رواية امرأة في حجر الثعبان الفصل الاربعون 40 والاخير بقلم رانيا جابر حسن

رواية امرأة في حجر الثعبان الفصل الاربعون 40 والاخير بقلم رانيا جابر حسن

الحلقة الأربعون والأخيرة..
(تائب الحب)
في منزل رياض ..(في الصباح من اليوم التالي،في تمام الساعة التاسعة)
-اجتمعت عائلة رياض في الصباح في منزل 'عم رياض' الكبير،لمقابلة 'رياض'،استيقظت 'ملك' علي صوت طرقات الباب المتواصلة..
ملك:بقلق..رياض رياض
رياض :بخمول..إيه!
ملك:بقلق..الباب بيخبط أوي،قوم شوف مين!
رياض:بلا مبالاة..نامي وسيبي اللي يخبط يخبط
ملك:بضيق..يووه،أنا هقوم أنا هشوف مين
ارتدت'ملك' اسدالها وذهبت لتفتح الباب..قائلة:أيوه يا عمي اتفضل
عم رياض:بغضب..جوزك فين!
ملك:بخوف..خير يا عمي في حاجة!
عم رياض :أنتي مالك أنتي ما تدخلي تصحيه من سكات
ملك:باستغراب..هو حضرتك بتكلمني كده ليه! أنا عملت حاجة!
عم رياض :بغيظ..أنتي سبب المصايب كلها
ملك:بضيق..ليه إن شاء الله أنا عملت مصايب إيه!
جاء رياض قائلا:بسخرية..يمكن خدتي الورث منهم يا ملك وأنا معرفش!
عم رياض :بابتسامة مستفزة..قصدك الورث اللي أنت كتبتوهولها باسمها ياابن الغالي
رياض:باستفزاز وسخرية..إيه ده يا عمي أنت لحقت تعرف إني كتبت كل ثروتي لملك!
عم رياض :أنت حر في نفسك،أنا طالع أبلغك أن العيلة كلها متجمعة وعايزة تكلم معاك
رياض :والمفروض بقي إني اصحي من النوم بالطريقة دي،وأنزل أجري معاك يعني!
عم رياض :يعني إيه!
رياض :باستفزاز..يعني مليش مزاج أتكلم مع حد دلوقتي
عم رياض:أنا هنزل وهستناك تحت
رياض :بلا مبالاة..خد الباب في ايدك
خرج عم رياض وجلست ملك علي الكرسي في خوف قائلة:هم ناويين علي إيه معاك!
رياض :بلا مبالاة..قومي نكمل نوم ومتقلقيش منهم
ملك :لا أنا خلاص صحيت مش هنام تاني
رياض :طيب أنا هنام أنا
__________________________
في منزل عبد القادر..
مازن:بقلق..خير ياحاج أنا جيت علي ملا وشي قولت في حاجة،أنت كويس!
عبد القادر :أنا بخير يا ولدي الحمد لله،اقعد خد نفسك
مازن:وهو يأخذ أنفاسه..خضتني يا يوسف
يوسف :هعمل إيه كان لازم اجيبك بالطريقة دي،وأقولك إن الحاج تعبان شوية
مازن :واديني جيت يا سيدي اهو
ازيك يا حاجة عامله إيه!
الأم :تسلم ياولدي من كل شر
عبد القادر :هقولك علي حاجة ولو أنا غالي عندك هتنفذها
مازن:رقبتي ياحاج قول
عبد القادر:مراتك
مازن :بضيق..مالها!
عبد القادر :رجعها تاني
مازن :يا حاج الموضوع ده انتهي بقي ومش عايزين نفتحه تاني
عبد القادر :ياواد بقولك وغلاوتي عندك،شكلي مش غالي عليك
مازن:بضجر..حاضر يا حاج هبقي أشوف الموضوع ده
ليلي:بخبث..طيب أطلع بقي غير هدومك وتعالي
مازن:حاضر
صعد مازن إلي غرفته وفتح الباب،ليجد هايدي جالسة علي الفراش،نظر إليها وهو رافعا حاجبه،قائلا :امم علشان كده بعتوا جابوني
هايدي:بانكسار..ازيك يا مازن!
