رواية في ذمة الغريب الفصل الثامن 8 بقلم الكاتبة كنوز

رواية في ذمة الغريب الفصل الثامن 8 بقلم الكاتبة كنوز

أمس بالليل طيفك مر بالعيون

وكعدت وياك ساعة وعاتبيتك

فجأة وراح طيفك فزت الروح

كلبت الليل كلة ومالگيتك

━━━━━━━━━ ━━━━━━━━━

:: شـ شـ شنو.. هاا مو..

ضاع الكلام وضاعت الحروف من حلگي صرت جني طفل يتعلم الحجي و يخربط بالكلام اريد ارتب جملة ماكو اريد افكر بجذبة عقلي علن استسلامه

:: شوفي انا زلمه ما احبن الجذب و اخوج من يوم اجه و وكف هنا

أشر ع باب الاستقبال وين وكف عروة يوم جابني وحجه وياه ،،،وكمل كلامه

:: وكالي السالفة نهوة عرفتها جذب و سايرته انتظرته ييي و يحجي صدك بس جنه صاحبي بعده ما يعرفني زين و مايعرف شنهي بت صارت بحمايتي و أمانة يمي يعني يعني لونج گاتلة ابوي غصبًا ما عليه احميج بروحي و دمي

:: هاا شوف هي.. ااا

بقيت امتت بالحجي وهو قاطعني برفض

:: اريدن الصدك اذا ناوية تسفطين عليَّه مثل اخوج كومي ولا تخافين مني ابد بيتج هذا صار وتبقين معززة مكرمة بيه

فركت ايد بالثانية صارت عيني ع الخاتم اللي لابسه بالخنصر ابيض كلش حلو يجذب النظر .. بعلت ريگي ورجعت لتفكيري سئلته

:: اگدر اثق بيك و احجيلك

:: لا

رفض واني بساع ابتعدت أكثر اخذ حذري و صوت الخوف يهمس بصدري حيسوي بيج مثل ما سوا بـ ابن عمه بساع دگ ناقوس الخطر براسي وهو كمل كلامه بهدوء ولا كأنه قبل شوية ذب قنبلة عليَّه

:: الثقة موش حاجة اجيبنها بعلاكة وانطيها الج من تشوفين مني موقف يستاهل الثقة ذيج الساعة خلي ثقتج بيه بس هسه احجي شنهي سالفتج خل افتهم

حجيت اله كلشي صار بذاك اليوم الاسود اللي جرد الالوان من حياتي وخلاني بالرمادي فقط همس لاحول ولا قوة الا بالله العلي العظيم وگال

:: يعني الحرمة وضعها تعبانة من البداية

:: اي و النبي محمد اول ما دخلت عليها جانت تنزف و تعبانه و لو عايفتها جا حتى الطفلة ماتت

:: هواي تحلفين تره مصدكج انا بلاية حلفان

:: هاا... لا هو كلامي هيج

هز راسه بتفهم صارت عينه بعيني بساع دنگ غاض البصر وأشر بيده بحركة سريعة عبالك دا يصرف جن

:: هاي هي روحي نامي بس هل سالفة لا تحجينها جدام احد خاصة اخوي قسيم

:: اخوك

سئلت مستغربة لان ما شفت اله اخ موجود كل ظني هو وحيد خواته

:: اي هسه بالشغل يوم.. يومين هيج و يجي ديربالج يزل لسانج جدامه الثقة عنده صفر لو يصح بيده يغسل الماي گبل لايشربه

:: بس انت موجود ما يگدر يسويلي شي

وياه كلامي رفع راسه وطال النظر هل مرة صافن ثواني وبعد نظرة ماسح ع وجه بضيق واضح

:: ماطول انا موجود فنه اليدنه صوبج كائنًا من كان

:: شكرا

:: الشكر لله

عفته و طبيت مرتاحة لان حجيت الحقيقة احس نص مشكلتي نحلت حمل ثگيل نزاح عن اكتافي خليت راسي ع مخدة احس لزمت طرف الخيط و حگدر ارتب حالتي

نمت مرتاحة و كعدت الصبح شبعانة نوم ظليت بفراشي احملق بالسگف و ابتسم ما حسيت اله وجهه عنبر بنص وجهي

عنبر :: شو تبتسمين لوحدج ولج جنج وحدة عاشگة

ضحكت و نهضت جذعي لميت شعري

:: هيج احسني مرتاحة جيف اهلي زينين

ضحكت و طلعت اسمع هوسة بره طلعت البنات ينظفن شايلات الزوالي و يمسحن

:: صباح الخير

براءة :: هلا صباح النور عفتلج ريوك ع كاونتر گيمر و الجاي حار گبل شوية سويته

هزيت راسي اي غسلت وجهي صبيت جاي و سويتلي لفة گيمر اكلت وكمت وياهن اساعدهن براءة عجنت كباب هواي مدري شكو وترفة اجت هم تساعدهن خطية كدمة داير مداير عينها صايرة بنفسجي

طلعت إصالة تخبز بره عاجنة مال جيش كامل كعدت يمها و حرارة التنور مدفية المكان

إصالة :: ذبي الحجاب اذا تردين الولد كلهم بره

رحمة :: لا فشله خاف يرجع

:: ما يطبون جفت لاتخافين

ذبت حطب بالتنور و شعلته گعدت تشنك تقربت عليها

:: تردين اساعدج

:: تعرفين؟؟

::اي مرات اخبز وياه رانيا مرت ابوية

مديت ايدي اساعدها عود،،،هي تشنگ بساع مدري شلون تسوي واني اتماطل ويا العجينة

:: صدك شلون صرتي اذا بعدج مريضى گولي لا تستحين حتى العصر ناخذج لدكتور

:: لا والله هسه احسن الحمد لله

:: شنو تخبزين كمية و تضمي مو ؟

:: لا هذا ثواب نريد نسوي مجلس

همهمت الها بتفهم تذكرت اليوم ذكرى استشهاد فاطمة الزهراء عليها السلام العجين هواي رادت تصيح ع وحدة من البنات تخبز وياها اني دكيت صدري الها اساعدها

