رواية حكاية صبا الفصل التاسع 9 بقلم حنين عادل
Part 9
بيغمض مُسلم عينيه تاني !
صبا بخوف وهي بتبُص للدكتور وبعدها بتبُص علي مُسلم : هو غمض عينيه تاني ليه ؟
مراد بص لها وبص له بحزن وغيرة ووشه عابس رجع شعره لورا وبعدين حط ايده في جيوبه وهو بيضغط بأسنانه علي شفايفه ..
الدكتور كشف عليه وابتسم :
اهدي مفيش حاجة خطيرة هو بس مجهد .
صبا قربت أكتر وهي بتبص لوش مُسلم اللي بقي لونه أصفر بخوف ورفعت وشها وقالت للدكتور:
يعني ايه مجهد؟
انت متأكد أنه كويس؟
الدكتور وهو بيظبط الأجهزة:
بصي يا أنسة هو فقد دم كتير فطبيعي يفوق ثواني ويرجع ينام تاني .
بصت صبا لـ مُسلم وهي حاسة بالذنب :
طب هيفضل كده قد ايه؟
الدكتور: في خلال يومين بإذن الله هيفوق ويبقي كويس .
مراد كان واقف بيتابع قلقها وخوفها عليه وجوه قلبه صراع ندم وخوف وغيره عليها .
صبا قربت من مُسلم : فوق بقا يا مُسلم بالله عليك أنا مش هستحمل لو جرالك حاجة.
بصت صبا علي مراد اللي واقف واضح عليه الحزن وملامح وشه متغيرة: مالك ؟
مراد : اكيد متضايق علي مُسلم هو شاب كويس ومحترم ويستاهل كل خير !
بصت صبا علي مُسلم : فعلا ! ربنا يقومه بالسلامة
حاول يرسم مراد ابتسامة باهتة علي وشه وقال:
ما تقلقيش هيبقي كويس..
اتنهد : ياريتني كنت مكانه !
بصت له صبا باستغراب : ليه بتقول كده ؟
مراد بابتسامة وعيونه في عينيها : عشان اشوف قلقك وخوفك ده كله عليا أنا وبس!
صبا بصت له بتوتر وبعدين رجعت تبُص لمُسلم وكأنها بتقفل الكلام معاه .
اتنهد وطلع من الأوضة راح علي اوضته وقف يبُص من شباك بيطُل علي الجنينة بحزن :
سُكت وقت ما حبت صالح ! بس الدنيا اتقلبت وجت لي فرصة قولت أكيد هتحس بحبي ليها
يقوم يطلع لي مُسلم كمان خوفها وتوترها وعياطها عليه ده معقول كله احساس بالذنب بس!
ولا في حاجة في قلبها اتحركت ناحيته
ايه الحظ الهباب ده بس !
كل ما اقرب لك خطوة احس انك بتبعدي عشرة!
حد بيحضنه من ضهره وايد بتلف بقوة حوالين بطنه هوا سخن في رقبته وصوت رقيق بيهمس :
وحشتني !
نفخ بقرف: صافي مش وقتك خالص !
فك ايدها وبعدها عنه فبانت بنت بيضا جسمها متناسق شعرها بني قصير كاريه ولابسه فستان فوق الركبة علي كعب عالي !
بصت له وعقدت حواجبها وكأنها زعلانة :
كده يا مراد مالك متغير معايا كده ليه ؟
انت ليه مش بتحبني زي ما أنا بحبك ده أنا اكتر واحدة هتسعدك في الدنيا ده انا حتي بنت خالتك وبعدين أنت ناسي اللي حصل بينا هنتجوز امتي بقا ؟
مراد قعد علي الكرسي وطلع سيجارة وولعها وهو بيبُص لها ببرود : أنا ما وعدتكيش بحاجة يا صافي أنا راجل
فـ طبيعي يحصل ده مع واحدة اغرتني ورمت نفسها عليا وانا سكران !
بصت له بغضب: انت لازم ......
قاطعها بغضب : أنا ماحدش يفرض عليا اعمل ايه وانا قولتها مرة وعشرة ومليون مش بحبك هو الحب بالعافية!
روحي لـ شمس هانم اللي بتخطط لك وقولي لها تشوف لك حل تجوزك اي حد عادي او توفروا علي نفسكم التعب وروحي لأي دكتور شمال يرجعك فابريكا ..
صافي بدموع : أنا بتقولي كده ده انا أمنت لك و.....
قاطعها مراد ببرود: أنا عارف كل حاجة حصلت في الليلة السودة دي كويس اوي وعملت اللي عاوزينه اهو اتسلي وأشوف اخركم ايه انسيني يا صافي وشوفي حياتك أنا لحد دلوقتي مائذتكيش ..