مازن :باستفزاز..زي الفل من غيرك
هايدي :وحشتني
مازن :بغضب..جاية ليه يا هايدي وعايزة إيه!
هايدي :جاية علشانك يا مازن
مازن :وأنا قدامك اهو نعم!
هايدي :أنا آسفة ومش هعمل كده تاني
مازن:الموضوع انتهي يامدام وافتكر إن كل واحد راح لحاله وانتهينا بقي
هايدي:ببكاء..لا ما انتهاش أحنا بنحب بعض،ودي كانت غلطة ومش هكررها تاني
مازن:بابتسامة حزينة..عارفة المشكلة فين ياهايدي! إنك بتاخدي كل حاجة ببساطة وكأن مفيش حاجة حصلت،وده اللي مجنني
هايدي:أكبر دليل إني اتغيرت إني جتلك لحد هنا بعد ما طلقتني وطردتني من البيت
مازن:ياهانم ده كان رد فعل طبيعي علي اللي حصل
هايدي:طيب خلاص نفتح صفحة جديدة وننسي اللي حصل
مازن:وإيه الفايدة من أننا نرجع لبعض وأنتي زي ما أنتي مابتحاوليش تتغيري ودايما مش شايفة غير نفسك،اهتماماتك،الشوبنج،وزنك زاد ولا زي ماهو،أما عن جوزك فده مش في حساباتك أصلا
هايدي :متقولش كده أنت أول أولوياتي والله يا مازن
مازن:يعني لو رجعنا تاني هتشوفي بيتك وجوزك وتسيبك من الحاجات الفاضية دي!
هايدي :بابتسامة..وهي تومأ برأسها..اه
مازن :ماشي يا مدام أما نشوف
هايدي :بدلع..بحبك
مازن :بمزاح..أهدي ياهانم أنا لسه ما رددكيش
هايدي :طيب تحب نروح بيتنا
مازن:اكيد احب طبعا،يلا بينا
_______________________
بعد تناول الغداء أرتدي رياض ملابسه وهم بالنزول إلي عمه..
ملك:رياض
رياض :نعم
ملك :بخوف..خلي بالك من نفسك
رياض :بابتسامة..حاضر
(في منزل عم رياض)
أخذت العائلة تتبادل الأحاديث..قال عم رياض: بغيظ..الباشا لسه ماصحيش،مش قادر يفارق حضن الهانم وينزل
رد الآخر:العصر أذن وهو حتي معبرناش ولا قال اطلعوا نتكلم عندي
عمه :أنت عايزه يدخلك عنده علشان المدام تغضب عليه
جاء رياض قائلا:احم احم..ياساتر
عمه:اسكتوا خالص اهو جه اهو
دخل رياض ناظرا لهم كلهم،قائلا :بابتسامة مستفزة..متجمعين عند النبي إن شاء الله
عمه:اقعد يا رياض أرتاح
رياض :وهو يجلس علي الكرسي..اديني قعدت اهو،خير!
رد عمه الآخر:بص ياابني احنا كلنا عيلة واحدة،ومش معني إنك كبير العيلة بعد أبوك وباعد نفسك شوية عننا،يبقي احنا ملناش كلمة و..
رياض :وهو يقاطعه..ادخل في الموضوع علي طول ياعمي
عمه:ماشي،هو سؤال مفيش غيره،أنت صحيح سيبت الكار بتاعنا وبطلت؟
رياض :أنا خلاص توبت وحد الله بيني وبين الحرام
نظر الجميع إلي بعض في تصديق لما سمعوه عنه..خلاص يا ابني من هنا ورايح أنت في حالك واحنا في حالنا
رياض :بتعجب..يعني إيه!
عمه:يعني من النهاردة أنا كبير العيلة،وأنت ملكش وجود وسطينا،اللي يخرج عن كارنا ويستعر من شغلانة أجداده،ويسمع كلام مراته،يبقي مالوش مكان بينا
رياض :وهو يشير إليه محذرا..بغضب،عمي خرج مراتي من الحوار ده،ومتنساش إني كبير العيلة من بعد أبويا الله يرحمه
عمه:باستفزاز.كنت،لكن دلوقتي بح
رياض :وأنا هسبلكم الكار كله وكفاية عليا شغلانة العطارة
عمه:بابتسامة مستفزة..بس المحلات دي مش ليك لوحدك ياابن أخويا
رياض :بتعجب..أمال لمين إن شاء الله!