بعدها أول خبزة و سمعت صوته ما دخل من بره صاح عمة لبسي عباتج وتعاي

إصالة :: جاي اخبز غفار شتريد

غفار :: خل البنات يكملن عنج وتعاي بساع

غسلت اديها من العجين واخذت عبايتها ابتسمت اللي وگالت قبل لا تطلع

إصالة :: طكطكي بيهن بين ما اجي واذا تخافين من التنور لا تخبزين لحد ما اجي

هزيت راسي الها واخذت راحتي أكثر شلهت رداناتي و

كمت اخبز شو هذا تنور الطين يختلف عن تنور الغاز عالي و يلهب أكثر بس ما تراجعت فشلة

دا اخبز واجت عنبر تركض اكيد جايبة اخبار اصلاً ما تركض هيج الا اكو خبر وكفت بنص البيت وصاحت فرحانة

عنبر :: ولج ترفة وينج

طلعت ترفة تركض بيدها السجينة جانت تثرم

ترفة :: شكو ولج خمشتي گلبي

عنبر :: غفار خلى عمة إصالة اطگ غفار جنزته بالربد كام يزحف زحوف ع اديه و رجلي

هنه يسولفن واني بالي وياهن استمع ليش گتلوا و شنو السبب انتبهت ع ترفة ما اهتمت اله حتى لمحت ابتسامة تسلطت ع وجهه لان اكو شخص يحميها بغياب اخوها الزين و يرد حقها هم... تقربت ع ترفة تريد تتأكد

ترفة :: ليش عمتي أصالة طكته و شلون لوحدها گدرت عليه

هزت عنبر ايدها بسخرية و عوجت حلگها

عنبر :: جا موش غفار ذيج گاله اذا جست ترفة نوبة الخ اخلي النسوان اطكك و من اجيتي شاف وجهج و سجدة موش هنا هل اخذ عمتي اطكه

عنبر تسولف وتاشر بـ اديها شلون إصالة ضربت عمار و شلون عمار گام يزحف تنقل الخبر صوت و صورة شميت ريحة شي احترگ التفت

واشوف الخبزات ثعولن بالتنور طلعتهن و تجوت اديَّه حرت بيهن وين اوديهن لا اشوفهن إصالة شتگول عليَّه ماتعرف تخبز

أخذتهن ضميتهن جوه السعف و الحطب اجت إصالة عگدت جبينها بعدها ريحة الخبز المحروگ موجودة

إصالة :: ها شنهي بعدج ما خبزتي

:: هاا مو شفته بعده مو حامي گلت انتظر شوية حتى الخبز يصير زين

هذا الحجي سمعته منها البارحة من سئلوها لسه ما خبزتي واليوم رديته الها عود اني افتهم بالخبز... خبزت واني هم خبزت تباوع ع خبزاتي تبتسم وتكلي عاشت ايدج

كملنا اباوع لخبزي و خبزها فرق من السمه للكاع خبزها كبار دوائر و حلوات و خبزاتي لو طويلة چنها لسان

لو محروكة من النص و الحوافي معجنة واحسن وحدة بيهن مزرفة تگول ضاربيها مية طلقة.. شلت وحدة قسمت اكل منها اشوفها طعم مرورة الحراگ ع العجين شلون ابوية جان ياكل و يگلي بحياتي ما ضايگ هيج خبز

طشن البنات يتحضرن و براءة طبت تغسل... وعنبر تروح و ترد تقرا

توي گعدت كمزت من مكان من ندفع الباب بكل قوة طبت سجدة وجه متلايم صايرة نار فاتت من يمي

حتى خفت اسئلها شبيج ماكو ثواني ندفع الباب بقوة أكبر من الـ قبلها شاب بعده بملابسة العسكرية من شافني رجع بساع ورا الباب وتعذر غطيت شعري عدل و فتحت الباب أكثر افسحله مجال

رحمة :: تفضل خويه

دخل عيونه تفتر بـ أركان البيت

جراح :: وينها هاي اليوم اتويها توي

قبل لا ارد طلعت سجدة وكفت اباب الهول وصاحت بعصبية

سجدة ::شتريد بعد لحكتني لهنا

رص ع اسنانه يحجي بغضب و رفع اصبعه بتهديد الها

جراح :: صوتج ولج وهذا شعرج بعد اذا طلعت منه شعراية وحدة وحگ هو علي ادكج صفر

فرت ايدها بسخرية و ضحكت

سجدة ::ياهو يدكني صفر انت لا هواي عاحبتك نفسك

هي تحجي ابرود وهو صاير نار

::ولج الكائنات يمشون و عيونهم ما نزلت عنج عاجبج الوضع واني ااوج واشتعل مو... بله عوفج مني يطبني مرض الحرام ما تعرفينه انتِ

طبت ليجوه دقايق وطلعت بيدها مكص جرت شعرها لكدام وثواني كصته وشمرته يم رجليه

سجدة ::كلشي تحبه انت و تريده بيدي ادمرنه و لو يصح بيدي حتى روحي احرگها جي عاشگها اتت

