رواية دموع ليان كامله وحصريه بقلم منال كريم

بارت1

يوم العيد الكبير

كانت ليان مع جدها في الملاهي و بيتعامل معها كأنها طفلة مش شابة عندها ٢٠ سنة

ليان بسعادة: شكرا يا جدو على كل حاجه أنا بحبك اوي

الجد ابراهيم: أنا بحبك اكتر يا ليان

ليان بحزن: أنا مش عارفة من غيرك كنت عملت ايه ، بعد وفاة بابا و ماما اتجوزت و نسيت أن عندها بنت.

ابراهيم: ربنا يرحم ابوكي ،و أمك معملتش حاجة غلط هي اتجوزت..

ليان بحزن: انا مش عايزة اتكلم عنها يا جدو.

طبطب على كتفها و قال: عندك حق سيبك من الكلام و خلينا ننبسط بالعيد

ليان بغناء: العيد فرحة و اجمل فرحة مع اجمل جدو في الدنيا.

و قضت ليان يوم جميل مع جدها، و رجعوا البيت.

ليان: اه يا رجلي مش قادرة اقف على رجلي.

ابراهيم: طبعا مش هتقدري تقفي على رجلك من كتر اللف و اللعب كأنك عيلة صغيرة..

ليان: مانا لسه صغيرة يا جدو، و من حقي العب براحتي

ابراهيم: ربنا يفرحك يا حبيبتي.

قام ابراهيم و قال: أقوم انا ادخل ارتاح شوية...

مسكت ليان أيده و وصلته الاوضة.

و هي كمان دخلت اوضتها علشان تعبانة...

/////////////

تاني يوم الصبح

دخلت ليان اوضة جدها و هي بتقول: أنت لسه نايم يا جدو ، يلا علشان الفطار

مفيش رد، قربت منه و قالت: نومك تقيل يا جدو.

قعدت جنبه و تحرك فيه و بتقول: يا جدو، أنت كويس صح

مفيش رد، أترعبت و صرخت و هي بتقول: جدو قوم علشان انا من غيرك مش هعرف اعيش

طلبت الإسعاف و راحوا المستشفى..

////////

في المستشفى

ليان بخوف: طمني يا دكتور

الدكتور: الحالة مش مستقرة ،ربنا يستر.

ليان بدموع: يارب يقوم بالسلامة، انا خايفة من غيره.

قعدت طول اليوم في المستشفى و بعدين مشيت علشان ممنوع مرافق ..

//////

دخلت الشقة بحزن و ضياع و نزلت دموعها و قالت: ليه كده يا جدو تسبني و أنا مليش غيرك، مش هقدر اعيش من غيرك..

عدت الايام و لسه ابراهيم في المستشفى ،و حياة ليان وقفت، لحد ما فى يوم صحيت من النوم على رنة التلفيون،بصت على الرقم و كان رقم الممرضة

ردت بخوف: جدي كويس صح.

ردت الممرضة بحزن: للاسف جدك مات.

صرخت ليان و هي بتقول: لا جدي لا يمكن يسبني هو عارف اني مليش غيره بعد وفاة بابا..

الممرضة: اخر كلمة جدك قالها ليان.

انهارت ليان من العياط

////////////

بعد ما انتهت إجراءات الدفن و العزا

كانت ليان نايمة في اوضة جدها و تفتكر كل الذكريات اللي عاشتها معاه.

دخلت صاحبة عمرها،جميلة و قالت:

ليان في حد عايز يشوفك

ليان : مش عايزة اشوف حد..

جميلة: دي امك

قامت ليان بفزع و قالت: هي جاية ليه؟

جميلة: اكيد جاية علشان تقف جنبك

قالت ليان باستهزاء: و هي امته وقفت جنبي، مش بعد ما ابويا مات ،اتجوزت و سبتني أنا و راحت ربت ولاد جوزها.

طبطت جميلة على كتفها و قالت: معلش اخرجي ليها

قامت ليان و خرجت مع جميلة

كانت قاعدة امها و جنبها جوزها و معاهم شبابين، قامت زينب و قالت: ليان عاملة ايه يا حبيبتي

ليان: مين حضرتك.

زينب: انتي مش عارفاني أنا ماما.

قعدت ليان و قالت ببرود: معلش مش فاكرة ،امي اللي اعرفها سابتني من سنين و قتها كنت طفلة صغيرة لما ابويا مات، و اللي اسمها امي بسرعة اتجوزت واحد تاني و ربت ولاده.

زينب: انا طلبت من جدك تجي تعيشي معايا و هو رفض.

ليان: عنده حق أنا لا يمكن اعيش مع حد غير ابويا..

زينب: بلاش نتكلم في اللي فات ،انا جاية النهاردة علشان اخدك تعيشي معي

ليان: انا مش هسيب بيت جدي

زينب: جدك الله يرحمه مات و مينفعش تعيشي هنا لوحدك..