عمه:المحلات دي كانت بتاعة جدك الله يرحمه،أيام مكان دكان صغير،وكان شغال فيه باليومية،وأما صاحب الدكان عزل رح جدك اشتراه بالفلوس اللي حوشها من شغله،وكلنا شركة فيه
رياض :المحلات دي اللي كبرها أبويا،ومحدش ليه فيها مليم
عمه الآخر :أبوك فعلا اللي كبرها بفلوس الربح منها لأنه مكنش بيصرف منها حاجة،بس ده مايمنعش أننا لينا نصيب فيها
رياض :بلين..وأنا مش بحب أكل حق حد،تعالوا اشتغلوا معايا في المحلات وخدوا ربحكم
عمه:بابتسامة مستفزة..لا خليلك أنت الشغلانة دي،متلزمناش
رياض :وهو يكتم غيظه..اللهم طولك يا روح
عمه الآخر :بسخرية..في ايدك إنك ترجع تاني كبير العيلة،وتضمنا ليك،وتسيبك بقي من الدروشة اللي أنت بقيت فيها دي
رياض :بتعجب..دروشة! الرجوع إلي الله بقي دروشة!،أنتوا إيه رأيكم يارجالة في الكلام ده!
عمه:بابتسامة مستفزة..احنا قولنا اللي عندنا وعلي فكرة كل اللي قاعدين دول موافقين علي الكلام ده،والمفاجأة بقي أن معظم رجالتك سابوك وبقوا معايا،أصل الحلال دلوقتي مبقاش يأكل عيش حاف
رياض :باستفزاز..مبروك عليك يا عمي،بس ياريت متجيش تشكيلي من حد أما يتعلم عليك زي ما كنت بتعمل
عمه الآخر :قولت إيه يا رياض معانا ولا لا!
رياض :وهو يهم بالوقوف،بجمود..أنا كان نفسي نبقي عيلة صالحة مع بعض ناخد بيد بعض في الطاعة،لكن أنتوا سكتكم غير سكتي،من النهاردة أنا في طريق وأنتوا في طريق،وهعتبر أنكم موتوا كلكم والرحمة تجوز عليكم،سلام يا كبير العيلة
عمه:بغيظ..اتصل يا واد باابن المعلم..وقوله من النهاردة ملناش صالح برياض وخليه يخلص
________________________
في القهوة..
حجاج:بقلق..مالك مضايق ليه!
رياض :عمي جمع العيلة كلها وبيقولي لترجع للشفلانة تاني،أو يبقي هو كبير العيلة ومليش دعوة بيهم
حجاج :طيب وأنت عملت إيه!
رياض :من النهاردة معرفش حد فيهم،قولي هو صحيح كل الرجالة سبتنا وبقيت مع عمي
حجاج:بارتباك..وهو يومأ برأسه،ايوه
بس ولا يهمك أنا في ضهرك ومعاك أنا وكام عيل اللي واقفين قدام البيت دول
رياض :بضيق..لا مشيهم أنا مش عايز حد خلاص،كل واحد يشيل مسؤولية نفسه
حجاج :طيب ما ضايقش نفسك اللي يغور يغور
-مر الوقت ودخل الليل سريعا..
رياض :أنا هروح اطلع،سلام
حجاج:بحزن.مع السلامة يامعلم
(في المنزل)
في غرفة رياض..قالت ملك :ها كانوا عايزين منك إيه!
رياض :وهو يجلس علي فراشه دون تبديل ملابسه..طريقهم غير طريقي،الله يسهلهم
ملك :كنت عارفة أنهم هيحاولوا يضغطوا عليك علشان ترجع للسكة دي تاني
رياض :بابتسامة حزينة..كنت فاكر إني أول ما أتوب هيبقي ليا كلمة عليهم زي الأول وأقدر اخليهم يتوبوا هم كمان،لكن أظاهر إني اتمديت في الحلم كتير
ملك:بابتسامة..يا حبيبي إنك لا تهدي من أحببت
رياض :حتي الرجالة اللي كانوا معايا سابوني ومشيوا
ملك:بتفاؤل..أنت عند المحلات هتشتغل فيها وتنساهم
رياض :بابتسامة ساخرة..لا دول كمان عايزين حقهم في المحلات دي
ملك:بتعجب..هي دي بفلوس حلال ولا لا! وبتاعت مين أصلا!
