رواية مش حب عادي الفصل الرابع والعشرين 24 بقلم ملك ابراهيم
أنس بص للدكتور بصدمة وبص لـ رحيم لقاه بيضحك ..
رد أنس بقلق: حاجة زي ايه يا دكتور؟
رحيم اتكلم وهو بيضحك: لبن مثلا! من اللي انت بتشربه قبل ما تنام؟!
أنس بص للدكتور وهو مصدوم ومش عارف يرد..
الدكتور فهم وضحك وقاله: المهم اي حاجة كنت بتشربها من الحاجات دي لازم تتوقف.. معدتك مش هتستحمل اي حاجة.
دخلت حبيبة في اللحظة دي واتكلمت بهدوء: السلام عليكم..
الدكتور اول لما شاف حبيبة ابتسم بسعادة وقال بحماس ظهر في نبرة صوته وهو بيقرب منها: حبيبة!!.. مش معقول.
حبيبة ابتسمت للدكتور بمجاملة وردت بتوتر بعد ما لاحظت نظرات رحيم لها: ازي حضرتك يا دكتور.
رد الدكتور بحماس: انا الحمد لله كويس وانتي عامله ايه؟ اختفيتي فجأة ومبقتيش تيجي المستشفى!؟
قربت من رحيم ووقفت جنبه وهي بترد بتوتر: انا سبت الشغل في المستشفى بقالي فترة.
الدكتور بفضول واهتمام: ليه كده؟
رحيم كان بيضغط على فكه بضيق.. رد عليه بعصبيه: عشان اتجوزت..
ومسك ايد حبيبة وهو بيبص للدكتور بغضب وقال: هو أنس المفروض يخرج امتى؟
الدكتور بص لـ ايد رحيم وحبيبة وفهم ان هو جوزها.. رد بتوتر: اول لما نتيجة التحاليل تظهر.. يعني بعد ساعتين بالكتير.. نطمن عليه وهكتب له إذن خروج.
وعدل الدكتور نضارته النظر بتوتر وقال: عن اذنكم.
خرج من غرفة أنس..
ورحيم بص لـ حبيبة بغيظ..
حبيبة هزت كتفها بارتباك وبصت لـ أنس وقالت: حمدلله على السلامة يا أنس.. عامل ايه النهاردة؟
رد رحيم عليها: انا هقولك أنس عامل ايه النهاردة.
وبص لـ أنس وقاله: انا هسيبك ساعتين هروح مشوار وارجع اخدك ارجعك على البيت.
أنس هز راسه من غير ما يتكلم..
رحيم بص لـ حبيبة وقالها: تعالي انتي بقى معايا عشان انا جبت اخري من المستشفى دي.
وخدها وخرجوا من غرفة أنس.
أنس ضحك وهمس: صحيح الحب عذاب..
وبص في تليفونه على اسم ميادة المتسجل عنده "زفتتي
"
" رواية مش حب عادي بقلمي ملك إبراهيم.
عند رحيم وحبيبة.
بعد ما ركبوا العربية ورحيم أتحرك بيها.
حبيبة بصت له بدهشة وسألته: في ايه يا رحيم؟ هو انت معقول اضايقت عشان الدكتور كلمني قدامك؟
رد وهو بيبص قدامه: وانا هضايق ليه؟.. عادي يعني اني ابقى واقف وشايف واحد عيونه لمعت اول لما شاف مراتي دخلت.. أصل اللي بيجري في عروقي ده مايه ساقعه مش دم.. لازم اكون فرحان ومبسوط صح؟
حبيبة كانت هتضحك بس كتمت ضحكتها وقالت: بس أكيد انت مش هتمنعني اكلم الناس! انت عارف كويس ان طبيعة دراستي وشغلي اني لازم هتعامل مع دكاترة ومرضى.. زي ما انت بالظبط طبيعة شغلك انك تتعامل مع محاميات وستات عندهم قضايا.
رحيم بص قدامه على الطريق ومردش.. هو عارف ان هي معاها حق.. بس هو مش قادر يستحمل انه يشوف واحد بيبص لها او بيتكلم معاها وهو يقف هادي.
حبيبة اتوترت من عدم رده عليها وقالت: وبعدين دكتور حاتم ده محترم جدا على فكرة.. وباباه دكتور في الجامعة وبيدرسلي.
رحيم بص لها وقال: لا هو لو اسمه حاتم يبقى مفيش قلق منه.. كده انا مليش حق اغير.
حبيبة بصت له بدهشة.. لقته بيكمل كلامه وقال: يعني بتنطقي اسمه قدامي وكمان بتشكري فيه وفي أخلاقه والمفروض اني اكون هادي وانا بسمع مراتي بتمدح في واحد قدامي.
حبيبة بصت له بصدمة وقالت: على فكرة انت فهمت كلامي غلط.
رد رحيم بأبتسامة: بالعكس.. انا فهمت كلامك صح.. وانتي معاكي حق.. فعلا طبيعة شغلي وشغلك اننا نتعامل مع كل الناس.. أكيد انا مش همنعك تتعاملي مع الدكاترة زمايلك والمرضى.. وانتي كمان مش هتمنعيني اتعامل مع المحاميات والستات في القضايا عندي.
اتكلمت حبيبة: بالظبط كده.. دا اللي بقصده.
رد رحيم وهو بيبص قدامه: وانا مقتنع بكلامك لأن معاكي حق.. بس مش هقدر اوعدك اني مش هغير عليكي لان دي حاجة مش بـ أيدي.
حبيبة بصت له بقلق.. بص في عيونها وكمل كلامه: انتي مراتي وانا بحبك وطبيعي اغير عليكي من الهوى اللي بيلمسك.. بس اللي اقدر اوعدك بيه..اني اكون اهدا شويه في رد فعلي وغضبي.
