رواية الحب المفاجيء الفصل السادس عشر 16 بقلم امل بكر
اتكلم وهو باصص علي الشارع ،
-هطلب ايد همس
اتعدلت في وقفني وابتسامتي وسعت،
-بتهزر بجد بجد يعني ؟؟!
-اكيد مش بهزر ياأبرار
-طب ده حلو اوي يلا انزل دلوقتي كلم عمك
ضحك،
-ده انتي طلعتي متحمسه عني ..بس مش عايز يحصل مشاكل
-ولي هيحصل مشاكل تقصد سُليمان ولا هيقدر يتكلم
-انا مضايق انه فاهم غلط لغيت دلوقتي عايز اوضح سوء الفهم الي حاطه في دماغه ده وبعدين اكلم عمك
-تمام وإن شاء الله يقدر ويفهم
-ياريت بدل ماخلاص تكه وهنعجن بعض
ضحكت وبصتله بترجي،
-يزونه هو انا ممكن افرح همس واقولها
-خليها مفأجاة
-والله حرام البنت حزينه خليها تفرح شويه
بصلي بطرف عنيه.
-حزينه مالها
-يعني يايزن انت طريقتك معها زي الزفت
-ماهو انا معرفش قولت الكلام ده ازاي بقي اهو طلعت كده
-لو سمحت لما تقعدو مع بعض قولها ان مكنش قصدك حاجه بالكلام الي قولتو اخر مره مفيش بنت تقبل بالكلام ده
ابتسم وهو بيرفعلي حاجبه ،
-انا الي اخوكي علفكره
-وهي كمان اختي ومش عايزه حد يزعلها فاهم
-طب حاضر ياستي ربنا يسهل بس
-صليت المغرب
-لا لسه
-هروح اتوضي ونصلي مع بعض
-ماشي
صليت ورا يزن خلصنا وموبايلي رن وطلعت همس
ابتسمت للشاشه ورفعت عيني لقيت يزن بيبصلي بتحذيز
-أبرار اياكي
رديت وانا داخله البلاكونه علشان ارد ،
-طيب حاضر والله
اتكلمنا عادي وكنت بصراحه هموت وافرحها بس يزن يموتني بعد ساعات دخلت نمت
"""""""""""""""""""""""""""
تاني يوم بعد لما يزن اجي من الشغل كنا قاعدين كلنا في الصاله ويزن اتكلم
-بابا انا عايز اخطب
ماما بابتسامة انشكاح،
-مين ياحبيبي ؟!
-همس بنت عمي
بابا،
-علي البركه نقعد نتكلم مع عمك ونشوف ياحبيبي
ماما ،
-هو حد يلاقي زي يزن ابني
اتكلمت ،
-ولا في حلاوته
سيف ،
-ولا في رجولته
يزن وبابا ضحكو علينا وبابا قال،
-الله واعلم الخير فين
بعد مايزن خلص الكلام قعد جمبه وميلت عليه وانا بقول بهمس ،
-كلمت سُليمان ولا اي ؟!!