رياض :هفهمك جدي كان بيشتغل في محل صغير،وبعدين اشتراه بالفلوس اللي حوشها منه،وأما اشتغل في الشغلانة بتاعتنا هو وأخواته ساب المحل ده والربح بتاع المحل كان بيتصرف عليه لحد ما كبر وأبويا مسكه بعديه وهكذا
ملك:بحزن..ندمان إنك خسرت كل حاجة!
رياض :بابتسامة..كفاية إني كسبتك أنتي
ملك:طيب إيه رأيك نسيب هنا خالص ونروح نقعد عند جدو ونشتغل أنا وأنت في المزراعة ونساعد بعض
رياض :علي آخر الزمان هشتغل عند مراتي
ملك:أنت هتشتغل في المزراعة وهنعيش أنا وأنت علي مرتبك،بلاش الحساسية دي
رياض :ربنا يسهل،أنا هقوم أخد حمام
ملك :ماشي
(في منزل حجاج)
حجاج:بحزن..رياض صعبان عليا أوي
الأم :ماهو اللي عداهم برده يا حجاج
حجاج:بغضب..ياوليه يا مجنونة حد يرجع لطريق الحرام تاني بعد ما داق طعم الحلال
الابن:بتلعثم..بصراحة يا بويا أنا سمعت كده كلام بس خايف أقول
حجاج:قول ياواد متخفش
الابن :أنا سمعت عم رياض بيتفق مع ابن المعلم..علي إنه لو رياض مرجعش ليهم تاني يسلمه ليه وهو ياخد بتار أبوه منه
(فلاش باك..جمع ابن الرجل تاجر المخدرات الذي ذبحه رياض في الحارة، وأخذوا يتشاورن فيما يفعلون معه..
الابن:يا رجالة أنا عرفت إن رياض هو اللي قتل أبويا مش الواد اللي مرمي في السجن
-عرفت منين يا معلم!
الابن:عمه اتصل بيا وقالي إن رياض هو اللي قتل أبويا،وقالي كمان إنه ساب الكار بتاعنا ورجالته اتخلوا عنه ومفيش حد هياقفله
-طيب أنت ناوي علي إيه!
الابن:ناوي أخد حق أبويا منه
-هتقتله!
الابن:هاخد شقي عمره الأول،وبعدين أخلص عليه
-بس رياض مش سهل!
الابن:بابتسامة ساخرة..متخافوش منه مبقاش بيخوف قطة بعد ما ادروش)
حجاج:بقلق..يعني الواد ده ناوي علي نية وحشة لرياض!
الابن:اللي أنا فهمته كده يا بويا إنهم عايزين يزيحوه من قدمهم
حجاج:بقلق..ربنا يستر عليك يا رياض
(في منزل رياض )
خرج رياض من الحمام ودخل غرفته،ليجد زوجته مكبلة الأيدي وفمها معصوب..
رياض:بفزع..مين اللي عمل فيكي كده
ابن التاجر:وهو يضع المسدس علي رأسه..أي حركة كده ولا كده هقتلك،فتشوه يارجالة
-مش معاه سلاح يا معلم
الشاب:أقعد علي السرير جنب المدام لحد ما نتفاهم
رياض:وهو يجلس علي الفراش،وينظر إلي ملك بغضب لأنها أخفت سلاحه
الشاب:وهو يجلس علي الكرسي ويضع ساقيه علي الفراش مثلما كان يجلس رياض..وحشتني يا رياض والله
رياض :بغضب..الدخلة اللي دخلت بيها دي هحاسبك عليها،بس بعد ما أعرف مين اللي بعتك!
الشاب :باستفزاز..مين اللي باعتني مفيش حد،أنا جاي اصفي حسابي معاك
رياض :حساب إيه يا ابني أنا عملتلك حاجة!