حبيبة ابتسمت وقالت بسعادة: وانا اوعدك اني عمري ما هضايقك.. وعمري ما هسمح لحد يتخطى حدوده معايا لدرجة تثير غيرتك عليا.
رحيم ابتسم وقال: كده اتفقنا.
حبيبة بصت له بحب واتنهدت من قلبها.. كل يوم وكل لحظة حبه بيكبر جواها اكتر.
بعد دقايق قليله وصلوا قدام مبني النيابة.
حبيبة بصت لـ رحيم وسألته بدهشة: احنا جايين هنا ليه؟
رد وهو بيضحك: انتي متجوزة محامي يعني عادي اجي هنا!
اتكلمت بتوتر: عندك قضية يعني هنا ؟
رد وهو بيفتح باب العربية: اه وانتي هتنزلي معايا عشان في حد تعرفيه جوه.
اتكلمت بدهشة: بس انا معرفش حد هنا!
ابتسم لها وهو بيمد ايديه وقالها: تعالي بس معايا.
نزلت من العربية ومسكت في ايديه ودخلت معاه.
كانت ماشية جنبه متوتره لحد ما وقفت فجأة وشهقت بصدمة وقالت: مش معقول!!!
وبصت لـ رحيم وقالت بدهشة: مش اللي قاعده هناك دي جنب ذكريا.. تبقى سميحة المحاميه؟ ؟
رد وهو بيضحك: المرحومة سميحة.
مسكت أيديه بصدمة وخوف وقالت بدهشة: ازاي؟؟ والصور اللي سيف ادهالي وهي مقتـ،ـولة في شقتها؟
اتكلم وهو بياخد ايديها ويقربوا منهم: هتفهمي كل حاجة دلوقتي.
حبيبة اتحركت معاه وهي خايفه ومش فاهمه إيه اللي بيحصل.
اول لما قربوا من ذكريا وسميحة..
سميحة وقفت وهي بتبكي وكان وشها دبلان وباين عليها البهدلة.. بصت لـ رحيم وقالتله: ارجوك خرجني من هنا يا استاذ يا رحيم.. انا اسفه على كل اللي عملته.
وبصت لـ حبيبة وقالتلها: انا اسفه يا دكتورة.. كل اللي حصل ده كان من ترتيب سيف المنصوري.. انا نفذت كل اللي قالي عليه.. وكل الكلام اللي قولتهولك عن أستاذ رحيم مكنش حقيقي.
حبيبة همست بصدمة: سيف اللي عمل كل ده!!
رحيم طلع صورة من بتوع سيف اللي فيهم سميحة مقتـ،ـولة.. وسأل سميحة: ايه حكاية الصور دي؟ انا اتاكدت انها حقيقيه مش مفبركة.
ردت سميحة ببكاء: دي كانت خطة بديلة لـ سيف المنصوري.. كل ده كان مكياچ مش حقيقي وطلب مني اتصور بالوضعيات دي كأني مقتـ،ـولة وكان ناوي لو خطته الأولى فشلت.. تكون دي خطته البديلة ويتهمك بقتـ،ـلي بعد ما انا اختفي.
حبيبة اتكلمت بذهول: وليه كل ده!؟ انا عارفه انه مجنون بس مش للدرجادي!
اتكلمت سميحة معاها برجاء: انا اسفه يا دكتورة..
وبصت لـ رحيم وقالتله: ارجوك خرجني يا أستاذ رحيم.. انا عارفة ان حضرتك الوحيد إللي هتقدر تخرجني من هنا.. خرجني واوعدك مش هتشوفوا وشي تاني.. انا هسافر واسيب البلد كلها.
عسكري النيابة نده على اسم سميحة عشان تدخل للتحقيق.
رحيم بص لـ حبيبة وقالها: خليكي هنا مع ذكريا وانا هدخل احضر معاها التحقيق.
حبيبة كانت واقفه مصدومة.
رحيم شاور لـ ذكريا بعنيه عشان يخلي باله من حبيبة.
بعد ما دخلوا.. ذكريا قال لـ حبيبة: اتفضلي يا حبيبة اقعدي.. لانهم ممكن يتأخروا جوه.
حبيبة قعدت وهي بتتكلم بدهشة وذهول: انا مش مستوعبه ليه سيف يعمل كل ده! ؟ هيستفاد ايه من كل المؤامرات والخطط دي!
ذكريا مكنش يعرف ان رحيم مقلش لـ حبيبة اللي عمله في سيف إمبارح.. رد عليها ببساطه: هو مش هيقدر يقرب منكم تاني بعد اللي رحيم عمله فيه إمبارح.. دا خد علقه تنيمه في المستشفى شهرين تلاته.
حبيبة بصت له بدهشة وافتكرت وجود عمتها في المستشفى النهاردة عشان سيف.
سألت ذكريا بفضول: هو رحيم عمل ايه في سيف إمبارح؟؟
ذكريا اتصدم وقال: هو رحيم مقالكيش انه نزل بالليل وضرب سيف وكسر له دراعه ؟
حبيبة فتحت عنيها بصدمة وهزت راسها وقالت: لا مقاليش!
ذكريا غمض عنيه وهو بيخبط على دماغه بلوم في نفسه وقالها: طب حبيبة.. انا مقولتلكيش حاجة.. اكيد رحيم مش عايزك تعرفي.. ولو عرف اني قولتلك هيزعل مني.
اتكلمت حبيبة بفضول: متقلقش مش هقوله حاجه.. بس ممكن تحكيلي ايه اللي حصل بالظبط.
