رواية بنت النصاب الفصل الثامن 8 والاخير بقلم جمانة السعيدي
رحمه....اختفى خلدون العراق كله يدور علي محد يعرف هو وين
ابراهيم فكر ياخذ حقه منا اني وامي لان مستحيل يخسر هيج مبلغ بهاي السهوله مجاي يتقبل فكرة خلدون ضحك علي
اجا دك الباب
امي....منو اذا على خلدون ماموجود
(هذا الكلام من ورا الباب )
ابراهيم...اني ابراهيم اريد احجي وياج
امي...خير شكووو
ابراهيم.....على كيفج خلدون اخذ مني ٣٠ مليون
وقرا الفاتحه على اساس ينطيني رحمه من تكمل سادس
امي...روح اخذ فلوسك من خلدون بنتي مو للبيع
ابراهيم...وين الكا خلدون انتي ملزمه
لو تكملين هاي الزواجه لو ترجعين فلوسي
امي....اني لا متفقه وياك ولا ما خذه فلوسك فلوسك عد خلدون روح اخذهن منا واذا تشوفه اكتله خلاص
وريحنا منه
ابراهيم....انتم متفقين عليه اريد فلوسي ماكو اكلب الدنيا عليكم
امي....اكلبها اكثر ما هيه مكلوبه شتريد تسوي سوي
ذاك المركز وروح اشتكي
ابراهيم...بسيطه اني اعلمكك اني اضحكون عليه
رحمه.....طلع ابراهيم كبل الخالي يهدده
مايصير يخسر هيج مبلغ بسهوله على الاقل ياخذ العروس
شلون خلدون يضحك علي
دك الباب طلع خالي علي
خالي...نعم تفضل
ابراهيم...اني ابراهيم خلدون اتفق وياي ياخذ ٣٠ مليون
ويزوجني رحمه اني هسه اريد لو الفلوس لو رحمه
خالي...اني متفق وياك جنت حاضر لااتفاقيه
كتلك انطي فلوسك الخلدون
خطبت رحمه مني كلهن لا اني شنو علاقتي بهذا الموضوع اخذ حقك مم خلدون
وممنوع تقرب على رحمه وامها فهمت لو لا
ابراهيم...هيج صار الحجي
خالي...اني ما كتلك انطي فلوسك الخلدون
رحمه......من بعدها ااجا ابو يحيى وكام يعيط علينا بلشارع
ابو يحيى....انتم عصابه متفقين علينا ضحكتو علينا حتى تاخذون فلوسنا
بتكم تمشي وتضحك اليحيى لمن جرت رجله
انتن شريكات بهذا النصب سحبتنا للبيت تعالو نتفق على الخطبه ووكعتنا
هسه تخلقن الفلوس اريد فلوسي منجن
لو ادلنا على مكان خلدون مو معقوله زوجته ما تعرف مكانه انتي شريكته ااكيد تعرفين وين خاتل
امي...عيب عليك هذا الحجي وبتي ما ضحكت على ابنكم
انتم اجيتو تخطبون اذا انتم مضررين مره اني مضرره ااكثر منكم خسرنا سمعتنا بين الناس
روح شوف خلدون ووين وأخذ حقك منه
جمانه السعيدي
رحمه...الشارع طلع كله يتفرج علينا
انفضحنا فضيحه ما تتسولف نسوان ثنيين
وكل ساعه جاي واحد هاد علينا واحنا لا حول ولا قوه
سدينا البيت ورحنا بيت خالي
امي...شلون بينا صرنا سالفه بحلوك الناس
خالي...اني برائي ننتقل الغير محافظه ونخلص
لان خلدون مصايبه ما تنتهي
نغير مكانه وما ننطي العنوان الاي احد
احنا بعد مستحيل نكدر نعيش هنا حتى الناس بعد محد يتعامل ويانا بسبب الي صار
خوله...اني موافقه بس اريد اسوي شي مهم قبل لا اغير
اولايتي مااريد اي شي يربطني بخلدون بعد
راحت امي للمحكمه وخلعت بابا اطلكت وتنازلت عن كل حقوقها بس تخلص
إجراءات الطلاك كانت سهله لان امي قدمت للحكمه
ادله تثبت النصب والاحتيال الي عايش عليهن بابا
وستشهدت بلقضيا المرفوعه ضده
تم الطلاك بسرعه وسهوله
خالي عرض البيت للبيع اقصد بيتهم
وامي باعت كل غراض بيتنا بنص قيمه
كدرنا نشتري بفلوس البيت مشتمل زغير طابقين
بمركز المحافظه بس نريد نبعد عن المشاكل ونخلص
مااانطينا عنوانا الاي احد
حتى أقارب امي مايعرفون بيتنا الجديد وين
كل هذا الوقت وبابا مختفي وماكو اي خبر عنه