تقرب عليها بساع لزم ايدها لواها وره ظهرها ولزم فكها حيل ضاغط عليه

جراح :: ذليتيتي بحبج سجدة انا الزلم تحسب اليه الف حساب اوصل يم مره انذل لا وحك الخلقج من باجر اخطب و اتزوج

فگت نفسها من بين اديه و خلت ايدها بصدره دفعته عنها تمثل الصلابة بس ايدها ترتجف قهر

سجدة :: يله روحي شمنتظر نذر بركبتي اجيلك وبنص عرسك ارگص وافرحلك فرح ما صاير بس طلگني أول

تحجي و الرجفة واضحة بنبرة صوتها ذيج و وينها مبين دا تنطق عكس گلبها ضحك تقرب وكف كدامها وكال ابرود يحرك اعصابها

جراح :: ما اطلك وعليج اجيبنها و بغرفتج أخذها

بيدها المكص ضغطت عليه بيدها حيل وبحركة سريعة جرته من ذراعه دفعته ع حايط و لزمته من ياخة سترته العسكرية خلت المكص ع رگبته بتهديد

سجدة :: سويها حتى بليلة عرسك اذبحنك و اذبحها والله ولا تكول ما تسويها وانت اكثر واحد تعرفني شنهي أكدر اسوي

عيونه بعيونها ابتسم بمكر دنگ راسه باس خدها واني درت وجهي عنهم بساع فزيت من صاحت بعصبية دفعته عنها و ابتعدت تحاول تضبط انفاسها

وهو مبتسم دنك شال شعرها راد يطلع صاحت بيه

سجدة :: وين ماخذه تعال رجعه

جراح :: قابل ميت عليج انا راح اذبنه بالزبل هو هذا گدره

طلع واني واكفة اشرتلي براسها

سجدة ::عاينله شوفي ذباه صدك

هزيت راسي بـ اي و ركضت للباب شفته واكف يم السيارة بيده شعرها من فات شاب بساع خلى جوه سترته أخذه و راح ع بيت عمهم ابو طالب عرفته اخوه عنبر هذا

سجدة :: هاا

رحمة :: لا أخذه وياه

هزت راسها و عافتني وطبت من كلامهم عرفته هو خطيبها باوعت صار هدوء بعد الحرب الدارت بينهم خليت أيدي ع گلبي يدك ع سريع كلما اسمع صوت،، كلما يندك الباب

افز عبالي اجتني الشرطة وهل عائلة الله يخليهم ما يعرفون شي اسمه دك الباب بهدوء لا يهجمون هجم تكول مكافحة الارهاب توي اريد اكعد ندك الباب هل مرة بهدوء و الولد نفسه حچة من ورا الباب وهو منطيني ظهره

جراح :: بلا آمر عليج خوية صيحيلي عنبر گلها اخوج يريدج

طبيت اخم عليها لگيتها بالغرفة مكابلة صورة الامام و تسولف وياه مدري شتبسبس تشتكي همهما اله من فتحت الباب مسحت دمعتها مستحية واني هم ما سئلتها شبيها حتى لا احرجها

رحمة اخوج بره يريدج

بثواني تبدل حزنها فرح وبمكان الدمعة نرسمت ضحكة ع خدها

عنبر :: صدك جراح اجه

هزيت راسي وهي ركضت طلعت اله

براءة :: وانا بالحمام اسمع صوت صياح سجدة و جراح عرفت تعاركوا هاي يكضون الاجازة مالته معارك انا اعرف أخيتي تعشگة بس ماعرف شمالها تنفره و ترفض گربه منها

و كلما يگلها خل نسوي العرس ترفض لفيت راسي بالخاولي عاينت ع ساعة جاية الاثنعش ونص رحمة واكفة بالحوش لوحدها نشدتها ع عنبر

براءة :: جا عنبر وين مشت للمدرسة لو بعدها

رحمة :: والله ما ادري أخذها اخوها وياه

طبيت للحجرة سجدة واگفة جدام المرايا شهگت من شفت لشعرها مبتور لرگبتها بعد ما جان ويا حجول رجليها

براءة :: هاي شسويتي ولج ليش گصيتي

انتبهت اللي لمته گوه والخصل تناثرت منا ومنا

سجدة :: ما احبنه مضوجني

براءة :: شمالج سجدة الج جم يوم ما عاجبتني صاير وياج شي احجي

:: لا شيريد يصير مثلاً

:: سمعت صوت جراح شنهي هم تعاركتوا

:: هو يدور عركات من جوه الگاع

:: ع شنهي تعاركتوا بله

:: ما ادري وشعري من جدام طالع شوية جي الربطة حرير تزحف وهو گلب الدنيا

:: ياا غير تنتبهين ولج

:: گتلج ما ادري براءة لا تزيدينها عليَّه انتِ الثانية

:: هاي هي سكتت

عفتها و طلعت من سمعت صوت عنبر بالبيت بيدها كتابها اجتافها متهدلة ذبت الكتاب ومددت ع قنفة جرت قمصلة غفار الزيتوني تغطت بيها

عنبر :: ما اروحن انا اليوم للمدرسة وراح انامن لحد يكعدني

:: لويش ست انطوج عطلة بس الج

:: لا بس اريدن ابقى ادير بالي ع رحمة أحسنها بعدها مريضة

رفعت القمصلة شوية عضت شفتها و غمزت لرحمة حتى تحتى تأكد كلامها

:: مو بله رحمة

و رحمة لا حول ولا قوة تستحي تكول لا

رحمة :: اي صح

براءة :: انا و سجدة هنا عليمن ظلتج بعد گومي بدلي بساع راح يفوتج الوكت

عنبر :: خله يفوت انا اريدنه يفوتني

:: گومي عنبر لا تطلعين صوتي منا ناس

:: انتِ لا تصيحين وهو صوتج ما يطلع

:: عنبرررر

صحت بنفاذ صبر و هي فزت من مجانها بساع نزلت من القنفة ربعت بالتراب تملش بشعرها و تصيح

