتني وش فيك
خلف : وش بتفطر؟
عقاب : اي شي
مر خلف التماس واخذ تميس طلعوا للمكان المعتاد وجلسوا
عقاب : ترا انسدت نفسي وش فيك
خلف: افطر يا شيخ مافيه شي بسولف معك بس
ما تطمن عقاب ابد واوجعه قلبه وهو خايف ان وعد انتبهت وقلبت الدنيا عليه وهي لو تقول لخلف اي شي بيصدقها على طول عجز ياكل والتفت : خلف تكلم لا تخوفني
ناظره خلف بتمعن وهو يبي يعرف اذا فعلاً عقاب مسوي شي لوعد او لا لان رح يبان في عيونه وصوته : ليش خطبت وعد والحين بذات بعد خطبة مبارك
ثبتت عيون عقاب على خلف وكان متوقع ان وعد بتسوي شي عشان كذا ثبت وقد مايقدر يوزن كلامه اعتدل وهو يحاول يلف الموضوع لنقطه حساسه ودخل سالفة سحر بالموضوع عشان مايجبرع كثير : شوف يا خلف انت اخوي وصاحبي وتعرف كيف افكر ! وانا من فتره نويت اخطب لكن بعد سالفتك مع سحر قررت اني أجل الموضوع شوي لكن انصدمت من خطبة مبارك وماحبيت اني ادفن الفرصه وقلت لعمي عن رغبتي لكن في حال انه وعد رفضت مبارك يقولها لكن اذا وعد رضت في مبارك انا ماعندي اعتراض
خلف كان حاس بالذنب من جهه سحر عشان كذا ما قدر يعلق لكن قال: ومبارك وش عرفه في ابوي! وش عرفه وعد!
عقاب : هو قبل سألني لكن ما عطيته اهميه ماهقيت بيخطب
خلف : زين كيف تشوفه !؟ كلمني عنه
عقاب بدا يتكلم عن مبارك لكن كان يطلعه بصوره مثاليه مليانه اخلاق وادب سكتت خلف اللي مايدري وش يسوي بوعد
عقاب : ماودي اتدخل ياخلف بس ليش تسأل !
خلف كان صعب عليه يقول لخلف وعد ما تبيك لكن ما حب يقول : مدري وش اقولك يا عقاب لكن خلها في وقتها
قبل يتكلم عقاب فزوا على صوت نادر: مابغيتوا تجون اعنبوكم اصحاب انتم ولا عدوان
وقفوا كلهم يستقبلونه بحب وابعد خلف : متى رجعت ! ما درينا
نادر : بعذرك ما ماتدري انت وياه ناقعين بالبحر والبراد وانا اتقلب على الجمر
ابعد عقاب بعد ما سلم عليه:والله يا اخوي من ذبحته يديه محد بكى عليه اقلقتنا وقمت وطحت عشان تزوج وهاذي هي فايده الزواج اللي تبيه
خلف : يارجال وجبت وتزوج الادمي وربي سهل عليه وبعدين مب انت رايح تمشى شهر عسل خل لنا يومين عسل لا تصير بخيل
.
. .
.
ضحك نادر: ايه صادق شهر عسل من كثر ماهو عسل وحالي صابني سكر وقريباً ضغط
عقاب : والله وعشت وشفت نادر يشتكي دايماً الشكوى من نصيبنا والضحك من نصييه
نادر: حاسدني يالجني
عقاب : لا والله ما حسدتك انت اللي حسدت نفسك
خلف : ليه صار معك شي جديد
نادر جلس وهو يقطع في التميس بغيض : انا خبرت الواحد يشتكي الضيم من اعدائه من الناس عامه بس ماهقيت يجي يوم اشتكي من سوايا امي وخالتي وابوي
عقاب: حي الله فرقة حسب الله
نادر :عاد انت مال الحياء في قلبك طاري!؟ وش فرقة حسب الله اهلي ترا اهلي
عقاب : اهلك ماقلنا شي بس طبوا فيك وتأمروا عليك وعلى المسكينه اللي معك وهاذي ماهي سوايا اهل
خلف : اعقل يا عقاب مهما كان الظفر مايطلع من اللحم ولا تسمونها مؤامره
عقاب : وش نسميها سوء حظ نادر!
