رواية ظلم ابي الفصل الرابع 4 بقلم جمانة السعيدي
ساره....كلهم كشخو ولبسو ملابس جديده وراحو البيت مصطفى العرس بيت مصطفى
بقيت وحدي بلبيت
اباوع على الحياطين
شكد مقهور وشكد دعيت عليهم
المفروض هذا عرس اخوي الوحيد
لازم ااكون اكثر وحده فرحانه بهذا العرس
من كد القهر حتى مصطفى كمت ادعي علي
كون ما يتهنى بعرسه
غير اني اخته الجبيره
واني الي صار اسبوعين ارتب وافرش واعدل وانظف
ليش مااخذني بعرسه
لو التعب عليه والفرح الغيري
الله كريم لازم يجي يوم ويتغير هذا الوضع
رجعو بليل متاخر
اني كاعده بس سويت نفسي نايمه
اسمع ابوي ونور يسولفون على العرس والزفه
وشلون الأجواء جانت حلوه
على فكره حتى من خطبو عروس مصطفى مااخذوني وياهم
عبالك يتفشلون مني
يمكن اني مااشرفهم
ااكيد اني الخدامه بهذا البيت والخدامه ما تحضر مناسبات
اسيادها
ثاني يوم بليل راحت نور وابوي يشوفون العرسان
وحتى ما كالو تعالي ويانه
لا تبقين وحدج بلبيت
اني بطلت اطلب اطلع وياهم
إلى متى راح ااكول واني ليش جاي تجاهلوني
اسكت احسن
حتى بطلت اضوج على هيج شغلات
يمكن تعودت على القسوه والتجاهل
بيوم السبعه اهل العروس عزمو ابوي
من اجا من الدوام
صاح على نور
نور...هااا بابا
ابوي...حضري نفسج اهل العروس عزمونا للعشى
نور.. اي بابا تمام
اني كاعده كباله اصب جاي مافكر يكول تعالي ويانا ليش تبقين بلبيت وحدج
سكتت ماحجيت اي شي
من بعدها بكم يوم اجا مصطفى وعروسه يتعشون عدنا
البنيه تباوع عليه بتكبر
الله اعلم مصطفى شحجاله عني
ما تحجي وياي ولا كلمه ولا حرف تحجي بس ويا نور
ولا كالت اساعدج بلطبخ ولا حتى شالت وياي مواعين الاكل
جمانه السعيدي
مصطفى..كملتي يلله تعالي عوفي كلشي بمكانه
ساره تشيل وتنظف
خدرت الجاي وانطيته النور
واني اخذت المواعين غسلتهن
من كملت رحت الغرفتي
ليش اكعد يمهم وهما جاي يجاهلون وجودي
اروح اكعد وحدي احسن
جمانه السعيدي
هذا الموقف تكرر هواي كلما يجون عدنا بلبيت
زوجة مصطفى تتجاهلني وما تكعد وياي تحجي بس ويا نور وما تشيل اي شي
اذا مدت ايدها مصطفى ما يقبل يكوول عوفي كلشي
ساره تكمل مالج شغل ااكعدي واسكتي
يعني هاي البنيه غريبه ليش تعلمونها تتجاهلني وتحتقرني
انتم كافي عليه ليش ازودون واحد يعاملني مثل معاملتكم
المهم دخلت نور معهد
ابوي جهزها للمعهد احلى ملابس وجنط واحذيه
وتأخذ منه مصرف يومي
تشتري مكياج وعطور
اي طلب تطلبه يتنفذ الوغيره المدلله
من ترجع من الدوام تشمر ملابسها عليه حتى الملابس الداخليه
اغسلهن واحضرهن الها للدوام
هنا وملابس ابوي
بعمرها ما كعدت وياي ولا حجت عن يومها وتفاصيل الدوام
من ترجع تتغدا وتنام
ومن تكعد تلزم تليفونها وتبقى تحجي ويا صديقاتها
الحد مايوم تمددت اريد انام
ماكدرت انام افكر اني شنو نهاية حياتي قبل اخواني جانو زغار وتحملت علمودهم بس هسه كبرو وكلمن شاف طريقه
إلى متى راح ابقى مهمشه بهذا البيت
كبرت اني مو زغيره شلون يمتى راح استقر
احلم ازوج ويصير عندي اطفال اتخيل ابدللهم واغسللهم
واشتريلهم ملابس حلوه