-لا لسه هكلمه انهارده
-ان شاء الله تتصالحو
-ياريت علشان خلاص انا علي اخري منه
-اخدو عين ياحبايب امكم
-من عينك كل شويه كنتي تقولي هو كل شويه نازل مع سُليمان اهو ياختي ارتاحتي معدناش بنطيق بعض
شاوت علي نفسي بتكشيره ،
-انا !!!ماشي تشكر ياسي يزن
-غلبانه ياحبيبتي المهم قولتي حاجه لهمس
-لو فضلت غلز هقولها
بليل يزن شاف سُليمان وهو نازل علي السلم
-عايزك في موضوع
سُليمان بصله باستغراب ،
-خير عايز اي
يزن تجاهل طريقته وقال ،
-تعالي علي القهوة
-مفيش كلام بيني وبينك
بضيق واضح وسخريه ،
-لو سمحت يااستاذ سُليمان انا عايز اتكلم وياريت فعلاً تسمعني وبس وللاخر
<<<<<<<<<<<<<<<<<<<<<<<<<<<<<
||في القهوة||
يرن اتنهد واتكلم ،
-ياريت تسمعني للأخر متعملش زي اخر مره
سُليمان بصله ببرود ولكن يزن تجاهل لأجل انه يصالح صاحبه ويخطب الي قلبه حابها وحس انه فعلاً مش عايز غيرها
-انا لما كلمت اختك كان لهدف حمايتها مش الي في دماغك والسبب ان كان في واحد بيمشي وراها كذا مره وانا شوفتها صدفه وسألتها في حاجه حكتلي وكانت بتتكلم بخوف قولتها مقولتيش لحد من اخواتك قالتلي لاء وان بلاش علشان ميقعوش في مشكله وقتها الراجل مسكت الراجل عجنته وحذرته ان لو مشا وراها فاهيموت علي ايدي هو جري وهو تعبان من الضرب
سكت للحظه وبص علي ملامح سُليمان الي باصصله بثبات ومعناها كمل
-وانا مطمنتش واخد رقمها علشان لو مشا وراها تاني تكلمني علطول وانا كلمتها مرتين بالعدد واطمن ان معتش بيمشي وراها وقتها حسيت بالذنب نحيتك وان لازم اعرفك ان اخد رقمها وكملتها ووقتها كمان مسحت رقمها وبس كده انت بقي اخد اول كلمتين ومردتش تسمع للاخر وبصراحه وانا مكنتش ضايق طريقتك في الكلام معايا وكنت عايز اعجنك
سُليمان ابتسم بهدوء ورجع لملامحه الجديه،
-يعني انت شايف انك مش غلطان برده؟!!
يزن بعدم صبر منه ،
-انت بتتكلم جد ماقولتلك الحكايه ياعم ماشي يمكن انا غلط اني مقولتلكش من الاول بس انا وعدها وهي كانت خايفه لتأذي ولا تموت الراجل في ايدك علي الاقل انا مش شبهك بتفهم شويه لكن انت كان ممكن تموته
رفع حاجبه ،
-الله علي الاقناع
يزن سكت وسُليمان اتنحنح،
-طيب بالمناسبه عايز اقولك علي حاجه علشان بس لو عرفت ماتقولش اني عملت شبهك ولا حاجه
يزن بصله بانتباه ،
-عملت اي ؟!
- ان …..
"حكاله علي حوار أبرار والحمام وانه حبس الراجل "
يرن بغيظ ،
-وانت لي مجتش تقولي؟!! وأبرار لي مقالتش وقتها ؟!ازاي تخبي حاجه زي كده وروحتها للقسم !!!
-هي نفس الكلام خافت عليك علشان انت متهور
نهي كلامه بنفس طريقه يزن بسخريه
كمل كلام،
-وبعدين محصلش حاجه هي زي همس وانا مسبتش حقها
يزن كانت بيتنفس بغضب ان اخته عدت بالموقف ده لوحدها ومقالتلهوش وده ضايقه اكتر انه مكنش معاها
سُليمان اتكلم من تاني واتفهم ضيق يزن ،
-متفهمك بس هي فعلاً كانت خايفه عليك وبعدين المهم اني اخد بالي ولحقتها قول الحمدلله
-الحمدلله تشكر
بابتسامه وهو بيشرب بوق من الشاي ،
-وانا كمان تسلم انك عاملت همس زي اختك وسبحان الله اهو داين تدان الي بيعمل خير بيترد ليه
يزن اتعدل في قعدته وهو بيرد ،
-لا ماهو همس مش زي اختي انا جاي اكلمك علشان نتفاهم وتعرف انك فهمت من الاول غلط بس دلوقتي انا عايز اتقدم وافاتح عمي في الموضوع بس قولت نتصافي الاول
سُليمان تف المايه الي كان بيشربها وبصله وقال،
-انا كنت عارف يعني مفهمتش غلط اهو !
يزن بصله لثواني وقال وهو بيشاور علي زوره،
-لا بقولك اي اظبط بقي لانت جبت اخري وربنا وبص مش طايقك
رفع حاجبه وشاوره بايده.