بهاي الفتره طلعت النتيجه طلعت ناحجه
بس ماكدرت افرح من كد المصايب الي مرت علينا بفتره الاخيره
جمانه السعيدي
انقبلت جامعه بمركز المحافظه
دوام مسائي
خطيه خالي عاف ولايته واصدقائه وتغرب بس حتى يحمينا من كلام الناس
بس الحمد لله الناس الي يشتغل عدهم تمسكو بي
هلكد ماامين وحريص على حلالهم
وضعنا المادي تعبان حيل امي فقدت شغلها تحتاج وقت حتى ترجع تشتغل مثل قبل
بدت تفتر على الصالونات وتعرض عليهم تحف للنسوان
بصعوبه يله لكت صالون يقبل يشغلها
مره جبيره وموحلوه ولا لبس على الموديل
محد يقبل يشغلها بس رب العالمين ابد ما ينسانا
اشتغلت بنص تعبها يعني الحفافه تاخذ نص وأم الصالون تاخذ نص الوارد المادي كلش قليل بس احسن من الماكووو
خالي عنده اخبار منطقتنا القديمه يكول الشرطه كل يوم اداهم بيت جدي يدورون على بابا
ويا فضيحتهم كدام الناس سمعتهم صارت بلارض
على فكره عماتي رغم جمالهم وكلهن موضفات
وشريفات ومحترمات بس محد اتقدملهن الحد هاي اللحظه بسبب ابوي وسمعته الي أثرت عليهن
ماكدرت اشتري ملابس حلوه علمود الدوام وضعنا شويه صعب بعد ماانتقلنا هنا
اداوم برداء اسود وحجاب اسود كل يوم نفس الملابس
اني ابد ما معترضه المثل يكول الجود من الموجود
اول يوم دوام اليه كنت مااعرف اي احد ولا اعرف حتى القاعه الي راح اداوم بيها
استحي اسئل خاف أبين ثوله امشي واباوع
الحد ما وصلت للقاعه الطلاب والطالبات كلهم داخلين
والأستاذ دخل قبلي
الاستاذ ولد شاب ايجوز عمره ٢٧ او ٢٨
طالع الاول على دفعته ومتعين استاذ بلجامعه
وكفت بلباب التفت عليه بقا يباوع بوجهي
صرت حمره من الاحراج مااعرف شكووول
استاذ رضا....تفضلي
رحمه... ردت ادخل تقدمت خطوتين
استاذ رضا....ليش متأخره
رحمه......ليوم اول يوم وكنت ادور على القاعه
استاذ رضا...تفضلي ادخلي
من كد الاحراج مااعرف وين اكعد صرت ثوله من صدك
وااكفه واباوع للوجه
ابنيه ااشرتلي تعالي هنا
اجيت اعثر مااعرف شصار بيه
استاذ رضا....الله الله انتبهي
رحمه...اتمني الكاع تنفتح وتبلعني هلكد ما انحرجت
شبيه حتى مشي مااعرف امشي
استاذ.رضا...انت تعبانه مريضه
رحمه...ماكدرت ارد علي احس نفسي اذا احجي اخرب الدنيا كعدت وسكت بس مبين عليه الاحراج
ووجهي صار حار وايدي ترجف صرت طماطه
من خلصت المحاضره الكل طلع اني بقيت كاعده بمكاني وواكو كم وحده يسولفن
شويه ورجع الاستاذ نسا نضارته باوع اني كاعده بنفس مكاني وواكو ثنبين واكفات يسولفن
تقدم عليه
استاذ.رضا...محتاجه مساعده انتي تعبانه
رحمه...لا لان اول يوم أوضاعي مخربطه
استاذ رضا....تمام اذا تعبانه تكدرين اطلعين
رحمه...لا بس راح ابقى هنا لان احس نفسي مرتبكه شويه
يمكن لان ما متعوده على هيج اجواء
جمانه السعيدي
عافني وطلع بقيت طول النهار كاعده بلقاعه ما طلعت ابد
الحد ما خلصت ااخر محاضره
طلعت ويا البنات حسيت القلق والتوتر خف من عندي شويه
طلعت برا لازم اعبر الشارع وانتضر الخط
من عبرت استاذ رضا حرك سيارته
طلع راسه من الجامعه ااوصلج
رحمه...رفعت ايدي شكرا استاذ
صعدت بلخط اجا واحد كعد بصفي طبعا هواي أماكن فارغه بس هو مبين حقير
خله ايده بيني وبينه حتى لايمس جسمي
نزلت جنطتي وخليته بيني وبينه
من نزلت نزل وياي امشي ويمشي وراي هاي شلون مصيبه
....وووين بيتكم مارديت علي
....شكد حلوه الخاطر الله...مارديت علي