:: ما اروحن و الزهرة الزجية ما اروحن وهاي حلفت بعد ما يصير اكسر حلفي

اجه جراح ع صوت صياحها

جراح ::شكو شبيجن صوتجن واصل لراس الشارع وانتِ موش گتلج ابدل ملابسي الكاج مكملة و بالسيارة شجابج لهنا

براءة ::همزين اجيت تعال شوفلك صرفة وياها انا عجزت وتعبت منها

جراح :: شمالها

براءة :: من گعدت لسه أدور حجج حتى لا تمشي للمدرسة

جراح :: خمس دقايق الكاج بالسيارة

عنبر :: ما اروحن و حلفت بعد ما گدر شنهي تريدون الزهرة تشور بيه

:: صارن اربع دقايق

:: الله ياخذها لعنبر راح اغير اسمي من وراكم گتلكم ما اروحن بعد حلفت شنهي انتم يهود

:: اني ادفع كفارة عنج گومي

گامت من التراب تنفض بدشاشتها صفگت ايد بالثانية وصاحت

عنبر :: يباااو يابوية يايمة يردون الزهرة تشور بيّه و تسطرني لا صايرة ولا دايرة علوية تحلف و تخلف

براءة ::صدك تحجين من امس تقرين و شايلة هم هسه ما تروحين

عنبر :: يا يمه تعالي وين عفتيني بين الذيابة لا اخوه يرحم ولا اولاد عم

رحمة ظلت فاتحة حلگها متعجبة تصرفها

رحمة :: هاي كله ع مدرسة

:: اشايفه انتِ لو رادت شغلة هاي اقل فعالية عدها

رحمة :: طبت عنبر الغرفة تبجي البنية بيها شي مو مال شخص يتهرب من المدرسة واني شفتها شلون تقرا و تحب الدراسة طبيت وراها لگيتها بدلت ملابسها و دموعها ما وكفت سديت الباب و جريتها من ايدها گعدتها

:: ليش ما تردين ترحين اكو مشكلة عندج حسبيني اختج و احجيلي

بجت أكثر تناشغ مفرفحة

:: بنات بالمدرسة مسويات شلة و كلما يشوفني يصيحن السودة تنور اسود

:: و ع هاي ما تروحين و تعدمين مستقبلج بيدج

:: صار سنتين وهاي الثالثة اكولن لجراح انقلني ما يرضه يگلي هذا موش حل

:: وصدك مو حل بكل مكان حتلگين هيج نماذج إلى متى تبقين تتهربين

:: جا شسوي والله تعبت وانا احبن الدراسة وعدت امي الله يرحمها اصيرن دكتورة

:: الناس تشوفج بعين نفسج و عدم الثقة مثل المرايا و ينعكس ع وجهج تره انتِ صيري سباعية ولا تبين الهن تهتمين لكلامهن لو تنقهرين وهنه راح يبتعدن عندج و صدگي العيب بيهن وأكو فد نقص بداخلهن دا يسدن بالحجي ع غيرهن

هزت راسها اي مقتنعة كلما تمسح دموعها يرجعن يصبن لزمت اديَّه تتوسل

:: كرهت هاي لمدرسة كلش اذا ما محد راح وياي ينقلني تروحين انتِ وياي

:: اي والله اروح وياج بس هسه كومي روحي مو عندج امتحان

كامت طلعت واني وراها وكفت واخوها وراها يظفر شعرها بعد كفشته من دگت و لطمت...

تبجي و تمسح دموعها و تناشغ حيل هو ساكت ما يسئلها وهي تزيد بالبجي وتعلي الصوت حتى ينتبه عود

:: وينج يا يمه تجين و تشوفين ابنيتج شصار بيها احسن روحي تيتمت مرتين يمااا

شد الگصيبة خلى اديه ع اكتافها دارها عليه مدنك راسه عليها مسح دموعها وكأنه يعرف القصة ورا هذا البجي كله

:: نفس السالفة مو

:: جا انت موش تكول انتِ موش أخيتي بنيتي جا هيج الابوه يسوي ببنيته

:: و ليمت ابقى احودل بيج من مدرسة لمدرسة موش گتلج إلى تغثج لطيها ع حلگها حتى لا تفكه نوبة الخ عليج

:: جا موش سمعت كلامك و لطيتها و تلث خياطات بشفتها والمديرة طكتني ع راسي بالكتاب

جعد جبينه متعصب و سئلها يستفسر كل ظني ما يهتم لهيج مشاكل بس طلع عكس ظني

:: شوكت صار هالحجي ليش ما عندي علم بيه

:: جنت ملتحق و المديرة دزت ع ولي أمري ابوي صادف بالنجف و غفار موش هنا هم.... مشه وياي قسيم و بدون ما يتفاهم رزلني جدامها وجابني للبيت سحل و دمغ ع راسي و بقيت اسبوع بالفراش عليلة

:: وليش ما حجيتي بوگتها جا طيحت حظه تهديلي خل يجي إلا اكسرها لـ ايده وعلي شلون يرفعها عليج

:: يعني راح تنقلني ؟

:: اخر مرة عنبر وحك هو علي اذا اجيتيني تعوين بعد فوك همج اطكج ولون تبجين دم ما انقلج بعد