-طب حلو اوي قوم امشي بقي
بثقه وعناد،
-لاماهو انا مش هقوم غير لما نتصالح وتقولي انك راضي علشان عارفك الي مش بتكون موافق عليه هتبوظلي الدنيا بس كده كده هفضل مصر علي رائي وهخطبها
سُليمان اتكلم وهو بيحاول ميضحكش.
-لما اسأل عليك الاول نبقي نشوف
يزن بابتسامه منشكحه ،
-ايوا بقي الله يبارك فيك ياسيدي
-بس انا مقولتش مبروك !!!!
يزن قام وقف ،
-مش لازم تقول قوم اقف بقي كده علشان احضنك
سُليمان وقف وهو بيهز راسه من هبل صاحبه الي وحشه حضنو بعض والاتنين كانو وحشين بعض بشكل
سُليمان ،
-وحشتني اوي ياعم رغم انك في وشي اربعه وعشرين ساعه بس كنت كل يوم محتاج اتكلم معاك
يزن بابتسامه ،
-طيب اي؟! يلا جيم بلاستيشن
-انت مبتزهقش من الخساره يابني !!
غمزله وهو بيقول ،
-لو الخساره مش صاحبي يبقي في داهيه اي حاجه
سُلميان بصله وهو بيعقد حواجبه ،
-انت بقيت ممحون كده امتي ؟!!!
-قولت يعني علشان هخطب فانتعلم بالمره
رفع حاجبه بتمثيل الدهشه ،
-اي ده !! انت هتخطب
يزن قالها بغيظ مكبوت ،
-سُليمان !!!!
-قولت هفكر بلاش زن
-ما هكلم ابوك بكره ده كده كده
-هو انا همنعك من عمك ماتتكلم ياسيدي
-بالظبط مش هتحاول تعمل حاجه انت موافق خلاص
- مستعجل اوي كده !!!
اتكلم يزن وهو بيقفل نص عينه بانتظار الوقت ده،
-جداً انت متعرفش كنت حاسس بايه لو كانت وافقت علي العريس
-طب اتلم اي كنت حاسس بايه دي !!! بقولك اي دي اختي
بسخريه ،
-امال لو كنت قولت بحبها وو
سُليمان قال وهو ماشي قدامه،
-انت مرفوض
يزن ضحك وهو بيقول ،
-انت قولت كلمه رجاله اي هترجع في كلامك
"""""""""""""""""""""""
كنت قاعده في الصاله علي اعصابي وياتري سُليمان تفهم واتصالحو ووافق ولا عمل اي
بصيت علي الباب الي بيتفتح وبيدخل منه يزن دخل اوضه وانا دخلت ورا بسرعه
اتكلمت بفضول وانا بقفل الباب ورايا ،
-هااا عملت اي ؟!! اتكلمتو
قعد علي السرير ورد بارتياح،
-اتصالحنا واتلكمنا وتفهمنا
رديت بانبساط وانا بقعد جمبه ،
-دي خبر هايل طب وعرفته انك هتتقدم
-قولته وبكره هكلم عمك.. انا مبسوط اوي
قربت عليه وانا الي بدخل في حضنه ،
-ياحبيبي ربنا يتمملك علي خير
سمعت ضحكته وهو بيضبط علي شعري .
-يارب بس مش المفروض تحضنيني مش تدخلي في حضني !!!
ضحكت وانا بطلع من حضنه ،
-ياسيدي مش مهم انت الراجل احتويني
كملت كلامي ،
-يزونه ينفع بقي اعرف همس مش قادره
-خليها مفأجاة وامسكي نفسك شويه
-طيب هحاول هروح ورايه مذاكره
قومت وكنت هخرج بس وقفت لما قال ،
-لي مقولتليش علي الراجل الي ضايقك
صوت ضربات قلبي عليت وغمض عيني و فهمت هنا ان سُليمان الي قاله لفيتله وقولت بتوتر،
-مكنتش عايزاك يحصلك مشكله
قام وقف قدامي وقال،
-لي معرفتنيش مش كنت وقفت جمبك
بصيت للارض بضيق،
-مكنش قصدي حاجه والله هو سُليمان حبسه وجابلي حقي
قال بنبره مضايقه ،
-قالي بس ولو كان لازم تعرفيني
-انا اسفه يايزن بس والله انا عارفه انك عصبي وخوفت عليك مش اكتر
-معتتش تحصل.. اي حاجه تعرفيني ماشي ؟!