وقف وقرب منها وملامحه اتحولت للشر لحد ما زنقها في ركن ضيق :
انما دلوقتي أنا في الأوضة اللي جنبي هنا البنت اللي بعشقها وهتبقي مراتي أي حركات رخيصة من بتاعتك وشغل ستات سايبة اقسم بالله همحيكي من علي وش الدنيا
ماتنسيش كلامي ده اللي قدامك مش ابن خالتك
اللي قدامك مراد باشا الخولي !
بصت له بخوف ...بعد عنها وقعد وضهره ليها ..
طلعت بره الأوضة بخطوات سريعة..
خبطت علي أوضة شمس ودخلت وهي بتعيط ...
شمس : اششش ايييه انتي كنتي عند مراد ولا ايه ؟
حكت لها صافي اللي حصل ..فابتسمت شمس:
يعني كان عارف كل حاجة وبيلاعبنا مش سهل برده تربيتي !
صافي: انتي بتقولي ايه احنا في ايه ولا ايه ؟
شمس نبرتها اتغيرت : البنت اللي حاولت كتير اخليه ينساها موجودة هنا !
صافي بغضب: عارفه قال لي وانتي ازاي سمحتي بده !
شمس: مراد من وقت ما وصلت وهو متغير معايا مش طايقني مش بيسمعني اصلا ومصر يعاندني في أي حاجة أقولها.
صافي : يعني ايه هتسيبها كده تفوز بيه كده بسهولة !
شمس : أنا مش هعمل حاجة تاني كفاية لحد كده مراد اليومين دول الأحسن نجاريه في اللي هو عاوزه ..
صافي بغضب : طب وانا !
شمس بتنهيدة : انتي قدامه من وانتي صغيرة عمره مافكر فيكي طلعيه من دماغك احسن .
صافي بانفعال : بقا أنا يفضل عليا حتة البت الفلاحة دي ماشي يا مراد !
*ــــــــــــــــــــــــــــــــــــــــــــــــ*
وعند نعمان ...
بنت لبسها بسيط عباية بألوان زاهية وفوقها طرحة مربوطة لورا بإهمال وخصلات شعر نازلة منها عيونها واسعة ورسماها بالكحل التقيل واقفة تبُص عليه وعلي وشها مرسوم حزن عيونها مليانة دموع وحبساهم ..
*بت يا سماح واقفة كده ليه ..
لفت ليها وقالت : بشوف سيدي يا ستي ربنا يقومك بالسلامة .
بصت وداد لـ نعمان اللي كان نايم : يارب يا سماح ..
رفعت عينيها وبصت لها بشك: بس يعني ليه زعلانة اوي كده !
سماح اتوترت : مش سيدي وولي نعمتي ده لولاه كان فات كلاب السكك بتنهش في لحمي ..
من يوم ما ابويا مات وسابني في الدنيا لوحدي والكل كان طمعان فيا جابني هنا
واتكفل بيا وعاملني زي ....بنته وأكرمني ربنا يكرمه دنيا وآخرة ..
هزت وداد راسها بحزن : طب روحي انتي دلوقتي ..
مشت سماح وهي بتبُص عليه بحزن وطلعت بره الأوضة..
وداد بدموع : قوم لي بالسلامة يا نُعمان ماتكسرش ضهري أنا ماعدش ليا غيرك في الدنيا انت اهلي وناسي
*ــــــــــــــــــــــــــــــــــــــــــــــــ*
دخل مراد علي صبا اللي كانت نايمة علي الكرسي قصاد مُسلم ...
مد ايده عليها فقامت مفزوعة فجأة..
مراد: أنا أسف بس الوقت اتأخر روحي ارتاحي كفاية كده
صبا هزت راسها ومشت وهي بتبُص علي مُسلم ..
مراد : أنا لقيت نفسي فاضي نزلت اشتريت لك فساتين محجبات وطرح وحاجات يارب يعجبوكي
ابتسمت صبا ومشت ..دخلت اوضتها لقت الشنط علي السرير
بتفتح اول شنطة وشها أحمر من الخجل وقالت :
يا قليل الأدب !
كانت ملابس داخلية قفلت الشنطة بسرعة وشافت الفساتين والطرح ...
صبا ملامح وشها اتغيرت: البس الحاجات ازاي وهو اللي اشتراهم وشافهم بس انا محتجاهم برده !
منك لله يا عمي شافط فلوسي ومخليني علي الحديدة حتي الحاجات مش معايا اجيبها
الهي ماتتهني بيهم يا بعيد
*ـــــــــــــــــــــــــــــــــــــــــــــــ*
مراد كان قاعد جمب مُسلم علي كرسي بعد ما طلع الدكاترة بره ..
قام وقف قصاده وقرب منه اكتر واكتر ...
طلع مسدسه من جيبه وعمره ..
ابتسم وهو بيحطه تحت دقن مُسلم ..