ليان: أنا عشت سنين من غيرك و عادي اكمل حياتي لوحدي

زينب: ما كفاية وجع قلب و اسمعي الكلام.

نزلت دموع ليان وقالت: قلبي انا اللي موجوع حضرتك مش قلبك انتي.

و اخيرا اتكلم جوز زينب ( عبدالرحمن)و قال: يا بنتي امك بتحبك،و خايفة عليكي

ليان بعصبية : بعد اذن حضرتك محدش طلب رأيك

مراد ابن عبدالرحمن الكبير، رد بعصبية: اتكلمي بأسلوب احسن من كده.

بصت ليان على زينب و قالت: انتي جاية و جايبة معاكي محاميين يدافعوا عنك.

قبل ما زينب ترد رد، ابن عبدالرحمن الصغير( شريف):ماما زينب مش متهمة علشان تحتاج محاميين

كلمة ماما كسرت قلب ليان، امها حرمتها من حنانها و ادته لحد تاني،

قالت ليان بوجع: هما دول اللي سبتي بنتك الوحيدة علشانهم، خلتيني أنا يتيمة اب و ام ، بقيتي ليهم ام و هما عندهم اب، خدوا الحنان اللي انا اتحرمت منه..

زينب: من غير كلام كتير يلا معايا

ليان: قولت لا

زينب بأمر: الشقة دي بأسمي و لا نسيتي كان ابوكي اللي يرحمه كتبها بأسمي و انا بعت الشقة و كده مفيش مكان تروحي فيه إلا عندي

ملقتش ليان رد غير كلمة واحدة: انا بكرهك.

/////////

و ليان راحت على بيت زينب لأن ملهاش مكان تاني..

كانت قاعدة في الاوضة ، خبط الباب و قالت: اتفضل

دخل عبدالرحمن و معه صنية أكل و قال و هو بيضحك: جبتلك أكل طالما مش عايزة تاكلي معانا

ليان : شكرا لحضرتك بس انا مش جعانة

قعد عبدالرحمن قصادها و قال: لو قولتلك انا حاسس بيكي هتصدقيني.

ضحكت بسخرية و قالت: لا مش هصدق، علشان محدش في مكاني، لو فعلا حضرتك حاسس بيا كنت طلبت من مراتك تسأل عليا مش هقولك اعيش معاكم، بس على الاقل مجرد سؤال.

عبدالرحمن: عندك حق يا ليان، و مش هقدر اقولك غير امك بتحبك بجد.

ليان: تسمع عن مقولة الحب أفعال مش اقوال

عبدالرحمن: اسمع و اسمع كمان عن مقولة اعطي نفسك فرصة تعرفي زينب بجد

ليان: متأخر اوي

عبدالرحمن: في مقولة تانية بتقول، انك توصل متاخر احسن ماتوصلش خالص و زينب وصلت متأخرة و مده أيدها ليكي

ليان: خليها تسبني ارجع بيتي يمكن اعرف اسامحها

عبدالرحمن: زمان كانت هي مطمئنة عليكي مع جدك،دلوقتي مينفعش..

ليان مردتش و هي الحقيقة مش قادرة تتكلم، فهم عبدالرحمن و قام من مكانه و قال: منورة بيتك يا بنتي.

و خرج و هي مردتش عليه، نزل تحت كانت قاعدة زينب مع الشباب ،جريت على عبدالرحمن و سألت بلهفة: ها اتكلمت معها.

عبدالرحمن: الموضوع مش سهل عليها، اصبري عليها يا زينب

عيطت زينب و قالت: انا عارفة أنه صعب تسامحني

عبدالرحمن: حقها الصراحة

مراد: بلاش كلامك ده يا بابا احنا بنهون عليها

عبدالرحمن: انا بقولها الصراحة علشان تكون مستعدة للي جاي ،الوضح أن ليان نفسيتها تعبانة و كمان عنيدة.

شريف: صدقيني يا ماما هي اللي خاسرنة ام جميلة زيك، و هي تطول اصلا.

كانت نازلة ليان بصنية الاكل و قالت: معلش عيد كلامك تاني

الكل بص عليها و قامت زينب ناحيتها و سألت: عايزة حاجة يا حبيبتي

حطت الصينية على الترابيزة و شاورت على شريف و قالت: عايزة الشخص ده يكرر كلامه

محدش رد عليها، قالت هي: انا اللي خسرانة ، طيب مانا فعلا خسرانة و قولت اني اطول تكون دي امي، ليكون في معلوماتك انا مطولش علشان هي فعلا مش أمي هي أمكم انتم ،اتكلم كلام صح او اسكت خالص

اتعصب شريف و قال: اتكملي بطريقة احسن من كده.