هزيت راسي ،
-ماشي
بصتله وانا عاقده حواجبي ،
-مش زعلان؟!
نفخ بخنقه ،
-انا خوفت عليكي ومش عايز اي مخلوق يأذيكي بكلمه حتي
سكت اتكلم من تاني ،
-انتي كويسه مأذكيش يعني !!
-لا تمام مفيش حاجه
-طيب خلاص روحي اوضك بس بعد كده تعرفيني اي حاجه ومتخافيش ولا تفكري في عصبيتي ياختي
ضحكت بهدوء علي اخر كلامه ،
-طيب خلاص بقي روق
روحت اذاكر وتاني يوم يزن كلم عمه وقاله ميعرفش همس انه هو لغيت لما يقعدو
لقيت همس بتتصل عليا بصيت علي يزن الي لسه قاعد قدامي وبيحكيلي انه كلم عمو ولسه هيشوف يوم يقعدو
بصيت ليزن وهو رفع حاجبه وهو فاهمني ،
-اياكي سيبيها مفاجأة لوقتها
قومت ادخل البلاكونه وانا بقول ،
-طيب خلاص
-بيري الحقيني
-يلهوي يلهوي !
-بقولك الحقيني مش تصوتي معايا..
كملت بنبره ضيق
-بيري في عريس اتقدم !
-طب ده حلو اوي
-حلو اي وهباب اي انا رفض الاول يجي واحد تاني انا مش مرتاحه اصلاً من الاول اهو علشان خاطري تعالي اقنعي ماما فرحانه جداً وبتقولي خلاص هيحددو يوم !!
حاولت اكتم ضحكتي وانا ببص علي يزن الي متابعني بعينه وهو جوه الاوضه ،
-طب لي مش مرتاحه صدقيني خير
-لا انا هرفض مش عايزا
-استهدي بالله يابنتي خلينا نقعد بس وتشوفي
-نقعد!! وانتي اي الي هيجيبك!!
رفعت حواجبي بدهشه،
-مش بنت عمك اي قله الذوق دي ؟!
ضحكت بهدوء ،
-اه صح سوري يابيري اعصابي بايظه من وقت لما قالولي ومش فاهمه انا متوتره كده لي !!!
-ولا يهمك صدقيني هتوافقي وهترتاحي
بشك،
-وانتي واثقه اوي كده لي !!
بلاعبكه وانا بعدل الكلام ،
-بفترض يعني بلاش تفكري كتير بقي وريحي اعصابك
-طيب صدعتك معلش
-بلاش كلام خايب
قفلت معها ودخلت الاوضه يزن اتكلم ،
-هاا وافقت علي القعده ؟!
قعد قدامه وانا بحاول اكتم ضحكتي ،
-دي مش مرتاحه للي متقدم !
استغرب ،
-مش مرتاحه ازاي يعني ؟!
-مش مرتاحه افهمالك ازاي
بضيق ،
-ايوا يعني اي انتي كده بتطمنيني
-الله ماانت سألت وبجاوبك
قلب ملامحه للغيظً،
-كنتي تكذبي احسن ياشيخه
بمناكشه ،
-مبحبش الكذب انا
بغيظ مني ،
-أبرار ابعدي من وشي دلوقتي
رفعت حواجبي ،
-انت مرفوض ياحبيبي !!
عض علي شايفه بعصبيه مني وسأل،
-قولي مقالتش حاجه تاني
-ابداً هي رفضتك ومش عايزاك ومش حساك ومش مرتحالك وو انت بتبصلي كده لي !!!