ضحك نادر: لا والله قل حسن حظ شوق
لفوا عليه بضحك وقال خلف: تطور حس الثقه عندك ولا يتهيأ لي
نادر: شوف في اي ظرف من الظروف بيأيدك واقولك ثقه زايده الا في زواجي من شوق اقسم باالله قمت احلف يمين وابصم بالعشره ان ربي ارسلني انقذها من الكيات المتحجر الغبي اللي عاشت فيه ولولا الله مايسرني وتزوجتها اتوقع ان مستقبلها بيكون جحيم
عقاب : ترجم !؟
ابتسم خلف اوول ماشاف ضاري المقبل عليهم اللي ينعرف من غباره بالارض انه جاي وصوته العالي وضحك: جااء مهجد شياطين عقاب
لف عقاب بغضب : يخسي
سمعه ضاري من بعيد وتقدم وهو يضحك وضربه بخفه بمسبحته : بسم الله سكنهم مساكنهم ! اقول ياعيال ماخبرتكم تكلمون الجن ، ولا جاء مع خليف من البحر
وقف عقاب بغضب ناوي يضربه بس فاجئه ضاري اللي تقدم بضحك يسلم عليه وابعد بسرعه يسلم على خلف ونادر
عقاب : اقول انت هيه يا ابو راس اعقل احسن لك
لفوا يناظرون ضاري وانفجروا يضحكون وضحك ضاري من لقب عقاب اللي واضح فيه قهره : تمون يالجني
خلف : اجلس بس انت وياه !؟ ضاري وينك مختفي
ضاري: ماني مختفي انتم اللي غايبين
عقاب : كنا عايشين بسلام من دونك
ضاري : ماعليك خلاف يا حبيبي خليتك يومين تريح اعصابك واضح تلفت
نادر: بالله وقفوا هواش مايصير كل مره كذا
عقاب : والله انا من عمر وهذا انا معكم شوفوا من دخل وسبب الهواش
ضااري : يا اخوي ما خبرنا الغيره الا للحريم
وقف خلف قبل تشب من جديد : خلصصصصنا كل واحد اردى من الثاني خلاص كمل يا نادر كمل
ضحك ضاري : وش يكمل !
عقاب : سكر فمك تسمع اذنك!
طنشه ضاري وجلس
ونادر بدا يسولف عن مواقف ابو شوق معه وكيف انه ماهمه بنته بكل الاحوال وامها لكن ماذكر التفاصيل المبالغ فيها
خلف : بيني وبينك ابوها شيييين واضح من هيئته
نادر: اقولك من عصر الجاهلييييه انا مستعد اقولك انه ممكن يدفن شوق حيه في اي لحظه يحس ان وجودها عار
عقاب : مب لذا الدرجه عاد
ضاري : عاد انتبه لنفسك ترا كنك اياه
عقاب : ايه والله صادق خصوصاً اني احس اني لازم ادفنك ولا بتعم الجاهليه فالكون
خلف : وش بتسوي طيب! لا تقولي بتقطعهم!
عقاب :ايه يقطعهم ويقطع ابوهم وش يبي بهالناس
ضاري : فالنهايه الاوادم بايعين الدنيا بما فيها
خلف : اسمع مني لا تكثر روحات ولا تقطع يعني كل شي روح لهم نص ساعه وارجع بس لا تقطع الرحم
نادر:هذا اللي بيصير يعني عشان شوق بس
والتفت يضحك لضاري : عشان نديمتي
ضحك ضاري : يعني يناسبك الاسم ترا
عقاب : شف عاد بتقعدون تقولون أللغاز احسن لكم تقومون تطسون
شرح لهم ضاري المعنى وابتسم : عاد الظاهر بدور لي نديمه
نادر: ما تقول امك!
ضاري : ايه بس امي كبرت ومعاد لها حيل ومصره الا تبي تزوجني
عقاب: سلم عليها وقلها ترحم بنات الناس منك وانا متاكد انها هالمسكينه انها غلطت غلطة عمرها وجابتك
ابتسم ضاري ابتسامه خفيفه مكسوره ما احد انتبه لها متوقعين رد من ضاري لكن مارد وهو قلبه يوجعه كل مايتذكر انه ماهو من بطن هالمرأه العظيمه وانه لقيط ويمكن يكون فعلاً انها غلطت غلطة عمرها وتبنته
لاحظوا سكوت ضاري اللي وقف: ا انا عاد بروح
خلف باستغراب: جالسين!