وبيني وبين نفسي ااكول اله ادللهم دلال ماصاير
ابد مراح اعاملهم بقسوه
ماانام اذاا مااخليهم بحضني واللعب وياهم
يمكن اذا اسمع كلمة ماما اموت من الفرح
راح يعوضوني عن سنيين الحرمان والوحده الي عشتهن بيت اهلي اتخيل حياة شلون راح تكون اذا صارت عندي عائله
ساره...نور متوقعه اني نايمه
رن تليفونها سمعتها تكول ااي حبيبي دقيقه
اطلع برا واحجي وياك
جمانه السعيدي
فتحت باب الغرفه وطلعت
نور تحب ااكيد تحب ليش لا بنيه ومن حقها تختار الانسان الي تحبه
ليش اني ماعندي هذا الحق ليش ما مسموحلي اعيش مثلها
لا تكولون تقارنيين نفسج بيها
ليش مااقارن نفسي بيها احنا خوات النفس الام والاب
ليش هيه مدلله وتدرس وتلبس
وتحب وتنحب
واني ممنوع عليه كل هاي الاشياء
اختي من دمي ولحمي ليش تعيش حياة حلوه واني لا
ليش شايفه نفسها عليه ووتتكبر
ليش ما تعاملني كااني اختها الجبيره ليش تحتقرني
تعاملني وكانما خدامتها مو اختها
اعرف السبب الرئيسي ابوي هو الي خلق هاي الفتنه
بينا وميزها عليه
ياربي شكد ادعي علي وشكد اكرها
كلشي مايصير بي
المهم نور استمرت علاقتها بهذا الولد
كل ليله يبقون يحجون هو وياها للصبح
بحيث كوه تكعد تروح للدوام
الحد ما خلصت معهد واجت بكل جرئه تحجي ويا ابوي
نور ...يابه اريد احجي وياك بموضوع مهم
ابوي....ااي كولي
نور...ااكو ولد محترم وابن ناس يدرس وياي
أتخرجنا السنه ثنيينه سوه
ويريد يتقدملي لا تأخذ الموضوع بغير فكره
مابينا اي شي اني مااقبل على سوالف الحب وهاي الخرابيط
وهو لان شافني محارمه وبت ناس يريد يتقدملي
اني كتله لو تجي تطلب ايدي لو كلشي مراح يصير بينا
اذا تحب يريد يجي يتعرف عليك هو وابو
ساره...رفعت راسي مستغربه من كذب نور الي صار سنتين
بينها وبين هذا الشخص علاقه
وهسه تكول اني مااعترف بلحب كتله تعال اتقدملي
جنت منتظره رد ابوي عليها اريد اشوف شراح يكووول
الطبيعي من أب قاسي مثله يكووول شلون تعرفتي علي
وشلون طلب ايدج وشكد صار تحجون
ووين عرفتي اهله خوش ناس
انتي جاي تخونين الثقه اني ما كتلج روحي دوري عريس
كتلج روحي ادرسي
جمانه السعيدي
ساره......بقيت منتظره اشوف رده شنو
ابوي....اي عادي خل يجي اتعرف علي واشوف منو ابو
اهله بيت منو وإنشاء الله يصير خير
ساره... ماكدرت اسكت بعد مااتحمل ااكثر
شوو وافقت بسرعه تريد نور تزوج
واني ليش ماعندي حق مثلها اختار شريك حياتي
هيه تدرس وتطلع وتلبس واني كلهن ذني ممنوعات عليه
تزوج نور عادي واني ممنوع عليه الزواج مثل البنات
دنك ابوي شال دولكة الماي وشمرها عليه
رفعت ايدي صديتها تبللن ملابسي
نور.. انتي شكد حاقده ليش تقارنيين نفسج بيه
المفروض تفرحيلي اني اختج الزغيره
ساره...عساكم لا تهنيتو ولا فرحتو ولا شفتو السعاده
عساكم باايام سوده مثل الايام الي عشتها وياكم
ابوي.. انجبي لا اجي اكسر راسج انت ووين ونور وين
انتي منو بحالج
ساره...ليش نور بيش احسن مني
لو عايفني اكمل دراسه لو مهتم بيه مثلها جان هسه اني متخرجه ومزوجه
لو الزواج حق المصطفي ونور وبس واني عليه حرام
حسبي الله ونعم الوكيل عليكم