قال وهو بيقرب و هيشيط من كلامي ،
-انتي لي بيتكلمي عليا هي متعرفش انه انا اصلاً
-ماهو ده احساسها ناحيه المتقدم الله وانا مالي!!
قال،
-متقدم !!! هو انا مقدم في برنامج!!
جريت بسرعه وانا شايفا متعصب وبيجري ورايا
اتكلم بغيظ ،
-اقفي عندك ياانسانه يابارده
قولت وانا بنهج وبقف ورا ماما الي لسه طالعه من المطبخ وماسكه كوبايه الشاي،
-اشتم كمان عايزه حسنات
ماما قالت ،
-ابعدي من ورايا الشاي هيتكب عليا
-طب خلي يبعد عني بيفضل يقرصني في دراعي ابنك الغتت
فتح الباب وهو بيشاولي بتوعد ،
-حسابك بعدين
ضحكت بسخريه ،
-هه ولا يفرقلي
كان هيرجعلي ،
-لا والله طب تعالي
صوتت بسرعه ،
-بهزر خلاص ياباباااا
ماما وهي بتبرقلي،
-ابوكي نايم
يزن نزل وانا اتنفست براحه اوف وقف قلبي الي اسمع اخويا
<<بعد اربع ايام ويزن حبيبي كان بيعاني علشان يوصل لليوم ده انهارده هيتقدم واخيراً نزلت لهمس من الصبح وانا مش قادره وعايزه اقولها ان يزن العريس بس هحاول امسك نفسي
||في اوضه همس||
همس بتوتر وهي بتقوم اقف ،
-لا لا الفستان مش حلو انا مش عايزه اتجوز اصلاً
نفخت وانا بحط ايدي علي وشي بنفاذ صبر منها ومن الجمله الي قالتها عشرين مره
-همس اقعدي بالله عليكي صدعتيني بالكلمتين دول !!!
كشرت ملامحها وهي بتترجاني ،
-بيري اعملي اي حاجه اطلعي قوليلهم همس تعبانه وانا هنام
-اي ده !! اكيد لاء وشكلك زي القمر ممكن بقي تقعدي خليني اعرف احطلك البلاشر
قعدت من تاني ،
-طب انا متوتره كده لي !!
ابتسمت وانا بقرب منها وبحطلها البلاشر ،
-مش يمكن حد كويس دي اشاره اكيد
بصتلي بطرف عنيها من قربي ليها ،
-هو انتي بتهزري ده وقته؟!!!
-طب والله بتكلم جد واهدي بقي وترتيني والله
خلصت لبس وانا كمان لبست وكنت متحمسه جداً اشوف رد فعل همس الي حاسه انها هتفرح
مرات عمو دخلت وغمزلتي من غير ماهمس تاخد بالها اصل كلنا اتفقنا منقولهاش
-يلا يابنات علشان العريس اجي بره
همس قامت وقفت بارتباك ،
-طب المفروض اعمل اي ؟!
-خدي نفس وانا وراكي اهدي بس
بلعت ريقها وهي بتتنفس ،
-طيب انا هديت اهو
طلعنا وانا كنت وراها يزن لابس قميص ابيض وبنطلون اسود اخويا يهبل والله همس سلمت علي بابا وماما مفكره انهم قاعدين عادي قربت مني وهي بتهمس باستغراب تحت كلامهم جميعاً الي ملهوش علاقه بقعدتنا
-بيري هو فين العريس واهله ده ؟!!
حاولت اكتم ضحكتي لغيت لما تتفاجئ بنفسها،
-ا احم مش عارفه
بابًا اتكلم اخيراً بابتسامه ،
-طيب ندخل في الموضوع يزن طالب ايد همس
همس رفعت راسها بصدمه ضحكت عليها وهي بترمش كذا مره وكأنها مش مستوعبه الي سمعته!
يزن كان متابعها بعيونه وهي في عالم تاني مش مصدقه ان دعوتها استجابت معقول الي بيحصل حقيقي !!
السابع عشر من هنا