ضاري :عندي شغل
نادر : زين لكن ارجع فالليل جالسين
عقاب استانس انه سكت ضاري متوقع انها شطاره منه وقرر يحرجه اكثر ويقول : لا لا دام صرت صديق وتمون ونمون طال عمرك الليله عشانا عندك
خلف كان منتبهه لضيق ضاري والتفت بغضب لعقاب : ومن سمح لك تعزم
عقاب : يقول صديقنا وهذا عشى صداقه الا اذا ما وده
نادر هنا بعد انتبه وقال يبي يبرر موقف عقاب الشين : لا ما نقدر اصل...
قاطعه لضاري للي مهما كان منحرج وضايق مستحيل يحرج نفسه اكثر ويرفض عزيمتهم ويخلي لعقاب حجه عليه : لا والله صادق عقاب ، من زمان كنت بعزمكم لكن سبقني عقاب وابيكم تشرفون البيت اليوم
خلف وقف : مايحتاج ياضاري مابي...
انهى النقاش ضاري بحده غير معتاده: افا بترد عزيمتي ؟
تفشل خلف ونادر ووافقوا لكن اصروا انه مايتكلف ويكون عشاء بيت وعادي وراح ضاري وهو ضايق صدره وانحط بموقف شين وهو كان يبي يعزمهم لكن مو بذا الوقت اللي حالته الماديه صعبه شوي وامه تعبانه ووضعه مكركب لكن عقاب اجبره
واول ماراح لف نادر على خلف: انت وبعدين معك!؟ لين متى وهذا اسلوبك!
19
عقاب : وش قلت ؟
خلف : ما تشوف انك قلت شي!؟عقاب وش فيك! ضيقت صدره بكلامك وثاني شي تجبره على عزيمه وهو واضح ماهو مستعد لها
عقاب : ياحبيبي يالحساس اللي ضاق صدره اسمعوني عاد تراني ساكت له وبالعه عشانكم بتجلسون تدارونه مثل البنات بعد كذا كثير وبعدين هو مايستحي على وجهه له فتره ناقع هنا ولا عمره عزم
خلف : من قالك نبيه يعزم
عقاب : اذا مايعرف الاصول نعلمه الاصول
خلف : عقاااب ترا كبرررت شوفة نفسك على الناس
عقاب : المختصر يا خليف! بتهاوش معي عشانه
نادر: قلنا لك ماتبيه لا تجلس معه لكن لا تجلس تحرجه
اخذ عقاب اغراضه وصد: ماهو كفو هالشين يبعدني عن مكاني واصحابي
راح وتركهم وصد خلف بضيق: انا اشق هدومي من ذا الرجال ولا وش اسوي
نادر: خله يارجال تربيه الايام ، المهم يلا روح لدكانك وبرجع لبيتي
خلف : الله معك
اخذ خلف طريقه وهو يناظر دكان النوخذه الخالي واضح ما رجعوا من الكويت لكن مازال في باله موقفه مع ليلى بالبقاله وابتسم وهو يتذكر رعب عيونها ودخل المحل بهدوء وجلس قدام اغراض وهو صار عنده ولاء لهالشغله اللي رمت في طريقه ليلى
_______________________.
في بيت ابو خلف
ما نزلت وعد اليوم للفطور ولا اشرفت على اي شي فالبيت وكانت مليانه زعل وقهر وتنتظر الوقت اللي يطلع فيه ابوها واول ماطلع نزلت والكل يناظرها
ام وعد : تعالي ياوعد تعالي افطري
وعد : مابي مالي نفس
ام خلف : يا وعد يا بنتي تعوذي من ابليس ومايصير اللي تسوينه
ندى : انا مدري وشوله رافضه عقاب !؟ ما اشوف فيه شي يخليك ترفضينه كذا
وعد بغضب : اذا تشوفينه ما ينرد خذيه انتي
ام وعد : وعد وش ذا الحكي !؟ استحي على وجهك وبعدين ندى صادقه عقاب ما ينرد ولا بتسوين مثل سحر
وعد : يمه تكفين سكري الموضوع لانه مايقبل النقاش ابداً
ام وعد بغضب : لييييه ولا معجبك انك جالسه للعمر هذا وانتي ترفضين كل واحد يخطب وش فيك انتي تبين توقفين نصيبك ونصيب خواتك معك
انصدمت وعد من كلام امها وقالت بقهر: انا ما اوقف نصيب احد اللي بيتزوج الله يستر عليه
حنان: يمه الله يهديك محد يوقف نصيب احد وعد معها حق تختار اللي تبي تعيش معه
ام وعد : لا ما معها حق لين متى واحنا نجاريها لين متى هالانانيه الناس تزوجت وعاشت والطيور طارت بأرزاقها وهي للحين تكابر
الحين فهمت وعد ان الكل متحامل عليها دام السالفه فيها عقاب طلعت وتركتهم وهي مصره على اللي براسها ام خلف : يا نوريه وش فيك على البنت مهما كان وعد عاقله وتعرف مصلحتها
.
