رواية مش حب عادي الفصل الرابع عشر 14 بقلم ملك ابراهيم
وصلوا الجلسة ودخلوا قعدوا في اخر صف.
كان لسه رحيم مبدأش المرافعه.
حبيبة قعدت والمحاميه كانت قاعده جنبها علي الطرف..
وعلى الجانب التاني كان في بنتين قاعدين جنب بعض وبيتكلموا.
جه دور الدفاع وكان رحيم.
رحيم قام وقف وبدأ المرافعه..
حبيبة كانت بتبص له بحب وهو بيترافع..
قلبها بيدق بسرعه وصوته بيخطف قلبها بكل كلمة بينطقها.
كانت مركزة معاه بعيونها وقلبها..
لكن فجأة سمعت البنتين اللي جنبها وهما بيتكلموا وواحدة منهم بتقول للتانيه: شايفه محامي الدفاع؟ قمر.
ردت البنت التانيه: انا لو من المستشار.. كنت اخرج المتهم برائة عشان خاطر عيونه.
حبيبة بصت لهم بصدمة وقالت بغضب: عيب على فكرة الكلام اللي بتقوله دا!!
ردت واحدة من البنتين عليها بدهشة: عيب ليه؟ هو فعلا قمر.. انتي مش شايفه!
حبيبة اتعصبت اكتر وقلبها ولـ ـع من الغيرة.. لكن كانت محافظه على انخفاض صوتها على قد ما تقدر احتراما للمحكمة وعشان متحصلش مشكلة.
ردت حبيبة عليهم بغضب مكتوم: هو متجوز علي فكرة.
ردت بنت منهم بثقة: لأ مش متجوز.. أيديه مفهاش دبله! انا بصيت على ايديه وهو بيشاور على القفص.
حبيبة رفعت حاجبها بغيظ وقالت لها: والله.. بقى بصيتي علي أيديه وملقتيش دبله؟! طب ايه رأيكم بقى ان انا مراته.
البنتين بصوا لبعض بصدمة وواحدة منهم قالت بعدم تصديق: واحنا ايه يثبتلنا؟! انا كمان ممكن اقولك ان انا مراته!
حبيبة نسيت انهم في المحكمة واتعصبت علي البنت وزعقت لها: مراته ازاي يعني!! .. انتي اتجننتي ولا ايه!
فجأة القاضي خبط بالمطرقه اللي قدامه وقال بصوت عالي: الصوووت.
رحيم بص وراه واتصدم لما لقى حبيبة موجودة في القاعة والصوت العالي كان جاي من عندها.
كل اللي في القاعة بصوا على ورا..
وحبيبة بصت للبنتين إللي جنبها وهمست لهم: لما الجلسة تخلص هعرفك مراته ازاي.
رحيم كان لسه واقف يبص عليها ومش فاهم ايه اللي بيحصل!
اتكلم القاضي: أتفضل يا أستاذ كمل.
رحيم بص قدامه لحظة بيحاول يركز في القضيه بعد ما حبيبة شتت تفكيره وتركيزه.
كمل المرافعه وهو قلقان ان حبيبة تعمل مشكلة.
خلص المرافعه وبص علي حبيبة بقلق قبل ما يقعد مكانه في انتظار سماع الحكم.
المحامية سميحه همست لـ حبيبة : دكتورة حبيبة متشغليش نفسك بيهم.. هما بيبقوا جاين يتسلوا مش اكتر.
حبيبة كانت حاسه بنـار جواها ونفسها تخلـ ـع لهم عيونهم اللي بيبصوا بيها على رحيم.. وهمست بغضب: جايين يتسلوا ولا جايين يعاكسوا.. شوفي بيبصوا على رحيم ازاي!
ردت سميحة بهمس وهي بتضحك: دي ابسط حاجة بتحصل.. اومال لو جيتي المكتب وشوفتي اللي بيجولنا بيكونوا عاملين ازاي.
حبيبة بصت لها بصدمة وقالت: هما كمان بيجوا لحد المكتب؟
ردت سميحه بهدوء وابتسامة: مش قصدي.. بس في كتير بيجوا وبتكون طريقتهم غريبه شويه! بس استاذ رحيم مش بيقابل اي حد.. غير لو قضيه كبيرة فعلا.. وباقي القضايا بتتوزع علينا إحنا.
حبيبة بصت قدامها وحاولت تهدا وتسيطر علي أعصابها عشان المحكمة وعشان متعملش مشكله لـ رحيم.
بعد شويه القاضي نطق الحكم ببراءة المتـ ـهم ورحيم كسب القضيه.