فتح مُسلم عينيه فجأة وهو مصدوم :
انت عاوز تموتني
شال مراد المسدس بسرعة وحطه وراه في ضهره ...
مراد : انت ...انت بتقول ايه انت شكلك بتهلوس حمد الله علي السلامة يا حبيب اخوك !
ضيق مُسلم عينيه بشك: هو انا زعلتك في حاجة ؟
مراد: لا طبعا !
مُسلم : متأكد!
مراد : اكيد ؟
هز مُسلم رأسه : طيب ربنا يستر !
ابتسم مراد وهو بيضيق عينيه ابتسامة طالعة بالعافية وطلع بسرعة ودخل الدكتور يشوفه
مراد وهو بيتنهد : اول مرة اخاف كده !
هو ايه اللي بقي يحصل لي ده .
أنا كنت بفكر في ايه عاوز اموته !
طب استني أما يبقي كويس الأول واخطفه واعذبه في المخزن من غير ماحد يعرف !
صبا : هو انت بتقول ايه !
لف مراد ليها : أنا ...أنا ...بفكر بصوت عالي عادي يعني
صبا : اه طيب مُسلم فاق
مراد : ايوه فاق ..
دخلت صبا ودخل مراد وراها ..
صبا : انت كويس !
مُسلم : طالما شوفتك بخير أنا كويس
مراد هرش في دقنه بغضب..
مُسلم : حصلت حاجة غريبة اوي يا صبا
مراد شاور له علي رقبته بالDبح لو اتكلم ..
صبا : ايه هي !
ابتسم مُسلم: حلم غريب ..حلمت بيكي
هرش مراد في دقنه بغضب مكتوم ..
صبا لاحظته : انت عندك حساسية ولا ايه !
مُسلم : او جرب ههه لا صحيح ده غني مستحيل
مراد بيضحك ضحكة صفرا : اول مرة اشوف واحد راجع من الموت دمه خفيف كده !
مُسلم: ماتاخدهاش علي صدرك كده يا مراد باشا
حاول يقعد فـ صبا قامت بسرعة وحاولت تعدل وراه المخدة .
مراد بعدها وراح عدلها هو ومُسلم لاوي بوزه ومراد مضيق عينيه وكأنه مش طايقه..
بصت صبا للدكتور وهو بيدي مُسلم الدوا ..
صبا : عرفني المواعيد يا دكتور عشان اديهولي بنفسي
بص مُسلم لـ صبا بابتسامة لاحظها مراد وقال وهو بيهرش في شعره :
يعني مش لازم يا .....
قاطعه مراد: فعلا عندك حق أنا يا دكتور اللي هديله العلاج بنفسي واحركه لو عاوز !
ابتسم مُسلم ابتسامة صفرا ولف وشه وملامحه اتغيرت للغضب وهو بيشتمه في سره ...
ابتسمت صبا وهي بتبُص لـ مُسلم :
خلاص مراد هيخلي باله من العلاج
بصت لـ مراد : ممكن تعرفني فين المطبخ اعمله اي حاجة يأكلها !
مُسلم بص لـ مراد بابتسامة انتصار :
بسرعة يا مراد اصل حاسس اني هفتان
مراد شفايفه كانت بتتحرك لفوق وكأنه هيتشل وهز رأسه: تعالي وانا اوريهولك ...
مشت صبا بص لـ مُسلم وهو بيجز علي سنانه وقابض علي ايده : خلي بالك من نفسك ..
مُسلم بوجع : طيب طيب فهمت انت ملكش في الهزار ابدا ....
مشي مراد ورا صبا...
صبا كانت ماشية بطئ لحد ما جه مراد ومشت جنبه دخلها المطبخ كان مطبخ كبير وفيه طباخين كتير .
جه له مكالمة فبص لها بابتسامة : شوفي عاوزة تعملي ايه وهما يساعدوكي ..
خرج وسابها فابتسمت وطلبت من حد منهم :
لو سمحت عاوزة فراخ وعاوزة اعمل شوربة خضار ..
دخلت صافي وهي بتبُص عليها من فوق لتحت:
انتي جديدة هنا يا شاطرة !
صبا بصت لها باستغراب : انتي بتكلميني انا؟
صافي: ايوه اسمك ايه يا شاطرة
ضحكت صبا: اسمي الشاطرة صبا ههههه
صافي بغضب: ايه خفة الدم دي يابت يا فلاحة انتي
صبا : فلاحة وافتخر مش شتيمة علي فكرة انتي شكلك مطبقة علي قراءة الروايات ههههه
صافي : انتي بتردي عليا !
صبا رفعت حاجبها : انتي سألتيني وانا جاوبتك طبيعي ارد عليكي اومال اتعامل معاكي بلغة الإشارة ولا ايه انتي جاية تقولي شكل للبيع ولا ايه ؟
صافي اتعصبت مسكت حلة ماية و........يتبع
العاشر من هنا