دمرتو حياتي الله يدمر حياتكم
كام ابوي من مكانه بعصبيه وضربني راشد قوي
نور...حيل حيل كسر راسها تكسر هاي الحاقده الانانيه
ابوي... ولي لا بارك الله بيج كبالي وتدعين عليه
ساره...لزمت وجهي صار خدي حار بسبب الضربه
حتى اذني توجعني
عفتهم ورحت الغرفتي ابجي
من هذا اليوم بطلت احجي وياهم ثنيبنهم
اجت ام الولد تشوف نور ما طلعت عليها ولا قدمتلها شي
خليت نور محتاره وحدها تركض منا وترجع منا
الأخت الي ماتحترمني بعد مااباوع بوجها
اجا يوم المهر تعاملت ويا هذا اليوم كأنما يوم عادي التنظيف الروتيني وطبخت مركه وتمن
لا نظفت ااكثر ولا اهتميت
المفروض هيه تجي اصالحني اجيبلي فستان اكشخ بي كدام عيالها
طبعا هيه تتعامل وياي على اني حاسدتها
ومااتمنالها الخير
جمانه السعيدي
ماطلعت بيوم المهر نور اتصلت على بنات عمي اجن رتبت البيت وياها
اسمعها تسولف عليهن
تكووول مو اخت عدوه اليه تكول شلون نور تنخطب
واني الا
تكرهني ما تحبلي الخير
ااي اكرها واكره ابوي واخوي اكرهم ومااحبلهم الخير
مثل مااهمه مايحبون يشوفوني سعيده
جمانه السعيدي
كانت حفلة المهر بسيطه اني ما طلعت ابد
ولا شفتهم ولا شافوني
الحد ما خلصت الحفله يله طلعت من الغرفه
سويت عشى بسيط تعشيت قبلهم وعفت عشاهم على الطباخ ودخلت غرفتي
بدت نور اجهز العرسها كل يوم يجي خطيبها تطلع ويااا
يشترون شغلات العرس
خلال شهر ونص عرست نور
البيت صار فارغ احس الحياطين راح تاكلني
رغم هيه مجانت اتشاركني تفاصيل يومها ولا تحجي وياي هواي
بس احس اكو بشر وياي بلبيت اكو نفس بلبيت
لا باركتلها ولا رحت وياها للعرس
مادام هيه تكول عليه خاسدتها وحاقده عليها
هاي مو اختي اختي الي تحب مصلحتي
مو تفضل مصلحتها عليه
عشت كل عمري خدامه الها تالي تحجي عليه
احس نفسي صرت عجوز
كبرت سنيين على عمري
بطل مصطفى يجي البيتنا حتى نور بس بلبدايه تجي
بعدين بطلت توصل للبيت
ابوي كل يوم يتصل عليهم ويطلب منهم يجون
بس الأعذار الي تطلع منهم كل يوم ازيد ااكثر على اليوم الي قبله ما يجون البيتنا ولا يوصلون
بقا ابوي وحيد بلبيت اني صح خادمته
بس مااحجي وياا ابد يطلب شغله اروح اجيبها
واني ساكته
الي شفته منه كافي وزايد عليه
تمر الأيام صعبه وطويله عليه
زوجت مصطفى حبلت وجابت ولد بعدين بنيه
ونور حبلت وجابت بنيه
كل وواحد بيهم صار عنده بيت وعائلته مستقله
واني الي ابوي رفض ازوج علمودهم
بقيت وحيده لا أحد يسئل عني ولا احد يذكرني
مايجون البيتنا ابوي يروح يشوفهم ويرجع
كل الوقت احجي ويا نفسي
شسوي ماكو احد احجي وياااا
الوحده تكتل أصعب شعور بلدنيا شعور الوحده
رب العالمين من حلق حواء الادم
لان يعرف الانسان مستحيل يتحمل يعيش وحده بهاي الدنيا
لازم ااكو اله ونس بهاي الحياة
الحد ما وصلت العمر ٣٨ سنه شكلي عبالك عجوز
لا اهتمام ولا ترتيب شعري ابيض من الشيب
بعد كل هذا العمر اجا واحد يخطبني
تفاجئت ابوي يكووول اجا عليج واحد يريد عروس
بقيت اباوع بوجها بعد هذا العمر عريس
برائيكم منو هذا العريس
وليش بعد هذا العمر كله انخطبت
الخامس من هنا