...الرقم اريد الرقم .....ماكدرت اسكت الي يسكت
الناس تتوقع راضي التفت علي
رحمه...ليش ما تستحي طبعا أصيح بصوت عالي
حتى احرجه
...شبيج
رحمه....لا اخلاق ولا غيره ما تستحي وولي منا الانزع الي برجلي وواحد بلاااخلاق
الناس تباوع علينا
...انتي منو يمج منو محاجيج
رحمه...اذا تمشي وراي انزع الي برجلي وعلى راسك
صعدت على الرصيف وكمت امشي ويا الناس من شاف ماكو مني امل عافني ومشا
شلون بلوه ياربي شلون راح تخلص
ثاني يوم غصبا ما عليه هم وصلت متاخره طبعا مااسولفلكم نضرات الناس عليه ولله اخاف امشي بلشارع
رغم اني لبسي بسيط ومحتشم ولا مكياج ولا عطور فاخره بس هلبياض البلوه والعيون الزرك
وصلت محاضرة استاذ رضا هو دخل واني ورا
التفت شافني كلشي ما حجه كال تفضلي
من بعدها حسيت استاذ رضا مهتم الوجودي دائما يسئلني
عن احوالي ويدقق وياا اجاباتي من اطلع من الجامعه
اشوفه يكول اوصلج بس اني أرفض رغم من اصعد للخط
ابقى لازمه كلبي بايدي من الشخصيات العجيبه الي تصعد وياي بس اني وين اكو مره اكعد بصفها حتى لا يكعد واحد
ويتحرش بيه
بعد امتحانات نص السنه اتفاجئت استاذ رضا يكول اريد احجي وياج
رحمه..اتفضل استاذ
استاذ رضا....اني اريد اتقدملج هيج احجي بدون مقدمات
اذا دزيت اهلي توافقين
رحمه..تفاجئت مفاجئه خلتني مااعرف افكر زين
استاذ رضا....ليش سكتي انتي مرتبطه
رحمه...لا بس انطي خبر الاهلي
طلع كارت من جيبه وكال هذا رقمي انتضر اتصالج
بقيت واكفه بمكاني ااكول هذا الشي حقيقه لو خيال
اباوع للكارت بايدي لا حقيقه
رجعت للبيت امشي واحجي ويا نفسي معقوله اني ازوج
استاذ رضا هذا مو بس رضا هذا الرضا كله هههه
ووصلت للبيت لكيت ااكو خبر احلى من خبر خطبتي
الشرطه لزمو بابا لزمو بنفس محافضتنا ساكن
بس متخفي
رحمه...اي خلي يلزمو ياخذ جزائه واني عندي خبر حلو
اني انخطبت الاستاذ بلجامعه
من حجيت الامي وخالي ماكان عدهم مانع بس خالي كال نسئل عنه قبل ابوج خله بكلبي خوفه
ابن ناس وحلو وطلع نصاب
الحمد لله سمعته ذهب الناس كلها تحمد بي حتى جكاير ما يشرب
اجا تعرف علينا واحنا تعرفنا على عائلته إخوانه وأخواته كلهم مزوحين وطالعين باقي بس هو وأمه بلبيت
امه واخته من شافني تخبلن شنو هاي لعابه مو بنيه طبعا هو ما سئل عن ابوي ابد
بس اني كتله امي منفصله عن ابوي من زمان وماعدنا اخبار عن ابوي لان مقاطعنا من زمان وولي أمري خالي عقدنا عقد شيخ ومحكمه
شكد مااحجيلكم عنه قليل راقي ومثقف بشكل مو معقول
وحنين وطيب وكريم
جمانه السعيدي
قبل لا تنتهي السنه الدراسيه كنا مزوجين
يعاملني أرقى معامله وأمه كل اليجي اطلعني تكول شوفو جنتي جنها لعابه اي واحد من اقاربهم يكول راح اخطب
تكول ما تلكون مثل رحمه رضا يعرف يختار
انحكم بابا ٢٠ سنه قضايا نصب واحتيال
هو عمره تقريبا ٥٣ ونحكم عشرين يطلع عمره فوك السبعين اذا بقى عايش
من بعدها اجت كورونا وطلعت حامل
جبت ولد يخبل يشبه ابو بسنة ٢٣ جبت بنيه تشبه ببيتها نسخه منها ام ابوها
بلنسبه الامي بطلت شغل لان تعبت بعد ما تكدر
مخلصاتها زياره هيه وخالتي
وخالي لحد الان مامزوج بس صحته مو تمام تعب والعمر اله حوبه
الحمد لله الي قسملي حياة حلوه بعد كل ذاك التعب
والقهر والذله
الحمد لله الي وفقني ورزقني برجال طيب وكريمه وسمعته
ذهب خلصت ايام القلق والخوف من طلع بابا من حياتنا
انتهت قصتنا شكرا لكم ودمتم سالمين