المتـ ـهم المظلوم اللي كان في القفص كان بيبكي من الفرحة وبيدعي لـ رحيم من قلبه.. وكل المحامين اللي حضروا الجلسه كانوا بيباركوا لـ رحيم.
حبيبة كانت بتبص له وهي قاعده في اخر القاعة وعيونها مليانه حب وفخر.. وهمست "حبيبي" من قلبها.
المحامية سميحه قامت وقفت وهي بتبتسم وقالت لـ حبيبة: الحمد لله كسبنا القضيه.
حبيبة قامت وقفت معاها وبصت للبنتين بغيظ وكأنها بتقولهم حظكم اننا في المحكمة.
رحيم ساب كل اللي حواليه وقرب منها بسرعه وعيونه مش شايفه اي حد غيرها.
قرب منها وسألها بقلق: حبيبة انتي كويسه ؟
البنتين بصوا لـ حبيبة بصدمة لما لقوه بيتكلم معاها فعلا وواضح انه يعرفها.. الخوف بالنسبه لهم الاكبر ان كلامها يطلع صح وتطلع مراته فعلا.
حبيبة بصت للبنتين بطرف عنيها وقربت من رحيم وحطت ايديها في دراعه وكأنها عايزة كل الدنيا تعرف ان هو من حقها هي بس ومش من حق اي بنت غيرها تبصله.. وقالت برقه: اه يا حبيبي كويسه اطمن.
رحيم للحظة اتصدم.. حبيبة بتخاف لو قرب منها او لمسها!! بس هي دلوقتي اللي بتقرب منه وبتحط أيديها في دراعه وكمان بتقوله يا حبيبي!!
وقف يبص لها بدهشة كام لحظة ولما شاف نظرات عيونها بتروح على البنتين اللي قاعدين وكان وشهم اصفر وبيبصوا في الأرض ومتوترين بطريقه غريبه..
رجع بعيونه لـ المحامية سميحه ولقاها بتضحك وبصت علي البنتين وعلى حبيبة وكأنها عايزه تقوله ان حبيبة عايزة تعرف البنتين دول انك جوزها!
رحيم فهم المشهد بسرعه وقال لـ حبيبة بصوت مسموع: يلا يا حبيبتي نمشي إحنا.
وبص لـ المحامية سميحه وقالها: كملوا انتوا باقي الإجراءات ولو في اي حاجة وقفت معاكم كلموني.
ومسك ايد حبيبة وخرجوا من القاعة وهو بيسألها بفضول: ليه مستنتيش في العربية بدل الدوشه اللي في المحكمة ؟
ردت حبيبة بخجل: كنت عايزة أشوفك وانت بتترافع.. مبروك على القضيه.
رحيم ابتسم وسألها بمشاكسه: عجبتك المرافعة بتاعتي؟؟
حبيبة ردت بخجل: اه عجبتني.
وصلوا عند عربية رحيم.. فتح باب العربية وهو بيسألها بأبتسامة: مين عجبك اكتر.. انا ولا المرافعه؟؟
وشها احمر بخجل..
ركبت من غير ما ترد.
رحيم ابتسم بسعادة حقيقيه في قلبه..
وركب جنبها واتحرك بالعربية.
سألها اول لما اتحركوا بالعربية: ايه اللي حصل في الجلسة؟
حبيبة اتوتر وقالت: مفيش.. دول بنتين مستفزين كانوا عمالين يتكلموا.
رحيم ابتسم وقال: واضح انك مضايقه من كلامهم؟
حبيبة بصت له وسألته: هي كل الجلسات بيكون فيها بنات جايين يتسلوا كدا؟
رحيم رد وهو بيكتم ضحكته: معرفش.. انا بخلص الجلسة وامشي على طول.
بصت قدامها وقالت بضيق: احسن برضه.
رحيم ضحك وبعدين سألها: وايه اللي حصل في محل المجوهرات؟؟
ظهر علي وشها ملامح الضيق والحزن وقالت: محصلش حاجة.. بس انا مش عايزة مرات بابا تدخل في اي حاجة تخصني.
رد رحيم ببساطه: خلاص متدخلش في اي حاجة تخصك! اي حد يضايقك نبعده عن حياتنا نهائي.
حبيبة بصت له بحب وابتسمت.. قلبها بينطق وبيقوله مليون بحبك.. بس هي مكسوفه تنطقها.. او يمكن لسه خايفه.
اتكلم رحيم تاني وهو بيبص علي الطريق قدامه: انا هاخدك محل تاني تختاري الشبكة اللي تعجبك.. ومفيش حد هيتدخل في اي حاجة انتي تختاريها.
