رواية شمس الدوار الفصل الحادي عشر 11 بقلم مصطفي جابر

عند سراج

سراج كان واقف بصدمة وهم بيغطوا وش حبيبه

سراج بصدمة: حبيبة ماتت حبيبة اللي كانت لسه اهنة من يومين غارقة في دمها وسط طين الأرض

العسكري بهدوء: قضاء وقدر يا سراج بيه البقا لله بشعة قوي الموتة دي

سراج بعصبية: قضاء وقدر إيه يا حضرة العسكري دي مقتولة مين اللي له يد يعمل اكدة مين اللي يتجرأ ينهي حياة واحدة كانت مرت الدمنهوري في يوم من الأيام

العسكري بصدمة: الموضوع مش بسيط واصل يا سراج بيه المعاينة بتقول إنهم مكنوش واحد دول كانوا اتنين مشتركين في اللي حصل

سراج بذهول: اتنين يعني كان متخطط له

العسكري: الحقيقة أوعر من كدة الأول ضربها بالسكينة ولقيناها ومحتفظين بيها عشان البصمات أما التاني فده كان داخل على طمع سرقها وسرق كل الدهب اللي كانت لابساه

سراج بجمود: لاه اكيد في حاجة تانية ورا اللي حصل دا

السكينة دي تتحرز وتتعاين بصماتها دلوقت خدوها على المشرحة والله العظيم ما هسيب حقها لو كان مين اللي عملها

العساكر شالوا الجثة وسراج فضل واقف بيفكر

سراج في سره بغل: السكينة دي هتجيب رقبة اللي عملها بس مين هم وليه

في الدوار

الغفير دخل ونفسه مقطوع

الغفير بصوت مرعوش: يا رباب هانم يا عطوة بيه الحقوا الست حبيبة لقوها مقتولة في أرض النخل

عطوة قام وقف والكرسي اتقلب وراه عينه برقت بصدمة وصرخ بجنون: أنت بتقول إيه يا واكل ناسك حبيبة مين اللي ماتت أنت اتجنيت في عقلك عاد

الغفير بدموع: والله يا بيه المركز كله هناك والخبر مسمع في البلد الست حبيبة راحت خلاص

عطوة بزعيق: كداب حبيبة لسه كانت واقفه على رجلها حبيبة متموتش واصل

شمس ورباب وصابرين وقفوا بصدمة وفي ثواني كان عطوة وشمس والكل راكبين العربيات وطايرين على القسم

بعد دقايق شمس شافت سراج واقف جِريت عليه بلهفة

شمس بشهقات: سراج قولي إن الخبر ده كدب قولي إن حبيبة بخير

سراج بهدؤء: حبيبة راحت يا شمس خلصوا عليها وسرقوها ورموها في الخلاء

شمس دموعها نزلت بغزارة: يا مري يا وجع قلبي عليكي يا حبيبة ليه كدة مين اللي قلبه حجر يعمل فيكي كدة

عطوة كان واقف بعيد جسمه كله بيترعش قرب من سراج بخطوات ضايعة: سراج أبوس يدك خليني أشوفها خليني أودعها الوداع الأخير

سراج بحدة ووجع: تشوف إيه يا عطوة المنظر يقطع القلب بلاش توجع قلبك أكتر ما هو موجوع ادعيلها بالرحمة

عطوة بانهيار: وحياة غلاوة شمس عندك ورحمه أبونا خليني أدخل لها اني مش هقدر أعيش والمنظر ده في خيالي من غير ما ألمس يدها للمرة الأخيرة سراج أنا بموت ارحمني

سراج قلبه رق لأخوه وشاور له يدخل عطوة دخل الأوضة الباردة لقى جثة متغطية بملاية بيضاء قرب منها بإيد بتترعش وكشف الوش

عطوة انهار و مسك ايدها: قومي يا حبيبة قومي يا نور عيني وقولي إنك بتمثلي عليا عشان توجعي قلبي والله مسمحك على كل حاجة والله ماني طايق الدنيا من غير ريحتك في الدار كنت بداري عشقي ليكي ورا قسوتي كنت بوهِم نفسي إني كرهتك بس أنا كنت بتنفسك يا حبيبة

كمل بوجع وشهقاته: كنت مستنيكي ترجعي كنت هصالحك والله كنت هقولك إنك ست الحريم كلهم إزاي تمشي وتسيبي عطوة لوحده مين هيملى عليا الدنيا العشق اللي في قلبي ليكي كان جبال ميهدوش لا طلاق ولا زعل ليه تروحي وانتي زعلانه مني ليه تموتي والسكينة في رقبتك وأنا مش جنبك أحميكي

باس يدها بحرقة وهو بيعيط زي الطفل اللي فقد أمه: يا وجع عمري يا حبيبة قتلوكي وقتلوا قلبي معاكي عمري ما حبيت ولا هحب غيرك أنتي اللي سكنتي الروح وأنتي اللي خدتي الروح معاكي ودميتيها يا ريتني أنا اللي مت مكانك يا عشق عطوة الوحيد

سراج بصوت مخنوق: وحد الله يا عطوة ده نصيبها وقدرها ادعي لها بالرحمة يا خوي البكا مش هيرجع اللي فات

عطوة بص له وعيونه غرقانة دموع: مش قادر يا سراج النار اللي في صدري مش هتطفي واصل حبيبة ماتت وهي شايلة مني ماتت وحيدة وأني كنت قاعد بضحك في الدوار العشق اللي بينا كان أوعر من الموت بس الموت سبقنا وكسر ضهري

في اللحظة دي الباب خبط ودخل العسكري

بص لسراج بجمود: سراج بيه المأمور بعتني أبلغك إننا خلاص رفعنا البصمات من على جثة القتيلة ومن على السكينة ولازم دلوقتي ناخد بصمات أهل الدوار كلهم حريم ورجالة

الثاني عشر من هنا