الشاب:بغضب..أنت قتلت أبويا ولا نسيت!
رياض :وهو يكتم غيظه..خد شوية العيال اللي أنت جايبهم دول وغور من هنا،وإلا ورحمة أبويا لاقتلك
الشاب:بابتسامة مستفزة..أخد فلوسك الأول وهسيبك ويادار ما دخلك شر
رياض:بغضب..فلوس إيه أنت اتجننت يالا،ده عشم إبليس في الجنة
الشاب:وهو يضغط علي مسدسه مصوبا علي ذراع رياض..طيب نجرب كده ونشوف ادينا بنتسلي ماورناش حاجة
صرخ رياض من قوة الطلقة وتوعد له بالقتل،أما ملك فكادت أن تسقط من خوفها علي زوجها..
الشاب:هاتوهم بره في الصالة
سحب الرجال رياض وملك إلي خارج الغرفة،وابقي رياض جالسا علي الأرض وفي وجهه قدمي الشاب الذي جلس أمامه..
الشاب:ها هتقول الفلوس فين ولا لا!
رياض :بغضب..وحياة ديني لاقتلك
الشاب:بابتسامة مستفزة..ماشي،فكوا المدام يارجالة وخدوا رحاتكم معاها علي الأخر،أنا بصراحة بحب أتفرج علي مشاهد العنف دي،أنت إيه رأيك يا رياض!
رياض :بفزع..عارف لو قربت منها،أنت حر
الشاب :وهو ينظر إلي رجالته..شوفوا شغلكم
قام رياض :وهو ينازع معهم،ولكن صدق القول 'الكثرة تغلب الشجاعة'.
جلس رياض مكانه علي الأرض مرة أخري في وهن فقد كان ذراعه ينزف بكثرة،أما ملك منهكة القوي من المعافرة معهم..
رياض :بوهن..سيبوها وهقولكم علي مكان الفلوس
الشاب:بابتسامة مستفزة..ايوه كده أحبك وأنت عاقل
رياض :فوكها وسيبها
الشاب:ماشي،فكوا المدام وخليها تروحله
حل الرجال وثاق ملك،فاسرعت وارتمت في حضن رياض وقامت بإحضار شريطة ووضعتها علي مكان الرصاصة حتي توقف الدم
الشاب:بسخرية..شوفتوا الحنية يارجالة
جاء حجاج ومعه رجالة واستطاع أن يسيطر علي علي الشاب ومن معه،ثم جلس بجوار رياض قائلا :أنت كويس يامعلم!
رياض :وهو يستند عليه ليقوم..كويس
ملك :بصراخ.اطلب الإسعاف بسرعة يامعلم حجاج رياض جسمه هيتصفي
حجاج:بارتباك..حاضر
أخذ رياض السلاح من حجاج ووضعه في رأس الشاب،قائلا :اللي يدخل بيت التعبان يتحمل قرصته..ثم أخرجت الطلقة في منتصف رأس الشاب مباشرة..
ملك:بصراخ..ليه يا رياض ليه!
رياض :بثبات..دفاع عن النفس ولا إيه!
الرجال الذين مع الشاب..بخوف،يامعلم احنا ملناش ذنب احنا..
رياض :وهو يقاطعهم..بس اخرسوا أنتوا كلاب ولا ليكم لازمة
حجاج:الإسعاف جاية حالا
رياض :ظبط كل حاجة ياحجاج
-جاءت الإسعاف وحملت جثة الشاب،ورياض،وبدأت التحقيقات التي سريعا ما انتهت بعدم مقاضاة رياض لأن الشاب هو الذي اقتحم بيته بنية السرقة والقتل مثلما شهد رجالة رياض بذلك وأيضا الرجال الذين كانوا مع الشاب، ولم يذكر أحد من رجال الشاب بأن رياض هو الذي قتل والد هذا الشاب وإنه جاء ليأخذ بتار والده.
في المستشفي وقبل خروج رياض منها..
ملك:ببكاء..احنا مالناش قعاد هنا بعد ما تخرج بالسلامة هنروح علي طول البلد عند جدو ونشتغل في المزرعة
رياض:بوهن..احنا هنقعد هنا ومتخافيش..