.
اماني: يمه هاللي قلتيه ثقيل حيل ! ليه تحسسينا إنا جالسين على قلبكم
ام وعد :يابنتي ماهو ذا قصدي لكن ابي اتطمن عليكم ابي ازوجكم وافرح فيكم
الكل سكت محد رد وكلهم متضايقين
_______________________.
وفي بيت الجد قايد
كانوا سحر وعهد ومضاوي وهيا وشهد بالسطح جالسين ويتقهوون لكن لفوا على دق باب السطح
وفزت شهد تفتح: وعد حياك
وعد بغضب: وين عمي محمد !
مضاوي: بسم لله ردي السلام طيب
وعد : مضاوي مالي خلقك وين عمي
عهد : عشتوا ليه مالك خلق تردين السلام داخله على يهودين
مسكت نفسها وعد غصب لا تطلع حرت عقاب فيها: ابعدي عني يا عهد ترا كل شياطين الارض قدام عيوني لا تخليني اسوي شي اندم عليه
هيا: اذكري الله يا وعد ومحمد في غرفته
مرت وعد بغضب ولفت سحر بخوف: بسم لله وش فيها
عهد : فيها الطغيان اللي مالقت احد يكسر راسها عليه
مضاوي : انتي وش صاير لعقلك هاه انهبلتي وقعدتي؟؟ عهد امسكي لسانك لا اقول لعقاب
عهد صدت وسكتت
اما وعد طارت لغرفة محمد وهي مالها نصير الا محمد دقت الباب ودخلت : عمي فاضي
اعتدل محمد وهو يبعد الجريده: اي يا وحش تعالي
صدت وعد بضيق : الظاهر بتناهشني الوحوش يا عمي ويضيع هالاسم مني
فز محمد بخوف : وعد وش فيك!؟ وش صاير !
جلست وعد بضيق: عمي طلبتك مالي الا انت تفهمني
محمد : ابشري قولي وش فيك!
وعد قالت له عن خطبة مبارك وخطبة عقاب وقالت انها رافضه عقاب ولا تبيه وتكرهه ولا قالت كل التفاصيل وانصدم محمد: وش صاير لكم انتم! كل واحد عاف ولد عمه ولا يبيه!
وعد : ياعمي ادري ان عقاب ولد عمي واحسن من الغريب واعرف اني ما احصل احسن منه واعرف اني كل شي بينحاس برفضي له لكن ياعمي افهمني ما اطيق عقاب ما اواطنه وتعرف ان لا انا ولا عقاب شخصياتنا تتوافق وتعرف اني لو بتزوجه من ثاني يوم بيذبحني ولا بهج وتطلق انا وياه ما يصير نتزوج وانت بنفسك قلت الزواج ماهو غصب واجبار
محمد سكت بحيره وهو فعلاً يعرف انهم اكثر اثنين مايصلحون لبعض وعد قويه وعقاب طاغي : انا ادري يا وعد لكن كيف نقنع ابوك
وعد رغم مرارة القرار الا انها كابرت على نفسها وقالت بعد ما الكل ضغط عليها ووصفها بالانانيه وانها موقفه نصيبها ونصيب اخواتها : انا موافقه على مبارك لكن ابيك تفهم ابوي ان كل شي قسمه ونصيب ولا يجبرني على عقاب
انصعق محمد من قرارها ولف :يا وعد انتي متاكده !؟ انتي تقولين مبارك شايب
وعد بغصه: فرق العمر مو مهم
ابعد محمد ووقف يناظرها بحيره وقرب : وعد اذا ما تبين مبارك محد يقدر يجبرك ابد لا عليه ولا على عقاب .