عبدالرحمن بصوت عالي: اخرس يا شريف

و بص على ليان و قال: تعالي اقعدي معانا.

مردتش عليه و طلعت الاوضة تاني

جز مراد على أسنانه و قال: بنت قليلة الأدب

عبدالرحمن بحدة: عيب كده يا كبير يا عاقل

مراد : انا اسف بس هي مستفزة

و طلع اوضته هو و شريف

و زينب منهارة من العياط، طبطب عبدالرحمن على كتفها و قال: انتي غلطتي زمان لما سبتي بنتك و دلوقتي لازم تحاربي علشان ترجع ليكي..

//////////

في اوضة ليان

نائمة على السرير و حضنه صورة جدها و باباها، و هي بتعيط و قالت: انتوا ليه مشيتوا و سبتوني لوحدي،و انتوا عارفين اني بخاف صح، عملتوا فيا كده ليه، انا مش مبسوطة هنا و حاسه اني مخنوقة.

فضلت ليان تعيط لحد ما راحت في النوم

//////////////

تاني يوم الصبح

صحيت ليان على خبط الباب ،ردت بنوم : مين

ردت زينب من برة و قالت: انا يا ليان.

اتعصبت ليان من صوتها و سالت: عايزة ايه

زينب: عايزة اتكلم معاكي ،ممكن تفتحي الباب.

ليان: و انا مش عايزة

خرج مراد من أوضته و شاف زينب و هي وافقة قدام باب ليان وباين عليها الحزن، مشي ناحية الاوضة بغضب، و خبط على الباب بعنف و صرخ: البيت ده بيت ماما زينب مش بيتك علشان تتحكمي فيه، و لم صاحبة البيت تطلب منك حاجه نفذي الامر

زينب: اسكت يا مراد لو سمحت الحكاية مش ناقصة

زعق مراد : يا ماما البنت دي مدلعة و عايزة تاخد على دماغها

في الوقت ده كانت لبست ليان و فتحت الباب و اتكلمت بقوة: ومين هيديني على دماغي، اوعي تكون أنت.

زينب: حقك عليا يا حبيبتي هو ميقصدش

ليان: و حتي لو يقصد عادي، و بعدين يا استاذ اظن انك كنت حاضر و عارف اني جيت هنا بالغصب

و ارتفع صوتها و هي بتقول: يعني انا لا عايزة البيت و لا أصحابه و لا عايزة اعيش هنا.

خرج عبدالرحمن و قال::في ايه على الصبح

ليان: اه معلش واضح اني عملت ازعاج ليكم ،و علشان كده انا بطلب من المدام صاحبة البيت ترجع بيتي ليا و تسبني أمشي من هنا

زينب: انا عايزة اعوضك عن الماضي

ليان : هتعرفي

نزلت دموع زينب و قالت: اوعدك اعمل المستحيل علشان ترضي عني

ضحكت ليان ضحكة وجع و قالت : تمام، يلا نبدا، و انا عندي خمس سنين صحيت من النوم على خبر وفاة بابا.

و انهارت من الدموع و كملت: لقيت الكل بيقولي أن بابا في الجنة و مخافش علشان ماما هتفضل معايا

و شاورت بايديها و قالت: و بعد سنة بالضبط ،عرفت أن امي مشيت ،سألت راحت فين ،قالوا اتجوزت علشان هي لسه صغيرة، الجملة دي اتحفرت في دماغي و صرخت ،انا كمان صغيرة و عايزة ماما ،بس ماما مجاتش.

عبدالرحمن لما لقي زينب و ليان منهارين، قال: كفاية لحد كده.

مسحت ليان دموعها بعنف و قالت: ليه كفاية ليه في حاجات كتير ، مثلا لما كل اصحابي عندهم أم و انا لا ،لما كنت محتاجة أسأل على حاجات خاصة بيا، عارفة كنت بسأل مين ،جدو ،انا بكرهك ،فاهمة بكرهك و عمري ما احبك

وقعت زينب من طولها، جري عبدالرحمن و الشباب عليها ،خدوها و دخلوا الاوضة، و ليان واقفة زي ماهي..

خرج مراد و قال بعصبية : مبسوطة دلوقتي ،انتي ايه معندكيش قلب

و كمل بتهديد: لو ماما حصل لها حاجة موتك على أيدي.

ردت ليان ببرود: الواضح أنك أنت اللي معندكش عقل، أنت سمعت أنا قولت ايه، و ده ميجيش نقطة في بحر من اللي عشته، انا مش عايزة اقعد هنا، اطلب منها تخليني امشي من هنا علشان انا بكرهها و بكرهكم كلكم.

رفع مراد أيده بغضب و ضربها بالقلم..

و للحديث بقية

الثاني من هنا