رفعت نفسها توكف ع أطراف رجليها لزمته من وجه منا ومنا وباسته

:: و يستغربون جي اگلهم هذا ابوي الثاني

ابتسم الها يبوس شعرها

:: يله جيبي جنطتج وتعاي موش امتحان عندج ؟

:: اي ما تعوفني و ترجع ،،اكمل امتحان و طلعني اريدن الحك ع ملة

أشر الها ع عيونه ثنينهن ركضت اخذت جنطتها و طلعت وياه

كملنا كل الشغل اني و البنات فردشت جنطتي ماعندي شي اسود كله بيجي و تدرجاته تذكرت عمتهم إصالة نفس طولي

طلعت أدور عليها ماكو رجعت للغرفة لگيتها تخابر بصوت ناصي ما سمعت منها غير

" شلون صرتي بعدها عيونج توجعج والله من امس گلبي يمج "

سكتت ثواني و رجعت همست بصوت خافت يادوب ينسمع

" والله موش بيدي كلهم موجودين گوه اگدر اطلع بدون محد يشوفني... هسه بس ابوي يطلع اجيلج "

تحمحمت ودكيت الباب هي فزت و وكع الموبايل من ايدها دنكت شالته و رد الدم بوجهه من شافتني حاولت تبتسم الارتباك و الرعب جان واضح عليها

إصالة :: هاا حبيبة تردين شي كولي لا تستحين

رحمة :: اريدلي دشداشة سودة تراك البسه لان ما جايبة وياي ملابس سود

:: اي بعيوني تهديلي هسه اشوفج

دزت رسالة و فتحت كنتورها طلعت دشداشة و تراك

إصالة :: شني الي يعجيج لبسي

التراك قصير وهو مجلس كلت فشلة اخذت الدشداشة و طبيت اغسل كملت

وطلعت كعدت يم البنات إصالة اختفت عبالك فص ملح و ذاب و أمن العلوية سئلت عليها گالن الها صديقتها مريضة و راحت تشوفها

گامت تجي النسوان و كل وحدة تدخل تسئل براءة لو سجدة عليَّه وهنه يكولن اقاربنه

اجت الملة بدت تقرا صوتها كلش حلو الاستقبال كله نسوان طلعت اكعد بره صارت كدامي عنبر توها اجت بعدها بملابس المدرس گعدت ع درج اجت كعدت يمي

عنبر :: هاي صديقتي اجت وانا ما اگدر بس اعاين بوجهه اضحك گلت اطلع گبل لا اترزل احسن

گامت تنعى الملة توي دا ابجي ضيقت عنبر عيونها ع نسوان أشرت باصبعها ع رحاب وهي تقرب راسهه عليه تحجي بصوت همس

عنبر :: عايني رحاب مغطية راسهه وتهز بأجتافها عود تبجي بالجذب

راحت البجية مني انتبهت صدك المره توها تهتز تبجي شالت طرف العباية خزرت ازل شفتها ماكو دموع بعيونها ابد

براءة :: خلصنا المجلس عنبر نزعت عبايتها و گطفتها صاجت

عنبر :: يمه ولجن متت جوع شوكت نتغدا

:: هاي لفات و راح اسوي جاي

حطيت ماي بالقوري و خليته ع نار لملمت الكواغد و رحمة وياي تعزل و تعدل و عنبر انبحطت ع كاع من تجوع عبالك سيارة خلص البانزين منها بعد ما تتحرك ما احس اله ندفع الباب و رحمة كمزت من مكانها وصاحت

رحمة :: والله ما سويت الها شي هي ماتت

ما لحكت انشدها شني السالفة طب قسيم اخوي توه جاي ابتسمت اريدن اهلي بيه استغربت جي الغضب واضح ع وجه وهو ينشد ع سجدة

قسيم :: سجدددة... وينها اليوم اراويها ربها بين عيونها

نزلت سجدة وكفت بايات الدرج الأولى من فوگ ومدت راسها

سجدة :: شكو

قسيم :: شني هاي سالفة شعرج و العالم تعاين عليج

سجدة :: ياهو گالك جراح مو وانت ندفعت بكلامه واجيتني

هي گالتها وهو سوه الدرج خطوتين ضربها راشدي وظل يضرب بيها صعدت اركض اريدن ابعده عنها ماگدر

رحمة :: فزعت ورا براءة ما اگدر اشوف بنية تنضرب و اسكت براءة تجر بيه وهو لازمها من شعرها و يضرب بيها ع ظهرها

اجر ادفع ماكو آخر شي لزمت ايده بثنين اديَّه و لكطته بعضة نبتت اسناني بيده ابتعد بساع وصاح شايغة روحه باوعلي بغضب ينفض بيده من الوجع واني نترت بيه

رحمة :: ما تستحي تمد ايدك ع اختك ما يضرب المره الا المره

براءة تجر بيه وتاشر ع حلكها اسكت وهو عيونه تفترس وجهي بغضب

قسيم :: وانتِ الآخرة ياهي و شسوين هنا

ابتسمت براءة مجاملة تريد تضيع السالفة و تبعدهم عن بعض

براءة :: خطار يمنه لا والله صارت من اهل البيت منا وبينا

هز راسه يباوع ع عضة طالع دم وين نابتات نيباني مسح ايده بقميصة وصاح ع سجدة

قسيم ::خل اشوفنج تعتبين هذه الباب مرة ثانية افصم ظهرج بالنص وعلي حتى شغل تنسينه بعد ماعندي بنية تفتر بالمحاكم