ملك:وهي تقاطعه..تاني أنت مفيش فايدة فيك! فيه إيه هنا نقعد علشانه! أنا خلاص كلمت جدي ورتبت معاه كل حاجة،وكمان هناخد خالتو نادية معانا
حجاج:مراتك بتكلم صح يامعلم،أنت لازم تبعد عن هنا خالص،وتبدأ حياتك من جديد
رياض:باستسلام..خلاص اللي تشوفيه
حجاج:أنا عملت اللي قولتلي عليه
ملك:بقلق..إيه هو!
حجاج:المعلم اتبرع بفلوسه كلها للمستشفيات والجمعيات الخيرية،وهم بقي يوزعوها بمعرفتهم
ملك:بابتسامة..الحمد لله
رياض:بتعجب..قولي أنت جبت منين الرجالة دي والسلاح اللي كانوا معاك!
حجاج:الواد ابني سمع عمك وهو بيتفق مع ابن المعلم..في اليوم ده أنا قلبي كان حاسس إن هيحصل حاجة،اتصلت بالرجالة وقولتلهم يجوا تاني واللي هم عايزينه هياخدوه،وأول ما وصلوا وسمعنا صوت ضرب النار طلعنا علي طول،بس ده كل اللي حصل
رياض :بابتسامة..متحرمش منك
حجاج:ولا منك يا غالي
-مرت أيام علي ذلك وخرج رياض من المستشفي،وعاد إلي بيته ليلملم ملابسه هو وزوجته ويذهبا إلي المزرعة..
حجاج:ببكاء..هتوحشني والله يا معلم
رياض :وأنت كمان ياحجاج،أنا هبقي أجي ازورك
حجاج:علي فكرة عمك وكام واحد من عندكم اتقبض عليهم
رياض :الله يسهلهم مليش دعوة بيهم،أنا سبتلهم كل حاجة حتي محلات العطارة حلال عليهم
حجاج :خلي بالك من نفسك يامعلم
ملك :بابتسامة..أنا متشكرة جدا علي اللي عملته معانا
حجاج:بتشكريني علي إيه!رياض ده ابني
نادية:بابتسامة..نشوف وشك بخير يا معلم حجاج
حجاج:والله يا ست نادية هتقطعي بينا،بس هنعمل إيه بقي للست ملك اللي هتاخدك مننا!
ملك:أنت عارف مقدرش استغنى عنها
رياض :وهو يحتضنه..يلا أشوفك علي خير
حجاج:ببكاء..مع السلامة يا ابني
(في المزرعة)
-وبعد أن استقرت أحوالهم،وبدأ رياض العمل في المزرعة ومعرفة كل شئ بمساعدة 'يوسف'،أخبرته ملك بحملها..
رياض :بفرح..بجد يا ملك أنتي حامل!
ملك:بابتسامة..اه بجد هضحك عليك يعني
رياض :بدعابة..يالمضة،الف حمد وشكر ليك يارب
ملك:ربنا يجعل أيامنا كلها سعادة وحب يارب
رياض :يارب
_________________________
-تم شفاء حسن ابن أحمد، وعادت العائلة جميعا تلتف مجددا حول بعضها في سلام..
أما مازن فقد رجع إلي بيته وتغيرت زوجته كثيرا عن ما كانت من قبل،وانتظمت حياتهم إلي حد كبير..
-أما عن والد عبد العال الذي كان يريد أن يأخذ بتار ولده من محمد ابن نافع..فقد توفي بعد موت محمد مباشرة،وذهب نافع إلي عائلته وتم الصلح بينهم،وهنا قد توقفت مسألة التار الذي بدأت..
-واخيرا انتهت رحلة شقاء 'ملك'،وبدأت تستمع بحياتها التي استطاعت بإرادتها ومثابرتها،أن تتغلب علي كل المصاعب التي رأتها،وتحول زوجها من تاجر المخدرات سابقا إلي تائب الحب،فحقا الحب يصنع المعجزات،وعطاء ربنا ورضاه لا حدود له.....
__________________________
تمــــــت

تعديل المقال