حبيبة كانت هتعترض وتقوله انها مش عايزة شبكه.. بس افتكرت البنتين اللي كانوا بيعاكسوه في المحكمة.. ودبلة الجواز إللي لازم تكون في ايديها وايده عشان مفيش اي بنت غيرها تبص عليه تاني.
هزت راسها بالايجاب وسكتت.
بعد شويه وصلوا قدام محل مجوهرات.
نزلوا وحبيبة كانت بتفكر في حاجة واحدة بس.. ياترى رحيم هيشتري لنفسه دبلة ويلبسها في ايديه هو كمان؟ ولا هيكون مش مهتم ؟!
دخلوا المحل ورحيم سلم على صاحب المحل وقاله يعرض لهم اجمل حاجة عنده.
قعد هو وحبيبة وهي كانت متوترة وبتهز رجليها بسرعه من غير ما تحس.
رحيم مسك ايديها فجأة وسألها: قلقانه من ايه؟
حبيبة بصت له و ردت بتوتر: مش عارفه!
مسك ايديها بين أيديه وهو بيحاول يطمنها.
صاحب المحل جاب لهم افضل تشكيله عنده.
حبيبة شافت خاتم زواج رقيق جدا وعجبها.. مسكته في ايديها واعجابها كان واضح في نظرة عنيها.
رحيم ابتسم وقال لـ صاحب المحل: هناخد دا.
حبيبة بصت لـ رحيم وابتسمت وقالت بسعادة: شكله عجبني اوي.
رد رحيم: هيبقى أحلى لما تلبسيه.
ابتسمت بخجل وخفضت وشها وهي بتبص علي الخاتم.
اتكلم رحيم مع صاحب المحل: تمام هناخد دا وعايز كمان دبلة رجالي ليا.
حبيبة بصت لـ رحيم ومقدرتش تخفي فرحتها لما طلب دبلة رجالي له هو كمان.
اختار رحيم دبلة رجالي وحبيبة اختارت الخاتم ورفضت تختار حاجة تانيه..
رحيم حاسب وخرجوا من محل المجوهرات وحبيبة فرحانه انه اشترى دبلة لنفسه وهيلبسها.
ركبوا العربية ورحيم قالها بأبتسامة: ايه رأيك نحتفل بمناسبة ان انا كسبت القضية النهاردة ؟
حبيبة هزت راسها بالموافقه وهي حاسه انها بتعيش مع رحيم اجمل واسعد اللحظات في حياتها.
رواية مش حب عادي بقلمي ملك إبراهيم.
في قصر الجبالي.
جوه مكتب الجد مرسي الجبالي.
دخلت رباب وعيونها كانت متورمة من العياط.. وقفت قدام جدها وقالت: طلبتني يا جدي؟
رد جدها وهو بيبص لها: اقعدي يا رباب عايزك.
قعدت قدامه وبعدين عيطت جامد.. وبصت لـ جدها وقالت بصوت عياط مزعج: هو رحيم هيتجوز مراته تاني يا جدي ويعملها فرح؟ مش هو المفروض يتجوزني انا؟
رد جدها: هو دا الموضوع اللي انا عايزك فيه يا رباب.. انتي بتحبي رحيم ابن عمك وعايزه تتجوزيه.. صح؟
ردت رباب بلهفة: ايوه والله يا جدي بحبه اوي..
ورجعت تعيط تاني وكملت: بس هو مش حاسس بيا خالص!
اتكلم جدها: انا اعرف الطريقه اللي تخلي مرات رحيم تمشي من هنا.. وهو يتجوزك انتي.. بس انتي لازم تساعديني ومتعرفيش اي حد.. حتى ابوكي مش عايزه يعرف.
ردت رباب بلهفة: قول يا جدي وانا هعمل كل اللي تقولي عليه.
اتكلم الجد بـ مكر: احنا ملناش دعوة بـ رحيم خالص.. احنا عايزين مراته.. هنسيبه يجهز الفرح بتاعه اللي هو عايزه وكل حاجة تفضل عاديه لحد يوم الفرح.. قبل ما الفرح يبدأ بـ ساعة.. انتي هتدخلي اوضة العروسة وتقوليلها الكلام اللي انا هقولهولك ده.. تقوليه بالحرف يا رباب.. وانا متأكد انها اول لما تسمع الكلام ده منك.. هتسيب الفرح والبيت كله وتمشي من هنا.. وساعتها رحيم هيحتاج عروسة عشان الفرح والناس اللي جت.. انتي اللي هتلبسي الفستان ويبقى فرحك انتي ورحيم.