ما حجت اي شي سجدة الدمعة واگفه متحجرة بعيونها عافت البنات ونزلت من فاتت من يمه زمخ بيها

قسيم :: نزلي عيونج لا تعاينلي هيج لا افگسهن

هي عاندت بقت واگفة عيونها بعيونه بغضب شال ايده يريد يضربها وبراءة تتوسل بيه يعوفها اجت إصالة بعدها بعبايتها وكفت بوجه و خزرته نزل ايده و ندارت ع سجدة

إصالة :: صعدي لحجرتج عمة

صعدت سجدة عكس وگفتها قبل شوية جانت شامخة وهسه خاوية صعدت تجر خطواتها جر حتى رجليها تحركهن بثگل.... فزيت من صاحت إصالة بيه

إصالة :: شمالك انت تجيلك يومين تضرب هذه وتعارك ذاك مسودن

أخذته من ايده تحجي وياه و تعاتبه ع تصرفه

واني كل تفكيري يم سجدة انقهرت عليها كلش هي أكبر خواتها ما جان مفروض يمد ايده عليها ف

طلعت بالحديقة گلبي يم ابويه و اخواني ذني لجم يوم الفارگتهم بيهن احسهن سنين عليَّه بيدي موبايلي هيج بس صورة ما بيه خط ما أكدر اتصل

اريد اطلب موبايل واستحي خاف ما يقبلن اتصل ع اخويه من موبايلاتهن طلعت براءة تنش بالدجاج طببته للگن واجت يمي

براءة :: احسنج ضايجة بيج شي بس لا ضجتي من قسيم مسحيها بوجهي حبيبة هو هيج دومه عصبي

رحمة :: لا والله ما ضايجة بكل عائلة تصير خلافات بس ردت اخابر اهلي و ماعندي خط بموبايلي

:: تهديلي اجيبن الج نقال غفار خلى هنا من طلع ع حسابج كال اخافن أهلها يتصلون عليها

تهللت اساريري و الفرحة بانت ع ملامحي فركت اديَّه وحدة بالثانية بحماس واني انتظرها تجيبه اللي صدك جابته و راحت طبت

فتحته بساع بدون رمز استغربت اكو واحد يخلي موبايله بلا رمز جذبت انتباهي الخلفية صورة هو و شاب ثاني واكف ورا و مدنگ يبوس راسه

دخلت رقم ابوية اتصلت ما يرد رجعت اتصلت ع أزاد اول ما دك رد بلهفة ما عباله اني

ازاد :: ها خوية خو ما بيها شي رحمة

رحمة :: اني رحمة أزاد شلونك

سكت اسمع صوت أنفاسه عالي صوت شهگة مكتومة انخمش گلبي گمت ع حيلي ايدي ع گلبي

:: شبيك ليش تبجي ابويه بي شي

:: لا والله مابي

:: لعد ليش تبجي

:: مشتاقتلج كلش البيت يخنگني من دونج

:: يروح اختك مو اكثر مني والله عقلي وگلبي يمكم كل يوم يمر عليَّه واني بعيدة عنكم بسنة

:: والله احس روحي تيتمت مرتين من عفتينه

:: ما اعوفك والله ولا اعوفك اصبر بس هاليومين بلكي الله يحلها

:: اريد اجيج من اداوم اطلع مناك من المدرسة حتى لحد يشوفني

:: بس ديربالك ازاد عفية ذولة ماعدهم رحمة واذا لزموك يأذوك

:: لاتخافين اني أدبر نفسي واجي

سديت الاتصال انتبهت ع رسايل وصلت فضولي اخذني فتحت الواتساب رقم بلا اسم عگدت جبيني مستغربه الرساله عبارة

" راح ادزلك فديوهات حصلتهن بالجديد"

فتحت الفديو التصوير بليل كلشي ما مبين منه

سديته بساع بس مبين فاتحة الرسائل بقيت اروح وارد بمكاني شلون بيه شلون اذا عرف شفت المحادثة وشفت الرسائل...

كمزت من طلع قسيم الموبايل بين إذنه وكتفه لازمه وبـ اديه مجموعة أوراق هواي وفايل يحجي بصوت عالي ويصيح

كمت اضوج منه من ضرب سجدة بدون ما يتفاهم گمت اكرهه رجعت لنفس گعدتي عيوني ع موبايل بيدي صوت الفضول يگلي فتحي المحادثة وشوفي باقي الكلام

رجلي تهتز بتوتر تغلب عليّ فضولي رجعت فتحت المحادثة صعدت لفوگ كله محذوف

اجت عنبر يمي بيدها كاسة بيها زبد و گرصة خبز وعلبة الشكر شايلتها جوه ابطها كعدت يمي و بالسجينة وتدهن بالخبز بالزبد و ترش فوگاه شكر وتاكل ع سريع بحرگة گلب تتعارك ويا الخبزة مدتلي اللفة بيدها

عنبر :: تاكلين

رحمة :: لا ما احبه

:: طيبة والله ضوگيها

تحجي وهي تقرب اللفة ع حلگي أكثر عضيت منها شويه وهي صافنه تنتظر ردي

:: هاا شلونها موش طيبة

:: اي طيبة

جانت صدك طيبة خلط بين الحلا و ملوحة الخبزة كملت اكلت غسلت و رجعت كعدت يمي رفعت رجليها لصدرها ونزلت الدشداشة أكثر

:: انتِ هم دوه راسج من وراهم و طلعتي

:: لا جنت احجي وياه اهلي خابرتهم

هزت راسها بـ اي جرت گصيبتها لگدام تلعب بالخصل و تلفها ع إصبعها

:: شايفة البيت اللي يسون اله سحر شلون ينثبر هذا قويسم مثل السحر كلما يرجع مثل السحر يثبر بيت عمي يعارك خواته

:: اصلا اني گمت اموت منه ا..

قطعت كلامي درت وجهي عليها لگيتها مبتسمة ضميت شفايفي اخرس باقي كلماتي شلون احجي كدامها ع ابن عمها مهما سوى وفعل يبقى من دمها

خلت راسها ع ركبها و تنهدت بحزن

عنبر :: الله لا ينطيهم خذوا بنته منه و من اهدها هو هيج عصبي يطب و يطلع يعارك ذبان وجه

:: منو اخذ بنته وليش اخذها

:: مرته ماتت بعد الولادة صار عدها مضاعفات و أهل مرته رادوا الطفلة وهو ما قبل ينطيها ظلوا معارك عليها تالي ارتكبوا عليه ع اساس يشرب خمر و يكبسل موش مؤهل لتربيتها و خذوها منه

:: اكو تحليل يبين اذا ما يشرب شلون

:: اي طلبته المحكمة ومن سوا طلع إيجابي

:: يعني يشرب صدك

انتفضت رفعت راسها بساع تأشر بثنين اديها بالنفي وتحلف

:: لا والله احنه سادة و نسحترم و جدي صعب كلش شوفي عمامي أولادهم صاروا زلم و يحترمونه لجدي جكارة ما يدخنون جدامه ماعدا عمي كزار موش زين

:: لعد شلون طلع إيجابي التحليل

حركت اكتافها بعدم معرفة

:: ماعرف لعبوا لعبة و خذوها منه و هسه رفع دعوة عليهم وراح يصير الها شهرين و القاضي يأجل بيها

گعدت ع كرويته برا صوت القريات من الجامع القريب صارت ساعه عشرة واني برا البنات نامن من وكت لان تعبن اليوم باوعت ع قرآن ابو المحابس كل يوم الفجر

يقرا بي و يخلي بنفس المكان توضيت و رجعت فتحته بديت اقرا جذب نظري آية ولكم في القصاص حياة يا اولي الألباب جواها خط بقلم رصاص أكثر من مرة

انتبهت الوقت تأخر الأصوات سكنت كلها بس صوت الأشجار وهي تتمايل ويا الهوى تسبح لرب العالمين

صوت نعيق البوم وهي تطير من شجرة لشجرة الساعة متعدية الثنعش صدقت وگمت اتحرك شوية احس

تكسرت من الگعدة باوعت ع ورد الجوري ريحته فايحة بالحديقة صارت عيني ع وردة ورقاتها مفرطة شلعتها و كمت اشلع ورقة ورقة ارجع ما ارجع

انتهت الأوراق ع ما ارجع غندبت ضايجة شلعت الوردة الثانية و الثالثة و الرابعة مديت ايدي اريد اخذ وحدة الشجرة صايرة گرعة باقى بس الورق الأخضر اجيت اروح ع شجرة الثانية

گمزت من مكاني من نفتح باب البيت رجعت لمكاني من شفته هو لابس تراك أسود فوگه فروة شتوي و ملثم بشماغ من دخل نزعه راد يدخل جوه من لمحني اجه بتجاهي

غفار :: چا وين البنات

رحمة :: هاا نامن خطية من وقت اليوم تعبن هواي

بيده سفري مدّ الي

:: هاج

:: لا ما اريد.. شكرا

:: اخذي ثواب هذا هلبت الله وتخـ..

بتر كلامه ع نص دنگ خلى يمي عگد مابين حواجبة من انتبه ع أوراق الورد المفلس بس ما حجة شي و راح دخل صار عندي فضول اعرف شنو بالسفري اجيت افتحه استحيت خاف يطلع و يشوفني مديت راسي اباوع ورا

فتحته تمن و قيمة بعدها حارهذة القيمة من ريحتها مبينه طيبة و التمن تكفخ منه ريحة الزعفران و الدارسين باوعت ع خاشوكه گلت خل اضوكه بس

گمت اكل بلا اما احس انتبهت ع روحي مخلصة السفري باقي بي بس خاشوكتين تقريبا ضليت ابلع بريگي هسه شيكول

عليَّ ما شايفة اكل طشيت التمنات الباقيات بالسفري حتى يبين عايفة هواي و سديته وادعي كون ما يرجع عليه صفنت احجي بيني وبين نفسي هو مو انطانيه بعد شنو يرجع عليه يكرم

سجدة :: نايمة احس ع ايد تمسح ع راسي و وجهي فتحت عيوني غفار گاعد يم راسي سئلني بقلق

غفار :: موش عوايدج تنامين من وكت شمالج بس لا مريضة

شلت راسي و كعدت عيوني ضباب شوية ياله اتضحت الرؤية زين

سجدة :: لا بس تعبت من الشغل گلت اخذلي كسرة ارتاح

يمي ازل بقت يمنه نايمة و دافرة البطانية غطيتها زين عگد جبينة مغتاظ من صارت عينه ع وجهي و أثر اصابع قسيم ع خدي طابعة ازرگ

:: ياهو طكج

مسحت ع خدي الضربة توجع من الداخل حتى باطن خدي احسه مورم و ياذيني

:: محد

:: قسيم مو ؟

نهض بساع رأيد يطلع اله كضيته من ايده بساع

:: عوفه غفار باجر عنده محكمة هل محروك گلبه

:: يطبه مرض محروك گلبه يجي يطلع حرگته بيج ويطكج

كوه خليته يكعد حجيت اله الصار وگلت اله ما ادري من طلع شعري صح اغتاض مني و عاتبني بس دومه يتفاهم عكس قسيم... النوب اغتاظ من جراح جي العركة صارت من ورا كام بساع