رباب عيونها لمعت بالحماس واللهفة وقالت: ربنا يخليك ليا يا جدي.. انا هعمل كل اللي هتقولي عليه.. يعني انا اللي هبقى العروسة في الفرح مش حبيبة ؟
اتكلم جدها بضيق منها: وطي صوتك.. بقولك مش عايز اي حد يعرف بـ كلامنا دا.. اسكتي خالص واسمعيني كويس.
رواية مش حب عادي بقلمي ملك إبراهيم.
في شقة والد حبيبة.
نجاة مرات ابو حبيبة كانت قاعده بتغلي وهي بتتكلم بعصبيه: بقى اللي ما تتسمى تعمل فيا انا كدا؟ مفكره ان انا طمعانه فيها وفي فلوس جوزها!! انا اللي غلطانه عشان خايفه عليها.. بكره لما يطلقها ويرموها في الشارع هتعرف ان انا كان عندي حق.
عاطف كان قاعد بيسمع كلام امه وهي عماله تتكلم وتزعق وتتعصب من وقت ما رجعت من مشوارها مع حبيبة.. وبعدين اتكلم ببرود: يعني حبيبة هتطلق إمتى عشان اتجوزها ؟
نجاة بصت لـ ابنها بغضب وصرخت فيه: دا انا لو كنت مخلفه رجل كنبه كانت اتحركت من مكانها عشاني! بقولك حبيبة هزقتني قدام حماتها وخالتها..
وبصت حواليها وسألته بعصبيه: والموكوس ابوها فين؟
رد عاطف: راح عند اخته الغنيه.. ابنها الكبير كلمه وقاله يروحلهم هناك.
نجاة بصت قدامها بتفكير وقالت: ياترى عايزين منه ايه؟ دا اخته دي بخيله هي وجوزها ومش بنعرف نطول منهم حاجة!
وبصت لـ ابنها وزعقت فيه: قوم اعملي كوباية عصير لمون ولا حاجة اروق دمي اللي بيتحرق دا.
عاطف قام بسرعه من قدامها ودخل المطبخ وهو خايف من عصبيتها.
ثواني وسمعت صوت جرس الباب.
اتكلمت نجاة بصوت عالي: تعالى يا زفت افتح.
عاطف مردش عليها.
قامت تفتح الباب وهي مش طايقه حد.
فتحت الباب واتفاجأت بـ سيف المنصوري ابن اخت جوزها!
هي عارفه سيف وعارفه ان هو اللي ماسك شغل والده كله.
اتكلمت بترحاب مبالغ فيه: يا اهلا بـ ابن الغاليه.. بيت خالك نور.
سيف بص لها ببرود ودخل من غير ما يتكلم.. بص حواليه وقال بجمود: خالي مش هنا صح؟
ردت بقلق: الواد عاطف بيقولي ان هو راح عند الست والدتك.
سيف هز راسه وهو بيبص لها وقال بجمود: سيبتي حبيبة في محل المجوهرات ومشيتي ليه؟
نجاة بصت له بصدمة وسألته بقلق: هي حبيبة اشتكت لك ولا ايه؟
وفجأة صوتها اتحول لنبرة ضعيفه وقالت بتمثيل : وحياة غلاوة خالك عندي حبيبة دي انا بحبها كأنها بنتي وو....
قاطعها سيف بـ إشارة من أيديه وطلع من چاكيت البادلة بتاعه علبة وقالها: خدي دي الأول عشان نعرف نتكلم.
نجاة خدت منه العلبة بدهشة وفتحتها..
شهقت بصدمة وفزع وهي بتبص لـ سيف وقالت: دا الطقم الالماظ اللي اختارته لـ حبيبة وهي مردتش تاخده!!
رد سيف ببرود: بقى بتاعك دلوقتي.
نجاة لمست الطقم بـ أيديها وهي مش مصدقه.. بريق الالماظ كان بيلمع جوه عنيها اللي مليانه حقد وطمع..
اتكلم سيف بصوته الحاد وهو بيراقب لهفتها علي الطقم: بس انتي عارفه ان الطقم دا تمنه غالي.
ايديها اتجمدت فوق الطقم وبصت لـ سيف بصدمة وقالت: بس انا مش معايا تمنه.. انت عارف ظروف خالك!.
رد سيف ببرود: الطقم دا مش تمنه فلوس.. تمنه حاجة اغلى بكتير.
نجاة بصت له بفضول..
كمل كلامه وقال: تمنه حبيبة.... بقلمي ملك إبراهيم.
... يتبع
ناوي على ايه يابن المنصوري 
سيف ونجاة والجد مرسي ورباب
والجد مرسي ورباب رحيم وحبيبة هيلاقوها منين ولا منين
واضح ان في مفاجأت كتير هتحصل ليلة الفرح
الخامس عشر من هنا