:: وين رايح

:: هسه اجي دقايق

طلع من الحجرة بخطوات مستعجلة كمت غسلت وجهي بماي بارد حتى الصلاة فايت وكتها توضيت و صليت كمت مددت

بعدني نعسانة ويا ما مغضت عيني شفت اختي بينة،،المفقودة،،، لابسة الثوب الأبيض وبيه وردة صغيرة حمرة جابه الها غفار بالعيد طبت بيتنه عاينت بوجوهنه كلنا

احجي وياها ما ترد من شافت غفار ابتسمت وراحت كعدت يمه

فزيت من نومي ادور عليها ماكو الها أثر طلعت للحوش مخنتكة

ادورها هلبت الله و تطلع رجعتها صدك موش حلم فتحت باب الحوش اعاين البستان كله أظلم

بينة اختي اصغر مني و اكبر من براءة جان ارسلان ابن عمي مرتضى الله يرحمه عاشگها وهي عاشتكه طلبها من ابوي و انطاها اله و عقدوا سيد و محكمة

كعدنه الصبح ماكو .. لا ارسلان و لا بينة.. گلبنه الدنيا عليهم وما لگينه الهم أثر ... طش الخبر فلانة نهبها فلان و نهزموا سوا ومن اهدها راس اخواني بالگاع

رجعت حجرتي اجسن نار واجه بصدري

اجه غفار ينفض بيده مفاصل ايده حمر عرفته متعارك وياه جراح و طاگة ابتسم بوجهي

:: كومي تعشي ما يصير تنامين بلاية اكل

:: مااريدن اطلع واشوف وجه قسيم

:: جا نجيب عشانه هنا

بعدت البطانيه اريدن انهض اسوي العشه اعترض هو

:: خلج انتِ تعبانة انا اجيبنه

صدك جاب صينية العشه كباب زاد من الثواب و زلاطة وانا خليت القوري ع صوبة يخدر بلعت ريكي و فتحت الموضوع وياه رغم اسمها محظور بالبيت نطقه

:: حلمت بـ بينة

توقفت ايده عن الأكل جر حسرة تسولف شكبر همه ذب الخبزة بالصينية وهمس الحمد لله

:: غفار

:: سدي هل سالفة سجدة

:: يعني عليك الله ثنين عاقدين و مكملين كلشي لويش يشردون و يخلون دمهم ينهدر گلي ؟

صك ع أسنانه بغضب ما يتفسر نابع من وجع گلبه ونار العار التلهب ورا وكل ظنه اعرف مجانها وساكتة

:: تعرفين مجانها مو

:: لا و روح ابوي بس قسيم حالف يمين بس يلگاها يذبحها اعرف قسيم ما يفكر بس انت غفار گلي ما تعرف بينة ماتعرف اخلاقها شنهي شلون تصدك تنهزم هيج

:: الله كريم عود خل الگاها هسه

:: سجدة اذا تعـ

قطعت كلامه اقسم يمين اله اقطع الشك اللي بداخله

:: و دم المظلوم ماعرف عنها شي

مسح وجهه ايده ترتجف قهر و عجز احنه ناس عرب و شيوخ و الصار موش هين يخلي روسنه منكسة سنين و وصمة عار تلحگ حتى أولادنا

بعد سكوته گال يشاركني ظنونه باعز الناس ع گلبه اللي هو عون اخوه ارسلان

::عون من اسبوع مشه لتركيا

:: اي؟؟

سكت ضايج حلگه يستصعب البوح بشكوكه حتى بظنونه ما يريد يظلمة حجيت اني بعد ما فهمت مغزى كلامه

سجدة :: انت شاك بيهم بتركيا و عون يعرف و متستر عليهم و ضام عنك مو ؟؟

:: ما اعرف ضايع انا سجدة عون قسم ع قران ما يعرف مجان ارسلان و بينة وقسيم يكول لا يعرف وجاي يروح الهم... وانا بين نار العار و الاخوه صرت

:: ولو يعرف مجان اخوه تلكاه هيج مدوهن يمشي بلا عگل ؟غفار... لا تسمع حجي الناس اسمع كلبك انشد نفسك عون يرضى ينزل راسك الگاع ؟ انا اجاوبنك ثنينهم تربية ابوي وجدي لا ارسلان يجيب العار ولا عون يسكت عنه

شبك اديَّه فوك راسه تايهه و يفكر گمت شلت للمطبخ غسلت المواعين وصبيت جاي اللي واله

رحمة :: شفت الوقت تأخر اجيت اطب انام شفت الموبايل وين عفته ع كرويتة وبيه ضوة رسائل توصل دنگت عليه اشوف

عين صارت گبل ع كلمة سلمها الي وماعليك

طالع جاري الكتابة... واني عقلي كبل ربط الموضوع اكيد متفق ويا نزار عليّه بعد خلاني أأمن واحجي اله غدرني

صوت طگطگة درت راسي شفته طلع بيده كوب جاي واني بساع ركضت لباب البيت طلع دنك ع موبايله قرا اللي قريته اني

ورفع راسه الي اني شفته اجه بتجاهي فتحت الباب و ركضت لشارع حافية بطرك الدشداشة و الشال "لبي يدك مثل طبول الحرب واني اسمع خطواته تركض وراي

يتبع.....

التاسع من هنا

تعديل المقال